𖼳𖽡𖽻𖾐 𖼷𖽻𖾐 𖼞𖽳𖾐 𖼠𖽴𖾐 𖼮𖽑𖽡𖽻𖾐
30
1 𖼐𖽑𖽡𖾐 𖼮𖽑𖽪 𖼠𖽴𖾐 𖼺𖽧𖾐 𖼻𖽜 𖼺𖽺𖾑，𖼳𖽡𖽻𖾐 𖼷𖽻𖾐 𖼊𖽑𖽡 𖼷𖽻𖾐 𖼹𖽸𖾑 𖼖𖽡𖾐． 2 𖼳𖽡𖽻𖾐 𖼷𖽻𖾐 𖼞𖽳𖾐 𖼞𖽑𖽫𖾐 𖼳𖽶𖾐 𖼷𖽙𖾐 𖼖𖽙𖾐 𖼺𖽶𖾑 𖼖𖽡𖾐，𖼳𖽶𖾐 𖼞𖽳𖾐 𖼊𖽑𖽡 𖼖𖽦 𖼞𖽚，𖼞𖽑𖽫𖾐 𖼞𖽳𖾐 𖼊𖽑𖽡 𖼖𖽦 𖼞𖽚，𖼄𖽶𖾐 𖼞𖽳𖾐 𖼐𖽑𖽡 𖼖𖽦 𖼞𖽚 𖼮𖽻𖾐 𖼖𖽡𖾐． 𖼳𖽡𖽻𖾐 𖼷𖽻𖾐 𖼖𖽡𖾐 𖼣𖽴 𖼞𖽳𖾐 𖼮𖽑𖽡𖽪𖾐 𖼞𖽑𖽶𖾑 𖼳𖽡𖽻𖾐 𖼷𖽻𖾐 𖼊𖽑𖽺 𖼊𖽴 𖼖𖽡𖾐． 3 𖼐𖽑𖽡𖾐 𖼳𖽳𖾐 𖼠𖽕𖾐 𖼮𖽶𖾐 𖼻𖽜 𖼳𖽡𖽻𖾐 𖼷𖽻𖾐 𖼞𖽳𖾐 𖼈𖽪𖾑 𖼖𖽚𖾐、 𖼖𖽡𖾐 𖼀𖽳 𖼐𖽺𖾐 𖼳𖽡𖽻𖾐 𖼷𖽻𖾐 𖼖𖽡𖾐 𖼣𖽴 𖼊𖽑𖽺 𖼂𖽻𖾐 𖼍𖽡 𖼖𖽡𖾐，𖼦𖽑𖽔𖾐 𖼖𖽺𖾑 𖼳𖽡𖽻𖾐 𖼷𖽻𖾐 𖼖𖽡𖾐 𖼣𖽴 𖼊𖽑𖽺 𖼳𖽳𖾐 𖼺𖽜 𖼹𖽸𖾑 𖼍𖽴𖾑 𖼖𖽡𖾐． 4 𖼳𖽳𖾐 𖼺𖽜 𖼍𖽴𖾑 𖼞𖽳𖾐 𖽂𖽚 𖼞𖽑𖽶𖾐，𖼳𖽳𖾐 𖼠𖽪𖾐 𖼖𖽪𖾐 𖼐𖽑𖽡 𖼊𖽝𖾐 𖼹𖽸𖾑 𖼍𖽴𖾑 𖼖𖽡𖾐，𖼊𖽑𖽡 𖼀𖽳 𖼊𖽑𖽡 𖼊𖽝𖾐 𖼍𖽴𖾑，𖼈𖽦𖾑 𖼖𖽜 𖼺𖽳𖾐 𖼰𖽡𖽺𖾐 𖼺𖽺𖾑，𖼳𖽡𖽻𖾐 𖼷𖽻𖾐 𖼊𖽑𖽺 𖼈𖽦𖾑 𖼺𖽜 𖼖𖽡𖾐． 5 𖼐𖽑𖽡𖾐 𖼮𖽑𖽪 𖼠𖽴𖾐 𖼺𖽧𖾐 𖼻𖽜 𖼈𖽦𖾑 𖼖𖽜 𖼹𖽸𖾑，𖼦𖽑𖽔𖾐 𖼖𖽺𖾑 𖼳𖽳𖾐 𖼻𖽜 𖼂𖽻𖾐 𖼍𖽡 𖼖𖽡𖾐． 6 𖼐𖽑𖽡𖾐 𖼳𖽡𖽻𖾐 𖼷𖽻𖾐 𖼀𖽑𖽨 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖽃𖽙𖾑 𖼄𖽺 𖼮𖽑𖽡𖽺，𖼰𖽨𖾑 𖼍𖽻𖾑 𖼄𖽳𖾐 𖼞𖽳𖾐 𖼐𖽑𖽡𖾑 𖼮𖽻𖾐 𖼀𖽳 𖼍𖽙𖾑，𖼽𖽻 𖼞𖽜 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼞𖽳𖾐 𖼮𖽡 𖼽𖽡𖾑 𖼳𖽳𖾐 𖼮𖽡𖽺 𖼍𖽴 𖼍𖽪𖾐 𖼞𖽳𖾐 𖼍𖽙𖾑 𖼖𖽡𖾐，𖼣𖽙𖾐 𖼮𖽡 𖼽𖽡𖾑 𖼳𖽳𖾐 𖼮𖽡𖽺 𖼞𖽳𖾐 𖼞𖽑𖽶𖾑 𖼠𖽻𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼻𖽶𖾑 𖼊𖽻𖾐．