𖽃𖽦𖾐 𖼰𖽧 𖼊𖽚𖾐 𖼺𖽪𖾑 25

𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼖𖽙𖾐 𖼀𖽙𖾐 𖼄𖽡𖽻 𖼐𖽑𖽡 𖼦𖽑𖽙𖾐 𖼞𖽜 𖼖𖽻𖾐 (𖼊𖽚𖾐 35： 4-9)

1 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐： 2 “𖼐𖽑𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼀𖽦𖾐 𖼊𖽑𖽧，𖼽𖽻 𖼈𖽳𖾐 𖼄𖽡𖽻 𖼐𖽑𖽡 𖼦𖽑𖽙𖾐 𖼣𖽙𖾐 𖼊𖽑𖽺 𖼞𖽜 𖼖𖽡𖾐，𖼽𖽻 𖼈𖽳𖾐 𖼐𖽑𖽧𖾐 𖼺𖽳 𖼄𖽙𖾐 𖼞𖽑𖽙𖾐 𖼦𖽑𖽙𖾐 𖼂𖽻𖾐 𖼖𖽻𖾐 𖼺𖽪𖾐 𖼄𖽡𖽻 𖼐𖽑𖽡，𖼐𖽑𖽡𖾐 𖼈𖽳𖾐 𖼷𖽶𖾐 𖼹𖽺𖾐 𖼖𖽻𖾐 𖼮𖽑𖽳𖾐． 3 𖼐𖽑𖽡𖾐 𖼈𖽳𖾐 𖼞𖽑𖽙𖾐 𖼽𖽻 𖼈𖽳𖾐 𖼞𖽳𖾐 𖼷𖽶𖾐 𖼖𖽡𖾐 𖼺𖽪𖾐 𖼄𖽡𖽻 𖼐𖽑𖽡，

𖼞𖽑𖽶𖾑 𖼀𖽑𖽨𖾐、 𖼳𖽳𖾐、 𖼮𖽡、

4 𖼄𖽳𖾐 𖼷𖽺 𖼖𖽕𖾑 𖼖𖽕、 𖼄𖽳𖾐 𖼷𖽺 𖼐𖽑𖽡𖾐 𖼀𖽸、 𖼄𖽳𖾐 𖼷𖽺 𖼐𖽑𖽡𖾑 𖼐𖽑𖽡𖾐，𖼽𖽦 𖼄𖽳𖾐 𖼮𖽑𖽡𖾐 𖼄𖽶𖾑 𖼄𖽶𖾐、 𖽃𖽔𖾑 𖼮𖽑𖽸 𖼄𖽶𖾐、

5 𖼦𖽑𖽨𖾐 𖼐𖽑𖽡𖾐 𖼺𖽪𖾐 𖼽𖽻𖾐 𖼖𖽙𖾐 𖼮𖽡𖾐、 𖼈𖽡𖾐 𖼳𖽶𖾐 𖼮𖽡𖾐、 𖼮𖽑𖽪 𖼠𖽴𖾐 𖼺𖽧𖾐 \fr 25．5 \ft “𖼮𖽑𖽪 𖼠𖽴𖾐 𖼺𖽧𖾐 ” 𖼦𖽑𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼄𖽡𖾐 𖼊𖽺𖾐 𖼮𖽻𖾐，𖼦𖽑𖽔𖾐 𖼮𖽶𖾐 𖼹𖽳𖾐、𖼦𖽑𖽔𖾐 𖼮𖽶𖾐 𖼠𖽴𖾐，𖼈𖽺𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼹𖽸𖾑 𖼺𖽪𖾐 𖼞𖽑𖽶𖾑 𖼳𖽶 𖼺𖽧𖾐 𖼣𖽻𖾐．、

6 𖼀𖽙𖾐 𖼊𖽪𖾐 𖼍𖽚𖾑 𖼖𖽚𖾐 𖼂𖽚𖾐 𖽃𖽔 𖼮𖽑𖽙 𖼵𖽶𖾐 𖼈𖽡𖾐、 𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼞𖽑𖽶𖾑 𖼮𖽶𖾐 𖼻𖽜 𖼖𖽚𖾐 𖼂𖽚𖾐 𖼵𖽶𖾐 𖼈𖽡𖾐 𖼐𖽺𖾐 𖼮𖽑𖽡𖽪𖾐 𖼖𖽚𖾐 𖼂𖽚𖾐 𖼳𖽡𖽻𖾐 𖼄𖽶𖾐．

