Íꞌdóŋá 25

Anzị Kẹ̃tụ́rã ꞌbã tịlé Ịbụrahị́mụ̃ nî rĩ kî

¹ Ịbụrahị́mụ̃ ĩgbã vâ ũkú ãzí rụ́ la Kẹ̃tụ́rã ꞌi. ² Tị ĩꞌdiní anzị ꞌdĩ kî, Zĩmũránĩ ꞌi, Yõkĩtánĩ ꞌi, Mẽdánĩ ꞌi, Mĩdíánĩ ꞌi, Ĩsãbákĩ ꞌi, ãzíla Sụ́ã ꞌi. ³ Yõkĩtánĩ tị Sébã kí Dẽdánĩ be, drị̃lẹ́ Dẽdánĩ drị̂ kí Ãsũrímũ ꞌi, Lẽtũsímũ kî trũ ꞌbá Lẽũmínĩ drị̂ kí abe.

⁴ Anzị Mị̃dị́yánị̃ drị̂ kí Éfã kí Ẽférũ trũ, Hãnókĩ trũ, Ãbídã trũ Ẽlídã abe. ꞌDĩ kí pírí anzị Kẹ̃tụ́rã drị̂ kî.

⁵ Ịbụrahị́mụ̃ fẽ ãko pírí ĩꞌdi trũ adrujó ꞌdĩ kí Ĩsákã drị́. ⁶ Ĩꞌdi drĩ adrujó ídri rĩ sĩ fẽ ãko wókõ anzị ũkú ãzí ĩꞌdidrị́ ꞌdĩ ꞌba drị̂ kí, pẽ dó kí tị ãngũ ị̃tụ̂ ꞌbã ãfũ agâlé ru ngọ́pị̃ Ĩsákã rụ́ ꞌdâ rĩ sĩ álị́.

Drã ãzíla ị̃sị̃ŋá Ịbụrahị́mụ̃ drị̂

⁷ Ịbụrahị́mụ̃ la drã ꞌdĩ ịsụ́ mba dó lọ́lọ́ ílí trũ 175. ⁸ Drã dó ꞌbá ãmbá ru mụ dô sĩ áyị́pịka ũdrãlépi rá rĩ ꞌba rụ̂lé.

⁹ Ngọ́pị̃ Ĩsákã kí Ịsụmaị́lị̃ be ị̃sị̃ kí dó ĩꞌdi ụ̃jị́gọ́ Mãkĩpélã gá, ámvụ́ Mãmírẽ ꞌbã wókõ ị̃tụ̂ ꞌbã agá gâlé ru Ẽfĩrónĩ Zõhárĩ ngọ́pị ꞌbá Hị́tị̃rú rĩ drị̂ agá. ¹⁰ Ĩꞌdi ámvụ́ ándrá Ịbụrahị́mụ̃ ꞌbã ĩgbãlé ꞌbá Hị́tị̃rú rĩ ꞌba drị́ rĩ ꞌi; Ịbụrahị́mụ̃ kí ũkû Sárã ꞌbe ị̃rị̃ trá ị̂sị̃ kí ãngũ ꞌdã gá ꞌdãá.

¹¹ Drã Ịbụrahị́mụ̃ drị̂ ꞌbã ũngúkú gá, Ãdróŋá wi sụ̃sụ́ ngọ́pị̃ Ĩsákã nî, ĩꞌdi ꞌbã uꞌá agá ãni rú “Kídí ꞌbá ídri ãma ndrelépi cé rĩ drị̂ tị gá” (Bẹ̃rị̃láị̃-rọ́ị̃).

Ịsụmaị́lị̃ ꞌbã drị̃lẹ́ kî

¹² Ịsụmaị́lị̃ ũkú Ịbụrahị́mụ̃ drị́ Sárã ꞌbã ãtíꞌbóru Mị̃sị́rị̃ ízóru Hãgárị̃ ꞌbã tịlé rĩ ꞌbã drị̃lẹ́ kí ꞌdĩ. ¹³ Drị̃lẹ́ Ịsụmaị́lị̃ drị̂ kí kî tịŋá vú sĩ; ngọ́tị́ drị̃drị̃ rĩ Nẽbãyótĩ ꞌi, Kẽdárĩ ꞌi, Ãdị̃bẹ́lị̃ ꞌi, Mĩsĩpãsámũ ꞌi, ¹⁴ Mísíma ꞌi, Dúmã ꞌi, Másã ꞌi, ¹⁵ Hãdádĩ ꞌi, Témã ꞌi, Yẹ̃tụ́rị̃ ꞌi, Náfĩsĩ ꞌi ãzíla Kẽdémã ꞌi. ¹⁶ ꞌDĩ kí áꞌbị́-anzị mụdrị́ drị̃ ị̃rị̃ rụ́ ũsĩlé sụ́rụ́ ãzíla tọ̃rọ́mẹ́ ĩꞌbadrị̂ kí vú sĩ ãzíla ãngũ ĩꞌbã kí sĩ urijó rĩ abe. ¹⁷ Ílí Ịsụmaị́lị̃ ꞌbã uꞌájó ídrirú rĩ ĩꞌdi 137 drã dó ĩndõ.

