Íꞌdóŋá 12

Umveŋá Ịbụrámụ̃ drị̂

¹ Ãdróŋá jọ Ịbụrámụ̃ nî, “Mí aꞌbe ãngũ ꞌdĩ ꞌi, ꞌbá mídrị̂ kí ãzíla ꞌbá mî átẹ́pị drị́ko gá ꞌdĩ kí abe ímụ ãngũ mâ mụlé lũlé mínî rĩ gá. ² Ma ími ꞌbã áꞌbị́ sụ́rụ́ ãmbógó la ãni, ma vâ míní sụ̃sụ́ ãlá rĩ wi rá; ma ími rụ́ ꞌbã ãmbógóru, ꞌbá kî dó vâ sụ̃sụ́ ãlá rĩ ịsụ́ mí rụ̂ sĩ. ³ Ma sụ̃sụ́ wi ꞌbá sụ̃sụ́ wilépi míní múké rĩ nî, ma ꞌbá ími wãlépi rĩ wã rá, ãzíla ꞌbá ãngũ drị̃ gá rĩ kí pírí sụ̃sụ́ ãlá rĩ ịsụ́ mí rụ̂ sĩ.”

⁴ Ịbụrámụ̃ aꞌbe ãngũ ꞌdã ꞌi Ãdróŋá ꞌbã jọlé ĩꞌdiní rĩ áni; Lọ́tị̃ mụ ĩꞌdi be ĩndĩ. Ịbụrámụ̃ ílí ca dó ꞌdĩ sĩ kãlị́ ázị̂rị̃ drị̃ tõwú ĩꞌdi ꞌbã drị̃ kojó Hãránĩ gá ꞌdãá rĩ sĩ. ⁵ ꞌDụ ĩꞌdi ꞌbã ũkû Sãráĩ, ádrị́pị̃ ngọ́pị Lọ́tị̃ be, ãko pírí ĩꞌdi ꞌbã ịsụ́lé ꞌbá abe Hãránĩ gá ꞌdãá rĩ kî trũ ko dó drị̃ mụjó ãngũ Kãnánĩ gá. Kî mụ calé Kãnánĩ gâlé ꞌbo, ⁶ Ịbụrámụ̃ acị́ ãngũ ꞌdã agâ sĩ pírí, kpere cajó ife Mõréãrú Sẹ̃kẹ́mụ̃ gá rĩ gá. Ịsụ́ ụ́ꞌdụ́ ꞌdã sĩ ꞌbá Kãnánĩrú rĩ kí uꞌá agá ãngũ ꞌdã agá ꞌdãá. ⁷ Ãdróŋá iꞌdaru Ịbụrámụ̃ní jọ ĩꞌdiní, “Ma ãngũ ꞌdĩ fẽ mî drị̃lẹ́ ꞌbaní.” Sị dô sĩ ãngũ uwiŋá idéjó rĩ Ãdróŋá ní ãngũ ĩꞌdi ꞌbã sĩru iꞌdajó ĩꞌdinî rĩ gá ꞌdãá. ⁸ Ko dó drị̃ ꞌdãá rĩ sĩ mụjó ꞌbé agâlé ru Bẹ̃tẹ́lị̃ ꞌbã wókõ ị̃tụ̂ ꞌbã ãfũ agâlé ru sị dô sĩ bụ́rụ́jọ́ ĩꞌdidrị̂ Bẹ̃tẹ́lị̃ ꞌbã wókõ ị̃tụ̂ ꞌbã ꞌde agâlé ru ãzíla Áyĩ ị̃tụ̂ ꞌbã agá agâlé ru; ꞌdãá sị dó ãngũ sĩ uwiŋá idéjó rĩ Ãdróŋá nî ãzíla umve dô sĩ Ãdróŋá ꞌi. ⁹ Ịbụrámụ̃ mụ ácị̃ trũ drị̃ gá ándrâléru ãngũ umvelé Nẹ̃gẹ́vụ̃ rĩ gá.

Ịbụrámụ̃ dó Mị̃sị́rị̃ gá

¹⁰ Rílẽ aꞌdé dó ãngũ ꞌdã gá ꞌdãá, Ịbụrámụ̃ mụ dó ándrá Mị̃sị́rị̃ gâlé ru uꞌájó were rílẽ ꞌdã tẽjó ãꞌdusĩku rílẽ ꞌdã mị la ꞌbãngá ika. ¹¹ Ĩꞌdi dó mụ calé ãni rú fijó Mị̃sị́rị̃ gá, jọ ũkû Sãráĩní, “Ánị̃ mi ũkú ãlápítí íni la rĩ rá. ¹² ꞌBá Mị̃sị́rị̃rú ꞌdĩ drĩ kí ími ndre, kí jọ la ꞌdĩ bãsĩ ũkû ꞌi. Kí áma ꞌdị rá, kí ími aꞌbe ídri. ¹³ Íjọ mi mâ ámvọ́pị ꞌi, kí dô sĩ áma tãmba ími ị́jọ́ sĩ, áma ídri la dô sĩru pa ími ị́jọ́ sĩ rá.” ¹⁴ Ịbụrámụ̃ la mụ calé Mị̃sị́rị̃ gá, ndre kí Sãráĩ ꞌi ũkú ãlápítí la. ¹⁵ Ãzíla ꞌbá ãmbogo Fãráwũ drị̂ ndre kí ĩꞌdi, ịcụ́ kí ĩꞌdi Fãráwũ ní, ụ́ꞌdụ dó ĩꞌdi agụlé úpí drị́ko gâlé. ¹⁶ Mba Ịbụrámụ̃ tã múké ị́jọ́ la sĩ, Ịbụrámụ̃ ịsụ́ málĩ ágó ãzíla ãrónĩ rĩ kî; kãbĩlõ, tị́, kãyĩnõ, ngãmíyã ãzíla ãtíꞌbó ãgọbị rú ãzíla ũkúru rĩ kî trũ.

¹⁷ Wó Ãdróŋá ĩcãndĩ Fãráwũ ãyánĩ ũkpó la sĩ ꞌbá ĩꞌdidrị́ko gá rĩ abe Sãráĩ Ịbụrámụ̃ ũkû ꞌbã ị́jọ́ sĩ. ¹⁸ Fãráwũ umve Ịbụrámụ̃ ꞌi, zị ĩꞌdi, “Mí idé ma íni ãꞌdu sĩ? Ílũ mání ĩꞌdi mî ũkû ꞌi la ku ãꞌdu sĩ? ¹⁹ Íjọ mání ĩꞌdi mî ámvọ́pị mánî sĩ ĩꞌdi ꞌdụjó mání ũkúru íni la ãꞌdu sĩ? Úꞌdîꞌda íni, mî ũkû ꞌdĩ. Íꞌdụ mî ngâ ꞌi ímụ trũ!” ²⁰ Fãráwũ fẽ ãzị́táŋá ꞌbá ĩꞌdidrị̂ ꞌbaní Ịbụrámụ̃ drị̃ gá, agụ kí dó ĩꞌdi ũkû be ãko pírí ĩꞌdi ꞌbã ịsụ́lé rĩ kî trũ pẽ kí ĩꞌdi tị rá.