𖼮𖽜𖾐 𖼀𖽑𖽙 𖼮𖽜𖾐 𖼄𖽙𖾐 𖼞𖽳𖾐 𖼳𖽪𖾐 𖼮𖽨𖾐
21
1 𖼐𖽑𖽡𖾐 𖼷𖽑𖽻𖾐 𖼀𖽺 𖼖𖽙𖾐 𖼀𖽙𖾐 𖼞𖽑𖽙𖾐 𖼍𖽧𖾑 𖼖𖽡𖾐 𖼺𖽪𖾐 𖼳𖽪𖾐 𖼮𖽨𖾐 𖼦𖽑𖽺𖾑 𖼻𖽻𖾐 𖼣𖽻𖾐： 2 𖼐𖽑𖽡𖾐 𖼳𖽡𖾐 𖼂𖽚 𖼖𖽦 𖼺𖽪𖾐 𖼷𖽑𖽻𖾐 𖼊𖽑𖽺 𖼈𖽳𖾐 𖼂𖽻𖾐 𖼖𖽻𖾐 𖼀𖽑𖽚𖾐 𖼀𖽑𖽙 𖼂𖽺𖾐 𖼊𖽑𖽡𖾑 𖼣𖽻𖾐，𖼽𖽻 𖼐𖽑𖽡𖾐 𖼊𖽑𖽺 𖼮𖽑𖽡𖽚 𖼞𖽑𖽚 𖼠𖽙𖾐 𖼳𖽙𖾐 𖼖𖽡𖾐，𖼳𖽶 𖼞𖽑𖽚 𖼖𖽚 𖼞𖽑𖽶𖾑 𖼊𖽑𖽡 𖼞𖽑𖽚 𖼽𖽻 𖼞𖽜 𖼐𖽑𖽧𖾐 𖼺𖽳 𖽂𖽙𖾐 𖼽𖽡𖾐 𖼊𖽙𖾐，𖼊𖽑𖽡 𖼳𖽶 𖼀𖽑𖽶 𖼖𖽺𖾑 𖼊𖽚𖾐 𖼄𖽔 𖼻𖽻𖾐． 3 𖼽𖽻 𖼊𖽑𖽡 𖼽𖽚𖾐 𖼍𖽺𖾑 𖼖𖽻𖾐 𖼊𖽑𖽡𖾑 𖼣𖽻𖾐，𖼽𖽻 𖼞𖽜 𖼊𖽑𖽡 𖼽𖽚𖾐 𖼍𖽺𖾑 𖼺𖽜 𖼽𖽡𖾐 𖼻𖽻𖾐． 𖼽𖽻 𖼄𖽳 𖼻𖽙 𖼮𖽻𖾐 𖼊𖽑𖽡𖾑 𖼣𖽻𖾐，𖼽𖽻 𖼄𖽳 𖼻𖽙 𖼽𖽻 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖽂𖽙𖾐 𖼺𖽜 𖼽𖽡𖾐 𖼊𖽙𖾐．4 𖼽𖽻 𖼞𖽳𖾐 𖼺𖽡 𖼀𖽑𖽙 𖼄𖽳 𖼻𖽙 𖼹𖽶𖾐 𖼽𖽻 𖼞𖽜 𖼦𖽑𖽙𖾐，𖼻𖽙 𖼄𖽡𖾐 𖼐𖽜𖾐 𖼖𖽺𖾑 𖼮𖽻𖾐 𖼊𖽑𖽡𖾑 𖼣𖽻𖾐，𖼄𖽳 𖼻𖽙 𖼐𖽺𖾐 𖼻𖽙 𖼄𖽡𖾐 𖼐𖽜𖾐 𖼽𖽻 𖼺𖽡 𖼀𖽑𖽙 𖼊𖽑𖽺 𖼞𖽜 𖼖𖽡𖾐，𖼽𖽻 𖼊𖽑𖽡 𖼽𖽚𖾐 𖼍𖽺𖾑 𖼺𖽜 𖼽𖽡𖾐 𖼖𖽡𖾐． 5 𖼮𖽜𖾐 𖼀𖽑𖽙 𖼄𖽡𖾐 𖼀𖽻𖾐 𖼀𖽦𖾐： ‘ 𖼣𖽙𖾐 𖼺𖽡 𖼀𖽑𖽙 𖼐𖽑𖽡𖾐 𖼊𖽑𖽺 𖼐𖽺𖾐 𖼣𖽙𖾐 𖼞𖽳𖾐 𖼄𖽳 𖼻𖽙、 𖼻𖽙 𖼄𖽡𖾐 𖼐𖽜𖾐 𖼊𖽑𖽺 𖼮𖽨，𖼣𖽙𖾐 𖼊𖽑𖽡 𖼽𖽚𖾐 𖼍𖽺𖾑 𖼺𖽜 𖼽𖽡𖾐 𖼐𖽑𖽧𖾐 𖼄𖽔 𖼺𖽳’ 𖼀𖽦𖾐 𖼊𖽑𖽡𖾑 𖼣𖽻𖾐． 