Íꞌdóŋá 13

Ịbụrámụ̃ awa kíru Lọ́tị̃ be

¹ Ịbụrámụ̃ ãfũ dó Mị̃sị́rị̃ gâlé rá, ũkú ĩꞌdidrị̂ trũ, ãko ĩꞌdidrị̂ kî trũ pírí, ãzíla Lọ́tị̃ mụ ĩꞌdi be ĩndĩ, fi dô sĩ Kãnánĩ gá ãngũ umvelé Nẹ̃gẹ́vụ̃ ꞌi rĩ gá. ² Ịbụrámụ̃ ándrá málĩ trũ; tị́ trũ, kãbĩlõ trũ, ị̃ndrị́ trũ, gólũdĩ trũ ãzíla sílĩvã trũ wẽwẽ rú.

³ Angájó Nẹ̃gẹ́vụ̃ gá co wãyá ãngũ pírí gá cajó kpere Bẹ̃tẹ́lị̃ gá; ãngũ ꞌdã drĩdríŋĩ Bẹ̃tẹ́lị̃ ꞌbã ãni Áyĩ be rĩ gá ándrá bụ́rụ́jọ́ drị̃drị̃ ĩꞌdi ꞌbã sĩ ãngũ uwiŋá idéjó rĩ sịjó rĩ gá. ⁴ ꞌDãá Ịbụrámụ̃ umve Ãdróŋá rụ́.

⁵ Lọ́tị̃ acị́lépi Ịbụrámụ̃ be rĩ ꞌbã málĩ kí wẽwẽ rú ãzíla hémã kî trũ. ⁶ Wó ãngũ ꞌdã ca dó ĩꞌbaní uꞌájó ãlu la ku, ãꞌdusĩku málĩ ĩꞌbadrị́ ꞌda kí ambamba icó kí sĩ uꞌálé ãngũ ãlu gá ku. ⁷ Ãwãŋá ꞌde dó ꞌbá málĩ Ịbụrámụ̃ drị̂ kí tãmbalépi rĩ kí drĩdríŋĩ gá Lọ́tị̃ drị̂ kí tãmbalépi rĩ abe. Ụ́ꞌdụ́ ꞌdã sĩ ꞌbá Kãnánĩrú ãzíla Pẹ̃rẹ́zị̃rú rĩ kí uꞌá agá ãngũ ꞌdã gá ꞌdãá. Ịbụrámụ̃ jọ Lọ́tị̃ní, “Lẽ ãma iré ãma rá. Ímụ úkõ ãzí rĩ gâlé ru ma vâ mụ ãzí rĩ gâlé ru. ⁸ Lẽ tátí ãma ãwã mí be ku, ꞌbá málĩ kí tãmbalépi má drị̂ kí mídrị̂ abe ꞌbã ãwã kí ku; ãꞌdusĩku ãma mí be kãká. ⁹ Ãngũ ꞌdĩ dó pírí ími drị̃lẹ́ gá ꞌdĩ ku yã? Lẽ ãma iré ãma rá. Ímụ úkõ ãzí rĩ gâlé ru ma vâ mụ ãzí rĩ gâlé ru.” ¹⁰ Lọ́tị̃ undré ãngũ, ndre ãngũ gbayi Yõrĩdánĩ tị gá rĩ ị̃yị́ trũ ãzíla ị̃rẹ́bị́ ru kpãcĩ cécé ámvụ́ úpí drị̂ áni, cécé ãngũ Mị̃sị́rị̃ gá rĩ áni, mụ agá Zóã gâlé ru. ꞌDĩ sĩ Ãdróŋá ị̃lị̃kị̃ drĩ ꞌbá Sõdómũ gá rĩ kí Gõmórã gá rĩ abe ku. ¹¹ Lọ́tị̃ pẽ dó ãngũ gbayi Yõrĩdánĩ gâlé ru rĩ mụ dô sĩ ị̃tụ́ ꞌbã ãfũ agâlé ru. ꞌBá ꞌdĩ awa kí dô sĩru rá. ¹² Ịbụrámụ̃ ace dóru uꞌálé ãngũ Kãnánĩ gá, wó Lọ́tị̃ rĩ dó tọ̃rọ́mẹ́ ị̃yị́ tị gá ꞌdã kí agá, ꞌbe lị́cọ́ ĩꞌdidrị̂ Sõdómũ gá. ¹³ ꞌBá Sõdómũ gá ꞌdã kí ándrá ꞌbá ũnzí la, ãzíla rĩ kí izatáŋá izalé Ãdróŋá ụrụꞌbá gá.

¹⁴ Lọ́tị̃ ꞌbã mụjó ꞌbo rĩ sĩ, Ãdróŋá jọ Ịbụrámụ̃ní, “Mí undré drĩ ãngũ ꞌdĩ ándrá ãzíla ụ́rụ́, ị̃tụ́ ꞌbã ãfũ agá ãzíla ị̃tụ́ ꞌbã ꞌde agá. ¹⁵ Ma mụ ãngũ mî ndrelé ꞌdĩ fẽlé míní drị̃lẹ́ mídrị̂ abe kpítã rá. ¹⁶ Ma drị̃lẹ́ mídrị̂ kí fẽ kpẹ̃lé cínákí vũ gá rĩ áni, ꞌbá ãzí drĩ cínákí ꞌbã kãlãfe lã rá, kî dórú drị̃lẹ́ mídrị̂ kí kãlãfe lã rá. ¹⁷ Ímụ úꞌdîꞌda mí acị́ ãngũ mâ mụlé fẽlé míní ꞌdĩ ꞌbã mgbọ la kí undrélé ãzo la be.” ¹⁸ Ịbụrámụ̃ mụ dó hémã ĩꞌdidrị̂ kî trũ kọmọrọ́ ife agá Hẽbũrónĩ gá, ꞌdãá sị dó ãngũ sĩ uwiŋá idéjó rĩ Ãdróŋá nî.