𖼽𖽦𖾑 𖼊𖽑𖽴𖾑 𖼖𖽚 𖼄𖽚 𖼳𖽡𖾐 𖼊𖽑𖽺 𖼄𖽡𖽻𖾐 𖼖𖽻𖾐
18
1 𖼄𖽚 𖼳𖽡𖾐 𖼞𖽳𖾐 𖼽𖽚 𖼀𖽑𖽙，𖼄𖽡 𖼍𖽡𖽦𖾑 𖼺𖽪𖾐 𖼍𖽡𖾐 𖼄𖽻 𖼽𖽦𖾑 𖼊𖽑𖽴𖾑 𖼖𖽚 ，𖼞𖽑𖽻𖾑 𖽂𖽙 𖼺𖽙𖾐 𖼂𖽙𖾐 𖼄𖽚 𖼳𖽡𖾐 𖼐𖽺𖾐 𖼽𖽻 𖼞𖽳𖾐 𖼷𖽑𖽻𖾐 𖼀𖽺 𖼊𖽑𖽺 𖼞𖽑𖽙𖾐 𖼂𖽺𖾐 𖼺𖽪𖾐 𖼄𖽡𖽻 𖼊𖽑𖽺 𖼊𖽻 𖼮𖽨，𖼞𖽑𖽶𖾑 𖼽𖽺𖾐 𖼦𖽴 𖼦𖽫 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖽃𖽔 𖼊𖽺𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼦𖽳 𖼊𖽚𖾐 𖼖𖽻𖾐 𖼺𖽪𖾐 𖼄𖽡𖽻 𖼣𖽻𖾐．2 𖽃𖽔𖾐 𖼺𖽺𖾑，𖼽𖽦𖾑 𖼊𖽑𖽴𖾑 𖼖𖽚 𖼽𖽻 𖼻𖽙 𖼄𖽳 𖼳𖽡𖾐 𖼀𖽑𖽙𖾐 𖼖𖽔𖾐 𖼊𖽑𖽺 𖼐𖽺𖾐 𖼽𖽻 𖼖𖽡𖾑 𖼂𖽙𖾑 𖼐𖽑𖽡 𖼽𖽚𖾐 𖼊𖽑𖽺 𖼦𖽳 𖼄𖽚 𖼳𖽡𖾐 𖼊𖽑𖽺 𖼄𖽡𖽻𖾐 𖼖𖽻𖾐，𖼳𖽡𖾐 𖼀𖽑𖽙𖾐 𖼖𖽔𖾐 𖼦𖽑𖽺𖾑 𖼄𖽚 𖼳𖽡𖾐 𖼞𖽳𖾐 𖼄𖽳 𖼻𖽙 𖼣𖽻𖾐，𖽃𖽙𖾑 𖼄𖽺 𖼞𖽑𖽶𖾑 𖼮𖽶𖾐 𖼄𖽚 𖼳𖽡𖾐 𖼽𖽻 𖼈𖽳𖾐 𖼊𖽑𖽺 𖼀𖽑𖽨 𖼽𖽻 𖼽𖽚 𖼀𖽑𖽙 𖼈𖽴 𖼞𖽳𖾐 𖼍𖽙𖾑 𖼍𖽧𖾑 𖼽𖽡𖾐． 3 𖼄𖽚 𖼳𖽡𖾐 𖼽𖽻 𖼻𖽙 𖼐𖽑𖽡 𖼽𖽚𖾐 𖼊𖽑𖽺 𖼊𖽑𖽡 𖼽𖽚𖾐 𖼠𖽴 𖼳𖽱𖾑 𖼄𖽡𖾐，𖼞𖽪𖾐 𖼮𖽡𖽺𖾐 𖼄𖽚 𖼳𖽡𖾐 𖼀𖽦𖾐：“𖼣𖽙𖾐 𖼺𖽙𖾐 𖼞𖽳𖾐 𖼄𖽡𖾐 𖼊𖽺𖾐 𖼣𖽙𖾑 𖼮𖽻𖾐 𖼺𖽪𖾐 𖼣𖽻𖾐．” 4 𖼊𖽑𖽡 𖼽𖽚𖾐 𖼽𖽡 𖼖𖽡𖾑 𖼽𖽡 𖼳𖽡𖽺𖾑 𖼄𖽡𖾐，𖼞𖽪𖾐 𖼮𖽡𖽺𖾐 𖼄𖽚 𖼳𖽡𖾐 𖼀𖽦𖾐： “𖼣𖽙𖾐 𖽃𖽔 𖼀𖽙 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼣𖽙𖾐 𖼊𖽑𖽺 𖼂𖽻𖾐 