𖼽𖽱𖾐 𖼳𖽪𖾐 𖼽𖽕𖾑 𖼺𖽪𖾑 20

𖼀𖽑𖽻𖾐 𖼈𖽜 𖼖𖽪𖾐

1 𖼽𖽺𖾐 𖼦𖽴 𖼦𖽫 𖼽𖽱𖾐 𖼳𖽪𖾐 𖼽𖽕𖾑 𖼖𖽙𖾐 𖼀𖽦𖾐： 2 “𖼐𖽑𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼀𖽦𖾐 𖼊𖽑𖽧 𖼖𖽡𖾐： ‘𖼣𖽙𖾐 𖼄𖽚 𖼳𖽡𖾐 𖼊𖽑𖽺 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐，𖼐𖽑𖽡𖾐 𖼈𖽳𖾐 𖼽𖽻 𖼄𖽳𖾑 𖼖𖽙𖾐 𖼀𖽙𖾐 𖼀𖽑𖽻𖾐 𖼈𖽜 𖼖𖽪𖾐 𖼺𖽺𖾐 𖼊𖽑𖽧 𖼖𖽻𖾐 𖼖𖽡𖾐． 3 𖽃𖽔𖾐 𖼺𖽺𖾑，𖼊𖽡 𖼮𖽑𖽻 𖼄𖽔 𖼮𖽑𖽡𖾐 𖼄𖽙𖾐 𖼷𖽑𖽻𖾐 𖼺𖽦 𖼦𖽑𖽙𖾐 𖼺𖽪𖾐 𖼞𖽜，𖼮𖽡𖽪 𖼖𖽪𖾐 𖼞𖽑𖽶𖾑 𖼹𖽻𖾐 𖼞𖽳𖾐 𖼽𖽡𖾐 𖼺𖽺𖾑，𖼖𖽦 𖼂𖽚𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖽂𖽙𖾐 𖼮𖽡𖽪 𖼀𖽑𖽻𖾐 𖼊𖽙𖾐．

4 𖼷𖽑𖽻𖾐 𖼺𖽦 𖼺𖽪𖾐 𖼮𖽡𖽪 𖼖𖽪𖾐 𖼦𖽑𖽺𖾑 𖼹𖽻𖾐 𖼞𖽳𖾐 𖼊𖽑𖽡 𖼊𖽝𖾐 𖼞𖽑𖽶𖾐 𖼽𖽡𖾐，𖼖𖽪𖾐 𖽃𖽔𖾑 𖼊𖽪 𖼞𖽳𖾐 𖼽𖽻 𖼄𖽳𖾑 𖼞𖽑𖽙𖾐 𖼂𖽺𖾐 𖼺𖽪𖾐 𖼄𖽡𖽻 𖼦𖽑𖽺 𖼺𖽺𖾑，𖼖𖽪𖾐 𖼞𖽑𖽶𖾐 𖼮𖽳 𖼄𖽻 𖼊𖽑𖽺 𖼰𖽨𖾐 𖼖𖽡𖾐．𖽃𖽔𖾐 𖼺𖽺𖾑，𖼮𖽳 𖼄𖽻 𖼽𖽻 𖼊𖽑𖽺 𖼹𖽶𖾐 𖼖𖽪𖾐 𖼞𖽑𖽶𖾐 𖼊𖽡 𖼽𖽡𖾐，𖼽𖽻 𖼈𖽳𖾐 𖼮𖽻𖾐 𖼞𖽳𖾐 𖼮𖽑𖽡𖾐，𖼦𖽑𖽔𖾐 𖼖𖽺𖾑 𖼮𖽻𖾐 𖼞𖽳𖾐 𖼽𖽻 𖼊𖽑𖽺 𖼞𖽜 𖼺𖽺𖾑，𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖽂𖽙𖾐 𖼮𖽻𖾐 𖼊𖽙𖾐 𖼖𖽡𖾐． 5 𖼖𖽦 𖼂𖽚𖾐 𖼺𖽪𖾐 𖼷𖽑𖽻𖾐 𖼽𖽻 𖼊𖽑𖽺 𖼞𖽕 𖼖𖽻𖾐 𖼊𖽑𖽡𖾑 𖼣𖽻𖾐，𖼮𖽳 𖼄𖽻 𖼽𖽻 𖼊𖽑𖽺 𖼰𖽡𖽻𖾐 𖼺𖽺𖾑 𖼖𖽦 𖼂𖽚𖾐 𖼺𖽪𖾐 𖼷𖽑𖽻𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖽂𖽙𖾐 𖼰𖽡𖽺𖾐 𖼄𖽔 𖼊𖽙𖾐．