Íꞌdóŋá 21

Tịŋá Ĩsákã drị̂

¹ Ãdróŋá wi sụ̃sụ́ Sárãní ĩꞌdi ꞌbã ándrá cécé jọlé rĩ áni. ² Sárã ịsụ́ ꞌa tị Ịbụrahị́mụ̃ní ngọ́tị́ ágọ́bị́ ụ́ꞌdụ́ ĩꞌdi ꞌbã adrujó ĩdránígó ru rĩ sĩ. Ụ́tị mgbâ cé ụ́ꞌdụ́ Ãdróŋá ꞌbã jọlé ála ĩꞌdi tị rĩ sĩ. ³ Ịbụrahị́mụ̃ ꞌda ngọ́tị̂ rụ́ Ĩsákã ꞌi, ⁴ Ĩsákã ụ́ꞌdụ́ la mụ calé ãrõ ꞌbo, Ịbụrahị́mụ̃ ĩtãrã ĩꞌdi rá cécé Ãdróŋá ꞌbã azịlé rĩ áni. ⁵ Ịbụrahị́mụ̃ ụ́ꞌdụ́ ꞌdã sĩ ílí la ca túrú ãlu sáwã ꞌbání Ĩsákã tịjó rĩ sĩ. ⁶ Sárã jọ, “Ãdróŋá ají mání ãyĩkõ ꞌbo! ꞌBá pírí ị́jọ́ ꞌdĩ arelépi rá ꞌdĩ kí dó gụ má trũ.” ⁷ Jọ vâ, “Ãꞌdi icó tátí jọlé la ma Sárã ꞌi má icó tá ngọ́tị́ tịlé Ịbụrahị́mụ̃ní rá rĩ gá nĩ? Wó átị ĩꞌdiní ngọ́tị́ ágọ́bị́ sáwã ĩꞌdi ꞌbã dejó ꞌbo rĩ gá ꞌdâ rá.”

⁸ Ụ́ꞌdụ́ ngọ́tị̂ tị nzejó ĩbã gá rĩ sĩ, Ịbụrahị́mụ̃ ꞌbã ụ̃mụ̃ ãmbógó tẽté la.

Hãgárị̃ kí drojó Ịsụmaị́lị̃ be ãmvé rĩ

⁹ Ụ́ꞌdụ́ ãlu Ịsụmaị́lị̃ Hãgárị̃ Mị̃sị́rị̃rú rĩ ꞌbã tịlé Ịbụrahị́mụ̃ nî rĩ kí avâ gá Sárã ngọ́pị Ĩsákã be. ¹⁰ Sárã ndre kí ãzíla jọ Ịbụrahị́mụ̃ní, “Ípẽ ĩzóŋá ãtíꞌbóru ꞌdĩ kí tị ngọ́pị̃ be ꞌdâ rá. Lẽ ũkú ꞌdĩ ꞌbã ngọ́pị ꞌba ịsụ́ ãko ãzí mí drị́ mâ ngọ́pị ꞌbã ꞌdụlé rĩ kí agá ku.” ¹¹ Ị́jọ́ ꞌdĩ fẽ Ịbụrahị́mụ̃ ásị́ gá ũcõgõ ãmbógó la ãꞌdusĩku Ịsụmaị́lị̃ la vâ adrujó ĩꞌdi ꞌbã ngọ́tị́ŋá rĩ sĩ. ¹² Wó Ãdróŋá jọ Ịbụrahị́mụ̃ní, “Mí adru mgbá ꞌdĩ sĩ ãzíla ĩzóŋá ãtíꞌbóru Hãgárị̃ sĩ ụ̃rị̃ sĩ ku. Mí idé ị́jọ́ Sárã ꞌbã jọlé míní rĩ, ãꞌdusĩku ũyõ mâ nalé mi adru drị̃lẹ́ kî trũ rĩ la adru Ĩsákã rụ̂ sĩ. ¹³ Ma vâ drị̃lẹ́ kí fẽ Hãgárị̃ ꞌdĩ ꞌbã ngọ́pị nî, kî sĩ acá sụ́rụ́ trũ ãꞌdusĩku ĩꞌdi vâ mî ngọ́tị́.”

¹⁴ Ịbụrahị́mụ̃ angá ụ̃ꞌbụ́tị ụ́ꞌdụ́ ãzí rĩ drị̂ sĩ fẽ Hãgárị̃ní íná ãzíla ị̃yị́. ꞌBã ngọ́tị́ŋâ ũngúkú la gá, pẽ dó tị la mụlé. Mụ dó rá ãzíla rĩ abálé ãngũ ásé ꞌarú Bẹ̃rị̃sẹ́bã drị̂ agá. ¹⁵ Ị̃yị̂ la mụ ukólé pírí ꞌbo, aꞌbe ngọ́tị́ŋâ mị̃rị́ ãzí agá ¹⁶ ãzíla rĩ drĩdríŋĩ mítã túrú ãlu ꞌdĩpí iꞌdójó ngọ́pị̃ rụ̂lé. Jọ cénĩ-cénĩrú, “Má icó mâ ngọ́tị̂ ꞌbã drãŋá talé ku.” Ĩꞌdi ꞌbã ri agá ꞌdãá iꞌdó awálé.

