𖼍𖽡𖾐 𖼄𖽻 𖼂𖽺𖾐 𖼳𖽪𖾐 𖼮𖽨𖾐 (𖼖𖽡𖾑 8： 1-28)
29
1 𖼐𖽑𖽡𖾐 𖼽𖽕𖾑 𖼖𖽪𖽦 𖼐𖽺𖾐 𖼽𖽻 𖼞𖽳𖾐 𖼻𖽙 𖼞𖽑𖽶𖾑 𖼹𖽻𖾐 𖼊𖽑𖽺 𖼀𖽜𖾐 𖼀𖽑𖽪𖾐 𖼺𖽡 𖼮𖽡𖾐，𖼽𖽻 𖼈𖽳𖾐 𖼞𖽜 𖼣𖽙𖾐 𖼊𖽑𖽺 𖼠𖽙𖾐 𖼳𖽙𖾐 𖼺𖽪𖾐 𖼍𖽡𖾐 𖼄𖽻 𖼂𖽺𖾐 𖼞𖽑𖽶𖾑 𖼮𖽶𖾐，𖼦𖽑𖽺𖾑 𖼻𖽻𖾐 𖼂𖽺𖾐 𖼖𖽡𖾐： 𖼐𖽑𖽡 𖼖𖽙 𖼦𖽑𖽳𖾐 𖼻𖽙 𖼊𖽑𖽡 𖼮𖽑𖽡𖾐 𖼐𖽺𖾐 𖼐𖽙𖾐 𖼊𖽴 𖼄𖽔 𖼠𖽚 𖼺𖽪𖾐 𖼽𖽻𖾐 𖼖𖽙𖾐 𖼐𖽑𖽡 𖼊𖽝𖾐 𖼺𖽶𖾐 𖼂𖽻𖾐 𖼖𖽻𖾐 𖼖𖽡𖾐， 2 𖼹𖽦𖾑 𖼇𖽝𖾐 𖼄𖽔 𖼠𖽚 𖼺𖽪𖾐 𖽃𖽔𖾑 𖼂𖽻𖾐，𖼵𖽶𖾐 𖼈𖽡𖾐 𖼮𖽑𖽻𖾐 𖼇𖽝𖾐 𖼄𖽔 𖼠𖽚 𖼺𖽪𖾐 𖽃𖽔𖾑 𖼂𖽻𖾐 𖼐𖽺𖾐 𖼵𖽶𖾐 𖼈𖽡𖾐 𖼄𖽺𖾑 𖼇𖽝𖾐 𖼄𖽔 𖼠𖽚 𖼺𖽪𖾐 𖼀𖽙𖾑 𖼀𖽙 𖽃𖽔𖾑 𖼂𖽻𖾐，𖼦𖽑𖽺𖾑 𖼹𖽻𖾐 𖼐𖽑𖽡𖾐 𖼦𖽑𖽔𖾐 𖼮𖽶𖾐 𖼹𖽳𖾐 𖼺𖽪𖾐 𖼳𖽙𖾐 𖼄𖽶𖾐 𖼻𖽜 𖼂𖽺𖾐 𖼖𖽡𖾐． 3 𖼐𖽑𖽡𖾐 𖽃𖽔𖾑 𖼂𖽻𖾐 𖼦𖽑𖽺𖾑 𖼹𖽻𖾐 𖼀𖽑𖽨 𖼰𖽡𖽻𖾐 𖼖𖽪𖾐 𖼞𖽑𖽶𖾐 𖼰𖽡𖽺𖾐 𖼺𖽺𖾑，𖼈𖽺𖾐 𖼂𖽻𖾐 𖼖𖽻𖾐 𖼦𖽑𖽙𖾐 𖼣𖽙𖾐 𖼊𖽑𖽺 𖼍𖽡𖾐 𖼖𖽡𖾐，𖼦𖽑𖽔𖾐 𖼖𖽺𖾑 𖼐𖽑𖽡 𖼻𖽙 𖼐𖽺𖾐 𖼽𖽻𖾐 𖼖𖽙𖾐 𖼐𖽑𖽡 𖼊𖽝𖾐 𖼺𖽶𖾐 𖼂𖽻𖾐 𖼖𖽻𖾐 𖼖𖽡𖾐．4 𖼐𖽑𖽡𖾐 𖼽𖽕𖾑 𖼖𖽪𖽦 𖼐𖽺𖾐 𖼽𖽻 𖼻𖽙 𖼞𖽑𖽶𖾑 𖼹𖽻𖾐 𖼊𖽑𖽺 𖼦𖽳 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖽃𖽔𖾑 𖼊𖽪 𖼮𖽑𖽡𖽺 𖼖𖽻𖾐 𖼺𖽺𖾑，𖽃𖽔𖾐 𖼮𖽡𖽦𖾐 𖼈𖽺𖾐 𖼽𖽻 𖼈𖽳𖾐 𖼞𖽶𖾐 𖼮𖽑𖽶 𖼷𖽑𖽡 𖼖𖽡𖾐． 5 𖼐𖽑𖽡𖾐 𖼍𖽡𖾐 𖼄𖽻 𖼞𖽳𖾐 𖼺𖽡 𖼮𖽡𖾐 𖼀𖽑𖽡𖽻𖾐 𖼈𖽺𖾐 𖼂𖽻𖾐 𖼖𖽻𖾐 𖼽𖽕𖾑 𖼖𖽪𖽦 𖼞𖽜 𖼈𖽦，𖼞𖽑𖽶𖾐 𖼮𖽻𖾐 𖼀𖽑𖽡𖽻𖾐 𖼮𖽻 𖼠𖽕𖾐、 𖼊𖽑𖽦 𖼮𖽻𖾐 𖼀𖽑𖽡𖽻𖾐 𖼮𖽻、 𖼽𖽡 𖼇𖽮 𖼍𖽴 𖼐𖽺𖾐 𖼐𖽑𖽧𖾐 𖼄𖽙𖾐 𖼰𖽙𖾐 𖼮𖽑𖽨𖾑 𖼀𖽑𖽡 𖼊𖽴 𖼈𖽦 𖼍𖽪𖾐 𖼖𖽡𖾐，𖼦𖽑𖽔𖾐 𖼖𖽺𖾑 𖼖𖽦 𖼠𖽸𖾑 𖼞𖽑𖽙𖾐 𖼷𖽝 𖼀𖽑𖽢 𖼺𖽪𖾐 𖼽𖽡 𖼇𖽮 𖼍𖽴 𖼞𖽳𖾐 𖼮𖽡𖽪 𖼳𖽡𖽦𖾐 𖼐𖽦𖾑 𖼍𖽪𖾐 𖼖𖽡𖾐． 6 𖼐𖽑𖽡𖾐 𖼍𖽕 𖼰𖽡𖾐 𖼈𖽺𖾐 𖼽𖽻 𖼞𖽜 𖼊𖽴，𖼹𖽦𖾑 𖼍𖽕 𖼰𖽡𖾐 𖼣𖽴 𖼀𖽑𖽡 𖼍𖽴𖾑 𖼍𖽪𖾐 𖼖𖽡𖾐． 7 𖽃𖽔𖾐 𖼺𖽺𖾑 𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼖𖽚𖾐 𖼂𖽚𖾐 𖼵𖽶𖾐 𖼈𖽡𖾐 𖼐𖽑𖽡𖾑 𖼽𖽻 𖼈𖽪𖾑 𖼊𖽡𖾐 𖼊𖽑𖽺 𖼦𖽜，𖼽𖽻 𖼞𖽜 𖼍𖽡𖾐 𖼄𖽻 𖼂𖽺𖾐． 8 𖼐𖽑𖽡𖾐 𖼽𖽕𖾑 𖼖𖽪𖽦 𖼞𖽳𖾐 𖼻𖽙 𖼞𖽑𖽶𖾑 𖼹𖽻𖾐 𖼊𖽑𖽺 𖼖𖽺𖾑 𖼦𖽳 𖼂𖽻𖾐 𖼖𖽻𖾐，𖼽𖽻 𖼈𖽳𖾐 𖼞𖽜 𖼞𖽑𖽶𖾐 𖼮𖽻𖾐 𖼀𖽑𖽡𖽻𖾐 𖼮𖽻 𖼠𖽕𖾐 𖼈𖽦 𖼖𖽡𖾐． 