𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼹𖽸𖾑 (𖼊𖽚𖾐 37： 1-9)
37
1 𖼂𖽡 𖼺𖽔 𖼖𖽡𖽦𖾑 𖼮𖽑𖽪 𖼠𖽴𖾐 𖼺𖽧𖾐 𖼻𖽜 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼊𖽑𖽡 𖼊𖽝𖾐 𖼹𖽸𖾑，𖼳𖽶𖾐 𖼞𖽳𖾐 𖼐𖽑𖽡 𖼖𖽦 𖼞𖽚 𖼂𖽕 𖼮𖽻𖾐，𖼞𖽑𖽫𖾐 𖼞𖽳𖾐 𖼊𖽑𖽡 𖼖𖽦 𖼞𖽚 𖼂𖽕 𖼮𖽻𖾐，𖼄𖽶𖾐 𖼞𖽳𖾐 𖼊𖽑𖽡 𖼖𖽦 𖼞𖽚 𖼂𖽕 𖼮𖽻𖾐． 2 𖼹𖽦𖾑 𖼳𖽳𖾐 𖼠𖽕𖾐 𖼰𖽶𖾐 𖼻𖽜 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼊𖽑𖽺 𖼂𖽻𖾐 𖼍𖽡，𖼞𖽑𖽶𖾐 𖼮𖽻𖾐 𖼊𖽑𖽦 𖼮𖽻𖾐 𖼖𖽺𖾑 𖼂𖽻𖾐，𖼖𖽡𖾐 𖼣𖽴 𖼊𖽑𖽺 𖼳𖽳𖾐 𖼺𖽜 𖼂𖽺𖾐 𖼍𖽴𖾑． 3 𖼦𖽑𖽔𖾐 𖼖𖽺𖾑 𖼳𖽳𖾐 𖼠𖽪𖾐 𖼖𖽪𖾐 𖼖𖽡𖾐 𖼊𖽝𖾐 𖼦𖽜𖾐 𖼺𖽺𖾑，𖼈𖽺𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼮𖽑𖽡𖾑 𖼀𖽑𖽦𖾐 𖼖𖽡𖾐 𖼂𖽦𖾐 𖼊𖽑𖽺 𖼍𖽴𖾑，𖼦𖽑𖽺𖾑 𖼀𖽳 𖼐𖽑𖽡 𖼊𖽝𖾐 𖼍𖽴𖾑，𖼞𖽑𖽶𖾑 𖼀𖽳 𖼐𖽑𖽡 𖼊𖽝𖾐 𖼍𖽴𖾑． 