Íꞌdóŋá 17

Ịbụrámụ̃ ꞌbã kí ĩtãrãŋá ꞌbãjó ícétáŋá tị icíma Ãdróŋá be rĩ drị̂rú rĩ

¹ Ịbụrámụ̃ la dó mụ calé ílí trũ kãlị́ úrômĩ drị̃ la úrômĩ, Ãdróŋá iꞌdaru ĩꞌdiní ãzíla jọ ĩꞌdiní, “Ma Ãdróŋá Ũkpó ꞌDị́pị ꞌi: mí are áma tị ụ́ꞌdụ́ pírí sĩ mí idé ị́jọ́ múké rĩ kí áyụ. ² Ma tị icíma ãma drĩdríŋĩ gá mí be rĩ ꞌbã ị́jọ́ azị ãzíla ma mî drị̃lẹ́ kí fẽ kpẹ̃lé ũꞌbíru.” ³ Ị́jọ́ ꞌdĩ sĩ, Ịbụrámụ̃ sị̃ kũmú su tị vụ̃rụ́ ãrútáŋáru, Ãdróŋá jọ ĩꞌdiní, ⁴ “Tị icíma ãmadrị́ mí be rĩ ꞌdĩ: áꞌbã mi adrujó sụ́rụ́ wẽwẽ rú ꞌbã áꞌbị́ru. ⁵ Ícó dó ími umvelé Ịbụrámụ̃ ꞌi ị̃dị́ ku, ála dó ími umve Ịbụrahị́mụ̃ ꞌi ãꞌdusĩku ma dó ími ꞌbã áꞌbị́ sụ́rụ́ ũꞌbí ꞌbã ãni larú. ⁶ Ma fẽ mî drị̃lẹ́ kí kpẹ̃lé ũꞌbíru sụ́rụ́ la ãfũ ími agá ꞌdâ wẽwẽ rú ãzíla drị̃lẹ́ ãzí rĩ kí adru ũpirú. ⁷ Ma ị́jọ́ mâ azịlé míní ꞌdĩ tãmba ãzíla mî drị̃lẹ́ ꞌbã anzịŋá ꞌbaní tị icítáŋá ukólépi ku rĩrú. Ma adru Ãdróŋá mínî ãzíla mî anzịŋá ꞌbã ãni. ⁸ Ma ãngũ mí sĩ adrujó ala gá ꞌdâ ãmị́yọ́ŋáru ꞌdĩ fẽ mínî ãzíla mî anzịŋá abe. Ãngũ Kãnánĩ gá ꞌdĩ la adru pírí má ãni ãzíla anzịŋá mídrị̂ ꞌbã ãni jã ꞌdâ, ma dô sĩ adru Ãdróŋá ĩꞌba ãni.” ⁹ Ãdróŋá jọ Ịbụrahị́mụ̃ní, “Lẽ mí ãꞌị̃ tị icíma ꞌdĩ tãmbalé má be rá, mi ꞌi ãzíla anzịŋá mídrị̂ kî. ¹⁰ Mi ãzíla anzịŋá mídrị̂ abe ĩmi ãꞌị̃ anzị tịlé mí drị́ko gá rĩ kí ĩtãrãjó pírí rá. ^11-12 Iꞌdójó úꞌdîꞌda lẽ ĩmi ĩtãrã anzị ãgọbị ũrekeŋáru rĩ kí ụ́ꞌdụ́ ãrõ rĩ gá rá, ĩmi ĩtãrã vâ ꞌbá ãtíꞌbóru rĩ ꞌbã anzịŋá kí ĩndĩ ãzíla ajílé ãmị́yọ́ŋáru rĩ kî trũ. ꞌDĩ la dó iꞌda la tị icítáŋá ĩꞌdi ãma drĩdríŋĩ gá ĩmi abe cí. ¹³ ꞌBá ãlu-ãlu lẽ îtãrã ĩꞌdi rá ꞌdĩ la dó iꞌda