𖼺𖽶 𖼻𖽜 𖼄𖽳𖾐 𖼷𖽑𖽦𖾐
24
1 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼊𖽦𖾐 𖼖𖽻𖾐 𖼖𖽡𖾐． 𖼐𖽑𖽡𖾐 𖼐𖽺𖾐 𖼽𖽕𖾑 𖼖𖽪𖽦、 𖼐𖽕 𖼍𖽕、 𖼽𖽕𖾑 𖼂𖽡 𖼦𖽪𖾑 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽳 𖼄𖽻 𖼳𖽶 𖼷𖽑𖽡𖾐 𖼽𖽚𖾐，𖼄𖽳𖾑 𖼄𖽳 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼊𖽦𖾐 𖼖𖽻𖾐，𖼄𖽡𖾐 𖼈𖽡 𖼈𖽡 𖼮𖽻𖾐 𖼣𖽙𖾐 𖼊𖽑𖽺 𖼊𖽑𖽴 𖼖𖽡𖾐． 2 𖼐𖽑𖽡𖾐 𖼊𖽑𖽡 𖼽𖽚𖾐 𖼍𖽺𖾑 𖼺𖽜 𖼣𖽙𖾐 𖼖𖽙𖾐 𖽂𖽙𖾐 𖼐𖽳 𖼖𖽻𖾐 𖼊𖽙𖾐，𖼽𖽻 𖼈𖽳𖾐 𖼞𖽜 𖽂𖽙𖾐 𖼐𖽳 𖼖𖽻𖾐 𖼄𖽔 𖼊𖽙𖾐，𖼷𖽑𖽻𖾐 𖼀𖽺 𖼖𖽺𖾑 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖽂𖽙𖾐 𖼊𖽦𖾐 𖼖𖽻𖾐 𖼄𖽔 𖼊𖽙𖾐．”3 𖼄𖽚 𖼳𖽡𖾐 𖽂𖽙 𖼰𖽡𖽺𖾐 𖼮𖽑𖽻𖾐 𖼹𖽺𖾐 𖼖𖽻𖾐，𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽪𖾑 𖼊𖽻 𖼐𖽺𖾐 𖼳𖽪𖾐 𖼮𖽨𖾐 𖼀𖽦𖾐 𖼷𖽑𖽻𖾐 𖼀𖽺 𖼖𖽙𖾐 𖼊𖽑𖽧． 𖼷𖽑𖽻𖾐 𖼀𖽺 𖼄𖽳𖾑 𖼄𖽳 𖼊𖽻 𖼞𖽑𖽚 𖼀𖽦𖾐：“𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼄𖽪𖾑 𖼍𖽴𖾑 𖼺𖽪𖾐，𖼣𖽙𖾐 𖼈𖽳𖾐 𖼷𖽑𖽜𖾑 𖼷𖽑𖽜𖾐 𖼳𖽪𖾐 𖼊𖽻𖾐． ”
4 𖼄𖽚 𖼳𖽡𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼊𖽻 𖼂𖽪𖾑 𖼞𖽑𖽙𖾐 𖼣𖽻𖾐 𖼈𖽝 𖼹𖽺𖾐 𖼖𖽻𖾐，𖼷𖽑𖽶𖾐 𖼐𖽦 𖼍𖽪𖾐 𖼖𖽻𖾐，𖽂𖽙 𖼰𖽡𖽺𖾐 𖼞𖽑𖽶𖾐 𖼞𖽳𖾐 𖼍𖽡𖾐 𖼷𖽻𖾐 𖼊𖽑𖽡 𖼷𖽻𖾐 𖼷𖽑𖽧𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼷𖽑𖽡𖾐 𖼐𖽑𖽡 𖼮𖽑𖽪𖾐 𖼳𖽶 𖼖𖽙𖾐 𖼮𖽑𖽻𖾐，𖼖𖽚𖾐 𖼻𖽶𖾐 𖼷𖽑𖽡𖾐 𖼐𖽑𖽡 𖼮𖽑𖽡𖾐 𖼰𖽻 𖼞𖽑𖽻𖾑 𖼍𖽳𖾐． 