𖽃𖽦𖾐 𖼰𖽧 𖼊𖽚𖾐 𖼺𖽪𖾑 26

𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼀𖽜𖾐 𖼮𖽑𖽙𖾐 𖼞𖽳𖾐 𖼽𖽚 𖼮𖽑𖽡𖽻𖾐

1 𖼐𖽑𖽡𖾐 𖼄𖽳𖾐 𖼷𖽑𖽡𖾐 𖼮𖽑𖽙𖾐 𖼻𖽜 𖼺𖽺𖾑，𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽳𖾐 𖼀𖽜𖾐 𖼮𖽑𖽙𖾐 𖼹𖽸𖾑 𖼖𖽡𖾐，𖼀𖽜𖾐 𖼮𖽑𖽙𖾐 𖼦𖽑𖽺𖾑 𖼈𖽝 𖼊𖽑𖽧 𖼖𖽻𖾐 𖼺𖽪𖾐 𖼽𖽦 𖼄𖽳𖾐 𖼮𖽑𖽡𖾐 𖼄𖽶𖾑 𖼄𖽶𖾐 𖼐𖽺𖾐 𖼄𖽳𖾐 𖼷𖽺 𖼖𖽕𖾑 𖼖𖽕，𖼄𖽳𖾐 𖼷𖽺 𖼐𖽑𖽡𖾐 𖼀𖽸，𖼄𖽳𖾐 𖼷𖽺 𖼐𖽑𖽡𖾑 𖼐𖽑𖽡𖾐 𖼞𖽑𖽶𖾑 𖼳𖽶 𖼻𖽜 𖼷𖽝 𖼀𖽑𖽢 𖼖𖽡𖾐，𖼦𖽑𖽔𖾐 𖼖𖽺𖾑 𖼖𖽦 𖼠𖽸𖾑 𖼞𖽜 𖼰𖽡𖾐 𖼖𖽪𖾑 𖼂𖽚 𖼀𖽚𖾐 𖼍𖽦𖾐 𖼖𖽡𖾐． 2 𖼄𖽳𖾐 𖼊𖽑𖽡 𖼮𖽑𖽙𖾑 𖼮𖽑𖽙𖾐 𖼞𖽳𖾐 𖼞𖽑𖽫𖾐 𖼳𖽶𖾐 𖼷𖽙𖾐 𖼖𖽙𖾐 𖼺𖽶𖾑 𖼖𖽡𖾐，𖼳𖽶𖾐 𖼞𖽳𖾐 𖼐𖽑𖽡 𖼷𖽑𖽡𖾐 𖼦𖽑𖽦 𖼖𖽦 𖼞𖽚 𖼮𖽻𖾐，𖼞𖽑𖽫𖾐 𖼞𖽳𖾐 𖼖𖽡𖾐 𖼖𖽦 𖼞𖽚 𖼮𖽻𖾐 𖼖𖽡𖾐． 3 𖼄𖽳𖾐 𖼮𖽑𖽙𖾐 𖼦𖽑𖽺𖾑 𖼣𖽙 𖼮𖽑𖽙𖾐 𖼣𖽙 𖼮𖽑𖽙𖾐 𖼷𖽙𖾐 𖼖𖽙𖾐 𖼊𖽴 𖼺𖽺𖾑，𖼈𖽳 𖼈𖽳 𖼄𖽙𖾐 𖼐𖽑𖽡 𖼰𖽪𖾑 𖼀𖽑𖽢 𖼖𖽡𖾐． 4 𖼦𖽑𖽺𖾑 𖼰𖽪𖾑 𖼞𖽳𖾐 𖼦𖽜 𖼷𖽜𖾐 𖼞𖽑𖽶𖾑 𖼮𖽑𖽙𖾐 𖼊𖽑𖽺 𖼀𖽑𖽳𖾐 𖼳𖽳𖾑 𖼄𖽙𖾐 𖼳𖽡𖽪𖾐 \fr 26．4 \ft “𖼀𖽑𖽳𖾐 𖼳𖽳𖾑 𖼄𖽙𖾐 𖼳𖽡𖽪𖾐 ” 𖼦𖽑𖽺𖾑 “𖼖𖽧𖾐 𖼞𖽑𖽢𖾐 𖼳𖽡𖽪𖾐 ” 𖼖𖽙𖾐 𖼀𖽦𖾐 𖼺𖽪𖾐 𖼣𖽻𖾐． 