36
1 𖼂𖽡 𖼺𖽔 𖼖𖽡𖽦𖾑、 𖼽𖽕𖾑 𖼦𖽴 𖼖𖽡𖾑 𖼽𖽕𖾑 𖼂𖽚 𖼐𖽺𖾐 𖼈𖽪𖾐 𖼺𖽝𖾑 𖽂𖽙 𖼐𖽑𖽡𖾐 𖼮𖽻𖾐 𖼺𖽪𖾐 𖼷𖽑𖽻𖾐，𖼞𖽑𖽶𖾑 𖼽𖽺𖾐 𖼦𖽴 𖼦𖽫 𖼈𖽪𖾐 𖼺𖽝𖾑 𖽂𖽙 𖼐𖽑𖽡𖾐 𖼖𖽪 𖼞𖽜 𖼺𖽪𖾐 𖼷𖽑𖽻𖾐 𖼣𖽻𖾐． 𖼽𖽻 𖼈𖽳𖾐 𖼺𖽡 𖼮𖽡𖾐 𖼊𖽺𖾐 𖼞𖽳𖾐 𖼞𖽑𖽙𖾐 𖼣𖽻𖾐 𖼳𖽶 𖼄𖽡𖽻 𖼂𖽺𖾐 𖼠𖽸𖾑 𖼺𖽺𖾑，𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐 𖼂𖽺𖾐 𖼽𖽡𖾐．𖼷𖽑𖽻𖾐 𖼀𖽺 𖼠𖽳𖾐 𖼖𖽪𖾐 𖼄𖽡𖽻 𖼐𖽑𖽡 𖼄𖽨 𖼄𖽨 𖼦𖽑𖽙𖾐 𖼞𖽜
2 𖽃𖽔𖾐 𖼺𖽺𖾑，𖼄𖽚 𖼳𖽡𖾐 𖼞𖽑𖽻𖾑 𖼂𖽡 𖼺𖽔 𖼖𖽡𖽦𖾑、 𖼽𖽕𖾑 𖼦𖽴 𖼖𖽡𖾑 𖼽𖽕𖾑 𖼂𖽚 𖼐𖽺𖾐 𖼈𖽪𖾐 𖼺𖽝𖾑 𖽂𖽙 𖼐𖽑𖽡𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐，𖼽𖽻 𖼈𖽳𖾐 𖼞𖽑𖽶𖾑 𖼽𖽺𖾐 𖼦𖽴 𖼦𖽫 𖼈𖽪𖾐 𖼺𖽝𖾑 𖽂𖽙 𖼐𖽑𖽡𖾐 𖼖𖽪 𖼞𖽜，𖼐𖽑𖽧𖾐 𖼄𖽙𖾐 𖼞𖽕 𖼍𖽪𖾐 𖽂𖽙𖾐 𖼐𖽺𖾐 𖼐𖽑𖽧𖾐 𖼺𖽳 𖼖𖽻𖾐 𖼄𖽡𖽻 𖼄𖽪𖾐 𖼺𖽪𖾐 𖼷𖽑𖽻𖾐 𖼣𖽻𖾐． 3 𖼽𖽻 𖼈𖽳𖾐 𖼄𖽚 𖼳𖽡𖾐 𖼄𖽦𖾐 𖼊𖽪 𖼮𖽑𖽡𖽺 𖼮𖽑𖽻𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽑𖽙𖾐 𖼦𖽑𖽙𖾐 𖼂𖽻𖾐 𖼖𖽻𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽳𖾐 𖼻𖽜 𖼖𖽚𖾐 𖼂𖽚𖾐 𖼄𖽡𖽻 𖼐𖽑𖽡 𖼷𖽶𖾐 𖼹𖽺𖾐 𖼖𖽻𖾐． 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽡 𖼐𖽜𖾑 𖼊𖽑𖽡 𖼐𖽜𖾐 𖼐𖽑𖽧𖾐 𖼺𖽳 𖼦𖽑𖽙𖾐 𖼞𖽜 𖼺𖽪𖾐 𖼄𖽡𖽻 𖼐𖽑𖽡 𖼦𖽑𖽙𖾐 𖼄𖽚 𖼳𖽡𖾐 𖼞𖽳𖾐 𖼖𖽻𖾐． 