𖼞𖽪𖾐 𖼮𖽡𖽺𖾐，𖼽𖽻 𖼷𖽑𖽻𖾐 𖼺𖽦 𖼞𖽑𖽶𖾑 𖼊𖽡 𖼮𖽑𖽻 𖼄𖽔 𖼮𖽑𖽡𖾐 𖼺𖽪𖾐 𖼣𖽻𖾐，𖼽𖽻 𖽃𖽙𖾑 𖼄𖽺 𖼊𖽑𖽙 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼖𖽙𖾐 𖼮𖽑𖽻𖾐 𖼦𖽑𖽦 𖼞𖽑𖽴 𖼄𖽔 𖼠𖽚． 6 𖼷𖽑𖽻𖾐 𖼺𖽦 𖼺𖽪𖾐 𖼞𖽑𖽶𖾑 𖼽𖽚𖾐 𖼖𖽪𖾐 𖼞𖽑𖽶𖾐 𖼮𖽻𖾐 𖼺𖽺𖾑，𖼽𖽻 𖼷𖽑𖽻𖾐 𖼷𖽪𖾐 𖽃𖽙𖾑 𖼄𖽺 𖼮𖽑𖽡𖽺 𖼳𖽶 𖼊𖽻 𖼐𖽙𖾐 𖼷𖽶𖾐 𖼦𖽑𖽙𖾐，𖼦𖽑𖽔𖾐 𖼖𖽺𖾑 𖼳𖽡𖽻𖾐 𖼺𖽺𖾑 𖼞𖽑𖽶𖾑 𖼮𖽶𖾐 𖼞𖽳𖾐 𖼍𖽡𖾐 𖼄𖽻 𖼈𖽳 𖼳𖽶𖾐 𖼦𖽑𖽙𖾐 𖼺𖽺𖾑，𖼀𖽑𖽚𖾐 𖼽𖽻 𖼮𖽡𖽪 𖼊𖽑𖽧 𖼖𖽻𖾐 𖼞𖽳𖾐 𖼖𖽪𖾐 𖼐𖽺𖾐 𖽃𖽔𖾑 𖼞𖽑𖽶𖾐 𖽂𖽙𖾐 𖼞𖽚 𖼽𖽡𖾐 𖼊𖽙𖾐．’” 7 𖽃𖽔𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼐𖽕 𖼇𖽮 𖼊𖽑𖽔𖾐 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖽂𖽙 𖼰𖽡𖽺𖾐 𖼀𖽙 𖼰𖽡𖽔𖾐 𖼖𖽡𖾑 𖼖𖽡𖾑 𖼄𖽡𖾐 𖼊𖽺𖾐 𖼰𖽡𖾐 𖼍𖽡 𖼺𖽶𖾐 𖼖𖽪𖾐 𖼺𖽺𖾐 𖼊𖽑𖽧 𖼖𖽻𖾐，𖼽𖽡 𖼇𖽕 𖼖𖽡𖽦 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖽂𖽙 𖼰𖽡𖽺𖾐 𖼀𖽙 𖼳𖽶𖾑 𖼰𖽡𖽦𖾑 𖼖𖽪𖾐 𖼊𖽑𖽺 𖼺𖽺𖾐 𖼊𖽑𖽧 𖼖𖽻𖾐，𖼽𖽚 𖼍𖽕𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖽂𖽙 𖼰𖽡𖽺𖾐 𖼀𖽙 𖼰𖽡𖾐 𖼖𖽡𖽦𖾑 𖼽𖽕𖾑 𖼂𖽔𖾐 𖼖𖽪𖾐 𖼊𖽑𖽺 𖼺𖽺𖾐 𖼊𖽑𖽧 𖼖𖽻𖾐，𖼰𖽡𖾐 𖼖𖽡𖽦𖾑 𖼽𖽕𖾑 𖼂𖽔𖾐 𖼦𖽑𖽺𖾑 𖼳𖽡𖾐 𖼂𖽚 𖼖𖽪𖽦 𖼣𖽻𖾐． 