𖽃𖽦𖾐 𖼰𖽧 𖼊𖽚𖾐 𖼺𖽪𖾑 38

𖼍𖽡𖾐 𖼷𖽻𖾐 𖼹𖽸𖾑

1 𖼽𖽻 𖼈𖽳𖾐 𖼮𖽑𖽪 𖼠𖽴𖾐 𖼺𖽧𖾐 𖼻𖽜 𖼍𖽡𖾐 𖼷𖽻𖾐 𖼹𖽸𖾑，𖼍𖽡𖾐 𖼷𖽻𖾐 𖼞𖽳𖾐 𖼞𖽑𖽫𖾐 𖼳𖽶𖾐 𖼷𖽙𖾐 𖼖𖽙𖾐 𖼺𖽶𖾑，𖼳𖽶𖾐 𖼞𖽳𖾐 𖼣𖽙 𖼖𖽦 𖼞𖽚 𖼮𖽻𖾐，𖼞𖽑𖽫𖾐 𖼞𖽳𖾐 𖼣𖽙 𖼖𖽦 𖼞𖽚 𖼮𖽻𖾐，𖼄𖽶𖾐 𖼞𖽳𖾐 𖼺𖽙𖾐 𖼖𖽦 𖼞𖽚 𖼮𖽻𖾐． 2 𖼍𖽡𖾐 𖼷𖽻𖾐 𖼞𖽳𖾐 𖼖𖽡𖾐 𖼣𖽴 𖼊𖽑𖽺 𖼮𖽑𖽡𖽪𖾐 𖼖𖽡𖾐 𖼂𖽦𖾐 𖼹𖽸𖾑 𖼍𖽴𖾑，𖼮𖽑𖽡𖽪𖾐 𖼞𖽑𖽶𖾑 𖼍𖽡𖾐 𖼷𖽻𖾐 𖼖𖽙𖾐 𖼊𖽴，𖼮𖽡 𖼻𖽜 𖼍𖽡𖾐 𖼷𖽻𖾐 𖼊𖽑𖽺 𖼂𖽻𖾐 𖼍𖽡． 3 𖼦𖽑𖽔𖾐 𖼖𖽺𖾑 𖼮𖽡 𖼻𖽜 𖼍𖽡𖾐 𖼷𖽻𖾐 𖼊𖽑𖽺 𖼞𖽑𖽪 𖼖𖽪𖾐 𖼞𖽑𖽴 𖼖𖽚𖾐 𖼂𖽚𖾐 𖼄𖽡𖽻 𖼐𖽑𖽡 𖼐𖽺𖾐 𖼞𖽑𖽪 𖼖𖽪𖾐 𖼰𖽡𖽺𖾐 𖼞𖽳𖾐 𖼖𖽻 𖼹𖽸𖾑，𖼹𖽦𖾑 𖼺𖽡𖾑 𖼀𖽑𖽦 𖼖𖽦、 𖼦𖽙 𖼊𖽑𖽪𖾐 𖼖𖽚𖾐 𖼂𖽚𖾐 𖽃𖽔𖾑 𖼞𖽚 𖼖𖽦 𖼐𖽺𖾐 𖽃𖽔𖾐 𖼍𖽚𖾑 𖼞𖽑𖽴 𖼮𖽑𖽳 𖼖𖽚𖾐 𖼂𖽚𖾐 𖼄𖽡𖽻 𖼐𖽑𖽡 𖼹𖽸𖾑． 𖼍𖽡𖾐 𖼷𖽻𖾐 𖼞𖽳𖾐 𖼄𖽡𖽻 𖼐𖽑𖽡 𖼻𖽜 𖼊𖽪𖾐 𖼞𖽑𖽙𖾐 𖼣𖽻𖾐 𖼮𖽡 𖼻𖽜 𖼹𖽸𖾑 𖼺𖽪𖾐 𖼣𖽻𖾐． 4 𖼹𖽦𖾑 𖼮𖽡 𖼻𖽜 𖼍𖽡𖾐 𖼷𖽻𖾐 𖼖𖽙𖾐 𖼀𖽙𖾐 𖼂𖽜𖾑 𖼊𖽑𖽡 𖼊𖽝𖾐 𖼹𖽸𖾑，𖼂𖽜𖾑 𖼦𖽑𖽺𖾑 𖼀𖽑𖽨 𖼍𖽡𖾐 𖼷𖽻𖾐 𖼮𖽑𖽡𖽺 𖼞𖽳𖾐 𖼮𖽑𖽻𖾐 𖼍𖽴𖾑 𖼍𖽪𖾐 𖼺𖽺𖾑，𖼍𖽕𖾑 𖽂𖽚 𖼀𖽳 𖼍𖽡𖾐 𖼷𖽻𖾐 𖼮𖽚 𖼀𖽺𖾐 𖼞𖽳𖾐 𖼮𖽑𖽡𖾐． 