4 𖼞𖽑𖽙𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽳𖾐 𖼄𖽡𖽻 𖼄𖽪𖾐 𖼈𖽪𖾐 𖼺𖽝𖾑 𖽂𖽙 𖼐𖽑𖽡𖾐 𖼺𖽪𖾐 𖼷𖽑𖽻𖾐，𖼄𖽳𖾑 𖼄𖽳 𖼖𖽺𖾑 𖼽𖽻 𖼄𖽳𖾑 𖼞𖽳𖾐 𖼄𖽡𖽻 𖼊𖽑𖽺 𖼷𖽴𖾐 𖼦𖽑𖽙𖾐 𖼺𖽺𖾑 𖼖𖽻𖾐 𖼺𖽪𖾐 𖼣𖽻𖾐． 5 𖼽𖽻 𖼈𖽳𖾐 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼷𖽑𖽻𖾐 𖼀𖽺 𖼦𖽑𖽙𖾐 𖼂𖽻𖾐 𖼖𖽻𖾐 𖼺𖽪𖾐 𖼄𖽡𖽻 𖼐𖽑𖽡 𖼄𖽨 𖼷𖽑𖽚，𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼄𖽪𖾑 𖼍𖽴𖾑 𖼻𖽜 𖼖𖽡𖾐 𖼺𖽪𖾐 𖼊𖽑𖽺 𖼠𖽳𖾐 𖼦𖽑𖽻𖾐．”
6 𖽃𖽔𖾐 𖼺𖽺𖾑，𖼄𖽚 𖼳𖽡𖾐 𖼄𖽡𖽻 𖼍𖽻𖾑 𖼹𖽺𖾐 𖼖𖽻𖾐，𖼽𖽻 𖼈𖽳𖾐 𖼞𖽳𖾐 𖼷𖽑𖽻𖾐 𖼀𖽺 𖼞𖽑𖽙𖾐 𖼣𖽻𖾐 𖼖𖽙𖾐 𖼀𖽦𖾐 𖼊𖽑𖽧：“𖼻𖽙 𖼐𖽜𖾐 𖼣𖽻𖾐 𖼦𖽻，𖼻𖽙 𖼄𖽳 𖼣𖽻𖾐 𖼦𖽻，𖼹𖽦𖾑 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼹𖽸𖾑 𖼖𖽙𖾐 𖼀𖽙𖾐 𖼄𖽡𖽻 𖼐𖽑𖽡 𖼦𖽑𖽙𖾐 𖼂𖽻𖾐 𖼖𖽻𖾐 𖼄𖽔 𖼻𖽻𖾐． ” 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼷𖽑𖽻𖾐 𖼀𖽺 𖼊𖽑𖽺 𖽂𖽙𖾐 𖼀𖽨 𖼍𖽡，𖼄𖽡𖽻 𖼐𖽑𖽡 𖼄𖽔 𖼦𖽑𖽙𖾐 𖼂𖽻𖾐 𖼖𖽻𖾐． 7 𖼞𖽪𖾐 𖼮𖽡𖽺𖾐，𖼞𖽑𖽙𖾐 𖼦𖽑𖽙𖾐 𖼂𖽻𖾐 𖼖𖽻𖾐 𖼺𖽪𖾐 𖼄𖽡𖽻 𖼐𖽑𖽡，𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽳𖾐 𖼞𖽑𖽙𖾐 𖼣𖽻𖾐 𖼳𖽶 𖼹𖽸𖾑 𖼖𖽚 𖼦𖽑𖽻𖾐，𖼦𖽑𖽔𖾐 𖼖𖽺𖾑 𖼷𖽺 𖼷𖽺𖾐 𖼮𖽻𖾐 𖼺𖽺．
𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽳𖾐 𖼀𖽜𖾐 𖼮𖽑𖽙𖾐 𖼹𖽸𖾑
8 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼹𖽸𖾑 𖼺𖽪𖾐 𖼷𖽑𖽻𖾐 𖼠𖽻𖾐 𖼊𖽑𖽺 𖼞𖽑𖽙𖾐 𖼈𖽪𖾐 𖼺𖽝𖾑 𖽂𖽙 𖼐𖽑𖽡𖾐 𖼮𖽻𖾐 𖼺𖽪𖾐，𖼄𖽳𖾐 𖼷𖽑𖽡𖾐 𖼮𖽑𖽙𖾐 𖼻𖽜 𖼺𖽺𖾑 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽳𖾐 𖼀𖽜𖾐 𖼮𖽑𖽙𖾐 𖼹𖽸𖾑． 𖼀𖽜𖾐 𖼮𖽑𖽙𖾐 𖼦𖽑𖽺𖾑 𖼈𖽝 𖼊𖽑𖽧 𖼖𖽻𖾐 𖼺𖽪𖾐 𖼽𖽦 𖼄𖽳𖾐 𖼮𖽑𖽡𖾐 𖼄𖽶𖾑 𖼄𖽶𖾐 𖼐𖽺𖾐 𖼄𖽳𖾐 𖼷𖽺 𖼖𖽕𖾑 𖼖𖽕、 𖼄𖽳𖾐 𖼷𖽺 𖼐𖽑𖽡𖾐 𖼀𖽸、 𖼄𖽳𖾐 𖼷𖽺 𖼐𖽑𖽡𖾑 𖼐𖽑𖽡𖾐 𖼞𖽑𖽶𖾑 𖼳𖽶 𖼻𖽜 𖼷𖽝 𖼀𖽑𖽢 𖼺𖽪𖾐 𖼣𖽻𖾐，𖼦𖽑𖽔𖾐 𖼖𖽺𖾑 𖼖𖽦 𖼠𖽸𖾑 𖼞𖽜 𖼰𖽡𖾐 𖼖𖽪𖾑 𖼂𖽚 𖼀𖽚𖾐 𖼍𖽦𖾐． 9 𖼄𖽳𖾐 𖼊𖽑𖽡 𖼮𖽑𖽙𖾑 𖼮𖽑𖽙𖾐 𖼞𖽳𖾐 𖼞𖽑𖽫𖾐 𖼳𖽶𖾐 𖼷𖽙𖾐 𖼖𖽙𖾐 𖼺𖽶𖾑，𖼳𖽶𖾐 𖼞𖽳𖾐 𖼐𖽑𖽡 𖼷𖽑𖽡𖾐 𖼦𖽑𖽦 𖼖𖽦 𖼞𖽚 𖼮𖽻𖾐，𖼞𖽑𖽫𖾐 𖼞𖽳𖾐 𖼖𖽡𖾐 𖼖𖽦 𖼞𖽚 𖼮𖽻𖾐． 10 𖼽𖽻 𖼈𖽳𖾐 𖼄𖽳𖾐 𖼮𖽑𖽙𖾐 𖼦𖽑𖽺𖾑 𖼣𖽙 𖼮𖽑𖽙𖾐 𖼣𖽙 𖼮𖽑𖽙𖾐 𖼷𖽙𖾐 𖼖𖽙𖾐 𖼊𖽴 𖼺𖽺𖾑，𖼈𖽳 𖼈𖽳 𖼄𖽙𖾐 𖼐𖽑𖽡 𖼰𖽪𖾑 𖼀𖽑𖽢 𖼦𖽑𖽙𖾐． 11 𖼦𖽑𖽺𖾑 𖼰𖽪𖾑 𖼞𖽳𖾐 𖼦𖽜 𖼷𖽜𖾐 𖼞𖽑𖽶𖾑 𖼮𖽑𖽙𖾐 𖼊𖽑𖽺 𖼀𖽑𖽳𖾐 𖼳𖽳𖾑 𖼄𖽙𖾐 𖼳𖽡𖽪𖾐 𖼖𖽕𖾑 𖼖𖽕 𖼞𖽑𖽶𖾑 𖼳𖽶 𖼂𖽺𖾐 𖼍𖽴𖾑，𖼞𖽑𖽶𖾑 𖼰𖽪𖾑 𖼞𖽳𖾐 𖼦𖽜 𖼷𖽜𖾐 𖼞𖽑𖽶𖾑 𖼮𖽑𖽙𖾐 𖼊𖽑𖽺 𖼖𖽺𖾑 𖼀𖽑𖽳𖾐 𖼳𖽳𖾑 𖼄𖽙𖾐 𖼳𖽡𖽪𖾐 𖼖𖽕𖾑 𖼖𖽕 𖼞𖽑𖽶𖾑 𖼳𖽶 𖼂𖽺𖾐 𖼍𖽴𖾑． 