𖼮𖽨𖾐 𖼺𖽺𖾑，𖼣𖽙𖾐 𖼊𖽑𖽺 𖼇𖽕 𖼖𖽻 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼰𖽨𖾑 𖼊𖽑𖽧 𖼖𖽻𖾐，𖼽𖽻 𖼞𖽜 𖼣𖽙𖾐 𖼊𖽑𖽺 𖼄𖽔 𖼺𖽦 𖼦𖽑𖽙𖾐． 5 𖼄𖽚 𖼳𖽡𖾐 𖼽𖽚 𖼀𖽑𖽙 𖼽𖽦𖾑 𖼊𖽑𖽴𖾑 𖼖𖽚 ，𖼄𖽚 𖼳𖽡𖾐 𖼞𖽳𖾐 𖼄𖽳 𖼻𖽙 𖼐𖽺𖾐 𖼽𖽻 𖼻𖽙 𖼐𖽑𖽡 𖼽𖽚𖾐 𖼊𖽑𖽺 𖼦𖽳 ，𖼖𖽻𖾐 𖼺𖽺𖾑 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖽂𖽙 𖼰𖽡𖽺𖾐 𖼊𖽑𖽺 𖼮𖽑𖽡𖾐． 𖼞𖽑𖽶𖾑 𖼄𖽚 𖼳𖽡𖾐 𖼦𖽑𖽺𖾐 𖼠𖽴𖾐 𖼍𖽚 𖼮𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼣𖽻𖾐． 6 𖼽𖽦𖾑 𖼊𖽑𖽴𖾑 𖼖𖽚 𖼷𖽑𖽻𖾐 𖼹𖽡𖾐 𖼄𖽚 𖼳𖽡𖾐 𖼊𖽑𖽺 𖼀𖽦𖾐 𖼊𖽑𖽧 ：“𖼐𖽑𖽡𖾐 𖼽𖽚 𖼀𖽑𖽙 𖼽𖽦𖾑 𖼊𖽑𖽴𖾑 𖼖𖽚 𖼐𖽑𖽡𖾐 𖼊𖽑𖽺 𖼄𖽡𖽻𖾐 𖼖𖽻𖾐，𖼐𖽑𖽡𖾐 𖼄𖽳 𖼻𖽙 𖼐𖽺𖾐 𖼐𖽑𖽡𖾐 𖼻𖽙 𖼐𖽑𖽡 𖼽𖽚𖾐 𖼖𖽺𖾑 𖼮𖽑𖽻𖾐 𖼖𖽻𖾐 𖼍𖽳𖾐．”
7 𖼄𖽚 𖼳𖽡𖾐 𖼊𖽚𖾐 𖼖𖽻𖾐 𖼽𖽻 𖼽𖽚 𖼀𖽑𖽙 𖼊𖽑𖽺 𖼹𖽶𖾐，𖼽𖽻 𖽃𖽙𖾑 𖼄𖽺 𖼮𖽑𖽡𖽺 𖼊𖽑𖽴，𖼽𖽻 𖼖𖽙𖾐 𖼮𖽑𖽻𖾐 𖼮𖽑𖽻 𖼄𖽦𖾐 𖼹𖽮𖾑，𖼷𖽙𖾐 𖼖𖽙𖾐 𖼺𖽙𖾑 𖼺𖽙𖾐 𖼮𖽻𖾐 𖼊𖽻 𖼐𖽙𖾐 𖼦𖽑𖽻𖾐 𖼺𖽺𖾑，𖼊𖽑𖽡 𖼊𖽑𖽜 𖼦𖽑𖽺𖾐 𖼠𖽴𖾐 𖼞𖽑𖽶𖾐 𖼊𖽡 𖼽𖽡𖾐． 8 𖼽𖽺𖾐 𖼦𖽴 𖼦𖽫 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽙𖾐，𖼇𖽕 𖼖𖽻 𖼐𖽺𖾐 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼊𖽑𖽺 