5 𖼦𖽑𖽔𖾐 𖼖𖽺𖾑 𖼂𖽜𖾑 𖼞𖽳𖾐 𖼖𖽡𖾐 𖼣𖽴 𖼊𖽑𖽺 𖼮𖽡 𖼠𖽪𖾐 𖼖𖽪𖾐 𖼖𖽡𖾐 𖼊𖽝𖾐 𖼹𖽸𖾑 𖼍𖽴𖾑，𖼍𖽡𖾐 𖼷𖽻𖾐 𖼈𖽦𖾑 𖼖𖽜 𖼺𖽳𖾐 𖼰𖽡𖽺𖾐 𖼞𖽳𖾐 𖼂𖽺𖾐． 6 𖼹𖽦𖾑 𖼮𖽑𖽪 𖼠𖽴𖾐 𖼺𖽧𖾐 𖼻𖽜 𖼍𖽡𖾐 𖼷𖽻𖾐 𖼞𖽳𖾐 𖼈𖽦𖾑 𖼖𖽜 𖼹𖽸𖾑，𖼮𖽡 𖼻𖽜 𖼈𖽦𖾑 𖼖𖽜 𖼊𖽑𖽺 𖼂𖽻𖾐 𖼍𖽡． 7 𖼈𖽦𖾑 𖼖𖽜 𖼺𖽳𖾐 𖼍𖽡𖾐 𖼷𖽻𖾐 𖼐𖽑𖽡 𖼀𖽳 𖼞𖽳𖾐 𖼠𖽪𖾐 𖼖𖽪𖾐 𖼞𖽑𖽶𖾐 𖼰𖽡𖽺𖾐 𖼺𖽺𖾑，𖼍𖽡𖾐 𖼷𖽻𖾐 𖼊𖽑𖽺 𖼈𖽦𖾑 𖼺𖽜 𖼖𖽚𖾐 𖼂𖽚𖾐 𖼂𖽺𖾐． 𖼍𖽡𖾐 𖼷𖽻𖾐 𖼦𖽑𖽺𖾑 𖼺𖽧𖾐 𖼀𖽑𖽡 𖼻𖽜 𖼹𖽸𖾑 𖼺𖽪𖾐 𖼣𖽻𖾐，𖼍𖽡𖾐 𖼷𖽻𖾐 𖼠𖽻𖾐 𖼊𖽑𖽺 𖼞𖽻𖾑 𖼞𖽻 𖼮𖽻𖾐．

𖼊𖽪 𖼖𖽻 𖼹𖽸𖾑 (𖼊𖽚𖾐 30：18)

8 𖼽𖽻 𖼈𖽳𖾐 𖼮𖽡 𖼻𖽜 𖼮𖽑𖽡𖾐 𖼈𖽶 𖼖𖽦 𖼈𖽶 𖼷𖽑𖽡 𖼖𖽚𖾐 𖼂𖽚𖾐 𖼊𖽪 𖼖𖽻 𖼹𖽸𖾑，𖼹𖽦𖾑 𖼊𖽪 𖼖𖽻 𖼍𖽡𖾐 𖼞𖽳𖾐 𖼖𖽺𖾑 𖼹𖽸𖾑，𖼞𖽑𖽶𖾑 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖽃𖽔𖾑 𖼊𖽪 𖼮𖽑𖽡𖽺 𖼞𖽳𖾐 𖼠𖽙𖾐 𖼳𖽙𖾐 𖼺𖽪𖾐 𖼻𖽙 𖼄𖽳 𖼄𖽡𖾐 𖼐𖽜𖾐 𖼞𖽳𖾐 𖼀𖽑𖽡𖽻 𖼐𖽦𖾐 𖼊𖽪𖾐 𖼻𖽜 𖼹𖽸𖾑 𖼺𖽪𖾐 𖼣𖽻𖾐．

𖼮𖽡𖽺 𖼞𖽪 𖼂𖽺𖾐 𖼍𖽙𖾑

9 𖼽𖽻 𖼈𖽳𖾐 𖼹𖽦𖾑 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼖𖽙𖾐 𖼀𖽙𖾐 𖼮𖽡𖽺 𖼞𖽪 𖼂𖽺𖾐 𖼍𖽙𖾑，𖼈𖽝 𖼊𖽑𖽧 𖼖𖽻𖾐 𖼺𖽪𖾐 𖼽𖽦 𖼄𖽳𖾐 𖼮𖽑𖽡𖾐 𖼄𖽶𖾑 𖼄𖽶𖾐 𖼞𖽑𖽶𖾑 