7 𖼄𖽪 𖼦𖽜𖾐 𖼐𖽑𖽡𖾐、 𖼽𖽡 𖼇𖽮 𖼍𖽴 \fr 25．7 \ft “𖼽𖽡 𖼇𖽮 𖼍𖽴 ” 𖼦𖽑𖽺𖾑 𖼍𖽡 𖼄𖽻 𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐 𖼍𖽡 𖼽𖽡𖾐 𖼞𖽑𖽶𖾑 𖼮𖽶𖾐 𖼈𖽦 𖼖𖽚𖾐 𖼂𖽚𖾐 𖼀𖽑𖽡𖽻𖾐 𖼣𖽻𖾐． 𖼐𖽺𖾐 𖼐𖽑𖽧𖾐 𖼄𖽙𖾐 𖼰𖽙𖾐 𖼮𖽑𖽨𖾑 𖼀𖽑𖽡 𖼊𖽑𖽺 𖼂𖽚𖾐 𖼍𖽦𖾐 𖼺𖽪𖾐 𖼀𖽑𖽶 𖼊𖽴 𖼖𖽚𖾐 𖼣𖽻𖾐．

8 𖼽𖽻 𖼈𖽳𖾐 𖼣𖽙𖾐 𖼖𖽙𖾐 𖼀𖽙𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼍𖽚 𖼖𖽡𖾐，𖽃𖽔𖾐 𖼺𖽺𖾑 𖼣𖽙𖾐 𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖽂𖽙𖾐 𖼮𖽻𖾐 𖼊𖽙𖾐． 9 𖼐𖽑𖽡𖾐 𖼈𖽳𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼐𖽺𖾐 𖼄𖽡𖽻 𖼐𖽑𖽡 𖼻𖽜 𖼊𖽪𖾐 𖼞𖽑𖽙𖾐 𖼣𖽻𖾐 𖼹𖽸𖾑 𖼞𖽑𖽶𖾑 𖼮𖽶𖾐，𖼣𖽙𖾐 𖼐𖽑𖽡𖾐 𖼊𖽑𖽺 𖼞𖽑𖽙𖾐 𖼀𖽦𖾐 𖼄𖽪𖾑 𖼺𖽪𖾐 𖼖𖽙𖾐 𖼮𖽑𖽻𖾐 𖼹𖽸𖾑 𖼖𖽡𖾐．

𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼞𖽳𖾐 𖼠𖽴𖾐 𖼮𖽑𖽡𖽻𖾐 ( 𖼊𖽚𖾐 37： 1-9)