6 𖼽𖽻 𖼺𖽡 𖼀𖽑𖽙 𖼽𖽻 𖼊𖽑𖽺 𖼦𖽳 𖼺𖽺𖾑，𖼄𖽡𖽻 𖼦𖽑𖽺 𖼷𖽶 𖼄𖽻 \fr 21．6 \ft “𖼄𖽡𖽻 𖼦𖽑𖽺 𖼷𖽶 𖼄𖽻 ” 𖼦𖽑𖽺𖾑 “𖽂𖽙 𖼺𖽙𖾐 𖼂𖽙𖾐 ” 𖼀𖽑𖽚𖾐 𖼺𖽪𖾐 𖼖𖽺𖾑 𖼮𖽻𖾐． 𖼞𖽳𖾐 𖼞𖽑𖽶𖾑 𖼠𖽻𖾐 𖼽𖽡𖾐，𖼹𖽦𖾑 𖼦𖽳 𖽃𖽔𖾑 𖼊𖽪 𖼮𖽑𖽡𖽺 𖼽𖽡𖾐，𖽃𖽔𖾑 𖼊𖽪 𖼻𖽶𖾐 𖼞𖽳𖾐 𖼞𖽑𖽶𖾑 𖼠𖽻𖾐，𖼽𖽻 𖼺𖽡 𖼀𖽑𖽙 𖼖𖽦 𖼍𖽧𖾑 𖼈𖽺𖾐 𖼽𖽻 𖼐𖽙𖾑 𖼂𖽻𖾐 𖼊𖽑𖽪𖾐 𖼮𖽨𖾐，𖽃𖽔𖾐 𖼺𖽺𖾑 𖼽𖽻 𖼻𖽳𖾐 𖼻𖽳𖾐 𖼽𖽻 𖼺𖽡 𖼀𖽑𖽙 𖼊𖽑𖽺 𖼠𖽙𖾐 𖼳𖽙𖾐 𖼖𖽡𖾐．
7 𖼽𖽻 𖼄𖽳𖾑 𖼻𖽙 𖼄𖽳 𖼊𖽑𖽺 𖼈𖽪 𖼀𖽑𖽚𖾐 𖼄𖽙𖾐 𖼂𖽺𖾐 𖼊𖽑𖽡𖾑 𖼣𖽻𖾐，𖼀𖽑𖽚𖾐 𖼄𖽙𖾐 𖼞𖽑𖽶𖾑 𖼀𖽑𖽚𖾐 𖼀𖽑𖽙 𖼖𖽙𖾐 𖼺𖽶𖾑 𖽂𖽙𖾐 𖼺𖽜 𖼽𖽡𖾐 𖼄𖽔 𖼊𖽙𖾐． 8 𖼺𖽡 𖼀𖽑𖽙 𖼽𖽻 𖼞𖽳𖾐 𖼀𖽑𖽚𖾐 𖼄𖽙𖾐 𖼊𖽑𖽺 𖼺𖽺𖾐 𖼊𖽑𖽧 𖼖𖽻𖾐 𖼄𖽳 𖼖𖽳𖾐 𖼰𖽕𖾐，𖼠𖽙𖾑 𖼍𖽻𖾐 𖼽𖽻 𖼊𖽑𖽺 𖼄𖽔 𖼺𖽳 𖼊𖽑𖽡𖾑 𖼣𖽻𖾐，𖼽𖽻 𖼞𖽜 𖼽𖽻 𖼄𖽳𖾑 𖼞𖽶𖾐 𖼮𖽑𖽶 𖼊𖽑𖽺 𖽂𖽙𖾐 𖼈𖽳 𖼞𖽑𖽚 𖼊𖽙𖾐． 𖼽𖽻 𖼺𖽡 𖼀𖽑𖽙 𖼽𖽻 𖼊𖽑𖽺 𖼈𖽪 𖼞𖽑𖽻𖾐 𖼂𖽻𖾑 𖼀𖽑𖽙 𖼊𖽑𖽺 𖽂𖽙𖾐 𖼞𖽜 𖼄𖽔 𖼊𖽙𖾐，𖼞𖽪𖾐 𖼮𖽡𖽺𖾐 𖼽𖽻 𖼺𖽡 𖼀𖽑𖽙 𖼽𖽻 𖼊𖽑𖽺 𖼇𖽪 𖼠𖽚． 9 𖼺𖽡 𖼀𖽑𖽙 𖼽𖽻 𖼞𖽳𖾐 𖼀𖽑𖽚𖾐 𖼄𖽙𖾐 𖼊𖽑𖽺 𖼺𖽺𖾐 𖼊𖽑𖽧 𖼖𖽻𖾐 𖼽𖽻 𖼻𖽙 𖼊𖽑𖽺 𖼞𖽜 𖼊𖽑𖽡𖾑 𖼣𖽻𖾐，𖼽𖽻 𖼄𖽳𖾑 𖼻𖽙 𖼄𖽳 𖼊𖽑𖽺 𖼖𖽙𖾐 𖼺𖽶𖾑 𖼠𖽙𖾐 𖼳𖽙𖾐 𖼖𖽡𖾐．
