𖼄𖽡𖽻 𖼦𖽑𖽺 𖼀𖽳𖾐 𖼈𖽡𖾐 𖼖𖽙𖾐 𖼮𖽑𖽻𖾐 𖼖𖽡𖾐
23
1 𖼖𖽳𖾐 𖼖𖽪𖾐 𖼊𖽻 𖽂𖽙𖾐 𖼊𖽑𖽜𖾐 𖼄𖽔 𖼊𖽙𖾐，𖼷𖽑𖽻𖾐 𖼊𖽶𖾐 𖼖𖽙𖾐 𖼮𖽑𖽻𖾐 𖼮𖽨 𖼄𖽡𖽻𖾐 𖼠𖽕𖾐 𖼄𖽔 𖼰𖽶𖾐 𖽂𖽙𖾐 𖼂𖽺𖾐 𖼄𖽔 𖼊𖽙𖾐．2 𖼷𖽑𖽻𖾐 𖼷𖽪𖾐 𖼖𖽙𖾐 𖼮𖽑𖽻𖾐 𖼊𖽶𖾐 𖼄𖽡𖽻 𖼂𖽺𖾐 𖼄𖽔 𖼊𖽙𖾐，𖼷𖽙𖾐 𖼖𖽙𖾐 𖼍𖽶𖾐 𖼞𖽳𖾐 𖼄𖽡𖽻 𖼮𖽨𖾐 𖼊𖽑𖽺 𖼷𖽑𖽻𖾐 𖼄𖽨 𖼖𖽙𖾐 𖼮𖽻𖾑 𖼊𖽴 𖼺𖽺𖾑，𖼀𖽳𖾐 𖼈𖽡𖾐 𖼖𖽙𖾐 𖼄𖽔 𖼮𖽑𖽻𖾐 𖽂𖽙𖾐 𖼂𖽺𖾐 𖼄𖽔 𖼊𖽙𖾐． 3 𖼦𖽑𖽔𖾐 𖼖𖽺𖾑 𖼷𖽑𖽻𖾐 𖼷𖽙𖾐 𖼖𖽙𖾐 𖼍𖽶𖾐 𖼞𖽳𖾐 𖼄𖽡𖽻 𖼮𖽨𖾐，𖼖𖽡 𖼮𖽨𖾐 𖼖𖽙𖾐 𖼄𖽔 𖼮𖽑𖽻𖾐 𖼄𖽙𖾐 𖼷𖽑𖽻𖾐 𖼳𖽚𖾑 𖼀𖽑𖽙 𖼊𖽑𖽺 𖼍𖽺𖾑 𖼂𖽻𖾐 𖼮𖽨𖾐 𖼄𖽔 𖼊𖽙𖾐．
4 𖼐𖽑𖽡𖾐 𖼮𖽡𖾐 𖼂𖽦𖾐 𖼞𖽳𖾐 𖼐𖽑𖽡 𖼣𖽻𖾐 𖼦𖽻，𖼊𖽑𖽳 𖼖𖽳𖾐 𖼄𖽪 𖼣𖽻𖾐 𖼦𖽻，𖼀𖽑𖽧 𖼦𖽑𖽙𖾐 𖼺𖽺𖾑 𖼐𖽑𖽡𖾐 𖼮𖽑𖽢𖾑 𖼄𖽡𖽻𖾐 𖼊𖽑𖽡𖾑 𖼣𖽻𖾐，𖼺𖽶𖾐 𖼞𖽚 𖼖𖽻𖾐 𖼽𖽻 𖼊𖽑𖽺 𖼞𖽜 𖼖𖽡𖾐． 5 𖼐𖽑𖽡𖾐 𖼮𖽡𖾐 𖼂𖽦𖾐 𖼞𖽳𖾐 𖼊𖽑𖽳 𖼖𖽳𖾐 𖼄𖽪 𖼊𖽑𖽺，𖼄𖽪 𖼰𖽡𖽦𖾐 𖼮𖽑𖽢𖾑 𖼐𖽑𖽧𖾑 𖼞𖽑𖽻𖾑 𖼀𖽜 𖼞𖽳𖾐 𖼐𖽦𖾐 𖼄𖽡𖽻𖾐 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖽂𖽙𖾐 𖼺𖽜 𖼽𖽡𖾐 𖼄𖽔 𖼊𖽙𖾐，𖼊𖽑𖽳 𖼖𖽳𖾐 𖼄𖽪 𖼺𖽡 𖼀𖽑𖽙 𖼖𖽙𖾐 𖼂𖽻𖾐 𖼺𖽺𖾑 𖼄𖽪 𖼰𖽡𖽦𖾐 𖼮𖽑𖽳 𖼦𖽑𖽙𖾐 𖼖𖽡𖾐．
6 𖼷𖽙𖾐 𖼖𖽙𖾐 𖼍𖽶𖾐 𖼞𖽳𖾐 𖼄𖽡𖽻 𖼮𖽨𖾐 𖼊𖽑𖽺 𖼖𖽡 𖼮𖽨𖾐 𖼖𖽙𖾐 𖼄𖽔 𖼮𖽑𖽻𖾐 𖼐𖽺𖾐 𖼷𖽑𖽻𖾐 𖼳𖽚𖾑 𖼀𖽑𖽙 𖼊𖽑𖽺 𖼦𖽹𖾑，𖼮𖽶𖾐 𖼊𖽴𖾐 𖼷𖽑𖽻𖾐 𖼳𖽚𖾑 𖼀𖽑𖽙 𖼞𖽜 𖼀𖽶 𖼄𖽔 𖼊𖽙𖾐．