𖼳𖽶 𖼻𖽜 𖼺𖽺𖾑，𖼮𖽡𖽺 𖼞𖽪 𖼖𖽙𖾐 𖼀𖽙𖾐 𖼠𖽳𖾐 𖼻𖽸 𖼄𖽡𖾐 𖼀𖽳 𖼮𖽑𖽨𖾑 𖼮𖽑𖽙𖾐 𖼂𖽺𖾐，𖼮𖽑𖽨𖾑 𖼮𖽑𖽙𖾐 𖼄𖽳𖾑 𖼄𖽳 𖼳𖽶𖾐 𖼞𖽳𖾐 𖼊𖽑𖽡 𖼦𖽑𖽙𖾐 𖼖𖽦 𖼞𖽚 𖼮𖽻𖾐． 10 𖼮𖽑𖽨𖾑 𖼮𖽑𖽙𖾐 𖼞𖽳𖾐 𖼠𖽻𖾐 𖼻𖽶𖾐 𖼐𖽑𖽡 𖼷𖽑𖽡𖾐 𖼮𖽑𖽡𖾐 𖼹𖽸𖾑，𖼮𖽡 𖼍𖽡𖾐 𖼮𖽚𖾐 𖼐𖽑𖽡 𖼷𖽑𖽡𖾐 𖼊𖽝𖾐 𖼹𖽸𖾑，𖼠𖽻𖾐 𖼻𖽶𖾐 𖼊𖽑𖽺 𖼍𖽴𖾑 𖼺𖽪𖾐 𖽃𖽔𖾑 𖼞𖽚 𖼖𖽦 𖼐𖽺𖾐 𖼰𖽡𖽻𖾑 𖼖𖽜𖼄𖽳𖾑 𖼄𖽳 𖼀𖽑𖽨𖾐 𖼻𖽜 𖼹𖽸𖾑． 11 𖼳𖽶 𖼐𖽑𖽡𖽻𖾐 𖼄𖽡𖾐 𖼀𖽳 𖼖𖽺𖾑 𖼞𖽑𖽶𖾑 𖼖𖽙𖾐 𖼺𖽶𖾑，𖼮𖽑𖽨𖾑 𖼮𖽑𖽙𖾐 𖼞𖽳𖾐 𖼠𖽻𖾐 𖼻𖽶𖾐 𖼐𖽑𖽡 𖼷𖽑𖽡𖾐 𖼮𖽑𖽡𖾐，𖼮𖽡 𖼍𖽡𖾐 𖼮𖽚𖾐 𖼐𖽑𖽡 𖼷𖽑𖽡𖾐 𖼊𖽝𖾐 𖼹𖽸𖾑，𖼠𖽻𖾐 𖼻𖽶𖾐 𖼊𖽑𖽺 𖼍𖽴𖾑 𖼺𖽪𖾐 𖽃𖽔𖾑 𖼞𖽚 𖼖𖽦 𖼐𖽺𖾐 𖼰𖽡𖽻𖾑 𖼖𖽜 𖼄𖽳𖾑 𖼄𖽳 𖼀𖽑𖽨𖾐 𖼻𖽜 𖼹𖽸𖾑． 12 𖼮𖽡𖽺 𖼞𖽪 𖼞𖽳𖾐 𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖼮𖽑𖽨𖾑 𖼮𖽑𖽙𖾐，𖼞𖽑𖽫𖾐 𖼞𖽳𖾐 𖼣𖽙 𖼷𖽑𖽡𖾐 𖼖𖽦 𖼞𖽚 𖼮𖽻𖾐，𖼮𖽑𖽨𖾑 𖼮𖽑𖽙𖾐 𖼠𖽻𖾐 𖼻𖽶𖾐 𖼷𖽑𖽡𖾐 𖼮𖽑𖽡𖾐，𖼮𖽡 𖼍𖽡𖾐 𖼮𖽚𖾐 𖼷𖽑𖽡𖾐 𖼊𖽝𖾐，𖼠𖽻𖾐 𖼻𖽶𖾐 𖼊𖽑𖽺 𖼍𖽴𖾑 𖼺𖽪𖾐 𖽃𖽔𖾑 𖼞𖽚 𖼖𖽦 𖼐𖽺𖾐 𖼰𖽡𖽻𖾑 𖼖𖽜𖼄𖽳𖾑 𖼄𖽳 𖼀𖽑𖽨𖾐 𖼻𖽜 𖼹𖽸𖾑． 13 𖼮𖽡𖽺 𖼞𖽪 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼞𖽑𖽫𖾐 𖼞𖽳𖾐 𖼣𖽙 𖼷𖽑𖽡𖾐 𖼖𖽦 𖼞𖽚 𖼮𖽻𖾐．