𖼖𖽕𖾑 𖼖𖽕 𖼞𖽑𖽶𖾑 𖼳𖽶 𖼂𖽺𖾐 𖼍𖽴𖾑 𖼖𖽡𖾐，𖼞𖽑𖽶𖾑 𖼰𖽪𖾑 𖼞𖽳𖾐 𖼦𖽜 𖼷𖽜𖾐 𖼞𖽑𖽶𖾑 𖼮𖽑𖽙𖾐 𖼊𖽑𖽺 𖼖𖽺𖾑 𖼐𖽑𖽡𖾐 𖼀𖽑𖽳𖾐 𖼳𖽳𖾑 𖼄𖽙𖾐 𖼳𖽡𖽪𖾐 𖼖𖽕𖾑 𖼖𖽕 𖼞𖽑𖽶𖾑 𖼳𖽶 𖼂𖽺𖾐 𖼍𖽴𖾑 𖼖𖽡𖾐． 5 𖼦𖽑𖽺𖾑 𖼰𖽪𖾑 𖼞𖽳𖾐 𖼦𖽜 𖼷𖽜𖾐 𖼊𖽑𖽺 𖼀𖽑𖽳𖾐 𖼳𖽳𖾑 𖼄𖽙𖾐 𖼳𖽡𖽪𖾐 𖼣𖽙 𖼷𖽑𖽡𖾐 𖼊𖽝𖾐 𖼂𖽺𖾐 𖼍𖽴𖾑 𖼖𖽡𖾐，𖼞𖽑𖽶𖾑 𖼰𖽪𖾑 𖼞𖽳𖾐 𖼦𖽜 𖼷𖽜𖾐 𖼊𖽑𖽺 𖼖𖽺𖾑 𖼀𖽑𖽳𖾐 𖼳𖽳𖾑 𖼄𖽙𖾐 𖼳𖽡𖽪𖾐 𖼣𖽙 𖼷𖽑𖽡𖾐 𖼊𖽝𖾐 𖼂𖽺𖾐 𖼍𖽴𖾑 𖼖𖽡𖾐． 𖼀𖽑𖽳𖾐 𖼳𖽳𖾑 𖼄𖽙𖾐 𖼳𖽡𖽪𖾐 𖼦𖽑𖽺𖾑 𖼹𖽻𖾐 𖼐𖽑𖽡 𖼊𖽝𖾐 𖼐𖽑𖽡 𖼊𖽝𖾐 𖼷𖽙𖾐 𖼖𖽙𖾐 𖼍𖽴 𖼍𖽪𖾐 𖼍𖽴𖾑 𖼖𖽡𖾐． 6 𖼐𖽑𖽡𖾐 𖼳𖽳𖾐 𖽃𖽔𖾑 𖼞𖽚 𖼖𖽦 𖼣𖽙 𖼷𖽑𖽡𖾐 𖼊𖽝𖾐 𖼂𖽺𖾐 𖼺𖽺𖾑，𖼄𖽳𖾐 𖼦𖽑𖽺𖾑 𖼐𖽑𖽡 𖼰𖽪𖾑 𖼊𖽑𖽺 𖼞𖽑𖽢𖾐 𖼷𖽙𖾐 𖼖𖽙𖾐 𖼍𖽡，𖼀𖽜𖾐 𖼮𖽑𖽙𖾐 𖼊𖽑𖽡 𖼊𖽝𖾐 𖼀𖽑𖽢 𖼖𖽡𖾐．

𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼀𖽜𖾐 𖼊𖽪𖾐 𖼞𖽳𖾐 𖼽𖽚 𖼮𖽑𖽡𖽻𖾐

7 𖼐𖽑𖽡𖾐 𖽃𖽔𖾑 𖼮𖽑𖽸 𖼄𖽶𖾐 𖼻𖽜 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽳𖾐 𖼀𖽜𖾐 𖼊𖽪𖾐 𖼷𖽑𖽡𖾐 𖼍𖽡𖾑 𖼮𖽑𖽙𖾐 𖼷𖽝 𖼖𖽡𖾐， 8 𖼀𖽜𖾐 𖼊𖽪𖾐 𖼊𖽑𖽡 𖼮𖽑𖽙𖾑 𖼮𖽑𖽙𖾐 𖼞𖽑𖽫𖾐 𖼳𖽶𖾐 𖼷𖽙𖾐 𖼖𖽙𖾐 𖼺𖽶𖾑 𖼖𖽡𖾐，𖼳𖽶𖾐 𖼞𖽳𖾐 𖼺𖽙𖾐 𖼷𖽑𖽡𖾐 𖼖𖽦 𖼞𖽚 𖼮𖽻𖾐 𖼖𖽡𖾐，𖼞𖽑𖽫𖾐 𖼞𖽳𖾐 𖼖𖽡𖾐 𖼖𖽦 𖼞𖽚 𖼮𖽻𖾐 𖼖𖽡𖾐． 