8 𖼹𖽦𖾑 𖼽𖽺𖾐 𖼖𖽡𖾑 𖼠𖽜𖾐 𖼖𖽪𖾐 𖼐𖽺𖾐 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼮𖽡𖾐 𖼊𖽚𖾐 𖼄𖽡𖾐 𖼀𖽳，𖼖𖽡𖽚 𖼂𖽡𖽦𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼄𖽡𖾐 𖼳𖽡𖽻𖾐 𖼀𖽙 𖼊𖽺𖾐 𖼠𖽻𖾐 𖼄𖽙𖾐 𖼊𖽑𖽺 𖼂𖽡 𖼳𖽡𖾐 𖼖𖽪𖾐 𖼊𖽑𖽺 𖼺𖽺𖾐 𖼊𖽑𖽧 𖼖𖽻𖾐，𖼰𖽡𖽔𖾐 𖼍𖽴 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼰𖽡𖾐 𖼖𖽡𖽦𖾑 𖼄𖽡𖾐 𖼊𖽺𖾐 𖼖𖽔𖾐 𖼄𖽚𖾑 𖼖𖽪𖾐 𖼊𖽑𖽺 𖼺𖽺𖾐 𖼊𖽑𖽧 𖼖𖽻𖾐，𖼄𖽔 𖼐𖽕 𖼳𖽡𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼂𖽔𖾐 𖼳𖽔𖾐 𖼄𖽡𖾐 𖼊𖽺𖾐 𖼠𖽜𖾐 𖼖𖽕 𖼖𖽪𖾐 𖼊𖽑𖽺 𖼺𖽺𖾐 𖼊𖽑𖽧 𖼖𖽻𖾐． 9 𖼦𖽑𖽺𖾑 𖼹𖽻𖾐 𖼄𖽳𖾑 𖼄𖽳 𖼖𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼐𖽺𖾐 𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖼮𖽻𖾐 𖼺𖽪𖾐 𖼞𖽑𖽻𖾐 𖼂𖽻𖾑 𖼀𖽑𖽙 𖼖𖽙𖾐 𖼀𖽙𖾐 𖼺𖽺𖾐 𖼊𖽑𖽧 𖼖𖽻𖾐 𖼺𖽪𖾐 𖼀𖽑𖽻𖾐 𖼈𖽜 𖼖𖽪𖾐 𖼣𖽻𖾐．𖼽𖽻 𖼄𖽳𖾑 𖼊𖽡 𖼮𖽑𖽻 𖼄𖽔 𖼮𖽑𖽡𖾐 𖼄𖽙𖾐 𖼷𖽑𖽻𖾐 𖼺𖽦 𖼺𖽪𖾐 𖼞𖽜 𖼮𖽡𖽪 𖼀𖽑𖽻𖾐 𖼞𖽑𖽶𖾑 𖼠𖽻𖾐 𖽂𖽙𖾐 𖼽𖽡𖾐 𖼊𖽙𖾐，𖼖𖽦 𖼂𖽚𖾐 𖼺𖽪𖾐 𖼷𖽑𖽻𖾐 𖼞𖽜 𖼺𖽦 𖼄𖽳𖾐 𖼄𖽔 𖼻𖽻𖾐，𖼽𖽻 𖼞𖽜 𖼷𖽑𖽻𖾐 𖼷𖽪𖾐 𖽃𖽙𖾑 𖼄𖽺 𖼮𖽑𖽡𖽺 𖼳𖽶 𖼊𖽻 𖼐𖽙𖾐 𖼷𖽶𖾐 𖼄𖽳𖾐 𖼞𖽑𖽶𖾑 𖼮𖽶𖾐 𖼮𖽑𖽡𖾐．