10 𖼽𖽻 𖼈𖽳𖾐 𖼮𖽑𖽪 𖼠𖽴𖾐 𖼺𖽧𖾐 𖼻𖽜 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼊𖽑𖽡 𖼊𖽝𖾐 𖼹𖽸𖾑 𖼖𖽡𖾐，𖼳𖽶𖾐 𖼞𖽳𖾐 𖼐𖽑𖽡 𖼖𖽦 𖼞𖽚 𖼂𖽕，𖼞𖽑𖽫𖾐 𖼞𖽳𖾐 𖼊𖽑𖽡 𖼖𖽦 𖼞𖽚 𖼂𖽕，𖼄𖽶𖾐 𖼞𖽳𖾐 𖼊𖽑𖽡 𖼖𖽦 𖼞𖽚 𖼂𖽕 𖼮𖽻𖾐 𖼖𖽡𖾐． 11 𖼐𖽑𖽡𖾐 𖼳𖽳𖾐 𖼠𖽕𖾐 𖼮𖽶𖾐 𖼻𖽜 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼊𖽑𖽺 𖼂𖽻𖾐 𖼍𖽡 𖼖𖽡𖾐，𖼞𖽑𖽶𖾐 𖼮𖽻𖾐 𖼊𖽑𖽦 𖼮𖽻𖾐 𖼖𖽺𖾑 𖼂𖽻𖾐 𖼖𖽡𖾐，𖼖𖽡𖾐 𖼣𖽴 𖼊𖽑𖽺 𖼳𖽳𖾐 𖼀𖽑𖽡 𖼍𖽴𖾑 𖼖𖽡𖾐． 12 𖼐𖽑𖽡𖾐 𖼳𖽳𖾐 𖼠𖽪𖾐 𖼖𖽪𖾐 𖼖𖽡𖾐 𖼊𖽝𖾐 𖼦𖽜𖾐 𖼺𖽺𖾑，𖼈𖽺𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼮𖽑𖽡𖾑 𖼀𖽑𖽦𖾐 𖼖𖽡𖾐 𖼊𖽝𖾐 𖼊𖽑𖽺 𖼍𖽴𖾑，𖼦𖽑𖽺𖾑 𖼀𖽳 𖼐𖽑𖽡 𖼊𖽝𖾐 𖼍𖽴𖾑 𖼖𖽡𖾐，𖼞𖽑𖽶𖾑 𖼀𖽳 𖼐𖽑𖽡 𖼊𖽝𖾐 𖼍𖽴𖾑 𖼖𖽡𖾐． 13 𖼐𖽑𖽡𖾐 𖼮𖽑𖽪 𖼠𖽴𖾐 𖼺𖽧𖾐 𖼻𖽜 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼈𖽦𖾑 𖼖𖽜 𖼐𖽑𖽡 𖼂𖽻𖾐 𖼹𖽸𖾑，𖼦𖽑𖽔𖾐 𖼖𖽺𖾑 𖼳𖽳𖾐 𖼻𖽜 𖼂𖽻𖾐 𖼍𖽡 𖼖𖽡𖾐． 14 𖼐𖽑𖽡𖾐 𖼈𖽦𖾑 𖼖𖽜 𖼦𖽑𖽺𖾑 𖼺𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼐𖽑𖽡 𖼀𖽳 𖼞𖽳𖾐 𖼳𖽳𖾐 𖼠𖽪𖾐 𖼖𖽪𖾐 𖼞𖽑𖽶𖾐 𖼠𖽚 𖼺𖽺𖾑，𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼊𖽑𖽺 𖼈𖽦𖾑 𖼺𖽜 𖼖𖽡𖾐． 15 𖼈𖽦𖾑 𖼖𖽜 𖼻𖽳𖾐 𖼻𖽳𖾐 𖼳𖽳𖾐 𖼠𖽪𖾐 𖼖𖽪𖾐 𖼞𖽑𖽶𖾐 𖼮𖽻𖾐 𖼍𖽳𖾐 𖼖𖽡𖾐，𖽂𖽙𖾐 𖼞𖽻𖾐 𖼊𖽑𖽧 𖼖𖽻𖾐 𖼄𖽔 𖼊𖽙𖾐． 16 𖼣𖽙𖾐 𖼖𖽪 𖼐𖽑𖽡𖾐 𖼊𖽑𖽺 𖼞𖽜 𖼺𖽪𖾐 𖼷𖽑𖽦𖾐 𖼮𖽡𖽺𖾐 𖼀𖽑𖽡 𖼐𖽑𖽡𖾐 𖼀𖽑𖽨 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼞𖽑𖽶𖾐 𖼰𖽡𖽺𖾐 𖼖𖽡𖾐．