10 𖼷𖽑𖽻𖾐 𖼹𖽦𖾑 𖼄𖽳 𖼻𖽙 𖼊𖽑𖽡 𖼽𖽚𖾐 𖼹𖽶𖾐 𖼊𖽑𖽡𖾑 𖼣𖽻𖾐，𖽃𖽙𖾑 𖼄𖽺 𖼞𖽑𖽶𖾑 𖼽𖽚𖾐 𖼊𖽑𖽺 𖼷𖽙 𖼊𖽻𖾐 𖼊𖽜 𖼈𖽦 𖼐𖽺𖾐 𖼄𖽳 𖼽𖽚𖾐 𖼮𖽻𖾐 𖼮𖽡𖽺𖾐，𖽃𖽙𖾑 𖼄𖽺 𖼖𖽙𖾐 𖼺𖽶𖾑 𖼂𖽺𖾐 𖼖𖽡𖾐，𖼊𖽑𖽡 𖼳𖽶 𖼖𖽺𖾑 𖽂𖽙𖾐 𖼣𖽻𖾐 𖼐𖽑𖽡𖽡𖾑𖽪𖾑 𖼄𖽔 𖼊𖽙𖾐． 11 𖼦𖽑𖽺𖾑 𖼺𖽙𖾐 𖼳𖽶 𖼽𖽻 𖼊𖽑𖽺 𖼄𖽔 𖼞𖽜 𖼊𖽑𖽡𖾑 𖼣𖽻𖾐，𖼽𖽻 𖼞𖽜 𖼐𖽑𖽧𖾐 𖼺𖽳 𖼄𖽙𖾐 𖽂𖽙𖾐 𖼺𖽜 𖼽𖽡𖾐 𖼊𖽙𖾐 𖼖𖽡𖾐，𖼊𖽑𖽡 𖼳𖽶 𖼀𖽑𖽶 𖼖𖽺𖾑 𖼊𖽚𖾐 𖼄𖽔 𖼻𖽻𖾐．
𖼷𖽑𖽻𖾐 𖼺𖽦 𖼷𖽑𖽻𖾐 𖼊𖽝 𖼺𖽪𖾐 𖼊𖽑𖽺 𖽂𖽙 𖼇𖽕 𖼳𖽶 𖼞𖽳𖾐 𖼳𖽪𖾐 𖼮𖽨𖾐
12 𖼷𖽑𖽻𖾐 𖼊𖽑𖽺 𖼊𖽝 𖼺𖽺𖾑 𖼊𖽝 𖼳𖽶𖾐 𖼦𖽑𖽙𖾐 𖼺𖽪𖾐，𖼽𖽻 𖼊𖽑𖽺 𖼖𖽺𖾑 𖼷𖽑𖽜𖾑 𖼷𖽑𖽜𖾐 𖼈𖽪𖾑 𖼠𖽻𖾐 𖼦𖽑𖽙𖾐 𖼖𖽡𖾐． 13 𖼷𖽑𖽻𖾐 𖼂𖽕𖾑 𖼽𖽡𖾑 𖼺𖽙𖾐 𖼺𖽦 𖼺𖽪𖾐 𖼄𖽔 𖼣𖽻𖾐，𖼞𖽑𖽶𖾑 𖼳𖽶𖾐 𖼀𖽑𖽺𖾐 𖼮𖽑𖽡𖾐 \fr 21．13 \ft “𖼳𖽶𖾐 𖼀𖽑𖽺𖾐 𖼮𖽑𖽡𖾐 ” 𖼳𖽡𖾐 𖼂𖽚 𖼖𖽦 𖼈𖽴 𖼞𖽑𖽶𖾐 “𖽂𖽙 𖼺𖽙𖾐 𖼂𖽙𖾐 𖼮𖽑𖽢𖾑 𖼰𖽡𖽻𖾐 𖼽𖽻 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐 ” 𖼀𖽦𖾐 𖼺𖽪𖾐 𖼣𖽻𖾐． 𖼊𖽑𖽡𖾑 𖼣𖽻𖾐，𖼣𖽙𖾐 𖼄𖽡𖾐 𖼊𖽺𖾐 𖼊𖽑𖽡 𖼄𖽦𖾐 𖼂𖽺𖾐 𖼳𖽡𖽻𖾐 𖼺𖽺𖾑，𖼽𖽻 𖼞𖽜 𖼮𖽡𖽪 𖼀𖽑𖽻𖾐 𖼞𖽑𖽶𖾑 𖼠𖽻𖾐 𖽂𖽙𖾐 𖼈𖽶 𖼊𖽙𖾐． 