4 𖼹𖽦𖾑 𖼮𖽑𖽪 𖼠𖽴𖾐 𖼺𖽧𖾐 𖼻𖽜 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼈𖽦𖾑 𖼖𖽜 𖼐𖽑𖽡 𖼂𖽻𖾐 𖼹𖽸𖾑，𖼦𖽑𖽔𖾐 𖼖𖽺𖾑 𖼳𖽳𖾐 𖼻𖽜 𖼂𖽻𖾐 𖼍𖽡． 5 𖼈𖽦𖾑 𖼖𖽜 𖼦𖽑𖽺𖾑 𖼺𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼐𖽑𖽡 𖼀𖽳 𖼞𖽳𖾐 𖼳𖽳𖾐 𖼠𖽪𖾐 𖼖𖽪𖾐 𖼞𖽑𖽶𖾐 𖼠𖽚 𖼺𖽺𖾑，𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼊𖽑𖽺 𖼈𖽦𖾑 𖼺𖽜．6 𖼹𖽦𖾑 𖼳𖽳𖾐 𖼠𖽕𖾐 𖼰𖽶𖾐 𖼻𖽜 𖼺𖽺𖾑，𖼮𖽡 𖼽𖽡𖾑 𖼳𖽳𖾐 𖼮𖽡𖽺 𖼊𖽑𖽡 𖼊𖽝𖾐 𖼹𖽸𖾑，𖼳𖽶𖾐 𖼞𖽳𖾐 𖼐𖽑𖽡 𖼖𖽦 𖼞𖽚 𖼂𖽕 𖼮𖽻𖾐，𖼞𖽑𖽫𖾐 𖼞𖽳𖾐 𖼊𖽑𖽡 𖼖𖽦 𖼞𖽚 𖼂𖽕 𖼮𖽻𖾐． 7 𖼦𖽑𖽔𖾐 𖼖𖽺𖾑 𖼳𖽳𖾐 𖼻𖽜 𖼰𖽡𖾐 𖼖𖽪𖾑 𖼂𖽚 𖼐𖽑𖽡 𖼊𖽝𖾐 𖼊𖽝 𖼊𖽑𖽧 𖼖𖽻𖾐，𖼀𖽑𖽨 𖼮𖽡 𖼽𖽡𖾑 𖼳𖽳𖾐 𖼮𖽡𖽺 𖼞𖽳𖾐 𖼐𖽑𖽡 𖼣𖽴 𖼊𖽑𖽺 𖼍𖽙𖾑． 8 𖼦𖽑𖽺𖾑 𖼣𖽴 𖼊𖽑𖽡 𖼊𖽝𖾐 𖼍𖽙𖾑，𖼞𖽑𖽶𖾑 𖼣𖽴 𖼊𖽑𖽡 𖼊𖽝𖾐 𖼍𖽙𖾑，𖼰𖽡𖾐 𖼖𖽪𖾑 𖼂𖽚 𖼐𖽑𖽡 𖼊𖽝𖾐 𖼮𖽡 𖼽𖽡𖾑 𖼳𖽳𖾐 𖼮𖽡𖽺 𖼊𖽑𖽺 𖼊𖽴． 9 𖼰𖽡𖾐 𖼖𖽪𖾑 𖼂𖽚 𖼐𖽑𖽡 𖼊𖽝𖾐 𖼊𖽪𖾐 𖼖𖽦 𖼀𖽑𖽺𖾐 𖼍𖽪𖾐，𖼮𖽡 𖼽𖽡𖾑 𖼳𖽳𖾐 𖼮𖽡𖽺 𖼊𖽑𖽺 𖼀𖽜𖾐 𖼍𖽡，𖼰𖽡𖾐 𖼖𖽪𖾑 𖼂𖽚 𖼞𖽳𖾐 𖼮𖽑𖽻 𖼄𖽦𖾐 𖼰𖽻𖾐 𖼷𖽙𖾐 𖼖𖽙𖾐 𖼞𖽳𖾐 𖼀𖽳 𖼖𖽻𖾐，𖼀𖽑𖽡𖽻 𖼰𖽻𖾐 𖼺𖽺𖾑 𖼮𖽡 𖼽𖽡𖾑 𖼳𖽳𖾐 𖼮𖽡𖽺 𖼞𖽳𖾐 𖼀𖽳 𖼠𖽚．