12 𖼽𖽻 𖼈𖽳𖾐 𖼦𖽑𖽺𖾑 𖼰𖽪𖾑 𖼞𖽳𖾐 𖼦𖽜 𖼷𖽜𖾐 𖼊𖽑𖽺 𖼀𖽑𖽳𖾐 𖼳𖽳𖾑 𖼄𖽙𖾐 𖼳𖽡𖽪𖾐 𖼣𖽙 𖼷𖽑𖽡𖾐 𖼊𖽝𖾐 𖼂𖽺𖾐 𖼍𖽴𖾑，𖼞𖽑𖽶𖾑 𖼰𖽪𖾑 𖼞𖽳𖾐 𖼦𖽜 𖼷𖽜𖾐 𖼊𖽑𖽺 𖼖𖽺𖾑 𖼀𖽑𖽳𖾐 𖼳𖽳𖾑 𖼄𖽙𖾐 𖼳𖽡𖽪𖾐 𖼣𖽙 𖼷𖽑𖽡𖾐 𖼊𖽝𖾐 𖼂𖽺𖾐 𖼍𖽴𖾑． 𖼀𖽑𖽳𖾐 𖼳𖽳𖾑 𖼄𖽙𖾐 𖼳𖽡𖽪𖾐 𖼦𖽑𖽺𖾑 𖼹𖽻𖾐 𖼐𖽑𖽡 𖼊𖽝𖾐 𖼐𖽑𖽡 𖼊𖽝𖾐 𖼷𖽙𖾐 𖼖𖽙𖾐 𖼍𖽴 𖼍𖽪𖾐 𖼍𖽴𖾑 𖼺𖽪𖾐 𖼣𖽻𖾐． 13 𖼦𖽑𖽔𖾐 𖼖𖽺𖾑 𖼳𖽳𖾐 𖽃𖽔𖾑 𖼞𖽚 𖼖𖽦 𖼣𖽙 𖼷𖽑𖽡𖾐 𖼊𖽝𖾐 𖼂𖽺𖾐 𖼺𖽺𖾑，𖼄𖽳𖾐 𖼦𖽑𖽺𖾑 𖼐𖽑𖽡 𖼰𖽪𖾑 𖼊𖽑𖽺 𖼞𖽑𖽢𖾐 𖼷𖽙𖾐 𖼖𖽙𖾐 𖼍𖽡，𖼀𖽜𖾐 𖼮𖽑𖽙𖾐 𖼊𖽑𖽡 𖼊𖽝𖾐 𖼀𖽑𖽢 𖼦𖽑𖽙𖾐．
𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐𖼞𖽳𖾐 𖼀𖽜𖾐 𖼊𖽪𖾐 𖼹𖽸𖾑
14 𖼽𖽻 𖼈𖽳𖾐 𖽃𖽔𖾑 𖼮𖽑𖽸 𖼄𖽶𖾐 𖼻𖽜 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽳𖾐 𖼀𖽜𖾐 𖼊𖽪𖾐 𖼷𖽑𖽡𖾐 𖼍𖽡𖾑 𖼮𖽑𖽙𖾐 𖼷𖽝． 15 𖼀𖽜𖾐 𖼊𖽪𖾐 𖼊𖽑𖽡 𖼮𖽑𖽙𖾑 𖼮𖽑𖽙𖾐 𖼞𖽑𖽫𖾐 𖼳𖽶𖾐 𖼷𖽙𖾐 𖼖𖽙𖾐 𖼺𖽶𖾑，𖼳𖽶𖾐 𖼞𖽳𖾐 𖼺𖽙𖾐 𖼷𖽑𖽡𖾐 𖼖𖽦 𖼞𖽚 𖼮𖽻𖾐，𖼞𖽑𖽫𖾐 𖼞𖽳𖾐 𖼖𖽡𖾐 𖼖𖽦 𖼞𖽚 𖼮𖽻𖾐． 16 𖼽𖽻 𖼈𖽳𖾐 𖼀𖽜𖾐 𖼊𖽪𖾐 𖼦𖽑𖽺𖾑 𖼣𖽙 𖼮𖽑𖽙𖾐 𖼷𖽙𖾐 𖼖𖽙𖾐 𖼊𖽴 𖼊𖽑𖽡 𖼰𖽪𖾑 𖼂𖽺𖾐，𖼠𖽳𖾐 𖼖𖽪𖾐 𖼞𖽑𖽶𖾑 𖼮𖽑𖽡𖽚 𖼮𖽑𖽙𖾐 𖼖𖽺𖾑 𖼷𖽙𖾐 𖼖𖽙𖾐 𖼊𖽴 𖼊𖽑𖽡 𖼰𖽪𖾑 𖼂𖽺𖾐． 