14 𖼷𖽑𖽻𖾐 𖼂𖽕𖾑 𖼽𖽡𖾑 𖼇𖽪 𖼄𖽡𖽻 𖼻𖽜 𖼺𖽙𖾐 𖼊𖽑𖽺 𖼺𖽦 𖼊𖽑𖽡𖾑 𖼣𖽻𖾐，𖼮𖽡𖽪 𖼀𖽑𖽻𖾐 𖼺𖽺𖾑 𖼣𖽙𖾐 𖼞𖽳𖾐 𖼍𖽡𖾐 𖼷𖽻𖾐 𖼞𖽑𖽶𖾑 𖼠𖽻𖾐 𖼈𖽶 𖼖𖽻𖾐 𖼀𖽦𖾐 𖼖𖽺𖾑，𖼐𖽑𖽡𖾐 𖼽𖽻 𖼊𖽑𖽺 𖼵𖽪𖾐 𖼂𖽡𖾐 𖼽𖽡𖾐 𖼈𖽪𖾑 𖼠𖽻𖾐 𖼦𖽑𖽙𖾐 𖼖𖽡𖾐．
15 𖼷𖽑𖽻𖾐 𖼽𖽻 𖽃𖽔 𖼀𖽙 𖼊𖽑𖽺 𖼊𖽝 𖼣𖽻𖾐 𖼦𖽻，𖽃𖽔 𖼄𖽙𖾐 𖼊𖽑𖽺 𖼊𖽝 𖼣𖽻𖾐 𖼦𖽻，𖼽𖽻 𖼊𖽑𖽺 𖼷𖽑𖽜𖾑 𖼷𖽑𖽜𖾐 𖼈𖽪𖾑 𖼠𖽻𖾐 𖼦𖽑𖽙𖾐 𖼖𖽡𖾐．
16 𖼷𖽑𖽻𖾐 𖼊𖽑𖽺 𖼞𖽑𖽶 𖼈𖽪 𖼺𖽪𖾐，𖼈𖽪 𖼦𖽑𖽙𖾐 𖼣𖽻𖾐 𖼦𖽻，𖼽𖽻 𖼖𖽦 𖼠𖽻𖾐 𖼮𖽻𖾐 𖼍𖽳𖾐 𖼺𖽺 𖼣𖽻𖾐 𖼦𖽻，𖼷𖽑𖽻𖾐 𖼞𖽑𖽶 𖼈𖽪 𖼺𖽪𖾐 𖼊𖽑𖽺 𖼷𖽑𖽜𖾑 𖼷𖽑𖽜𖾐 𖼈𖽪𖾑 𖼠𖽻𖾐 𖼦𖽑𖽙𖾐 𖼖𖽡𖾐．
17 𖼷𖽑𖽻𖾐 𖼽𖽻 𖽃𖽔 𖼀𖽙 𖼊𖽑𖽺 𖼮𖽙 𖼰𖽪𖾑 𖼣𖽻𖾐 𖼦𖽻，𖽃𖽔 𖼄𖽙𖾐 𖼊𖽑𖽺 𖼮𖽙 𖼰𖽪𖽪𖾑 𖼣𖽻𖾐 𖼦𖽻，𖼽𖽻 𖼊𖽑𖽺 𖼷𖽑𖽜𖾑 𖼷𖽑𖽜𖾐 𖼈𖽪𖾑 𖼠𖽻𖾐 𖼦𖽑𖽙𖾐 𖼖𖽡𖾐．
18 𖼷𖽑𖽻𖾐 𖼷𖽙𖾐 𖼖𖽙𖾐 𖼦𖽻𖾐 𖼊𖽦，𖼊𖽑𖽡 𖼽𖽚𖾐 𖼖𖽚𖾐 𖼄𖽙𖾐 𖼻𖽜 𖼣𖽻𖾐 𖼦𖽻，𖼖𖽦 𖼞𖽚 𖼷𖽑𖽧𖾐 𖼻𖽜 𖼣𖽻𖾐 𖼦𖽻，𖼠𖽳𖾐 𖼖𖽪𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼊𖽝，𖼦𖽑𖽻𖾐 𖼊𖽑𖽻𖾐 𖼊𖽝 𖼄𖽔 𖼳𖽶𖾐 𖼺𖽺，𖼊𖽝 𖼐𖽙𖾐 𖼊𖽴 𖼽𖽦 𖼞𖽪𖾐 𖼊𖽑𖽺 𖼽𖽦 𖼍𖽳𖾐 𖼍𖽺𖾑 𖼣𖽻𖾐． 19 𖼠𖽙𖾑 𖼍𖽻𖾐 𖼽𖽻 𖼍𖽪𖾐 𖼖𖽻𖾐，𖼍𖽚𖾐 𖼖𖽜 𖼍𖽚𖾐 𖼺𖽜 𖼽𖽡𖾐 𖼠𖽸𖾑 𖼊𖽑𖽡𖾑 𖼣𖽻𖾐，𖼽𖽻 𖼊𖽑𖽺 𖼊𖽝 𖼺𖽪𖾐 𖼞𖽑𖽶𖾑 𖼽𖽚𖾐 𖼽𖽺𖾐 𖼮𖽑𖽡𖽪𖾑 𖼄𖽔 𖼮𖽻𖾐． 