Íꞌdóŋá 18

Ãdróŋá ꞌbã ngọ́tị́ ị́jọ́ azịjó Ịbụrahị́mụ̃ nî rĩ

¹ Ãdróŋá iꞌdaru Ịbụrahị́mụ̃ní kọmọrọ́ ị̃ndụ́ gá ĩꞌdi ꞌba drị́ rĩ agá mõrõgó ĩꞌdidrị̂ ꞌbã tị gá ị̃tụ́kã ãcí sĩ. ² Ndre ãngũ ụrụ gá, ndre ãgọbị kí na pá tu agá ụrụ gá sĩ. Ĩꞌdi mụ kí ndrelé ꞌbo, cọtị cẹ̃ mụlé drị̃ ụfụlé ĩꞌba abe. Ãvụ̃ vụ̃rụ́ ị̃nzị̃táŋá sĩ kpere drị̃ la ꞌbã vũ aló agá. ³ Jọ, “ꞌBá ãmbogo má drị́ ꞌdĩ la, ⁴ ĩmi alị má drị́ko gâ sĩ alị-alị ku. Ma dó ãzị́ nga ĩminî. Ĩmi ají má ụ̃sụ̃ ĩminí ị̃yị́ sĩ pá ũjĩjó. Ĩmi avị́ ife ꞌdĩ ị̃ndụ́ gá ꞌdâ. ⁵ Ma ãkónã ají ĩminí wereŋáru sĩ ĩminí ũkpõ fẽjó, ĩmi dô sĩ mụ múké. Ĩminí amụ́jó má drị́ko gá ꞌdõlé rĩ ĩꞌdi mání ị̃nzị̃táŋáru lẽ áfẽ ĩminí ãko ãzí nalé.” Umvi kí, “Ãwãꞌdĩfô, ãma ãꞌị̃ rá.” ⁶ Ịbụrahị́mụ̃ afụ ru mõrõgó agâlé, jọ Sárãní, “Mí aꞌdụ́ ãnáfóró mĩnãmĩnã la sĩ íná avujó gbõrú.” ⁷ Cẹ̃ tị́ kí agâlé aꞌdụ́ kãjóŋá mũꞌdẽmũꞌdẽ la, fẽ ĩꞌdi ãtíꞌbó ãlu idélépi la kpí gbõrú íni la drị́. ⁸ Ají ãdu, lé ãzíla ĩzá tá be idélé ꞌdĩ kí ꞌbãlé kí drị̃lẹ́ gá, ĩꞌbaní íná na agá ꞌdãá, Ịbụrahị́mụ̃ tu pá ãni rú ife ị̃ndụ́ gá ꞌdãá. ⁹ Zị kí ĩꞌdi, “Mî ũkû Sárã íngõlé yã?” Umvi kí jọ, “Ĩꞌdi mõrõgó agâlé ꞌdã.” ¹⁰ Ãdróŋá jọ, “Ĩmbá úrômĩ vúlé gá ma áma uja ꞌdõlé Sárã la ngọ́tị́ ágọ́bị́ ịsụ́ rá.” Ịsụ́ Sárã la dị̃ ị́jọ́ kî jọlé ꞌdĩ kí are sĩ mõrõgó agâlé. ¹¹ Ịsụ́ Sárã kí Ịbụrahị́mụ̃ be ĩdranigorú ãzíla Sárã ꞌbã ílí tịjó rĩ alị dó rá. ¹² Sárã gụ dó gụ̃gụ̃. Jọ, “Ma dó ĩdránígó ru ãzíla áma ũkpõ ukó dó ꞌbo, má ágô vâ ĩdránígó ru, má icó ngọ́tị́ŋá tịlé íngoníru?” ¹³ Ãdróŋá zị Ịbụrahị́mụ̃ ꞌi, “Sárã gụgụ̃ ãzíla jọ ‘Má icó ngọ́tị́ŋá ịsụ́lé ĩdránígó ru rá la ãꞌdu ị́jọ́ sĩ?’ ¹⁴ Ãko ãzí Ãdróŋá ní ũkpó la cí yã? Mâ jọlé ꞌbo rĩ áni ĩmbá úrômĩ vúlé gá ma áma uja Sárã la ngọ́tị́ŋá ịsụ́ rá.” ¹⁵ Sárã la adrujó ụ̃rị̃rú rĩ sĩ, ga ãgátã rá jọ, “Ágụ gẹ̃rị̃ sĩ ku.” Ãdróŋá jọ, “Ãndá, ígụ rá.” ¹⁶ Ãgọbị ꞌdã mụ kí dó ãngũ ĩꞌbã kí sĩ icójó Sõdómũ andréjó múké rĩ gá. Ịbụrahị́mụ̃ agụ kí pá ꞌbãlé. ¹⁷ Ãdróŋá zịru ꞌa, “Má icó ị́jọ́ mâ lẽlé idélé Ịbụrahị́mụ̃ní rĩ kí ucílé cá rá yã? Yụ ánga kí ụ̃zị̃lé ĩꞌdiní ku. ¹⁸ Ãꞌdusĩku Ịbụrahị́mụ̃ la mụ adrulé sụ́rụ́ ãmbógó ũkpó íni la, ĩꞌdi rụ́ sĩ ma mụ sụ̃sụ́ wilé sụ́rụ́ ụ̃nọ́kụ́ drị̃ gá ꞌdĩ ꞌbaní pírí. ¹⁹ Ápẽ ĩꞌdi íni la sĩ ímbátáŋá fẽjó anzị ĩꞌdidrị̂ ꞌbaní ĩꞌbã anzị abe sĩ ị́jọ́ má drị̂ kí vụ́tị ũbĩjó sĩ ị́jọ́ kpị ãzíla ãndá rĩ kí idéjó, drĩ kí idé la rá, ma mụ ị́jọ́ pírí mâ ꞌbãlé ĩꞌbanî rĩ kí idélé rá.” ²⁰ Ãdróŋá jọ Ịbụrahị́mụ̃ní, “ꞌBá Sõdómũ gá ãzíla Gõmórã gá rĩ iza kíru ũnzíkãnãrú, ị́jọ́ ũnzĩ ĩꞌbadrị̂ acá kpere áma bị́lẹ́ gá. ²¹ Ị́jọ́ ꞌdĩ sĩ, ma sĩ asị́jó vụ̃rụ́ ꞌdõlé sĩ ị́jọ́ ꞌdĩ kí ãndá yã rĩ ndrejó ꞌdĩ. Drĩ kí adru ãndá ma dô sĩ nị̃ la rá.”