17 𖼦𖽑𖽺𖾑 𖼰𖽪𖾑 𖼞𖽳𖾐 𖼦𖽜 𖼷𖽜𖾐 𖼊𖽑𖽺 𖼀𖽑𖽳𖾐 𖼳𖽳𖾑 𖼄𖽙𖾐 𖼳𖽡𖽪𖾐 𖼣𖽙 𖼷𖽑𖽡𖾐 𖼊𖽝𖾐 𖼂𖽺𖾐 𖼍𖽴𖾑，𖼞𖽑𖽶𖾑 𖼰𖽪𖾑 𖼞𖽳𖾐 𖼦𖽜 𖼷𖽜𖾐 𖼊𖽑𖽺 𖼖𖽺𖾑 𖼀𖽑𖽳𖾐 𖼳𖽳𖾑 𖼄𖽙𖾐 𖼳𖽡𖽪𖾐 𖼣𖽙 𖼷𖽑𖽡𖾐 𖼊𖽝𖾐 𖼂𖽺𖾐 𖼍𖽴𖾑． 18 𖼹𖽦𖾑 𖼮𖽡 𖽃𖽔𖾑 𖼞𖽚 𖼖𖽦 𖼣𖽙 𖼷𖽑𖽡𖾐 𖼊𖽝𖾐 𖼂𖽺𖾐，𖼦𖽑𖽺𖾑 𖼐𖽑𖽡 𖼰𖽪𖾑 𖼊𖽑𖽺 𖼞𖽑𖽢𖾐 𖼷𖽙𖾐 𖼖𖽙𖾐 𖼍𖽡 𖼺𖽺𖾑，𖼀𖽜𖾐 𖼊𖽪𖾐 𖼊𖽑𖽡 𖼊𖽝𖾐 𖼀𖽑𖽢 𖼦𖽑𖽙𖾐． 19 𖼀𖽜𖾐 𖼊𖽪𖾐 𖼊𖽑𖽺 𖼹𖽦𖾑 𖼦𖽑𖽨𖾐 𖼐𖽑𖽡𖾐 𖼺𖽪𖾐 𖼽𖽻𖾐 𖼖𖽙𖾐 𖼮𖽡𖾐 𖼻𖽜 𖼀𖽜𖾐 𖼍𖽡，𖼞𖽑𖽶𖾑 𖼊𖽑𖽺 𖼹𖽦𖾑 𖼈𖽡𖾐 𖼳𖽶𖾐 𖼮𖽡𖾐 𖼻𖽜 𖼀𖽜𖾐 𖼻𖽶𖾐 𖼦𖽑𖽙𖾐．
𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐𖼞𖽳𖾐 𖼠𖽴𖾐 𖼮𖽑𖽡𖽻𖾐 𖼹𖽸𖾑
20 𖼽𖽻 𖼈𖽳𖾐 𖼮𖽑𖽪 𖼠𖽴𖾐 𖼺𖽧𖾐 𖼻𖽜 𖼺𖽺𖾑，𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼍𖽚 𖼖𖽚𖾐 𖼂𖽚𖾐 𖼺𖽧𖾐 𖼀𖽑𖽡 𖼹𖽸𖾑． 21 𖼺𖽧𖾐 𖼀𖽑𖽡 𖼊𖽑𖽡 𖼀𖽑𖽡𖾑 𖼀𖽑𖽡 𖼳𖽶𖾐 𖼞𖽳𖾐 𖼷𖽑𖽡𖾐 𖼖𖽦 𖼞𖽚 𖼮𖽻𖾐，𖼞𖽑𖽫𖾐 𖼞𖽳𖾐 𖼊𖽑𖽡 𖼖𖽦 𖼞𖽚 𖼂𖽕 𖼮𖽻𖾐． 22 𖼊𖽑𖽡 𖼀𖽑𖽡𖾑 𖼀𖽑𖽡 𖼺𖽧𖾐 𖼀𖽧𖾐 𖼐𖽑𖽡 𖼊𖽝𖾐 𖼍𖽴𖾑，𖼷𖽙𖾐 𖼖𖽙𖾐 𖼍𖽴 𖼍𖽪𖾐 𖼞𖽳𖾐 𖼮𖽻𖾐，𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽳𖾐 𖼺𖽧𖾐 𖼀𖽑𖽡 𖼄𖽳𖾑 𖼄𖽳 𖼷𖽙𖾐 𖼖𖽙𖾐 𖼺𖽶𖾑 𖼹𖽸𖾑． 