Íꞌdóŋá 22

Ãdróŋá jọ Ịbụrahị́mụ̃ ꞌbã fẽ Ĩsákã ꞌi uwiŋáru

¹ Ụ́ꞌdụ́ ãzí ãlu Ãdróŋá ụ̃ꞌbị̃ Ịbụrahị́mụ̃ ꞌi; umve ĩꞌdi, “Ịbụrahị́mụ̃!” Ịbụrahị́mụ̃ ãꞌị̃, “Wõyí, ma ꞌdõ!”

² Ãdróŋá jọ, “Íꞌdụ mî ngọ́pị mî lẽlé ambamba Ĩsákã ꞌi, ímụ trũ ãngũ Mọ̃rị́yã gá. ꞌBé mâ mụlé lũlé míní rĩ ꞌbã drị̃ gá, ífẽ ĩꞌdi mání uwiŋáru.”

³ Ụ̃ꞌbụ́tịnị́nị́ ụ́ꞌdụ́ ãzí rĩ sĩ Ịbụrahị́mụ̃ ũnũ ijijá ídétáŋâní, ꞌbã kí kãyĩnõ ĩꞌdidrị̂ drị̃ gá, ãzíla ꞌdụ Ĩsákã kí ãtíꞌbó ị̃rị̃ abe. Mụ kî dó ãngũ ándrá Ãdróŋá ꞌbã lũlé ĩꞌdinî rĩ gá. ⁴ Ụ́ꞌdụ́ na la sĩ Ịbụrahị́mụ̃ ndre dó ãngũ ꞌi álị́ ꞌdáni. ⁵ Jọ dó ãtíꞌbó ị̃rị̃ ꞌdĩ ꞌbaní, “Ĩmi adru kãyĩnõ ꞌdĩ trũ ꞌdâ. Ãma mụ mgbâ be Ãdróŋá ị̃nzị̃lé lé, ꞌdã ꞌbã ũngúkú gá ãma dó ãgõ vúlé ĩmi rụ́ ꞌdõlé ĩndõ.”

⁶ Ịbụrahị́mụ̃ fẽ Ĩsákã ꞌdụ ijijá uwiŋá drị̂ kí nĩ ãzíla ꞌdụ ĩꞌdidrị̂ sĩ ménéŋá kí ásé ãcí ꞌbã sĩ akójó rĩ abe. ⁷ Ĩꞌbaní mụ agá ãlu ꞌdĩ gá ꞌdâ, Ĩsákã umve átẹ́pị̃ ꞌi, “Mâ átẹ́pị!” Ãꞌị̃, “Wõyí, mâ ngọ́pị!” Ĩsákã zị ĩꞌdi, “Ándre íꞌdụ ꞌbãngá ijijá kí ásé ãcí sĩ akójó rĩ abe rá, wó kãbĩlõ mvá uwiŋá idéjó rĩ íngõlé yã?”

⁸ Ịbụrahị́mụ̃ umvi ĩꞌdiní, “Ãdróŋá ꞌbã ãmgbã la kãbĩlõ mvâ fẽ rá.”

⁹ Kî dó mụ calé ãngũ Ãdróŋá ꞌbã ị́jọ́ la jọjó ĩꞌdiní rĩ gá ꞌbo, Ịbụrahị́mụ̃ sị ãngũ uwiŋá idéjó rĩ ãzíla ũꞌbã ijijá drị̃ la gá. Umbé ngọ́pị̃ ꞌi, ꞌbã ĩꞌdi ãngũ uwiŋá idéjó rĩ drị̃ gá. ¹⁰ ꞌDã ꞌbã ũngúkú gá anzé dó ménéŋá rãwũ ĩꞌdi ꞌdịjó. ¹¹ Wó mãlãyíkã Ãdróŋá drị̂ umve ĩꞌdi angájó ꞌbụ̃ gâlé, “Ịbụrahị́mụ̃! Ịbụrahị́mụ̃!” Ãꞌị̃, “Wõyí, ma ꞌdõ.”