𖼦𖽑𖽻𖾐 𖼊𖽑𖽻𖾐，𖼽𖽻 𖼄𖽡𖽻 𖼄𖽔 𖽂𖽙𖾐 𖼄𖽪𖾐 𖼞𖽳𖾐 𖽂𖽙 𖼀𖽑𖽶 𖼮𖽑𖽡𖽪𖾑 𖼖𖽡𖾐，𖼦𖽑𖽔𖾐 𖼖𖽺𖾑 𖼽𖽻 𖼊𖽑𖽺 𖼹𖽳𖾐 𖼄𖽙𖾐 𖼞𖽪𖾐 𖼞𖽑𖽙 𖼦𖽑𖽻𖾐 𖼖𖽡𖾐．
20 𖼷𖽑𖽻𖾐 𖼺𖽧𖾐 𖼖𖽜 𖼻𖽜 𖼽𖽻 𖼮𖽜𖾐 𖼀𖽑𖽙 𖼮𖽜𖾐 𖼄𖽙𖾐 𖼊𖽑𖽺 𖼊𖽝 𖼺𖽺𖾑，𖼞𖽑𖽶𖾑 𖼊𖽑𖽡 𖼠𖽸𖾑 𖼹𖽦𖾐 𖼳𖽶𖾐 𖼽𖽻 𖼖𖽦 𖼠𖽻𖾐 𖼀𖽜 𖼊𖽑𖽡𖾑 𖼣𖽻𖾐，𖼽𖽻 𖼊𖽑𖽺 𖼷𖽑𖽜𖾑 𖼷𖽑𖽜𖾐 𖽂𖽙 𖼇𖽕 𖼳𖽶 𖼖𖽡𖾐． 21 𖼦𖽑𖽻𖾐 𖼊𖽑𖽻𖾐，𖼊𖽑𖽡 𖼐𖽑𖽡 𖼐𖽑𖽡𖾐 𖼖𖽚 𖼺𖽺𖾑 𖼳𖽶𖾐 𖼦𖽑𖽙𖾐 𖼊𖽑𖽡𖾑 𖼣𖽻𖾐，𖼽𖽻 𖼊𖽑𖽺 𖽂𖽙 𖼇𖽕 𖼳𖽶 𖼄𖽔 𖼻𖽻𖾐，𖼞𖽪𖾐 𖼮𖽡𖽺𖾐 𖼮𖽜𖾐 𖼀𖽑𖽙 𖼊𖽑𖽺 𖼮𖽡 𖼀𖽑𖽡 𖼻𖽜 𖼈𖽳𖾐 𖼂𖽻𖾐 𖼖𖽻𖾐 𖼺𖽪𖾐 𖼣𖽻𖾐．
22 𖼷𖽑𖽻𖾐 𖼷𖽙𖾐 𖼖𖽙𖾐 𖼊𖽝 𖼊𖽦 𖼺𖽺𖾑，𖼄𖽺 𖼊𖽦𖾐 𖼺𖽪𖾐 𖼻𖽙 𖼄𖽳 𖼊𖽑𖽺 𖼦𖽹𖾑 𖼄𖽳𖾐 𖽃𖽔𖾐 𖼞𖽶𖾑 𖼀𖽑𖽧𖾐 𖼦𖽑𖽙𖾐，𖼦𖽑𖽻𖾐 𖼊𖽑𖽻𖾐 𖼠𖽳𖾐 𖼖𖽪𖾐 𖼦𖽹𖾑 𖼄𖽔 𖼄𖽳𖾐 𖼊𖽑𖽡𖾑 𖼣𖽻𖾐，𖼽𖽻 𖼊𖽑𖽺 𖼦𖽹𖾑 𖼺𖽪𖾐 𖼞𖽑𖽶𖾑 𖼽𖽚𖾐，𖼻𖽙 𖼄𖽳 𖼞𖽳𖾐 𖼷𖽑𖽻𖾐 𖼀𖽑𖽙 𖼞𖽑𖽙𖾐 𖼖𖽡𖾐 𖼺𖽪𖾐 𖼐𖽺𖾐 𖼄𖽡𖽻 𖼦𖽑𖽺 𖼷𖽶 𖼄𖽻 𖼞𖽑𖽙𖾐 𖼍𖽧𖾑 𖼖𖽙𖾐 𖼮𖽑𖽻𖾐 𖼀𖽑𖽶 𖼊𖽚𖾐 𖼮𖽑𖽡𖽪𖾑 𖼖𖽡𖾐， 23 𖼞𖽶𖾐 𖼮𖽑𖽶 𖼊𖽑𖽺 𖼞𖽑𖽻𖾐 𖼂𖽻𖾑 𖼦𖽹𖾑 𖼄𖽳𖾐 𖼊𖽑𖽡𖾑 𖼣𖽻𖾐，𖼺𖽙𖾐 𖼊𖽑𖽺 𖼈𖽪𖾑 𖼠𖽻𖾐 𖼦𖽑𖽙𖾐 𖼺𖽪𖾐，𖼽𖽻 𖼊𖽑𖽺 𖼖𖽺𖾑 𖼈𖽪𖾑 𖼠𖽻𖾐 𖼦𖽑𖽙𖾐 𖼖𖽡𖾐； 