23 𖼽𖽻 𖼈𖽳𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐𖼞𖽳𖾐 𖼠𖽳𖾐 𖼻𖽸 𖼄𖽡𖾐 𖼀𖽳 𖼦𖽑𖽡𖽚 𖼺𖽪𖾐 𖼺𖽧𖾐 𖼀𖽑𖽡 𖼐𖽑𖽡 𖼷𖽑𖽡𖾐 𖼀𖽑𖽡 𖼹𖽸𖾑． 24 𖼺𖽧𖾐 𖼀𖽑𖽡 𖼦𖽑𖽺𖾑 𖼐𖽑𖽡 𖼷𖽑𖽡𖾐 𖼀𖽑𖽡 𖽂𖽚 𖼞𖽑𖽶𖾐，𖼀𖽑𖽨𖾐 𖼍𖽡𖾐 𖼮𖽚𖾐 𖼖𖽡𖾐 𖼷𖽑𖽡𖾐 𖼊𖽝𖾐 𖼹𖽸𖾑 𖼍𖽙𖾑． 𖼺𖽧𖾐 𖼀𖽑𖽡 𖼊𖽑𖽡 𖼀𖽑𖽡 𖽂𖽚 𖼞𖽑𖽶𖾐 𖼀𖽑𖽨𖾐 𖼍𖽡𖾐 𖼮𖽚𖾐 𖼐𖽑𖽡 𖼊𖽝𖾐 𖼮𖽻𖾐，𖼺𖽧𖾐 𖼀𖽧𖾐 𖼀𖽑𖽨 𖼺𖽺𖾑 𖼀𖽑𖽨𖾐 𖼍𖽡𖾐 𖼮𖽚𖾐 𖼞𖽑𖽶𖾐 𖼰𖽡𖽺𖾐． 25 𖼽𖽻 𖼈𖽳𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽳𖾐 𖼳𖽶 𖼐𖽑𖽡𖽻𖾐 𖼄𖽡𖾐 𖼀𖽳 𖼖𖽺𖾑 𖼦𖽑𖽡𖽚 𖼺𖽪𖾐 𖼺𖽧𖾐 𖼀𖽑𖽡 𖼐𖽑𖽡 𖼷𖽑𖽡𖾐 𖼀𖽑𖽡 𖼹𖽸𖾑， 26 𖼀𖽑𖽨𖾐 𖼍𖽡𖾐 𖼮𖽚𖾐 𖼖𖽡𖾐 𖼷𖽑𖽡𖾐 𖼊𖽝𖾐 𖼹𖽸𖾑，𖼺𖽧𖾐 𖼀𖽑𖽡 𖼊𖽑𖽡 𖼀𖽑𖽡𖾑 𖼀𖽑𖽡 𖽂𖽚 𖼞𖽑𖽶𖾐 𖼀𖽑𖽨𖾐 𖼍𖽡𖾐 𖼮𖽚𖾐 𖼐𖽑𖽡 𖼊𖽝𖾐 𖼮𖽻𖾐． 27 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽳𖾐 𖼠𖽙𖾑 𖼍𖽻𖾐 𖼀𖽳 𖼞𖽑𖽶𖾑 𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖼣𖽻𖾐，𖼦𖽑𖽡𖽚 𖼺𖽪𖾐 𖼺𖽧𖾐 𖼀𖽑𖽡 𖼮𖽑𖽡𖽚 𖼀𖽑𖽡 𖼹𖽸𖾑． 28 𖼽𖽻 𖼈𖽳𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼠𖽙𖾑 𖼍𖽻𖾐 𖼀𖽳 𖼠𖽢𖾐 𖼖𖽧𖾐 𖼞𖽚 𖼐𖽑𖽡 𖼄𖽦𖾐 𖼞𖽳𖾐 𖼦𖽑𖽡𖽚 𖼺𖽪𖾐 𖼺𖽧𖾐 𖼀𖽑𖽡 𖼐𖽑𖽡 𖼀𖽑𖽡 𖼹𖽸𖾑． 