Okhwibulwa khwa Yesu
(Matayo 1:18-25)
2
1 Munyinga chilia omuruki Kaisaria Akosito yarusia lilaka ari abandu boosi ba mu esibala sia Roma babalwe. 2 Khuno khwali okhubalwa khwa abandu khwa okhuranga Kurenio nali Kabana wa Siria. 3 Kho abandu baacha okhubalwa buli sia mulala wayebulwa.4 Yosefu warula Kalilaya mulukoba lwa Nasareti, waacha Yutea mulukoba lwa Tauti lwa balanganga bari Betelehemu, sikila yali wa olwibulo lwa Tauti. 5 Yachayo okhubalwa nende Maria, omukhana wa bali nebalakana okhuyilana wali nabelekhe. 6 Lwa bali Betelehemu esise sia Maria okhwikangulula biatuukha. 7 Maria webula omwana omusiani, omwana wuwe omubele. Wamubiimba yingubo mani wamwalisia wa ebiaayo bililaanga, sikila chiinju cha abacheni chali chiichule.
Yingeloosi nende Abaayi
8 Khandi baliho abaayi bali nibamenya mumayilwe nebalindanga ebiaayo biabo esilo. 9 Yingeloosi ya Omwami yabalolekhela, obulafu bwa Omwami bwaakha buli abundu wa bali, mani oburi bwabatila. 10 Yingeloosi yabasungila yiri, “Mukharia ta! nimurerere likhuwa lilayi, lilarera obusangaafu mu abandu boosi. 11 Sikila enywe, omuhonia Omwami kristo wibulwe mulukoba lwa Tauti. 12 Sino nisio silaba esiechesi khu enywe: mulamunyoola omwana omutoro bamuboyile mubitambaa mani bamwaliisie khu siindu sia ebiaayo biliilangakho.”
13 Abwene na abwene, omukanda omukhongo kwa chingeloosi chindi cha mwikulu kwatubaana nende yingeloosi yilia, baafumia Wele ne basunga bari,
14 “Yifuma yikalukhile Wele wa mwikulu,
omulembe kube musialo nende khubaandu bamusimisia!”
15 Lwa yingeloosi yakalukha mwikulu, abaayi basungana bari, “Khubuukhe khuche Betelehemu, khulengele amakhuwa kekholekhe ka Omwami yakhakhusungila.” 16 Baarekukha baacha bwangu bwangu banyoola Maria nende Yosefu, khandi balengela omwana wukonile khu siindu sia ebiaayo biliilaangakho.
17 Lwa balengela omwana bamanyisia abandu amakhuwa ka bali nebasungilwe khu mwana mwene. 18 Abandu boosi lwa bahulila amakhuwa ka abaayi balia bahuka. 19 Halali Maria waara amakhuwa kalia koosi mumwoyo kukwe nende munganakani chiiche.
20 Abaayi balia bakalukhayo nebekhoyela nebamufumia Wele sikila kebali nebahulile nende okhulengela, kali buchwa khuli basungilwa.
21 Chinyinga munane chaawa, omwana wasebwa mani bamukulikha bari Yesu, eliira lia yingeloosi yasungila maayi wuwe nasili okhubelekha.
Simioni Wafumia Omwami
22 Chinyinga cha okhwisaruula lwa chatuukha, okhulondekhana nende amalako ka Musa, baayila omwana Yesu Yerusalemu mu litembeli yimbeli wa Omwami.
23 Okhulondekhana nende amalaka ka Omwami, omwana omubele omusiani alahanwa khu Omwami Wele. 24 Khandi bayila esihanwa okhulondekhana nende amalaka ka Musa kasunga kari, “Amausi kabili ka mwisiino naho ka okhubaya.”