9 𖼽𖽕𖾑 𖼖𖽪𖽦 𖼐𖽺𖾐 𖼽𖽻 𖼻𖽙 𖼞𖽑𖽶𖾑 𖼹𖽻𖾐 𖼞𖽜 𖼮𖽡𖽪 𖼳𖽡𖽦𖾐 𖼐𖽦𖾑，𖼀𖽑𖽡𖾐 𖼊𖽑𖽪𖾐 𖼊𖽴 𖼖𖽡𖾐，𖽃𖽔𖾐 𖼺𖽺𖾑 𖼽𖽻 𖼈𖽳𖾐 𖼻𖽳𖾐 𖼹𖽦𖾐 𖼞𖽳𖾐 𖼳𖽪𖾐 𖼮𖽨𖾐 𖼖𖽙𖾐 𖼮𖽑𖽻𖾐，𖼍𖽡𖾐 𖼄𖽻 𖽂𖽙𖾐 𖼂𖽺𖾐 𖼊𖽙𖾐． 𖼦𖽑𖽺𖾑 𖼖𖽙𖾐 𖼺𖽶𖾑 𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼺𖽺𖾑，𖼽𖽕𖾑 𖼖𖽪𖽦 𖼐𖽺𖾐 𖼽𖽻 𖼻𖽙 𖼞𖽑𖽶𖾑 𖼹𖽻𖾐 𖼞𖽜 𖼍𖽡𖾐 𖼄𖽻 𖼂𖽺𖾐 𖼖𖽡𖾐．
10 𖼐𖽑𖽡𖾐 𖼐𖽑𖽡 𖼖𖽙 𖼦𖽑𖽳𖾐 𖼺𖽶𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖽃𖽙𖾑 𖼄𖽺 𖼮𖽑𖽡𖽺 𖼞𖽳𖾐 𖼖𖽻𖾐，𖼽𖽕𖾑 𖼖𖽪𖽦 𖼐𖽺𖾐 𖼽𖽻 𖼻𖽙 𖼞𖽑𖽶𖾑 𖼹𖽻𖾐 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼐𖽑𖽡 𖼖𖽙 𖼦𖽑𖽳𖾐 𖼈𖽪𖾑 𖼊𖽡𖾐 𖼊𖽑𖽺 𖼍𖽦𖾐 𖼺𖽺𖾑， 11 𖼐𖽑𖽡𖾐 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺，𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖽃𖽔𖾑 𖼊𖽪 𖼞𖽳𖾐 𖼞𖽑𖽶𖾑 𖼠𖽻𖾐，𖼐𖽑𖽡 𖼖𖽙 𖼦𖽑𖽳𖾐 𖼞𖽑𖽶𖾑 𖼮𖽑𖽡𖾐 𖼊𖽑𖽺 𖼺𖽦 𖼦𖽑𖽙𖾐 𖼖𖽡𖾐． 12 𖼐𖽑𖽡 𖼖𖽙 𖼦𖽑𖽳𖾐 𖼺𖽶 𖼊𖽑𖽡 𖼀𖽧𖾑 𖼈𖽺𖾐 𖼂𖽻𖾐 𖼖𖽻𖾐，𖼐𖽑𖽡𖾐 𖼖𖽦 𖼐𖽑𖽡𖾐 𖼻𖽜 𖼐𖽑𖽡 𖼺𖽶 𖼖𖽡𖾑 𖼍𖽡𖾐 𖼷𖽻𖾐 𖼮𖽑𖽡𖽪𖾐 𖼖𖽡𖾐 𖼣𖽴 𖼊𖽑𖽺 𖼄𖽺𖾑，𖼷𖽺 𖼷𖽺𖾐 𖼺𖽪𖾐 𖼄𖽳𖾑 𖼄𖽳 𖼐𖽑𖽡𖾑 𖼺𖽺𖾑，𖼍𖽡𖾐 𖼷𖽻𖾐 𖼮𖽑𖽡𖾑 𖼀𖽑𖽦𖾐 𖼞𖽳𖾐 𖼦𖽜 𖼖𖽡𖾐． 13 𖼐𖽑𖽡 𖼦𖽑𖽦 𖼂𖽙𖾐 𖼞𖽑𖽶𖾐 𖼞𖽑𖽙𖾐 𖼈𖽶 𖼺𖽪𖾐 𖼷𖽑𖽳𖾐、 𖼺𖽶 𖼊𖽑𖽻 \fr 29．13 \ft “𖼺𖽶 𖼊𖽑𖽻 ” 𖼦𖽑𖽺𖾑 “𖼺𖽺 ” 𖼖𖽙𖾐 𖼀𖽦𖾐 𖼺𖽪𖾐 𖼣𖽻𖾐．、 𖼊𖽡𖾐 𖼖𖽡𖾐 𖼐𖽑𖽡 𖼊𖽝𖾐 𖼐𖽺𖾐 𖼊𖽡𖾐 𖼖𖽡𖾐 𖼊𖽑𖽺 𖼊𖽴 𖼺𖽪𖾐 𖼷𖽑𖽳𖾐，𖼄𖽳𖾑 𖼄𖽳 𖼈𖽺𖾐 𖼍𖽡𖾐 𖼷𖽻𖾐 𖼊𖽑𖽺 𖼍𖽦𖾐 𖼮𖽑𖽡𖽪𖾐 𖼦𖽑𖽙𖾐 𖼖𖽡𖾐． 14 𖼦𖽑𖽻𖾐 𖼊𖽑𖽻𖾐，𖼐𖽑𖽡 𖼖𖽙 𖼦𖽑𖽳𖾐 𖼦𖽙、 𖼐𖽑𖽡 𖼮𖽡𖾐 𖼐𖽺𖾐 𖼐𖽑𖽡 𖼳𖽡，𖼄𖽳𖾑 𖼄𖽳 𖼈𖽺𖾐 𖼷𖽑𖽻𖾐 𖼷𖽪𖾐 𖼮𖽻𖾐 𖼞𖽳𖾐 𖼐𖽑𖽡𖾑 𖼮𖽻𖾐 𖼀𖽳 𖼽𖽡𖾐 𖼮𖽑𖽡𖽪𖾐 𖼦𖽑𖽙𖾐 𖼖𖽡𖾐，𖼞𖽪𖾐 𖼮𖽡𖽺𖾐 𖼦𖽑𖽺𖾑 𖼽𖽺𖾐 𖼮𖽑𖽡𖽪𖾑 𖼍𖽡𖾐 𖼮𖽡𖽺𖾐 𖼣𖽻𖾐．