14 𖽃𖽔𖾑 𖼊𖽪 𖼦𖽜 𖼷𖽜𖾐 𖼽𖽙𖾐 𖼀𖽳 𖼞𖽳𖾐 𖼮𖽑𖽨𖾑 𖼮𖽑𖽙𖾐，𖼞𖽑𖽫𖾐 𖼞𖽳𖾐 𖼷𖽑𖽡𖾐 𖼣𖽙 𖼖𖽦 𖼞𖽚 𖼮𖽻𖾐，𖼮𖽑𖽨𖾑 𖼮𖽑𖽙𖾐 𖼞𖽳𖾐 𖼠𖽻𖾐 𖼻𖽶𖾐 𖼺𖽙𖾐 𖼮𖽑𖽡𖾐，𖼮𖽡 𖼍𖽡𖾐 𖼮𖽚𖾐 𖼺𖽙𖾐 𖼊𖽝𖾐 𖼮𖽻𖾐． 15 𖽃𖽔𖾑 𖼊𖽪 𖼦𖽜 𖼷𖽜𖾐 𖼈𖽳𖾑 𖼀𖽳 𖼮𖽑𖽨𖾑 𖼮𖽑𖽙𖾐 𖼖𖽺𖾑 𖼞𖽑𖽫𖾐 𖼞𖽳𖾐 𖼷𖽑𖽡𖾐 𖼣𖽙 𖼖𖽦 𖼞𖽚 𖼮𖽻𖾐，𖼠𖽻𖾐 𖼻𖽶𖾐 𖼺𖽙𖾐 𖼮𖽑𖽡𖾐，𖼮𖽡 𖼍𖽡𖾐 𖼮𖽚𖾐 𖼺𖽙𖾐 𖼊𖽝𖾐 𖼮𖽻𖾐． 16 𖼮𖽡𖽺 𖼞𖽪 𖼦𖽜 𖼷𖽜𖾐 𖼞𖽳𖾐 𖼮𖽑𖽨𖾑 𖼮𖽑𖽙𖾐，𖼄𖽳𖾑 𖼄𖽳 𖼖𖽺𖾑 𖼈𖽝 𖼊𖽑𖽧 𖼖𖽻𖾐 𖼺𖽪𖾐 𖼽𖽦 𖼄𖽳𖾐 𖼮𖽑𖽡𖾐 𖼄𖽶𖾑 𖼄𖽶𖾐 𖼞𖽑𖽶𖾑 𖼳𖽶 𖼻𖽜 𖼷𖽝 𖼀𖽑𖽢 𖼺𖽪𖾐 𖼣𖽻𖾐． 17 𖼮𖽡𖽺 𖼞𖽪 𖼰𖽻𖾐 𖼖𖽡𖾐 𖼖𖽡𖾐 𖼦𖽑𖽡𖽚 𖼺𖽪𖾐 𖼠𖽻𖾐 𖼻𖽶𖾐，𖼄𖽳𖾑 𖼄𖽳 𖼀𖽑𖽨𖾐 𖼰𖽡𖽻𖾑 𖼖𖽜 𖼻𖽜 𖼷𖽙𖾐 𖼖𖽙𖾐 𖼹𖽙𖾑 𖼍𖽪𖾐． 𖼠𖽻𖾐 𖼻𖽶𖾐 𖼊𖽑𖽺 𖼀𖽑𖽨𖾐 𖽃𖽔𖾑 𖼞𖽚 𖼖𖽦 𖼍𖽴𖾑，𖼍𖽡𖾐 𖼮𖽚𖾐 𖼮𖽡 𖼻𖽜 𖼹𖽸𖾑 𖼺𖽪𖾐 𖼣𖽻𖾐，𖼠𖽻𖾐 𖼻𖽶𖾐 𖼐𖽺𖾐 𖼻𖽶𖾐 𖼮𖽑𖽡𖽪𖾐 𖼀𖽑𖽨𖾐 𖼻𖽜 𖼂𖽻𖾐 𖼍𖽡．

18 𖼮𖽡𖽺 𖼞𖽪 𖼞𖽳𖾐 𖼠𖽳𖾑 𖼄𖽡𖾐 𖼊𖽪 𖼮𖽑𖽨𖾑 𖼄𖽳𖾐，𖼞𖽑𖽶𖾑 𖼄𖽳𖾐 𖼷𖽺 𖼖𖽕𖾑 𖼖𖽕、 𖼐𖽑𖽡𖾐 𖼀𖽸、 𖼐𖽑𖽡𖾑 𖼐𖽑𖽡𖾐 𖼐𖽺𖾐 𖼈𖽝 𖼊𖽑𖽧 𖼖𖽻𖾐 𖼺𖽪𖾐 𖼽𖽦 𖼄𖽳𖾐 