𖽃𖽦𖾐 𖼰𖽧 𖼊𖽚𖾐 𖼺𖽪𖾑 39

𖼺𖽡 𖼮𖽡𖾐 𖼀𖽑𖽡𖽻𖾐 𖼂𖽺𖾐 (𖼊𖽚𖾐 28：1-5)

1 𖼽𖽻 𖼈𖽳𖾐 𖼄𖽳𖾐 𖼷𖽺 𖼖𖽕𖾑 𖼖𖽕、 𖼄𖽳𖾐 𖼷𖽺 𖼐𖽑𖽡𖾐 𖼀𖽸 𖼐𖽺𖾐 𖼄𖽳𖾐 𖼷𖽺 𖼐𖽑𖽡𖾑 𖼐𖽑𖽡𖾐 𖼞𖽑𖽶𖾑 𖼳𖽶 𖼻𖽜 𖼺𖽺𖾑，𖼍𖽡𖾐 𖼄𖽻 𖼺𖽡 𖼮𖽡𖾐 𖼊𖽺𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼠𖽙𖾐 𖼳𖽙𖾐 𖼞𖽑𖽶𖾑 𖼮𖽶𖾐 𖼈𖽦 𖼖𖽚𖾐 𖼂𖽚𖾐 𖼀𖽑𖽡𖽻𖾐 𖼮𖽻 𖼠𖽕𖾐 𖼂𖽺𖾐，𖼦𖽑𖽔𖾐 𖼖𖽺𖾑 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼊𖽑𖽺 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐 𖼺𖽺𖾑，𖼽𖽕𖾑 𖼖𖽪𖽦 𖼖𖽙𖾐 𖼀𖽙𖾐 𖼺𖽡 𖼮𖽡𖾐 𖼀𖽑𖽡𖽻𖾐 𖼂𖽺𖾐．

𖼽𖽡 𖼇𖽮 𖼍𖽴 𖼹𖽸𖾑 (𖼊𖽚𖾐 28：6-14 )

2 𖼽𖽻 𖼈𖽳𖾐 𖼦𖽑𖽔𖾐 𖼖𖽺𖾑 𖼳𖽳𖾐 𖼰𖽕𖾐、 𖼽𖽦 𖼄𖽳𖾐 𖼮𖽑𖽡𖾐 𖼄𖽶𖾑 𖼄𖽶𖾐 𖼐𖽺𖾐 𖼄𖽳𖾐 𖼷𖽺 𖼖𖽕𖾑 𖼖𖽕、 𖼄𖽳𖾐 𖼷𖽺 𖼐𖽑𖽡𖾐 𖼀𖽸、 𖼄𖽳𖾐 𖼷𖽺 𖼐𖽑𖽡𖾑 𖼐𖽑𖽡𖾐 𖼞𖽑𖽶𖾑 𖼳𖽶 𖼻𖽜 𖼽𖽡 𖼇𖽮 𖼍𖽴 𖼂𖽺𖾐． 3 𖼽𖽻 𖼈𖽳𖾐 𖼳𖽳𖾐 𖼀𖽑𖽡 𖼀𖽙𖾑 𖼀𖽙 𖼊𖽝 𖼊𖽑𖽧 𖼖𖽻𖾐，𖼷𖽑𖽳 𖼳𖽳𖾐 𖼰𖽕𖾐 𖼄𖽶𖾑 𖼄𖽶𖾐 𖼂𖽺𖾐 𖼺𖽺𖾑，𖼖𖽦 𖼠𖽸𖾑 𖼞𖽜 𖼷𖽝 𖼄𖽳𖾐 𖼷𖽺 𖼖𖽕𖾑 𖼖𖽕、 𖼄𖽳𖾐 𖼷𖽺 𖼐𖽑𖽡𖾐 𖼀𖽸、 𖼄𖽳𖾐 𖼷𖽺 𖼐𖽑𖽡𖾑 𖼐𖽑𖽡𖾐 𖼐𖽺𖾐 𖼽𖽦 𖼄𖽳𖾐 𖼮𖽑𖽡𖾐 𖼄𖽶𖾑 𖼄𖽶𖾐 𖼞𖽑𖽶𖾑 𖼳𖽶 𖼠𖽻𖾐 𖼊𖽑𖽺 𖼰𖽡𖽺𖾐．