9 𖼐𖽑𖽡𖾐 𖼀𖽜𖾐 𖼊𖽪𖾐 𖼦𖽑𖽺𖾑 𖼣𖽙 𖼮𖽑𖽙𖾐 𖼞𖽜 𖼷𖽙𖾐 𖼖𖽙𖾐 𖼊𖽴 𖼊𖽑𖽡 𖼰𖽪𖾑 𖼂𖽺𖾐，𖼠𖽳𖾐 𖼖𖽪𖾐 𖼞𖽑𖽶𖾑 𖼮𖽑𖽡𖽚 𖼮𖽑𖽙𖾐 𖼞𖽜 𖼖𖽺𖾑 𖼷𖽙𖾐 𖼖𖽙𖾐 𖼊𖽴 𖼊𖽑𖽡 𖼰𖽪𖾑 𖼂𖽺𖾐，𖼮𖽑𖽡𖽚 𖼮𖽑𖽙𖾐 𖼷𖽙𖾐 𖼖𖽙𖾐 𖼊𖽴 𖼺𖽪𖾐 𖼞𖽑𖽶𖾑 𖼰𖽪𖾑 𖼞𖽳𖾐 𖼄𖽳𖾑 𖼊𖽺𖾐 𖼞𖽑𖽶𖾑 𖼮𖽑𖽙𖾐，𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖽃𖽙𖾑 𖼄𖽺 𖼀𖽳 𖼊𖽧𖾐 𖼍𖽪𖾐 𖼖𖽻𖾐 𖼖𖽡𖾐． 10 𖼦𖽑𖽺𖾑 𖼰𖽪𖾑 𖼞𖽳𖾐 𖼦𖽜 𖼷𖽜𖾐 𖼊𖽑𖽺 𖼀𖽑𖽳𖾐 𖼳𖽳𖾑 𖼄𖽙𖾐 𖼳𖽡𖽪𖾐 𖼣𖽙 𖼷𖽑𖽡𖾐 𖼊𖽝𖾐 𖼂𖽺𖾐 𖼍𖽴𖾑 𖼖𖽡𖾐，𖼞𖽑𖽶𖾑 𖼰𖽪𖾑 𖼞𖽳𖾐 𖼦𖽜 𖼷𖽜𖾐 𖼊𖽑𖽺 𖼖𖽺𖾑 𖼀𖽑𖽳𖾐 𖼳𖽳𖾑 𖼄𖽙𖾐 𖼳𖽡𖽪𖾐 𖼣𖽙 𖼷𖽑𖽡𖾐 𖼊𖽝𖾐 𖼂𖽺𖾐 𖼍𖽴𖾑 𖼖𖽡𖾐． 11 𖼐𖽑𖽡𖾐 𖼹𖽦𖾑 𖼮𖽡 𖽃𖽔𖾑 𖼞𖽚 𖼖𖽦 𖼣𖽙 𖼷𖽑𖽡𖾐 𖼊𖽝𖾐 𖼂𖽺𖾐，𖼦𖽑𖽺𖾑 𖼐𖽑𖽡 𖼰𖽪𖾑 𖼊𖽑𖽺 𖼞𖽑𖽢𖾐 𖼷𖽙𖾐 𖼖𖽙𖾐 𖼍𖽡 𖼺𖽺𖾑，𖼀𖽜𖾐 𖼊𖽪𖾐 𖼊𖽑𖽡 𖼊𖽝𖾐 𖼀𖽑𖽢 𖼖𖽡𖾐． 12 𖽃𖽔𖾑 𖼮𖽑𖽸 𖼄𖽶𖾐 𖼻𖽜 𖼷𖽝 𖼺𖽪𖾐 𖼀𖽜𖾐 𖼊𖽪𖾐 𖼠𖽳𖾐 𖼊𖽑𖽧 𖼖𖽻𖾐 𖼞𖽑𖽶𖾑 𖼮𖽑𖽙𖾐，𖼀𖽑𖽨 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼠𖽙𖾑 𖼍𖽻𖾐 𖼀𖽳 𖼹𖽺𖾐 𖼖𖽡𖾐． 13 𖼀𖽜𖾐 𖼊𖽪𖾐 𖼳𖽶𖾐 𖼊𖽑𖽧 𖼖𖽻𖾐 𖼺𖽪𖾐，𖼀𖽑𖽨 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼐𖽑𖽡 𖼀𖽳 𖼹𖽺𖾐，𖼊𖽑𖽡 𖼀𖽳 𖼊𖽑𖽡 𖼖𖽦 𖼞𖽚 𖼳𖽶𖾐 𖼮𖽻𖾐 𖼺𖽺𖾑，𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼊𖽑𖽺 𖼂𖽡𖾑 𖼻𖽶𖾐 𖼖𖽡𖾐． 