24 𖼺𖽙𖾐 𖼊𖽑𖽺 𖼄𖽦𖾐 𖼊𖽪 𖼊𖽝 𖼍𖽳𖾐 𖼺𖽪𖾐，𖼽𖽻 𖼞𖽜 𖼖𖽺𖾑 𖼄𖽦𖾐 𖼍𖽳𖾐 𖼖𖽡𖾐；𖼺𖽙𖾐 𖼊𖽑𖽺 𖼺𖽜 𖼊𖽝 𖼖𖽴𖾐 𖼺𖽪𖾐，𖼽𖽻 𖼞𖽜 𖼖𖽺𖾑 𖼺𖽜 𖼖𖽴𖾐 𖼖𖽡𖾐；𖼺𖽙𖾐 𖼊𖽑𖽺 𖼖𖽦 𖼀𖽑𖽦𖾐 𖼊𖽝 𖼳𖽡𖽪 𖼺𖽪𖾐，𖼽𖽻 𖼞𖽜 𖼖𖽺𖾑 𖼖𖽦 𖼀𖽑𖽦𖾐 𖼳𖽡𖽪 𖼖𖽡𖾐；𖼺𖽙𖾐 𖼊𖽑𖽺 𖼮𖽑𖽡𖾑 𖼀𖽑𖽦𖾐 𖼊𖽝 𖼳𖽡𖽪 𖼺𖽪𖾐，𖼽𖽻 𖼞𖽜 𖼖𖽺𖾑 𖼮𖽑𖽡𖾑 𖼀𖽑𖽦𖾐 𖼳𖽡𖽪 𖼖𖽡𖾐； 25 𖽃𖽔𖾐 𖼍𖽚𖾑 𖼻𖽜 𖼺𖽙𖾐 𖼊𖽑𖽺 𖼮𖽑𖽡𖽪𖾐 𖼺𖽪𖾐，𖼽𖽻 𖼊𖽑𖽺 𖼖𖽺𖾑 𖽃𖽔𖾐 𖼍𖽚𖾑 𖼻𖽜 𖼮𖽑𖽡𖽪𖾐 𖼖𖽪𖾐；𖼺𖽙𖾐 𖼊𖽑𖽺 𖼊𖽝 𖼳𖽝 𖼦𖽑𖽙𖾐 𖼺𖽪𖾐，𖼽𖽻 𖼊𖽑𖽺 𖼖𖽺𖾑 𖼊𖽝 𖼳𖽝 𖼦𖽑𖽙𖾐 𖼖𖽡𖾐；𖼺𖽙𖾐 𖼊𖽑𖽺 𖼊𖽝 𖼺𖽪𖾐，𖼽𖽻 𖼊𖽑𖽺 𖼖𖽺𖾑 𖼊𖽝 𖼖𖽡𖾐．
26 𖼷𖽑𖽻𖾐 𖼽𖽻 𖼀𖽑𖽚𖾐 𖼀𖽑𖽙 𖼀𖽑𖽚𖾐 𖼄𖽙𖾐 𖼞𖽳𖾐 𖼄𖽦𖾐 𖼊𖽪 𖼊𖽑𖽡 𖼂𖽦𖾐 𖼊𖽝 𖼍𖽳𖾐 𖼦𖽑𖽙𖾐 𖼊𖽑𖽡𖾑 𖼣𖽻𖾐，𖼽𖽻 𖼄𖽦𖾐 𖼊𖽪 𖼖𖽙𖾐 𖼀𖽙𖾐 𖼺𖽺𖾑 𖼽𖽻 𖼊𖽑𖽺 𖼀𖽑𖽨 𖼦𖽑𖽙𖾐，𖼽𖽻 𖼞𖽜 𖼐𖽑𖽧𖾐 𖼺𖽳 𖼺𖽜 𖼽𖽡𖾐 𖼖𖽡𖾐． 27 𖼷𖽑𖽻𖾐 𖼽𖽻 𖼀𖽑𖽚𖾐 𖼀𖽑𖽙 𖼀𖽑𖽚𖾐 𖼄𖽙𖾐 𖼞𖽳𖾐 𖼺𖽜 𖼊𖽑𖽡 𖼮𖽑𖽡𖾐 𖼊𖽝 𖼖𖽴𖾐 𖼦𖽑𖽙𖾐 𖼊𖽑𖽡𖾑 𖼣𖽻𖾐，𖼽𖽻 𖼺𖽜 𖼖𖽙𖾐 𖼀𖽙𖾐 𖼺𖽺𖾑 𖼽𖽻 𖼊𖽑𖽺 𖼀𖽑𖽨 𖼦𖽑𖽙𖾐，𖼽𖽻 𖼞𖽜 𖼐𖽑𖽧𖾐 𖼺𖽳 𖼺𖽜 𖼽𖽡𖾐 𖼖𖽡𖾐．
𖼮𖽡𖽺 𖼷𖽑𖽻𖾐 𖼊𖽑𖽺 𖼦𖽹𖾑 𖼄𖽳𖾐 𖼞𖽳𖾐 𖼳𖽪𖾐 𖼮𖽨𖾐