7 𖼽𖽕𖾑 𖼖𖽪𖽦 𖼳𖽡𖽻𖾐 𖼷𖽻𖾐 𖼊𖽑𖽺 𖼳𖽡𖽻𖾑 𖼳𖽡𖽻𖾐 𖼮𖽻𖾐 𖼺𖽪𖾐 𖼳𖽡𖽻𖾐 𖼄𖽶𖾐 𖼮𖽑𖽡𖽪𖾐 𖼖𖽡𖾐，𖼊𖽑𖽡 𖼐𖽜𖾑 𖼊𖽑𖽡 𖼐𖽜𖾐 𖼀𖽙𖾐 𖼊𖽪𖾐 𖼠𖽙𖾐 𖼳𖽙𖾐 𖼞𖽑𖽶𖾑 𖼮𖽶𖾐，𖼳𖽡𖽻𖾐 𖼷𖽻𖾐 𖼊𖽑𖽺 𖼳𖽡𖽻𖾐 𖼦𖽑𖽺𖾑 𖼮𖽑𖽡𖽪𖾐 𖼖𖽡𖾐． 8 𖽃𖽔𖾑 𖼄𖽶 𖼐𖽑𖽡𖾐 𖼖𖽻𖾑 𖼹𖽺𖾐 𖼽𖽡𖾐，𖼽𖽕𖾑 𖼖𖽪𖽦 𖼀𖽙𖾐 𖼊𖽪𖾐 𖼍𖽚𖾑 𖼞𖽑𖽶𖾑 𖼮𖽶𖾐，𖼳𖽡𖽻𖾐 𖼦𖽑𖽺𖾑 𖼮𖽑𖽡𖽪𖾐 𖼖𖽡𖾐，𖼦𖽑𖽺𖾑 𖼐𖽑𖽡𖾐 𖼈𖽳𖾐 𖼹𖽦𖾐 𖼹𖽦𖾐 𖼀𖽻𖾐 𖼀𖽻𖾐，𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼄𖽔 𖼐𖽙 𖼮𖽑𖽡𖽪𖾐 𖼖𖽡𖾐 𖼺𖽪𖾐 𖼳𖽡𖽻𖾐 𖼣𖽻𖾐． 9 𖼐𖽑𖽡𖾐 𖼈𖽳𖾐 𖼳𖽡𖽻𖾐 𖼷𖽻𖾐 𖼊𖽑𖽺 𖼠𖽳𖾐 𖼖𖽪𖾐 𖼳𖽡𖽻𖾐 𖽂𖽙𖾐 𖼮𖽑𖽡𖽪𖾐 𖼄𖽔 𖼊𖽙𖾐，𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐、 𖼷𖽙𖾐 𖼺𖽳 𖼍𖽡𖾐 𖼮𖽡𖽺𖾐 𖼐𖽺𖾐 𖼮𖽶𖾐 𖼀𖽳 𖼍𖽡𖾐 𖼮𖽡𖽺𖾐 𖼖𖽺𖾑 𖽂𖽙𖾐 𖼂𖽺𖾐 𖼄𖽔 𖼊𖽙𖾐．
10 𖼽𖽕𖾑 𖼖𖽪𖽦 𖼊𖽑𖽡 𖼞𖽑𖽚 𖼊𖽑𖽡 𖼰𖽻𖾐，𖼽𖽺𖾐 𖼮𖽑𖽡𖽪𖾑 𖼍𖽡𖾐 𖼮𖽡𖽺𖾐 𖼞𖽳𖾐 𖼮𖽡𖽺 𖼺𖽶 𖼻𖽜 𖼺𖽺𖾑，𖼳𖽡𖽻𖾐 𖼷𖽻𖾐 𖼞𖽳𖾐 𖼮𖽑𖽡𖽪𖾐 𖼖𖽡𖾐 𖼂𖽦𖾐 𖼊𖽑𖽺 𖼄𖽺𖾑，𖼳𖽡𖽻𖾐 𖼷𖽻𖾐 𖼖𖽙𖾐 𖼀𖽙𖾐 𖼺𖽡 𖼮𖽡𖾐 𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼖𖽡𖾐． 𖼐𖽑𖽡𖾐 𖼈𖽳𖾐 𖼹𖽦𖾐 𖼹𖽦𖾐 𖼀𖽻𖾐 𖼀𖽻𖾐 𖼦𖽑𖽺𖾑 𖼻𖽻𖾐 𖼂𖽺𖾐 𖼺𖽺𖾑，𖼳𖽡𖽻𖾐 𖼷𖽻𖾐 𖼞𖽜 𖼽𖽺𖾐 𖼦𖽴 𖼦𖽫 𖽃𖽙𖾑 𖼮𖽑𖽡𖽺 𖼺𖽡 𖼮𖽡𖾐 𖼷𖽑𖽚 𖼖𖽡𖾐．”
𖼷𖽑𖽻𖾐 𖼊𖽑𖽺 𖼈𖽳 𖼞𖽑𖽚 𖼞𖽳𖾐 𖼀𖽑𖽶