7 𖼄𖽡𖽻 𖼦𖽑𖽺 𖼷𖽶 𖼄𖽻 𖼺𖽙𖾐 𖼊𖽑𖽺 𖽂𖽙𖾐 𖼦𖽹𖾑 𖼄𖽔 𖼊𖽙𖾐，𖼄𖽡𖽻 𖼮𖽨𖾐 𖼖𖽙𖾐 𖼮𖽡 𖼄𖽔 𖼠𖽳𖾐 𖼺𖽪𖾐 𖼷𖽑𖽻𖾐 𖼐𖽺𖾐 𖼷𖽑𖽻𖾐 𖼹𖽳𖾐 𖼊𖽑𖽺 𖽂𖽙𖾐 𖼺𖽦 𖼄𖽔 𖼊𖽙𖾐，𖼞𖽪𖾐 𖼮𖽡𖽺𖾐 𖼣𖽙𖾐 𖼽𖽺𖾐 𖼮𖽑𖽡𖽪𖾑 𖼀𖽑𖽨 𖼺𖽪𖾐 𖼷𖽑𖽻𖾐 𖼊𖽑𖽺 𖼽𖽺𖾐 𖼮𖽑𖽡𖽪𖾑 𖼄𖽔 𖼮𖽻𖾐 𖼐𖽺𖾐 𖼰𖽕 𖼄𖽔 𖼠𖽸𖾑．
8 𖼺𖽙𖾐 𖼞𖽳𖾐 𖽂𖽚𖾑 𖼮𖽜𖾐 𖽂𖽙𖾐 𖼷𖽶𖾐 𖼄𖽔 𖼊𖽙𖾐，𖼞𖽪𖾐 𖼮𖽡𖽺𖾐 𖽂𖽚𖾑 𖼮𖽜𖾐 𖼦𖽑𖽺𖾑 𖼄𖽦𖾐 𖼊𖽪 𖼮𖽡𖾐 𖼺𖽪𖾐 𖼞𖽜 𖼄𖽦 𖼍𖽳𖾐 𖼠𖽸𖾑，𖼦𖽑𖽔𖾐 𖼖𖽺𖾑 𖼷𖽑𖽻𖾐 𖼹𖽳𖾐 𖼞𖽳𖾐 𖼊𖽻 𖼂𖽪𖾑 𖼊𖽑𖽺 𖼹𖽸𖾑 𖼂𖽚𖾐 𖼠𖽸𖾑．
9 𖼣𖽙𖾑 𖼮𖽻𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖽂𖽙𖾐 𖼮𖽑𖽡𖾐 𖼻𖽸 𖼄𖽔 𖼊𖽙𖾐，𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼈𖽳𖾐 𖼖𖽺𖾑 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼣𖽙𖾑 𖼮𖽻𖾐 𖼠𖽚，𖼣𖽙𖾑 𖼮𖽻𖾐 𖼺𖽪𖾐 𖼷𖽑𖽻𖾐 𖼞𖽳𖾐 𖼳𖽚𖾑 𖼞𖽑𖽪 𖼞𖽑𖽶𖾑 𖼐𖽑𖽡𖾐 𖼈𖽳𖾐 𖼺𖽝𖾑 𖼍𖽳𖾐．
𖼳𖽡𖽻𖾐 𖼞𖽑𖽚 𖼐𖽺𖾐 𖼳𖽡𖽻𖾐 𖼐𖽑𖽡𖾐
10 𖼮𖽑𖽡𖽚 𖼞𖽑𖽚 𖼠𖽻𖾐 𖼞𖽑𖽶𖾐 𖼐𖽑𖽡𖾐 𖼈𖽳𖾐 𖼄𖽡𖾐 𖼄𖽙 𖼄𖽡𖾐 𖼳𖽶𖾑 𖼺𖽺𖾑，𖼖𖽚𖾑 𖼄𖽚 𖼠𖽜𖾐 𖼍𖽙𖾑 𖼖𖽡𖾐． 11 𖼦𖽑𖽻𖾐 𖼊𖽑𖽻𖾐，𖼳𖽶 𖼞𖽑𖽚 𖼞𖽑𖽶𖾑 𖼞𖽑𖽚，𖼐𖽑𖽡𖾐 𖼈𖽳𖾐 𖼄𖽡𖾐 𖼮𖽑𖽙𖾐 𖼞𖽜 𖼳𖽡𖽻𖾐 𖼖𖽡𖾐，𖼄𖽙 𖼳𖽶𖾑 𖼄𖽔 𖼊𖽙𖾐，𖼐𖽑𖽡𖾐 𖼈𖽳𖾐 𖼠𖽻𖾐 𖼊𖽑𖽺 𖼷𖽑𖽻𖾐 𖼳𖽚𖾑 𖼀𖽑𖽙 𖼞𖽜 𖽂𖽙𖾐 𖼷𖽙 𖼊𖽙𖾐． 