17 𖼐𖽑𖽡𖾐 𖼳𖽳𖾐 𖼠𖽕𖾐 𖼰𖽶𖾐 𖼻𖽜 𖼺𖽺𖾑，𖼮𖽡 𖼽𖽡𖾑 𖼳𖽳𖾐 𖼮𖽡𖽺 \fr 25．17 \ft “𖼮𖽡 𖼽𖽡𖾐 𖼳𖽳𖾐 𖼮𖽡𖽺” 𖼦𖽑𖽺𖾑 “𖼄𖽳𖾐 𖼷𖽑𖽦𖾐 𖼀𖽚 𖼮𖽡𖽺 𖼞𖽳𖾐 𖼀𖽜𖾐 𖼦𖽴𖾐 𖼀𖽑𖽡” 𖼀𖽑𖽚𖾐 𖼺𖽪𖾐 𖼖𖽺𖾑 𖼮𖽻𖾐． 𖼊𖽑𖽡 𖼊𖽝𖾐 𖼹𖽸𖾑 𖼖𖽡𖾐，𖼳𖽶𖾐 𖼞𖽳𖾐 𖼐𖽑𖽡 𖼖𖽦 𖼞𖽚 𖼂𖽕，𖼞𖽑𖽫𖾐 𖼞𖽳𖾐 𖼊𖽑𖽡 𖼖𖽦 𖼞𖽚 𖼂𖽕 𖼮𖽻𖾐 𖼖𖽡𖾐． 18 𖼐𖽑𖽡𖾐 𖼳𖽳𖾐 𖼻𖽜 𖼰𖽡𖾐 𖼖𖽪𖾑 𖼂𖽚 \fr 25．18 \ft “𖼮𖽡𖾐 𖼖𖽪𖾑 𖼂𖽚” 𖼦𖽑𖽺𖾑 𖼄𖽶 𖼠𖽻𖾐 𖼹𖽡𖾐 𖼖𖽦 𖼞𖽳𖾐 𖼄𖽡𖾐 𖼣𖽻𖾐． 𖼐𖽑𖽡 𖼊𖽝𖾐 𖼊𖽝 𖼊𖽑𖽧 𖼖𖽻𖾐 𖼺𖽺𖾑，𖼀𖽑𖽨 𖼮𖽡 𖼽𖽡𖾑 𖼳𖽳𖾐 𖼮𖽡𖽺 𖼞𖽳𖾐 𖼐𖽑𖽡 𖼣𖽴 𖼊𖽑𖽺 𖼍𖽙𖾑 𖼖𖽡𖾐． 19 𖼦𖽑𖽺𖾑 𖼣𖽴 𖼊𖽑𖽡 𖼊𖽝𖾐 𖼍𖽙𖾑，𖼞𖽑𖽶𖾑 𖼣𖽴 𖼊𖽑𖽡 𖼊𖽝𖾐 𖼍𖽙𖾑，𖼰𖽡𖾐 𖼖𖽪𖾑 𖼂𖽚 𖼐𖽑𖽡 𖼊𖽝𖾐 𖼞𖽜 𖼮𖽡 𖼽𖽡𖾑 𖼳𖽳𖾐 𖼮𖽡𖽺 𖼊𖽑𖽺 𖼊𖽴 𖼖𖽡𖾐． 20 𖼰𖽡𖾐 𖼖𖽪𖾑 𖼂𖽚 𖼐𖽑𖽡 𖼊𖽝𖾐 𖼊𖽪𖾐 𖼖𖽦 𖼀𖽑𖽺𖾐 𖼍𖽪𖾐，𖼮𖽡 𖼽𖽡𖾑 𖼳𖽳𖾐 𖼮𖽡𖽺 𖼊𖽑𖽺 𖼀𖽜𖾐 𖼍𖽡，𖼰𖽡𖾐 𖼖𖽪𖾑 𖼂𖽚 𖼞𖽳𖾐 𖼮𖽑𖽻𖾐 𖼄𖽦𖾐 𖼰𖽻𖾐 𖼷𖽙𖾐 𖼖𖽙𖾐 𖼞𖽳𖾐 𖼀𖽳 𖼖𖽻𖾐，𖼀𖽑𖽡𖽻 𖼰𖽻𖾐 𖼺𖽺𖾑 𖼮𖽡 𖼽𖽡𖾑 𖼳𖽳𖾐 𖼮𖽡𖽺 𖼞𖽳𖾐 𖼀𖽳 𖼠𖽚 𖼖𖽡𖾐． 