𖼹𖽙𖾐 𖼹𖽶𖾐 𖼹𖽸𖾑 ( 𖼊𖽚𖾐 37：10-16)
10 𖼹𖽦𖾑 𖼮𖽑𖽪 𖼠𖽴𖾐 𖼺𖽧𖾐 𖼻𖽜 𖼹𖽙𖾐 𖼹𖽶𖾐 𖼊𖽑𖽡 𖼀𖽑𖽦 𖼹𖽸𖾑，𖼳𖽶𖾐 𖼞𖽳𖾐 𖼐𖽑𖽡 𖼖𖽦 𖼞𖽚 𖼮𖽻𖾐，𖼞𖽑𖽫𖾐 𖼞𖽳𖾐 𖼊𖽑𖽡 𖼖𖽦 𖼞𖽚 𖼮𖽻𖾐，𖼄𖽶𖾐 𖼞𖽳𖾐 𖼊𖽑𖽡 𖼖𖽦 𖼞𖽚 𖼂𖽕 𖼮𖽻𖾐． 11 𖼦𖽑𖽔𖾐 𖼖𖽺𖾑 𖼳𖽳𖾐 𖼠𖽕𖾐 𖼰𖽶𖾐 𖼻𖽜 𖼹𖽙𖾐 𖼹𖽶𖾐 𖼊𖽑𖽺 𖼂𖽻𖾐 𖼍𖽡，𖼹𖽙𖾐 𖼹𖽶𖾐 𖼖𖽡𖾐 𖼣𖽴 𖼳𖽳𖾐 𖼺𖽜 𖼹𖽸𖾑 𖼍𖽴𖾑． 12 𖼹𖽦𖾑 𖼖𖽦 𖼠𖽻𖾐 𖼊𖽑𖽻𖾐 𖼞𖽑𖽫𖾐 𖼮𖽻𖾐 𖼐𖽺𖾐 𖼺𖽧𖾐 𖼀𖽑𖽡 𖼹𖽸𖾑 𖼹𖽙𖾐 𖼹𖽶𖾐𖼖𖽡𖾐 𖼣𖽴 𖼍𖽴𖾑，𖼺𖽧𖾐 𖼀𖽑𖽡 𖼦𖽜 𖼷𖽜𖾐 𖼳𖽳𖾐 𖼺𖽜 𖼹𖽸𖾑 𖼍𖽴𖾑． 13-14 𖼐𖽑𖽡𖾐 𖼳𖽳𖾐 𖼠𖽪𖾐 𖼖𖽪𖾐 𖼖𖽡𖾐 𖼊𖽝𖾐 𖼹𖽸𖾑 𖼺𖽺𖾑，𖼀𖽑𖽨 𖼹𖽙𖾐 𖼹𖽶𖾐 𖼀𖽑𖽡 𖼖𖽙𖾐 𖼐𖽳，𖼮𖽑𖽡𖾑 𖼀𖽑𖽦𖾐 𖼖𖽡𖾐 𖼂𖽦𖾐 𖼞𖽳𖾐 𖼖𖽡𖾐 𖼣𖽴 𖼊𖽑𖽺 𖼍𖽴𖾑，𖼈𖽦𖾑 𖼖𖽜 𖼺𖽳𖾐 𖼳𖽳𖾐 𖼠𖽪𖾐 𖼖𖽪𖾐 𖼞𖽑𖽶𖾐 𖼰𖽡𖽺𖾐 𖼺𖽺𖾑 𖼈𖽦𖾑 𖼺𖽜． 15 𖼹𖽦𖾑 𖼮𖽑𖽪 𖼠𖽴𖾐 𖼺𖽧𖾐 𖼻𖽜 𖼹𖽙𖾐 𖼹𖽶𖾐 𖼈𖽦𖾑 𖼖𖽜 𖼐𖽑𖽡 𖼂𖽻𖾐 𖼹𖽸𖾑，𖼳𖽳𖾐 𖼠𖽕𖾐 𖼰𖽶𖾐 𖼻𖽜 𖼂𖽻𖾐 𖼍𖽡，𖼹𖽙𖾐 𖼹𖽶𖾐 𖼈𖽦𖾑 𖼖𖽚𖾐 𖼂𖽚𖾐 𖼂𖽺𖾐． 