Íꞌdóŋá 14

Ịbụrámụ̃ ꞌbã Lọ́tị̃ pajó rĩ

¹ Ụ́ꞌdụ́ ꞌdã sĩ Ãmãrãfẹ́lị̃ úpí ꞌbá Bãbụ̃lọ́nị̃ gá rĩ ꞌba drị̂ kí Ãrị̃ọ́kị̃ úpí ꞌbá Ẽlásã ꞌba drị̂ abe, Kẽdọ̃rị̃lãọ̃mẹ̃rị̃ úpí Ĩlámũ gá rĩ abe, Tídãlĩ úpí ꞌbá Gõímũ gá rĩ ꞌba drị̂ trũ, ² ꞌbá ꞌdĩ mụ kí ãꞌdị́ gá; Bérã úpí ꞌbá Sõdómũ gá rĩ ꞌba drị̂, Bị̃rị́sã úpí ꞌbá Gõmórã gá rĩ ꞌba drị̂, Sĩnábũ úpí ꞌbá Ãdímã gá rĩ ꞌba drị̂, Sẽmẽbérĩ úpí ꞌbá Zẽbõlímũ gá rĩ ꞌba drị̂, ãzíla úpí Bélã gá rĩ (ꞌdĩ umvelé Zóã rĩ ꞌi) ꞌba rụ́ ãꞌdị̂ ꞌdịlé. ³ Ũpi vúlé ꞌdĩ icí kíru ãlu áꞌbụ Sĩdímũ gá (úꞌdîꞌda umvelé mĩrĩ ãꞌị́ru rĩ). ⁴ Rĩ kí ãzị́ ngalé Kẽdọ̃rị̃lãọ̃mẹ̃rị̃ pálé gá ílí mụdrị́ drị̃ ị̃rị̃, ílí mụdrị́ drị̃ na rĩ sĩ ají kí ị́jọ́ mvu kí ĩꞌdi rụ́ ꞌdãá rĩ sĩ ãmvé. ⁵ Ílí mụdrị́ drị̃ sụ rĩ sĩ úpí Kẽdọ̃rị̃lãọ̃mẹ̃rị̃ ãzíla ũpi ãzí ꞌdĩ icí kíru ãlu mụ kí ãꞌdị́ gá, ndẽ kí ꞌbá Rẽfãímũ gá rĩ kí Ãsị̃tẹ̃rọ́tị̃ Kãrị̃námụ̃ gá, ꞌbá Zụ́zị̃ gá rĩ kí Hámũ gá, ꞌbá Ẽmérĩ gá rĩ kí Sábẽ Kĩrĩãtãnãímũ gá, ⁶ ꞌbá Họ́rị̃ gá rĩ kí ãngũ ꞌbé ꞌarú Sẽírĩ gá Élĩ-Pãránĩ ãngũ kõtórõrú rĩ tị gá ãni rú. ⁷ Uja kíru vúlé mụ kí Énĩ-Mĩsĩpátĩ gá (umvelé Kãdésĩ ꞌi) iza kí ãngũ Ãmẹ́lẹ̃kị̃ ꞌba drị̂, ụꞌdị́ kí ꞌbá Ãmọ́rị̃ ꞌbã ãni uꞌálépi Hãzázõ Tãmárĩ gá rĩ kí rá. ⁸ Úpí Sõdómũ gá rĩ kí, úpí Gõmórã gá rĩ trũ, úpí Ãdímã gá rĩ trũ, úpí Sẽbũímĩ gá rĩ trũ ãzíla úpí Bélã gá rĩ trũ (ãngũ ꞌdĩ Zóã ꞌi) mụ kí ụ̃tị̃ kíru áꞌbụ Sĩdímũ gá rĩ (mĩrĩ ãꞌị́ru rĩ) gá ãꞌdị̂ ꞌdịjó ũpi ꞌdĩ abe. ⁹ Kẽdọ̃rị̃lãọ̃mẹ̃rị̃ úpí Ĩlámũ gá rĩ, Tídãlĩ úpí Gõímũ gá rĩ, Ãmãrãfẹ́lị̃ úpí Sínã gá rĩ ãzíla Ãrị̃ọ́kị̃ úpí Ẽlásã gá rĩ; ũpi sụ ꞌdĩ ꞌdị kí ãꞌdị́ ũpi tõwú abe. ¹⁰ Ịsụ́ íni ꞌdĩ áꞌbụ Sĩdímũ drị̂ ga tré ꞌbụ́ kócõrú rĩ sĩ, ũpi Sõdómũ ãzíla Gõmórã gá rĩ kí mụ apálé, ꞌbá ĩꞌbadrị̂ uꞌde kí ꞌbụ́ ꞌdĩ kí agá ụrụka la apá kî dó ꞌbé agá. ¹¹ Ũpi sụ ꞌdĩ ra kí ãko Sõdómũ ãzíla Gõmórã gá rĩ kí pírí mụ kî trũ rá. ¹² ꞌDụ kí vâ ala gá Lọ́tị̃ Ịbụrámụ̃ ádrị́pị ꞌbã ngọ́pị ĩndĩ, málĩ ĩꞌdidrị̂ kí abe pírí ĩꞌdi ꞌbã uꞌájó Sõdómũ gá rĩ sĩ. ¹³ ꞌBá ãzí ãlu apálépi la amụ́ ị́jọ́ ꞌdĩ lũlé Ịbụrámụ̃ Ĩbũrãníyã rú rĩ nî. Ịsụ́ ꞌdĩ sĩ Ịbụrámụ̃ la uꞌá agá kọmọrọ́ ife ãmbogo-ãmbogo Mãmírẽ drị̂ kí andre gá, Ãmọ́rị̃ ádrị́pị Ãsĩkólũ ꞌba drị́ Ãmẹ́rị̃ be rĩ. ꞌBá ꞌdĩ kí ándrá Ịbụrámụ̃ kî trũ wọ̃rị́ru kí vâru ale ãlu. ¹⁴ Ịbụrámụ̃ la mụ arelé la ụ́ꞌdụ ꞌî ãdrõmvâ ĩndĩ, tra ꞌbá 318 ĩꞌdidrị́ ko agá icólépi ãꞌdị́ní rá ꞌdĩ kí dro dô sĩ ũpi sụ ꞌdĩ kí vú kpere Dánĩ gá. ¹⁵ ꞌDãá awa dó ꞌbá kí tị ị̃rị̃, ụꞌdị́ kî dó mẹ́rọ́ꞌbá kí ị́nị́ sĩ ndẽ kí dó kí rá, dro kí dó kí vú kpere Hõbáhã gá, ꞌdĩ Dãmãsị̃kị́yã ꞌbã drị̃lẹ́ gâlé ru, ¹⁶ ãzíla apá kí dó ãko tá ralé ꞌda kî. Ají dó ádrị́pị̃ ngọ́pị Lọ́tị̃ ꞌi málĩ ĩꞌdidrị̂ kí abe ĩndĩ, ũkú kî trũ ãzíla ꞌbá ꞌdụlé ĩꞌdi abe rĩ kî trũ.