25 Yaliho omundu Yerusalemu bari Simioni, wali omundu omuluungi khandi omuraboola. Wali neyaalinda Israeli yihonisibwe khandi yali wayechusibwa nende Roho Omutakatifu. 26 Roho yali wamwechesia ari se akhafwe nasili okhulola Omwami Kristo ta. 27 Roho wareera Simioni mu litembeli, lwa abebuli bareera omwana Yesu kho bamukholele okhulondekhana nende amalako. 28 Wabukula omwana mumakhono kaake, wafumia Wele wasunga ari,
29 “Omwami Omukhongo, nono onyala walekhuula omukhalabani wuwo wakona mumulembe,
sikila wukholile khuli walaka.
30 Sikila chimoni chanje chilengele obuhonia bubwo,
31 bwa olombile yimbeli wa abandu boosi.
32 Niye wuli obuwaanga bwa lifumulula khu abandu bakhali Abaisraeli,
nende yifuma khu abandu baabo Abaisraeli.”
33 Abebuli bahuka khwako ka yalakaya khu mwana. 34 Kho Simioni wabiita omwana chikhabi, wasungila maayi wuwe ari, “Omwana wuno akhakile Abaisraeli abakali bakwe ne abandi basinjile. Akhabe esilolelo okhurula khu Wele sia abandu abakali bakhekaane, 35 kho amebaasio kaabo kechesibwe abuwanga. Mani ewe Maria, okhahulile obululu khuli bwa okhuhunwa esilotwa.”
36 Mu litembeli mulia omung'oosi yalimo bari Ana, omukoko wa Fanweli wa olwibulo lwa Asheri. Yali mulukhasi emiika musafu kho omusacha wuwe waafwa, ne nono yali wusakhuule. 37 Yali namulekhwa nabwila yatukha emiika amakhumi munane nende kine. Seyarulakho mu litembeli ta, yechomianga Omwami esilo nende esiteere, nayeyimana esiakhulia nasaaya. 38 Ebisee biene Simoni neyakhamala, Ana wecha wafumia Wele mani walakaya amakhuwa khu omwana Yesu, okhulondekhana nende okhuhonisibwa khwa Yerusalemu khwa abandu bali nibaliindanga.
39 Ne bakhamala okhukhola emilukha kiosi khuli lilaka lia Omwami lisunga, bakalukha Nasareti ya Kalilaya. 40 Omwana wakhulunduwa waba nende amani, wechula obusicha mani Wele waba ninaye.
Omusiani Yesu wasikala mu litembeli
41 Abebuli ba Yesu bachichanga Yerusalem buli omwiika mukhoyo ya Epasaka 42 Yesu khuli yatukha emiika likhumi ne kibili, baacha ninaye mwikhoyo okhulondekhana nende emiima kiabo. 43 Epasaka neyakhawa abebuli ba Yesu barekukha bakalukha yingo, omusiani Yesu wasikala yinyuma Yerusalemu, halali abebuli baabe sebamanya ta! 44 Halali bapaara buchwa bari wubeele mu abandu bandi, bachililila nende oluchendo lwa yinyinga ndala, kho barakikha okhumukaaka mubalebe nende abalina. 45 Sebamunyoola ta, kho bakalukha Yerusalemu okhumukaaka. 46 Yinyinga ya khataru bamunyoola mu litembeli wikhale akarikari wa abechesi ba amalako, alabarekeresianga nabareeba amareebo. 47 Buli omundu wamurekeresia yahuka khuli yali nayamanya amakhuwa amakali khandi khuli yakalusianga amareebo. 48 Lwa abebuli baabe bamulengela bahuka. Maayi wuwe wasunga ari; “Mwana wanje siina sikila nokhola ori? Lengela papa wuwo ninasie khuli khunyakhane nekhulakhukakanga.” 49 Wabasungila ari; “Sina sikilile enywe nemungaka? Se mumanya muri esie nenyekhana okhuba munju ya Papa wanje ta?” 50 Halali sebamanya lia yali nalabasungilanga ta. 51 Kho barekukha beekha baacha Nasareti, Yesu waba nende liria khu bebuli baabe. Maayi wuwe wabiikha amakhuwa kalia mumwoyo kukwe. 52 Yesu wakhulunduwa, waba nende obusicha, mani Wele nende abandu bamuyanja.