Íꞌdóŋá 8

Ị̃yị́ ãmbógó ꞌbá kí ịmvụ́lépi rĩ ꞌbã nzụjó rĩ

¹ Ãdróŋá ũrã ị́jọ́ Núwã drị̃ gá ãzíla ãnãkpá ásé agá ãzíla lị́cọ́ gá uꞌálépi ĩꞌdi be íꞌbó ãmbógó rĩ agá rĩ kí drị̃ gá, ãpẽ dô sĩ ãlụ́kụ̃ tị ị̃yị́ ãmbógó tị̃lépi rĩní sĩru umvijó. ² Ị̃yị́ agbẹ́lépi vụ̃rụ̂lé rĩ ãzíla aꞌdélépi ꞌbụ̃ gâlé rĩ kí Ãdróŋá ụ̃pị̃ kí tị cí. ³ Ị̃yị́ tị̃lépi vũ drị̃ gá ꞌdâ rĩ nzụ dó jãjãŋáru ụ́ꞌdụ́ túrú ãlu kãlị́ tõwú sị dó kpere vụ̃rụ̂lé. ⁴ Íꞌbó ãmbógó ꞌdã amụ́ dó rilé ꞌbé Ãrãrátĩ drị̃ gá ĩmbá tõwú vúlé gá. ⁵ Ĩmbá ị̃rị̃ nụ́sụ̃ vúlé gá ꞌbé ãzí rĩ kí drị̃ iꞌdó dó indrélé.

⁶ ꞌDã ꞌbã ũngúkú gá ụ́ꞌdụ́ kãlị́ sụ, Núwã nzị̃ dẹ̃rị́sã íꞌbó ãmbógó rĩ drị́ gá ĩꞌdi ꞌbã idélé rĩ. ⁷ Ãpẽ kúrúke tị ala gâ sĩ ãmvé ꞌdõlé, ãgõ vúlé ꞌdõlé rĩ unga lé ꞌdõlé kpere ị̃yị́ ꞌbã nzụ agá vũ drị̃ gá ꞌdãá. ⁸ Pẽ vâ ãlĩꞌbõ tị amájó la ị̃yị̂ nzụ rá yã rĩ, ịsụ́ ãngũ sĩ rijó ku, ị̃yị́ ꞌbã drĩ ãngũ drị̃ ꞌbejó cí rĩ sĩ, angá dô sĩ vúlé íꞌbó ãmbógó rĩ agá ꞌdõlé. ⁹ Núwã ĩjũ drị́ aꞌị́ dô sĩ ãlĩꞌbõ ĩꞌdi rụ́ íꞌbó agâlé. ¹⁰ Tẽ vâ ụ́ꞌdụ́ ãzí kí ázị̂rị̃ ị̃dị́, pẽ ãlĩꞌbõ tị ãmvé angájó íꞌbó agâlé. ¹¹ Ãlĩꞌbõ la mụ ãgõlé ĩndróloŋá sĩ ĩꞌdi rụ́ ꞌdõlé, zãbíbũ ãráŋá ꞌbã bị́ ãtĩ ajílé ĩndĩ. Núwã nị̃ dô ị̃yị̂ nzụ dó vũ drị̃ gâlé rá. ¹² Tẽ ụ́ꞌdụ́ ãzí kí ázị̂rị̃ ị̃dị́, pẽ vâ ãlĩꞌbõ tị ãmvêlé ị̃dị́, ãgõ dó vúlé ꞌdõlé ị̃dị́ ku. ¹³ Núwã nzị̃ dó íꞌbó ãmbógó rĩ ꞌbã dẹ̃rị́sã ndre dó ãngũ drị̃ ꞌi rá ị̃yị̂ nzụ dó ĩmbá mụdrị́ nụ́sụ̃ uzogó ãmbógó ꞌdã ꞌbã vúlé gá, ꞌdĩ sĩ Núwã ꞌbã ílí ca dó túrú ázíyá drị̃ la ãlu.

¹⁴ Ĩmbá ị̃rị̃ vúlé gá ãngũ drị̃ ꞌi dó ãꞌí ru. ¹⁵ Ãdróŋá jọ dó Núwã nî ¹⁶ “Ĩmi ãfũ dó íꞌbó ãmbógó rĩ agâlé pírí ãmvé, ¹⁷ mí iyá ãko filépi mí be ídri rĩ kí pírí ãmvé, ãnãkpá kí, ãriŋa kî trũ, ꞌba amụ́ kî sĩ tịlé ꞌbã kpẹ̃ kí sĩ wẽwẽ rú.” ¹⁸ Núwã ãfũ kí dô sĩ ũkû trũ, ngọ́pịka kî trũ, ãzíla ngọ́pịka ꞌbã ũkúka kî trũ aꞌbe kí dô sĩ íꞌbô rá.

¹⁹ Ãnãkpá ũví ndú-ndú, ãriŋa ũví ndú-ndú ꞌdĩ ãfũ kí pírí ị̃rị̃ ị̃rị̃ ágó kí ũkú be. ²⁰ Núwã sị dó ãngũ uwiŋá idéjó rĩ Ãdróŋá nî, aꞌdụ̂ dó ãnãkpá ãzíla ãríŋá ãlá la kí idé dô sĩ uwiŋá ivélé ivê rĩrú Ãdróŋá nî. ²¹ Ãdróŋá uꞌá dó ãyĩkõ sĩ uwiŋá ꞌdã sĩ ũrã dó ĩꞌdi ásị́ gá cénĩ-cénĩrú, “Má icó dó ụ̃nọ́kụ́ wãlé ꞌbá ꞌbáru ꞌdĩ ꞌbã ị́jọ́ sĩ ị̃dị́ ku, ꞌbá ꞌbáru ꞌdĩ ꞌbã ásị́ drĩtáni adru ũnzí iꞌdójó ngọ̃tị̃ŋã sĩ má icó dô ãko ídri trũ ꞌdĩ kí ị̃lị̃kị̃lé mâ idélé ꞌbo ꞌdĩ áni ku.

²² “Ụ̃nọ́kụ́ ꞌbã adrujó cí rĩ áni áyi ãná rĩjó rĩ kí ãná lãjó rĩ be, ị̃gbẹ̃ kí ãngũ ãcí be, ílí kí áyi be, ị̃tụ́ kí ị́nị́ be icó kí ukólé ku.”