Íꞌdóŋá 9

¹ Ãdróŋá wi sụ̃sụ́ Núwãní ãnzị́pịka abe, jọ ĩꞌbaní “Ĩtị tị̃, ị̃kpẹ̃ wẽwẽ rú, ĩga ụ̃nọ́kụ́ gá ꞌdâ tré. ² Ãnãkpá pírí ụ̃nọ́kụ́ drị̃ gá ꞌdâ ãmbogo ãzílanírí rĩ kí ãriŋa ꞌbụ̃ gá rĩ kî, ị̃ꞌbị ị̃yị́ agá rĩ kî trũ kí idé ĩmi sĩ ụ̃rị̃ sĩ ãꞌdusĩku áfẽ ũkpõ ĩꞌbadrị̂ ĩmidrị́ alé gá. ³ Áfẽ ĩminí ãko pírí ídrî trũ rĩ kí ãkónã rú cécé mâ ĩminí ãko dụlépi vũ drị̃ gá ꞌdĩ kí fẽlé ãkónã rú rĩ áni. ⁴ Wó lẽ ĩna ĩzá ãrí ĩꞌdi drĩ sĩ adrujó ídri rĩ trũ mũtú ku. ⁵ ꞌBá ꞌdịŋá má uga úmgbé, ꞌbá drĩ ꞌbá ꞌdị ála ĩꞌdi ꞌdị kẹ̃jị́ la gá. Ãnãkpá ꞌbá ꞌdịlépi rĩ lẽ ụ́ꞌdị ĩꞌdi rá. ⁶ ꞌBá drĩ ꞌbá ãzí ãrí asu rá, lẽ âsu vâ ĩꞌdidrị̂ rá ãꞌdusĩku Ãdróŋá idé ꞌbá gbíyã ĩꞌdidrị̂ sĩ. ⁷ Lẽ ũri ꞌbã ãfũ ĩmi ụrụꞌbá gá, ĩmi ĩjãlã ĩmi wẽwẽ rú, ĩmi iré sĩ ãngũ drị̃ gá pírí.”

⁸ Ãdróŋá jọ Núwãní ngọ́pịka abe, ⁹ “Ma tị icíma ꞌbã mí be ãzíla mî drị̃lẹ́ abe, ¹⁰ ãzíla ãko ándrá ídri filépi mí be íꞌbó agá rĩ kí, ãriŋa kî trũ ãnãkpá lị́cọ́ gá rĩ kî trũ ãzíla ásé agá rĩ kî trũ ãko pírí ídri vũ drị̃ gá ꞌdâ rĩ kí abe pírí. ¹¹ Ma tị icíma icí mi be: má icó ãko ídri rĩ kí ịmvụ́lé ị̃yị́ sĩ ị̃dị́ ku, ị̃yị́ icó dó ãngũ izalé ị̃dị́ ku.”

¹² Ãdróŋá jọ, “Ị́jọ́ iꞌdalépi la ícétáŋáru tị icíma ãma drĩdríŋĩ gá ꞌdâ mí be ãzíla ãko ídrî trũ rĩ abe rĩ, ¹³ áꞌbã gẹ́rị́ ụ̃rụ́ꞌbụ̃ kí agá. Ĩꞌdi ícétáŋá mâ azịŋá ukólépi ku rĩ azịjó míní ãko ídrî trũ rĩ kí abe pírí vũ drị̃ gá ꞌdâ rĩ. ¹⁴ Ádrĩ ụ̃rụ́ꞌbụ̃ tị ãpẽ vũ drị̃ gá ꞌdâ gẹ́rị́ drĩru ala cí, ¹⁵ ma tị icíma ãmadrị́ mí be ãzíla ãko pírí ídrî trũ rĩ abe rĩ ꞌbã ị́jọ́ agá. Tánĩ-tánĩ ãko ãzí icô dó ịmvụ́lé ị̃yị́ ꞌdã ꞌbã áni la sĩ ku. ¹⁶ Ádrĩ dó gẹ́rị́ ndre ụ̃rụ́ꞌbụ̃ gá ꞌdâ, ma tị icíma ãma ãni mí be ukólépi ku rĩ ꞌbã ị́jọ́ Ãdróŋá kí drĩdríŋĩ gá ãko pírí ídri trũ rĩ abe rĩ agá.” ¹⁷ Ãdróŋá jọ Núwãní, “ꞌDĩ ícétáŋá tị icíma ãni mâ ꞌbãlé drĩdríŋĩ ãma ãni ãko pírí ídri trũ ãngũ drị̃ gá ꞌdâ rĩ abe rĩ.”