11 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐： 12 “𖼐𖽑𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼀𖽺 𖼊𖽑𖽺 𖼈𖽜𖾐 𖼐𖽦𖾐 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼞𖽑𖽙𖾐 𖼈𖽜𖾐 𖼖𖽙𖾐 𖼮𖽑𖽻𖾐，𖼽𖽻 𖼈𖽳𖾐 𖼽𖽻 𖼄𖽳𖾑 𖼈𖽪𖾑 𖼠𖽻𖾐 𖼖𖽙𖾐 𖼀𖽙𖾐 𖼈𖽳 𖼀𖽑𖽶 𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜 𖼖𖽡𖾐． 𖼈𖽳 𖼀𖽑𖽶 𖼄𖽔 𖼞𖽜 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼽𖽻 𖼈𖽳𖾐 𖼊𖽑𖽺 𖼈𖽜𖾐 𖼐𖽦𖾐 𖼞𖽑𖽶𖾑 𖼮𖽶𖾐 𖼹𖽦𖾐，𖼽𖽻 𖼈𖽳𖾐 𖼐𖽙𖾐 𖼊𖽡𖾐 𖼈𖽡𖾑 𖼞𖽑𖽙 𖼷𖽶𖾐 𖼄𖽳𖾐 𖼠𖽸𖾑． 13 𖼞𖽑𖽙𖾐 𖼈𖽜𖾐 𖼠𖽚 𖼺𖽪𖾐 𖼷𖽑𖽻𖾐，𖼊𖽑𖽡 𖼽𖽚𖾑 𖼽𖽚𖾐 𖼺𖽡 𖼮𖽡𖾐 𖼊𖽺𖾐 𖼞𖽳𖾐 𖼮𖽡𖽻𖾐 𖼊𖽪𖾐 𖼖𖽙𖾐 𖼮𖽑𖽻𖾐 𖼀𖽑𖽨𖾐 𖼀𖽑𖽡 \fr 30．13 \ft 𖼀𖽑𖽨𖾐 𖼀𖽑𖽡𖾐 𖼦𖽑𖽺𖾑 “𖼮𖽑𖽡𖽚 𖼷𖽑𖽺𖾐 𖼞𖽳𖾐 𖼷𖽑𖽡𖾐 𖼀𖽜𖾐 𖼊𖽑𖽡 𖼀𖽜𖾐 ” 𖼣𖽻𖾐． 𖼊𖽑𖽡 𖼀𖽑𖽡 𖼻𖽙 𖼊𖽚𖾐 𖼖𖽡𖾐，𖼀𖽑𖽨𖾐 𖼀𖽑𖽡 𖼦𖽑𖽺𖾑 𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜 𖼖𖽡𖾐 𖼳𖽶 𖼣𖽻𖾐． 14 𖼞𖽑𖽙𖾐 𖼈𖽜𖾐 𖼠𖽚 𖼺𖽪𖾐 𖼷𖽑𖽻𖾐，𖼐𖽑𖽡 𖼷𖽑𖽡𖾐 𖼞𖽑𖽚 𖼊𖽑𖽺 𖼊𖽦𖾐 𖼺𖽪𖾐，𖼈𖽳 𖼀𖽑𖽶 𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜 𖼖𖽡𖾐． 