𖽃𖽦𖾐 𖼰𖽧 𖼊𖽚𖾐 𖼺𖽪𖾑 22

𖼺𖽙𖾐 𖼞𖽑𖽶 𖼺𖽪𖾐 𖼮𖽑𖽡𖽪𖾑 𖼖𖽡𖾐 𖼞𖽳𖾐 𖼳𖽪𖾐 𖼮𖽨𖾐

1 𖼷𖽑𖽻𖾐 𖼺𖽙𖾐 𖼞𖽳𖾐 𖼐𖽑𖽡 𖼐𖽺𖾐 𖽃𖽔𖾑 𖼮𖽑𖽸 𖼽𖽻𖾐 𖼞𖽑𖽶 𖼊𖽑𖽡𖾑 𖼣𖽻𖾐，𖼺𖽦 𖼦𖽑𖽙𖾐 𖼣𖽻𖾐 𖼦𖽻𖾐，𖼈𖽪 𖼦𖽑𖽙𖾐 𖼣𖽻𖾐 𖼦𖽻𖾐，𖼐𖽑𖽡 𖼊𖽑𖽡 𖼮𖽑𖽡𖾐 𖼞𖽑𖽶 𖼺𖽪𖾐 𖼣𖽙 𖼮𖽑𖽡𖾐 𖼮𖽑𖽡𖽪𖾑 𖼖𖽡𖾐，𖽃𖽔𖾑 𖼮𖽑𖽸 𖼽𖽻𖾐 𖼊𖽑𖽡 𖼊𖽝𖾐 𖼞𖽑𖽶 𖼺𖽪𖾐 𖼖𖽡𖾐 𖼊𖽝𖾐 𖼮𖽑𖽡𖽪𖾑 𖼖𖽡𖾐．

2 𖼷𖽝𖾐 𖼀𖽑𖽙 𖽃𖽔𖾐 𖼄𖽶 𖼮𖽑𖽧 𖼺𖽙𖾐 𖼖𖽜𖾐 𖼀𖽜𖾐 𖼠𖽢𖾑 𖼊𖽪𖾐 𖼦𖽑𖽺𖾐 𖼞𖽑𖽶𖾐 𖼊𖽡 𖼽𖽡𖾐 𖼞𖽑𖽶𖾑 𖼮𖽶𖾐，𖼄𖽡𖽻𖾐 𖼺𖽪𖾐 𖼮𖽻𖾐 𖼺𖽺𖾑 𖼊𖽝 𖼳𖽶𖾐 𖼦𖽑𖽙𖾐 𖼊𖽑𖽡𖾑 𖼣𖽻𖾐，𖼽𖽻 𖼊𖽑𖽺 𖼊𖽝 𖼳𖽶𖾐 𖼦𖽑𖽙𖾐 𖼺𖽪𖾐 𖼞𖽑𖽶𖾑 𖼽𖽚𖾐 𖼷𖽑𖽻𖾐 𖼺𖽦 𖼽𖽺𖾐 𖼮𖽑𖽡𖽪𖾑 𖼄𖽔 𖼰𖽕𖾐． 3 𖼦𖽑𖽻𖾐 𖼊𖽑𖽻𖾐，𖽃𖽔𖾑 𖼄𖽶 𖼐𖽑𖽡𖾐 𖼊𖽚𖾐 𖼖𖽻𖾐 𖼦𖽑𖽻𖾐 𖼊𖽑𖽡𖾑 𖼣𖽻𖾐，𖼽𖽻 𖼷𖽑𖽻𖾐 𖼺𖽦 𖼽𖽺𖾐 𖼮𖽑𖽡𖽪𖾑 𖼮𖽻𖾐．