21 𖼐𖽑𖽡𖾐 𖼮𖽡 𖼽𖽡𖾑 𖼳𖽳𖾐 𖼮𖽡𖽺 𖼀𖽑𖽨 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼊𖽑𖽺 𖼍𖽙𖾑 𖼖𖽡𖾐，𖼦𖽑𖽔𖾐 𖼖𖽺𖾑 𖼣𖽙𖾐 𖼖𖽪 𖼐𖽑𖽡𖾐 𖼊𖽑𖽺 𖼞𖽜 𖼺𖽪𖾐 𖼷𖽑𖽦𖾐 𖼮𖽡𖽺𖾐 𖼀𖽑𖽡 𖼀𖽑𖽨 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼞𖽑𖽶𖾐 𖼰𖽡𖽺𖾐 𖼖𖽡𖾐． 22 𖼣𖽙𖾐 𖼞𖽑𖽶𖾑 𖼠𖽻𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼻𖽶𖾑 𖼊𖽻𖾐，𖼣𖽙𖾐 𖼦𖽑𖽔𖾐 𖼖𖽺𖾑 𖼰𖽡𖾐 𖼖𖽪𖾑 𖼂𖽚 𖼐𖽑𖽡 𖼊𖽝𖾐 𖼠𖽻𖾐 𖼊𖽑𖽺 𖼞𖽳𖾐 𖼮𖽡 𖼽𖽡𖾑 𖼳𖽳𖾐 𖼮𖽡𖽺 𖼊𖽑𖽺 𖼮𖽑𖽻𖾐，𖼣𖽙𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼞𖽑𖽙𖾐 𖼐𖽪𖾑 𖼍𖽴𖾑 𖼊𖽻𖾐 𖼞𖽳𖾐 𖼄𖽡𖽻 𖼮𖽨𖾐，𖼐𖽑𖽡𖾐 𖼊𖽑𖽺 𖼀𖽦𖾐 𖼊𖽑𖽧 𖼊𖽻𖾐．

