𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼳𖽡𖾐 𖼐𖽦𖾑 𖽂𖽙 𖼰𖽡𖽺𖾐 𖼮𖽻𖾐
19
1 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼊𖽚𖾐 𖼖𖽻𖾐 𖼠𖽙𖾑 𖼍𖽻𖾐，𖼺𖽕𖾐 𖼣𖽕𖾐 𖼳𖽨𖾐 𖼊𖽦𖾐 𖼊𖽑𖽡 𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼖𖽻𖾐 𖼳𖽡𖾐 𖼐𖽦𖾑 𖽂𖽙 𖼰𖽡𖽺𖾐 𖼞𖽳𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼮𖽑𖽡𖾐． 2 𖼽𖽻 𖼈𖽳𖾐 𖼖𖽡𖾑 𖼇𖽺𖾐 𖼍𖽧𖾑 𖼄𖽡𖾐 𖼊𖽺𖾐 𖼮𖽑𖽻𖾐 𖼺𖽜 𖼍𖽪𖾐，𖼖𖽻𖾐 𖼳𖽡𖾐 𖼐𖽦𖾑 𖽂𖽙 𖼰𖽡𖽺𖾐 𖼞𖽳𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼮𖽑𖽡𖾐 𖼺𖽺𖾑，𖽂𖽙 𖼰𖽡𖽺𖾐 𖼞𖽑𖽶𖾐 𖼄𖽡𖾐 𖼳𖽡𖽻𖾐 𖼞𖽳𖾐 𖼞𖽑𖽶𖾑 𖼠𖽻𖾐 𖼦𖽑𖽺𖾐 𖼠𖽴𖾐 𖼍𖽚 𖼈𖽶．𖽂𖽙 𖼺𖽙𖾐 𖼂𖽙𖾐 𖼞𖽜 𖼮𖽙𖾐 𖼺𖽪𖾐 𖼄𖽳𖾐 𖼷𖽑𖽦𖾐
3 𖼄𖽚 𖼳𖽡𖾐 𖽂𖽙 𖼰𖽡𖽺𖾐 𖼊𖽑𖽺 𖼊𖽦𖾐 𖼽𖽡𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼞𖽑𖽻𖾑 𖼽𖽡𖾐，𖼽𖽺𖾐 𖼦𖽴 𖼦𖽫 𖽂𖽙 𖼰𖽡𖽺𖾐 𖼊𖽑𖽺 𖼮𖽑𖽻𖾐 𖼽𖽻 𖼊𖽑𖽺 𖽃𖽶𖾐，𖼀𖽦𖾐：“𖼐𖽑𖽡𖾐 𖼽𖽔 𖼠𖽴𖾑 𖼈𖽴 𖼊𖽑𖽺 𖼦𖽑𖽺𖾑 𖼻𖽻𖾐 𖼀𖽦𖾐 𖼊𖽑𖽧 ，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼦𖽑𖽺𖾑 𖼻𖽻𖾐 𖼄𖽪𖾑 𖼍𖽴𖾑 𖼖𖽡𖾐 ： 4 ‘ 𖼣𖽙𖾐 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼊𖽑𖽺 𖼞𖽑𖽙𖾐 𖼂𖽺𖾐 𖼞𖽳𖾐 𖼄𖽡𖽻，𖼐𖽑𖽡𖾐 𖼈𖽳𖾐 𖼄𖽳𖾑 𖼄𖽳 𖼐𖽦𖾐 𖼄𖽡𖽻𖾐 𖼦𖽑𖽻𖾐，𖼦𖽑𖽔𖾐 𖼖𖽺𖾑 𖼷𖽜𖾐 𖼄𖽙𖾐 𖼷𖽜𖾐 𖼻𖽙 𖼊𖽑𖽺 𖼀𖽶 𖼖𖽙𖾐 𖼺𖽶𖾑，𖼣𖽙𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼦𖽳 𖼦𖽑𖽺𖾑 𖼠𖽻𖾐 𖼮𖽑𖽡𖾐 𖼖𖽻𖾐． 