14 𖼀𖽜𖾐 𖼊𖽪𖾐 𖼊𖽑𖽺 𖼹𖽦𖾑 𖼦𖽑𖽨𖾐 𖼐𖽑𖽡𖾐 𖼺𖽪𖾐 𖼽𖽻𖾐 𖼖𖽙𖾐 𖼮𖽡𖾐 𖼻𖽜 𖼀𖽜𖾐 𖼍𖽡 𖼖𖽡𖾐，𖼞𖽑𖽶𖾑 𖼊𖽑𖽺 𖼹𖽦𖾑 𖼈𖽡𖾐 𖼳𖽶𖾐 𖼮𖽡𖾐 𖼻𖽜 𖼀𖽜𖾐 𖼻𖽶𖾐 𖼖𖽡𖾐．

𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽳𖾐 𖼠𖽴𖾐 𖼮𖽑𖽡𖽻𖾐

15 𖼽𖽻 𖼈𖽳𖾐 𖼮𖽑𖽪 𖼠𖽴𖾐 𖼺𖽧𖾐 𖼻𖽜 𖼺𖽺𖾑，𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼍𖽚 𖼖𖽚𖾐 𖼂𖽚𖾐 𖼺𖽧𖾐 𖼀𖽑𖽡 𖼹𖽸𖾑 𖼖𖽡𖾐． 16 𖼺𖽧𖾐 𖼀𖽑𖽡 𖼊𖽑𖽡 𖼀𖽑𖽡𖾑 𖼀𖽑𖽡 𖼳𖽶𖾐 𖼞𖽳𖾐 𖼷𖽑𖽡𖾐 𖼖𖽦 𖼞𖽚 𖼮𖽻𖾐，𖼞𖽑𖽫𖾐 𖼞𖽳𖾐 𖼊𖽑𖽡 𖼖𖽦 𖼞𖽚 𖼂𖽕 𖼮𖽻𖾐 𖼖𖽡𖾐． 17 𖼊𖽑𖽡 𖼀𖽑𖽡𖾑 𖼀𖽑𖽡 𖼺𖽧𖾐 𖼀𖽧𖾐 𖼐𖽑𖽡 𖼊𖽝𖾐 𖼍𖽴𖾑，𖼷𖽙𖾐 𖼖𖽙𖾐 𖼍𖽴 𖼍𖽪𖾐 𖼮𖽻𖾐 𖼖𖽡𖾐，𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽳𖾐 𖼺𖽧𖾐 𖼀𖽑𖽡 𖼄𖽳𖾑 𖼄𖽳 𖼷𖽙𖾐 𖼖𖽙𖾐 𖼺𖽶𖾑 𖼹𖽸𖾑 𖼖𖽡𖾐． 18 𖼐𖽑𖽡𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽳𖾐 𖼠𖽳𖾐 𖼻𖽸 𖼄𖽡𖾐 𖼀𖽳 𖼦𖽑𖽡𖽚 𖼺𖽪𖾐 𖼺𖽧𖾐 𖼀𖽑𖽡 𖼐𖽑𖽡 𖼷𖽑𖽡𖾐 𖼀𖽑𖽡 𖼹𖽸𖾑 𖼖𖽡𖾐． 19 𖼺𖽧𖾐 𖼀𖽑𖽡 𖼦𖽑𖽺𖾑 𖼐𖽑𖽡 𖼷𖽑𖽡𖾐 𖼀𖽑𖽡 𖽂𖽚 𖼞𖽑𖽶𖾐，𖼀𖽑𖽨𖾐 𖼍𖽡𖾐 𖼮𖽚𖾐 \fr 26．