15 𖼐𖽑𖽡𖾐 𖼽𖽻𖾐 𖼖𖽙𖾐 𖼊𖽑𖽡 𖼊𖽝𖾐 𖼺𖽶𖾐 𖼂𖽻𖾐 𖼖𖽻𖾐，𖼽𖽕𖾑 𖼖𖽪𖽦 𖼐𖽺𖾐 𖼽𖽻 𖼻𖽙 𖼞𖽑𖽶𖾑 𖼹𖽻𖾐 𖼞𖽜 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼽𖽻𖾐 𖼖𖽙𖾐 𖼈𖽪𖾑 𖼊𖽡𖾐 𖼊𖽑𖽺 𖼍𖽦𖾐 𖼖𖽡𖾐． 16 𖼐𖽑𖽡𖾐 𖼽𖽻𖾐 𖼖𖽙𖾐 𖼦𖽑𖽺𖾑 𖼊𖽝𖾐 𖼺𖽦 𖼦𖽑𖽙𖾐，𖼽𖽻𖾐 𖼺𖽶 𖼈𖽺𖾐 𖼍𖽡𖾐 𖼷𖽻𖾐 𖼊𖽑𖽺 𖼖𖽡𖾐 𖼀𖽳 𖼞𖽳𖾐 𖼦𖽜 𖼖𖽡𖾐． 17 𖼐𖽑𖽡𖾐 𖼽𖽻𖾐 𖼖𖽙𖾐 𖼦𖽙 𖼊𖽑𖽡 𖼊𖽝𖾐 𖼊𖽑𖽡 𖼊𖽝𖾐 𖼐𖽺𖾐 𖼊𖽝𖾐 𖼊𖽑𖽧 𖼖𖽻𖾐，𖼈𖽪𖾐 𖼦𖽑𖽦 𖼐𖽺𖾐 𖼀𖽪𖾐 𖼍𖽻𖾐 𖼷𖽑𖽡 𖼠𖽔𖾐 𖼹𖽧𖾑 𖼺𖽺𖾑，𖼀𖽑𖽨 𖼽𖽻𖾐 𖼦𖽙 𖼐𖽺𖾐 𖼽𖽻𖾐 𖼈𖽪𖾑 𖼊𖽡𖾐 𖼊𖽑𖽺 𖼍𖽦𖾐 𖼖𖽡𖾐． 18 𖼽𖽻𖾐 𖼖𖽙𖾐 𖼊𖽑𖽡 𖼊𖽝𖾐 𖼐𖽺𖾐 𖼈𖽺𖾐 𖼍𖽡𖾐 𖼷𖽻𖾐 𖼊𖽑𖽺 𖼍𖽦𖾐 𖼮𖽑𖽡𖽪𖾐 𖼦𖽑𖽙𖾐 𖼖𖽡𖾐，𖼞𖽪𖾐 𖼮𖽡𖽺𖾐 𖼦𖽑𖽺𖾑 𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜 𖼺𖽪𖾐 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼣𖽻𖾐，𖼦𖽑𖽺𖾑 𖽃𖽔𖾐 𖼍𖽚𖾑 𖼻𖽜 𖼮𖽑𖽡𖽪𖾐，𖼳𖽡𖽻𖾑 𖼳𖽡𖽻𖾐 𖼮𖽻𖾐 𖼺𖽪𖾐 𖼍𖽡𖾐 𖼮𖽡𖽺𖾐 𖼣𖽻𖾐．
19 𖼐𖽑𖽡𖾐 𖼦𖽑𖽔𖾐 𖼖𖽺𖾑 𖼽𖽻𖾐 𖼖𖽙𖾐 𖼠𖽳𖾐 𖼖𖽪𖾐 𖼞𖽑𖽶𖾑 𖼊𖽝𖾐 𖼺𖽶𖾐 𖼂𖽻𖾐 𖼖𖽻𖾐，𖼽𖽕𖾑 𖼖𖽪𖽦 𖼐𖽺𖾐 𖼽𖽻 𖼻𖽙 𖼞𖽑𖽶𖾑 𖼹𖽻𖾐 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼽𖽻𖾐 𖼖𖽙𖾐 𖼈𖽪𖾑 𖼊𖽡𖾐 𖼊𖽑𖽺 𖼍𖽦𖾐． 20 𖼐𖽑𖽡𖾐 𖼽𖽻𖾐 𖼖𖽙𖾐 𖼦𖽑𖽺𖾑 𖼊𖽝𖾐 𖼺𖽦 𖼦𖽑𖽙𖾐，𖼺𖽶 𖼊𖽑𖽡 𖼀𖽧𖾑 𖼈𖽺𖾐 𖼽𖽕𖾑 𖼖𖽪𖽦 𖼐𖽺𖾐 𖼽𖽻 𖼻𖽙 𖼞𖽑𖽶𖾑 𖼹𖽻𖾐 𖼽𖽙𖾐 𖼀𖽳 𖼐𖽙𖾑 𖼀𖽺𖾐 𖼖𖽺𖾐 𖼊𖽑𖽺 𖼄𖽺𖾑，𖼹𖽦𖾑 𖼊𖽑𖽡 𖼀𖽧𖾑 𖼈𖽺𖾐 𖼽𖽻 𖼈𖽳𖾐 𖼽𖽙𖾐 𖼀𖽳 𖼖𖽦 𖼐𖽑𖽡𖾐 𖼄𖽙𖾐 𖼐𖽺𖾐 𖼽𖽙𖾐 𖼀𖽳 𖼮𖽑𖽡𖾐 𖼐𖽑𖽡𖾐 𖼄𖽙𖾐 𖼊𖽑𖽺 𖼄𖽺𖾑，𖼷𖽺 𖼷𖽺𖾐 𖼺𖽪𖾐 𖼺𖽶 𖼐𖽑𖽡𖾑 𖼺𖽺𖾑，𖼍𖽡𖾐 𖼷𖽻𖾐 𖼊𖽑𖽺 𖼖𖽡𖾐 𖼀𖽳 𖼞𖽳𖾐 𖼦𖽜 𖼖𖽡𖾐． 21 𖼐𖽑𖽡𖾐 𖼳𖽡𖽻𖾐 𖼷𖽑𖽳𖾐 𖼐𖽺𖾐 𖼍𖽡𖾐 𖼷𖽻𖾐 𖼊𖽑𖽺 𖼺𖽶 𖼊𖽑𖽡 𖼀𖽧𖾑 𖼈𖽺𖾐 𖼺𖽺𖾑，𖼀𖽝𖾐 𖼽𖽕𖾑 𖼖𖽪𖽦 𖼊𖽑𖽺 𖼐𖽺𖾐 𖼽𖽻 𖼀𖽑𖽡𖽻𖾐 𖼷𖽑𖽶 𖼊𖽑𖽺 𖼍𖽦𖾐，𖼹𖽦𖾑 𖼀𖽝𖾐 𖼽𖽻 𖼻𖽙 𖼞𖽑𖽶𖾑 𖼹𖽻𖾐 𖼊𖽑𖽺 𖼐𖽺𖾐 𖼽𖽻 𖼻𖽙 𖼀𖽑𖽡𖽻𖾐 𖼷𖽑𖽶 𖼊𖽑𖽺 𖼖𖽺𖾑 𖼍𖽦𖾐 𖼖𖽡𖾐． 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼽𖽻 𖼈𖽳𖾐 𖼐𖽺𖾐 𖼽𖽻 𖼈𖽳𖾐 𖼞𖽳𖾐 𖼀𖽑𖽡𖽻𖾐 𖼷𖽑𖽶，𖼊𖽑𖽡 𖼊𖽑𖽜 𖼺𖽡 𖼮𖽡𖾐 𖼦𖽑𖽻𖾐 𖼊𖽻𖾐．