𖼞𖽑𖽙𖾐 𖼂𖽺𖾐 𖼄𖽡𖽻，𖼹𖽦𖾑 𖼮𖽨𖾐 𖼄𖽙𖾐 𖼊𖽑𖽺 𖼞𖽑𖽙𖾐 𖼷𖽶𖾐 𖼄𖽳𖾐 𖼞𖽳𖾐 𖼠𖽻𖾐 𖼰𖽡𖽳𖾐 𖼞𖽑𖽶𖾐 𖽃𖽔 𖼊𖽺𖾑 𖼻𖽻𖾐 𖼽𖽻 𖼈𖽳𖾐 𖼊𖽑𖽺 𖼰𖽨𖾑 𖼊𖽑𖽧 𖼖𖽻𖾐 𖼞𖽳𖾐 𖼄𖽡𖽻，𖼄𖽚 𖼳𖽡𖾐 𖼄𖽳𖾑 𖼄𖽳 𖼦𖽑𖽺 𖼽𖽻 𖼽𖽚𖾐 𖼀𖽑𖽙 𖼖𖽙𖾐 𖼊𖽑𖽧． 9 𖼞𖽪𖾐 𖼮𖽡𖽺𖾐，𖼽𖽺𖾐 𖼦𖽴 𖼦𖽫 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼖𖽦 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼰𖽨𖾑 𖼊𖽑𖽧 𖼖𖽻𖾐 𖼞𖽳𖾐 𖼹𖽳𖾐 𖼄𖽡𖽻 𖼖𖽙𖾐 𖼀𖽙𖾐 𖼺𖽺𖾑 ，𖼽𖽦𖾑 𖼊𖽑𖽴𖾑 𖼖𖽚 𖼦𖽑𖽔𖾐 𖼮𖽶𖾐 𖼖𖽺𖾑．
10 𖼽𖽦𖾑 𖼊𖽑𖽴𖾑 𖼖𖽚 𖼀𖽦𖾐： 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽑𖽪𖾐 𖼮𖽑𖽳 𖼷𖽻 𖼳𖽶 𖼣𖽻𖾐，𖼽𖽻 𖼐𖽑𖽡𖾐 𖼞𖽜 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼐𖽺𖾐 𖼇𖽕 𖼖𖽻 𖼖𖽦 𖼠𖽻𖾐 𖼞𖽑𖽶𖾐 𖽂𖽙𖾐 𖼮𖽡𖽪 𖼀𖽑𖽻𖾐 𖼊𖽚𖾐 𖼖𖽻𖾐，𖼦𖽑𖽔𖾐 𖼖𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼖𖽦 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼰𖽨𖾑 𖼊𖽑𖽧 𖼖𖽻𖾐． 