𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐𖼹𖽸𖾑 𖼖𖽦 𖼠𖽸𖾑 𖼊𖽑𖽺 𖼺𖽺𖾐 (𖼊𖽚𖾐 35：30-36)
31
1 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐： 2 “𖼐𖽦𖾐 𖼄𖽺! 𖼽𖽚 𖼍𖽕𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼦𖽪𖾑 𖽃𖽳 𖼞𖽳𖾐 𖼖𖽡𖾑 𖼂𖽙𖾑，𖼈𖽪𖾐 𖼖𖽡𖾑 𖼞𖽳𖾐 𖼻𖽙 𖼂𖽡 𖼺𖽔 𖼖𖽡𖽦𖾑 𖼊𖽑𖽺 𖼣𖽙𖾐 𖼽𖽻 𖼄𖽡𖾐 𖽃𖽶𖾐，𖼽𖽻 𖼊𖽑𖽺 𖼺𖽺𖾐 𖼊𖽑𖽧 𖼖𖽻𖾐． 3 𖼣𖽙𖾐 𖼞𖽳𖾐 𖼳𖽨𖾐 𖼽𖽻 𖼊𖽑𖽺 𖼞𖽕 𖼍𖽪𖾐 𖼺𖽺𖾑，𖼽𖽻 𖼞𖽜 𖽂𖽙 𖼐𖽑𖽡𖾐 𖼮𖽻𖾐、 𖼈𖽪𖾐 𖼺𖽝𖾑 𖼮𖽻𖾐、 𖼺𖽪𖾑 𖼺𖽝𖾑 𖼐𖽺𖾐 𖼞𖽑𖽙𖾐 𖼣𖽻𖾐 𖼳𖽶 𖼖𖽦 𖼠𖽸𖾑 𖼂𖽺𖾐 𖼠𖽸𖾑， 4 𖼽𖽻 𖼀𖽑𖽨𖾐、 𖼳𖽳𖾐 𖼐𖽺𖾐 𖼮𖽡 𖼻𖽜 𖼞𖽑𖽙𖾐 𖼣𖽻𖾐 𖼳𖽶 𖼠𖽴𖾐 𖼮𖽑𖽡𖽻𖾐 𖼂𖽺𖾐 𖼠𖽸𖾑， 5 𖼦𖽑𖽔𖾐 𖼖𖽺𖾑 𖼀𖽑𖽶 𖼊𖽴 𖼖𖽚𖾐 𖼊𖽝 𖼠𖽸𖾑、 𖼂𖽚𖾐 𖼠𖽸𖾑，𖼺𖽧𖾐 𖼄𖽪𖾐 𖼖𖽦 𖼠𖽸𖾑，𖼞𖽑𖽙𖾐 𖼣𖽻𖾐 𖼳𖽶 𖼄𖽡𖽻 𖼐𖽑𖽡 𖼂𖽺𖾐 𖼠𖽸𖾑．6 𖼐𖽦𖾐 𖼄𖽺! 𖼍𖽕𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼠𖽻𖾐 𖼞𖽑𖽶𖾐 𖼽𖽕𖾑 𖼳𖽡𖾐 𖼺𖽔 𖼄𖽚 𖼞𖽳𖾐 𖼻𖽙 𖼽𖽕𖾑 𖼦𖽴 𖼖𖽡𖾑 𖼽𖽕𖾑 𖼂𖽚 ，𖼣𖽙𖾐 𖼽𖽻 𖼞𖽜 𖼂𖽡 𖼺𖽔 𖼖𖽡𖽦𖾑 𖼖𖽙𖾐 𖼂𖽻𖾐 𖼊𖽻𖾐，𖼞𖽑𖽙𖾐 𖽂𖽙 𖼐𖽑𖽡𖾐 𖼈𖽪𖾐 𖼺𖽝𖾑 𖼮𖽻𖾐 𖼺𖽪𖾐 𖼷𖽑𖽻𖾐，𖼣𖽙𖾐 𖼠𖽳𖾐 𖼠𖽳𖾐 𖽂𖽙 𖼐𖽑𖽡𖾐 𖼈𖽪𖾐 𖼺𖽝𖾑 𖼖𖽪 𖼽𖽻 𖼈𖽳𖾐 𖼊𖽑𖽺 𖼞𖽜 𖼺𖽺𖾑，𖼽𖽻 𖼈𖽳𖾐 𖼞𖽜 𖼣𖽙𖾐 𖼐𖽑𖽡𖾐 𖼊𖽑𖽺 𖼞𖽑𖽙𖾐 𖼀𖽦𖾐 𖼄𖽪𖾑 𖼺𖽪𖾐 𖼄𖽡𖽻 𖼂𖽺𖾐 𖼠𖽸𖾑 𖼊𖽻𖾐．