29 𖼺𖽧𖾐 𖼀𖽑𖽡 𖼦𖽑𖽺𖾑 𖼹𖽻𖾐 𖼍𖽕𖾑 𖽂𖽚 𖼞𖽑𖽶𖾑 𖼊𖽑𖽜𖾐 𖼺𖽧𖾐 𖼀𖽧𖾐 𖼐𖽑𖽡 𖼊𖽝𖾐 𖼮𖽻𖾐 ，𖼞𖽕 𖼂𖽻𖾑 𖼞𖽑𖽶𖾑 𖼊𖽑𖽜𖾐 𖼷𖽙𖾐 𖼖𖽙𖾐 𖼊𖽴 𖼠𖽪𖾐 𖼖𖽪𖾐 𖼞𖽳𖾐 𖼮𖽑𖽡𖾐 𖼺𖽺𖾑，𖼠𖽪𖾐 𖼖𖽪𖾐 𖼻𖽜 𖼞𖽑𖽢𖾐 𖼷𖽙𖾐 𖼖𖽙𖾐 𖼍𖽡，𖼠𖽢𖾐 𖼞𖽚 𖼖𖽧𖾐 𖼦𖽑𖽺𖾑 𖼐𖽑𖽡 𖼀𖽑𖽡 𖼐𖽺𖾐 𖼦𖽑𖽺𖾑 𖼻𖽻𖾐 𖼂𖽺𖾐． 30 𖽃𖽔𖾐 𖼺𖽺𖾑，𖼺𖽧𖾐 𖼀𖽑𖽡 𖼦𖽑𖽦 𖼀𖽑𖽡 𖼐𖽺𖾐 𖼀𖽑𖽨𖾐 𖼍𖽡𖾐 𖼮𖽚𖾐 𖼷𖽑𖽡𖾐 𖼮𖽑𖽡𖽚 𖼊𖽝𖾐 𖼮𖽻𖾐，𖼺𖽧𖾐 𖼀𖽑𖽡 𖼊𖽑𖽡 𖼀𖽑𖽡𖾑 𖼀𖽑𖽡 𖽂𖽚 𖼞𖽑𖽶𖾐 𖼀𖽑𖽨𖾐 𖼍𖽡𖾐 𖼮𖽚𖾐 𖼐𖽑𖽡 𖼊𖽝𖾐 𖼮𖽻𖾐．
31 𖼽𖽻 𖼈𖽳𖾐 𖼹𖽦𖾑 𖼮𖽑𖽪 𖼠𖽴𖾐 𖼺𖽧𖾐 𖼻𖽜 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽳𖾐 𖼰𖽡𖽻𖾑 𖼖𖽜 𖼹𖽸𖾑，𖼠𖽳𖾐 𖼻𖽸 𖼄𖽡𖾐 𖼀𖽳 𖼦𖽑𖽡𖽚 𖼺𖽪𖾐 𖼺𖽧𖾐 𖼀𖽑𖽡 𖼖𖽙𖾐 𖼀𖽙𖾐 𖼰𖽡𖽻𖾑 𖼖𖽜 𖼣𖽙𖾐 𖼂𖽻𖾐 𖼹𖽸𖾑， 32 𖼳𖽶 𖼐𖽑𖽡𖽻𖾐 𖼄𖽡𖾐 𖼀𖽳 𖼦𖽑𖽡𖽚 𖼺𖽪𖾐 𖼺𖽧𖾐 𖼀𖽑𖽡 𖼖𖽙𖾐 𖼀𖽙𖾐 𖼰𖽡𖽻𖾑 𖼖𖽜 𖼣𖽙𖾐 𖼂𖽻𖾐 𖼹𖽸𖾑，𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖼦𖽑𖽡𖽚 𖼺𖽪𖾐 𖼺𖽧𖾐 𖼀𖽑𖽡 𖼖𖽙𖾐 𖼀𖽙𖾐 𖼖𖽺𖾑 𖼰𖽡𖽻𖾑 𖼖𖽜 𖼣𖽙𖾐 𖼂𖽻𖾐 𖼹𖽸𖾑， 33 𖼺𖽧𖾐 𖼀𖽑𖽡 𖼠𖽻𖾐 𖼊𖽑𖽺 𖼞𖽳𖾐 𖼰𖽡𖽻𖾑 𖼖𖽜，𖼦𖽑𖽺𖾑 𖼀𖽳 𖼮𖽑𖽻𖾐 𖼺𖽳𖾐 𖼞𖽑𖽶𖾑 𖼀𖽳 𖼮𖽨𖾐． 34 𖼺𖽧𖾐 𖼀𖽑𖽡 𖼐𖽺𖾐 𖼰𖽡𖽻𖾑 𖼖𖽜 𖼄𖽳𖾑 𖼄𖽳 𖼊𖽑𖽺 𖼳𖽳𖾐 𖼻𖽜 𖼂𖽻𖾐 𖼍𖽡，𖼦𖽑𖽔𖾐 𖼖𖽺𖾑 𖼺𖽧𖾐 𖼀𖽑𖽡 𖼊𖽑𖽺 𖼳𖽳𖾐 𖼠𖽪𖾐 𖼖𖽪𖾐 𖼍𖽴𖾑 𖼺𖽺𖾑，𖼰𖽡𖽻𖾑 𖼖𖽜 𖼺𖽳𖾐 𖼰𖽡𖽺𖾐．