16 𖼐𖽑𖽡𖾐 𖼦𖽑𖽔𖾐 𖼖𖽺𖾑 𖼳𖽳𖾐 𖼠𖽕𖾐 𖼰𖽶𖾐 𖼻𖽜 𖼺𖽺𖾑，𖼹𖽙𖾐 𖼹𖽶𖾐 𖼞𖽳𖾐 𖼻𖽜 𖼖𖽚𖾐 𖼂𖽚𖾐 𖼺𖽡𖾑 𖼀𖽑𖽦 𖼖𖽦、 𖼮𖽶𖾐 𖼀𖽳 𖼰𖽡𖽺𖾐 𖼀𖽡𖽳𖾐、 𖼂𖽕𖾐 𖼖𖽦 𖼻𖽙 𖼐𖽺𖾐 𖼮𖽶𖾐 𖼀𖽳 𖼍𖽡𖾐 𖼮𖽡𖽺𖾐 𖼻𖽜 𖼖𖽚𖾐 𖼂𖽚𖾐 𖼀𖽡𖽳𖾐 𖼹𖽸𖾑．
𖼀𖽙𖾐 𖼷𖽻𖾐 𖼹𖽸𖾑 (𖼊𖽚𖾐 37： 17-24)
17 𖼹𖽦𖾑 𖼳𖽳𖾐 𖼠𖽕𖾐 𖼰𖽶𖾐 𖼻𖽜 𖼀𖽙𖾐 𖼷𖽻𖾐 𖼊𖽑𖽡 𖼷𖽻𖾐 𖼹𖽸𖾑． 𖼖𖽻𖾐 𖼊𖽑𖽪𖾐 𖼻𖽜 𖼺𖽺𖾑，𖼀𖽙𖾐 𖼷𖽻𖾐 𖼊𖽑𖽻𖾐、 𖼀𖽙𖾐 𖼷𖽻𖾐 𖼈𖽶、 𖼀𖽙𖾐 𖼷𖽻𖾐 𖼊𖽑𖽺 𖼊𖽝 𖼍𖽴𖾑 𖼺𖽪𖾐 𖼈𖽦𖾐 𖼖𖽪𖾐 𖼹𖽚𖾐 𖼄𖽦𖾐、 𖼈𖽦𖾐 𖼖𖽪𖾐 𖼀𖽑𖽦 𖼐𖽺𖾐 𖼈𖽦𖾐 𖼖𖽪𖾐，𖼄𖽳𖾑 𖼄𖽳 𖼷𖽙𖾐 𖼖𖽙𖾐 𖼊𖽴 𖼐𖽺𖾐 𖼊𖽝 𖼊𖽑𖽧 𖼖𖽻𖾐． 18 𖼀𖽙𖾐 𖼷𖽻𖾐 𖼈𖽶 𖼞𖽳𖾐 𖼐𖽑𖽡 𖼀𖽳 𖼮𖽑𖽻𖾐 𖼠𖽕𖾑 𖼖𖽦 𖼮𖽑𖽡𖽚 𖼠𖽕𖾑 𖼮𖽡𖽺𖾐 𖼊𖽑𖽧 𖼖𖽻𖾐，𖼊𖽑𖽡 𖼀𖽳 𖼺𖽙𖾐 𖼠𖽕𖾑 𖼮𖽻𖾐． 19 𖼠𖽕𖾑 𖼖𖽦 𖼞𖽑𖽙𖾐 𖼣𖽻𖾐，𖼊𖽑𖽡 𖼠𖽕𖾑 𖼊𖽑𖽺 𖼺𖽳 𖼀𖽑𖽳 𖼈𖽦𖾐 𖼖𖽙𖾐 𖼺𖽶𖾑 𖼺𖽪𖾐 𖼈𖽦𖾐 𖼖𖽪𖾐 𖼺𖽙𖾐 𖼀𖽑𖽸𖾐 𖼊𖽝 𖼍𖽦𖾐，𖼈𖽦𖾐 𖼖𖽪𖾐 𖼀𖽑𖽦 𖼐𖽺𖾐 𖼈𖽦𖾐 𖼖𖽪𖾐 𖼹𖽚𖾐 𖼄𖽦𖾐 𖼖𖽺𖾑 𖼮𖽻𖾐，𖼮𖽑𖽡𖽚 𖼠𖽕𖾑 𖼖𖽦 𖼐𖽺𖾐 𖼦𖽑𖽺𖾑 𖼻𖽻𖾐 𖼂𖽺𖾐． 