5 𖽃𖽔𖾑 𖼄𖽳𖾐 𖼐𖽑𖽡𖾐 𖼈𖽳𖾐 𖼣𖽙𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐 𖼦𖽶𖾐，𖼣𖽙𖾐 𖼄𖽳𖾐 𖼷𖽑𖽦𖾐 𖼊𖽑𖽺 𖼳𖽪𖾐 𖼦𖽶𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼈𖽳𖾐 𖼊𖽑𖽺 𖼍𖽪𖾐 𖼄𖽺 𖼷𖽑𖽻𖾐 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼺𖽺𖾐 𖼊𖽑𖽧 𖼖𖽻𖾐 𖼣𖽙𖾐 𖼞𖽳𖾐 𖼀𖽑𖽶 𖼊𖽴 𖼺𖽪𖾐 𖼷𖽑𖽻𖾐 𖼀𖽺 𖼂𖽺𖾐 𖼊𖽻𖾐，𖼞𖽪𖾐 𖼮𖽡𖽺𖾐 𖼄𖽶 𖼊𖽑𖽡 𖼊𖽺𖾐 𖼣𖽙𖾐 𖼞𖽳𖾐 𖼣𖽻𖾐． 6 𖼐𖽑𖽡𖾐 𖼈𖽳𖾐 𖼦𖽑𖽺𖾑 𖼣𖽙𖾐 𖼞𖽳𖾐 𖼀𖽑𖽶 𖼊𖽴 𖼺𖽪𖾐 𖼍𖽡𖾐 𖼄𖽻 𖼐𖽺𖾐 𖼣𖽙𖾐 𖼺𖽡 𖼮𖽡𖾐 𖼺𖽪𖾐 𖼠𖽚 𖼠𖽻𖾐 𖼞𖽑𖽶𖾐 𖼞𖽳𖾐 𖼷𖽑𖽻𖾐 𖼀𖽺 𖼣𖽻𖾐，𖼊𖽻 𖼂𖽪𖾑 𖼦𖽑𖽺𖾑 𖼹𖽻𖾐 𖼐𖽑𖽡𖾐 𖼄𖽳𖾑 𖼄𖽳 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼀𖽦𖾐 𖼖𖽡𖾐．
7 𖼄𖽚 𖼳𖽡𖾐 𖼽𖽡𖾐 𖼷𖽑𖽻𖾐 𖼀𖽺 𖼞𖽳𖾐 𖼮𖽳 𖼄𖽻 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐，𖼽𖽺𖾐 𖼦𖽴 𖼦𖽫 𖼽𖽻 𖼊𖽑𖽺 𖼞𖽑𖽙𖾐 𖼄𖽪𖾑 𖼍𖽴𖾑 𖼺𖽪𖾐，𖼽𖽻 𖼄𖽳𖾑 𖼄𖽳 𖼀𖽦𖾐 𖼽𖽻 𖼈𖽳𖾐 𖼊𖽑𖽺 𖼰𖽨𖾐． 8 𖼷𖽑𖽻𖾐 𖼀𖽺 𖼄𖽳𖾑 𖼄𖽳 𖼊𖽻 𖼞𖽑𖽚 𖼀𖽦𖾐：“𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼄𖽪𖾑 𖼍𖽴𖾑 𖼺𖽪𖾐，𖼣𖽙𖾐 𖼈𖽳𖾐 𖼄𖽳𖾑 𖼄𖽳 𖼳𖽪𖾐 𖼊𖽻𖾐． 𖽃𖽔𖾐 𖼺𖽺𖾑，𖼷𖽑𖽻𖾐 𖼀𖽺 𖼀𖽦𖾐 𖼺𖽪𖾐 𖼊𖽻 𖼂𖽪𖾑 𖼄𖽚 𖼳𖽡𖾐 𖼀𖽦𖾐 𖼽𖽺𖾐 𖼦𖽴 𖼦𖽫 𖼖𖽙𖾐 𖼊𖽑𖽧．”