22 𖼽𖽻𖾐 𖼖𖽙𖾐 𖼷𖽑𖽳𖾐 𖼐𖽺𖾐 𖼽𖽻𖾐 𖼄𖽳𖾑，𖼈𖽪𖾐 𖼦𖽑𖽦 𖼞𖽑𖽶𖾐 𖼷𖽑𖽳𖾐 𖼐𖽺𖾐 𖼺𖽶 𖼊𖽑𖽻，𖼊𖽡𖾐 𖼖𖽡𖾐 𖼐𖽑𖽡 𖼊𖽝𖾐 𖼐𖽺𖾐 𖼊𖽡𖾐 𖼖𖽡𖾐 𖼊𖽑𖽺 𖼊𖽴 𖼺𖽪𖾐 𖼷𖽑𖽳𖾐，𖼽𖽙𖾐 𖼀𖽳 𖼀𖽪𖾐 𖼍𖽻𖾐，𖼦𖽑𖽺𖾑 𖼹𖽻𖾐 𖼐𖽑𖽡𖾐 𖼈𖽺𖾐 𖼊𖽚𖾐 𖼖𖽻𖾐 𖼖𖽡𖾐，𖼞𖽪𖾐 𖼮𖽡𖽺𖾐 𖼦𖽑𖽺𖾑 𖼽𖽻 𖼈𖽳𖾐 𖼍𖽡𖾐 𖼄𖽻 𖼂𖽺𖾐 𖼊𖽻𖾐 𖼞𖽑𖽶𖾑 𖼮𖽶𖾐，𖼞𖽑𖽙𖾐 𖼦𖽑𖽙𖾐 𖼞𖽜 𖼖𖽡𖾐 𖼺𖽪𖾐 𖼽𖽻𖾐 𖼖𖽙𖾐 𖼣𖽻𖾐． 23 𖼀𖽑𖽨 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼍𖽙𖾑 𖼺𖽪𖾐，𖼰𖽡𖽻𖾐 𖼖𖽪𖾐 𖼞𖽑𖽶𖾐 𖼮𖽑𖽻𖾐 𖼇𖽝𖾐 𖼄𖽔 𖼠𖽚 𖼺𖽪𖾐 𖽃𖽔𖾑 𖼂𖽻𖾐 𖼈𖽻𖾑 𖼈𖽻𖾐 𖼊𖽑𖽡 𖼀𖽑𖽡，𖼷𖽑𖽳𖾐 𖼮𖽑𖽻𖾐 𖼺𖽪𖾐 𖽃𖽔𖾑 𖼂𖽻𖾐 𖼊𖽑𖽡 𖼊𖽝𖾐 𖼐𖽺𖾐 𖽃𖽔𖾑 𖼂𖽻𖾐 𖼀𖽙𖾑 𖼀𖽙 𖼊𖽑𖽡 𖼊𖽝𖾐 𖼈𖽺𖾐 𖼺𖽺𖾑， 24 𖼦𖽑𖽺𖾑 𖼹𖽻𖾐 𖼞𖽑𖽙𖾐 𖼣𖽻𖾐 𖼐𖽑𖽡𖾐 𖼈𖽺𖾐 𖼽𖽕𖾑 𖼖𖽪𖽦 𖼐𖽺𖾐 𖼽𖽻 𖼻𖽙 𖼞𖽑𖽶𖾑 𖼹𖽻𖾐 𖼖𖽦 𖼀𖽑𖽦𖾐 𖼊𖽑𖽺 𖼍𖽦𖾐 𖼖𖽡𖾐． 𖽂𖽙 𖼺𖽙𖾐 𖼂𖽙𖾐 𖽃𖽙𖾑 𖼄𖽺 𖼮𖽡𖽺 𖼊𖽑𖽡 𖼖𖽦 𖼐𖽑𖽡𖽻𖾐 𖼺𖽺𖾑，𖼊𖽜 𖼐𖽑𖽡𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼖𖽡𖾐． 25 𖼐𖽑𖽡𖾐 𖼽𖽻 𖼈𖽳𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼍𖽡𖾐 𖼊𖽪𖾐 𖼦𖽑𖽺𖾑 𖼹𖽻𖾐 𖼷𖽶𖾐 𖼠𖽚 𖼖𖽻𖾐 𖼺𖽺𖾑，𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜 𖼺𖽪𖾐 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼖𖽡𖾐，𖼦𖽑𖽺𖾑 𖽃𖽔𖾐 𖼍𖽚𖾑 𖼻𖽜 𖼮𖽑𖽡𖽪𖾐，𖼳𖽡𖽻𖾑 𖼳𖽡𖽻𖾐 𖼮𖽻𖾐 𖼺𖽪𖾐 𖼍𖽡𖾐 𖼮𖽡𖽺𖾐 𖼣𖽻𖾐．
𖼍𖽡𖾐 𖼄𖽻 𖼞𖽑𖽙𖾐 𖽂𖽙𖾐 𖼷𖽻 𖼺𖽪𖾐 𖼄𖽡 𖼐𖽜𖾐 (𖼖𖽡𖾑 10： 12-15)