20 𖼀𖽙𖾐 𖼷𖽻𖾐 𖼈𖽶 𖼊𖽑𖽺 𖼺𖽳 𖼀𖽑𖽳 𖼈𖽦𖾐 𖼖𖽙𖾐 𖼺𖽶𖾑 𖼺𖽪𖾐 𖼈𖽦𖾐 𖼖𖽪𖾐 𖼖𖽡𖾐 𖼀𖽑𖽸𖾐 𖼊𖽝 𖼍𖽦𖾐，𖼈𖽦𖾐 𖼖𖽪𖾐 𖼀𖽑𖽦 𖼐𖽺𖾐 𖼈𖽦𖾐 𖼖𖽪𖾐 𖼹𖽚𖾐 𖼄𖽦𖾐 𖼖𖽺𖾑 𖼮𖽻𖾐． 21 𖼀𖽙𖾐 𖼷𖽻𖾐 𖼈𖽶 𖼊𖽑𖽺 𖼠𖽕𖾑 𖼖𖽦 𖼮𖽡𖽺𖾐 𖼊𖽑𖽧 𖼖𖽻𖾐 𖼞𖽳𖾐 𖼺𖽙𖾐 𖼍𖽚 𖽂𖽚 𖼞𖽑𖽶𖾐 𖼄𖽻𖾑，𖼊𖽑𖽡 𖼍𖽚 𖼞𖽳𖾐 𖼈𖽦𖾐 𖼖𖽪𖾐 𖼊𖽑𖽡 𖼀𖽑𖽸𖾐 𖼮𖽻𖾐． 22 𖼈𖽦𖾐 𖼖𖽪𖾐 𖼐𖽺𖾐 𖼠𖽕𖾑 𖼖𖽦 𖼞𖽑𖽶𖾑 𖼀𖽙𖾐 𖼷𖽻𖾐 𖼖𖽙𖾐 𖼊𖽴，𖼳𖽳𖾐 𖼠𖽕𖾐 𖼰𖽶𖾐 𖼊𖽑𖽡 𖼀𖽑𖽡 𖼍𖽺𖾑 𖼻𖽜 𖼊𖽝 𖼊𖽑𖽧 𖼖𖽻𖾐 𖼺𖽪𖾐 𖼣𖽻𖾐．
23 𖼐𖽑𖽡𖾐 𖼦𖽑𖽔𖾐 𖼖𖽺𖾑 𖼳𖽳𖾐 𖼠𖽕𖾐 𖼰𖽶𖾐 𖼻𖽜 𖼺𖽺𖾑，𖼀𖽙𖾐 𖼊𖽪𖾐 𖼳𖽶 𖼊𖽝𖾐、 𖼀𖽙𖾐 𖼊𖽪𖾐 𖼊𖽑𖽺 𖼷𖽑𖽳 𖼠𖽙𖾐 𖼳𖽙𖾐 𖼖𖽚𖾐 𖼂𖽚𖾐 𖼹𖽦 𖼍𖽻𖾐 𖼐𖽺𖾐 𖼺𖽡𖾑 𖼀𖽑𖽦 𖼖𖽦 𖼹𖽸𖾑． 24 𖼽𖽻 𖼈𖽳𖾐 𖼀𖽙𖾐 𖼷𖽻𖾐 𖼐𖽺𖾐 𖼄𖽡𖽻 𖼐𖽑𖽡 𖼻𖽜 𖼊𖽪𖾐 𖼦𖽑𖽺𖾑 𖼹𖽻𖾐 𖼹𖽸𖾑 𖼞𖽑𖽶𖾑 𖼮𖽶𖾐，𖼳𖽳𖾐 𖼠𖽕𖾐 𖼰𖽶𖾐 𖼺𖽙𖾐 𖼷𖽑𖽡𖾐 𖼣𖽙 𖼰𖽡𖾐 𖼻𖽜 𖼹𖽸𖾑 𖼺𖽪𖾐 𖼣𖽻𖾐．
𖼳𖽡𖽻𖾐 𖼷𖽻𖾐 𖼹𖽸𖾑