𖼹𖽙𖾐 𖼹𖽶𖾐 𖼞𖽳𖾐 𖼠𖽴𖾐 𖼮𖽑𖽡𖽻𖾐 ( 𖼊𖽚𖾐 37：10-16)

23 𖼐𖽑𖽡𖾐 𖼮𖽑𖽪 𖼠𖽴𖾐 𖼺𖽧𖾐 𖼻𖽜 𖼹𖽙𖾐 𖼹𖽶𖾐 𖼊𖽑𖽡 𖼀𖽑𖽦 𖼹𖽸𖾑 𖼖𖽡𖾐，𖼳𖽶𖾐 𖼞𖽳𖾐 𖼐𖽑𖽡 𖼖𖽦 𖼞𖽚，𖼞𖽑𖽫𖾐 𖼞𖽳𖾐 𖼊𖽑𖽡 𖼖𖽦 𖼞𖽚，𖼄𖽶𖾐 𖼞𖽳𖾐 𖼊𖽑𖽡 𖼖𖽦 𖼞𖽚 𖼂𖽕 𖼮𖽻𖾐 𖼖𖽡𖾐． 24 𖼐𖽑𖽡𖾐 𖼳𖽳𖾐 𖼠𖽕𖾐 𖼰𖽶𖾐 𖼻𖽜 𖼹𖽙𖾐 𖼹𖽶𖾐 𖼊𖽑𖽺 𖼂𖽻𖾐 𖼍𖽡 𖼖𖽡𖾐，𖼹𖽙𖾐 𖼹𖽶𖾐 𖼖𖽡𖾐 𖼣𖽴 𖼳𖽳𖾐 𖼀𖽑𖽡 𖼍𖽴𖾑 𖼖𖽡𖾐． 25 𖼹𖽙𖾐 𖼹𖽶𖾐 𖼊𖽑𖽺 𖼖𖽡𖾐 𖼣𖽴 𖼞𖽳𖾐 𖼖𖽦 𖼠𖽻𖾐 𖼊𖽑𖽻𖾐 𖼞𖽑𖽫𖾐 𖼮𖽻𖾐 𖼺𖽪𖾐 𖼳𖽳𖾐 𖼀𖽑𖽡 𖼍𖽴𖾑 𖼍𖽪𖾐 𖼖𖽡𖾐． 26-27 𖼐𖽑𖽡𖾐 𖼳𖽳𖾐 𖼠𖽪𖾐 𖼖𖽪𖾐 𖼖𖽡𖾐 𖼊𖽝𖾐 𖼹𖽸𖾑 𖼺𖽺𖾑，𖼀𖽑𖽨 𖼹𖽙𖾐 𖼹𖽶𖾐 𖼀𖽑𖽡 𖼖𖽙𖾐 𖼐𖽳，𖼮𖽑𖽡𖾑 𖼀𖽑𖽦𖾐 𖼖𖽡𖾐 𖼂𖽦𖾐 𖼞𖽳𖾐 𖼖𖽡𖾐 𖼣𖽴 𖼊𖽑𖽺 𖼍𖽴𖾑 𖼖𖽡𖾐，𖼈𖽦𖾑 𖼖𖽜 𖼺𖽳𖾐 𖼳𖽳𖾐 𖼠𖽪𖾐 𖼖𖽪𖾐 𖼞𖽑𖽶𖾐 𖼰𖽡𖽺𖾐 𖼺𖽺𖾑 𖼈𖽦𖾑 𖼺𖽜 𖼖𖽡𖾐． 28 𖼐𖽑𖽡𖾐 𖼮𖽑𖽪 𖼠𖽴𖾐 𖼺𖽧𖾐 𖼻𖽜 𖼹𖽙𖾐 𖼹𖽶𖾐 𖼈𖽦𖾑 𖼖𖽜 𖼐𖽑𖽡 𖼂𖽻𖾐 𖼹𖽸𖾑，𖼦𖽑𖽔𖾐 𖼖𖽺𖾑 𖼳𖽳𖾐 𖼠𖽕𖾐 𖼰𖽶𖾐 𖼻𖽜 𖼂𖽻𖾐 𖼊𖽡 𖼖𖽡𖾐，𖼹𖽙𖾐 𖼹𖽶𖾐 𖼈𖽦𖾑 𖼖𖽚𖾐 𖼂𖽚𖾐 𖼂𖽺𖾐． 29 𖼐𖽑𖽡𖾐 𖼳𖽳𖾐 𖼠𖽕𖾐 𖼰𖽶𖾐 𖼻𖽜 𖼺𖽺𖾑，𖼹𖽙𖾐 𖼹𖽶𖾐 𖼞𖽳𖾐 𖼻𖽜 𖼖𖽚𖾐 𖼂𖽚𖾐 𖼺𖽡𖾑 𖼀𖽑𖽦 𖼖𖽦、 𖼮𖽶𖾐 𖼀𖽳 𖼰𖽡𖽺𖾐 𖼀𖽡𖽳𖾐 𖼐𖽺𖾐 𖼂𖽕𖾐 𖼖𖽦 𖼻𖽙 𖼮𖽶𖾐 𖼀𖽳 𖼍𖽡𖾐 𖼮𖽡𖽺𖾐 𖼻𖽜 𖼖𖽚𖾐 𖼂𖽚𖾐 𖼀𖽡𖽳𖾐 𖼹𖽸𖾑 𖼖𖽡𖾐． 30 𖼐𖽑𖽡𖾐 𖼍𖽡𖾐 𖼖𖽚𖾐 𖼂𖽚𖾐 𖽃𖽔𖾑 𖼂𖽻𖾐 𖼻𖽳𖾐 𖼻𖽳𖾐 𖼈𖽺𖾐 𖼺𖽺𖾑，𖼣𖽙𖾐 𖽃𖽙𖾑 𖼄𖽺 𖼮𖽡𖽺 𖼹𖽙𖾐 𖼹𖽶𖾐 𖼊𖽑𖽺 𖼍𖽦𖾐 𖼖𖽡𖾐．

𖼀𖽙𖾐 𖼷𖽻𖾐 𖼞𖽳𖾐 𖼠𖽴𖾐 𖼮𖽑𖽡𖽻𖾐 (𖼊𖽚𖾐 37： 17-24)