11 𖽃𖽔𖾑 𖼄𖽳𖾐 𖼣𖽙𖾐 𖼺𖽝𖾑，𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼄𖽶𖾐 𖼷𖽑𖽚 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐，𖼽𖽻 𖼞𖽑𖽙𖾐 𖼣𖽻𖾐 𖼳𖽶 𖼺𖽡𖾐 𖼊𖽑𖽺 𖼠𖽳𖾐． 𖼞𖽪𖾐 𖼮𖽡𖽺𖾐，𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼳𖽡𖽦 𖼈𖽳 𖼄𖽙𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼮𖽑𖽡𖾐 𖼻𖽸 𖼺𖽺𖾑，𖼽𖽺𖾐 𖼦𖽴 𖼦𖽫 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼰𖽨𖾑 𖼊𖽑𖽧 𖼖𖽻𖾐 𖼞𖽳𖾐 𖼄𖽡𖽻 𖼖𖽙𖾐 𖼮𖽑𖽻𖾐 𖼐𖽦𖾐 𖼊𖽑𖽧 𖼖𖽻𖾐 𖼊𖽙𖾐．
12 𖽃𖽔𖾐 𖼺𖽺𖾑，𖼽𖽦𖾑 𖼊𖽑𖽴𖾑 𖼖𖽚 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼐𖽺𖾐 𖼞𖽳𖾐 𖼖𖽪𖾐 𖼍𖽡𖾐 𖼊𖽪𖾐 𖼊𖽑𖽡 𖼹𖽻𖾐 𖼈𖽺𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼍𖽡𖾐． 𖼽𖽕𖾑 𖼖𖽪𖽦 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽳 𖼄𖽻 𖼄𖽳𖾑 𖼄𖽳 𖼖𖽻𖾐 𖽂𖽙 𖼺𖽙𖾐 𖼂𖽙𖾐 𖽃𖽙𖾑 𖼄𖽺 𖼮𖽑𖽡𖽺，𖼽𖽦𖾑 𖼊𖽑𖽴𖾑 𖼖𖽚 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼷𖽙𖾐 𖼷𖽙．
𖼽𖽦𖾑 𖼊𖽑𖽴𖾑 𖼖𖽚 𖼄𖽚 𖼳𖽡𖾐 𖼊𖽑𖽺 𖼄𖽡𖽻 𖼮𖽨𖾐 𖼄𖽪𖾑