28 𖼐𖽑𖽡 𖼷𖽑𖽻𖾐 𖼊𖽑𖽺 𖼍𖽶𖾐 𖼄𖽳𖾐 𖼺𖽺𖾑，𖼻𖽙 𖼐𖽜𖾐 𖼣𖽻𖾐 𖼦𖽻，𖼻𖽙 𖼄𖽳 𖼣𖽻𖾐 𖼦𖽻，𖼍𖽶𖾐 𖼳𖽶𖾐 𖼦𖽑𖽙𖾐 𖼊𖽑𖽡𖾑 𖼣𖽻𖾐，𖼖𖽚𖾐 𖼄𖽙𖾐 𖼻𖽜 𖼐𖽑𖽡 𖼊𖽑𖽺 𖼷𖽴𖾐 𖼳𖽶𖾐 𖼦𖽑𖽙𖾐 𖼖𖽡𖾐． 𖼦𖽑𖽻𖾐 𖼊𖽑𖽻𖾐，𖼐𖽑𖽡 𖼦𖽙 𖽂𖽙𖾐 𖼷𖽙 𖼄𖽔 𖼊𖽙𖾐，𖼐𖽑𖽡 𖼺𖽡 𖼀𖽑𖽙 𖼊𖽑𖽺 𖼖𖽺𖾑 𖽂𖽙 𖼇𖽕 𖼳𖽶 𖼄𖽔 𖼻𖽻𖾐． 29 𖼐𖽑𖽡 𖼞𖽑𖽶𖾑 𖽃𖽙𖾑 𖼄𖽺 𖼊𖽑𖽙 𖼹𖽦𖾐 𖼺𖽙𖾐 𖼍𖽶𖾐 𖼠𖽸𖾑，𖼷𖽑𖽻𖾐 𖼐𖽑𖽡 𖼺𖽡 𖼀𖽑𖽙 𖼊𖽑𖽺 𖼀𖽦𖾐 𖼊𖽑𖽧 𖼠𖽚 𖼺𖽪𖾐 𖼮𖽻𖾐，𖼦𖽑𖽻𖾐 𖼊𖽑𖽻𖾐 𖼽𖽻 𖼐𖽑𖽡 𖼊𖽑𖽺 𖼹𖽳𖾐 𖼄𖽙𖾐 𖼄𖽔 𖼀𖽑𖽳𖾐 𖼍𖽡 𖼺𖽺𖾑，𖼻𖽙 𖼐𖽜𖾐 𖼊𖽑𖽺 𖼣𖽻𖾐 𖼦𖽻，𖼻𖽙 𖼄𖽳 𖼊𖽑𖽺 𖼣𖽻𖾐 𖼦𖽻，𖼍𖽶𖾐 𖼳𖽶𖾐 𖼦𖽑𖽙𖾐 𖼊𖽑𖽡𖾑 𖼣𖽻𖾐，𖼐𖽑𖽡 𖼊𖽑𖽺 𖼖𖽚𖾐 𖼄𖽙𖾐 𖼻𖽜 𖼷𖽴𖾐 𖼳𖽶𖾐 𖼦𖽑𖽙𖾐 𖼖𖽡𖾐，𖼐𖽑𖽡 𖼺𖽡 𖼀𖽑𖽙 𖼊𖽑𖽺 𖼖𖽺𖾑 𖼈𖽪𖾑 𖼠𖽻𖾐 𖼦𖽑𖽙𖾐 𖼖𖽡𖾐． 30 𖼽𖽻 𖼞𖽜 𖼈𖽪𖾑 𖼠𖽻𖾐 𖼈𖽳 𖼀𖽑𖽶 𖼊𖽚𖾐 𖼖𖽡𖾐 𖼊𖽑𖽡𖾑 𖼣𖽻𖾐，𖼞𖽑𖽙 𖼄𖽙𖾐 𖼣𖽻𖾐 𖼦𖽻，𖼞𖽑𖽙𖾐 𖼍𖽧𖾑 𖼖𖽙𖾐 𖼮𖽑𖽻𖾐 𖼀𖽑𖽶 𖼊𖽚𖾐 𖼺𖽺𖾑，𖼈𖽪𖾑 𖼠𖽻𖾐 𖼈𖽳 𖼞𖽑𖽚 𖼖𖽡𖾐．
31 𖼐𖽑𖽡 𖼺𖽙𖾐 𖼞𖽳𖾐 𖼻𖽙 𖼊𖽑𖽺 𖼍𖽶𖾐 𖼄𖽳𖾐 𖼣𖽻𖾐 𖼦𖽻，𖼻𖽙 𖼄𖽳 𖼊𖽑𖽺 𖼍𖽶𖾐 𖼄𖽳𖾐 𖼣𖽻𖾐 𖼦𖽻，𖼄𖽳𖾑 𖼄𖽳 𖼳𖽪𖾐 𖼮𖽨𖾐 𖼦𖽑𖽺𖾑 𖼖𖽙𖾐 𖼮𖽑𖽻𖾐 𖼂𖽺𖾐 𖼖𖽡𖾐． 32 𖼐𖽑𖽡 𖼺𖽙𖾐 𖼞𖽳𖾐 𖼀𖽑𖽚𖾐 𖼀𖽑𖽙 𖼊𖽑𖽺 𖼍𖽶𖾐 𖼄𖽳𖾐 𖼣𖽻𖾐 𖼦𖽻，𖼀𖽑𖽚𖾐 𖼄𖽙𖾐 𖼊𖽑𖽺 𖼍𖽶𖾐 𖼄𖽳𖾐 𖼣𖽻𖾐 𖼦𖽻，𖼀𖽑𖽨𖾐 𖼺𖽙𖾐 𖼖𖽙 𖼖𖽡𖾐 𖼷𖽑𖽺𖾐 𖼺𖽺𖾑，𖼀𖽑𖽚𖾐 𖼀𖽑𖽙 𖼞𖽳𖾐 𖼺𖽡 𖼀𖽑𖽙 𖼊𖽑𖽺 𖼞𖽜 𖼖𖽡𖾐，𖼐𖽑𖽡 𖼊𖽑𖽺 𖼖𖽚𖾐 𖼄𖽙𖾐 𖼻𖽜 𖼷𖽴𖾐 𖼳𖽶𖾐 𖼦𖽑𖽙𖾐 𖼖𖽡𖾐．
