Íꞌdóŋá 23

Sárã drã rá ãzíla Ịbụrahị́mụ̃ ĩgbã ãngũ ĩꞌdi ị̃sị̃jó

¹ Sárã uꞌá ụ̃nọ́kụ́ drị̃ gá ꞌdâ ílí túrú ãlu kãlị́ ị̃rị̃ drị̃ ázị̂rị̃. ² Drã Hẽbũrónĩ gá ꞌdĩ ãngũ Kãnánĩ drị̂ agá ãzíla Ịbụrahị́mụ̃ awá ĩꞌdi ꞌbã drã ꞌdãá.

³ Ịbụrahị́mụ̃ aꞌbe ãvũ ũkû drị̂ vụ̃rụ́ ꞌdãá, mụ ꞌbá Hị́tị̃rú ꞌdĩ ꞌba rụ́ jọ, ⁴ “Ma uꞌálépi ĩmi abe ꞌdĩ ma mâ ngá ãmị́yọ́ŋá; ĩmi ị̃tụ̃ndã mání ãngũ ãzí mání sĩ icójó mâ ũkû ị̃sị̃jó.”

⁵ Umvi kí, ⁶ “Mí are ị́jọ́ ãma tị gá rĩ, ãmbógó. Ãma ími ndre drị̃lẹ́ ãzí ũkpó larú; mí ị̃sị̃ mî ũkû ꞌbụ́ ãzí ũnĩ-ambamba ãndânĩ ãmadrị̂ agá. ꞌBá cí ãma drĩdríŋĩ gá ꞌdâ la icó míní ꞌbụ́ fẽjó rá mî sĩ mî ũkû ị̃sị̃ ala gá ꞌdãá. Ãma icó míní ugalé la ku.”

⁷ Ịbụrahị́mụ̃ ilú drị̃ vụ̃rụ́ kí drị̃lẹ́ gá, ⁸ jọ, “Ĩdrĩ ãꞌị̃ mání ásị́ pírí sĩ mâ ũkû ị̃sị̃jó ꞌdâ yã áni, ĩzị Zõhárĩ ngọ́pị Ẽfĩrónĩ ꞌi ⁹ mání ꞌbụ́ Mãkĩpélã adrulépi ĩꞌdidrị́ ámvụ́ tị gá rĩ ị̃tụ̃ndãjó. Ĩzị ĩꞌdi mání ãngũ ꞌdĩ ị̃tụ̃ndãjó ãjẹ̃ ãngũ lê drị̂ sĩ pírí ĩminí adru agá cí ꞌdâ ꞌdĩ, ĩꞌdi dô sĩ adru má ãni larú ãngũ mâ sĩ ꞌbá ị̃sị̃jó rĩrú.”

¹⁰ Ẽfĩrónĩ ãmgbã rĩ ãngũ ꞌbá ꞌbaníru trajó rĩ gá ꞌbá Hị́tị̃rú ꞌdã abe ĩndĩ; umvi ꞌbá pírí ꞌdãá ꞌdĩ kí drị̃ gâ sĩ; ¹¹ “Mí are ãmbógó; ma míní ãngũ ámvụ́ru ꞌdã fẽ pírí ꞌbụ́ ala gá rĩ trũ. ꞌBá má drị́ ꞌdĩ kí drị̃ gâ sĩ ma ãngũ ꞌdĩ fẽ míní, mi dô sĩ mî ũkû ị̃sị̃.”

¹² Ịbụrahị́mụ̃ ilú drị̃ vụ̃rụ́ ꞌbá Hị́tị̃rú ꞌdĩ kí drị̃lẹ́ gá ị̃dị́ ¹³ jọ Ẽfĩrónĩní ꞌbá pírí ꞌdãá ꞌda kí drị̃ gâ sĩ, “Má aꞌị́ mí drị́ ãma arejó. Ma ãngũ ꞌdĩ ĩgbã pírí. Mí ãꞌị̃ ũfẽŋá mání lẽlé ũfẽlé ꞌdĩ ꞌi, ma dô sĩ mâ ũkû ị̃sị̃ ꞌdãá.”

¹⁴ Ẽfĩrónĩ umvi Ịbụrahị́mụ̃ ꞌi jọ, ¹⁵ “Ãmbógó má drị̂, ãngũ ꞌdĩ lu sĩlíngĩ túrú sụ, wó ꞌdĩ la ãma drĩdríŋĩ gá ꞌdâ ãꞌdu idé? Mí ị̃sị̃ mî ũkû ꞌi.”

¹⁶ Ịbụrahị́mụ̃ ãꞌị̃ ị́jọ́ Ẽfĩrónĩ drị̂ kí rá ãzíla ụ̃ꞌbị̃ séndẽ tá ĩꞌdiní lẽlé ꞌdã ꞌi ũꞌbí kí drị̃ gâ sĩ: sĩlíngĩ túrú sụ ꞌdĩ ãko séndẽ ụ̃ꞌbị̃jó ꞌbá tũjárĩ idélépi sáwã ꞌdã sĩ rĩ ꞌba drị̂ sĩ.

¹⁷ Ị́jọ́ ꞌdĩ sĩ, ãngũ Ẽfĩrónĩ drị́ Mãmírẽ andre gá Mãkĩpélã ꞌi ámvụ́ kí ꞌbụ́ ala gá rĩ trũ ãzíla ife pírí ala gá ꞌdãá rĩ kî trũ acá kî dó Ịbụrahị́mụ̃ ꞌbã ãko rú. ¹⁸ ꞌBá pírí Hị́tị̃rú traŋá ꞌdã gá ꞌdãá ꞌdĩ nị̃ kí tọndọlọ ãngũ ꞌdã dó Ịbụrahị́mụ̃ ꞌbã ãko rú.

¹⁹ ꞌDã ꞌbã vúlé gá Ịbụrahị́mụ̃ ị̃sị̃ dó ũkû Sárã ꞌi ꞌbụ́ ãngũ Kãnánĩ drị̂ agá ꞌdãá. ²⁰ Ị́jọ́ ꞌdĩ sĩ, ámvụ́ ándrá ꞌbá Hị́tị̃rú ꞌdĩ ꞌbã ãni ãzíla ꞌbụ́ ala gá rĩ trũ rĩ acá kí ãko Ịbụrahị́mụ̃ ãni larú ꞌbá ị̃sị̃jó.