Íꞌdóŋá 11

Tị ꞌbãru awajó rĩ

¹ Ándrá údu rĩ sĩ ꞌbá ãngũ drị̃ gá ꞌdâ rĩ kí tị ãlu jọ, ꞌbá pírí nị̃ kí cé, kí vâ uꞌá ãngũ ãlu gá. ² ꞌBá ꞌbã kí mvi agá ị̃tụ́ ꞌbã ãfũ agâlé ru, ịsụ́ kí ãngũ rị̂rú la Sínã gá rĩ kí dó ala gá. ³ Jọ kí kí drĩdríŋĩ gá, “Ãma amụ́ kí mũtũfálĩ ꞌbelé ꞌbã mba kí ũkpó ru írã áni.” ⁴ Jọ kí, “Ãma amụ́ kí lị́cọ́ sịlé jó gõrófãrú la trũ drị̃ la ꞌbã ca wị́lị́wị́lị́ ꞌbụ̃ gâlé, ãma rụ́ ꞌbã kụrú dô sĩ, ãma dô sĩ uꞌá ãngũ ãlu gá ãma irérú sĩ ụ̃nọ́kụ́ drị̃ gá ꞌdâ pírí ku.” ⁵ Ãdróŋá asị́ vụ̃rụ́ ꞌdõlé lị́cọ́ ꞌbá ꞌdĩ ꞌbã kí sịlé rĩ ndrelé. ⁶ Ãdróŋá jọ, “ꞌBá ꞌdĩ kí ꞌbá ãlu ãzíla kí pírí tị ãlu jọ, ꞌdĩ dó drĩ íꞌdóŋá ꞌbá ꞌdĩ ꞌbã kí ị́jọ́ drụ́zị́ ĩꞌbã kí lẽlé idélé rĩ iꞌdójó rĩ. Ị́jọ́ ꞌdĩ sĩ, kí ãko ĩꞌbã kí lẽlé rĩ idé gbõŋáŋáru, icó kí ndẽlé ku! ⁷ Lẽ ãmụ kí vụ̃rụ̂lé tị ĩꞌbadrị̂ usalé, ꞌba are kírú sĩru kí drĩdríŋĩ gá ku.” ⁸ Ãdróŋá iré dó kí ãngũ drị̃ gá pírí ãzị́ ĩꞌbadrị́ ꞌdã tu dó sĩ pá cí.

⁹ Lị́cọ́ ãmbógó ꞌdã rụ́ la Bãbụ̃lọ́nị̃ ꞌi ífí la Ãdróŋá usa ándrá ꞌbá kí tị ꞌdãá. Iré dó sĩ kí kpékpé vũ drị̃ gá ꞌdãá pírí. ¹⁰ ꞌDĩ ãwí Sẹ́mị̃ drị́ gá rĩ ꞌi. Ílí ị̃rị̃ ị̃yị́ ꞌbá kí ịmvụ́lépi rĩ ꞌbã vúlé gá Sẹ́mị̃ ílí ca dó túrú ãlu, acá dô sĩ Ãrĩfãsádĩ ꞌbã átẹ́pịrú. ¹¹ Ĩꞌdi mụ Ãrĩfãsádĩ tịlé ꞌbo, uꞌá ílí túrú tõwú tị vâ anzị ãgọbị ãzí kí izonzi abe. ¹² Ãrĩfãsádĩ la mụ calé ílí trũ kãlị́ na drị̃ tõwú, tị Sélã ꞌi. ¹³ Sélã tịjó ꞌbo rĩ ũngúkú gá Ãrĩfãsádĩ uꞌá ílí túrú sụ drị̃ la na, tị vâ anzị ãgọbị ãzí kí izonzi abe. ¹⁴ Sélã la mụ calé ílí trũ kãlị́ na tị Ẽbérĩ ꞌi, ¹⁵ ꞌdã ꞌbã ũngúkú gá uꞌá ílí túrú sụ drị̃ la na tị vâ anzị ãgọbị ãzí kí izonzi abe.