5 𖼦𖽑𖽔𖾐 𖼖𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼠𖽻𖾐 𖼞𖽑𖽶𖾐 𖼷𖽑𖽻𖾐 𖼖𖽦𖾑 𖼻𖽙 𖼊𖽑𖽺 𖼹𖽡𖾐 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐，𖼹𖽦𖾑 𖼐𖽑𖽡 𖼺𖽦 𖼺𖽺𖾑 𖼺𖽙𖾑 𖼺𖽙𖾐 𖼍𖽡𖾐 𖼮𖽡𖽺𖾐 𖼂𖽺𖾐，𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜． 6 𖼄𖽚 𖼳𖽡𖾐 𖼮𖽡𖽺 𖼺𖽶 𖼊𖽑𖽡 𖼀𖽑𖽦𖾐 𖼈𖽺𖾐 𖼖𖽻 𖼠𖽻𖾐 𖼞𖽑𖽶𖾐 𖼰𖽡𖽺𖾐，𖼹𖽦𖾑 𖼠𖽳𖾐 𖼖𖽪𖾐 𖼞𖽑𖽶𖾑 𖼊𖽑𖽡 𖼀𖽑𖽦𖾐 𖼈𖽺𖾐 𖼍𖽡𖾐 𖼷𖽻𖾐 𖼊𖽑𖽺 𖼦𖽜．
7 𖼽𖽻 𖼹𖽦𖾑 𖼄𖽳𖾐 𖼷𖽑𖽦𖾐 𖼺𖽪𖾑 𖼈𖽺𖾐 𖼂𖽻𖾐 𖼖𖽻𖾐，𖼷𖽻𖾐 𖼷𖽑𖽻𖾐 𖼀𖽺 𖼊𖽑𖽺 𖼰𖽨𖾐． 𖼷𖽑𖽻𖾐 𖼀𖽺 𖼀𖽦𖾐：“𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼄𖽪𖾑 𖼍𖽴𖾑 𖼺𖽪𖾐 𖼣𖽙𖾐 𖼈𖽳𖾐 𖼷𖽑𖽜𖾑 𖼷𖽑𖽜𖾐 𖼳𖽪𖾐 𖼊𖽻𖾐．”
8 𖽃𖽔𖾐 𖼺𖽺𖾑，𖼄𖽚 𖼳𖽡𖾐 𖼐𖽑𖽡 𖼺𖽶 𖼈𖽺𖾐 𖼂𖽻𖾐 𖼖𖽻𖾐 𖼷𖽑𖽻𖾐 𖼀𖽺 𖼞𖽶𖾐 𖼮𖽑𖽶 𖼊𖽑𖽺 𖼦𖽜，𖼀𖽦𖾐：“𖼐𖽦𖾐 𖼄𖽺! 𖼐𖽑𖽡 𖼺𖽶 𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼞𖽑𖽙𖾐 𖼄𖽳𖾐 𖼷𖽑𖽦𖾐 𖼞𖽳𖾐 𖼺𖽙 𖼣𖽻𖾐．