Ãnzị Núwã drị̂ kî

¹⁸ Anzị Núwã drị́ na Sẹ́mị̃ ꞌi, Hámũ ꞌi ãzíla Yáfẽtĩ ꞌi pa kíru ãfũlé ídri átẹ́pị̃ trũ íꞌbó agâlé; ꞌBá Kãnánĩrú rĩ ꞌbã átẹ́pị gápi umvelé Hámũ ꞌi ꞌdĩ. ¹⁹ Anzị Núwã drị́ na ꞌdĩ kí dó áꞌbị́ ꞌbá pírí ụ̃nọ́kụ́ gá ꞌdâ rĩ ꞌba drị́ rĩ. ²⁰ Núwã ĩꞌbã átẹ́pị ándrá ꞌbá ámvụ́ ãni la, ĩꞌdi vâ ꞌbá zãbíbũ salépi drị̃drị̃ rĩ ꞌi. ²¹ Ĩꞌdi mụ sụ́ lã mvụlé ꞌbo, ĩmẽrã rá, laru pílílí ru ĩꞌdidrị́ jó agâlé. ²² Hámũ Kãnánĩ átẹ́pị la mụ átẹ́pị̃ Núwã ꞌbã pílílí ndrelé ꞌbo, fũ ãmvêlé nze vú la ádrị́pịka ị̃rị̃ ꞌdã ꞌbanî. ²³ Wó Sẹ́mị̃ kí Yáfẽtĩ be aꞌdụ́ kí bõngó ꞌbe kí ĩꞌdi kọ́trọ́ gá ũngúkú gá, fi kí ũngúkú ũngúkúru jó agâlé, ajá kí tị ãmvé ꞌdõléru ĩꞌbanî sĩ átẹ́pị̃ ꞌbã pílílí ndrejó ku, ꞌbe kí dô sĩ pílílí drị̃ cí. ²⁴ Núwã la mụ angálé ụ́ꞌdụ́ mérã wáyĩnĩ sĩ rĩ drị̂ gâlé ꞌbo, nị̃ dó ị́jọ́ ngọ́pị̃ wereŋá ꞌdã ꞌbã idélé ĩꞌdi rụ́ rĩ rá. ²⁵ Jọ dó íni, “Áwã Kãnánĩ rá, ꞌbã adru ãtíꞌbóru ádrị́pịka kí pálé gá.” ²⁶ Jọ vâ, “Ãdróŋá Úpí Sẹ́mị̃ drị̂ úru ĩꞌdi rũrũ, lẽ Kãnánĩ ꞌbã adru ãtíꞌbóru Sẹ́mị̃ pálé gá.” ²⁷ Lẽ Ãdróŋá ꞌbã fẽ ãngũ Yáfẽtĩ drị̂ ꞌbã adru mgbọrú, ꞌba uꞌá kí Sẹ́mị̃ be ádrị́pị ãzíru, Kãnánĩ ꞌbã adru ĩꞌbã ụ̃pịgọŋaru. ²⁸ Núwã uꞌá ílí túrú na kãlị́ tõwú uzogó ãmbógó rĩ ꞌbã ũngúkú gá. ²⁹ Núwã uꞌá dô sĩ pírí rĩ gá ílí túrú úrômĩ kãlị́ tõwú.