15 𖼷𖽑𖽻𖾐 𖼀𖽻𖾐 𖼀𖽑𖽙 𖼄𖽨 𖼄𖽨 𖼊𖽚𖾐 𖼄𖽔 𖼻𖽻𖾐，𖼷𖽑𖽻𖾐 𖼳𖽚𖾑 𖼀𖽑𖽙 𖼖𖽺𖾑 𖼣𖽻𖾐 𖼐𖽑𖽡𖽪𖾑 𖼍𖽺𖾑 𖽂𖽙𖾐 𖼊𖽚𖾐 𖼄𖽔 𖼊𖽙𖾐． 𖼊𖽑𖽡 𖼽𖽚𖾑 𖼽𖽚𖾐 𖼞𖽑𖽙𖾐 𖼊𖽚𖾐 𖼖𖽡𖾐 𖼺𖽪𖾐 𖼞𖽑𖽶𖾑 𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜 𖼺𖽺𖾑，𖼐𖽑𖽡𖾐 𖼈𖽳𖾐 𖼖𖽙𖾐 𖼀𖽙𖾐 𖼈𖽪𖾑 𖼠𖽻𖾐 𖼈𖽳 𖼀𖽑𖽶 𖼂𖽺𖾐 𖼖𖽡𖾐． 16 𖼐𖽑𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼠𖽜𖾐 𖼂𖽻𖾐 𖼖𖽻𖾐 𖼺𖽪𖾐 𖼈𖽳 𖼀𖽑𖽶 𖼀𖽑𖽨 𖼺𖽺𖾑，𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽑𖽶𖾐 𖼠𖽙𖾐 𖼳𖽙𖾐 𖼞𖽳𖾐 𖼄𖽡𖽻 𖼊𖽑𖽺 𖼍𖽺𖾑 𖽂𖽙𖾐 𖼻𖽜 𖼊𖽙𖾐． 𖼦𖽑𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼽𖽻 𖼄𖽳𖾑 𖼈𖽪𖾑 𖼠𖽻𖾐 𖼊𖽑𖽺 𖼈𖽳 𖼞𖽑𖽚 𖼖𖽡𖾐 𖼺𖽪𖾐 𖼀𖽑𖽶 𖼣𖽻𖾐，𖽃𖽔𖾐 𖼺𖽺𖾑 𖼽𖽺𖾐 𖼦𖽴 𖼦𖽫 𖼷𖽑𖽜𖾑 𖼷𖽑𖽜𖾐 𖼽𖽻 𖼈𖽳𖾐 𖼊𖽑𖽺 𖼦𖽙𖾑 𖼮𖽑𖽡 𖼊𖽻𖾐．”
𖼮𖽡 𖼊𖽪 𖼖𖽻 𖼞𖽳𖾐 𖼮𖽑𖽡𖽻𖾐 ( 𖼊𖽚𖾐38：8)
17 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐： 18 𖼐𖽑𖽡𖾐 𖼮𖽡 𖼻𖽜 𖼊𖽪 𖼖𖽻 𖼊𖽑𖽡 𖼊𖽝𖾐 𖼐𖽺𖾐 𖼊𖽪 𖼖𖽻 𖼍𖽡𖾐 𖼊𖽪𖾐 𖼹𖽸𖾑，𖼊𖽪 𖼖𖽻 𖼞𖽑𖽶𖾐 𖽃𖽔𖾐 𖼮𖽡𖽦𖾐 𖼰𖽡𖽺𖾐 𖼺𖽺𖾑 𖼷𖽑𖽡 𖼖𖽚𖾐 𖼂𖽚𖾐 𖼂𖽺𖾐 𖼖𖽡𖾐，𖼊𖽪 𖼖𖽻 𖼦𖽑𖽺𖾑 𖼀𖽑𖽨 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼐𖽺𖾐 𖼍𖽡𖾐 𖼷𖽻𖾐 𖼠𖽻𖾐 𖼊𖽑𖽺 𖼞𖽳𖾐 𖼍𖽙𖾑 𖼖𖽡𖾐． 