7 𖼞𖽑𖽶𖾑 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐、
𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼐𖽺𖾐 𖼮𖽡 𖼽𖽡𖾑 𖼳𖽳𖾐 𖼮𖽡𖽺，
𖼹𖽦𖾑 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐𖼞𖽑𖽶𖾐 𖼞𖽑𖽙𖾐 𖼣𖽻𖾐 𖼳𖽶 𖼄𖽡𖽻 𖼐𖽑𖽡 𖼻𖽜 𖼊𖽪𖾐，
8 𖼹𖽙𖾐 𖼹𖽶𖾐 𖼐𖽺𖾐 𖼹𖽙𖾐 𖼹𖽶𖾐 𖼊𖽑𖽺 𖼍𖽦𖾐 𖼺𖽪𖾐 𖼄𖽡𖽻 𖼐𖽑𖽡 𖼻𖽜 𖼊𖽪𖾐，
𖼀𖽙𖾐 𖼷𖽻𖾐 𖼐𖽺𖾐 𖼀𖽙𖾐 𖼷𖽻𖾐 𖼊𖽑𖽺 𖼄𖽡𖽻 𖼐𖽑𖽡 𖼻𖽜 𖼊𖽪𖾐、
𖼳𖽡𖽻𖾐 𖼷𖽻𖾐、
9 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼖𖽚𖾐 𖼂𖽚𖾐 𖼍𖽡𖾐 𖼷𖽻𖾐 𖼐𖽺𖾐 𖼍𖽡𖾐 𖼷𖽻𖾐 𖼞𖽳𖾐 𖼄𖽡𖽻 𖼐𖽑𖽡 𖼻𖽜 𖼊𖽪𖾐，
𖼊𖽪 𖼖𖽻 𖼐𖽺𖾐 𖼊𖽪 𖼖𖽻 𖼍𖽡𖾐 𖼊𖽪𖾐，
10 𖼀𖽑𖽡𖽻𖾐 𖼮𖽻 𖼠𖽕𖾐 𖼐𖽺𖾐 𖼽𖽕𖾑 𖼖𖽪𖽦 𖼍𖽡𖾐 𖼄𖽻 𖼞𖽳𖾐 𖼺𖽡 𖼮𖽡𖾐 𖼀𖽑𖽡𖽻𖾐，𖼹𖽦𖾑 𖼽𖽻 𖼻𖽙 𖼞𖽑𖽶𖾑 𖼹𖽻𖾐 𖼍𖽡𖾐 𖼄𖽻 𖼂𖽺𖾐 𖼞𖽑𖽶𖾑 𖼮𖽶𖾐 𖼞𖽑𖽙𖾐 𖼈𖽦 𖼖𖽡𖾐 𖼺𖽪𖾐 𖼀𖽑𖽡𖽻𖾐 𖼷𖽑𖽶，
11 𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼖𖽚𖾐 𖼂𖽚𖾐 𖼵𖽶𖾐 𖼈𖽡𖾐 𖼐𖽺𖾐 𖼺𖽡 𖼮𖽡𖾐 𖼊𖽺𖾐 𖼞𖽳𖾐 𖼻𖽜 𖼖𖽚𖾐 𖼂𖽚𖾐 𖼳𖽡𖽻𖾑 𖼳𖽡𖽻𖾐 𖼮𖽻𖾐 𖼺𖽪𖾐 𖼳𖽡𖽻𖾐 𖼄𖽶𖾐 𖼣𖽻𖾐．
𖼖𖽦 𖼠𖽸𖾑 𖼞𖽜 𖼣𖽙𖾐 𖼐𖽑𖽡𖾐 𖼊𖽑𖽺 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐 𖼂𖽺𖾐 𖼽𖽡𖾐 𖼖𖽡𖾐．”