𖼮𖽑𖽡𖾐 𖼄𖽶𖾑 𖼄𖽶𖾐 𖼞𖽑𖽶𖾑 𖼳𖽶 𖼻𖽜，𖼖𖽦 𖼠𖽸𖾑 𖼞𖽜 𖼷𖽝 𖼀𖽑𖽢 𖼺𖽪𖾐 𖼣𖽻𖾐，𖼳𖽶𖾐 𖼞𖽳𖾐 𖼐𖽑𖽡 𖼷𖽑𖽡𖾐 𖼖𖽦 𖼞𖽑𖽚 𖼮𖽻𖾐，𖼄𖽶𖾐 𖼞𖽳𖾐 𖼣𖽙 𖼖𖽦 𖼞𖽚 𖼮𖽻𖾐，𖼮𖽡𖽺 𖼞𖽪 𖼞𖽳𖾐 𖼮𖽑𖽨𖾑 𖼮𖽑𖽙𖾐 𖼷𖽙𖾐 𖼖𖽙𖾐 𖼄𖽶𖾐 𖼮𖽻𖾐． 19 𖼠𖽳𖾑 𖼄𖽡𖾐 𖼊𖽪 𖼮𖽑𖽨𖾑 𖼄𖽳𖾐 𖼞𖽳𖾐 𖼠𖽻𖾐 𖼻𖽶𖾐 𖼖𖽡𖾐 𖼮𖽑𖽡𖾐，𖼮𖽡 𖼍𖽡𖾐 𖼮𖽚𖾐 𖼖𖽡𖾐 𖼊𖽝𖾐，𖼠𖽻𖾐 𖼻𖽶𖾐 𖼊𖽑𖽺 𖼀𖽑𖽨𖾐 𖽃𖽔𖾑 𖼞𖽚 𖼖𖽦 𖼍𖽴𖾑，𖼻𖽶𖾐 𖼮𖽑𖽡𖽪𖾐 𖼐𖽺𖾐 𖼰𖽡𖽻𖾑 𖼖𖽜 𖼊𖽑𖽺 𖼀𖽑𖽨𖾐 𖼻𖽜 𖼂𖽻𖾐 𖼍𖽡．

20 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐𖼐𖽺𖾐 𖼮𖽡𖽺 𖼞𖽪 𖼞𖽳𖾐 𖼞𖽑𖽙𖾐 𖼻𖽜 𖼺𖽪𖾐 𖼦𖽜𖾐 𖼹𖽙𖾑，𖼄𖽳𖾑 𖼄𖽳 𖼮𖽡 𖼻𖽜 𖼹𖽸𖾑 𖼺𖽪𖾐 𖼣𖽻𖾐．

𖼦𖽑𖽙𖾐 𖼂𖽻𖾐 𖼖𖽻𖾐 𖼺𖽪𖾐 𖼀𖽑𖽨𖾐 𖼳𖽳𖾐 𖼮𖽡 𖼞𖽳𖾐 𖼈𖽜𖾐 𖼮𖽑𖽡𖽺

21 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽑𖽶𖾐 𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽑𖽙𖾐 𖼻𖽜 𖼦𖽑𖽙𖾐 𖼺𖽪𖾐 𖼄𖽡𖽻 𖼐𖽑𖽡，𖼞𖽑𖽶𖾑 𖼄𖽚 𖼳𖽡𖾐 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐 𖼺𖽺𖾑，𖼽𖽕𖾑 𖼖𖽪𖽦 𖼞𖽳𖾐 𖼻𖽙 𖼽𖽡 𖼊𖽑𖽔𖾐 𖼄𖽔 𖼞𖽑𖽻𖾑 𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼦𖽳 𖼈𖽜𖾐 𖼠𖽚 𖼳𖽶 𖼣𖽻𖾐． 