¹⁷ Ãdróŋá are mgbâ ꞌbã awá agá, jọ ị́jọ́ angájó ꞌbụ̃ gâlé Hãgárị̃ be, “Ãꞌdu fẽ míní ũcõgõ nĩ, Hãgárị̃? Mí idé ụ̃rị̃ sĩ ku. Má are mgbâ ꞌbã áwáŋá rá. ¹⁸ Mí angá ụrụ gá, ímụ mgbâ aꞌdụ́lé ãzíla mí ũmĩ ásị́ la. Ma sụ́rụ́ ãmbógó la ꞌbã ĩꞌdi ꞌbã drị̃lẹ́ ꞌba rụ̂ sĩ.” ¹⁹ ꞌDã ꞌbã ũngúkú gá Ãdróŋá fẽ mịfị́ la nzị̃ru, ndre dô sĩ kídí ãzí. Mụ ị̃yị́ ãtõlé íníríkó ị̃yị́ drị̂ agá ãzíla fẽ ĩꞌdi mvụlé mgbâ nî. ²⁰ Mgbâ ꞌbã zo gá Ãdróŋá rĩ adrulé ĩꞌdi be; rĩ uꞌálé ãngũ Pãránĩ gá ãzíla acá ãlị́gọ́ dora gbẹlépi larú. ²¹ Ãndrẽ ĩgbã ĩꞌdiní ũkú Mị̃sị́rị̃ ízóru la.

Tị icíma Ịbụrahị́mụ̃ kí drĩdríŋĩ gá Ãbị̃mẹ́lẹ̃kị̃ be rĩ

²² Ụ́ꞌdụ́ ꞌdã sĩ Ãbị̃mẹ́lẹ̃kị̃ kí ãmbógó ĩꞌdidrị́ ãsĩkárĩ drị́ Pĩkólĩ be jọ kí Ịbụrahị́mụ̃ní, “Ánị̃ rá Ãdróŋá ĩꞌdi mí be cí ãko pírí mî idélé rĩ kí agá. ²³ Úꞌdîꞌda lẽ ína ũyõrú Ãdróŋá drị̃lẹ́ gá mí icó áma ulélé ku, jõku mâ anzịŋá kí ãzíla mâ drị̃lẹ́ kî trũ. Mí iꞌda mání sụ́rụ́ mî mụjó uꞌájó ala gá ãmị́yọ́ŋáru rĩ, íwi mání sụ̃sụ́ cécé mâ idélé míní rĩ áni.” ²⁴ Ịbụrahị́mụ̃ jọ, “Ána ũyõ rá.” ²⁵ Ịbụrahị́mụ̃ unu Ãbị̃mẹ́lẹ̃kị̃ drị̃lẹ́ gá kídí ụ̃pị́gọ́ŋá ĩꞌdidrị̂ ꞌbã kí pajó la rá rĩ sĩ. ²⁶ Wó Ãbị̃mẹ́lẹ̃kị̃ jọ, “Ánị̃ ãꞌdi idé ị́jọ́ ꞌdĩ nĩ yã rĩ ku. Ílũ vâ mání ị́jọ́ ꞌdĩ ku, drĩ gápi mâ arelé ími tị gá ãndrũ ꞌdĩ.” ²⁷ Ịbụrahị́mụ̃ ají kãbĩlõ ãzíla tị́. ꞌBá ị̃rị̃ ꞌdĩ icí kí dó tị rá. ²⁸ Ịbụrahị́mụ̃ uya kãbĩlõ ĩꞌdidrị́ ũꞌbí rĩ kí agá kãbĩlõ mvá ãrónĩ la kí ázị̂rị̃. ²⁹ Ãbị̃mẹ́lẹ̃kị̃ zị Ịbụrahị́mụ̃ ꞌi, “Mí uya kãbĩlõ mvá ázị̂rị̃ ꞌdĩ kí ífí la íngoní yã?” ³⁰ Ịbụrahị́mụ̃ umvi ĩꞌdiní, “Mí ãꞌị̃ kãbĩlõ ázị̂rị̃ ꞌdĩ kí áma drị́ gá ꞌdâ icéjó la ága kídí ꞌdĩ ma ꞌi.” ³¹ Ãngũ ꞌdã ála dô sĩ ĩꞌdi umve Bẹ̃rị̃sẹ́bã ꞌi ãꞌdusĩku ãgọbị ị̃rị̃ ꞌdĩ icí kí tị ꞌdãá. ³² Tị icíma Bẹ̃rị̃sẹ́bã gá ꞌdã vúlé gá, Ãbị̃mẹ́lẹ̃kị̃ kí ãsĩkárĩ ãmbógó ĩꞌdidrị́ Pĩkólĩ be uja kíru mụlé ãngũ Fị̃lị̃sị̃tị́nị̃ gá. ³³ Ịbụrahị́mụ̃ sa ife ị́tị́ru la Bẹ̃rị̃sẹ́bã gá ꞌdãá, umve Ãdróŋá rụ́ ꞌdãá Úpí jã ꞌdâ rĩ. ³⁴ Ịbụrahị́mụ̃ uꞌá ãngũ Fị̃lị̃sị̃tị́nị̃ drị̂ gá ụ́ꞌdụ́ ãzorú.