𖼷𖽝𖾐 𖼀𖽑𖽙 𖼊𖽑𖽺 𖼵𖽪𖾐 𖽂𖽙𖾐 𖼊𖽑𖽡𖾑 𖼣𖽻𖾐，𖼽𖽻 𖼞𖽜 𖼮𖽑𖽡𖽪𖾑 𖼖𖽡𖾐，𖼽𖽻 𖼊𖽑𖽡 𖼳𖽶 𖼖𖽺𖾑 𖼄𖽔 𖼮𖽻𖾐 𖼊𖽑𖽡𖾑 𖼣𖽻𖾐，𖼽𖽻 𖼊𖽑𖽺 𖼈𖽪 𖼦𖽑𖽙𖾐 𖼺𖽺𖾑，𖼞𖽑𖽶 𖼺𖽪𖾐 𖼄𖽡𖽻 𖼐𖽑𖽡 𖼀𖽑𖽶 𖼮𖽑𖽡𖽪𖾑 𖼖𖽡𖾐． 4 𖼽𖽻 𖼞𖽑𖽙𖾐 𖼞𖽑𖽶 𖼺𖽪𖾐 𖼐𖽑𖽡 𖼣𖽻𖾐 𖼦𖽻，𖼊𖽑𖽳 𖼖𖽳𖾐 𖼄𖽪 𖼣𖽻𖾐 𖼦𖽻，𖽃𖽔𖾑 𖼮𖽑𖽸 𖼽𖽻𖾐 𖼣𖽻𖾐 𖼦𖽻，𖼦𖽑𖽔𖾐 𖼖𖽺𖾑 𖼽𖽻 𖼖𖽦 𖼠𖽻𖾐 𖼞𖽑𖽶𖾐 𖼮𖽻𖾐 𖼠𖽙𖾑 𖼍𖽳𖾐 𖼺𖽺 𖼊𖽑𖽡𖾑 𖼣𖽻𖾐，𖼽𖽻 𖼐𖽑𖽡 𖼀𖽜𖾐 𖼄𖽨𖾐 𖼮𖽑𖽡𖽪𖾑 𖼖𖽡𖾐．

5 𖼷𖽑𖽻𖾐 𖼄𖽡𖾐 𖼠𖽻𖾐 𖼞𖽑𖽶𖾐 𖼮𖽡𖽺 𖼖𖽚𖾑 𖼣𖽻𖾐 𖼦𖽻，𖼺𖽳 𖼖𖽳 𖼊𖽻𖾐 𖼮𖽑𖽨𖾐 𖼖𖽪𖾐 𖼞𖽪𖾐 𖼞𖽑𖽶𖾐 𖼮𖽡𖽺 𖼖𖽚𖾑 𖼣𖽻𖾐 𖼦𖽻，𖼮𖽡𖽺 𖼽𖽡𖾐 𖼺𖽙𖾐 𖼞𖽳𖾐 𖼖𖽚𖾑 𖼄𖽚 𖼷𖽙 𖼦𖽑𖽙𖾐 𖼊𖽑𖽡𖾑 𖼣𖽻𖾐，𖼽𖽻 𖼄𖽳𖾑 𖼞𖽳𖾐 𖼦𖽑𖽔𖾐 𖼮𖽶𖾐 𖼹𖽳𖾐 𖼺𖽪𖾐 𖼖𖽚𖾑 𖼄𖽚 𖼐𖽺𖾐 𖼺𖽳 𖼖𖽳 𖼊𖽻𖾐，𖼈𖽺𖾐 𖼺𖽙𖾐 𖼊𖽑𖽺 𖼮𖽑𖽡𖽪𖾑 𖼖𖽡𖾐．

6 𖼷𖽑𖽻𖾐 𖽃𖽔𖾐 𖼍𖽚𖾑 𖼻𖽜 𖽃𖽔𖾑 𖼮𖽑𖽪 𖼊𖽑𖽺 𖼮𖽑𖽡𖽪𖾐 𖼺𖽺𖾑，𖼺𖽙𖾐 𖼞𖽳𖾐 𖼠𖽜𖾐 𖼂𖽜𖾐 𖼺𖽪𖾐 𖼖𖽚𖾑 𖼄𖽚 𖼣𖽻𖾐 𖼦𖽻，𖼄𖽔 𖼠𖽜𖾐 𖼺𖽺 𖼺𖽪𖾐 𖼣𖽻𖾐 𖼦𖽻，𖼄𖽡𖾐 𖼮𖽑𖽙𖾐 𖼣𖽻𖾐 𖼦𖽻，𖼮𖽑𖽡𖽪𖾐 𖼦𖽑𖽙𖾐 𖼊𖽑𖽡𖾑 𖼣𖽻𖾐，𖽃𖽔𖾐 𖼍𖽚𖾑 𖼍𖽴𖾑 𖼺𖽪𖾐 𖼞𖽑𖽶𖾑 𖼽𖽚𖾐 𖼺𖽙𖾐 𖼊𖽑𖽺 𖼮𖽑𖽡𖽪𖾑 𖼖𖽡𖾐．