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽑𖽶𖾐 𖼷𖽑𖽦𖾐 𖼮𖽡𖽺𖾐 𖼀𖽑𖽡 𖼰𖽡𖽺𖾐 𖼺𖽪𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼍𖽙𖾑 𖼍𖽳𖾐． 22 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼊𖽑𖽺 𖼞𖽑𖽙𖾐 𖼄𖽪𖽪𖾑 𖼍𖽴𖾑 𖼺𖽪𖾐，𖼽𖽚 𖼍𖽕𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼦𖽪𖾑 𖽃𖽳 𖼞𖽳𖾐 𖼖𖽡𖾑 𖼂𖽙𖾑、 𖼈𖽪𖾐 𖼖𖽡𖾑 𖼞𖽳𖾐 𖼻𖽙 𖼂𖽡 𖼺𖽔 𖼖𖽡𖽦𖾑 𖼮𖽑𖽢𖾑 𖼄𖽳𖾑 𖼄𖽳 𖼂𖽺𖾐 𖼀𖽑𖽢 𖼦𖽑𖽻𖾐． 23 𖼂𖽡 𖼺𖽔 𖼖𖽡𖽦𖾑 𖼖𖽙𖾐 𖼮𖽑𖽻𖾐 𖼄𖽡𖽻 𖼄𖽪𖾐 𖼺𖽪𖾐，𖼞𖽑𖽶𖾑 𖼍𖽗𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼽𖽕𖾑 𖼳𖽡𖾐 𖼺𖽔 𖼄𖽚 𖼞𖽳𖾐 𖼻𖽙 𖼽𖽕𖾑 𖼦𖽴 𖼖𖽡𖾑 𖼽𖽕𖾑 𖼂𖽚 𖼣𖽻𖾐，𖼽𖽻 𖼞𖽑𖽶𖾑 𖼖𖽚𖾐 𖼊𖽝 𖼐𖽺𖾐 𖼺𖽧𖾐 𖼄𖽪𖾐 𖼖𖽦 𖼠𖽸𖾑 𖼣𖽻𖾐，𖼦𖽑𖽔𖾐 𖼖𖽺𖾑 𖼽𖽦 𖼄𖽳𖾐 𖼮𖽑𖽡𖾐 𖼄𖽶𖾑 