13 𖼠𖽙𖾑 𖼍𖽻𖾐 𖼊𖽑𖽡 𖼐𖽑𖽡𖾐，𖼄𖽚 𖼳𖽡𖾐 𖼊𖽡𖾐 𖼍𖽳𖾐 𖼷𖽑𖽻𖾐 𖼀𖽺 𖼖𖽙𖾐 𖼀𖽙𖾐 𖼄𖽡𖽻 𖼦𖽑𖽺，𖼷𖽑𖽻𖾐 𖼀𖽺 𖼄𖽶 𖼊𖽑𖽡 𖼮𖽑𖽻𖾐 𖼄𖽶 𖼮𖽑𖽧 𖼮𖽑𖽡𖾐 𖼖𖽺𖾑，𖼄𖽚 𖼳𖽡𖾐 𖼀𖽙 𖼮𖽑𖽶𖾐 𖼞𖽑𖽻𖾑 𖼦𖽑𖽡𖽚 𖼍𖽳𖾐．
14 𖼄𖽚 𖼳𖽡𖾐 𖼷𖽑𖽻𖾐 𖼀𖽺 𖼖𖽙𖾐 𖼀𖽙𖾐 𖼞𖽑𖽙𖾐 𖼂𖽺𖾐 𖼞𖽳𖾐 𖼄𖽡𖽻 𖼽𖽻 𖼽𖽚 𖼀𖽑𖽙 𖼐𖽦𖾐 𖼄𖽡𖽻𖾐 𖼺𖽺𖾑，𖼀𖽦𖾐：“𖼐𖽑𖽡𖾐 𖽃𖽔𖾐 𖼹𖽻𖾐 𖼷𖽑𖽻𖾐 𖼀𖽺 𖼊𖽑𖽺 𖼦𖽑𖽺𖾑 𖼻𖽻𖾐 𖼂𖽺𖾐 𖼐𖽺𖾑？ 𖽃𖽔𖾐 𖼹𖽻𖾐 𖼐𖽑𖽡𖾐 𖼊𖽑𖽡 𖼽𖽚𖾐 𖼍𖽺𖾑 𖼊𖽡𖾐 𖼍𖽳𖾐 𖼄𖽡𖽻 𖼦𖽑𖽺 𖼺𖽺𖾑，𖼷𖽑𖽻𖾐 𖼀𖽺 𖼞𖽑𖽙𖾐 𖼣𖽻𖾐 𖼄𖽶 𖼊𖽑𖽡 𖼮𖽑𖽻𖾐 𖼄𖽶 𖼮𖽑𖽧 𖼖𖽙𖾐 𖼮𖽑𖽡𖾐 𖼖𖽺𖾑 𖼐𖽑𖽡𖾐 𖼀𖽙 𖼮𖽑𖽶𖾐 𖼦𖽑𖽡𖽚 𖼍𖽳𖾐 𖼐𖽺𖾑？ ”
15 𖼄𖽚 𖼳𖽡𖾐 𖼽𖽻 𖼽𖽚 𖼀𖽑𖽙 𖼖𖽙𖾐 𖼊𖽻 𖼞𖽑𖽚：“𖼞𖽪𖾐 𖼮𖽡𖽺𖾐 𖼷𖽑𖽻𖾐 𖼀𖽺 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼄𖽡𖽻 𖼮𖽨𖾐 𖼊𖽻 𖼐𖽙𖾐． 16 𖼽𖽻 𖼈𖽳𖾐 𖼄𖽡𖽻 𖼮𖽻𖾐 𖼞𖽑𖽶𖾑 𖼮𖽶𖾐，𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐，𖼣𖽙𖾐 𖼽𖽻 𖼈𖽳𖾐 𖼐𖽑𖽡 𖼀𖽳 𖼖𖽙𖾐 𖼀𖽙𖾐 𖼄𖽡𖽻 𖼦𖽑𖽺 𖼀𖽑𖽪𖾐，𖼽𖽻 𖼈𖽳𖾐 𖼞𖽜 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼐𖽑𖽡𖾐 𖼮𖽡𖽺𖾐 𖼐𖽺𖾐 𖼳𖽪𖾐 𖼮𖽨𖾐 𖼦𖽑𖽺𖾑 𖼊𖽑𖽺 𖼺𖽝𖾑 𖼖𖽡𖾐．”