4 𖼹𖽦𖾑 𖼽𖽡 𖼇𖽮 𖼍𖽴 𖼖𖽙𖾐 𖼀𖽙𖾐 𖼈𖽳𖾐 𖼀𖽑𖽳 𖼀𖽶 𖼰𖽕𖾐 𖼐𖽑𖽡 𖼰𖽴𖾐 𖼂𖽺𖾐，𖼀𖽑𖽨 𖼐𖽑𖽡 𖼀𖽳 𖼍𖽴𖾑． 5 𖼮𖽡𖽪 𖼳𖽡𖽦𖾐 𖼖𖽺𖾑 𖼽𖽡 𖼇𖽮 𖼍𖽴 𖼷𖽝 𖼖𖽙𖾐 𖼺𖽶𖾑，𖼳𖽳𖾐 𖼰𖽕𖾐、 𖼄𖽳𖾐 𖼷𖽺 𖼖𖽕𖾑 𖼖𖽕、 𖼄𖽳𖾐 𖼷𖽺 𖼐𖽑𖽡𖾐 𖼀𖽸、 𖼄𖽳𖾐 𖼷𖽺 𖼐𖽑𖽡𖾑 𖼐𖽑𖽡𖾐 𖼐𖽺𖾐 𖼈𖽝 𖼊𖽑𖽧 𖼖𖽻𖾐 𖼺𖽪𖾐 𖼽𖽦 𖼄𖽳𖾐 𖼮𖽑𖽡𖾐 𖼄𖽶𖾑 𖼄𖽶𖾐 𖼻𖽜 𖼂𖽺𖾐 𖼺𖽪𖾐 𖼣𖽻𖾐，𖼮𖽡𖽪 𖼳𖽡𖽦𖾐 𖼽𖽡 𖼇𖽮 𖼍𖽴 𖼊𖽑𖽺 𖼐𖽦𖾑 𖼍𖽡，𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼊𖽑𖽺 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐 𖼳𖽶 𖼣𖽻𖾐． 6 𖼽𖽻 𖼈𖽳𖾐 𖼀𖽑𖽶 𖼊𖽴 𖼖𖽚𖾐 𖼐𖽑𖽡𖾐 𖼐𖽑𖽡 𖼀𖽑𖽡 𖼈𖽺𖾐 𖼂𖽻𖾐 𖼖𖽻𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼞𖽳𖾐 𖼻𖽙 𖼦𖽑𖽺𖾑 𖼷𖽑𖽡𖾐 𖼐𖽑𖽡 𖼽𖽚𖾐 𖼄𖽡𖾐，𖼊𖽝 𖼀𖽑𖽶 𖼊𖽴 𖼖𖽚𖾐 𖼦𖽑𖽺𖾑 𖼐𖽑𖽡 𖼀𖽑𖽡 𖼊𖽑𖽺 𖼍𖽴𖾑，𖼂𖽚𖾐 𖼳𖽳𖾐 𖼰𖽡𖽦𖾐 𖼖𖽦𖾐 𖼀𖽑𖽡 𖼞𖽑𖽶𖾐 𖼰𖽡𖽺𖾐． 7 𖼐𖽑𖽡𖾐 𖼹𖽦𖾑 𖼀𖽑𖽶 𖼊𖽴 𖼖𖽚𖾐 𖼐𖽑𖽡 𖼀𖽑𖽡 𖼊𖽑𖽺 𖼀𖽑𖽨 𖼽𖽡 𖼇𖽮 𖼍𖽴 𖼈𖽳𖾐 𖼀𖽑𖽳 𖼀𖽶 𖼰𖽕𖾐 𖼊𖽑𖽺 𖼍𖽴𖾑 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼦𖽙𖾑 𖼮𖽑𖽡． 𖼽𖽕𖾑 𖼖𖽪𖽦 𖼈𖽳𖾐 𖼀𖽑𖽳 𖼐𖽑𖽡 𖼀𖽳 𖼽𖽡 𖼺𖽴𖾑 𖼖𖽡𖽦𖾑 𖼞𖽳𖾐 𖼻𖽙 𖼷𖽑𖽡𖾐 𖼐𖽑𖽡 𖼽𖽚𖾐 𖼄𖽡𖾐 𖼊𖽑𖽺 𖼀𖽶，𖼽𖽺𖾐 𖼦𖽴 𖼦𖽫 𖼞𖽜 𖼽𖽻 𖼞𖽳𖾐 𖼷𖽑𖽻𖾐 𖼀𖽺 𖼊𖽑𖽺 𖼦𖽙𖾑 𖼮𖽑𖽡 𖼊𖽪𖾐 𖼂𖽺𖾐．

𖼐𖽑𖽧𖾐 𖼄𖽙𖾐 𖼰𖽙𖾐𖼮𖽑𖽨𖾑 𖼀𖽑𖽡 𖼹𖽸𖾑 (𖼊𖽚𖾐 28：15-30)