19 \ft “𖼍𖽡𖾐 𖼮𖽚𖾐” 𖼦𖽑𖽺𖾑 𖼠𖽻𖾐 𖼦𖽑𖽜𖾐 𖼦𖽑𖽜𖾐 𖼮𖽻𖾐 𖼺𖽪𖾐 𖼺𖽱 𖼣𖽻𖾐． 𖼖𖽡𖾐 𖼷𖽑𖽡𖾐 𖼊𖽝𖾐 𖼹𖽸𖾑 𖼖𖽡𖾐． 𖼺𖽧𖾐 𖼀𖽑𖽡 𖼊𖽑𖽡 𖼀𖽑𖽡 𖽂𖽚 𖼞𖽑𖽶𖾐 𖼀𖽑𖽨𖾐 𖼍𖽡𖾐 𖼮𖽚𖾐 𖼐𖽑𖽡 𖼊𖽝𖾐 𖼮𖽻𖾐，𖼺𖽧𖾐 𖼮𖽚𖾐 𖼀𖽑𖽨 𖼺𖽺𖾑 𖼀𖽑𖽨𖾐 𖼍𖽡𖾐 𖼮𖽚𖾐 𖼠𖽻𖾐 𖼞𖽑𖽶𖾐 𖼰𖽡𖽺𖾐 𖼖𖽡𖾐． 20 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽳𖾐 𖼳𖽶 𖼐𖽑𖽡𖽻𖾐 𖼄𖽡𖾐 𖼀𖽳 𖼖𖽺𖾑 𖼦𖽑𖽡𖽚 𖼺𖽪𖾐 𖼺𖽧𖾐 𖼀𖽑𖽡 𖼐𖽑𖽡 𖼷𖽑𖽡𖾐 𖼀𖽑𖽡 𖼹𖽸𖾑 𖼖𖽡𖾐， 21 𖼀𖽑𖽨𖾐 𖼍𖽡𖾐 𖼮𖽚𖾐 𖼖𖽡𖾐 𖼷𖽑𖽡𖾐 𖼊𖽝𖾐 𖼹𖽸𖾑 𖼖𖽡𖾐，𖼺𖽧𖾐 𖼀𖽑𖽡 𖼊𖽑𖽡 𖼀𖽑𖽡𖾑 𖼀𖽑𖽡 𖽂𖽚 𖼞𖽑𖽶𖾐 𖼀𖽑𖽨𖾐 𖼍𖽡𖾐 𖼮𖽚𖾐 𖼐𖽑𖽡 𖼊𖽝𖾐 𖼮𖽻𖾐 𖼖𖽡𖾐． 22 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽳𖾐 𖼠𖽙𖾑 𖼍𖽻𖾐 𖼀𖽳 𖼞𖽑𖽶𖾑 𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖼣𖽻𖾐，𖼦𖽑𖽡𖽚 𖼺𖽪𖾐 𖼺𖽧𖾐 𖼀𖽑𖽡 𖼮𖽑𖽡𖽚 𖼀𖽑𖽡 𖼹𖽸𖾑 𖼖𖽡𖾐． 23 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼠𖽙𖾑 𖼍𖽻𖾐 𖼀𖽳 𖼠𖽢𖾐 𖼞𖽚 𖼖𖽧𖾐 𖼐𖽑𖽡 𖼄𖽦𖾐 𖼞𖽳𖾐 𖼦𖽑𖽡𖽚 𖼺𖽪𖾐 𖼺𖽧𖾐 𖼀𖽑𖽡 𖼐𖽑𖽡 𖼀𖽑𖽡 𖼹𖽸𖾑 𖼖𖽡𖾐． 