𖼽𖽻 𖼈𖽳𖾐 𖼷𖽙 𖼷𖽺 𖼷𖽺𖾐 𖼺𖽪𖾐，𖼐𖽑𖽡𖾑 𖼻𖽙 𖼣𖽕𖾐 𖼐𖽜𖾐 𖼞𖽜 𖽂𖽙𖾐 𖼷𖽙 𖼊𖽙𖾐，𖼐𖽑𖽡𖾐 𖼈𖽳𖾐 𖼺𖽳 𖼖𖽳 𖼊𖽻𖾐 𖼮𖽑𖽨𖾐 𖼖𖽪𖾐 𖼞𖽪𖾐 𖼐𖽺𖾐 𖽃𖽔 𖼮𖽑𖽙 𖼮𖽑𖽨𖾐 𖼖𖽪𖾐 𖼞𖽪𖾐 𖼞𖽜 𖼖𖽺𖾑 𖼳𖽡𖽻𖾐 𖼖𖽡𖾐．
12 𖼮𖽑𖽡𖽚 𖼐𖽑𖽡𖾐 𖼠𖽻𖾐 𖼞𖽑𖽶𖾐 𖼐𖽑𖽡𖾐 𖼄𖽡𖽻 𖼄𖽪𖾐 𖼖𖽡𖾐，𖼦𖽑𖽻𖾐 𖼊𖽑𖽻𖾐 𖼳𖽶 𖼐𖽑𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼳𖽡𖽻𖾐 𖼐𖽑𖽡𖾐 𖼳𖽪𖾐 𖼖𖽡𖾐． 𖽃𖽔𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼞𖽳𖾐 𖼐𖽑𖽡 𖼐𖽺𖾐 𖼊𖽑𖽳 𖼖𖽳𖾐 𖼄𖽪 𖼖𖽺𖾑 𖽂𖽙𖾐 𖼐𖽙 𖼊𖽙𖾐，𖼦𖽑𖽔𖾐 𖼖𖽺𖾑 𖼐𖽑𖽡𖾐 𖼈𖽳𖾐 𖼀𖽑𖽚𖾐 𖼄𖽙𖾐 𖼞𖽳𖾐 𖼻𖽙 𖼄𖽡𖾐 𖼐𖽜𖾐 𖼐𖽺𖾐 𖼣𖽙𖾑 𖼮𖽻𖾐 𖼺𖽪𖾐 𖼷𖽑𖽻𖾐 𖼖𖽺𖾑 𖽂𖽙𖾐 𖼐𖽙 𖼊𖽙𖾐．
13 𖼣𖽙𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽑𖽙𖾐 𖼄𖽪𖾑 𖼺𖽪𖾐 𖼊𖽻 𖼂𖽪𖾑，𖼐𖽑𖽡𖾐 𖼈𖽳𖾐 𖼐𖽑𖽧𖾐 𖼄𖽙𖾐 𖼊𖽑𖽺 𖼍𖽙𖾑 𖼳𖽪𖾐 𖼖𖽡𖾐． 𖼐𖽑𖽡𖾐 𖼈𖽳𖾐 𖼠𖽳𖾐 𖼖𖽪𖾐 𖼺𖽡𖾐 𖼞𖽳𖾐 𖼄𖽡𖾐 𖼊𖽑𖽺 𖽂𖽙𖾐 𖽃𖽶𖾐 𖼄𖽔 𖼊𖽙𖾐，𖼀𖽦𖾐 𖼷𖽑𖽻𖾐 𖼊𖽑𖽺 𖼖𖽺𖾑 𖽂𖽙𖾐 𖼊𖽑𖽧 𖼄𖽔 𖼊𖽙𖾐．
𖼻𖽦 𖼐𖽑𖽡𖾐 𖼺𖽙𖾐 𖼊𖽝𖾐