8 𖼽𖽻 𖼈𖽳𖾐 𖼦𖽑𖽔𖾐 𖼖𖽺𖾑 𖼖𖽦 𖼠𖽸𖾑 𖼞𖽜 𖼽𖽡 𖼇𖽮 𖼍𖽴 𖼹𖽸𖾑 𖼖𖽙𖾐 𖼺𖽶𖾑，𖼳𖽳𖾐 𖼰𖽕𖾐、 𖼄𖽳𖾐 𖼷𖽺 𖼖𖽕𖾑 𖼖𖽕、 𖼄𖽳𖾐 𖼷𖽺 𖼐𖽑𖽡𖾐 𖼀𖽸、 𖼄𖽳𖾐 𖼷𖽺 𖼐𖽑𖽡𖾑 𖼐𖽑𖽡𖾐 𖼐𖽺𖾐 𖼈𖽝 𖼊𖽑𖽡 𖼖𖽻𖾐 𖼺𖽪𖾐 𖼽𖽦 𖼄𖽳𖾐 𖼮𖽑𖽡𖾐 𖼄𖽶𖾑 𖼄𖽶𖾐 𖼞𖽑𖽶𖾑 𖼳𖽶 𖼻𖽜 𖼺𖽺𖾑，𖼐𖽑𖽧𖾐 𖼄𖽙𖾐 𖼰𖽙𖾐 𖼮𖽑𖽨𖾑 𖼀𖽑𖽡 𖼊𖽑𖽡 𖼀𖽑𖽡 𖼹𖽸𖾑． 9 𖼐𖽑𖽧𖾐 𖼄𖽙𖾐 𖼰𖽙𖾐 𖼮𖽑𖽨𖾑𖼀𖽑𖽡 𖼞𖽳𖾐 𖼞𖽑𖽫𖾐 𖼳𖽶𖾐 𖼷𖽙𖾐 𖼖𖽙𖾐 𖼺𖽶𖾑，𖼐𖽑𖽡 𖼍𖽴𖾐 𖼣𖽻𖾐，𖼳𖽶𖾐 𖼞𖽳𖾐 𖼊𖽑𖽡 𖼣𖽜𖾐 𖼮𖽻𖾐，𖼞𖽑𖽫𖾐 𖼞𖽳𖾐 𖼖𖽺𖾑 𖼊𖽑𖽡 𖼣𖽜𖾐 𖼮𖽻𖾐． 10 𖼞𖽑𖽶𖾑 𖼊𖽑𖽺 𖼀𖽑𖽶 𖼊𖽴 𖼖𖽚𖾐 𖼖𖽡𖾐 𖼮𖽑𖽳𖾑 𖼂𖽚𖾐 𖼍𖽦𖾐： 𖼊𖽑𖽡 𖼮𖽑𖽳𖾑 𖼞𖽑𖽶𖾑 𖼮𖽑𖽳𖾑 𖼊𖽑𖽺 𖼀𖽑𖽶 𖼊𖽴 𖼖𖽚𖾐 𖼐𖽑𖽡𖾐、 𖼈𖽡𖾑 𖼳𖽳𖾐 𖼐𖽺𖾐 𖼈𖽡𖾑 𖼖𖽮𖾐 𖼀𖽑𖽳𖾐 𖼣𖽻𖾐， 11 𖼐𖽑𖽡 𖼮𖽑𖽳𖾑 𖼞𖽑𖽶𖾑 𖼮𖽑𖽳𖾑 𖼊𖽑𖽺 𖼀𖽑𖽶 𖼊𖽴 𖼖𖽚𖾐 𖼖𖽮𖾐、 𖼀𖽑𖽶 𖼊𖽴 𖼖𖽚𖾐 𖼖𖽕𖾑 𖼖𖽕 𖼐𖽺𖾐 𖼳𖽳𖾐 𖼦𖽜𖾐 𖼖𖽚𖾐 𖼣𖽻𖾐， 12 𖼺𖽙𖾐 𖼮𖽑𖽳𖾑 𖼞𖽑𖽶𖾑 𖼮𖽑𖽳𖾑 𖼊𖽑𖽺 𖼄𖽪 𖼦𖽜𖾐 𖼳𖽳𖾐、 𖼄𖽪 𖼦𖽜𖾐 𖼀𖽑𖽨𖾐 𖼐𖽺𖾐 𖼐𖽑𖽡𖾐 𖼷𖽑𖽧 𖼖𖽚𖾐 𖼣𖽻𖾐， 13 𖼖𖽡𖾐 𖼮𖽑𖽳𖾑 𖼞𖽑𖽶𖾑 𖼮𖽑𖽳𖾑 𖼊𖽑𖽺 𖼈𖽡𖾐 𖼮𖽡𖾐 𖼈𖽡𖾑、 𖼄𖽪 𖼦𖽜𖾐 𖼐𖽑𖽡𖾐 𖼐𖽺𖾐 𖼦𖽑𖽙𖾐 𖼈𖽡𖾑 𖼣𖽻𖾐，𖼀𖽑𖽶 𖼊𖽴 𖼖𖽚𖾐 𖼦𖽑𖽺𖾑 𖼹𖽻𖾐 𖼂𖽚𖾐 𖼳𖽳𖾐 𖼰𖽡𖽦𖾐 𖼖𖽦𖾐 𖼀𖽑𖽡 𖼞𖽑𖽶𖾐 𖼰𖽡𖽺𖾐． 14 𖼖𖽦 𖼠𖽸𖾑 𖼞𖽜 𖼽𖽡 𖼺𖽴𖾑 𖼖𖽡𖽦𖾑 𖼞𖽳𖾐 𖼻𖽙 𖼷𖽑𖽡𖾐 𖼐𖽑𖽡 𖼽𖽚𖾐 𖼄𖽡𖾐 𖼊𖽝 𖼀𖽑𖽶 𖼊𖽴 𖼖𖽚𖾐 𖼦𖽑𖽺𖾑 𖼷𖽑𖽡𖾐 𖼐𖽑𖽡 𖼀𖽑𖽡 𖼊𖽑𖽺 𖼍𖽦𖾐，𖼊𖽑𖽡 𖼀𖽑𖽡 𖼊𖽑𖽺 𖼊𖽑𖽡 𖼽𖽚𖾐 𖼄𖽡𖾐 𖼍𖽴𖾑，𖼦𖽑𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼞𖽳𖾐 𖼷𖽑𖽡𖾐 𖼐𖽑𖽡 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽡𖾑 𖼮𖽡𖽪 𖼳𖽶 𖼣𖽻𖾐．