19 𖼽𖽕𖾑 𖼖𖽪𖽦 𖼐𖽺𖾐 𖼽𖽻 𖼻𖽙 𖼞𖽑𖽶𖾑 𖼹𖽻𖾐 𖼊𖽪 𖼖𖽻 𖼞𖽑𖽶𖾐 𖼮𖽑𖽡𖾐 𖼈𖽶 𖼖𖽦𖾐 𖼈𖽶 𖼷𖽑𖽡 𖼖𖽡𖾐． 20 𖼽𖽻 𖼈𖽳𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽑𖽶𖾐 𖼊𖽡 𖼽𖽡𖾐 𖼣𖽻𖾐 𖼦𖽻，𖼍𖽡𖾐 𖼷𖽻𖾐 𖼞𖽳𖾐 𖽃𖽔𖾐 𖼍𖽚𖾑 𖼻𖽜 𖼍𖽡𖾐 𖼊𖽪𖾐 𖼊𖽑𖽺 𖼮𖽑𖽡𖽪𖾐，𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜 𖼣𖽻𖾐 𖼦𖽻，𖼮𖽑𖽡𖾐 𖼈𖽶 𖼖𖽦 𖼈𖽶 𖼷𖽑𖽡 𖼺𖽺𖾑 𖼳𖽶𖾐 𖼮𖽡𖽦 𖼄𖽔 𖼠𖽸𖾑 𖼊𖽻𖾐． 21 𖼐𖽑𖽡𖾐 𖼈𖽳𖾐 𖼮𖽑𖽡𖾐 𖼈𖽶 𖼖𖽦 𖼈𖽶 𖼄𖽔 𖼷𖽑𖽡 𖼊𖽑𖽡𖾑 𖼣𖽻𖾐，𖼷𖽑𖽜𖾑 𖼷𖽑𖽜𖾐 𖼳𖽶𖾐 𖼊𖽻𖾐． 𖼦𖽑𖽺𖾑 𖼽𖽕𖾑 𖼖𖽪𖽦 𖼐𖽺𖾐 𖼽𖽻 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐，𖼹𖽦𖾐 𖼹𖽦𖾐 𖼀𖽻𖾐 𖼀𖽻𖾐 𖼞𖽳𖾐 𖼳𖽪𖾐 𖼮𖽨𖾐 𖼣𖽻𖾐．
𖼺𖽡 𖼮𖽡𖾐 𖼺𖽪𖾐 𖼳𖽡𖽻𖾐 𖼷𖽑𖽳𖾐 𖼂𖽺𖾐 𖼞𖽳𖾐 𖼳𖽪𖾐 𖼮𖽨𖾐
22 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐： 23 𖼐𖽑𖽡𖾐 𖼦𖽑𖽔𖾐 𖼮𖽶𖾐 𖼹𖽳𖾐 𖼺𖽪𖾐 𖼳𖽡𖽻𖾐 𖼄𖽶𖾐 𖼻𖽜 𖼺𖽺𖾑 𖼳𖽡𖽻𖾐 𖼷𖽑𖽳𖾐 𖼂𖽺𖾐 𖼖𖽡𖾐，𖼳𖽡𖽻𖾑 𖼳𖽡𖽻𖾐 𖼮𖽻𖾐 𖼺𖽪𖾐 𖼺𖽧𖾐 𖼰𖽡𖾐 \fr 30．23 \ft “𖼳𖽡𖽻𖾑 𖼳𖽡𖽻𖾐 𖼮𖽻𖾐 𖼺𖽪𖾐 𖼺𖽧𖾐 𖼰𖽡𖾐 ” 𖼦𖽑𖽺𖾑 𖼳𖽡𖽦𖾑 𖼈𖽪𖾐 “𖼄𖽚𖾑 𖼽𖽘𖾑 ” 𖼀𖽦𖾐 𖼺𖽪𖾐 𖼣𖽻𖾐． 𖼮𖽑𖽡𖽚 𖼰𖽡𖾐，𖼳𖽡𖽻𖾑 𖼳𖽡𖽻𖾐 𖼮𖽻𖾐 𖼺𖽪𖾐 𖼺𖽧𖾐 𖼠𖽚𖾐 \fr 30．23 \ft “𖼳𖽡𖽻𖾑 𖼳𖽡𖽻𖾐 𖼮𖽻𖾐 𖼺𖽪𖾐 𖼺𖽧𖾐 𖼠𖽚𖾐 ” 𖼦𖽑𖽺𖾑 𖼳𖽡𖽦𖾑 𖼈𖽪𖾐 𖼺𖽙𖾐 𖼰𖽡𖾐，𖼳𖽡𖽻𖾑 𖼳𖽡𖽻𖾐 𖼮𖽻𖾐 𖼺𖽪𖾐 𖼳𖽶𖾑 𖼀𖽺 \fr 30．