7 𖼷𖽑𖽻𖾐 𖼞𖽳𖾐 𖼀𖽑𖽨𖾐 𖼀𖽑𖽡 𖼣𖽻𖾐 𖼦𖽻，𖼄𖽡𖽻 𖼐𖽑𖽡 𖼣𖽻𖾐 𖼦𖽻，𖼰𖽡𖽻𖾐 𖼮𖽑𖽡𖽦𖾐 𖼮𖽑𖽻 𖼞𖽜 𖼐𖽦𖾐 𖼳𖽪𖾐 𖼺𖽺𖾑，𖼄𖽡𖽻 𖼐𖽑𖽡 𖼦𖽑𖽺𖾑 𖼹𖽻𖾐 𖼞𖽑𖽶𖾑 𖼈𖽴 𖽃𖽔𖾑 𖼞𖽑𖽶𖾐 𖼮𖽑𖽻𖾐 𖼷𖽝𖾐 𖼀𖽑𖽙 𖼮𖽑𖽢𖾑 𖼞𖽑𖽶 𖼦𖽑𖽙𖾐． 𖼷𖽝𖾐 𖼀𖽑𖽙 𖼊𖽑𖽺 𖼵𖽪𖾐 𖽂𖽙𖾐 𖼊𖽡𖾑𖽑 𖼣𖽻𖾐，𖼷𖽝𖾐 𖼀𖽑𖽙 𖼞𖽜 𖼐𖽑𖽡 𖼀𖽜𖾐 𖼄𖽨𖾐 𖼮𖽑𖽡𖽪𖾑 𖼖𖽡𖾐． 8 𖼷𖽝𖾐 𖼀𖽑𖽙 𖼊𖽑𖽺 𖼵𖽪𖾐 𖼄𖽔 𖽂𖽙𖾐 𖼊𖽑𖽡𖾑 𖼣𖽻𖾐，𖼄𖽡𖽻 𖼐𖽑𖽡 𖼐𖽦𖾐 𖼳𖽪𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼦𖽳 𖼄𖽡𖽻 𖼦𖽑𖽺 𖼷𖽶 𖼄𖽻 \fr 22．8 \ft “𖼄𖽡𖽻 𖼦𖽑𖽺 𖼷𖽶 𖼄𖽻 ” 𖼳𖽡𖾐 𖼂𖽚 𖼖𖽦 𖼈𖽴 𖼠𖽻𖾐 𖼞𖽑𖽶𖾐 “𖽂𖽙 𖼺𖽙𖾐 𖼂𖽙𖾐 ” 𖼀𖽦𖾐 𖼺𖽪𖾐 𖼣𖽻𖾐，22： 9 𖼹𖽧𖾑 𖼖𖽺𖾑 𖼦𖽑𖽺𖾑 𖼖𖽙𖾐 𖼺𖽶𖾑 𖼣𖽻𖾐． 𖼞𖽳𖾐 𖼽𖽡𖾐，𖼄𖽡𖽻 𖼐𖽑𖽡 𖼽𖽻 𖼈𖽺𖾐 𖼺𖽪𖾐 𖼣𖽻𖾐 𖼄𖽔 𖼣𖽻𖾐 𖼐𖽺𖾐 𖼮𖽑𖽕 𖼄𖽡𖾐 𖼀𖽻𖾐 𖼖𖽡𖾐．

9 𖼷𖽑𖽻𖾐 𖼷𖽙𖾐 𖼖𖽙𖾐 𖼦𖽻𖾐 𖼊𖽦 𖼞𖽳𖾐 𖼄𖽡𖽻 𖼮𖽨𖾐，𖼐𖽑𖽡、 𖼊𖽑𖽳 𖼖𖽳𖾐 𖼄𖽪、 𖽃𖽔𖾑 𖼮𖽑𖽸 𖼽𖽻𖾐、 𖼀𖽑𖽡𖽻𖾐 𖼷𖽑𖽶 𖼐𖽺𖾐 𖽃𖽔 𖼊𖽺𖾑 𖼳𖽶 𖼄𖽡𖽻 𖼐𖽑𖽡 𖼀𖽑𖽧 𖼦𖽑𖽙𖾐 𖼖𖽙𖾐 𖼀𖽙𖾐 𖼦𖽻𖾐 𖼊𖽦 𖼣𖽻𖾐 𖼦𖽻，𖼐𖽑𖽡 𖼀𖽳 𖼷𖽙𖾐 𖼖𖽙𖾐 𖼮𖽑𖽻𖾐，𖼄𖽡𖽻 𖼦𖽑𖽺 𖼷𖽶 𖼄𖽻 𖽃𖽙𖾑 𖼄𖽺 𖼮𖽑𖽡𖽺 𖼽𖽡𖾐 𖼄𖽡𖽻 𖼦𖽑𖽺 𖼀𖽑𖽪𖾐 𖼖𖽡𖾐，𖼄𖽡𖽻 𖼦𖽑𖽺 𖼷𖽶 𖼄𖽻 𖽃𖽔 𖼺𖽺 𖼊𖽑𖽺 𖼽𖽺𖾐 𖼮𖽑𖽡𖽪𖾑 𖼍𖽧𖾑 𖼊𖽑𖽡𖾑 𖼣𖽻𖾐，𖽃𖽔 𖼺𖽺 𖼐𖽑𖽡 𖼀𖽜𖾐 𖼄𖽨𖾐 𖼮𖽑𖽡𖽪𖾑 𖼖𖽡𖾐．