15 𖼦𖽑𖽔𖾐 𖼖𖽺𖾑 𖼳𖽳𖾐 𖼠𖽕𖾐 𖼰𖽶𖾐 𖼻𖽜 𖼰𖽕𖾐 𖼈𖽝 𖼈𖽝 𖼖𖽙𖾐 𖼺𖽶𖾑，𖼐𖽑𖽧𖾐 𖼄𖽙𖾐 𖼰𖽙𖾐 𖼮𖽑𖽨𖾑 𖼀𖽑𖽡 𖼊𖽑𖽺 𖼳𖽳𖾐 𖼖𖽙 𖼰𖽳𖾑 𖼻𖽙 𖼂𖽺𖾐 𖼍𖽴𖾑． 16 𖼹𖽦𖾑 𖼳𖽳𖾐 𖼠𖽪𖾐 𖼖𖽪𖾐 𖼐𖽑𖽡 𖼊𖽝𖾐 𖼂𖽺𖾐 𖼺𖽺𖾑，𖼐𖽑𖽧𖾐 𖼄𖽙𖾐 𖼰𖽙𖾐 𖼮𖽑𖽨𖾑 𖼀𖽑𖽡 𖼞𖽔 𖼂𖽻𖾑 𖼐𖽑𖽡 𖼀𖽳 𖼊𖽑𖽺 𖼍𖽴𖾑． 17 𖼳𖽳𖾐 𖼖𖽙 𖼰𖽳𖾑 𖼻𖽙 𖼞𖽑𖽶𖾑 𖼐𖽑𖽡 𖼰𖽴𖾐 𖼀𖽑𖽳𖾐 𖼺𖽺𖾑，𖼐𖽑𖽧𖾐 𖼄𖽙𖾐 𖼰𖽙𖾐 𖼮𖽑𖽨𖾑 𖼀𖽑𖽡 𖼐𖽑𖽡 𖼀𖽳 𖼞𖽳𖾐 𖼳𖽳𖾐 𖼠𖽪𖾐 𖼖𖽪𖾐 𖼊𖽑𖽺 𖼍𖽡． 18 𖼦𖽑𖽔𖾐 𖼖𖽺𖾑 𖼳𖽳𖾐 𖼖𖽙 𖼰𖽳𖾑 𖼻𖽙 𖼠𖽳𖾐 𖼖𖽪𖾐 𖼞𖽑𖽶𖾑 𖼐𖽑𖽡 𖼀𖽳 𖼀𖽑𖽳𖾐 𖼺𖽺𖾑，𖼳𖽳𖾐 𖼰𖽡𖽦𖾐 𖼖𖽦𖾐 𖼀𖽑𖽡 𖼐𖽑𖽡 𖼊𖽝𖾐 𖼊𖽑𖽺 𖼍𖽴𖾑，𖼽𖽡 𖼇𖽮 𖼍𖽴 𖽃𖽙𖾑 𖼄𖽺 𖼀𖽳 𖼮𖽡𖽪 𖼳𖽡𖽦𖾐 𖼰𖽕𖾐 𖼖𖽙𖾐 𖼊𖽴． 19 𖼹𖽦𖾑 𖼳𖽳𖾐 𖼠𖽪𖾐 𖼖𖽪𖾐 𖼐𖽑𖽡 𖼊𖽝𖾐 𖼹𖽸𖾑，𖼀𖽑𖽨 𖼐𖽑𖽧𖾐 𖼄𖽙𖾐 𖼰𖽙𖾐 𖼮𖽑𖽨𖾑 𖼀𖽑𖽡 𖼞𖽳𖾐 𖼍𖽕𖾑 𖽂𖽚 𖼐𖽑𖽡 𖼀𖽳 𖼍𖽴𖾑． 20 𖼐𖽑𖽡𖾐 𖼦𖽑𖽔𖾐 𖼖𖽺𖾑 𖼳𖽳𖾐 𖼠𖽪𖾐 𖼖𖽪𖾐 𖼐𖽑𖽡 𖼊𖽝𖾐 𖼂𖽺𖾐 𖼺𖽺𖾑，𖼀𖽑𖽨 𖼽𖽡 𖼇𖽮 𖼍𖽴 𖽃𖽙𖾑 𖼄𖽺 𖼀𖽳 𖼈𖽳𖾐 𖼀𖽑𖽳 𖼀𖽶 𖼰𖽕𖾐 𖼐𖽑𖽡 𖼰𖽴𖾐 𖼍𖽕𖾑 𖽂𖽚 𖼞𖽑𖽶𖾑 𖼊𖽑𖽜𖾐 𖼖𖽙𖾐 𖼍𖽴𖾑，𖼮𖽡𖽪 𖼳𖽡𖽦𖾐 𖼞𖽳𖾐 𖼞𖽕 𖼂𖽻𖾑 𖼄𖽻𖾑 𖼮𖽻𖾐． 21 𖼰𖽕𖾐 𖼈𖽝 𖼻𖽙 𖼖𖽕𖾑 𖼖𖽕 𖼻𖽜 𖼐𖽑𖽧𖾐 𖼄𖽙𖾐 𖼰𖽙𖾐 𖼮𖽑𖽨𖾑 𖼀𖽑𖽡 𖼞𖽳𖾐 𖼠𖽪𖾐 𖼖𖽪𖾐 𖼀𖽑𖽳𖾐 𖼺𖽺𖾑，𖼽𖽡 𖼇𖽮 𖼍𖽴 𖼞𖽳𖾐 𖼠𖽪𖾐 𖼖𖽪𖾐 𖼊𖽑𖽺 𖼍𖽡，𖽃𖽔𖾐 𖼺𖽺𖾑 𖼐𖽑𖽧𖾐 𖼄𖽙𖾐 𖼰𖽙𖾐 𖼮𖽑𖽨𖾑 𖼀𖽑𖽡 𖼞𖽜 𖼽𖽡 𖼇𖽮 𖼍𖽴 𖼊𖽑𖽺 𖼣𖽴𖾑，𖼐𖽑𖽧𖾐 𖼄𖽙𖾐 𖼰𖽙𖾐 𖼮𖽑𖽨𖾑 𖼀𖽑𖽡 𖼞𖽜 𖽂𖽙𖾐 𖼷𖽑𖽦𖾐 𖼹𖽺𖾐 𖼖𖽻𖾐 𖼄𖽔 𖼊𖽙𖾐．