23 \ft “𖼳𖽡𖽻𖾑 𖼳𖽡𖽻𖾐 𖼮𖽻𖾐 𖼺𖽪𖾐 𖼳𖽶𖾑 𖼀𖽺 ” 𖼦𖽑𖽺𖾑 𖼳𖽡𖽦𖾑 𖼈𖽪𖾐 𖼺𖽙𖾐 𖼰𖽡𖾐， 24 𖼳𖽡𖽻𖾑 𖼳𖽡𖽻𖾐 𖼮𖽻𖾐 𖼺𖽪𖾐 𖼺𖽧𖾐 𖼰𖽡𖾐 𖼮𖽑𖽡𖽚 𖼰𖽡𖾐，𖼹𖽦𖾑 𖽃𖽔 𖼮𖽑𖽙 𖼵𖽶𖾐 𖼈𖽡𖾐 𖼖𖽡𖾐 𖼰𖽡𖾐 𖼣𖽻𖾐，𖼦𖽑𖽺𖾑 𖼹𖽻𖾐 𖼄𖽳𖾑 𖼄𖽳 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽳𖾐 𖼮𖽡𖽻𖾐 𖼊𖽪𖾐 𖼻𖽜 𖼮𖽡𖽻𖾐 𖼖𖽡𖾐． 25 𖽃𖽔𖾐 𖼺𖽺𖾑，𖼖𖽦 𖼠𖽸𖾑 𖼞𖽜 𖼐𖽑𖽡𖾐 𖼮𖽡𖽺𖾐𖼂𖽺𖾐 𖼖𖽚𖾐 𖼂𖽚𖾐 𖼵𖽶𖾐 𖼈𖽡𖾐 𖼂𖽺𖾐 𖼞𖽳𖾐 𖼄𖽪𖾐 𖼊𖽪𖾐 𖼻𖽜，𖼄𖽡𖽻 𖼐𖽑𖽡 𖼦𖽑𖽺𖾑 𖼹𖽻𖾐 𖼈𖽺𖾐 𖼺𖽡 𖼮𖽡𖾐 𖼺𖽪𖾐 𖼐𖽑𖽡𖾐 𖼮𖽡𖽺𖾐𖼂𖽺𖾐 𖼖𖽚𖾐 𖼂𖽚𖾐 𖼵𖽶𖾐 𖼈𖽡𖾐 𖼂𖽺𖾐 𖼀𖽑𖽢 𖼖𖽡𖾐． 26 𖼐𖽑𖽡𖾐 𖼳𖽡𖽻𖾐 𖼷𖽑𖽳𖾐 𖼦𖽑𖽺𖾑 𖼻𖽜 𖼺𖽺𖾑 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼐𖽺𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺， 27 𖼹𖽙𖾐 𖼹𖽶𖾐 𖼐𖽺𖾐 𖼹𖽙𖾐 𖼹𖽶𖾐 𖼊𖽑𖽺 𖼍𖽦𖾐 𖼺𖽪𖾐 𖼄𖽡𖽻 𖼐𖽑𖽡 𖼻𖽜 𖼊𖽪𖾐，𖼀𖽙𖾐 𖼷𖽻𖾐 𖼐𖽺𖾐 𖼀𖽙𖾐 𖼷𖽻𖾐 𖼞𖽳𖾐 𖼄𖽡𖽻 𖼐𖽑𖽡 𖼻𖽜 𖼊𖽪𖾐，𖼹𖽦𖾑 𖼳𖽡𖽻𖾐 𖼷𖽻𖾐， 28 𖼍𖽡𖾐 𖼷𖽻𖾐 𖼐𖽺𖾐 𖼍𖽡𖾐 𖼷𖽻𖾐 𖼞𖽳𖾐 𖼄𖽡𖽻 𖼐𖽑𖽡 𖼻𖽜 𖼊𖽪𖾐，𖼊𖽪 𖼖𖽻 𖼐𖽺𖾐 𖼊𖽪 𖼖𖽻 𖼍𖽡𖾐 𖼊𖽪𖾐，𖼦𖽑𖽺𖾑 𖼹𖽻𖾐 𖼄𖽳𖾑 𖼄𖽳 𖼊𖽑𖽺 𖼄𖽺𖾑 𖼖𖽡𖾐． 29 𖼐𖽑𖽡𖾐 𖼄𖽡𖽻 𖼐𖽑𖽡 𖼦𖽑𖽺𖾑 𖼹𖽻𖾐 𖼊𖽑𖽺 𖼀𖽜𖾐 𖼀𖽑𖽪𖾐 𖼊𖽑𖽧 𖼖𖽻𖾐 𖼺𖽺𖾑，𖼺𖽡 𖼮𖽡𖾐 𖼺𖽪𖾐 𖼄𖽡𖽻 𖼐𖽑𖽡 𖼀𖽑𖽢，𖼞𖽑𖽙𖾐 𖼄𖽡𖽻 𖼐𖽑𖽡 𖼦𖽑𖽺𖾑 𖼹𖽻𖾐 𖼊𖽑𖽺 𖼍𖽪 𖼄𖽳𖾐 𖼺𖽪𖾐 𖼄𖽡𖽻 𖼐𖽑𖽡 𖼖𖽺𖾑 𖼄𖽳𖾑 𖼄𖽳 𖼺𖽡 𖼮𖽡𖾐 𖼊𖽻𖾐．