17 𖼽𖽻 𖼽𖽚 𖼀𖽑𖽙 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼦𖽑𖽺𖾑 𖼻𖽻𖾐 𖼊𖽑𖽔 𖼂𖽺𖾐． 18 𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼀𖽺 𖼄𖽳𖾑 𖼄𖽳 𖼖𖽺𖾑 𖼦𖽑𖽔𖾐 𖼮𖽶𖾐 𖽂𖽙 𖼞𖽶𖾐，𖼞𖽪𖾐 𖼮𖽡𖽺𖾐 𖼄𖽡𖽻 𖼄𖽨 𖼐𖽑𖽡𖾐 𖼊𖽑𖽡 𖼽𖽚𖾐 𖼍𖽺𖾑 𖼂𖽺𖾐 𖼦𖽑𖽻𖾐 𖼄𖽔 𖼊𖽙𖾐． 19 𖽃𖽔𖾑 𖼄𖽳𖾐 𖼐𖽑𖽡𖾐 𖼣𖽙𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐 ，𖼣𖽙𖾐 𖼐𖽑𖽡𖾐 𖼊𖽑𖽺 𖼄𖽡𖽻 𖼊𖽑𖽡 𖼮𖽨𖾐 𖼀𖽦𖾐 𖼄𖽪𖾑，𖽂𖽙 𖼺𖽙𖾐 𖼂𖽙𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼮𖽻𖾐 𖼞𖽜． 𖼐𖽑𖽡𖾐 𖼷𖽑𖽻𖾐 𖼀𖽺 𖼊𖽑𖽡𖾑 𖼮𖽪 𖽂𖽙 𖼺𖽙𖾐 𖼂𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼖𖽻𖾐，𖼽𖽻 𖼈𖽳𖾐 𖼞𖽳𖾐 𖼄𖽡𖽻 𖼮𖽨𖾐 𖼀𖽦𖾐 𖽂𖽙 𖼺𖽙𖾐 𖼂𖽙𖾐 𖼖𖽙𖾐 𖼊𖽑𖽧 𖼖𖽡𖾐． 20 𖼦𖽑𖽔𖾐 𖼖𖽺𖾑 𖼽𖽻 𖼈𖽳𖾐 𖼊𖽑𖽺 𖼐𖽑𖽡𖾐 𖼮𖽡𖽺𖾐 𖼐𖽺𖾐 𖼳𖽪𖾐 𖼮𖽨𖾐 𖼄𖽪𖾑 𖼍𖽴𖾑，𖼮𖽻𖾐 𖼮𖽡𖽺𖾐 𖽃𖽔 𖼊𖽺𖾐 𖼠𖽚 𖼖𖽡𖾐，𖼄𖽡𖽻 𖼂𖽺𖾐 𖼊𖽙𖾐 𖼄𖽔 𖼊𖽙𖾐 𖼺𖽝𖾑 𖼖𖽡𖾐． 21 𖼐𖽑𖽡𖾐 𖼦𖽑𖽔𖾐 𖼖𖽺𖾑 𖼷𖽑𖽻𖾐 𖼀𖽺 𖼠𖽻𖾐 𖼊𖽑𖽺 𖼈𖽪𖾐 𖼺𖽝𖾑 𖽂𖽙 𖼐𖽑𖽡𖾐 𖼮𖽻𖾐 𖼺𖽪𖾐 𖼊𖽑𖽺 𖼺𖽺𖾐 𖼊𖽑𖽧 𖼖𖽻𖾐 𖼖𖽡𖾐，𖼞𖽑𖽶𖾑 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼮𖽡𖽮𖾐 𖼠𖽙𖾐 𖼳𖽙𖾐 𖼺𖽪𖾐，𖼐𖽑𖽧𖾐 𖼹𖽳𖾐 𖼣𖽜𖾐 𖼻𖽺𖾐 𖼊𖽙𖾐，𖼄𖽔 𖼹𖽳𖾐 𖼮𖽑𖽻𖾐 𖼖𖽻𖾐 𖼺𖽪𖾐 𖼮𖽡 𖼀𖽑𖽡 𖼊𖽑𖽺 𖼦𖽶𖾑 𖼺𖽪𖾐 𖼷𖽑𖽻𖾐 𖼣𖽻𖾐． 