𖼄𖽶𖾐 𖼐𖽺𖾐 𖼄𖽳𖾐 𖼷𖽺 𖼖𖽕𖾑 𖼖𖽕、 𖼄𖽳𖾐 𖼷𖽺 𖼐𖽑𖽡𖾐 𖼀𖽸、 𖼄𖽳𖾐 𖼷𖽺 𖼐𖽑𖽡𖾑 𖼐𖽑𖽡𖾐 𖼞𖽑𖽶𖾑 𖼳𖽶 𖼻𖽜 𖼈𖽦𖾐 𖼖𖽪𖾐 𖼀𖽚𖾐 𖼠𖽸𖾑 𖼺𖽪𖾐 𖼷𖽑𖽻𖾐 𖼣𖽻𖾐．

24 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽑𖽶𖾐 𖼺𖽡 𖼮𖽡𖾐 𖼊𖽺𖾐 𖼞𖽳𖾐 𖼞𖽑𖽙𖾐 𖼻𖽜 𖼦𖽑𖽙𖾐 𖼺𖽪𖾐 𖼳𖽳𖾐，𖼺𖽡 𖼮𖽡𖾐 𖼊𖽺𖾐 𖼞𖽳𖾐 𖼮𖽡𖽻𖾐 𖼊𖽪𖾐 𖼻𖽜 𖼮𖽡𖽻𖾐 𖼠𖽚，𖼄𖽳𖾑 𖼄𖽳 𖼊𖽑𖽡 𖼍𖽪𖾐 𖼰𖽡𖾐 𖼮𖽻𖾐．

25 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼐𖽑𖽡 𖼷𖽑𖽡𖾐 𖼞𖽑𖽚 𖼊𖽑𖽺 𖼊𖽦𖾐 𖼺𖽪𖾐 𖼞𖽑𖽙𖾐 𖼦𖽑𖽙𖾐 𖼂𖽻𖾐 𖼖𖽻𖾐 𖼺𖽪𖾐 𖼀𖽑𖽨𖾐，𖼺𖽡 𖼮𖽡𖾐 𖼊𖽺𖾐 𖼞𖽳𖾐 𖼮𖽡𖽻𖾐 𖼊𖽪𖾐 𖼻𖽜 𖼮𖽡𖽻𖾐 𖼠𖽚，𖼺𖽙𖾐 𖼍𖽪𖾐 𖼖𖽡𖾐 𖼦𖽑𖽙𖾐 𖼺𖽙𖾐 𖼷𖽑𖽡𖾐 𖼰𖽡𖾐 𖼮𖽻𖾐． 26 𖼐𖽑𖽡 𖼷𖽑𖽡𖾐 𖼞𖽑𖽚 𖼊𖽑𖽺 𖼊𖽦𖾐 𖼺𖽪𖾐 𖼷𖽑𖽻𖾐，𖼄𖽳𖾑 𖼄𖽳 𖼈𖽜𖾐 𖼊𖽑𖽧 𖼖𖽻𖾐，𖼮𖽑𖽡𖽚 𖼷𖽑𖽡𖾐 𖼄𖽺 𖼺𖽙𖾐 𖼍𖽪𖾐 𖼣𖽙 𖼦𖽑𖽙𖾐 𖼣𖽙 𖼷𖽑𖽡𖾐 𖼽𖽚𖾐 𖼮𖽻𖾐． 𖼊𖽑𖽡 𖼽𖽚𖾑 𖼽𖽚𖾐 𖼺𖽡 𖼮𖽡𖾐 𖼊𖽺𖾐 𖼞𖽳𖾐 𖼮𖽡𖽻𖾐 𖼊𖽪𖾐 𖼖𖽙𖾐 𖼮𖽑𖽻𖾐，𖼽𖽻 𖼄𖽳𖾑 𖼞𖽜 𖼷𖽻 𖼺𖽪𖾐 𖼀𖽑𖽨𖾐 𖼦𖽑𖽙𖾐 𖼂𖽻𖾐 𖼖𖽻𖾐． 