Mẹ̃lẹ̃kị̃zẹ̃dẹ́kị̃ ní sụ̃sụ̂ wijó Ịbụrámụ̃ drị̃ gá rĩ

¹⁷ Ịbụrámụ̃ la mụ ãgõlé vúlé ãꞌdị́ ĩꞌdi sĩ úpí Kẽdọ̃rị̃lãọ̃mẹ̃rị̃ ndẽjó ũpiru icílépi ĩꞌdi abe rĩ abe ꞌbo, úpí Sõdómũ drị̂ amụ́ drị̃ ụfụlé ĩꞌdi be áꞌbụ ꞌa Sõwénĩ drị̂ agá (ꞌdĩ áꞌbụ ꞌa umvelé áꞌbụ ũpi drị̂ rĩ ꞌi). ¹⁸ Mẹ̃lẹ̃kị̃zẹ̃dẹ́kị̃ úpí Sãlémũ drị̂ ãzíla ꞌbá uwiŋá idélépi Ãdróŋá ụrụ gá ãndânĩ rĩ drị́ rĩ ají ãkónã ãzíla wáyĩnĩ trũ Ịbụrámụ̃ nî, ¹⁹ wi sụ̃sụ́ ĩꞌdi drị̃ gá jọ, “Ãdróŋá ụrụ gá pírí ãndânĩ ꞌbụ̃ ꞌbãlépi ụ̃nọ́kụ́ be rĩ ꞌbã wi sụ̃sụ́ ími drị̃ gá Ịbụrámụ̃! ²⁰ Ãdróŋá ụrụ gá ãndânĩ rĩ, míní fẽlépi la índẽ mẹ́rọ́ꞌbá mídrị̂ kí rá rĩ ị́cụ́ rụ́ la ịcụ́-ịcụ̂!” Wó Ịbụrámụ̃ fẽ dó Mẹ̃lẹ̃kị̃zẹ̃dẹ́kị̃ní ãko ãlu mụdrị́ agá ãko ĩꞌdi ꞌbã arálé rĩ drị̂ kî. ²¹ Úpí Sõdómũ drị̂ jọ Ịbụrámụ̃ní, “Mí aꞌbe ãko mî arálé ri kí, bela mí ãfẽ mâ ꞌbá kí pírí áyụ.” ²² Ịbụrámụ̃ umvi úpíní, “Ána ũyõ Ãdróŋá ụrụ gá ãndânĩ rĩ drị̃lẹ́ gá, ꞌbụ̃ kí ꞌbãlépi ụ̃nọ́kụ́ be rĩ, ²³ má icó ãko ãzí má ãni rú la tãmbalé ku táni kéyĩ (wị́zị̃) jõku ŋĩlâ ĩbáká. Vúlé-vúlé ru mí amụ́ rú sĩ jọlé la Ịbụrámụ̃ acá kụ́rẹ́nị́ru la ãko má drị̂ kí sĩ la ku. ²⁴ Má icó ãko ãzí ꞌdụlé mání ãluŋá la ku, ma be la ãko ꞌbá má drị̂ ꞌbã kí nalé rá rĩ kí aꞌị́ áyụ. Bela lẽ mâ wọ̃rị́ka, Ãnẹ́rị̃, Ãsĩkólũ ãzíla Mãmírẽ ꞌbã ꞌdụ kí ĩꞌbadrị́ wókõ gá rĩ kî.”