²² Ãgọbị ị̃rị̃ ꞌdĩ mụ kí dó Sõdómũ gâlé ru, Ãdróŋá ace ru Ịbụrahị́mụ̃ be. ²³ Ịbụrahị́mụ̃ asé ru Ãdróŋá andre gá, zị ĩꞌdi, “Mi mụ ꞌbá ị́jộ kóru rĩ kí ụꞌdị́lé ꞌbá ị́jọ́ trũ rĩ kí abe yã? ²⁴ ꞌBá ị́jộ kóru rĩ drĩ kí adru ꞌbá kãlị́ tõwú táwụ̃nị̃ ꞌdã agá cí mí kí ụꞌdị́ ꞌbá ũnzí rĩ kí abe pírí yã? Mí icó táwụ̃nị̃ ꞌdã aꞌbelé kí ị́jọ́ sĩ ku yã? ²⁵ Ãndá ãndáru mí icó ꞌbá ị́jộ kóru rĩ kí ụꞌdị́lé ꞌbá ị́jọ́ trũ rĩ abe pírí ku. Icóru tátí ku.” ²⁶ Ãdróŋá jọ, “Ádrĩ ꞌbá múké rĩ kí ịsụ́ kãlị́ tõwú ma ụ̃nọ́kụ́ ꞌdã aꞌbe kí ị́jọ́ sĩ rá.” ²⁷ Ịbụrahị́mụ̃ ꞌbã vâ mãmálá Ãdróŋá drị̃lẹ́ gá ị̃dị́ jọ, “Áma ũkpó sĩ ị́jọ́ jọjó mí be la yụ. ²⁸ ꞌBá ị́jộ kóru rĩ drĩ kí adru ꞌbá kãlị́ sụ drị̃ tõwú mí drĩ vâ ãngũ ꞌdã ị̃lị̃kị̃ rá yã?” Ãdróŋá umvi, “Ádrĩ kãlị́ sụ drị̃ tõwú ịsụ́ ꞌdãá, má icó ãngũ ꞌdã izalé ku.” ²⁹ Zị vâ ị̃dị́, “ꞌBá drĩ kí adru ꞌdãá kãlị́ sụ mi ãngũ ꞌdã ị̃lị̃kị̃ rá yã?” Umvi, “ꞌBá kãlị́ sụ ꞌda kí sĩ, má icó ãngũ izalé ku.” ³⁰ Ịbụrahị́mụ̃ jọ Ãdróŋá ní, “Ími ásị́ ꞌbã azá mání ku mí aꞌbe ájọ ị́jọ́; ꞌbá múké rĩ drĩ kí adru kãlị́ na mi ãngũ ꞌdã iza rá yã?” Umvi, “Má icó ku.” ³¹ Ịbụrahị́mụ̃ jọ, “Ítrũ ma ị́jọ́ mâ jọ ásị́ ũkpó sĩ ꞌdĩ sĩ rá. ꞌBá drĩ kí adru kãlị́ ị̃rị̃ mi ãngũ ꞌdã iza rá yã?” “ꞌBá kãlị́ ị̃rị̃ ꞌdã kí ị́jọ́ sĩ má icó ku.” ³² Ịbụrahị́mụ̃ jọ, “Ãdróŋá mí adru ũmbã sĩ mání ku fô. Wó ꞌbá drĩ kí adru mụdrị́?” Umvi, “ꞌBá mụdrị́ ꞌdã kí ị́jọ́ sĩ má iza ãngũ ꞌdã ku.” ³³ Ãdróŋá la mụ ị́jọ́ jọŋá Ịbụrahị́mụ̃ be rĩ delé ꞌbo, mụ dó rá. Ịbụrahị́mụ̃ gõ dó lị́cọ́ gá.