10 𖼷𖽑𖽻𖾐 𖼽𖽻 𖼞𖽳𖾐 𖼐𖽑𖽡、 𖼊𖽑𖽳 𖼖𖽳𖾐 𖼄𖽪、 𖽃𖽔𖾑 𖼮𖽑𖽸 𖼽𖽻𖾐、 𖼮𖽡𖽺 𖼰𖽡𖽻𖾐 𖼮𖽡𖽦𖾐 𖼮𖽑𖽻 𖼞𖽜 𖼐𖽦𖾐 𖼳𖽪𖾐 𖼺𖽺𖾑，𖼳𖽶𖾐 𖼦𖽑𖽙𖾐 𖼣𖽻𖾐 𖼦𖽻，𖼐𖽙𖾐 𖼊𖽴 𖼣𖽻𖾐 𖼦𖽻，𖼺𖽙𖾐 𖼮𖽑𖽢𖾑 𖼞𖽑𖽶 𖼦𖽑𖽙𖾐 𖼣𖽻𖾐 𖼦𖽻，𖼠𖽳𖾐 𖼖𖽪𖾐 𖼷𖽑𖽻𖾐 𖼄𖽡𖽻𖾐 𖼺𖽪𖾐 𖼄𖽔 𖼮𖽻𖾐 𖼊𖽑𖽡𖾑 𖼣𖽻𖾐， 11 𖼄𖽡𖽻 𖼐𖽑𖽡 𖼐𖽦𖾐 𖼳𖽪𖾐 𖼺𖽪𖾐 𖼞𖽑𖽶𖾑 𖼽𖽚𖾐 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼄𖽳𖾐 𖼷𖽑𖽦𖾐 𖼖𖽡𖾐，𖼺𖽙𖾐 𖼄𖽡𖽻 𖼐𖽑𖽡 𖼽𖽻 𖼖𖽦 𖼠𖽻𖾐 𖼞𖽑𖽶𖾐 𖼄𖽔 𖼮𖽻𖾐，𖼄𖽡𖽻 𖼐𖽑𖽡 𖼺𖽡 𖼀𖽑𖽙 𖼽𖽻 𖼞𖽳𖾐 𖼄𖽳𖾐 𖼷𖽑𖽦𖾐 𖼞𖽑𖽶𖾑 𖼊𖽑𖽺 𖼷𖽶𖾐 𖼦𖽶𖾐 𖼊𖽑𖽡𖾑 𖼣𖽻𖾐，𖼄𖽡𖽻 𖼐𖽑𖽡 𖼐𖽦𖾐 𖼳𖽪𖾐 𖼺𖽪𖾐 𖼞𖽑𖽶𖾑 𖼽𖽚𖾐 𖼮𖽑𖽡𖽪𖾑 𖼄𖽔 𖼻𖽻𖾐． 12 𖼽𖽻 𖼹𖽳𖾐 𖼄𖽙𖾐 𖼄𖽔 𖼐𖽦𖾐 𖼳𖽪𖾐 𖼺𖽺𖾑，𖼞𖽑𖽶 𖼂𖽡𖾐 𖼽𖽡𖾐 𖼊𖽑𖽡𖾑 𖼣𖽻𖾐，𖼽𖽻 𖼮𖽡𖽺 𖼺𖽡 𖼀𖽑𖽙 𖼊𖽑𖽺 𖼮𖽑𖽡𖽪𖾑 𖼖𖽡𖾐． 13 𖼐𖽑𖽡𖾑 𖼳𖽶𖾐 𖼮𖽑𖽢𖾑 𖼰𖽸𖾐 𖼮𖽑𖽡𖽦 𖼦𖽑𖽙𖾐 𖼊𖽑𖽡𖾑 𖼣𖽻𖾐，𖼐𖽦𖾐 𖼳𖽪𖾐 𖼺𖽪𖾐 𖼷𖽑𖽻𖾐 𖼐𖽑𖽡𖾑 𖼳𖽶𖾐 𖼮𖽑𖽢𖾑 𖼰𖽸𖾐 𖼮𖽑𖽡𖽦 𖼺𖽪𖾐 𖼮𖽡𖽺 𖼳𖽶𖾐 𖼄𖽻𖾐 𖼞𖽑𖽶𖾑 𖼈𖽺𖾐 𖼂𖽻𖾐 𖼖𖽻𖾐 𖼮𖽨 𖼄𖽡𖽻𖾐 𖼂𖽺𖾐 𖼖𖽡𖾐． 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼽𖽻 𖼞𖽜 𖼮𖽑𖽡𖽪𖾑 𖼄𖽔 𖼻𖽻𖾐．