𖼳𖽡𖽻𖾐 𖼐𖽑𖽡𖾐 𖼞𖽳𖾐 𖼳𖽪𖾐 𖼮𖽨𖾐 (𖼊𖽚𖾐35：1-3)
12 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐： 13 “𖼐𖽑𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼄𖽪𖾑 𖼍𖽴𖾑 𖼀𖽦𖾐：‘ 𖼐𖽑𖽡𖾐 𖼈𖽳𖾐 𖼣𖽙𖾐 𖼞𖽳𖾐 𖼳𖽡𖽻𖾐 𖼐𖽑𖽡𖾐 𖼊𖽑𖽺 𖼳𖽪𖾐 𖼖𖽡𖾐，𖼞𖽪𖾐 𖼮𖽡𖽺𖾐 𖼦𖽑𖽺𖾑 𖼣𖽙𖾐 𖼐𖽺𖾐 𖼐𖽑𖽡𖾐 𖼈𖽳𖾐 𖼠𖽻𖾐 𖼊𖽑𖽺 𖼹𖽦𖾐 𖼹𖽦𖾐 𖼀𖽻𖾐 𖼀𖽻𖾐 𖼞𖽳𖾐 𖼮𖽨 𖼄𖽡𖽻𖾐 𖼣𖽻𖾐． 𖼐𖽑𖽡𖾐 𖼈𖽳𖾐 𖼺𖽝𖾑 𖼖𖽡𖾐，𖼣𖽙𖾐 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼈𖽳𖾐 𖼊𖽑𖽺 𖼺𖽺𖾐 𖼊𖽑𖽧 𖼖𖽻𖾐 𖼺𖽡 𖼮𖽡𖾐 𖼺𖽪𖾐 𖼷𖽑𖽻𖾐 𖼰𖽕𖾐． 14 𖽃𖽔𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼳𖽡𖽻𖾐 𖼐𖽑𖽡𖾐 𖼳𖽪𖾐 𖼖𖽡𖾐，𖼞𖽪𖾐 𖼮𖽡𖽺𖾐 𖼦𖽑𖽺𖾑 𖼐𖽑𖽡𖾐 𖼈𖽳𖾐 𖼞𖽳𖾐 𖼺𖽡 𖼮𖽡𖾐 𖼐𖽑𖽡𖾐 𖼦𖽑𖽦 𖼣𖽻𖾐． 𖼦𖽑𖽺𖾑 𖼊𖽑𖽡 𖼐𖽑𖽡𖾐 𖼊𖽑𖽺 𖼄𖽔 𖼳𖽪𖾐 𖼺𖽪𖾐，𖼽𖽻 𖼞𖽜 𖼷𖽑𖽜𖾑 𖼷𖽑𖽜𖾐 𖼳𖽶𖾐 𖼖𖽡𖾐． 𖼳𖽡𖽻𖾐 𖼐𖽑𖽡𖾐 𖼞𖽑𖽶𖾐 𖼄𖽡𖽻 𖼞𖽑𖽙𖾐 𖼄𖽪𖾐 𖼺𖽪𖾐，𖼽𖽻 𖼊𖽑𖽺 𖼷𖽑𖽜𖾑 𖼷𖽑𖽜𖾐 𖼀𖽑𖽙 𖼮𖽑𖽪𖾐 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼄𖽳 𖼮𖽡𖽦 𖼦𖽑𖽙𖾐 𖼖𖽡𖾐． 