9 𖼠𖽙𖾑 𖼍𖽻𖾐 𖼄𖽚 𖼳𖽡𖾐、 𖼽𖽕𖾑 𖼖𖽪𖽦、 𖼐𖽕 𖼍𖽕、 𖼽𖽕𖾑 𖼂𖽡 𖼦𖽪𖾑 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽳 𖼄𖽻 𖼳𖽶 𖼷𖽑𖽡𖾐 𖼽𖽚𖾐，𖼄𖽳𖾑 𖼄𖽳 𖽂𖽙 𖼰𖽡𖽺𖾐 𖼊𖽑𖽺 𖼊𖽦𖾐 𖼽𖽡𖾐 𖼦𖽑𖽙𖾐． 10 𖼽𖽻 𖼈𖽳𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼄𖽡𖽻𖾐． 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼮𖽑𖽡𖾑 𖼀𖽑𖽦𖾐 𖼊𖽑𖽚 𖼞𖽳𖾐 𖼀𖽑𖽶 𖼊𖽴 𖼖𖽚𖾐 𖼖𖽕𖾑 𖼖𖽕 𖼖𖽙𖾐 𖼺𖽶𖾑 𖼞𖽑𖽶𖾑 𖼳𖽶 𖼞𖽑𖽻 𖼍𖽳𖾐，𖼄𖽶 𖼠𖽻𖾐 𖼖𖽙𖾐 𖼺𖽶𖾑 𖼮𖽡𖾑 𖼮𖽡𖾐 𖼮𖽻𖾐． 11 𖽂𖽙 𖼺𖽙𖾐 𖼂𖽙𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼈𖽪𖾑 𖼷𖽪𖾐 𖼦𖽑𖽺𖾑 𖼹𖽻𖾐 𖼊𖽑𖽺 𖼄𖽔 𖼦𖽹𖾑 𖼺𖽺𖾑，𖼽𖽻 𖼈𖽳𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼐𖽦𖾐 𖼄𖽡𖽻𖾐，𖼦𖽑𖽔𖾐 𖼖𖽺𖾑 𖼷𖽙 𖼷𖽙 𖼊𖽻𖾐 𖼊𖽻𖾐．
𖼄𖽚 𖼳𖽡𖾐 𖼳𖽡𖾐 𖼐𖽦𖾑 𖽂𖽙 𖼰𖽡𖽺𖾐 𖼊𖽑𖽺 𖼮𖽻𖾐
12 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼊𖽦𖾐 𖼖𖽻𖾐，𖼦𖽑𖽺𖾑 𖼠𖽻𖾐 𖼦𖽦，𖼣𖽙𖾐 𖼳𖽪𖾐 𖼮𖽨𖾐 𖼐𖽺𖾐 𖼷𖽑𖽦𖾐 𖼮𖽡𖽺𖾐 𖼈𖽝 𖼖𖽚𖾐 𖼀𖽑𖽡 𖼊𖽑𖽺 𖼍𖽦𖾐 𖼺𖽺𖾑 𖼐𖽑𖽡𖾐 𖼊𖽑𖽺 𖼞𖽜 𖼊𖽻𖾐，𖼐𖽑𖽡𖾐 𖼞𖽜 𖼷𖽑𖽻𖾐 𖼀𖽺 𖼊𖽑𖽺 𖽂𖽙𖾐 𖼄𖽪𖾑 𖼍𖽴𖾑 𖼊𖽙𖾐．” 13 𖽃𖽔𖾐 𖼺𖽺𖾑，𖼄𖽚 𖼳𖽡𖾐 𖼐𖽺𖾐 𖼽𖽻 𖼞𖽳𖾐 𖼹𖽡𖾐 𖼖𖽦 𖼽𖽱𖾐 𖼳𖽪𖾐 𖼽𖽕𖾑 𖼂𖽺𖾐 𖼳𖽡𖽻𖾐 𖼀𖽑𖽢，𖼄𖽚 𖼳𖽡𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖽂𖽙 𖼰𖽡𖽺𖾐 𖼊𖽑𖽺 𖼊𖽦𖾐 𖼽𖽡𖾐．