25 𖼽𖽻 𖼈𖽳𖾐 𖼹𖽦𖾑 𖼮𖽑𖽪 𖼠𖽴𖾐 𖼺𖽧𖾐 𖼻𖽜 𖼺𖽺𖾑，𖼳𖽡𖽻𖾐 𖼷𖽻𖾐 𖼊𖽑𖽡 𖼷𖽻𖾐 𖼹𖽸𖾑． 𖼳𖽡𖽻𖾐 𖼷𖽻𖾐 𖼞𖽳𖾐 𖼞𖽑𖽫𖾐 𖼳𖽶𖾐 𖼷𖽙𖾐 𖼖𖽙𖾐 𖼺𖽶𖾑，𖼳𖽶𖾐 𖼞𖽳𖾐 𖼊𖽑𖽡 𖼖𖽦 𖼞𖽚 𖼮𖽻𖾐，𖼞𖽑𖽫𖾐 𖼞𖽳𖾐 𖼊𖽑𖽡 𖼖𖽦 𖼞𖽚 𖼮𖽻𖾐，𖼄𖽶𖾐 𖼞𖽳𖾐 𖼐𖽑𖽡 𖼖𖽦 𖼞𖽚 𖼮𖽻𖾐． 𖼳𖽡𖽻𖾐 𖼷𖽻𖾐 𖼖𖽡𖾐 𖼣𖽴 𖼞𖽳𖾐 𖼮𖽑𖽡𖽪𖾐 𖼞𖽑𖽶𖾑 𖼳𖽡𖽻𖾐 𖼷𖽻𖾐 𖼊𖽑𖽺 𖼊𖽴． 26 𖼐𖽑𖽡𖾐 𖼳𖽳𖾐 𖼠𖽕𖾐 𖼮𖽶𖾐 𖼻𖽜 𖼳𖽡𖽻𖾐 𖼷𖽻𖾐 𖼞𖽳𖾐 𖼈𖽪𖾑 𖼖𖽚𖾐、 𖼖𖽡𖾐 𖼀𖽳 𖼐𖽺𖾐 𖼳𖽡𖽻𖾐 𖼷𖽻𖾐 𖼖𖽡𖾐 𖼣𖽴 𖼊𖽑𖽺 𖼂𖽻𖾐 𖼍𖽡，𖼦𖽑𖽔𖾐 𖼖𖽺𖾑 𖼳𖽡𖽻𖾐 𖼷𖽻𖾐 𖼖𖽡𖾐 𖼣𖽴 𖼊𖽑𖽺 𖼳𖽳𖾐 𖼺𖽜 𖼹𖽸𖾑 𖼍𖽴𖾑． 27 𖼹𖽦𖾑 𖼳𖽳𖾐 𖼺𖽜 𖼍𖽴𖾑 𖼞𖽳𖾐 𖽂𖽚 𖼞𖽑𖽶𖾐，𖼳𖽳𖾐 𖼠𖽪𖾐 𖼖𖽪𖾐 𖼐𖽑𖽡 𖼊𖽝𖾐 𖼹𖽸𖾑 𖼍𖽴𖾑，𖼊𖽑𖽡 𖼀𖽳 𖼊𖽑𖽡 𖼊𖽝𖾐 𖼍𖽴𖾑，𖼈𖽦𖾑 𖼖𖽜 𖼺𖽳𖾐 𖼰𖽡𖽺𖾐 𖼺𖽺𖾑，𖼳𖽡𖽻𖾐 𖼷𖽻𖾐 𖼊𖽑𖽺 𖼈𖽦𖾑 𖼺𖽜 𖼺𖽙𖾐． 28 𖼦𖽑𖽔𖾐 𖼖𖽺𖾑 𖼮𖽑𖽪 𖼠𖽴𖾐 𖼺𖽧𖾐 𖼻𖽜 𖼈𖽦𖾑 𖼖𖽜 𖼹𖽸𖾑，𖼳𖽳𖾐 𖼻𖽜 𖼂𖽻𖾐 𖼍𖽡．
29 𖼹𖽦𖾑 𖼖𖽦 𖼠𖽸𖾑 𖼞𖽜 𖼐𖽑𖽡𖾐 𖼮𖽡𖽺𖾐𖼂𖽺𖾐 𖼖𖽚𖾐 𖼂𖽚𖾐 𖼵𖽶𖾐 𖼈𖽡𖾐 𖼂𖽺𖾐 𖼞𖽳𖾐 𖼄𖽪𖾐 𖼊𖽪𖾐 𖼻𖽜，𖼄𖽡𖽻 𖼐𖽑𖽡 𖼦𖽑𖽺𖾑 𖼹𖽻𖾐 𖼈𖽺𖾐 𖼺𖽡 𖼮𖽡𖾐 𖼺𖽪𖾐 𖼐𖽑𖽡𖾐 𖼮𖽡𖽺𖾐𖼂𖽺𖾐 𖼖𖽚𖾐 𖼂𖽚𖾐 𖼵𖽶𖾐 𖼈𖽡𖾐 𖼂𖽺𖾐 𖼀𖽑𖽢．