𖼮𖽡𖽺 𖼊𖽑𖽺 𖼦𖽹𖾑 𖼄𖽳𖾐 𖼞𖽳𖾐 𖼳𖽪𖾐 𖼮𖽨𖾐
33 𖼷𖽑𖽻𖾐 𖼄𖽡𖾐 𖼊𖽪 𖼮𖽑𖽡𖽺 𖼀𖽜𖾐 𖼊𖽪𖾐 𖼀𖽑𖽪𖾐 𖼦𖽑𖽙𖾐 𖼣𖽻𖾐 𖼦𖽻，𖼄𖽡𖾐 𖼊𖽪 𖼠𖽢𖾑 𖼀𖽜𖾐 𖼊𖽪𖾐 𖼄𖽔 𖼀𖽜𖾐 𖼣𖽻𖾐 𖼦𖽻，𖼺𖽙𖾐 𖼞𖽳𖾐 𖼐𖽑𖽡、 𖼊𖽑𖽳 𖼖𖽳𖾐 𖼄𖽪 𖼮𖽑𖽙 𖼞𖽑𖽶𖾑 𖼞𖽑𖽶𖾐 𖼹𖽺𖾐 𖼽𖽡𖾐 𖼺𖽪𖾐 𖼮𖽻𖾐 𖼊𖽑𖽡𖾑 𖼣𖽻𖾐， 34 𖼄𖽡𖾐 𖼊𖽪 𖼺𖽡 𖼀𖽑𖽙 𖼮𖽡 𖼀𖽑𖽡 𖼈𖽺𖾐 𖼮𖽡𖽺 𖼺𖽡 𖼀𖽑𖽙 𖼊𖽑𖽺 𖼮𖽑𖽡𖽪𖾑 𖼖𖽡𖾐，𖼮𖽡𖽺 𖼳𖽶𖾐 𖼄𖽻𖾐 𖼄𖽡𖾐 𖼊𖽪 𖼺𖽡 𖼀𖽑𖽙 𖼊𖽑𖽺 𖼞𖽜 𖼻𖽻𖾐．
35 𖼊𖽑𖽡 𖼽𖽚𖾐 𖼞𖽳𖾐 𖼐𖽑𖽡 𖼽𖽡𖾐 𖼺𖽺𖾑，𖼠𖽳𖾐 𖼖𖽪𖾐 𖼊𖽑𖽡 𖼽𖽚𖾐 𖼞𖽳𖾐 𖼐𖽑𖽡 𖼊𖽑𖽺 𖼍𖽶𖾐 𖼳𖽶𖾐 𖼦𖽑𖽙𖾐 𖼊𖽑𖽡𖾑 𖼣𖽻𖾐，𖼽𖽻 𖼈𖽳𖾐 𖼐𖽑𖽡 𖼠𖽙𖾑 𖼊𖽑𖽺 𖼈𖽪 𖼦𖽑𖽙𖾐，𖼈𖽪 𖼀𖽑𖽶 𖼷𖽙𖾐 𖼖𖽙𖾐 𖼺𖽶𖾑 𖼀𖽜𖾐，𖼐𖽑𖽡 𖼳𖽶𖾐 𖼄𖽻𖾐 𖼖𖽺𖾑 𖼷𖽙𖾐 𖼖𖽙𖾐 𖼺𖽶𖾑 𖼀𖽜𖾐 𖼖𖽡𖾐． 36 𖼽𖽻 𖼐𖽑𖽡 𖽃𖽙𖾑 𖼄𖽺 𖼊𖽑𖽙 𖼹𖽦𖾐 𖼦𖽑𖽔𖾐 𖼮𖽶𖾐 𖼍𖽶𖾐 𖼺𖽳 𖼞𖽑𖽶𖾑 𖼽𖽻 𖼺𖽝𖾑 𖼍𖽳𖾐，𖼐𖽑𖽡 𖼺𖽡 𖼀𖽑𖽙 𖼹𖽳𖾐 𖼄𖽙𖾐 𖼄𖽔 𖼀𖽑𖽳𖾐 𖼍𖽡 𖼊𖽑𖽡𖾑 𖼣𖽻𖾐，𖼽𖽻 𖼞𖽳𖾐 𖼐𖽑𖽡 𖼠𖽙𖾑 𖼈𖽺𖾐 𖼺𖽙𖾐 𖼊𖽑𖽺 𖼮𖽑𖽡𖽪𖾑 𖼖𖽡𖾐，𖼐𖽑𖽡 𖼳𖽶𖾐 𖼄𖽻𖾐 𖼽𖽻 𖼞𖽜 𖼻𖽻𖾐．