30 𖼐𖽑𖽡𖾐 𖼳𖽡𖽻𖾐 𖼷𖽑𖽳𖾐 𖼈𖽺𖾐 𖼽𖽕𖾑 𖼖𖽪𖽦 𖼐𖽺𖾐 𖼽𖽻 𖼻𖽙 𖼊𖽑𖽺 𖼄𖽺𖾑，𖼽𖽻 𖼈𖽳𖾐 𖼞𖽜 𖼺𖽡 𖼮𖽡𖾐 𖼺𖽺𖾑，𖼣𖽙𖾐 𖼞𖽳𖾐 𖼍𖽡𖾐 𖼄𖽻 𖼂𖽺𖾐 𖼖𖽡𖾐． 31 𖼐𖽑𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼀𖽦𖾐 𖼊𖽑𖽧 𖼖𖽡𖾐：‘ 𖼐𖽑𖽡𖾐 𖼈𖽳𖾐 𖼹𖽦𖾐 𖼹𖽦𖾐 𖼀𖽻𖾐 𖼀𖽻𖾐 𖼳𖽡𖽻𖾐 𖼷𖽑𖽳𖾐 𖼦𖽑𖽺𖾑 𖼈𖽺𖾐 𖼣𖽙𖾐 𖼊𖽑𖽺 𖼞𖽜 𖼺𖽺𖾑 𖼺𖽡 𖼮𖽡𖾐 𖼺𖽪𖾐 𖼳𖽡𖽻𖾐 𖼷𖽑𖽳𖾐 𖼂𖽺𖾐 𖼖𖽡𖾐． 32 𖼳𖽡𖽻𖾐 𖼷𖽑𖽳𖾐 𖼦𖽑𖽺𖾑 𖼠𖽳𖾐 𖼖𖽪𖾐 𖼷𖽑𖽻𖾐 𖼊𖽑𖽺 𖽂𖽙𖾐 𖼄𖽺𖾑 𖼄𖽔 𖼊𖽙𖾐，𖼦𖽑𖽔𖾐 𖼖𖽺𖾑 𖼳𖽡𖽻𖾐 𖼷𖽑𖽳𖾐 𖼂𖽺𖾐 𖼄𖽪𖾐 𖼊𖽪𖾐 𖼻𖽜 𖼠𖽳𖾐 𖼖𖽪𖾐 𖼳𖽡𖽻𖾐 𖼷𖽑𖽳𖾐 𖽂𖽙𖾐 𖼂𖽺𖾐 𖼄𖽔 𖼊𖽙𖾐． 𖼳𖽡𖽻𖾐 𖼷𖽑𖽳𖾐 𖼦𖽑𖽺𖾑 𖼺𖽡 𖼮𖽡𖾐 𖼳𖽶 𖼣𖽻𖾐，𖼐𖽑𖽡𖾐 𖼈𖽳𖾐 𖼖𖽺𖾑 𖼽𖽻 𖼊𖽑𖽺 𖼺𖽡 𖼮𖽡𖾐 𖼷𖽑𖽚 𖼰𖽕𖾐 𖼖𖽡𖾐． 33 𖽃𖽔 𖼺𖽺𖼦𖽑𖽺𖾑 𖼖𖽙𖾐 𖼺𖽶𖾑 𖼳𖽡𖽻𖾐 𖼷𖽑𖽳𖾐 𖼂𖽺𖾐 𖼺𖽪𖾐 𖼣𖽻𖾐 𖼦𖽻，𖼳𖽡𖽻𖾐 𖼷𖽑𖽳𖾐 𖼦𖽑𖽺𖾑 𖼈𖽺𖾐 𖼠𖽳𖾐 𖼖𖽪𖾐 𖼷𖽑𖽻𖾐 𖼊𖽑𖽺 𖼄𖽺𖾑 𖼣𖽻𖾐 𖼦𖽻，𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼊𖽑𖽺 𖼽𖽻 𖼀𖽑𖽙 𖼮𖽑𖽪𖾐 𖼠𖽻𖾐 𖼊𖽑𖽺 𖼮𖽑𖽻𖾐 𖼄𖽳 𖼮𖽡𖽦 𖼊𖽻𖾐．’”