¹⁶ Ĩbérĩ la mụ calé ílí kãlị́ na drị̃ sụ tị Pẽlégĩ ꞌi, ¹⁷ ꞌdã ꞌbã ũngúkú gá uꞌá ílí túrú sụ drị̃ la kãlị́ na, tị vâ anzị ãgọbị ãzí kí izonzi abe. ¹⁸ Pẽlégĩ la mụ calé ílí kãlị́ na tị Réwũ ꞌi, ¹⁹ ꞌdã ꞌbã ũngúkú gá uꞌá ílí túrú ị̃rị̃ drị̃ la úrômĩ, tị anzị ãgọbị ãzí kí izonzi abe. ²⁰ Réwũ la mụ calé ílí kãlị́ na drị̃ la ị̃rị̃ tị Sẹ̃rụ́gị̃ ꞌi, ²¹ ꞌdã ꞌbã ũngúkú gá uꞌá ílí túrú ị̃rị̃ drị̃ la ázị̂rị̃ tị vâ anzị ãgọbị ãzí kí izonzi abe. ²² Sẹ̃rụ́gị̃ la mụ calé ílí kãlị́ na tị Nãhọ́rị̃ ꞌi, ²³ ꞌdã ꞌbã ũngúkú gá uꞌá ílí túrú ị̃rị̃, tị vâ anzị ãgọbị ãzí kí izonzi abe. ²⁴ Nãhọ́rị̃ la mụ calé ílí kãlị́ ị̃rị̃ drị̃ la úrômĩ tị Térã ꞌi, ²⁵ ꞌdã ꞌbã ũngúkú gá uꞌá ílí túrú ãlu mụdrị́ drị̃ la úrômĩ, tị vâ anzị ãgọbị ãzí kí izonzi abe. ²⁶ Térã ílí la mụ calé kãlị́ ázị̂rị̃ tị Ịbụrámụ̃ ꞌi, Nãhọ́rị̃ ꞌi ãzíla Hãránĩ ꞌi.

Ãwí Térã drị̂

²⁷ ꞌDĩ dó ãwí Térã drị̂ ꞌi, tị dó Ịbụrámụ̃ ꞌi, Nãhọ́rị̃ ꞌi ãzíla Hãránĩ ꞌi. Hãránĩ tị dó ĩꞌdidrị̂ gá Lọ́tị̃ ꞌi. ²⁸ Térã drĩ adrujó ídri rĩ sĩ ngọ́pị̃ Hãránĩ drã Ụ́rị̃ Kãlị̃dị́ã gá ꞌdĩ ãngũ ĩꞌdi tịjó rĩ gá. ²⁹ Ịbụrámụ̃ kí Nãhọ́rị̃ be ị̃rị̃ trá ĩgbã kí ũkú rá. Ũkú Ịbụrámụ̃ drị̂ rụ́ la Sãráĩ ꞌi, Nãhọ́rị̃ drị̂ rụ́ la Mílĩkã ꞌi, ĩꞌdi ádrị́pị̃ Hãránĩ ị̃zẹ́pị ꞌi. Mílĩkã ꞌbã ámvọ́pị ãzí rĩ rụ́ la Ị̃sị́kã ꞌi. ³⁰ Sãráĩ ĩꞌdi ándrá úndó tị ku. ³¹ Térã ꞌdụ ngọ́pị̃ Ịbụrámụ̃ kí ũkû Sãráĩ be, Hãránĩ ngọ́pị Lọ́tị̃ ĩꞌdi umvelépi áyị́pị rĩ be aꞌbe kí Ụ́rị̃ Kãlị̃dị́ã rá trũ mụjó Kãnánĩ gá. Wó kí mụ acálé Hãránĩ gá ꞌbe kí lị́cọ́ sĩ rijó ꞌdãá. ³² Térã uꞌá ílí túrú ị̃rị̃ drị̃ la tõwú, drã dô sĩ Hãránĩ gá ꞌdãá.