14 𖼐𖽑𖽡𖾐 𖼈𖽳𖾐 𖼊𖽑𖽡 𖼞𖽑𖽚 𖼺𖽙𖾐 𖼂𖽦𖾑 𖼣𖽙𖾐 𖼖𖽙𖾐 𖼀𖽙𖾐 𖼻𖽦 𖼐𖽑𖽡𖾐 𖼳𖽪𖾐 𖼖𖽡𖾐． 15 𖼐𖽑𖽡𖾐 𖼈𖽳𖾐 𖼇𖽝𖾐 𖼄𖽶𖾐 𖼷𖽜𖾐 𖼐𖽑𖽡𖾐 𖼦𖽑𖽦 𖼳𖽪𖾐 𖼖𖽡𖾐，𖼣𖽙𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽑𖽙𖾐 𖼄𖽪𖾑 𖼖𖽙𖾐 𖼮𖽑𖽻𖾐，𖼞𖽑𖽚 𖼳𖽸 𖼳𖽨𖾐 𖼠𖽻𖾐 𖼞𖽑𖽶𖾐 𖼞𖽑𖽙𖾐 𖼍𖽧𖾑 𖼷𖽑𖽦𖾐 𖼞𖽳𖾐 𖼐𖽑𖽡𖾐 𖼦𖽑𖽦，𖼇𖽝𖾐 𖼄𖽔 𖼠𖽚 𖼺𖽪𖾐 𖽃𖽔𖾑 𖼂𖽻𖾐 𖼳𖽶 𖼐𖽑𖽡𖾐 𖼷𖽙 𖼖𖽡𖾐． 𖼞𖽪𖾐 𖼮𖽡𖽺𖾐，𖼦𖽑𖽺𖾑 𖼊𖽑𖽡 𖼳𖽨𖾐 𖼐𖽑𖽡𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼊𖽚𖾐 𖼖𖽻𖾐 𖼳𖽶 𖼣𖽻𖾐，𖼐𖽑𖽡𖾐 𖼈𖽳𖾐 𖼣𖽙𖾐 𖼊𖽑𖽺 𖼄𖽡𖽻𖾐 𖼖𖽻𖾐 𖼖𖽦 𖼞𖽻 𖼄𖽔 𖼊𖽙𖾐．
16 𖼦𖽑𖽔𖾐 𖼖𖽺𖾑 𖼐𖽑𖽡𖾐 𖼈𖽳𖾐 𖼄𖽡𖾐 𖼠𖽻𖾐 𖼖𖽚𖾑 𖼄𖽚 𖼠𖽜𖾐 𖼊𖽙𖾐 𖼞𖽑𖽶𖾑 𖼮𖽶𖾐，𖼠𖽜𖾐 𖼷𖽑𖽳 𖼻𖽦 𖼐𖽑𖽡𖾐 𖼳𖽪𖾐 𖼖𖽡𖾐，
𖼹𖽦𖾑 𖼄𖽡𖾐 𖼠𖽻𖾐 𖼖𖽚𖾑 𖼄𖽚 𖼠𖽜𖾐 𖼦𖽑𖽻𖾐，𖼞𖽑𖽚 𖼞𖽶𖾐 𖼞𖽑𖽶𖾑 𖼮𖽶𖾐，𖼰𖽳𖾐 𖼍𖽙𖾑 𖼻𖽦 𖼐𖽑𖽡𖾐 𖼳𖽪𖾐 𖼖𖽡𖾐． 17 𖼐𖽑𖽡𖾐 𖼈𖽳𖾐 𖼞𖽳𖾐 𖼻𖽙 𖼐𖽜𖾐 𖼞𖽑𖽙𖾐 𖼣𖽻𖾐，𖼊𖽑𖽡 𖼞𖽑𖽚𖾑 𖼞𖽑𖽚 𖼻𖽦 𖼐𖽑𖽡𖾐 𖼦𖽑𖽺𖾑 𖼺𖽙𖾐 𖼊𖽝𖾐 𖼞𖽑𖽶𖾐 𖼽𖽡𖾐 𖼺𖽡 𖼀𖽑𖽙 𖼽𖽺𖾐 𖼦𖽴 𖼦𖽫 𖼊𖽑𖽺 𖼍𖽡𖾐 𖼊𖽑𖽴 𖼖𖽡𖾐．
18 𖼐𖽑𖽡𖾐 𖼈𖽳𖾐 𖼍𖽡𖾐 𖼮𖽡𖽺 𖼞𖽳𖾐 𖼺𖽶 𖼐𖽺𖾐 𖼇𖽝𖾐 𖼠𖽚 𖼺𖽪𖾐 𖽃𖽔𖾑 𖼂𖽻𖾐 𖼷𖽙𖾐 𖼖𖽙𖾐 𖼮𖽑𖽻𖾐 𖼻𖽜 𖼣𖽙𖾐 𖼊𖽑𖽺 𖼍𖽡𖾐 𖼄𖽔 𖼊𖽙𖾐，𖼻𖽦 𖼐𖽑𖽡𖾐 𖼍𖽡𖾐 𖼮𖽡𖽺 𖼞𖽳𖾐 𖼷𖽑𖽳𖾐 𖼖𖽺𖾑 𖼹𖽺𖾐 𖼠𖽙𖾑 𖼍𖽻𖾐 𖼊𖽑𖽡 𖼐𖽜𖾐 𖽂𖽙𖾐 𖼮𖽑𖽡𖾐 𖼄𖽔 𖼊𖽙𖾐．