34 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐：‘ 𖼐𖽑𖽡𖾐 𖼳𖽡𖽻𖾑 𖼳𖽡𖽻𖾐 𖼮𖽻𖾐 𖼺𖽪𖾐 𖼺𖽧𖾐 𖼈𖽡𖾐 𖼳𖽡𖽻𖾐、 𖽃𖽔𖾐 𖼞𖽑𖽪𖾐 𖼖𖽪𖾐 𖼳𖽡𖽻𖾐、 𖼊𖽑𖽻 𖼀𖽑𖽨𖾐 𖼷𖽑𖽳𖾐 𖼐𖽺𖾐 𖼮𖽡𖾑 𖼮𖽡𖾐 𖼮𖽻𖾐 𖼺𖽪𖾐 𖼺𖽧𖾐 𖼷𖽑𖽳𖾐，𖼊𖽑𖽡 𖼳𖽶𖾑 𖼊𖽑𖽡 𖼳𖽶 𖼷𖽙𖾐 𖼖𖽙𖾐 𖼄𖽨𖾐 𖼈𖽺𖾐 𖼂𖽻𖾐 𖼖𖽻𖾐． 35 𖼐𖽑𖽡𖾐 𖼖𖽦 𖼠𖽸𖾑 𖼞𖽜 𖼳𖽡𖽻𖾐 𖼂𖽺𖾐 𖼞𖽳𖾐 𖼄𖽪𖾐 𖼊𖽪𖾐 𖼻𖽜，𖼷𖽑𖽙 𖼊𖽑𖽡 𖼀𖽧𖾑 𖼰𖽡𖽺𖾐 𖼮𖽑𖽻𖾐 𖼺𖽺𖾑，𖼳𖽡𖽻𖾐 𖼂𖽺𖾐 𖼀𖽑𖽢 𖼖𖽡𖾐，𖼦𖽑𖽺𖾑 𖼠𖽔𖾐 𖼹𖽧𖾑 𖼺𖽡 𖼮𖽡𖾐 𖼺𖽪𖾐 𖼳𖽡𖽻𖾐 𖼣𖽻𖾐． 36 𖼐𖽑𖽡𖾐 𖼳𖽡𖽻𖾐 𖼊𖽑𖽡 𖼀𖽧𖾑 𖼈𖽺𖾐 𖼂𖽻𖾐 𖼖𖽻𖾐 𖼍𖽺𖾑 𖼄𖽶𖾐 𖼦𖽑𖽙𖾐，𖼀𖽑𖽨 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽑𖽶𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼞𖽳𖾐 𖼣𖽙𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼻𖽶𖾑 𖼞𖽑𖽶𖾑 𖼠𖽻𖾐 𖼍𖽙𖾑 𖼖𖽡𖾐． 𖼐𖽑𖽡𖾐 𖼈𖽳𖾐 𖼳𖽡𖽻𖾐 𖼦𖽑𖽺𖾑 𖼊𖽑𖽺 𖼺𖽡 𖼮𖽡𖾐 𖼷𖽑𖽚 𖼰𖽕𖾐 𖼖𖽡𖾐． 37 𖼐𖽑𖽡𖾐 𖼈𖽳𖾐 𖼳𖽡𖽻𖾐 𖼂𖽺𖾐 𖼞𖽳𖾐 𖼄𖽪𖾐 𖼊𖽪𖾐 𖼦𖽑𖽺𖾑 𖼖𖽙𖾐 𖼮𖽑𖽻𖾐，𖼽𖽻 𖼄𖽳𖾑 𖼖𖽙𖾐 𖼀𖽙𖾐 𖼳𖽡𖽻𖾐 𖽂𖽙𖾐 𖼂𖽺𖾐 𖼄𖽔 𖼊𖽙𖾐，𖼦𖽑𖽺𖾑 𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜 𖼺𖽪𖾐 𖼺𖽡 𖼮𖽡𖾐 𖼳𖽶 𖼳𖽡𖽻𖾐 𖼣𖽻𖾐． 38 𖽃𖽔 𖼊𖽺𖾑 𖼽𖽚𖾐 𖼳𖽡𖽻𖾐 𖼺𖽦 𖼊𖽑𖽺 𖼐𖽜 𖼖𖽙𖾐 𖼀𖽙𖾐 𖼺𖽺𖾑，𖼳𖽡𖽻𖾐 𖼦𖽑𖽺𖾑 𖼖𖽙𖾐 𖼺𖽶𖾑 𖼂𖽺𖾐 𖼊𖽑𖽡𖾑 𖼣𖽻𖾐，𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼊𖽑𖽺 𖼽𖽻 𖼀𖽑𖽙 𖼮𖽑𖽪𖾐 𖼞𖽑𖽶𖾐 𖼮𖽑𖽻𖾐 𖼄𖽳 𖼮𖽡𖽦 𖼦𖽑𖽙𖾐 𖼖𖽡𖾐．