26 “𖼽𖽕𖾑 𖼖𖽪𖽦 𖼍𖽡𖾐 𖼄𖽻 𖼐𖽑𖽡𖾐 𖼮𖽡𖽺𖾐 𖼷𖽶𖾐 𖼞𖽑𖽶𖾑 𖼮𖽶𖾐，𖼞𖽑𖽙𖾐 𖼦𖽑𖽙𖾐 𖼍𖽡𖾐 𖼺𖽪𖾐 𖼽𖽻𖾐 𖼖𖽙𖾐 𖼞𖽳𖾐 𖽂𖽚𖾐 𖼖𖽚𖾐 𖼄𖽺，𖼐𖽑𖽡𖾐 𖼈𖽺𖾐 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼊𖽜 𖼐𖽑𖽡𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼖𖽡𖾐，𖼍𖽡𖾐 𖼦𖽙 𖼦𖽑𖽺𖾑 𖼐𖽑𖽡𖾐 𖽂𖽙𖾐 𖼷𖽻 𖼺𖽪𖾐 𖼣𖽻𖾐．
27 𖼊𖽜 𖼐𖽑𖽡𖽻𖾐 𖼍𖽡𖾐 𖼮𖽡𖽺𖾐 𖼞𖽳𖾐 𖽂𖽚𖾐 𖼖𖽚𖾐 𖼄𖽺 𖼦𖽙 𖼐𖽺𖾐 𖼮𖽑𖽳 𖼍𖽪𖾐 𖼍𖽡𖾐 𖼮𖽡𖽺𖾐 𖼞𖽳𖾐 𖼽𖽻𖾐 𖼀𖽪𖾐 𖼍𖽻𖾐，𖼐𖽑𖽡𖾐 𖼽𖽻 𖼈𖽳𖾐 𖼞𖽜 𖼺𖽡 𖼮𖽡𖾐 𖼖𖽡𖾐，𖼞𖽑𖽶𖾑 𖼽𖽕𖾑 𖼖𖽪𖽦 𖼐𖽺𖾐 𖼽𖽻 𖼻𖽙 𖼞𖽑𖽶𖾑 𖼹𖽻𖾐 𖼍𖽡𖾐 𖼄𖽻 𖼂𖽺𖾐 𖼊𖽻𖾐 𖼞𖽑𖽶𖾑 𖼮𖽶𖾐 𖼞𖽑𖽙𖾐 𖼍𖽡𖾐 𖼺𖽪𖾐，𖼮𖽑𖽳 𖼍𖽪𖾐 𖼠𖽚 𖼐𖽺𖾐 𖼊𖽜 𖼐𖽑𖽡𖽻𖾐 𖼠𖽚 𖼺𖽪𖾐 𖼽𖽻𖾐 𖼖𖽙𖾐 𖼦𖽙 𖼞𖽑𖽶𖾑 𖼀𖽜𖾐 𖼣𖽻𖾐． 28 𖼦𖽑𖽺𖾑 𖼽𖽕𖾑 𖼖𖽪𖽦 𖼐𖽺𖾐 𖼽𖽻 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐，𖼞𖽑𖽻𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽑𖽻𖾐 𖼞𖽑𖽙𖾐 𖽂𖽙𖾐 𖼷𖽻 𖼺𖽪𖾐 𖼄𖽡 𖼐𖽜𖾐 𖼣𖽻𖾐． 𖼞𖽪𖾐 𖼮𖽡𖽺𖾐 𖼦𖽑𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼺𖽙𖾑 𖼺𖽙𖾐 𖼍𖽡𖾐 𖼮𖽡𖽺𖾐 𖼠𖽻𖾐 𖼊𖽑𖽺 𖼮𖽑𖽻𖾐 𖼀𖽜𖾐 𖼊𖽑𖽧 𖼖𖽻𖾐 𖼺𖽺𖾑，𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜 𖼺𖽪𖾐 𖼮𖽑𖽳 𖼍𖽪𖾐 𖼍𖽡𖾐 𖼮𖽡𖽺𖾐 𖼣𖽻𖾐．
29 𖼽𖽕𖾑 𖼖𖽪𖽦 𖼳𖽶𖾐 𖼦𖽑𖽙𖾐 𖼠𖽙𖾑 𖼍𖽻𖾐，𖼽𖽻 𖼞𖽳𖾐 𖼺𖽡 𖼮𖽡𖾐 𖼀𖽑𖽡𖽻𖾐 𖼦𖽑𖽺𖾑 𖼊𖽑𖽡 𖼹𖽦𖾐 𖼦𖽑𖽻𖾐 𖼈𖽺𖾐 𖼊𖽑𖽡 𖼹𖽦𖾐 𖼊𖽑𖽺 𖼞𖽜 𖼖𖽡𖾐，𖽃𖽔𖾐 𖼺𖽺𖾑 𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼖𖽚𖾐 𖼂𖽚𖾐 𖼵𖽶𖾐 𖼈𖽡𖾐 𖼐𖽑𖽡𖾑 𖼽𖽻 𖼈𖽳𖾐 𖼊𖽑𖽺 𖼦𖽜，𖼍𖽡𖾐 𖼄𖽻 𖼂𖽺𖾐 𖼊𖽻𖾐 𖼞𖽑𖽶𖾑 𖼮𖽶𖾐 𖼺𖽡 𖼮𖽡𖾐 𖼀𖽑𖽡𖽻𖾐 𖼦𖽑𖽺𖾑 𖼈𖽦 𖼖𖽡𖾐． 30 𖼽𖽕𖾑 𖼖𖽪𖽦 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐，𖼽𖽻 𖼠𖽙𖾑 𖼍𖽻𖾐 𖼍𖽡𖾐 𖼄𖽻 𖼈𖽳 𖼂𖽺𖾐 𖼺𖽪𖾐，𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽑𖽶𖾐 𖼺𖽡 𖼮𖽡𖾐 𖼊𖽺𖾐 𖼞𖽳𖾐 𖼊𖽡 𖼽𖽡𖾐 𖼣𖽙𖾐 𖼊𖽑𖽺 𖼠𖽙𖾐 𖼳𖽙𖾐 𖼞𖽑𖽶𖾑 𖼮𖽶𖾐，𖼺𖽡 𖼮𖽡𖾐 𖼀𖽑𖽡𖽻𖾐 𖼳𖽶 𖼐𖽑𖽡𖾐 𖼈𖽦 𖼖𖽡𖾐．