24 𖼺𖽧𖾐 𖼀𖽑𖽡 𖼦𖽑𖽺𖾑 𖼹𖽻𖾐 𖼍𖽕𖾑 𖽂𖽚 𖼞𖽑𖽶𖾑 𖼊𖽑𖽜𖾐 𖼺𖽧𖾐 𖼀𖽧𖾐 𖼐𖽑𖽡 𖼊𖽝𖾐 𖼮𖽻𖾐 𖼖𖽡𖾐，𖼞𖽕 𖼂𖽻𖾑 𖼞𖽑𖽶𖾑 𖼊𖽑𖽜𖾐 𖼷𖽙𖾐 𖼖𖽙𖾐 𖼊𖽴 𖼠𖽪𖾐 𖼖𖽪𖾐 𖼞𖽳𖾐 𖼮𖽑𖽡𖾐 𖼺𖽺𖾑，𖼠𖽪𖾐 𖼖𖽪𖾐 𖼻𖽜 𖼞𖽑𖽢𖾐 𖼷𖽙𖾐 𖼖𖽙𖾐 𖼍𖽡，𖼠𖽢𖾐 𖼞𖽚 𖼖𖽧𖾐 𖼦𖽑𖽺𖾑 𖼐𖽑𖽡 𖼀𖽑𖽡 𖼐𖽺𖾐 𖼦𖽑𖽺𖾑 𖼻𖽻𖾐 𖼂𖽺𖾐 𖼖𖽡𖾐． 25 𖽃𖽔𖾐 𖼺𖽺𖾑，𖼺𖽧𖾐 𖼀𖽑𖽡 𖼦𖽑𖽦 𖼀𖽑𖽡 𖼐𖽺𖾐 𖼀𖽑𖽨𖾐 𖼍𖽡𖾐 𖼮𖽚𖾐 𖼷𖽑𖽡𖾐 𖼮𖽑𖽡𖽚 𖼊𖽝𖾐 𖼮𖽻𖾐 𖼖𖽡𖾐，𖼺𖽧𖾐 𖼀𖽑𖽡 𖼊𖽑𖽡 𖼀𖽑𖽡𖾑 𖼀𖽑𖽡 𖽂𖽚 𖼞𖽑𖽶𖾐 𖼀𖽑𖽨𖾐 𖼍𖽡𖾐 𖼮𖽚𖾐 𖼐𖽑𖽡 𖼊𖽝𖾐 𖼮𖽻𖾐 𖼖𖽡𖾐．

26 𖼐𖽑𖽡𖾐 𖼮𖽑𖽪 𖼠𖽴𖾐 𖼺𖽧𖾐 𖼻𖽜 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽳𖾐 𖼰𖽡𖽻𖾑 𖼖𖽜 𖼹𖽸𖾑 𖼖𖽡𖾐，𖼠𖽳𖾐 𖼻𖽸 𖼄𖽡𖾐 𖼀𖽳 𖼦𖽑𖽡𖽚 𖼺𖽪𖾐 𖼺𖽧𖾐 𖼀𖽑𖽡 𖼖𖽙𖾐 𖼀𖽙𖾐 𖼰𖽡𖽻𖾑 𖼖𖽜 𖼣𖽙 𖼂𖽻𖾐 𖼹𖽸𖾑， 27 𖼳𖽶 𖼐𖽑𖽡𖽻𖾐 𖼄𖽡𖾐 𖼀𖽳 𖼦𖽑𖽡𖽚 𖼺𖽪𖾐 𖼺𖽧𖾐 𖼀𖽑𖽡 𖼖𖽙𖾐 𖼀𖽙𖾐 𖼰𖽡𖽻𖾑 𖼖𖽜 𖼣𖽙 𖼂𖽻𖾐 𖼹𖽸𖾑，𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖼦𖽑𖽡𖽚 𖼺𖽪𖾐 𖼺𖽧𖾐 𖼀𖽑𖽡 𖼖𖽙𖾐 𖼀𖽙𖾐 𖼖𖽺𖾑 𖼰𖽡𖽻𖾑 𖼖𖽜 𖼣𖽙 𖼂𖽻𖾐 𖼹𖽸𖾑 𖼖𖽡𖾐． 28 𖼺𖽧𖾐 𖼀𖽑𖽡 𖼠𖽻𖾐 𖼊𖽑𖽺 𖼞𖽳𖾐 𖼰𖽡𖽻𖾑 𖼖𖽜，𖼦𖽑𖽺𖾑 𖼀𖽳 𖼮𖽑𖽻𖾐 𖼺𖽳𖾐 𖼞𖽑𖽶𖾑 𖼀𖽳 𖼮𖽨𖾐 𖼖𖽡𖾐． 29 𖼺𖽧𖾐 𖼀𖽑𖽡 𖼐𖽺𖾐 𖼰𖽡𖽻𖾑 𖼖𖽜 𖼄𖽳𖾑 𖼄𖽳 𖼊𖽑𖽺 𖼳𖽳𖾐 𖼻𖽜 𖼂𖽻𖾐 𖼍𖽡 𖼖𖽡𖾐，𖼦𖽑𖽔𖾐 𖼖𖽺𖾑 𖼺𖽧𖾐 𖼀𖽑𖽡 𖼊𖽑𖽺 𖼳𖽳𖾐 𖼠𖽪𖾐 𖼖𖽪𖾐 𖼍𖽴𖾑 𖼺𖽺𖾑，𖼰𖽡𖽻𖾑 𖼖𖽜 𖼺𖽳𖾐 𖼰𖽡𖽺𖾐 𖼖𖽡𖾐．