31 𖼐𖽑𖽡𖾐 𖼳𖽳𖾐 𖼠𖽕𖾐 𖼰𖽶𖾐 𖼻𖽜 𖼀𖽙𖾐 𖼷𖽻𖾐 𖼊𖽑𖽡 𖼷𖽻𖾐 𖼹𖽸𖾑 𖼖𖽡𖾐． 𖼖𖽻𖾐 𖼊𖽑𖽪𖾐 𖼻𖽜 𖼺𖽺𖾑，𖼀𖽙𖾐 𖼷𖽻𖾐 𖼊𖽑𖽻𖾐、 𖼀𖽙𖾐 𖼷𖽻𖾐 𖼈𖽶、 𖼀𖽙𖾐 𖼷𖽻𖾐 𖼊𖽑𖽺 𖼊𖽝 𖼍𖽴𖾑 𖼺𖽪𖾐 𖼈𖽦𖾐 𖼖𖽪𖾐 𖼹𖽚𖾐 𖼄𖽦𖾐、 𖼈𖽦𖾐 𖼖𖽪𖾐 𖼀𖽑𖽦 𖼐𖽺𖾐 𖼈𖽦𖾐 𖼖𖽪𖾐，𖼄𖽳𖾑 𖼄𖽳 𖼳𖽳𖾐 𖼊𖽑𖽡 𖼊𖽝 𖼍𖽺𖾑 𖼻𖽜 𖼷𖽙𖾐 𖼖𖽙𖾐 𖼊𖽴 𖼐𖽺𖾐 𖼊𖽝 𖼊𖽑𖽧 𖼖𖽻𖾐 𖼖𖽡𖾐． 32 𖼀𖽙𖾐 𖼷𖽻𖾐 𖼈𖽶 𖼞𖽳𖾐 𖼐𖽑𖽡 𖼀𖽳 𖼮𖽑𖽻𖾐 𖼠𖽕𖾑 𖼖𖽦 𖼮𖽑𖽡𖽚 𖼠𖽕𖾑 𖼮𖽡𖽺𖾐 𖼊𖽑𖽧 𖼖𖽻𖾐，𖼊𖽑𖽡 𖼀𖽳 𖼺𖽙𖾐 𖼠𖽕𖾑 𖼮𖽻𖾐 𖼖𖽡𖾐． 33 𖼠𖽕𖾑 𖼖𖽦 𖼞𖽑𖽙𖾐 𖼣𖽻𖾐，𖼊𖽑𖽡 𖼠𖽕𖾑 𖼊𖽑𖽺 𖼺𖽳 𖼀𖽑𖽳 𖼈𖽦𖾐 𖼖𖽙𖾐 𖼺𖽶𖾑 𖼺𖽪𖾐 𖼈𖽦𖾐 𖼖𖽪𖾐 𖼺𖽙𖾐 𖼀𖽑𖽸𖾐 𖼊𖽝 𖼍𖽦𖾐 𖼖𖽡𖾐，𖼈𖽦𖾐 𖼖𖽪𖾐 𖼀𖽑𖽦 𖼐𖽺𖾐 𖼈𖽦𖾐 𖼖𖽪𖾐 𖼹𖽚𖾐 𖼄𖽦𖾐 𖼖𖽺𖾑 𖼮𖽻𖾐 𖼖𖽡𖾐，𖼮𖽑𖽡𖽚 𖼠𖽕𖾑 𖼖𖽦 𖼐𖽺𖾐 𖼦𖽑𖽺𖾑 𖼻𖽻𖾐 𖼂𖽺𖾐 𖼖𖽡𖾐． 34 𖼀𖽙𖾐 𖼷𖽻𖾐 𖼈𖽶 𖼊𖽑𖽺 𖼺𖽳 𖼀𖽑𖽳 𖼈𖽦𖾐 𖼖𖽙𖾐 𖼺𖽶𖾑 𖼺𖽪𖾐 𖼈𖽦𖾐 𖼖𖽪𖾐 𖼖𖽡𖾐 𖼀𖽑𖽸𖾐 𖼊𖽝 𖼍𖽦𖾐 𖼖𖽡𖾐，𖼈𖽦𖾐 𖼖𖽪𖾐 𖼀𖽑𖽦 𖼐𖽺𖾐 𖼈𖽦𖾐 𖼖𖽪𖾐 𖼹𖽚𖾐 𖼄𖽦𖾐 𖼖𖽺𖾑 𖼮𖽻𖾐 𖼖𖽡𖾐． 