31 𖼍𖽡𖾐 𖼄𖽻 𖼂𖽺𖾐 𖼊𖽻𖾐 𖼞𖽑𖽶𖾑 𖼮𖽶𖾐，𖼦𖽑𖽙𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼍𖽡𖾐 𖼺𖽪𖾐 𖼽𖽻𖾐 𖼖𖽙𖾐 𖼞𖽳𖾐 𖽂𖽚𖾐 𖼖𖽚𖾐 𖼄𖽺 𖼐𖽺𖾐 𖼀𖽪𖾐 𖼍𖽻𖾐 𖼦𖽙，𖼐𖽑𖽡𖾐 𖼈𖽺𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖽃𖽔𖾑 𖼊𖽪 𖼮𖽑𖽡𖽺 𖼞𖽳𖾐 𖼰𖽡𖽦𖾑 𖼖𖽡𖾐． 32 𖼽𖽕𖾑 𖼖𖽪𖽦 𖼐𖽺𖾐 𖼽𖽻 𖼻𖽙 𖼞𖽑𖽶𖾑 𖼹𖽻𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖽃𖽔𖾑 𖼊𖽪 𖼮𖽑𖽡𖽺 𖼞𖽳𖾐 𖼮𖽻𖾐，𖼽𖽻𖾐 𖼖𖽙𖾐 𖼦𖽙 𖼐𖽺𖾐 𖼰𖽡𖽻𖾐 𖼖𖽪𖾐 𖼞𖽑𖽶𖾐 𖽃𖽔𖾑 𖼂𖽻𖾐 𖼞𖽑𖽶𖾑 𖼷𖽙 𖼖𖽡𖾐． 33 𖼽𖽻 𖼈𖽳𖾐 𖼞𖽑𖽻𖾑 𖼽𖽻 𖼈𖽳𖾐 𖼖𖽙𖾐 𖼀𖽙𖾐 𖼦𖽑𖽙𖾐 𖼂𖽻𖾐 𖼖𖽻𖾐 𖼺𖽪𖾐 𖼽𖽺𖾐 𖼮𖽑𖽡𖽪𖾑 𖼍𖽡𖾐 𖼮𖽡𖽺𖾐 𖼞𖽳𖾐 𖼍𖽡𖾐 𖼊𖽪𖾐 𖼦𖽑𖽺𖾑 𖼹𖽻𖾐 𖼊𖽑𖽺 𖼷𖽙 𖼖𖽡𖾐，𖽃𖽔𖾐 𖼺𖽺𖾑 𖼽𖽻 𖼈𖽳𖾐 𖼊𖽑𖽺 𖼀𖽜𖾐 𖼀𖽑𖽪𖾐 𖼺𖽡 𖼮𖽡𖾐，𖼽𖽻 𖼈𖽳𖾐 𖼞𖽜 𖼍𖽡𖾐 𖼄𖽻 𖽂𖽙𖾐 𖼂𖽺𖾐 𖼊𖽙𖾐． 𖼦𖽑𖽻𖾐 𖼊𖽑𖽻𖾐，𖼠𖽳𖾐 𖼖𖽪𖾐 𖼷𖽑𖽻𖾐 𖽂𖽙𖾐 𖼷𖽙 𖼄𖽔 𖼊𖽙𖾐，𖼞𖽪𖾐 𖼮𖽡𖽺𖾐 𖼷𖽙 𖼊𖽪𖾐 𖼦𖽑𖽺𖾑 𖼺𖽡 𖼮𖽡𖾐 𖼺𖽪𖾐 𖼣𖽻𖾐． 34 𖼍𖽡𖾐 𖼄𖽻 𖼂𖽺𖾐 𖼞𖽑𖽶𖾑 𖼮𖽶𖾐 𖼞𖽑𖽙𖾐 𖼍𖽡𖾐 𖼺𖽪𖾐 𖼦𖽙 𖼐𖽺𖾐 𖽃𖽔𖾑 𖼂𖽻𖾐，𖼊𖽑𖽡 𖼀𖽧𖾑 𖼷𖽺𖾐 𖼠𖽙𖾑 𖼍𖽻𖾐 𖼊𖽑𖽡 𖼐𖽜𖾐 𖼮𖽑𖽡𖾐 𖼊𖽑𖽡𖾑 𖼣𖽻𖾐，𖽃𖽔𖾐 𖼍𖽚𖾑 𖼻𖽜 𖼮𖽑𖽡𖽪𖾐 𖼦𖽑𖽙𖾐 𖼖𖽡𖾐，𖽂𖽙𖾐 𖼷𖽙 𖼄𖽔 𖼊𖽙𖾐，𖼞𖽪𖾐 𖼮𖽡𖽺𖾐 𖼦𖽑𖽺𖾑 𖼺𖽡 𖼮𖽡𖾐 𖼺𖽪𖾐 𖼣𖽻𖾐．
35 𖽃𖽔𖾐 𖼺𖽺𖾑，𖼣𖽙𖾐 𖼐𖽑𖽡𖾐 𖼊𖽑𖽺 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐，𖼽𖽕𖾑 𖼖𖽪𖽦 𖼐𖽺𖾐 𖼽𖽻 𖼻𖽙 𖼞𖽑𖽶𖾑 𖼹𖽻𖾐 𖼍𖽡𖾐 𖼄𖽻 𖼂𖽺𖾐 𖼞𖽳𖾐 𖼐𖽑𖽡𖾐 𖼮𖽡𖽺𖾐 𖼊𖽑𖽺 𖼳𖽶 𖼐𖽑𖽡𖾐 𖼳𖽪𖾐 𖼖𖽡𖾐． 36 𖼐𖽑𖽡𖾐 𖼊𖽑𖽡 𖼐𖽑𖽡𖾑 𖼐𖽑𖽡𖾐 𖼽𖽺𖾐 𖼮𖽑𖽡𖽪𖾑 𖼖𖽙𖾐 𖼀𖽙𖾐 𖼺𖽺𖾑，𖼐𖽑𖽡 𖼖𖽙 𖼦𖽑𖽳𖾐 𖼊𖽑𖽡 𖼮𖽑𖽡𖾐 𖼦𖽑𖽙𖾐 𖼽𖽺𖾐 𖼮𖽑𖽡𖽡𖾑𖽪𖾑 𖼍𖽡𖾐 𖼮𖽡𖽺𖾐 𖼂𖽺𖾐 𖼖𖽡𖾐． 