15 𖼮𖽑𖽡𖽚 𖼐𖽑𖽡𖾐 𖼞𖽑𖽶𖾐 𖼄𖽡𖽻 𖽂𖽙𖾐 𖼄𖽪𖾐 𖼊𖽙𖾐，𖼦𖽑𖽻𖾐 𖼊𖽑𖽻𖾐 𖼳𖽶 𖼐𖽑𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼳𖽡𖽻𖾐 𖼐𖽑𖽡𖾐 𖼣𖽻𖾐，𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼷𖽺𖾐 𖼺𖽡 𖼮𖽡𖾐 𖼐𖽑𖽡𖾐 𖼦𖽑𖽦 𖼣𖽻𖾐，𖼦𖽑𖽺𖾑 𖼊𖽑𖽡 𖼐𖽑𖽡𖾐 𖼞𖽑𖽶𖾐 𖼄𖽡𖽻 𖼞𖽑𖽙𖾐 𖼄𖽪𖾐 𖼺𖽪𖾐，𖼷𖽑𖽜𖾑 𖼷𖽑𖽜𖾐 𖼽𖽻 𖼞𖽜 𖼳𖽶𖾐 𖼖𖽡𖾐． 16 𖽃𖽔𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼹𖽦𖾐 𖼹𖽦𖾐 𖼀𖽻𖾐 𖼀𖽻𖾐 𖼳𖽡𖽻𖾐 𖼐𖽑𖽡𖾐 𖼦𖽑𖽺𖾑 𖼳𖽪𖾐，𖼻𖽳𖾐 𖼹𖽦𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼂𖽺𖾐 𖼖𖽡𖾐． 17 𖼦𖽑𖽺𖾑 𖼣𖽙𖾐 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼠𖽻𖾐 𖼊𖽑𖽺 𖼻𖽳𖾐 𖼹𖽦𖾐 𖼞𖽳𖾐 𖼮𖽨 𖼄𖽡𖽻𖾐 𖼣𖽻𖾐，𖼞𖽪𖾐 𖼮𖽡𖽺𖾐 𖼮𖽑𖽡𖽚 𖼐𖽑𖽡𖾐 𖼠𖽻𖾐 𖼞𖽑𖽶𖾐 𖼽𖽺𖾐 𖼦𖽴 𖼦𖽫 𖼄𖽶 𖼠𖽻𖾐 𖼄𖽡𖾑 𖼐𖽦𖾐 𖼹𖽸𖾑，𖼦𖽑𖽻𖾐 𖼊𖽑𖽻𖾐 𖼞𖽑𖽙𖾐 𖼣𖽻𖾐 𖼳𖽶 𖼹𖽸𖾑 𖼦𖽑𖽻𖾐 𖼺𖽺𖾑，𖼳𖽶 𖼐𖽑𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼐𖽙 𖼹𖽺𖾐 𖼖𖽻𖾐 𖼦𖽑𖽙𖾐．’”
𖼷𖽑𖽦𖾐 𖼮𖽡𖽺𖾐 𖼀𖽑𖽡 𖼐𖽑𖽡 𖼊𖽝𖾐 (𖼊𖽚𖾐 9：9-11)
18 𖼽𖽺𖾐 𖼦𖽴 𖼦𖽫 𖼳𖽡𖾐 𖼐𖽦𖾑 𖽂𖽙 𖼰𖽡𖽺𖾐 𖼊𖽑𖽺 𖼄𖽚 𖼳𖽡𖾐 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐 𖼦𖽑𖽻𖾐 𖼺𖽺𖾑 ，𖼷𖽑𖽦𖾐 𖼮𖽡𖽺𖾐 𖼀𖽑𖽡 𖼐𖽑𖽡 𖼀𖽑𖽡 𖼈𖽺𖾐 𖼄𖽚 𖼳𖽡𖾐 𖼊𖽑𖽺 𖼞𖽜，𖼷𖽑𖽦𖾐 𖼮𖽡𖽺𖾐 𖼀𖽑𖽡 𖼦𖽑𖽺𖾑 𖽂𖽙 𖼺𖽙𖾐 𖼂𖽙𖾐 𖼖𖽦 𖼐𖽑𖽡𖾐 𖼻𖽜 𖼺𖽪𖾑 𖼄𖽙𖾐 𖼈𖽝 𖼍𖽦𖾐 𖼺𖽪𖾐 𖼖𖽚𖾐 𖼀𖽑𖽡 𖼣𖽻𖾐．