14 𖼷𖽑𖽻𖾐 𖼮𖽑𖽡𖽦𖾐 𖼮𖽑𖽻 𖼞𖽳𖾐 𖼮𖽡𖽺 𖼣𖽙𖾑 𖼻𖽜 𖼺𖽺𖾑，𖼐𖽙𖾐 𖼊𖽴 𖼣𖽻𖾐 𖼦𖽻，𖼳𖽶𖾐 𖼦𖽑𖽙𖾐 𖼣𖽻𖾐 𖼦𖽻，𖼮𖽡𖽺 𖼺𖽡 𖼀𖽑𖽙 𖼽𖽻 𖼮𖽡𖽺 𖼖𖽙𖾐 𖼮𖽑𖽻𖾐 𖼞𖽑𖽻𖾑 𖼄𖽔 𖼮𖽻𖾐 𖼊𖽑𖽡𖾑 𖼣𖽻𖾐，𖼣𖽙𖾑 𖼺𖽪𖾐 𖼞𖽑𖽶𖾑 𖼽𖽚𖾐 𖼮𖽡𖽺 𖼺𖽡 𖼀𖽑𖽙 𖼊𖽑𖽺 𖼮𖽑𖽡𖽪𖾑 𖼖𖽡𖾐． 15 𖼮𖽡𖽺 𖼺𖽡 𖼀𖽑𖽙 𖼽𖽻 𖼮𖽡𖽺 𖼖𖽙𖾐 𖼮𖽑𖽻𖾐 𖼞𖽑𖽻𖾑 𖼮𖽻𖾐 𖼍𖽳𖾐 𖼊𖽑𖽡𖾑 𖼣𖽻𖾐，𖼽𖽻 𖼞𖽜 𖼮𖽑𖽡𖽪𖾑 𖼄𖽔 𖼻𖽻𖾐． 𖼀𖽑𖽶 𖼞𖽜 𖼰𖽙𖾐 𖼂𖽻𖾐 𖼖𖽻𖾐 𖼻𖽜 𖼺𖽪𖾐 𖼣𖽻𖾐 𖼊𖽑𖽡𖾑 𖼣𖽻𖾐，𖼽𖽻 𖼞𖽜 𖼮𖽑𖽡𖽪𖾑 𖼄𖽔 𖼻𖽻𖾐，𖼞𖽪𖾐 𖼮𖽡𖽺𖾐 𖼽𖽻 𖼀𖽑𖽶 𖼞𖽜 𖼰𖽙𖾐 𖼻𖽜 𖼳𖽶 𖼣𖽻𖾐．