𖼽𖽻 𖼈𖽳𖾐 𖼞𖽜 𖼍𖽪𖾐 𖼈𖽪𖾑 𖼷𖽪𖾐、 \fr 18．21 \ft “𖼍𖽪𖾐 𖼈𖽪𖾑 𖼷𖽪𖾐” 𖼦𖽑𖽺𖾑 “𖼊𖽑𖽡 𖼍𖽪𖾐 𖼽𖽚𖾐” 𖼊𖽑𖽺 𖼠𖽕 𖼺𖽪𖾐 𖼈𖽪𖾑 𖼷𖽪𖾐 𖼣𖽻𖾐． 𖼦𖽑𖽙𖾐 𖼈𖽪𖾑 𖼷𖽪𖾐、 \fr 18．21 \ft “𖼦𖽑𖽙𖾐 𖼈𖽪𖾑 𖼷𖽪𖾐” 𖼦𖽑𖽺𖾑 “𖼊𖽑𖽡 𖼦𖽑𖽙𖾐 𖼽𖽚𖾐” 𖼊𖽑𖽺 𖼠𖽕 𖼺𖽪𖾐 𖼈𖽪𖾑 𖼷𖽪𖾐 𖼣𖽻𖾐．𖼣𖽙 𖼷𖽑𖽡𖾐 𖼈𖽪𖾑 𖼷𖽪𖾐 \fr 18．21 \ft “𖼣𖽙 𖼈𖽪𖾑 𖼷𖽪𖾐” 𖼦𖽑𖽺𖾑 “𖼣𖽙 𖼷𖽑𖽡𖾐 𖼽𖽚𖾐” 𖼊𖽑𖽺 𖼠𖽕 𖼺𖽪𖾐 𖼈𖽪𖾑 𖼷𖽪𖾐 𖼣𖽻𖾐． 𖼐𖽺𖾐 𖼷𖽑𖽡𖾐 𖼈𖽪𖾑 𖼷𖽪𖾐 \fr 18．21 \ft “𖼷𖽑𖽡𖾐 𖼈𖽪𖾑 𖼷𖽪𖾐 ” 𖼦𖽑𖽺𖾑 “𖼷𖽑𖽡𖾐 𖼽𖽚𖾐” 𖼊𖽑𖽺 𖼠𖽕𖼺𖽪𖾐 𖼈𖽪𖾑 𖼷𖽪𖾐 𖼣𖽻𖾐．𖼂𖽺𖾐 𖼷𖽑𖽻𖾐 𖼀𖽺 𖼊𖽑𖽺 𖼠𖽕 𖼖𖽡𖾐． 22 𖼽𖽻 𖼈𖽳𖾐 𖼞𖽑𖽙 𖼊𖽑𖽻𖾐 𖼣𖽻𖾐 𖼦𖽻，𖼷𖽑𖽻𖾐 𖼀𖽺 𖼞𖽳𖾐 𖼄𖽡𖽻 𖼮𖽨𖾐 𖼊𖽑𖽺 𖼦𖽑𖽺 𖼊𖽙𖾐，𖼄𖽡𖽻 𖼈𖽳 𖼞𖽑𖽙𖾐 𖼣𖽻𖾐 𖼐𖽑𖽡𖾐 𖼞𖽳𖾐 𖼦𖽑𖽺 𖼖𖽻𖾐，𖼄𖽡𖽻 𖼽𖽳𖾐 𖼺𖽪𖾐 𖼽𖽻 𖼈𖽳𖾐 𖼦𖽑𖽺 𖼍𖽺𖾑 𖼻𖽻𖾐． 𖼦𖽑𖽺𖾑 𖼻𖽻𖾐 𖼂𖽺𖾐 𖼺𖽺𖾑，𖼐𖽑𖽡𖾐 𖼞𖽳𖾐 𖼄𖽡𖽻 𖼖𖽻𖾑 𖼖𖽻𖾐 𖼊𖽻𖾐，𖼽𖽻 𖼈𖽳𖾐 𖼞𖽜 𖼖𖽺𖾑 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼄𖽡𖽻 𖼮𖽑𖽻 𖼀𖽶 𖼍𖽳𖾐． 