Íꞌdóŋá 20

Ịbụrahị́mụ̃ kí Ãbị̃mẹ́lẹ̃kị̃ be

¹ Ịbụrahị́mụ̃ mụ dó ándrálé Nẹ̃gẹ́vụ̃ gá rĩ dó drĩdríŋĩ Kãdésĩ ꞌbã ãni Sụ́rị̃ be rĩ gá umvelé Gérã ꞌi rĩ. ² Ịbụrahị́mụ̃ jọ ꞌbá ꞌdãá rĩ ꞌbaní Sárã ĩꞌdi ꞌbã ũkû ĩꞌdi ꞌî ámvọ́pị ꞌi. Úpí Ãbị̃mẹ́lẹ̃kị̃ pẽ ꞌbá tị ají Sárãꞌírụ́ ꞌdõlé. ³ Ị́nị́ ãlu Ãdróŋá iꞌdaru ĩꞌdiní gẹ̃rị̃ urobí agâ sĩ jọ ĩꞌdinî, “Mi mụ drãlé rá mî ũkú ꞌdĩ ꞌdụjó rĩ sĩ, ĩꞌdi ꞌbá ãzí ĩgbãlé rá la (ágô trũ).” ⁴ Wó íni ꞌdĩ Ãbị̃mẹ́lẹ̃kị̃ ikaru ĩꞌdi be ku. Jọ, “Ãdróŋá ma mâ ngá ị́jộ kóru! Mi dó ãma ụꞌdị́ ꞌbá má drị̂ kí abe pírí yã? ⁵ Ịbụrahị́mụ̃ jọ mání ĩꞌdi ꞌî ámvọ́pị ꞌi, ãzíla ĩꞌdi ꞌbã mgbã jọ vâ ĩꞌdi ꞌî ádrị́pị ꞌi. Má idé ị́jọ́ ꞌdĩ mâ nị̃jó la ku rĩ sĩ, mâ ũnzĩ ꞌdáyụ.” ⁶ Ãdróŋá umvi ĩꞌdiní gẹ̃rị̃ urobí agâ sĩ, “Ãndá ãndáru mí idé ị́jọ́ ꞌdĩ ꞌi mî nị̃jó la ku rĩ sĩ. Má atrị mi ị́jọ́ ũnzí idéjó mâ ụrụꞌbá gâ sĩ rá, ãzíla má ãꞌị̃ míní ĩꞌdi alójó ãluŋá la ku. ⁷ Wó úꞌdîꞌda ífẽ ũkú ꞌdĩ ágô drị̂lé vúlé. Ĩꞌdi nábị̃, ĩꞌdi míní Ãdróŋá ãꞌị̃ mi dô sĩ adru ídri, wó ídrĩ mí ngá ĩꞌdi uja ágô drị̂lé ku, mi ꞌi ãzíla ꞌbá mídrị̂ abe ĩmi ũdrã rá.” ⁸ Ụ̃ꞌbụ́tịnị́nị́ Ãbị̃mẹ́lẹ̃kị̃ umve ãtíꞌbó ĩꞌdidrị̂ kí ũlũ ĩꞌbaní ị́jọ́ru idélépi ĩꞌdi rụ́ rĩ kí rá, uja kí dó idélé ụ̃rị̃ sĩ. ⁹ ꞌBo Ãbị̃mẹ́lẹ̃kị̃ umve Ịbụrahị́mụ̃ ꞌi zị ĩꞌdi, “Mí idé dó ãma íni ãꞌdu sĩ? Ị́jọ́ ũnzí mâ idélé ími ụrụꞌbá gá rĩ ãꞌdu mî sĩ lẽjó andre ũnzĩ ajíjó áma drị̃ gá sụ́rụ́ má drị̂ abe rĩ? Ị́jọ́ ꞌdĩ tátí mî lẽlé icólé idélé mání ku la. ¹⁰ Ịbụrahị́mụ̃ mí idé dó ãma íni ãꞌdu sĩ?” ¹¹ Ịbụrahị́mụ̃ umvi, “Má ũrã mâ ngá ꞌbá ãzí ãngũ ꞌdĩ gá ꞌdâ Ãdróŋá rulépi la ãluŋá la ꞌdáyụ, ị́jọ́ ꞌdĩ sĩ kí áma ꞌdị sĩ mâ ũkû ꞌdụjó rá. ¹² Ĩꞌdi ábí ꞌbãngá mâ ámvọ́pị mgbã la. Ĩꞌdi mâ ụ́kụ́pị ꞌbã ị̃zẹ́pị, wó adru mâ ãndrẽ ãni ku, má ĩgbã dô sĩ ĩꞌdi rá.” ¹³ Ãdróŋá dó mụ áma anzélé mâ átẹ́pị drị́ko gâlé mụjó ãmị́yọ́ŋá ꞌbã ãngũ gá, ájọ dó ĩꞌdiní, “Mi dó ílẽ ma rá rĩ iꞌda mî jọjó la ꞌbá pírí ꞌbaní ma mî ádrị́pị rĩ sĩ.” ¹⁴ Ãbị̃mẹ́lẹ̃kị̃ fẽ Sárã Ịbụrahị́mụ̃ ꞌbã ũkû vúlé, ãzíla fẽ vâ ĩꞌdiní kãbĩlõ, tị́ ãzíla ãtíꞌbó kî trũ. ¹⁵ Jọ Ịbụrahị́mụ̃ní, “Ãngũ ꞌdĩ pírí má drị̂, mí uꞌá wókõ pírí ími ásị́ ꞌbã lẽlé rĩ agá.” ¹⁶ Jọ Sárãní, “Ma mî ádrị́pịní sĩlíngĩ fẽ ífí álĩfũ ãlu iꞌdajó la ꞌbá mídrị̂ ꞌbaní ãndá ãndáru mi ị́jộ kóru, ꞌbá pírí kí dô sĩ nị̃ la mí idé ị́jọ́ ũnzí ku.” ¹⁷ Ịbụrahị́mụ̃ ãꞌị̃ dó Ãdróŋá úpí Ãbị̃mẹ́lẹ̃kị̃ ní, ũkú ĩꞌdidrị́ko gá ꞌdãá rĩ ꞌbaní anzịŋá ịsụ́jó. ¹⁸ Ãdróŋá fẽ ũkú ꞌdã ꞌbaníru lịjó úndóru Ãbị̃mẹ́lẹ̃kị̃ ꞌbã Sárã Ịbụrahị́mụ̃ ũkû ꞌdụjó ĩꞌdiní rĩ sĩ ãtréŋáru.