19 𖼄𖽡𖾐 𖼠𖽻𖾐 𖼞𖽑𖽶𖾐 𖽃𖽙𖾑 𖼄𖽺 𖼄𖽡𖾐，𖼦𖽑𖽔𖾐 𖼮𖽶𖾐 𖼹𖽳𖾐 𖼺𖽪𖾐 𖼖𖽚𖾑 𖼄𖽚，𖼦𖽑𖽙𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽑𖽶𖾐 𖼰𖽡𖽺𖾐 𖼖𖽡𖾐．
𖼦𖽑𖽻𖾐 𖼊𖽑𖽻𖾐，𖽃𖽔𖾑 𖼮𖽑𖽸 𖼄𖽙𖾐 𖼀𖽕𖾑 𖼮𖽸𖾐 𖼈𖽡𖾐 𖼻𖽜 𖽃𖽔𖾑 𖼮𖽑𖽸 𖼻𖽙 𖼦𖽙 𖽂𖽙𖾐 𖼰𖽡𖽦𖾑 𖼄𖽔 𖼊𖽙𖾐．
𖼞𖽜 𖼮𖽙𖾐 𖼐𖽺𖾐 𖼄𖽪𖾑 𖼊𖽻
20 𖼐𖽦𖾐 𖼄𖽺! 𖼣𖽙𖾐 𖼹𖽡𖾐 𖼖𖽦 𖼹𖽡𖾐 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽻𖾐 𖼺𖽺𖾑，𖼮𖽨𖾐 𖼄𖽙𖾐 𖼊𖽑𖽺 𖼐𖽑𖽡𖾐 𖼖𖽙𖾐 𖼐𖽦𖾐 𖼳𖽪𖾐，𖼐𖽑𖽡𖾐 𖼊𖽑𖽺 𖼦𖽳 𖼣𖽙𖾐 𖼞𖽑𖽙𖾐 𖼂𖽺𖾐 𖼳𖽡𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼽𖽡𖾐 𖼊𖽻𖾐． 21 𖼐𖽑𖽡𖾐 𖼈𖽳𖾐 𖼽𖽻 𖽃𖽙𖾑 𖼄𖽺 𖼮𖽑𖽡𖽺 𖼷𖽜𖾐 𖼍𖽳𖾐 𖼖𖽡𖾐，𖼽𖽻 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐 𖼖𖽡𖾐，𖼽𖽻 𖼊𖽑𖽺 𖼀𖽑𖽚𖾐 𖼊𖽦 𖼄𖽔 𖼊𖽙𖾐． 𖼄𖽔 𖼣𖽻𖾐 𖼊𖽑𖽡𖾑 𖼣𖽻𖾐，𖼽𖽻 𖼐𖽑𖽡𖾐 𖼈𖽳𖾐 𖼦𖽑𖽙 𖼊𖽪 𖼊𖽑𖽺 𖼄𖽔 𖼄𖽡𖽺 𖼊𖽻𖾐，𖼞𖽪𖾐 𖼮𖽡𖽺𖾐 𖼽𖽻 𖼣𖽙𖾐 𖼄𖽡𖾐 𖼖𖽙𖾐 𖼀𖽙𖾐 𖼖𖽻𖾐 𖼳𖽶 𖼣𖽻𖾐． 22 𖼐𖽑𖽡𖾐 𖼈𖽳𖾐 𖼠𖽕𖾐 𖼰𖽶𖾐 𖼽𖽻 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐，𖼣𖽙𖾐 𖼞𖽑𖽙𖾐 𖼄𖽪𖾑 𖼊𖽻 𖼊𖽑𖽺 𖼳𖽪𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼐𖽑𖽡𖾐 𖼮𖽡𖾐 𖼂𖽦𖾐 𖼊𖽑𖽺 𖼮𖽡𖾐 𖼂𖽦𖾐 𖼰𖽕𖾐 𖼊𖽻𖾐，𖼐𖽑𖽡𖾐 𖼊𖽑𖽺 𖼀𖽨 𖼮𖽳 𖼺𖽪𖾐 𖼊𖽑𖽺 𖼀𖽨 𖼮𖽳 𖼊𖽻𖾐． 