35 𖼀𖽙𖾐 𖼷𖽻𖾐 𖼈𖽶 𖼊𖽑𖽺 𖼠𖽕𖾑 𖼖𖽦 𖼮𖽡𖽺𖾐 𖼊𖽑𖽧 𖼖𖽻𖾐 𖼞𖽳𖾐 𖼺𖽙𖾐 𖼍𖽚 𖽂𖽚 𖼞𖽑𖽶𖾐 𖼄𖽻𖾑，𖼊𖽑𖽡 𖼍𖽚 𖼞𖽳𖾐 𖼈𖽦𖾐 𖼖𖽪𖾐 𖼊𖽑𖽡 𖼀𖽑𖽸𖾐 𖼮𖽻𖾐 𖼖𖽡𖾐． 36 𖼈𖽦𖾐 𖼖𖽪𖾐 𖼐𖽺𖾐 𖼠𖽕𖾑 𖼖𖽦 𖼞𖽑𖽶𖾑 𖼀𖽙𖾐 𖼷𖽻𖾐 𖼖𖽙𖾐 𖼊𖽴 𖼖𖽡𖾐，𖼳𖽳𖾐 𖼠𖽕𖾐 𖼰𖽶𖾐 𖼊𖽑𖽡 𖼀𖽑𖽡 𖼍𖽺𖾑 𖼻𖽜 𖽂𖽙𖾐 𖼊𖽝 𖼊𖽙𖾐． 37 𖼐𖽑𖽡𖾐 𖼀𖽙𖾐 𖼊𖽪𖾐 𖼳𖽶 𖼊𖽝𖾐 𖼹𖽸𖾑 𖼺𖽺𖾑，𖼀𖽑𖽨 𖼀𖽙𖾐 𖼷𖽻𖾐 𖼊𖽑𖽺 𖼍𖽦𖾐，𖼀𖽜𖾐 𖼖𖽜𖾐 𖼊𖽚𖾐 𖽃𖽙𖾑 𖼄𖽺 𖼀𖽳 𖼄𖽡𖽻𖾐 𖼖𖽡𖾐． 38 𖼐𖽑𖽡𖾐 𖼳𖽳𖾐 𖼠𖽕𖾐 𖼰𖽶𖾐 𖼻𖽜 𖼺𖽺𖾑，𖼀𖽙𖾐 𖼊𖽪𖾐 𖼊𖽑𖽺 𖼷𖽑𖽳 𖼠𖽙𖾐 𖼳𖽙𖾐 𖼖𖽚𖾐 𖼂𖽚𖾐 𖼹𖽦 𖼍𖽻𖾐 \fr 25．38 \ft “𖼹𖽦 𖼍𖽻𖾐 ”𖼦𖽑𖽺𖾑 “𖼷𖽕 𖼍𖽺𖾐” 𖼣𖽻𖾐 𖼐𖽺𖾐 𖼺𖽡𖾑 𖼀𖽑𖽦 𖼖𖽦 𖼹𖽸𖾑 𖼖𖽡𖾐． 39 𖼀𖽙𖾐 𖼷𖽻𖾐 𖼐𖽺𖾐 𖼄𖽡𖽻 𖼐𖽑𖽡 𖼻𖽜 𖼊𖽪𖾐 𖼦𖽑𖽺𖾑 𖼹𖽻𖾐 𖼹𖽸𖾑 𖼞𖽑𖽶𖾑 𖼮𖽶𖾐，𖼳𖽳𖾐 𖼠𖽕𖾐 𖼰𖽶𖾐 𖼺𖽪𖾐 𖼺𖽙𖾐 𖼷𖽑𖽡𖾐 𖼣𖽙 𖼰𖽡𖾐 𖼻𖽜 𖼹𖽸𖾑 𖼖𖽡𖾐．

40 𖼐𖽑𖽡𖾐 𖼹𖽳𖾐 𖼄𖽙𖾐 𖼷𖽜𖾐 𖼍𖽳𖾐 𖼖𖽡𖾐，𖼣𖽙𖾐 𖽂𖽙 𖼰𖽡𖽺𖾐 𖼊𖽑𖽺 𖼮𖽻𖾐 𖼐𖽑𖽡𖾐 𖼊𖽑𖽺 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐 𖼂𖽺𖾐 𖼖𖽡𖾐．