la tị icíma ãmadrị̂ ĩꞌdi ukólépi ku la. ¹⁴ ꞌBá ꞌbãngá ágọ́bị́ru ĩtãrãlé ku rĩ ĩꞌdi dó mâ ꞌbá ũrirú ku, ãꞌdusĩku mba tị icíma ãmadrị́ ꞌdĩ tã ku.” ¹⁵ Ãdróŋá jọ Ịbụrahị́mụ̃ní, “Lẽ iꞌdójó úꞌdîꞌda mí umve mî ũkû Sãráĩ ꞌi ku, iꞌdójó úꞌdîꞌda mí umve dó ĩꞌdi Sárã ꞌi. ¹⁶ Ma ĩꞌdiní sụ̃sụ́ wi rá, mi ngọ́tị́ ágọ́bị́ tị ĩꞌdi be, ĩꞌdi adru andre sụ́rụ́ ũꞌbí ꞌbã ãni, ũpi kí vâ ãfũ ĩꞌdi ꞌbã drị̃lẹ́ kí agá ꞌdâ.” ¹⁷ Ịbụrahị́mụ̃ sị̃ kũmú su tị vụ̃rụ́ wó iꞌdó gụlé gụ̃gụ̃ ũrã ĩꞌdi ásị́ gá jọ, “ꞌBá la icó tịlé ílí la drĩ ca túrú ãlu rĩ gá rá yã?” ¹⁸ Zị Ãdróŋá ꞌi, “Ífẽ dó Ịsụmaị́lị̃ ngọ́tị́ mâ sĩ ị́jọ́ azịjó ĩꞌdinî rĩrú ku ãꞌdu sĩ yã?” ¹⁹ Ãdróŋá umvi ị́jọ́ jọ, “Yụ. Ũkú mí drị́ Sárã la ngọ́tị́ ágọ́bị́ tị mi rụ́ la ꞌda Ĩsákã ꞌi. Ma tị icíma má drị̂ tãmba ĩꞌdi be, ãzíla drị̃lẹ́ ĩꞌdidrị̂ abe jã ꞌdâ. Ĩꞌdi tị icíma ukólépi ku rĩ. ²⁰ Má are ị́jọ́ mî zịlé Ịsụmaị́lị̃ ꞌbã ị́jọ́ sĩ rĩ rá ma mụ ĩꞌdiní sụ̃sụ́ wilé rá ãzíla ma ĩꞌdiní anzị fẽ wẽwẽ rú drị̃lẹ́ la kí vâ adru ũꞌbíru. Ĩꞌdi adru ũpi anzị ãmbogo mụdrị́ drị̃ ị̃rị̃ ꞌbã átẹ́pịrú. ²¹ Wó ma tị icíma má drị̂ tãmba mî ngọ́pị Ĩsákã be, Sárã ꞌbã mụlé tịlé ílí drụ̃sị̃ rĩ sĩ ụ́ꞌdụ́ ãndrũ ꞌdĩ áni rĩ sĩ rĩ ꞌi.” ²² Ãdróŋá la mụ ị́jọ́ jọlé Ịbụrahị́mụ̃ be ꞌbo, aꞌbe dó ĩꞌdi rá. ²³ Ụ́ꞌdụ́ ãlu ꞌdã sĩ Ịbụrahị́mụ̃ are Ãdróŋá tị rá ĩtãrã ngọ́pị̃ Ịsụmaị́lị̃ rá ꞌbá ãgọbị rú ĩꞌdidrị́ko gá ãzíla ĩꞌdi ꞌbã ĩgbãlé ĩgbã rĩ abe. ²⁴ Ịbụrahị́mụ̃ ĩtãrãru ꞌdĩ sĩ ílí la ca dó kãlị́ úrômĩ drị̃ úrômĩ, ²⁵ ãzíla ngọ́pị̃ Ịsụmaị́lị̃ ílí ca mụdrị́ drị̃ na. ²⁶ Îtãrã kí ị̃rị̃ trá ụ́ꞌdụ́ ãlu ꞌdã sĩ, ²⁷ ãtíꞌbó Ịbụrahị́mụ̃ drị̂ abe pírí.