30 𖼣𖽙𖾐 𖽂𖽙 𖼰𖽡𖽺𖾐 𖼊𖽑𖽺 𖼐𖽑𖽡𖾐 𖼖𖽙𖾐 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐 𖼐𖽑𖽡𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼍𖽚 𖼍𖽪𖾐 𖼖𖽻𖾐 𖼖𖽡𖾐． 𖼰𖽨𖽨𖾑 𖼍𖽻𖾑 𖼄𖽳𖾐 𖼞𖽳𖾐 𖼽𖽚

31 𖼐𖽑𖽡𖾐 𖼈𖽝 𖼊𖽑𖽧 𖼖𖽻𖾐 𖼺𖽪𖾐 𖼽𖽦 𖼄𖽳𖾐 𖼮𖽑𖽡𖾐 𖼄𖽶𖾑 𖼄𖽶𖾐 𖼐𖽺𖾐 𖼄𖽳𖾐 𖼷𖽺 𖼖𖽕𖾑 𖼖𖽕、 𖼄𖽳𖾐 𖼷𖽺 𖼐𖽑𖽡𖾐 𖼀𖽸、 𖼄𖽳𖾐 𖼷𖽺 𖼐𖽑𖽡𖾑 𖼐𖽑𖽡𖾐 𖼞𖽑𖽶𖾑 𖼳𖽶 𖼻𖽜 𖼰𖽨𖾑 𖼍𖽻𖾑 𖼄𖽳𖾐 𖼹𖽸𖾑 𖼖𖽡𖾐，𖼦𖽑𖽔𖾐 𖼖𖽺𖾑 𖼖𖽦 𖼠𖽸𖾑 𖼞𖽜 𖼰𖽨𖾑 𖼍𖽻𖾑 𖼄𖽳𖾐 𖼊𖽑𖽺 𖼰𖽡𖾐 𖼖𖽪𖾑 𖼂𖽚 𖼀𖽚𖾐 𖼍𖽦𖾐 𖼖𖽡𖾐． 32 𖼐𖽑𖽡𖾐 𖼰𖽨𖾑 𖼍𖽻𖾑 𖼄𖽳𖾐 𖼦𖽑𖽺𖾑 𖼀𖽑𖽨 𖼺𖽺𖾑，𖼳𖽳𖾐 𖼻𖽜 𖼂𖽻𖾐 𖼍𖽡 𖼺𖽪𖾐 𖼮𖽑𖽪 𖼠𖽴𖾐 𖼺𖽧𖾐 𖼠𖽻𖾐 𖼻𖽶𖾐 𖼖𖽡𖾐 𖼮𖽑𖽡𖾐 𖼞𖽳𖾐 𖼳𖽳𖾐 𖽃𖽔𖾑 𖼞𖽚 𖼖𖽦 𖼊𖽑𖽺 𖼠𖽕𖾑 𖼍𖽪𖾐 𖼖𖽡𖾐． 𖼠𖽻𖾐 𖼻𖽶𖾐 𖼮𖽑𖽡𖾐 𖼈𖽶 𖼀𖽑𖽨 𖼺𖽺𖾑，𖼀𖽑𖽨𖾐 𖼍𖽡𖾐 𖼮𖽚𖾐 𖼖𖽡𖾐 𖼊𖽝𖾐 𖼠𖽻𖾐 𖼞𖽑𖽶𖾐 𖼰𖽡𖽺𖾐 𖼖𖽡𖾐． 33 𖼐𖽑𖽡𖾐 𖼰𖽨𖾑 𖼍𖽻𖾑 𖼄𖽳𖾐 𖼀𖽑𖽨 𖼳𖽳𖾐 𖽃𖽔𖾑 𖼞𖽚 𖼖𖽦 𖼊𖽑𖽺 𖼠𖽕𖾑 𖼍𖽪𖾐，𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼈𖽦𖾑 𖼰𖽨𖾑 𖼍𖽻𖾑 𖼄𖽳𖾐 𖼞𖽑𖽶𖾐 𖼮𖽻𖾐 𖼀𖽳 𖼰𖽡𖽺𖾐，𖼰𖽨𖾑 𖼍𖽻𖾑 𖼄𖽳𖾐 𖼦𖽑𖽺𖾑 𖼺𖽡 𖼮𖽡𖾐 𖼊𖽺𖾐 𖼐𖽺𖾐 𖼺𖽡 𖼮𖽡𖾐 𖼷𖽑𖽚 𖼊𖽺𖾐 𖼖𖽙𖾐 𖼀𖽜𖾐 𖼀𖽑𖽪𖾐 𖼖𖽡𖾐．