23 𖼐𖽑𖽡𖾐 𖼦𖽑𖽺𖾑 𖼻𖽻𖾐 𖼂𖽺𖾐，𖽂𖽙 𖼺𖽙𖾐 𖼂𖽙𖾐 𖼖𖽺𖾑 𖼐𖽑𖽡𖾐 𖼊𖽑𖽺 𖼦𖽑𖽺𖾑 𖼻𖽻𖾐 𖼀𖽦𖾐 𖼄𖽪𖾑 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼖𖽺𖾑 𖼷𖽳𖾑 𖼍𖽪𖾐 𖼊𖽙𖾐，𖼷𖽑𖽻𖾐 𖼀𖽺 𖼞𖽜 𖼖𖽺𖾑 𖼺𖽙𖾑 𖼺𖽙𖾐 𖼀𖽑𖽚𖾐 𖼽𖽻 𖼄𖽳𖾑 𖽃𖽔𖾑 𖼞𖽑𖽶𖾐 𖽂𖽙𖾐 𖼠𖽚𖾐 𖼽𖽡𖾐 𖼊𖽙𖾐．
𖼄𖽚 𖼳𖽡𖾐 𖼽𖽻 𖼽𖽚 𖼀𖽑𖽙 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐
24 𖽃𖽔𖾐 𖼺𖽺𖾑，𖼄𖽚 𖼳𖽡𖾐 𖼽𖽻 𖼽𖽚 𖼀𖽑𖽙 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐，𖼽𖽻 𖼞𖽑𖽙𖾐 𖼀𖽦𖾐 𖼄𖽪𖾑 𖼖𖽙𖾐 𖼮𖽑𖽻𖾐 𖼂𖽺𖾐 𖼽𖽡𖾐． 25 𖼄𖽚 𖼳𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼀𖽺 𖼠𖽻𖾐 𖼊𖽑𖽺 𖽂𖽙 𖼐𖽑𖽡𖾐 𖼈𖽪𖾑 𖼺𖽝𖾑 𖼮𖽻𖾐 𖼺𖽪𖾐 𖼊𖽑𖽺 𖼺𖽺𖾐 𖼊𖽑𖽧 𖼖𖽻𖾐，𖼽𖽻 𖼈𖽳𖾐 𖼞𖽜 𖼍𖽪𖾐 𖼈𖽪𖾑 𖼷𖽪𖾐、 𖼦𖽑𖽙𖾐 𖼈𖽪𖾑 𖼷𖽪𖾐、 𖼣𖽙 𖼷𖽑𖽡𖾐𖼈𖽪𖾑 𖼷𖽪𖾐 𖼐𖽺𖾐 𖼷𖽑𖽡𖾐 𖼈𖽪𖾑 𖼷𖽪𖾐𖼂𖽺𖾐 𖼷𖽑𖽻𖾐 𖼀𖽺 𖼊𖽑𖽺 𖼠𖽔． 26 𖼽𖽻 𖼈𖽳𖾐 𖼻𖽳𖾐 𖼻𖽳𖾐 𖼷𖽑𖽻𖾐 𖼀𖽺 𖼖𖽙𖾐 𖼀𖽙𖾐 𖼄𖽡𖽻 𖼮𖽨𖾐 𖼊𖽑𖽺 𖼦𖽺． 𖼖𖽳𖾐 𖼮𖽡𖽺 𖼞𖽳𖾐 𖼄𖽡𖽻 𖼮𖽨𖾐 𖼽𖽻 𖼈𖽳𖾐 𖼮𖽑𖽢𖾑 𖼦𖽺，𖼂𖽕𖾑 𖼞𖽑𖽕𖾐 𖼞𖽳𖾐 𖼄𖽡𖽻 𖼮𖽻𖾐 𖼞𖽑𖽶𖾑 𖼮𖽶𖾐 𖼍𖽺𖾑 𖼄𖽚 𖼳𖽡𖾐 𖼞𖽳𖾐 𖼞𖽑𖽻𖾑 𖼽𖽡𖾐．
27 𖼠𖽙𖾑 𖼍𖽻𖾐，𖼄𖽚 𖼳𖽡𖾐 𖼽𖽻 𖼽𖽚 𖼀𖽑𖽙 𖼊𖽑𖽺 𖼦𖽑𖽙𖾐 𖼺𖽜 𖼽𖽡𖾐 𖼦𖽑𖽙𖾐 𖼺𖽺𖾑，𖼽𖽻 𖼞𖽜 𖼀𖽑𖽚𖾐 𖼽𖽻 𖼄𖽳𖾑 𖼮𖽻𖾐 𖼞𖽳𖾐 𖼞𖽚 𖼽𖽡𖾐 𖼦𖽑𖽙𖾐．