Íꞌdóŋá 7

¹ Ãdróŋá jọ Núwãní, “Ífi íꞌbó ãmbógó rĩ agâlé ꞌbá mí drị́ko gá rĩ kî abe; ũkú mídrị̂ be anzị mídrị̂ kí ãzíla mî ãnzị́pịka ꞌbã ũkúka kí abe, ãꞌdusĩku má ịsụ́ mi ꞌbá ụ́ꞌdụ́ ꞌdĩ agá rĩ kí drĩdríŋĩ gá ꞌbá mgbã ị́jọ́ ũnzí idélépi ku la ụ̃nọ́kụ́ drị̃ gá ꞌdâ. ² Íꞌdụ ãnãkpá ágó kí ũkú be ázị̂rị̃ nalé nã rĩ kí vâ múké sĩ ị́jọ́ idéjó ãzíla ãnãkpá nalé ku ꞌdi kí ị̃rị̃ ị̃rị̃ ágó kí ũkú be, ³ ãzíla íꞌdụ ãríŋá ũví ndú-ndú ágó kí ũkú be ázị̂rị̃ kí tãmbajó ídrirú ụ̃nọ́kụ́ drị̃ gá ꞌda amụ́jó kí ũrí tịjó. ⁴ Ace ụ́ꞌdụ́ ázị̂rị̃ mání uzogó fẽjó ꞌdịjó ụ́ꞌdụ́ kãlị́ sụ ị́nị́ kí ị̃tụ́ be, ma sĩ ãko ụ̃nọ́kụ́ drị̃ gá ꞌda ídrirú mâ ũꞌbãlé rĩ kí ị̃lị̃kị̃ pírí.” ⁵ Núwã idé ị́jọ́ Ãdróŋâ ꞌbã jọlé ĩꞌdinî rĩ kí pírí.

⁶ Núwã ílí sáwã uzogó ꞌbã ꞌdịjó ꞌdã sĩ túrú ázíyá. ⁷ Fi kí dó íꞌbó agá ũkû trũ, anzị kí ãzíla ũkúka abe sĩru pajó. ⁸ Ãnãkpá amụ́ kí dó ĩꞌdi rụ́ íꞌbó agá ꞌdõlé ị̃rị̃ ị̃rị̃ ágó kí ũkú be nalé nãnã rĩ kí nalé ku rĩ trũ, ãko ídri trũ ãgãlépi vụ̃rụ́ sĩ rĩ abe. ⁹ Afí kí ĩꞌdi rụ́ ꞌdõlé Ãdróŋá ꞌbã jọlé rĩ áni ágó kí ãrónĩ be.

^10-16 Ụ́ꞌdụ́ ãlu ꞌdã sĩ Núwã fi kí íꞌbó ãmbógó ꞌdã agâlé ũkû be ãzíla ngọ́pịka na Sẹ́mị̃ ꞌi, Hámũ ꞌi, ãzíla Yáfẽtĩ ꞌi, ngọ́pịka ꞌbã ũkúka abe. Ãnãkpá ũví ndú-ndú, tãmbalé lị́cọ́ gá ãzíla ásé agá rĩ kíníríŋá ãzíla use rĩ kí, ãríŋá ũví ndú-ndú rĩ abe ãko ãgãlépi vụ̃rụ́ sĩ ãlu-ãlu fi kí ị̃rị̃ ị̃rị̃ ágó kí ãrónĩ be íꞌbó agalé. Ãko ãlu-ãlu ídri trũ Ãdróŋá ꞌbã ꞌbãlé rĩ fi kí íꞌbó agâlé ĩꞌdi trũ. Ãko pírí fi kí íꞌbó agâlé ị̃rị̃ ị̃rị̃ ágó kí ãrónĩ be Ãdróŋá ꞌbã azịlé ĩꞌdinî rĩ áni Úpí Ãdróŋá ụ̃pị̃ dó íꞌbô tị cí. Ụ́ꞌdụ́ ázị̂rị̃ ũngúkú gá uzogó iꞌdó ꞌdịlé ra. Ĩmbá ị̃rị̃ ụ́ꞌdụ́ mụdrị́ drị̃ ázị̂rị̃ rĩ sĩ kẹ̃bẹ̃lụ́ ị̃yị́ ãni vụ̃rụ̂lé rĩ ãkpẹ̃ kî, kẹ̃jị́ uzogó ãni ꞌbụ̃ gá rĩ nzị̃ kíru uzogó ũsũlé ịsụ́ ꞌdĩ sĩ Núwã ꞌbã ílí dó túrú ázíyá. Uzogó ꞌdị dó ụ̃nọ́kụ́ drị̃ gá ụ́ꞌdụ́ kãlị́ sụ ị́nị́ kí ị̃tụ́ be.

Ãdróŋá ị̃lị̃kị̃ dó ꞌbá kí pírí ị̃yị̂ ꞌbã kí ịmvụ́ŋá sĩ

¹⁷ Uzogó ꞌdị ụ́ꞌdụ́ kãlị́ sụ pâ tuŋâ kóru, ị̃yị́ tị̃ dó kpãwụ́ iti ụ̃nọ́kụ́ drị̃ rá, íꞌbó inga ru atụ́ dó ị̃yị́ drị̃ gá. ¹⁸ Ị̃yị́ tị̃ ũkpó sĩ ãmbógóru ngõngõ íꞌbô iꞌdó dó dịlé drị̃ la gá ꞌdãá. ¹⁹ Uzogó ꞌbã ãmbogo sĩ ị̃yị́ iti ꞌbé ãmbogo ãzombílíko rĩ kí drị̃ mĩlĩmĩlĩ. ²⁰ Iti ꞌbé kí drị̃ kpere ĩꞌbã kí ꞌde agá mgbi drị́ álụ kãlị́ ị̃rị̃. ²¹ Ãko pírí ídri trũ ãngũ drị̃ gá ꞌdâ rĩ kí ũdrã kí pírí ãnãkpá kí, ãríŋá kí, ãzíla ꞌbá kî trũ ịmvụ́ kí ị̃yị́ sĩ. ²² Ãko pírí uꞌálépi ídri ãngũ ãꞌí drị̃ gá ãlụ́kụ̃ sĩ rĩ ị̃lị̃kị̃ kí pírí. ²³ Ị́jọ́ ꞌdĩ sĩ, ãnãkpá kí, ãríŋá kí, ꞌbá kî trũ ũdrã kí pírí. Núwã pa kíru ꞌbá ãzíla ãnãkpá ĩꞌdi abe íꞌbó agá rĩ kî trũ nĩ áꞌdụ̂sĩ.

²⁴ Ị̃yị́ tị̃lépi ꞌdã uꞌá ụ́ꞌdụ́ túrú ãlu kãlị́ tõwú nzụŋâ kóru.