𖼊𖽑𖽦 𖼮𖽻𖾐 𖼀𖽑𖽡𖽻𖾐 𖼂𖽺𖾐 (𖼊𖽚𖾐 28：31-35 )

22 𖼽𖽻 𖼈𖽳𖾐 𖼹𖽦𖾑 𖼊𖽑𖽦 𖼮𖽻𖾐 𖼀𖽑𖽡𖽻𖾐 𖼮𖽻 𖼊𖽑𖽡 𖼳𖽡𖽚𖾐 𖼷𖽝，𖼊𖽑𖽡 𖼳𖽡𖽚𖾐 𖼐𖽺𖾐 𖼖𖽕𖾑 𖼖𖽕𖾐 𖼮𖽻𖾐． 23 𖼀𖽑𖽡𖽻 𖼮𖽻 𖼊𖽑𖽺 𖼖𖽺𖾐 𖼞𖽪𖾐 𖼊𖽑𖽡 𖼰𖽴𖾐 𖼂𖽺𖾐 𖼍𖽴𖾑，𖼖𖽺𖾐 𖼞𖽪𖾐 𖼦𖽜 𖼷𖽜𖾐 𖼊𖽑𖽺 𖼀𖽑𖽡𖽻𖾐 𖼐𖽝 𖼺𖽪𖾐 𖼞𖽜 𖼖𖽜 𖼻𖽙 𖼷𖽝 𖼍𖽴𖾑，𖼞𖽑𖽶𖾑 𖼄𖽦 𖼀𖽑𖽙 𖼀𖽑𖽡𖽻𖾐 𖼞𖽳𖾐 𖼖𖽺𖾐 𖼞𖽪𖾐 𖼖𖽙𖾐 𖼺𖽶𖾑 𖼺𖽺𖾑 𖼀𖽑𖽡𖽻𖾐 𖼮𖽻 𖼞𖽜 𖼷𖽺 𖼮𖽑𖽡𖽦 𖼄𖽔 𖼠𖽸𖾑． 24 𖼀𖽑𖽡𖽻𖾐 𖼮𖽻 𖼄𖽳𖾑 𖼖𖽦 𖼦𖽜 𖼷𖽜𖾐 𖼞𖽳𖾐 𖼷𖽝 𖼊𖽑𖽧 𖼖𖽻𖾐 𖼺𖽪𖾐 𖼽𖽦 𖼄𖽳𖾐 𖼮𖽑𖽡𖾐 𖼄𖽶𖾑 𖼄𖽶𖾐 𖼐𖽺𖾐 𖼄𖽳𖾐 𖼷𖽺 𖼖𖽕𖾑 𖼖𖽕、 𖼄𖽳𖾐 𖼷𖽺 𖼐𖽑𖽡𖾐 𖼀𖽸、 𖼄𖽳𖾐 𖼷𖽺 𖼐𖽑𖽡𖾑 𖼐𖽑𖽡𖾐 𖼻𖽜 𖼺𖽺𖾑，𖼺𖽸𖾑 𖼄𖽡𖽚 𖼖𖽙𖾐 𖼺𖽶𖾑 𖼂𖽺𖾐 𖼍𖽴𖾑， 25 𖼽𖽻 𖼦𖽑𖽔𖾐 𖼖𖽺𖾑 𖼳𖽳𖾐 𖼠𖽕𖾐 𖼰𖽶𖾐 𖼻𖽜 𖼺𖽳𖾑 𖼖𖽳𖾑 𖼂𖽺𖾐，𖼀𖽑𖽨 𖼺𖽺𖾑 𖼀𖽑𖽡𖽻 𖼮𖽻 𖼄𖽳𖾑 𖼖𖽦 𖼺𖽸𖾑 𖼄𖽡𖽚 𖼠𖽻𖾐 𖼊𖽑𖽺 𖼍𖽴𖾑， 26 𖼀𖽑𖽡𖽻𖾐 𖼮𖽻 𖼄𖽳𖾑 𖼖𖽦 𖼞𖽳𖾐 𖼍𖽴𖾑 𖼺𖽪𖾐 𖼺𖽳𖾑 𖼖𖽳𖾑 𖼐𖽺𖾐 𖼺𖽸𖾑 𖼄𖽡𖽚，𖼊𖽑𖽡 𖼳𖽶 𖼊𖽑𖽡 𖼄𖽙𖾐 𖼰𖽨𖾑 𖼐𖽺𖾐 𖼍𖽴𖾑． 𖼽𖽕𖾑 𖼖𖽪𖽦 𖼍𖽡𖾐 𖼄𖽻 𖼄𖽡𖽻 𖼄𖽪𖾐 𖼞𖽑𖽶𖾑 𖼮𖽶𖾐 𖼀𖽑𖽡𖽻𖾐 𖼮𖽻 𖼦𖽑𖽺𖾑 𖼈𖽦，𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼊𖽑𖽺 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐 𖼳𖽶 𖼣𖽻𖾐．

