Okhwilwacha khwa Yohana omabatisi
(Matayo 3:1-12; Mariko 1:1-8)
3
1 Omwika kwa likhumi na kirano Kaisaria Tiberia yali omuruki wa Roma, Pilato yali Kabana wa Yutea, Heroti yali omwami wa Kalilaya. Waandaye wa Heroti bari Filipo, yali omwami wa ebibala bia Iturea nende Tarakoniti. Lisania naye yali omwami wa esibala sia Abilene. 2 Munyinga cha Abasaayi abakhulundu, Anasi nende Kayafa, Yohana omusiani wa Sakaria yanyoola likhuwa okhurula khu Wele nali musichimi. 3 Mani wacha chimbeka choosi cha Yoritani na yelwacha ari abandu bekanile kho Wele ababeele obwoni bwabo. 4 Khuli kahandikwa musitabu sia omung'oosi Isaya kari:“Omwoyo kulalanganga musichiimi:
‘Rekekha omuyila kwa Omwami,
lomba yingila yiiye yilunjikhe.
5 Yichusia amatikho koosi,
kwalasia ebiili nende ebikulu bioosi,
lomba yinjila yekanyakanya yilunjikhe,
miusia chinjila chahandalala chibe chimiufu.
6 Kho abandu boosi balengele obuhonia bwa Wele.’ ”
7 Wasungila lituli liali nelichile okhupatisibwa ni naye ari, “Enywe ba olwibulo lwa chikhilakhima, wina wamusungila ari mwilukhe esinyaasio sia Wele silechanga? 8 Okhubirira mubikholwa bienyu, mwechesie muri mwayekanila obwoni bwenyu. Mukhebaasia muri, ‘Efwe khubeele nende Aburahamu khuli papa wefu.’ Sikila emusunjila endi Wele anyala okhukhola amachina kano kaakwa abana ba Aburahamu. 9 Ehaywa yirekekhe okhurema emisaala nende emisi kiakio. Omusala kukharaakho amatunda amalayi ta kukharemwe mani kusukunwe mu mulilo.”
10 Abandu balia bamureeba bari, “Nono khukhole sina?”
11 Khandi wakalusia ari, “Omundu wuli nende chingubo chibili akabe yindala khu wukhali nayo ta, wuli nende esiakhulia yeesi akhole ario.”
12 Abasololi ba emirulo boosi beecha okhupatisibwa, bamureeba bari, “Omwechesi, khukhole sina?”
13 Wabakalusia wasunga ari, “Mukhasolola okhubira esikelo sia mwenyakha okhusolala ta.” 14 Abasikari boosi bamureeba bari, “Efwe nafwe khukhole sina?” Wabakalusia wasunga ari, “Mukhanuula yesi yesi chisendi khulwa okhumurikhirisia naho mumurekho ka akhakholile ta. Munyalikhe nende omurungo kwenyu.”
15 Abandu bali balindile okhulengela kalekholekha, barakikha okhwibaasia mumioyo kiabo niiba Yohana niye Kristo. 16 Yohana wasunga ari, “Esie endamupatiisianga nende amachi. Nebuchwa Omundu wuwo wulecha yinyuma wanje, wuli nende obunyali okhuukhila esie, wa esie ekholaana okhwinama hasi engangulule chiisia cha ebiraro biibie ta. Niye akhamupatiisie nende Roho Omutakatifu nende omulilo. 17 Wutilile esindu sia okhubisia yingano, ayibuusie khandi ayibunge musiachi, mani asambe omukhuchi nende omulilo kukhasimanga ta.” 18 Warumikhila chinjila chinyinji okhubatinyilisia nende okhubelwaachila likhuwa lilayi.
19 Halali Yohana wakondekhela omwami Heroti sikila yali wubukuule Herotia, mukha waandaye, nende amabi kandi koosi ka yali nakholile. 20 Halali Heroti watasa obubi khu mabi khulwa okhutiila Yohana mani wamura musiboe.
Okhupatisibwa khwa Yesu
(Matayo 3:13-17; Mariko 1:9-11)
21 Abandu boosi nebakhamala okhupatisibwa, Yesu yesi yeecha wapatisibwa. Lwa yali nalasayanga, likulu liekukha, 22 Roho Omutakatifu wamwikhakho khuli esifwanane sia lihusi, khandi omumilo kwarula mwikulu nakusunga kuri, “Ewe wubele omwana wanje omusiime, nasiimisibwa ninawe.”
Olwibulo lwa Yesu yarulamo
(Matayo 1:1-17)
23 Yesu narakikha emilimo kikie yali nende emiika amakhumi kataru. Abandu bamubukulilanga okhuba khwa Yosefu,
Matati yali khwa Lawi, Lawi yali khwa Meliki,
Meliki yali khwa Yanai, Yanai yali khwa Yosefu,
25 Yosefu yali khwa Matatia, Matatia yali khwa Amosi,
Amosi yali khwa Nahumu,
Nahumu yali khwa Esili,
Esili yali khwa Nakai,
26 Nakai yali khwa Maati,
Maati yali khwa Matatia,
Matatia yali khwa Semeini,
Semeini ya khwa Yoseki,
Yoseki yali khwa Yota,
27 Yota yali khwa Yoanani,
Yoanani yali khwa Resa,
Resa yali khwa Serubabeli,
Serubabeli yali khwa Sealitieli,
Sealitieli yali khwa Neri,
28 Neri yali khwa Meliki,
Meliki yali khwa Ati,
Ati yali khwa Kosamu,
Kosamu yali khwa Elimatamu,
Elimatamu yali khwa Eri,
29 Eri yali khwa Yosia,
Yosia yali khwa Elieseri,
Elieseri yali khwa Yorimu,
Yorimu yali khwa Matati,
Matati yali khwa Lawi,
30 Lawi yali khwa Simioni,
Simioni yali khwa Yuta,
Yuta yali khwa Yosefu,
Yosefu yali khwa Yonamu,
Yonamu yali khwa Eliakimu,
31 Eliakimu yali khwa Melea,
Melea yali khwa Mena,
Mena yali khwa Matata,
Matata yali khwa Nasan,
Nasan yali khwa Tauti,
32 Tauti yali Khwa Yese,
Yese yali khwa Obeti,
Obeti yali khwa Boasi,
Boasi yali khwa Salaa,
Sala yali khwa Naason,
33 Nashoni yali khwa Aminatapu,
Aminatapu yali khwa Atimini,
Atimini yali khwa Arini,
Arini yali khwa Hesironi,
Hesironi yali khwa Peresi,
Peresi yali khwa Yutea,
34 Yuta yali khwa Yakopo,
Yakopo yali khwa Isaka,
Isaka yali khwa Aburahamu,
Aburahamu yali khwa Teera,
Teera yali khwa Nahori,
35 Nahori yali khwa Seruki,
Seruki yali khwa Reu,
Reu yali khwa Peleki,
Peleki yali khwa Eberi,
Eberi yali khwa Sela,
36 Sela yali khwa Kainani,
Kainani yali khwa Arifakisati,
Arifakisati yali khwa Siemu,
Siemu yali khwa Noa,
Noa yali khwa Lameki,
37 Lameki yali khwa Metusela,
Metusela yali khwa Enoka,
Enoka yali khwa Chereti,
Chereti yali khwa Mahalaleli,
Mahalaleli yali khwa Kainani,
38 Kainani yali khwa Enosi,
Enosi yali khwa Seti,
Seti yali khwa Atamu,
Atamu yali Omwana wa Wele.