¹² Mãlãyíkã jọ, “Ị́ꞌdị mgbâ ku jõku mí idé ãko ãzí ụrụꞌbá la gá ku. Ánị̃ dó ãndrũ íru mî Ãdróŋá rá rĩ rá ãꞌdusĩku mí uga mî ngọ́pị lú ãlu ꞌdĩ ĩꞌdiní ku.”

¹³ Ịbụrahị́mụ̃ undré ãngũ ĩꞌdi andre gá ꞌdãá ndre kãbĩlõ ágó újé la gĩ mị̃rị́ agá. Mụ ĩꞌdi aꞌdụ́lé ãzíla fẽ ĩꞌdi uwiŋá ivélé ivê rĩrú ngọ́pị̃ ꞌbã kẹ̃jị́ gá. ¹⁴ Ịbụrahị́mụ̃ ꞌda ãngũ ꞌdã ꞌbã rụ́, “Ãdróŋá fẽnĩ ꞌi.” Ãzíla kpere ãndrũ ꞌbá kí jọ la, “ꞌBé Ãdróŋá drị̂ drị̃ gá ĩꞌdi fẽ la rá.”

¹⁵ Mãlãyíkã Ãdróŋá drị̂ umve Ịbụrahị́mụ̃ angájó ꞌbụ̃ gâlé pâlékó ị̃rị̃ la sĩ ị̃dị́. ¹⁶ Ãdróŋá jọ, “Ána ũyõ áma mgbã rĩ ꞌbã rụ́ sĩ ꞌdĩ áni, marú míní sụ̃sụ́ wi ãmbógóru. Ãꞌdusĩku mí idé ị́jọ́ ꞌdĩ ꞌi ãzíla mí uga mî ngọ́pị kílímgbí ꞌdĩ mání ku. ¹⁷ Ána ũyõ ma míní drị̃lẹ́ kí fẽ wẽwẽ rú cécé lẽlẽgó ụrụ gá rĩ kî áni jõku cínákí mĩrĩ tị gá rĩ áni. Mî drị̃lẹ́ kírú ĩꞌbã mẹ́rọ́ꞌbá kí drị̃ arụ́ cí. ¹⁸ Sụ́rụ́ pírí kírú áma zị ĩꞌbaní sụ̃sụ́ wijó cécé mâ fẽlé mî drị̃lẹ́ ꞌbanî rĩ áni ãꞌdusĩku ímba ãzị́táŋá má drị̂ kí tã rá.” ¹⁹ Ịbụrahị́mụ̃ uja dóru vúlé ãtíꞌbó ꞌba rụ̂lé uja kî dóru Bẹ̃rị̃sẹ́bã, ãngũ Ịbụrahị́mụ̃ní jó ĩꞌdidrị̂ kí sịjó rĩ gá.

Anzị Nãhọ́rị̃ drị̂ kî

²⁰ Ụ́ꞌdụ́ ãzí vúlé gá Ịbụrahị́mụ̃ are ádrị́pị̃ Nãhọ́rị̃ní Mílĩkã tị anzị kí ãrõ: ²¹ Ụ́zị̃ ngọ́tị́ kãjãní rĩ, ꞌBụ́zị̃ ádrị́pị̃ ꞌi, Ãrámũ átẹ́pị Kẹ̃mụ́ẹ́lị̃ ꞌi, ²² Cẽsédĩ ꞌi, Házõ ꞌi, Pĩlĩdásĩ ꞌi, Jĩdĩláfĩ ꞌi, ãzíla Rẽbékã átẹ́pị Bẹ̃tụ́ẹ́lị̃ ꞌi. ²³ Mílĩkã tị anzị ãgọbị ãrõ ꞌdĩ kí Ịbụrahị́mụ̃ ꞌbã ádrị́pị Nãhọ́rị̃ nî. ²⁴ Rú mã ĩzóŋá ãtíꞌbóru ĩꞌdidrị́ ꞌdãá rĩ tị Tébã ꞌi, Gãhámụ̃ ꞌi, Tãhásĩ ꞌi ãzíla Mákã ꞌi.