𖼞𖽑𖽶𖾐 𖼮𖽻𖾐 𖼀𖽑𖽡𖽻𖾐 𖼮𖽻 𖼐𖽝 (𖼊𖽚𖾐 28：39-43 )

27 𖼦𖽑𖽔𖾐 𖼖𖽺𖾑 𖼽𖽦 𖼄𖽳𖾐 𖼮𖽑𖽡𖾐 𖼄𖽶𖾑 𖼄𖽶𖾐 𖼞𖽑𖽶𖾑 𖼳𖽶 𖼻𖽜 𖼺𖽺𖾑，𖼽𖽕𖾑 𖼖𖽪𖽦 𖼐𖽺𖾐 𖼽𖽻 𖼻𖽙 𖼞𖽑𖽶𖾑 𖼹𖽻𖾐 𖼖𖽙𖾐 𖼀𖽙𖾐 𖼞𖽑𖽶𖾐 𖼮𖽻𖾐 𖼀𖽑𖽡𖽻𖾐 𖼮𖽻 𖼠𖽕𖾐 𖼷𖽝． 28 𖼹𖽦𖾑 𖼽𖽦 𖼄𖽳𖾐 𖼮𖽑𖽡𖾐 𖼄𖽶𖾑 𖼄𖽶𖾐 𖼻𖽜 𖼍𖽕 𖼰𖽡𖾐 𖼂𖽺𖾐，𖼀𖽑𖽡𖾐 𖼊𖽑𖽪𖾐 𖼷𖽝，𖼖𖽪𖾑 𖼊𖽪 𖼐𖽝． 29 𖼦𖽑𖽔𖾐 𖼖𖽺𖾑 𖼈𖽝 𖼊𖽑𖽧 𖼖𖽻𖾐 𖼺𖽪𖾐 𖼽𖽦 𖼄𖽳𖾐 𖼮𖽑𖽡𖾐 𖼄𖽶𖾑 𖼄𖽶𖾐 𖼐𖽺𖾐 𖼄𖽳𖾐 𖼷𖽺 𖼖𖽕𖾑 𖼖𖽕、 𖼄𖽳𖾐 𖼷𖽺 𖼐𖽑𖽡𖾐 𖼀𖽸、 𖼄𖽳𖾐 𖼷𖽺 𖼐𖽑𖽡𖾑 𖼐𖽑𖽡𖾐 𖼞𖽑𖽶𖾑 𖼳𖽶 𖼻𖽜 𖼺𖽺𖾑，𖼖𖽦 𖼠𖽸𖾑 𖼞𖽜 𖼮𖽡𖽪 𖼳𖽡𖽦𖾐 𖼊𖽑𖽺 𖼈𖽦𖾐 𖼖𖽪𖾐 𖼀𖽚𖾐 𖼍𖽦𖾐． 𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼊𖽑𖽺 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐 𖼳𖽶 𖼣𖽻𖾐．

𖼍𖽕 𖼰𖽡𖾐 𖼣𖽴 𖼀𖽑𖽡 𖼂𖽺𖾐 (𖼊𖽚𖾐 28：36-36)