𖼐𖽑𖽡𖾐 𖼍𖽡𖾐 𖼷𖽻𖾐 𖼖𖽙𖾐 𖼀𖽙𖾐 𖼺𖽡 𖼮𖽡𖾐 𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼞𖽑𖽶𖾑 𖼮𖽶𖾐，𖼍𖽡𖾐 𖼷𖽻𖾐 𖼞𖽜 𖼺𖽡 𖼮𖽡𖾐 𖼦𖽑𖽻𖾐 𖼊𖽻𖾐． 𖼦𖽑𖽔𖾐 𖼖𖽺𖾑，𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼖𖽚𖾐 𖼂𖽚𖾐 𖼵𖽶𖾐 𖼈𖽡𖾐 𖼐𖽑𖽡𖾑 𖼍𖽡𖾐 𖼷𖽻𖾐 𖼊𖽑𖽺 𖼦𖽜 𖼺𖽺𖾑，𖼍𖽡𖾐 𖼷𖽻𖾐 𖼞𖽜 𖼺𖽡 𖼮𖽡𖾐 𖼖𖽡𖾐． 37 𖼐𖽑𖽡𖾐 𖼍𖽡𖾐 𖼷𖽻𖾐 𖼖𖽙𖾐 𖼀𖽙𖾐 𖼺𖽡 𖼮𖽡𖾐 𖼐𖽑𖽡𖾐 𖼮𖽡𖽺𖾐 𖼳𖽶 𖼐𖽑𖽡𖾐 𖼂𖽺𖾐 𖼖𖽡𖾐，𖼍𖽡𖾐 𖼷𖽻𖾐 𖼞𖽜 𖼺𖽡 𖼮𖽡𖾐 𖼺𖽺𖾑，𖼍𖽡𖾐 𖼷𖽻𖾐 𖼺𖽡 𖼮𖽡𖾐 𖼦𖽑𖽻𖾐 𖼊𖽻𖾐． 𖼍𖽡𖾐 𖼷𖽻𖾐 𖼊𖽑𖽺 𖼞𖽑𖽙𖾐 𖼍𖽪 𖼄𖽳𖾐 𖼺𖽪𖾐 𖼄𖽡𖽻 𖼐𖽑𖽡 𖼞𖽜 𖼖𖽺𖾑，𖼄𖽳𖾑 𖼄𖽳𖾐 𖼺𖽡 𖼮𖽡𖾐 𖼦𖽑𖽻𖾐 𖼊𖽻𖾐．
𖼊𖽑𖽡 𖼐𖽑𖽡𖾑 𖼐𖽑𖽡𖾐 𖼞𖽳𖾐 𖼍𖽡𖾐 𖼮𖽡𖽺𖾐 (𖼈𖽜𖾐 28： 1-8)
38 𖼐𖽑𖽡𖾐 𖼞𖽑𖽙𖾐 𖼦𖽑𖽙𖾐 𖼍𖽡𖾐 𖼖𖽡𖾐 𖼺𖽪𖾐 𖼦𖽑𖽺𖾑 𖼹𖽻𖾐 𖼣𖽻𖾐：“𖼊𖽑𖽡 𖼐𖽑𖽡𖾑 𖼐𖽑𖽡𖾐 𖼊𖽑𖽡 𖼞𖽑𖽚 𖼖𖽚 𖼺𖽪𖾐 𖼽𖽻𖾐 𖼻𖽙 𖼐𖽑𖽡 𖼊𖽝𖾐，𖼦𖽑𖽙𖾐 𖼍𖽡𖾐 𖼷𖽻𖾐 𖼊𖽑𖽺 𖼍𖽦𖾐 𖼖𖽡𖾐． 39 𖼷𖽑𖽶𖾐 𖼐𖽦 𖼊𖽑𖽡 𖼊𖽝𖾐 𖼦𖽑𖽙𖾐 𖼍𖽡𖾐，𖽃𖽔𖾑 𖼄𖽶 𖼐𖽑𖽡𖾐 𖼖𖽻𖾑 𖼹𖽺𖾐 𖼽𖽡𖾐 𖼞𖽑𖽶𖾑 𖼮𖽶𖾐 𖼊𖽑𖽡 𖼊𖽝𖾐 𖼦𖽑𖽙𖾐 𖼍𖽡𖾐 𖼖𖽡𖾐． 40 𖼷𖽑𖽶𖾐 𖼐𖽦 𖼽𖽻𖾐 𖼻𖽙 𖼖𖽙𖾐 𖼮𖽑𖽻𖾐 𖼍𖽡𖾐 𖼖𖽡𖾐 𖼺𖽪𖾐，𖼞𖽑𖽶𖾑 𖼷𖽙𖾐 𖼄𖽶𖾐 𖼊𖽑𖽡 𖼰𖽡𖾐 𖼐𖽺𖾐 𖼰𖽡𖾐 𖼊𖽑𖽧 𖼖𖽻𖾐 𖼺𖽪𖾐 𖽃𖽔 𖼮𖽑𖽙 𖼵𖽶𖾐 𖼈𖽡𖾐 𖼊𖽑𖽡 𖼰𖽡𖾐 𖼞𖽢𖾐 𖼷𖽙𖾐 𖼖𖽙𖾐 𖼮𖽑𖽻𖾐，𖼹𖽦𖾑 𖼮𖽶𖾐 𖼀𖽳 𖼊𖽑𖽡 𖼰𖽡𖾐 𖼻𖽜 𖼮𖽶𖾐 𖼀𖽳 𖼍𖽡𖾐 𖼮𖽡𖽺𖾐 𖼂𖽺𖾐 𖼖𖽡𖾐． 41 𖽃𖽔𖾑 𖼄𖽶 𖼐𖽑𖽡𖾐 𖼖𖽻𖾑 𖼞𖽑𖽶𖾑 𖼮𖽶𖾐 𖼽𖽻𖾐 𖼻𖽙 𖼖𖽙𖾐 𖼮𖽑𖽻𖾐 𖼍𖽡𖾐 𖼖𖽡𖾐 𖼺𖽪𖾐，𖼞𖽑𖽶𖾑 𖼖𖽺𖾑 𖼷𖽑𖽶𖾐 𖼐𖽦 𖼷𖽙𖾐 𖼺𖽳 𖼍𖽡𖾐 𖼮𖽡𖽺𖾐 𖼐𖽺𖾐 𖼮𖽶𖾐 𖼀𖽳 𖼍𖽡𖾐 𖼮𖽡𖽺𖾐 𖼖𖽙𖾐 𖼺𖽶𖾑 𖼂𖽺𖾐 𖼺𖽺𖾑，𖽃𖽔𖾐 𖼍𖽚𖾐 𖼻𖽜 𖼮𖽑𖽡𖽪𖾐，𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜 𖼺𖽪𖾐 𖼳𖽡𖽻𖾑 𖼳𖽡𖽻𖾐 𖼞𖽳𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼖𖽡𖾐．