23 𖼣𖽙𖾐 𖼞𖽳𖾐 𖼹𖽡𖾐 𖼖𖽦 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼺𖽜 𖼊𖽻𖾐，𖼐𖽑𖽡𖾐 𖼊𖽑𖽺 𖼦𖽳 𖼺𖽺𖾑 𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐、 𖼦𖽴𖾑 𖼮𖽑𖽪𖾐 𖼳𖽶 𖼷𖽑𖽻𖾐、 𖼂𖽡 𖼖𖽡𖾑 𖼳𖽡 𖼮𖽑𖽪𖾐 𖼳𖽶 𖼷𖽑𖽻𖾐、 𖼰𖽡𖽔𖾐 𖼐𖽕 𖼮𖽑𖽪𖾐 𖼳𖽶 𖼷𖽑𖽻𖾐、 𖼳𖽡𖾐 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽺𖾐 𖼽𖽺𖾐 𖼂𖽪𖾑 𖼺𖽶𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼞𖽑𖽶𖾑 𖼠𖽻𖾐 𖼽𖽡𖾐，𖼣𖽙𖾐 𖼞𖽑𖽶𖾑 𖼄𖽡𖾐 𖼊𖽺𖾐 𖼷𖽑𖽻𖾐 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐 𖼊𖽻𖾐． 24 𖼐𖽑𖽡𖾐 𖼽𖽻 𖼈𖽳𖾐 𖼞𖽳𖾐 𖼺𖽡𖾐 𖼮𖽑𖽡𖽻𖾐 𖼊𖽑𖽺 𖽂𖽙𖾐 𖼊𖽑𖽴 𖼄𖽔 𖼊𖽙𖾐，𖼞𖽑𖽶𖾑 𖼊𖽑𖽺 𖽂𖽙𖾐 𖼠𖽙𖾐 𖼳𖽙𖾐 𖼄𖽔 𖼊𖽙𖾐，𖼽𖽻 𖼈𖽳𖾐 𖼞𖽳𖾐 𖼮𖽻𖾐 𖼮𖽡𖽺𖾐 𖼖𖽙𖾐 𖽂𖽙𖾐 𖼷𖽻𖾐 𖼄𖽔 𖼊𖽙𖾐，𖼞𖽚 𖼀𖽑𖽚𖾐 𖼺𖽡𖾐 𖼮𖽑𖽡𖽻𖾐 𖼀𖽑𖽧𖾐 𖼦𖽑𖽙𖾐 𖼖𖽡𖾐，𖼺𖽡𖾐 𖼮𖽑𖽡𖽻𖾐 𖼊𖽴 𖼺𖽪𖾐 𖼻𖽶𖾐 𖼊𖽑𖽺 𖼖𖽺𖾑 𖼊𖽝 𖼮𖽑𖽡𖽦 𖼦𖽑𖽙𖾐 𖼖𖽡𖾐．