𖼰𖽨𖽨𖾑 𖼍𖽻𖾑 𖼄𖽳𖾐、 𖽃𖽔𖾑 𖼊𖽪 𖼮𖽑𖽨𖾑 𖼄𖽳𖾐 𖼐𖽺𖾐 𖼠𖽻𖾐 𖼻𖽶𖾐 𖼹𖽸𖾑
35 𖼽𖽻 𖼈𖽳𖾐 𖼈𖽝 𖼊𖽑𖽧 𖼖𖽻𖾐 𖼺𖽪𖾐 𖼽𖽦 𖼄𖽳𖾐 𖼮𖽑𖽡𖾐 𖼄𖽶𖾑 𖼄𖽶𖾐 𖼐𖽺𖾐 𖼄𖽳𖾐 𖼷𖽺 𖼖𖽕𖾑 𖼖𖽕、 𖼄𖽳𖾐 𖼷𖽺 𖼐𖽑𖽡𖾐 𖼀𖽸、 𖼄𖽳𖾐 𖼷𖽺 𖼐𖽑𖽡𖾑 𖼐𖽑𖽡𖾐 𖼞𖽑𖽶𖾑 𖼳𖽶 𖼻𖽜 𖼰𖽨𖾑 𖼍𖽻𖾑 𖼄𖽳𖾐 𖼂𖽺𖾐，𖼦𖽑𖽔𖾐 𖼖𖽺𖾑 𖼖𖽦 𖼠𖽸𖾑 𖼞𖽜 𖼰𖽨𖾑 𖼍𖽻𖾑 𖼄𖽳𖾐 𖼊𖽑𖽺 𖼰𖽡𖾐 𖼖𖽪𖾑 𖼂𖽚 𖼀𖽚𖾐 𖼍𖽦𖾐． 36 𖼽𖽻 𖼈𖽳𖾐 𖼰𖽨𖾑 𖼍𖽻𖾑 𖼄𖽳𖾐 𖼦𖽑𖽺𖾑 𖼀𖽑𖽨 𖼺𖽺𖾑，𖼳𖽳𖾐 𖼻𖽜 𖼂𖽻𖾐 𖼍𖽡 𖼺𖽪𖾐 𖼮𖽑𖽪 𖼠𖽴𖾐 𖼺𖽧𖾐 𖼠𖽻𖾐 𖼻𖽶𖾐 𖼖𖽡𖾐 𖼮𖽑𖽡𖾐 𖼞𖽳𖾐 𖼳𖽳𖾐 𖽃𖽔𖾑 𖼞𖽚 𖼖𖽦 𖼊𖽑𖽺 𖼠𖽕𖾑 𖼍𖽪𖾐． 𖼠𖽻𖾐 𖼻𖽶𖾐 𖼮𖽑𖽡𖾐 𖼈𖽶 𖼀𖽑𖽨 𖼺𖽺𖾑，𖼀𖽑𖽨𖾐 𖼍𖽡𖾐 𖼮𖽚𖾐 𖼖𖽡𖾐 𖼊𖽝𖾐 𖼞𖽑𖽶𖾐 𖼰𖽡𖽺𖾐．
37 𖼦𖽑𖽔𖾐 𖼖𖽺𖾑 𖼈𖽝 𖼊𖽑𖽧 𖼖𖽻𖾐 𖼺𖽪𖾐 𖼽𖽦 𖼄𖽳𖾐 𖼮𖽑𖽡𖾐 𖼄𖽶𖾑 𖼄𖽶𖾐 𖼐𖽺𖾐 𖼄𖽳𖾐 𖼷𖽺 𖼖𖽕𖾑 𖼖𖽕、 𖼄𖽳𖾐 𖼷𖽺 𖼐𖽑𖽡𖾐 𖼀𖽸、 𖼄𖽳𖾐 𖼷𖽺 𖼐𖽑𖽡𖾑 𖼐𖽑𖽡𖾐 𖼞𖽑𖽶𖾑 𖼳𖽶 𖼻𖽜 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖽃𖽔𖾑 𖼊𖽪 𖼞𖽳𖾐 𖼮𖽑𖽨𖾑 𖼄𖽳𖾐 𖼂𖽺𖾐． 38 𖼽𖽻 𖼈𖽳𖾐 𖼹𖽦𖾑 𖼮𖽑𖽪 𖼠𖽴𖾐 𖼺𖽧𖾐 𖼻𖽜 𖼮𖽑𖽨𖾑 𖼄𖽳𖾐 𖼖𖽙𖾐 𖼀𖽙𖾐 𖼠𖽻𖾐 𖼻𖽶𖾐 𖼣𖽙 𖼂𖽻𖾐 𖼹𖽸𖾑，𖼠𖽻𖾐 𖼻𖽶𖾐 𖼐𖽺𖾐 𖼻𖽶𖾐 𖼮𖽑𖽡𖽪 𖼊𖽑𖽺 𖼳𖽳𖾐 𖼻𖽜 𖼂𖽻𖾐 𖼍𖽡，𖼳𖽳𖾐 𖽃𖽔𖾑 𖼞𖽚 𖼖𖽦 𖼂𖽺𖾐 𖼍𖽴𖾑，𖼦𖽑𖽔𖾐 𖼖𖽺𖾑 𖼠𖽻𖾐 𖼻𖽶𖾐 𖼮𖽑𖽡𖾐 𖼈𖽶 𖼞𖽳𖾐 𖼮𖽡 𖼍𖽡𖾐 𖼮𖽚𖾐 𖼣𖽙 𖼊𖽝𖾐 𖼹𖽸𖾑．