14 𖼦𖽑𖽻𖾐 𖼊𖽑𖽻𖾐，𖼄𖽚 𖼳𖽡𖾐 𖼮𖽳 𖼄𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼦𖽑𖽺𖾑 𖼠𖽻𖾐 𖼮𖽻𖾐 𖼣𖽙𖾐 𖼈𖽳𖾐 𖼊𖽑𖽺 𖼳𖽡𖽻𖾐，𖼣𖽙𖾐 𖼈𖽳𖾐 𖼀𖽑𖽚𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖼞𖽚 𖼖𖽻𖾐 𖼰𖽶𖾐 𖼮𖽑𖽡𖾐 𖼖𖽡𖾐． 𖼐𖽦𖾐 𖼄𖽺! 𖼦𖽑𖽺𖾑 𖼠𖽻𖾐 𖼽𖽕𖾑 𖼖𖽪𖽦 𖼐𖽺𖾐 𖼦𖽪𖾑 𖽃𖽳 𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼮𖽻𖾐，𖼞𖽑𖽙𖾐 𖼷𖽙𖾐 𖼖𖽙𖾐 𖼍𖽶𖾐 𖼞𖽳𖾐 𖼄𖽡𖽻 𖼮𖽨𖾐 𖼮𖽻𖾐 𖼺𖽪𖾐，𖼽𖽡𖾐 𖼺𖽺𖾑 𖼽𖽻 𖼈𖽳𖾐 𖼞𖽳𖾐 𖼦𖽑𖽺 𖼽𖽡𖾐 𖼊𖽙𖾐．”
15 𖼄𖽚 𖼳𖽡𖾐 𖽂𖽙 𖼰𖽡𖽺𖾐 𖼊𖽑𖽺 𖼊𖽦𖾐 𖼽𖽡𖾐 𖼦𖽑𖽙𖾐，𖽂𖽙 𖼰𖽡𖽺𖾐 𖼊𖽑𖽺 𖼍𖽡𖾐 𖼮𖽑𖽙𖾐 𖼂𖽡𖾑 𖼻𖽶𖾐． 16 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽶 𖼳𖽳𖾐 𖼳𖽡𖾐 𖼐𖽦𖾑 𖽂𖽙 𖼰𖽡𖽺𖾐 𖼊𖽑𖽺 𖼰𖽻𖾑 𖼍𖽡，𖼍𖽡𖾐 𖼮𖽑𖽙𖾐 𖽂𖽙 𖼰𖽡𖽺𖾐 𖼊𖽑𖽺 𖼮𖽑𖽡𖽚 𖼐𖽑𖽡𖾐 𖼂𖽡𖾑 𖼍𖽡 𖼦𖽑𖽻𖾐． 𖼳𖽶 𖼐𖽑𖽡𖾐 𖼞𖽑𖽶𖾑 𖼊𖽑𖽡𖾐 𖼐𖽑𖽡𖾐，𖼽𖽺𖾐 𖼦𖽴 𖼦𖽫 𖼍𖽡𖾐 𖼮𖽑𖽙𖾐 𖼠𖽻𖾐 𖼞𖽑𖽶𖾐 𖼄𖽚 𖼳𖽡𖾐 𖼊𖽑𖽺 𖽃𖽶𖾐． 17 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼐𖽦𖾐 𖼄𖽡𖽻𖾐，𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽶 𖼳𖽳𖾐 𖽂𖽙 𖼰𖽡𖽺𖾐 𖼈𖽪𖾑 𖼖𖽚𖾐 𖼊𖽑𖽺 𖼮𖽻𖾐，𖼞𖽑𖽶𖾑 𖽃𖽔𖾐 𖼍𖽚𖾑 𖼖𖽜𖾐 𖼍𖽪𖾐 𖼖𖽻𖾐 𖼖𖽙𖾐 𖼺𖽶𖾑． 18 𖼄𖽚 𖼳𖽡𖾐 𖼍𖽡𖾐 𖼮𖽑𖽙𖾐 𖼞𖽑𖽶𖾐 𖼊𖽡 𖼽𖽡𖾐，𖽂𖽙 𖼰𖽡𖽺𖾐 𖼊𖽑𖽺 𖼖𖽡𖾐 𖼷𖽑𖽡𖾐 𖼐𖽑𖽡𖾐 𖼖𖽡𖾐 𖼷𖽑𖽡𖾐 𖼦𖽑𖽦 𖼮𖽻𖾐 𖼦𖽑𖽙𖾐．