𖼷𖽑𖽻𖾐 𖼮𖽻𖾐 𖼮𖽡𖽺𖾐 𖼐𖽺𖾐 𖼷𖽶 𖼊𖽺𖾐 𖼞𖽳𖾐 𖼳𖽪𖾐 𖼮𖽨𖾐

16 𖼻𖽙 𖼄𖽳 𖼐𖽜𖾐 𖼐𖽑𖽡𖾐 𖼺𖽙𖾐 𖼊𖽑𖽺 𖼄𖽔 𖼞𖽜 𖼺𖽺，𖼷𖽑𖽻𖾐 𖼽𖽻 𖼊𖽑𖽺 𖼇𖽪 𖼺𖽺𖾑，𖼽𖽻 𖼖𖽙𖾐 𖼮𖽑𖽻𖾐 𖼊𖽑𖽙𖾑 𖼄𖽡𖽻 𖼂𖽺𖾐 𖼊𖽑𖽡𖾑 𖼣𖽻𖾐，𖼇𖽪𖾐 𖼀𖽑𖽶 𖼊𖽚𖾐 𖼽𖽻 𖼊𖽑𖽺 𖼹𖽶𖾐 𖼄𖽳 𖼻𖽙 𖼰𖽕𖾐 𖼖𖽡𖾐． 17 𖼻𖽙 𖼄𖽳 𖼽𖽻 𖼀𖽙 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼞𖽜 𖼄𖽔 𖼦𖽶𖾐 𖼊𖽑𖽡𖾑 𖼣𖽻𖾐，𖼽𖽻 𖼦𖽑𖽔𖾐 𖼖𖽺𖾑 𖼻𖽙 𖼄𖽳 𖼐𖽜𖾐 𖼐𖽑𖽡𖾐 𖼞𖽳𖾐 𖼇𖽪𖾐 𖼀𖽑𖽶 𖼞𖽑𖽶𖾑，𖼻𖽙 𖼄𖽳 𖼽𖽻 𖼀𖽙 𖼊𖽑𖽺 𖼞𖽜 𖼖𖽡𖾐．

18 𖼻𖽙 𖼄𖽳 𖼳𖽳 𖼄𖽙𖾐 𖼂𖽺𖾐 𖼺𖽪𖾐 𖼞𖽜 𖽂𖽙𖾐 𖼠𖽙𖾑 𖼄𖽔 𖼊𖽙𖾐．

19 𖼮𖽡𖽺 𖼐𖽺𖾐 𖼐𖽑𖽡𖾑 𖼳𖽶𖾐 𖼖𖽙𖾐 𖼮𖽑𖽻𖾐 𖼊𖽑𖽙𖾑 𖼄𖽡𖽻 𖼂𖽺𖾐 𖼺𖽪𖾐 𖼷𖽑𖽻𖾐，𖼽𖽻 𖼊𖽑𖽺 𖼈𖽪𖾑 𖼠𖽻𖾐 𖼦𖽑𖽙𖾐 𖼖𖽡𖾐．

20 𖼽𖽺𖾐 𖼦𖽴 𖼦𖽫 𖼊𖽑𖽺 𖼍𖽺𖾑 𖼄𖽔 𖼍𖽡𖾐，𖼠𖽳𖾐 𖼖𖽪𖾐 𖼺𖽡𖾐 𖼊𖽑𖽺 𖼖𖽺𖾑 𖼍𖽡𖾐 𖼺𖽪𖾐 𖼷𖽑𖽻𖾐，𖼽𖽻 𖼞𖽜 𖼳𖽶𖾐 𖼮𖽡𖽦 𖼖𖽡𖾐．

21 𖼣𖽙𖾑 𖼮𖽻𖾐 𖼺𖽪𖾐 𖼊𖽑𖽺 𖽂𖽙𖾐 𖼐𖽑𖽧𖾐 𖼣𖽡𖽳𖾐 𖼄𖽔 𖼊𖽙𖾐，𖽂𖽙𖾐 𖼮𖽑𖽡𖾐 𖼻𖽸 𖼄𖽔 𖼊𖽙𖾐，𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼈𖽳𖾐 𖼖𖽺𖾑 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼣𖽙𖾑 𖼮𖽻𖾐 𖼠𖽚．

22 𖼻𖽙 𖼮𖽑𖽶 𖼄𖽦 𖼮𖽡𖽦𖾐 𖼐𖽺𖾐 𖼄𖽳 𖼮𖽑𖽶 𖼄𖽙𖾐 𖼊𖽑𖽺 𖽂𖽙𖾐 𖼮𖽑𖽡𖾐 𖼻𖽸 𖼄𖽔 𖼊𖽙𖾐． 23 𖼽𖽻 𖼈𖽳𖾐 𖼊𖽑𖽺 𖼮𖽑𖽡𖾐 𖼻𖽸 𖼊𖽑𖽡𖾑 𖼣𖽻𖾐，𖼽𖽻 𖼈𖽳𖾐 𖼣𖽙𖾐 𖼊𖽑𖽺 𖼮𖽑𖽡 𖼮𖽡𖽺𖾐 𖼞𖽑𖽶𖾑 𖼮𖽶𖾐，𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼽𖽻 𖼈𖽳𖾐 𖼊𖽑𖽺 𖼊𖽻 𖼞𖽑𖽚 𖼊𖽻𖾐， 24 𖼣𖽙𖾐 𖼦𖽑𖽔𖾐 𖼖𖽺𖾑 𖼀𖽶 𖼻𖽶 𖼮𖽑𖽡𖾐 𖼠𖽻𖾐 𖼞𖽑𖽶𖾐，𖼮𖽡𖾐 𖼂𖽦𖾐 𖼞𖽜 𖽃𖽔𖾑 𖼊𖽑𖽙 𖼻𖽜 𖼐𖽑𖽡𖾐 𖼈𖽳𖾐 𖼊𖽑𖽺 𖼺𖽦，𖼐𖽑𖽡𖾐 𖼈𖽳𖾐 𖼞𖽳𖾐 𖼄𖽳 𖼻𖽙 𖼞𖽜 𖼄𖽳 𖼮𖽑𖽶 𖼄𖽙𖾐 𖼮𖽨𖾐，𖼐𖽑𖽡𖾐 𖼈𖽳𖾐 𖼞𖽳𖾐 𖼻𖽙 𖼄𖽡𖾐 𖼐𖽜𖾐 𖼞𖽜 𖼻𖽙 𖼮𖽑𖽶 𖼄𖽦 𖼮𖽡𖽦𖾐 𖼀𖽑𖽢 𖼊𖽻𖾐．