42 𖼦𖽑𖽺𖾑 𖼐𖽑𖽡𖾐 𖼈𖽳𖾐 𖼹𖽦𖾐 𖼹𖽦𖾐 𖼀𖽻𖾐 𖼀𖽻𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖽃𖽔𖾑 𖼊𖽪 𖼞𖽳𖾐 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼄𖽔 𖼐𖽙 𖼦𖽑𖽙𖾐 𖼍𖽡𖾐 𖼖𖽡𖾐 𖼺𖽪𖾐 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼣𖽻𖾐，𖼣𖽙𖾐 𖼞𖽑𖽶𖾑 𖼠𖽻𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼻𖽶𖾑，𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐 𖼊𖽻𖾐． 43 𖼣𖽙𖾐 𖼞𖽑𖽶𖾑 𖼠𖽻𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼻𖽶𖾑 𖼊𖽻𖾐，𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼣𖽙𖾐 𖼞𖽳𖾐 𖼄𖽶 𖼳𖽳𖾐 𖼖𖽙𖾐 𖼀𖽙𖾐 𖼺𖽺𖾑，𖼀𖽑𖽶 𖼊𖽴 𖼺𖽡 𖼮𖽡𖾐 𖼮𖽻𖾐 𖼊𖽻𖾐． 44 𖼣𖽙𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼐𖽺𖾐 𖼍𖽡𖾐 𖼷𖽻𖾐 𖼞𖽜 𖼺𖽡 𖼮𖽡𖾐 𖼊𖽻𖾐，𖼽𖽕𖾑 𖼖𖽪𖽦 𖼐𖽺𖾐 𖼽𖽻 𖼻𖽙 𖼞𖽑𖽶𖾑 𖼹𖽻𖾐 𖼞𖽜 𖼖𖽺𖾑 𖼺𖽡 𖼮𖽡𖾐 𖼺𖽺𖾑，𖼍𖽡𖾐 𖼄𖽻 𖼂𖽺𖾐 𖼣𖽙𖾐 𖼊𖽑𖽺 𖼠𖽙𖾐 𖼳𖽙𖾐 𖼊𖽻𖾐． 45 𖼣𖽙𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼠𖽻𖾐 𖼊𖽑𖽺 𖼮𖽻𖾐 𖼺𖽺𖾑，𖼽𖽻 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼂𖽺𖾐 𖼊𖽻𖾐． 46 𖼽𖽻 𖼈𖽳𖾐 𖼷𖽑𖽜𖾑 𖼷𖽑𖽜𖾐 𖼺𖽝𖾑 𖼊𖽻𖾐，𖼣𖽙𖾐 𖼦𖽑𖽺𖾑 𖼽𖽻 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼣𖽻𖾐． 𖼣𖽙𖾐 𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖼮𖽑𖽻𖾐 𖼮𖽻𖾐 𖼊𖽻𖾐 𖼺𖽺𖾑，𖼽𖽻 𖼈𖽳𖾐 𖼊𖽑𖽺 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼦𖽳 𖼊𖽚𖾐 𖼖𖽻𖾐 𖼦𖽑𖽙𖾐． 𖼣𖽙𖾐 𖼽𖽻 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼣𖽻𖾐．