30 𖼐𖽑𖽡𖾐 𖼳𖽳𖾐 𖼀𖽑𖽡 𖼊𖽑𖽡 𖼀𖽑𖽡 𖼊𖽝，𖼖𖽦 𖼠𖽸𖾑 𖼞𖽜 𖼞𖽑𖽶𖾑 𖼊𖽑𖽺 “𖼺𖽡 𖼮𖽡𖾐 𖼺𖽪𖾐 𖼽𖽺𖾐 𖼦𖽴 𖼦𖽫 𖼷𖽺𖾐 𖼣𖽻𖾐 ” 𖼊𖽝 𖼍𖽴𖾑． 31 𖼹𖽦𖾑 𖼰𖽕𖾐 𖼈𖽝 𖼖𖽕𖾑 𖼖𖽕𖾐 𖼊𖽑𖽡 𖼮𖽑𖽡𖾐 𖼈𖽺𖾐 𖼺𖽺𖾑，𖼳𖽳𖾐 𖼀𖽑𖽡 𖼀𖽑𖽳𖾐 𖼍𖽕 𖼰𖽡𖾐 𖼞𖽳𖾐 𖼣𖽴 𖼠𖽻𖾐 𖼊𖽑𖽺 𖼍𖽡． 𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼊𖽑𖽺 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐 𖼳𖽶 𖼣𖽻𖾐．

𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐𖼞𖽳𖾐 𖼄𖽡𖽻 𖼂𖽺𖾐 𖼦𖽑𖽻𖾐

32 𖽃𖽔𖾐 𖼺𖽺𖾑，𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽳𖾐 𖼄𖽡𖽻 𖼄𖽳𖾑 𖼄𖽳 𖼂𖽺𖾐 𖼀𖽑𖽢 𖼦𖽑𖽻𖾐． 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼊𖽑𖽺 𖽃𖽔 𖼊𖽺𖾐 𖼄𖽪𖾑 𖼍𖽴𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖽃𖽔 𖼊𖽺𖾐 𖼂𖽺𖾐 𖼀𖽑𖽢． 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼽𖽻 𖼈𖽳𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽳𖾐 𖼄𖽡𖽻 𖼄𖽳𖾑 𖼄𖽳 𖼂𖽺𖾐 𖼦𖽑𖽻𖾐． 33 𖼽𖽻 𖼈𖽳𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼐𖽺𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽳𖾐 𖼄𖽡𖽻 𖼐𖽑𖽡，𖼄𖽳𖾑 𖼄𖽳 𖼦𖽑𖽙𖾐 𖼄𖽚 𖼳𖽡𖾐 𖼞𖽳𖾐 𖼞𖽑𖽶𖾑 𖼠𖽻𖾐 𖼖𖽻𖾐． 𖼞𖽑𖽶𖾑 𖼍𖽕𖾑 𖽂𖽚 𖼦𖽑𖽺𖾑 𖼹𖽻𖾐 𖼣𖽻𖾐：

𖽃𖽔𖾑 𖼞𖽚 𖼖𖽦、 𖼺𖽧𖾐 𖼀𖽑𖽡、 𖼰𖽡𖽻𖾑 𖼖𖽜、 𖼠𖽻𖾐 𖼻𖽶𖾐、 𖼍𖽡𖾐 𖼮𖽚𖾐，

34 𖼀𖽜𖾐 𖼊𖽪𖾐 𖼂𖽺𖾐 𖼖𖽚𖾐 𖼂𖽚𖾐 𖼦𖽑𖽨𖾐 𖼐𖽑𖽡𖾐 𖼺𖽪𖾐 𖼽𖽻𖾐 𖼖𖽙𖾐 𖼮𖽡𖾐、 𖼈𖽡𖾐 𖼳𖽶𖾐 𖼮𖽡𖾐 𖼐𖽺𖾐 𖼺𖽡 𖼮𖽡𖾐 𖼷𖽑𖽚 𖼊𖽺𖾐 𖼞𖽳𖾐 𖼰𖽨𖾑 𖼍𖽻𖾑 𖼄𖽳𖾐，

35 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺、 𖼀𖽚𖾐 𖼮𖽡𖽺 𖼈𖽦𖾑 𖼖𖽜 𖼐𖽺𖾐 𖼮𖽡 𖼽𖽡𖾑 𖼳𖽳𖾐 𖼮𖽡𖽺，

36 𖼹𖽙𖾐 𖼹𖽶𖾐 𖼐𖽺𖾐 𖼹𖽙𖾐 𖼹𖽶𖾐 𖼊𖽑𖽺 𖼍𖽦𖾐 𖼺𖽪𖾐 𖼄𖽡𖽻 𖼐𖽑𖽡 𖼻𖽜 𖼊𖽪𖾐、 𖼦𖽑𖽙𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼞𖽜 𖼺𖽪𖾐 𖽃𖽔𖾑 𖼂𖽻𖾐，