𖼄𖽳𖾐 𖼷𖽑𖽦𖾐 𖼖𖽙𖾐 𖼀𖽙𖾐 𖼂𖽺𖾐 𖼳𖽡𖽻𖾐
9 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼐𖽦𖾐 𖼄𖽺! 𖼣𖽙𖾐 𖼍𖽡𖾐 𖼮𖽑𖽙𖾐 𖼞𖽑𖽶𖾐 𖼮𖽻𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐 𖼞𖽑𖽶𖾑 𖼮𖽶𖾐，𖼷𖽑𖽻𖾐 𖼀𖽺 𖼞𖽜 𖼊𖽻 𖼮𖽨 𖼊𖽻𖾐，𖼽𖽻 𖼈𖽳𖾐 𖼞𖽜 𖼻𖽳𖾐 𖼻𖽳𖾐 𖼐𖽑𖽡𖾐 𖼊𖽑𖽺 𖼊𖽻 𖼮𖽶𖾐 𖼊𖽙𖾐．”
𖽃𖽔𖾐 𖼺𖽺𖾑，𖼄𖽚 𖼳𖽡𖾐 𖼷𖽑𖽻𖾐 𖼀𖽺 𖼞𖽑𖽙𖾐 𖼊𖽑𖽜𖾐 𖼺𖽪𖾐 𖼊𖽻 𖼂𖽪𖾑 𖼀𖽦𖾐 𖼽𖽺𖾐 𖼦𖽴 𖼦𖽫 𖼖𖽙𖾐 𖼊𖽑𖽧． 10 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼷𖽑𖽻𖾐 𖼀𖽺 𖼞𖽳𖾐 𖼞𖽑𖽶𖾑 𖼠𖽻𖾐 𖼽𖽡𖾐，𖽃𖽙𖾑 𖼐𖽑𖽡𖾐 𖼮𖽑𖽻𖾐 𖽃𖽔𖾑 𖼞𖽶𖾐 𖼐𖽑𖽡𖾐 𖼮𖽑𖽡𖾐，𖼽𖽻 𖼈𖽳𖾐 𖼽𖽻 𖼄𖽳𖾑 𖼞𖽚 𖼺𖽡 𖼮𖽡𖾐 𖼖𖽡𖾐，𖼽𖽻 𖼈𖽳𖾐 𖼞𖽜 𖼽𖽻 𖼄𖽳𖾑 𖼀𖽑𖽡𖽻𖾐 𖼷𖽑𖽶 𖼷𖽑𖽡 𖼖𖽡𖾐． 11 𖼺𖽙𖾐 𖼐𖽑𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼽𖽻 𖼈𖽳𖾐 𖼂𖽺𖾐 𖼳𖽡𖽻𖾐 𖼀𖽑𖽢 𖼖𖽡𖾐． 𖼞𖽪𖾐 𖼮𖽡𖽺𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼽𖽺𖾐 𖼦𖽴 𖼦𖽫 𖼷𖽑𖽻𖾐 𖼀𖽺 𖼄𖽳𖾑 𖼄𖽳 𖼄𖽦𖾐 𖼊𖽪 𖼮𖽑𖽡𖽺 𖼄𖽙𖾐 𖼹𖽺𖾐 𖼖𖽻𖾐 𖼳𖽡𖾐 𖼐𖽦𖾑 𖽂𖽙 𖼰𖽡𖽺𖾐 𖼊𖽑𖽺 𖼮𖽻𖾐 𖼊𖽻𖾐． 12 𖼐𖽑𖽡𖾐 𖼷𖽑𖽻𖾐 𖼀𖽺 𖼖𖽙𖾐 𖼀𖽙𖾐 𖽂𖽙 𖼰𖽡𖽺𖾐 𖼞𖽳𖾐 𖼦𖽜 𖼷𖽜𖾐 𖼄𖽡𖾐 𖼹𖽸𖾑 𖼺𖽙 𖼍𖽴𖾑 𖼖𖽡𖾐，𖼀𖽦𖾐：‘ 𖼐𖽑𖽡𖾐 𖼈𖽳𖾐 𖼷𖽜𖾐 𖼍𖽳𖾐 𖼖𖽡𖾐，𖽂𖽙 𖼰𖽡𖽺𖾐 𖼊𖽑𖽺 𖽂𖽙𖾐 𖼊𖽦𖾐 𖼽𖽡𖾐 𖼄𖽔 𖼊𖽙𖾐，𖽂𖽙 𖼰𖽡𖽺𖾐 𖼞𖽳𖾐 𖼦𖽜 𖼷𖽜𖾐 𖼖𖽺𖾑 𖽂𖽙𖾐 𖼄𖽚𖾐 𖼄𖽔 𖼊𖽙𖾐，𖽂𖽙 𖼰𖽡𖽺𖾐 𖼊𖽑𖽺 𖼞𖽑𖽙𖾐 𖼄𖽚𖾐 𖼄𖽳𖾐 𖼺𖽪𖾐 𖼷𖽑𖽻𖾐，𖼽𖽻 𖼞𖽜 𖼷𖽑𖽜𖾑 𖼷𖽑𖽜𖾐 𖼳𖽶𖾐 𖼊𖽻𖾐． 