25 𖼐𖽑𖽡𖾐 𖼮𖽡 𖼀𖽑𖽡 𖼮𖽑𖽶 𖼣𖽙𖾑 𖼺𖽺𖾑，𖼣𖽙𖾐 𖼷𖽑𖽻𖾐 𖼀𖽺 𖼠𖽻𖾐 𖼞𖽑𖽶𖾐 𖼞𖽳𖾐 𖼷𖽑𖽻𖾐 𖼳𖽚𖾑 𖼀𖽑𖽙 𖼊𖽑𖽺 𖼞𖽜 𖼊𖽑𖽡𖾑 𖼣𖽻𖾐，𖼮𖽡𖽺𖾐 𖼀𖽑𖽨 𖼺𖽪𖾐 𖼷𖽑𖽻𖾐 𖼖𖽙𖾐 𖼺𖽶𖾑 𖼽𖽻 𖼈𖽳𖾐 𖼞𖽳𖾐 𖼖𖽡𖾑 𖽂𖽙𖾐 𖼠𖽜𖾐 𖼄𖽔 𖼊𖽙𖾐． 26 𖼐𖽑𖽡𖾐 𖼞𖽳𖾐 𖼮𖽑𖽡𖽦𖾐 𖼮𖽑𖽻 𖼐𖽑𖽡𖾐 𖼊𖽑𖽺 𖼮𖽡𖽺𖾐 𖼞𖽑𖽚 𖼮𖽙𖾐 𖼺𖽺𖾑，𖼀𖽑𖽡𖽻𖾐 𖼷𖽑𖽶 𖼈𖽺𖾐 𖼐𖽑𖽡𖾐 𖼞𖽳𖾐 𖼍𖽙𖾑 𖼊𖽑𖽡𖾑 𖼣𖽻𖾐，𖽃𖽔𖾑 𖼄𖽶 𖼐𖽑𖽡𖾐 𖼄𖽔 𖼖𖽻𖾑 𖼺𖽺 𖽃𖽙𖾑 𖼄𖽺，𖼐𖽑𖽡𖾐 𖼷𖽑𖽜𖾑 𖼷𖽑𖽜𖾐 𖼽𖽻 𖼞𖽳𖾐 𖼀𖽑𖽡𖽻𖾐 𖼷𖽑𖽶 𖼈𖽺𖾐 𖼽𖽻 𖼊𖽑𖽺 𖼞𖽑𖽚 𖼞𖽜 𖼖𖽡𖾐． 27 𖼞𖽪𖾐 𖼮𖽡𖽺𖾐 𖼽𖽻 𖼽𖽦 𖼞𖽑𖽶𖾑 𖼮𖽶𖾐 𖼀𖽜𖾐 𖼖𖽚𖾐 𖼂𖽚𖾐 𖼦𖽑𖽺𖾑 𖼍𖽺𖾑 𖼮𖽻𖾐，𖼦𖽑𖽺𖾑 𖼽𖽻 𖼞𖽶𖾐 𖼮𖽑𖽶 𖼊𖽑𖽺 𖼀𖽜𖾐 𖼊𖽪𖾐 𖼣𖽻𖾐． 𖼦𖽑𖽺𖾑 𖼄𖽔 𖼮𖽻𖾐 𖼊𖽑𖽡𖾑 𖼣𖽻𖾐，𖼽𖽻 𖼽𖽦 𖼞𖽶𖾑𖽑 𖼮𖽶𖾐 𖽃𖽔 𖼊𖽺𖾑 𖼳𖽶 𖼈𖽺𖾐 𖼞𖽶𖾐 𖼮𖽑𖽶𖾐 𖼊𖽑𖽺 𖼀𖽜𖾐 𖼐𖽺𖾑 ？ 𖼽𖽻 𖼣𖽙𖾐 𖼊𖽑𖽺 𖼮𖽑𖽡 𖼮𖽡𖽺𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼊𖽻 𖼞𖽑𖽚 𖼊𖽻𖾐，𖼞𖽪𖾐 𖼮𖽡𖽺𖾐 𖼣𖽙𖾐 𖼦𖽑𖽺𖾑 𖼮𖽡 𖼽𖽡𖾑 𖼀𖽻𖾐 𖼀𖽡𖾐 𖼮𖽻𖾐 𖼳𖽶 𖼣𖽻𖾐．