25 𖼐𖽑𖽡𖾐 𖼈𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼠𖽙𖾐 𖼳𖽙𖾐 𖼖𖽡𖾐，𖽃𖽔𖾐 𖼺𖽺𖾑，𖼽𖽻 𖼷𖽙 𖼊𖽪𖾐 𖼐𖽺𖾐 𖽃𖽔𖾐 𖼮𖽡𖽦𖾐 𖼖𖽪 𖼐𖽑𖽡𖾐 𖼈𖽳𖾐 𖼊𖽑𖽺 𖼄𖽻𖾑 𖼊𖽻𖾐，𖼐𖽑𖽡𖾐 𖼈𖽳𖾐 𖼞𖽜 𖼐𖽙𖾐 𖼮𖽡𖽻𖾐 𖼄𖽔 𖼷𖽶𖾐 𖼊𖽻𖾐． 26 𖼐𖽑𖽡𖾐 𖼮𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼞𖽑𖽶𖾐，𖼻𖽙 𖼄𖽳 𖼄𖽡𖾐 𖼐𖽜𖾐 𖼞𖽜 𖼄𖽺 𖼊𖽦𖾐 𖼄𖽔 𖼠𖽸𖾑 𖼐𖽺𖾐 𖼄𖽺 𖼊𖽦𖾐 𖼺𖽺𖾑 𖽃𖽔𖾐 𖼞𖽶𖾑 𖼀𖽑𖽧𖾐 𖼦𖽑𖽙𖾐 𖼺𖽪𖾐 𖼄𖽡𖽻 𖼄𖽔 𖼮𖽻𖾐 𖼊𖽻𖾐． 𖼣𖽙𖾐 𖼐𖽑𖽡𖾐 𖼞𖽜 𖼻𖽳𖾐 𖼳𖽶𖾐 𖽂𖽙𖾐 𖼮𖽻𖾐 𖼊𖽻𖾐．
27 𖼣𖽙𖾐 𖽂𖽙 𖼐𖽑𖽡𖾐 𖽂𖽙 𖼖𖽕𖾐 𖼻𖽜 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽻𖾐 𖼺𖽺𖾑，𖼐𖽑𖽡𖾐 𖼞𖽑𖽙𖾐 𖼮𖽑𖽡𖾐 𖼽𖽡𖾐 𖼊𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼷𖽑𖽻𖾐 𖼞𖽜 𖼠𖽻𖾐 𖼄𖽺 𖼮𖽡𖽮𖾐 𖼞𖽴𖾐，𖼦𖽑𖽔𖾐 𖼖𖽺𖾑 𖼐𖽑𖽡𖾐 𖼮𖽡𖾐 𖼂𖽦𖾐 𖼞𖽑𖽙𖾐 𖼣𖽻𖾐 𖼞𖽜 𖼀𖽑𖽚𖾐 𖼰𖽻𖾐 𖼞𖽑𖽚 𖼽𖽡𖾐 𖼮𖽡𖽪 𖼀𖽑𖽻𖾐 𖼍𖽪𖾐 𖼊𖽻𖾐． 28 𖼣𖽙𖾐 𖼀𖽨 𖼠𖽻𖾑 𖼊𖽑𖽺 𖼹𖽡𖾐 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽻𖾐 𖼽𖽡𖾐 𖼺𖽺𖾑，𖼳𖽡𖾐 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐、 𖼰𖽡𖽔𖾐 𖼐𖽕 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽺𖾐 𖼦𖽴𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼄𖽳𖾑 𖼄𖽳 𖼊𖽑𖽺 𖼞𖽕 𖼊𖽑𖽧 𖼽𖽡𖾐 𖼊𖽻𖾐． 