37 𖼳𖽳𖾐 𖼀𖽙𖾐 𖼷𖽻𖾐 𖼐𖽺𖾐 𖼀𖽙𖾐 𖼊𖽪𖾐，𖼀𖽙𖾐 𖼷𖽻𖾐 𖼞𖽳𖾐 𖼄𖽡𖽻 𖼐𖽑𖽡 𖼻𖽜 𖼊𖽪𖾐 𖼐𖽺𖾐 𖼀𖽙𖾐 𖼊𖽪𖾐 𖼍𖽚𖾑 𖼖𖽚𖾐 𖼂𖽚𖾐 𖽃𖽔 𖼮𖽑𖽙 𖼵𖽶𖾐 𖼈𖽡𖾐，

38 𖼳𖽳𖾐 𖼳𖽡𖽻𖾐 𖼷𖽻𖾐、 𖼳𖽡𖽻𖾐 𖼷𖽑𖽳𖾐、 𖼳𖽡𖽻𖾑 𖼳𖽡𖽻𖾐 𖼮𖽻𖾐 𖼺𖽪𖾐 𖼳𖽡𖽻𖾐 𖼐𖽺𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖽃𖽔𖾑 𖼊𖽪 𖼞𖽳𖾐 𖼮𖽑𖽨𖾑 𖼄𖽳𖾐，

39 𖼮𖽡 𖼍𖽡𖾐 𖼷𖽻𖾐、 𖼍𖽡𖾐 𖼷𖽻𖾐 𖼊𖽑𖽺 𖼍𖽴𖾑 𖼺𖽪𖾐 𖼮𖽡 𖼂𖽜𖾑、 𖼍𖽡𖾐 𖼷𖽻𖾐 𖼈𖽦𖾑 𖼖𖽜 𖼐𖽺𖾐 𖼍𖽡𖾐 𖼷𖽻𖾐 𖼞𖽳𖾐 𖼄𖽡𖽻 𖼐𖽑𖽡 𖼻𖽜 𖼊𖽪𖾐，𖼊𖽪 𖼖𖽻 𖼐𖽺𖾐 𖼊𖽪 𖼖𖽻 𖼍𖽡𖾐 𖼊𖽪𖾐，

40 𖼮𖽡𖽺 𖼞𖽪 𖼞𖽳𖾐 𖼮𖽑𖽨𖾑 𖼮𖽑𖽙𖾐、 𖼠𖽻𖾐 𖼻𖽶𖾐、 𖼮𖽡 𖼍𖽡𖾐 𖼮𖽚𖾐、 𖼠𖽳𖾑 𖼄𖽡𖾐 𖼊𖽪 𖼞𖽳𖾐 𖼮𖽑𖽨𖾑 𖼄𖽳𖾐、 𖼰𖽕𖾐 𖼈𖽝、 𖼮𖽡 𖼹𖽙𖾑 𖼐𖽺𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐，𖼹𖽦𖾑 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽳𖾐 𖼻𖽜 𖼖𖽚𖾐 𖼂𖽚𖾐 𖼞𖽑𖽙𖾐 𖼣𖽻𖾐 𖼳𖽶 𖼄𖽡𖽻 𖼐𖽑𖽡．

41 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽑𖽶𖾐 𖼺𖽡 𖼮𖽡𖾐 𖼊𖽺𖾐 𖼞𖽳𖾐 𖼠𖽙𖾐 𖼳𖽙𖾐 𖼞𖽑𖽶𖾑 𖼮𖽶𖾐，𖼽𖽕𖾑 𖼖𖽪𖽦 𖼈𖽦 𖼖𖽚𖾐 𖼂𖽚𖾐 𖼺𖽡 𖼮𖽡𖾐 𖼀𖽑𖽡𖽻𖾐 𖼐𖽺𖾐 𖼽𖽻 𖼻𖽙 𖼞𖽑𖽶𖾑 𖼹𖽻𖾐 𖼞𖽳𖾐 𖼍𖽡𖾐 𖼄𖽻 𖼀𖽑𖽡𖽻𖾐 𖼷𖽑𖽶．

42 𖼄𖽡𖽻 𖼦𖽑𖽺𖾑 𖼹𖽻𖾐 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼊𖽑𖽺 𖽃𖽔 𖼊𖽺𖾐 𖼄𖽪𖾑 𖼍𖽴𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖽃𖽔 𖼊𖽺𖾐 𖼂𖽺𖾐 𖼀𖽑𖽢 𖼦𖽑𖽻𖾐． 43 𖼄𖽚𖾐 𖼳𖽡𖾐 𖼄𖽡𖽻 𖼐𖽑𖽡 𖼄𖽳𖾑 𖼄𖽳 𖼮𖽑𖽕 𖼐𖽦𖾐 𖼦𖽑𖽻𖾐，𖼽𖽻 𖼈𖽳𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖼄𖽡𖽻 𖼐𖽑𖽡，𖼄𖽳𖾑 𖼄𖽳 𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐，𖽃𖽔𖾐 𖼺𖽺𖾑 𖼄𖽚 𖼳𖽡𖾐 𖼄𖽢 𖼦𖽙𖾐 𖼽𖽻 𖼈𖽳𖾐 𖼊𖽑𖽺 𖼞𖽜．