13 𖼦𖽑𖽻𖾐 𖼊𖽑𖽻𖾐，𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖽂𖽙𖾐 𖼄𖽚𖾐 𖼄𖽳𖾐 𖼄𖽔 𖼊𖽙𖾐，𖼖𖽚𖾐 𖼄𖽙𖾐 𖼻𖽜 𖼽𖽻 𖼊𖽑𖽺 𖼷𖽴𖾐 𖼳𖽶𖾐 𖼦𖽑𖽙𖾐 𖼖𖽡𖾐，𖼮𖽑𖽡𖽦𖾐 𖼻𖽜 𖼀𖽝𖾐 𖼳𖽶𖾐 𖼖𖽺𖾑 𖼊𖽙𖾐． 𖼷𖽑𖽻𖾐 𖼣𖽻𖾐 𖼦𖽻，𖼮𖽡𖽺 𖼣𖽻𖾐 𖼦𖽻，𖼽𖽻 𖼞𖽜 𖽂𖽙𖾐 𖼠𖽙𖾑 𖼄𖽔 𖼊𖽙𖾐．’ 𖼽𖽻𖾐 𖼮𖽑𖽡𖽪𖾐 𖼄𖽸𖾐 𖼮𖽑𖽡𖽪 𖼊𖽻 𖼮𖽨 𖼞𖽑𖽶𖾑 𖼮𖽶𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖽂𖽙 𖼰𖽡𖽺𖾐 𖼊𖽑𖽺 𖽂𖽙𖾐 𖼊𖽦𖾐 𖼖𖽻𖾐 𖼊𖽙𖾐．”
14 𖼄𖽚 𖼳𖽡𖾐 𖽂𖽙 𖼰𖽡𖽺𖾐 𖼊𖽑𖽺 𖼮𖽑𖽻𖾐 𖼹𖽺𖾐 𖼖𖽻𖾐 𖼷𖽑𖽻𖾐 𖼀𖽺 𖼞𖽳𖾐 𖼞𖽑𖽶𖾑 𖼠𖽻𖾐 𖼽𖽡𖾐，𖼷𖽑𖽻𖾐 𖼀𖽺 𖼞𖽜 𖼽𖽻 𖼄𖽳𖾑 𖼞𖽚 𖼺𖽡 𖼮𖽡𖾐，𖽃𖽔𖾐 𖼺𖽺𖾑 𖼽𖽻 𖼈𖽳𖾐 𖼽𖽻 𖼄𖽳𖾑 𖼀𖽑𖽡𖽻𖾐 𖼷𖽑𖽶 𖼷𖽑𖽡 𖼠𖽔𖾐 𖼹𖽧𖾑 𖼦𖽑𖽻𖾐． 15 𖼄𖽚 𖼳𖽡𖾐 𖼷𖽑𖽻𖾐 𖼀𖽺 𖼖𖽙𖾐 𖼀𖽦𖾐：“𖼺𖽙𖾐 𖼐𖽑𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼮𖽑𖽡𖾐，𖼐𖽑𖽡𖾐 𖼈𖽳𖾐 𖼂𖽺𖾐 𖼳𖽡𖽻𖾐 𖼀𖽑𖽢 𖼖𖽡𖾐，𖼻𖽙 𖼄𖽳 𖼊𖽑𖽺 𖽂𖽙𖾐 𖼐𖽳 𖼄𖽔 𖼊𖽙𖾐．”
𖽂𖽙 𖼺𖽙𖾐 𖼂𖽙𖾐 𖼳𖽡𖾐 𖼐𖽦𖾑 𖽂𖽙 𖼰𖽡𖽺𖾐 𖼊𖽑𖽺 𖼮𖽻𖾐
16 𖼺𖽙𖾐 𖼐𖽑𖽡𖾐 𖼖𖽚 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼷𖽑𖽶𖾐 𖼐𖽦，𖽂𖽙 𖼰𖽡𖽺𖾐 𖼊𖽑𖽺 𖽃𖽔𖾑 𖼄𖽶 𖼠𖽶、 𖽃𖽔𖾑 𖼄𖽶 𖼀𖽢、 𖼍𖽡𖾐 𖼮𖽑𖽙𖾐 𖼮𖽻𖾐，𖼦𖽑𖽔𖾐 𖼖𖽺𖾑 𖼽𖽻𖾐 𖼮𖽑𖽡𖽪𖾐 𖼄𖽸𖾐 𖼮𖽑𖽡𖽪 𖼈𖽳 𖼷𖽑𖽚，𖼦𖽑𖽺𖾐 𖼠𖽴𖾐 𖼞𖽑𖽶𖾐 𖼈𖽶 𖼺𖽪𖾐 𖼷𖽑𖽻𖾐 𖼀𖽺 𖼄𖽳𖾑 𖼄𖽳 𖼮𖽡𖽮𖾐 𖼞𖽴𖾐． 