34 𖼮𖽡 𖼽𖽡𖾑 𖼳𖽳𖾐 𖼮𖽡𖽺 𖼞𖽑𖽶𖾑 𖼀𖽑𖽨 𖼺𖽺𖾑，𖼺𖽡 𖼮𖽡𖾐 𖼷𖽑𖽚 𖼊𖽺𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼊𖽑𖽺 𖼍𖽦𖾐 𖼖𖽡𖾐． 35 𖼹𖽙𖾐 𖼹𖽶𖾐 𖼐𖽺𖾐 𖼀𖽙𖾐 𖼷𖽻𖾐 𖼀𖽑𖽨 𖼰𖽨𖾑 𖼍𖽻𖾑 𖼄𖽳𖾐 𖼐𖽑𖽡𖾑 𖼮𖽻𖾐 𖼀𖽳 𖼺𖽡 𖼮𖽡𖾐 𖼊𖽺𖾐 𖼞𖽳𖾐 𖼍𖽙𖾑 𖼖𖽡𖾐，𖼹𖽙𖾐 𖼹𖽶𖾐 𖼳𖽶 𖼐𖽑𖽡𖽻𖾐 𖼄𖽡𖾐 𖼀𖽳 𖼍𖽙𖾑，𖼀𖽙𖾐 𖼷𖽻𖾐 𖼠𖽳𖾐 𖼻𖽸 𖼄𖽡𖾐 𖼀𖽳 𖼍𖽙𖾑，𖼷𖽙𖾐 𖼖𖽙𖾐 𖼍𖽴 𖼍𖽪𖾐 𖼍𖽙𖾑 𖼖𖽡𖾐．

𖽃𖽔𖾐 𖼍𖽪 𖼮𖽑𖽨𖾑 𖼄𖽳𖾐 𖼐𖽺𖾐 𖼠𖽻𖾐 𖼻𖽶𖾐 𖼞𖽳𖾐 𖼠𖽴𖾐 𖼮𖽑𖽡𖽻𖾐

36 𖼐𖽑𖽡𖾐 𖼈𖽝 𖼊𖽑𖽧 𖼖𖽻𖾐 𖼺𖽪𖾐 𖼽𖽦 𖼄𖽳𖾐 𖼮𖽑𖽡𖾐 𖼄𖽶𖾑 𖼄𖽶𖾐 𖼐𖽺𖾐 𖼄𖽳𖾐 𖼷𖽺 𖼖𖽕𖾑 𖼖𖽕、 𖼄𖽳𖾐 𖼷𖽺 𖼐𖽑𖽡𖾐 𖼀𖽸、 𖼄𖽳𖾐 𖼷𖽺 𖼐𖽑𖽡𖾑 𖼐𖽑𖽡𖾐 𖼞𖽑𖽶𖾑 𖼳𖽶 𖼻𖽜，𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖽃𖽔𖾑 𖼊𖽪 𖼞𖽳𖾐 𖼮𖽑𖽨𖾑 𖼄𖽳𖾐 𖼷𖽝，𖼈𖽦𖾐 𖼖𖽪𖾐 𖼀𖽚𖾐 𖼍𖽦𖾐 𖼖𖽡𖾐． 37 𖼦𖽑𖽔𖾐 𖼖𖽺𖾑 𖼮𖽑𖽪 𖼠𖽴𖾐 𖼺𖽧𖾐 𖼻𖽜 𖼮𖽑𖽨𖾑 𖼄𖽳𖾐 𖼖𖽙𖾐 𖼀𖽙𖾐 𖼠𖽻𖾐 𖼻𖽶𖾐 𖼣𖽙 𖼂𖽻𖾐 𖼹𖽸𖾑 𖼖𖽡𖾐，𖼠𖽻𖾐 𖼻𖽶𖾐 𖼊𖽑𖽺 𖼳𖽳𖾐 𖼻𖽜 𖼂𖽻𖾐 𖼍𖽡，𖼳𖽳𖾐 𖽃𖽔𖾑 𖼞𖽚 𖼖𖽦 𖼂𖽺𖾐 𖼍𖽴𖾑 𖼖𖽡𖾐，𖼦𖽑𖽔𖾐 𖼖𖽺𖾑 𖼠𖽻𖾐 𖼻𖽶𖾐 𖼮𖽑𖽡𖾐 𖼈𖽶 𖼞𖽳𖾐 𖼮𖽡 𖼍𖽡𖾐 𖼮𖽚𖾐 𖼣𖽙 𖼊𖽝𖾐 𖼹𖽸𖾑 𖼖𖽡𖾐．