28 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼐𖽑𖽧𖾐 𖼣𖽡𖽳𖾐 𖼄𖽔 𖼊𖽙𖾐，𖼷𖽑𖽻𖾐 𖼀𖽺 𖼞𖽳𖾐 𖼈𖽪𖾑 𖼷𖽪𖾐 𖼊𖽑𖽺 𖼖𖽺𖾑 𖼮𖽙 𖼰𖽪𖾑 𖼄𖽔 𖼊𖽙𖾐．

29 𖼐𖽡𖾐 𖼠𖽜𖾐 𖽂𖽙𖾐 𖼺𖽪𖾐 𖼷𖽙𖾐 𖼺𖽳 𖼐𖽺𖾐 𖽂𖽙 𖼊𖽺𖾐 𖼰𖽡𖽦𖾑 𖼺𖽪𖾐 𖼮𖽶𖾐 𖼀𖽳 𖼦𖽑𖽙𖾐 𖼣𖽙𖾐 𖼊𖽑𖽺 𖼞𖽜 𖼖𖽡𖾐，𖼐𖽑𖽡𖾐 𖼞𖽳𖾐 𖼮𖽑𖽡 𖼈𖽪𖾑 𖼻𖽙 𖼖𖽺𖾑 𖼦𖽑𖽙𖾐 𖼣𖽙𖾐 𖼊𖽑𖽺 𖼞𖽜 𖼖𖽡𖾐，𖼍𖽻𖾐 𖼞𖽙𖾐 𖼄𖽔 𖼊𖽙𖾐．

30 𖼐𖽑𖽡 𖼐𖽺𖾐 𖽃𖽔𖾑 𖼮𖽑𖽸 𖼽𖽻𖾐 𖽂𖽙 𖼊𖽺𖾐 𖼦𖽳 𖼺𖽪𖾐 𖼊𖽑𖽺 𖼦𖽑𖽺𖾑 𖼻𖽻𖾐 𖼂𖽺𖾐 𖼖𖽡𖾐，𖼳𖽶 𖼐𖽑𖽡𖾐 𖼽𖽻 𖼄𖽙𖾐 𖼖𖽙𖾐 𖽂𖽙𖾐 𖼮𖽑𖽻𖾐 𖼊𖽙𖾐，𖼦𖽑𖽦 𖼐𖽑𖽡𖾐 𖼖𖽚 𖼞𖽑𖽶𖾑 𖼮𖽶𖾐 𖼦𖽑𖽙𖾐 𖼣𖽙𖾐 𖼊𖽑𖽺 𖼞𖽜 𖼖𖽡𖾐．

31 𖼐𖽑𖽡𖾐 𖼈𖽳𖾐 𖼦𖽑𖽺𖾑 𖼣𖽙𖾐 𖼞𖽳𖾐 𖼺𖽡 𖼮𖽡𖾐 𖼺𖽪𖾐 𖼷𖽑𖽻𖾐 𖼀𖽺 𖼣𖽻𖾐，𖽃𖽔𖾐 𖼺𖽺𖾑 𖼄𖽡𖾐 𖼠𖽻𖾐 𖼮𖽻𖾐 𖼐𖽑𖽡𖾑 𖼳𖽶𖾐 𖼮𖽑𖽢𖾑 𖼰𖽸𖾐 𖼮𖽑𖽡𖽦 𖼦𖽑𖽙𖾐 𖼺𖽪𖾐 𖼮𖽡𖽺，𖼐𖽑𖽡𖾐 𖼈𖽳𖾐 𖽂𖽙𖾐 𖼷𖽙 𖼄𖽔 𖼊𖽙𖾐，𖼷𖽴𖾐 𖽃𖽔𖾑 𖼐𖽙 𖼰𖽙𖾑 𖼖𖽡𖾐．