27 𖼽𖽻 𖼈𖽳𖾐 𖼀𖽑𖽨𖾐 𖼺𖽙𖾐 𖼍𖽪𖾐 𖼖𖽡𖾐 𖼦𖽑𖽙𖾐 𖼺𖽙𖾐 𖼷𖽑𖽡𖾐 𖼰𖽡𖾐 𖼻𖽜 𖼺𖽺𖾑，𖼺𖽡 𖼮𖽡𖾐 𖼊𖽺𖾐 𖼞𖽳𖾐 𖼍𖽡𖾐 𖼮𖽚𖾐 𖼐𖽺𖾐 𖼰𖽨𖾑 𖼍𖽻𖾑 𖼄𖽳𖾐 𖼞𖽳𖾐 𖼍𖽡𖾐 𖼮𖽚𖾐 𖼹𖽸𖾑． 𖼍𖽡𖾐 𖼮𖽚𖾐 𖼊𖽑𖽡 𖼊𖽝𖾐 𖼺𖽙𖾐 𖼷𖽑𖽡𖾐 𖼖𖽡𖾐 𖼰𖽡𖾐 𖼮𖽻𖾐，𖼍𖽡𖾐 𖼮𖽚𖾐 𖼄𖽳𖾑 𖼄𖽳 𖼊𖽑𖽡 𖼦𖽑𖽙𖾐 𖼊𖽝𖾐 𖼮𖽻𖾐． 28 𖼹𖽦𖾑 𖼀𖽑𖽨𖾐 𖼺𖽙𖾐 𖼷𖽑𖽡𖾐 𖼰𖽡𖾐 𖼻𖽜 𖼺𖽺𖾑，𖼠𖽻𖾐 𖼻𖽶𖾐 𖼞𖽳𖾐 𖽃𖽔𖾑 𖼞𖽚 𖼖𖽦 𖼹𖽸𖾑，𖼦𖽑𖽔𖾐 𖼖𖽺𖾑 𖼻𖽶𖾐 𖼮𖽑𖽡𖽪𖾐 𖼐𖽺𖾐 𖼰𖽡𖽻𖾑 𖼖𖽜 𖼊𖽑𖽺 𖼂𖽻𖾐 𖼍𖽡．

29 𖼦𖽑𖽙𖾐 𖼂𖽻𖾐 𖼖𖽻𖾐 𖼺𖽪𖾐 𖼮𖽡，𖼐𖽑𖽡 𖼍𖽪𖾐 𖼖𖽡𖾐 𖼦𖽑𖽙𖾐 𖼐𖽑𖽡 𖼷𖽑𖽡𖾐 𖼣𖽙 𖼰𖽡𖾐 𖼮𖽻𖾐． 30 𖼽𖽻 𖼈𖽳𖾐 𖼮𖽡 𖼦𖽑𖽺𖾑 𖼹𖽻𖾐 𖼻𖽜 𖼺𖽺𖾑，𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖽃𖽔𖾑 𖼊𖽪 𖼞𖽳𖾐 𖼮𖽡 𖼍𖽡𖾐 𖼮𖽚𖾐，𖼍𖽡𖾐 𖼷𖽻𖾐 𖼐𖽺𖾐 𖼍𖽡𖾐 𖼷𖽻𖾐 𖼞𖽳𖾐 𖼂𖽜𖾑，𖼹𖽦𖾑 𖼍𖽡𖾐 𖼷𖽻𖾐 𖼞𖽳𖾐 𖼄𖽡𖽻 𖼐𖽑𖽡𖾐 𖼻𖽜 𖼊𖽪𖾐 𖼹𖽸𖾑． 31 𖼦𖽑𖽔𖾐 𖼖𖽺𖾑 𖼮𖽡𖽺 𖼞𖽪 𖼦𖽜 𖼦𖽜 𖼷𖽜𖾐 𖼷𖽜𖾐 𖼠𖽻𖾐 𖼻𖽶𖾐 𖼞𖽳𖾐 𖼮𖽡 𖼍𖽡𖾐 𖼮𖽚𖾐、 𖼠𖽳𖾑 𖼄𖽡𖾐 𖼊𖽪 𖼠𖽻𖾐 𖼻𖽶𖾐 𖼞𖽳𖾐 𖼮𖽡 𖼍𖽡𖾐 𖼮𖽚𖾐、 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼐𖽺𖾐 𖼮𖽡𖽺 𖼞𖽪 𖼞𖽑𖽙𖾐 𖼻𖽜 𖼺𖽪𖾐 𖼮𖽡 𖼹𖽙𖾑 𖼹𖽸𖾑．