29 𖼣𖽙𖾐 𖼊𖽑𖽡 𖼞𖽑𖽚 𖼠𖽻𖾐 𖼞𖽑𖽶𖾐 𖼮𖽑𖽻𖾐，𖼽𖽻 𖼈𖽳𖾐 𖼊𖽑𖽺 𖼄𖽳𖾑 𖼄𖽳 𖼄𖽔 𖼞𖽕 𖼊𖽑𖽧 𖼽𖽡𖾐 𖼊𖽻𖾐，𖼄𖽔 𖼣𖽻𖾐 𖼊𖽑𖽡𖾑 𖼣𖽻𖾐 𖼦𖽑𖽺𖾑 𖼄𖽡𖾐 𖼊𖽺𖾐 𖼄𖽡𖾐 𖼮𖽡𖽦𖾐 𖼀𖽑𖽢 𖼺𖽺𖾑，𖼄𖽡𖾐 𖼳𖽡𖽻𖾐 𖼀𖽙 𖼐𖽑𖽡𖾑 𖼳𖽶𖾐 𖼄𖽨 𖼍𖽪𖾐 𖼖𖽻𖾐 𖼐𖽑𖽡𖾐 𖼊𖽑𖽺 𖼦𖽹𖾑 𖼊𖽻𖾐． 30 𖼣𖽙𖾐 𖼽𖽻 𖼈𖽳𖾐 𖼊𖽑𖽺 𖼖𖽜𖾐 𖼖𖽜𖾐 𖼐𖽺𖾐 𖼞𖽕 𖼊𖽑𖽧 𖼽𖽡𖾐 𖼺𖽺𖾑，𖼐𖽑𖽡𖾐 𖼞𖽳𖾐 𖼷𖽑𖽻𖾐 𖼀𖽺 𖼀𖽑𖽙 𖼄𖽨 𖼍𖽪𖾐 𖼖𖽻𖾐，𖼞𖽑𖽶𖾑 𖼄𖽡𖾐 𖼊𖽺𖾐 𖼮𖽻𖾐 𖼀𖽡𖾐 𖼊𖽻𖾐． 31 𖼣𖽙𖾐 𖼐𖽑𖽡𖾐 𖼞𖽳𖾐 𖼄𖽡𖾐 𖼊𖽺𖾐 𖼖𖽙𖾐 𖼀𖽙𖾐 𖼄𖽡𖾐 𖼹𖽸𖾑 𖼍𖽧𖾑 𖼍𖽙𖾑 𖼦𖽑𖽻𖾐，𖼞𖽑𖽶𖾑 𖼠𖽳𖾐 𖼻𖽸 𖼄𖽡𖾐 𖼀𖽳 𖼦𖽜𖾐 𖼄𖽙𖾐 𖼐𖽑𖽡𖾐 𖼞𖽳𖾐 𖼮𖽑𖽻𖾐 𖼺𖽺𖾑，𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖼇𖽺𖾐 𖼖𖽡𖾑 𖼳𖽸𖾑 𖼄𖽡𖾐 𖼊𖽺𖾐 𖼞𖽳𖾐 𖼦𖽜𖾐 𖼄𖽙𖾐 𖼖𖽙𖾐 𖼮𖽑𖽡𖾐，𖼹𖽦𖾑 𖼳𖽶 𖼐𖽑𖽡𖽻𖾐 𖼄𖽡𖾐 𖼀𖽳 𖼽𖽙𖾑 𖼇𖽕 𖼖𖽕𖾐 𖼍𖽡 𖼖𖽻𖾐 𖼮𖽻 𖼮𖽑𖽻𖾐 𖼺𖽺𖾑，𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼦𖽳 𖼰𖽡𖽺𖾐 𖼄𖽡𖾐 𖼊𖽺𖾐 𖼖𖽙𖾐 𖼮𖽑𖽡𖾐． 𖼣𖽙𖾐 𖼞𖽑𖽶𖾑 𖼄𖽡𖾐 𖼊𖽺𖾐 𖼞𖽳𖾐 𖼷𖽑𖽻𖾐 𖼀𖽺 𖼊𖽑𖽺 𖼰𖽡𖽻𖾐 𖼺𖽺𖾑，𖼐𖽑𖽡𖾐 𖼖𖽦 𖼠𖽻𖾐 𖼞𖽑𖽶𖾐 𖼰𖽡𖽺𖾐 𖼊𖽻𖾐，𖼐𖽑𖽡𖾐 𖼽𖽻 𖼈𖽳𖾐 𖼊𖽑𖽺 𖼞𖽑𖽶𖾑 𖼄𖽡𖾐 𖼊𖽺𖾐 𖼮𖽑𖽻𖾐 𖼞𖽕 𖼊𖽑𖽧 𖼽𖽡𖾐 𖼖𖽡𖾐．