¹⁸ Drị̃lẹ́ Ịsụmaị́lị̃ drị́ ꞌdĩ uꞌá kí ãngũ drĩdríŋĩ Hãvílã ꞌba drị́ Sụ́rị̃ be rĩ gá Mị̃sị́rị̃ ꞌbã wókõ ị̃tụ̂ ꞌbã agâ gá mụ agá Ãsụ́rị́ã gâlé ru. Rĩ kí uꞌálé ádrị́pịka Ịbụrahị́mụ̃ ꞌbã drị̃lẹ́ ru ãzí ꞌdĩ abe ndú-ndú.

Tịŋá Ị́sãwụ̃ ꞌba drị́ Yãkóꞌbõ be rĩ

¹⁹ ꞌDĩ ãwí anzị Ĩsákã Ịbụrahị́mụ̃ ngọ́pịka ꞌba drị́ rĩ. ²⁰ Ĩsákã ĩgbã Rẽbékã Bẹ̃tụ́ẹ́lị̃ ị̃zẹ́pị Lãbánĩ ꞌbã ámvọ́pị ꞌi angájó Pãdánĩ Ãrámũ gá ũkúru ꞌdĩ sĩ ílí ca dó kãlị́ sụ́. ²¹ Rẽbékã la mụ tịlé ku Ĩsákã ãꞌị̃ Ãdróŋá ĩꞌdinî. Ãdróŋá umvi ĩꞌdi ꞌbã ãꞌị̃ŋá (zịtáŋá) rá, Rẽbékã ịsụ́ ꞌa. ²² Anzị ãꞌbã kíru ị̃rị̃, kíru co agâlé útĩ drĩ kí ku rú. Jọ, “Ãꞌdu laru ꞌe áma ụrụꞌbá gá íni nĩ?” Zị Ãdróŋá ị́jọ́ la sĩ.

²³ Ãdróŋá jọ ĩꞌdiní, “Sụ́rụ́ ị̃rị̃ kí ími ꞌa gá nĩ, mirú ꞌbá kí ãwụ̃ ị̃rị̃, kíru awa ndú-ndú angájó ími agá ꞌdâ. Sụ́rụ́ ãlu rĩ la adru ũkpó trũ ĩꞌdi ãzí rĩ ndẽ rá. Ngọ́tị́ kãyú rĩ larú adru vúlé rĩ pálé gá.”

²⁴ Ụ́ꞌdụ́ ĩꞌdi ꞌbã tĩjó rĩ la mụ calé ꞌbo, ãwụ̃ anzị ãgọbị kí ị̃rị̃. ²⁵ Kãyú rĩ íní la ikarú ꞌbíko trũ jĩnã, úꞌda rụ́ la Ị́sãwụ̃ ꞌi. ²⁶ Vúlé rĩ ãfũ rụ ádrị́pị̃ ꞌbã ĩníŋá cí, ꞌda rụ́ la Yãkóꞌbõ ꞌi. ꞌDĩ sĩ Ĩsákã ílí ca dó kãlị́ ázíyá ũkû la anzị ꞌdĩ kí tĩjó rĩ sĩ.

²⁷ Anzị zo kí dó rá, Ị́sãwụ̃ acá dó ãlị́gọ́ dora gbẹlépi rĩrú ꞌbé ãmvé, Yãkóꞌbõ ꞌbãngá ị̃gbẹ́ ꞌbá uꞌálépi lị́cọ́ gá la. ²⁸ Ĩsákã lẽ ꞌbãngá Ị́sãwụ̃ ꞌi ĩzá ásé agá rĩ ꞌbã ãjị́ sĩ, wó Rẽbékã lẽ ꞌbãngá Yãkóꞌbõ ꞌi.

²⁹ Ụ́ꞌdụ́ ãlu Yãkóꞌbõ la lõpérẽté aꞌdí agá kaị́kọ́ sĩ, Ị́sãwụ̃ angá dora gá ãbị́rị́ ndẽ ĩꞌdi káyĩ, ³⁰ Jọ Yãkóꞌbõní, “Gbõrú, mí ãfẽ mání lõpérẽté ika ꞌdĩ ꞌi! Má ukó rá.” (ꞌDĩ bãsĩ ĩꞌdi umvejó Édõmũ ꞌi ꞌdĩ.)

³¹ Yãkóꞌbõ umvi, “Ma míní fẽ la rá, ídrĩ ị́jọ́ míní mî adrujó kãyú rĩ fẽ mánî rĩ gá.”

³² Ị́sãwụ̃ jọ, “Múké ma úgólé drãlé drã, mâ adrujó ꞌbá kãyú rĩ mání mũkẽ íngõ idé yã?”

³³ Yãkóꞌbõ jọ, “Ína ũyõrú ị́jọ́ mî adrujó kãyú rĩ mi fẽ la mání ráká.” Ị́sãwụ̃ na dó sĩ ũyõ fẽ dó ị́jọ́ kãyú drị̂ Yãkóꞌbõ drị́. ³⁴ Yãkóꞌbõ fẽ dó ĩꞌdiní íná lõpérẽté sĩ. Na dó, mvu dó, inga dóru mụlé rá. ꞌDĩ dó bãsĩ ị́jọ́ Ị́sãwụ̃ ꞌbã kãyú ĩꞌdidrị̂ ꞌbãjó áváŋáru rĩ.