17 𖼄𖽚 𖼳𖽡𖾐 𖼷𖽑𖽻𖾐 𖼀𖽺 𖼊𖽑𖽺 𖼦𖽳，𖼦𖽑𖽺𖾐 𖼠𖽴𖾐 𖼞𖽑𖽶𖾐 𖼮𖽑𖽻𖾐 𖼊𖽚𖾐 𖼽𖽡𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼹𖽶𖾐，𖼽𖽻 𖼈𖽳𖾐 𖼄𖽳𖾑 𖼄𖽳 𖽂𖽙 𖼰𖽡𖽺𖾐 𖼞𖽑𖽶𖾐 𖼦𖽑𖽡𖽚． 18 𖼳𖽡𖾐 𖼐𖽦𖾑 𖽂𖽙 𖼰𖽡𖽺𖾐 𖽃𖽔𖾑 𖼞𖽑𖽶 𖼊𖽚𖾐 𖼖𖽻𖾐，𖼞𖽪𖾐 𖼮𖽡𖽺𖾐 𖼽𖽺𖾐 𖼦𖽴 𖼦𖽫 𖽃𖽔𖾐 𖼍𖽚𖾑 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼹𖽺𖾐 𖼖𖽻𖾐 𖽂𖽙 𖼰𖽡𖽺𖾐 𖼊𖽑𖽺 𖼮𖽻𖾐． 𖽂𖽙 𖼰𖽡𖽺𖾐 𖼊𖽑𖽺 𖽃𖽔𖾑 𖼞𖽑𖽶 𖼍𖽪𖾐 𖼖𖽻𖾐，𖼣𖽡𖽳 𖼊𖽪 𖽃𖽔𖾑 𖼞𖽑𖽶 𖼖𖽙𖾐 𖼺𖽶𖾑，𖽂𖽙 𖼰𖽡𖽺𖾐 𖼊𖽑𖽡 𖼊𖽝𖾐 𖼐𖽺𖾐 𖼈𖽳 𖼈𖽳 𖼄𖽙𖾐 𖼐𖽑𖽡𖽻𖾐 𖼍𖽪𖾐 𖼖𖽻𖾐． 19 𖼽𖽻𖾐 𖼮𖽑𖽡𖽪𖾐 𖼮𖽑𖽡𖽪 𖼀𖽺𖾐 𖽂𖽙𖾐 𖼮𖽻𖾐 𖽂𖽙𖾐 𖼈𖽳 𖼞𖽑𖽶𖾑 𖼮𖽶𖾐，𖼄𖽚 𖼳𖽡𖾐 𖼊𖽻 𖼂𖽪𖾑 𖼊𖽑𖽜𖾐 𖼍𖽪𖾐 𖼖𖽻𖾐，𖽂𖽙 𖼺𖽙𖾐 𖼂𖽙𖾐 𖽃𖽔𖾑 𖼄𖽶 𖼠𖽶 𖼮𖽑𖽡𖽪 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼽𖽻 𖼊𖽑𖽺 𖼊𖽻 𖼞𖽑𖽚． 20 𖼽𖽺𖾐 𖼦𖽴 𖼦𖽫 𖼹𖽺𖾐 𖼖𖽻𖾐 𖼳𖽡𖾐 𖼐𖽦𖾑 𖽂𖽙 𖼰𖽡𖽺𖾐 𖼈𖽪𖾑 𖼖𖽚𖾐 𖼊𖽑𖽺 𖼮𖽻𖾐，𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼊𖽑𖽺 𖽃𖽶𖾐 𖽂𖽙 𖼰𖽡𖽺𖾐 𖼈𖽪𖾑 𖼖𖽚𖾐 𖼊𖽑𖽺 𖼊𖽦𖾐 𖼽𖽡𖾐． 𖽃𖽔𖾐 𖼺𖽺𖾑，𖼄𖽚 𖼳𖽡𖾐 𖼊𖽦𖾐 𖼽𖽡𖾐 𖼦𖽑𖽙𖾐．
21 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼹𖽺𖾐 𖼽𖽡𖾐 𖼷𖽑𖽻𖾐 𖼀𖽺 𖼊𖽑𖽺 𖼀𖽦𖾐 𖼄𖽪𖾑 ，𖼺𖽙 𖼍𖽴𖾑 𖼞𖽳𖾐 𖼄𖽡𖾐 𖼹𖽸𖾑 𖼊𖽑𖽺 𖼖𖽻𖾑 𖼠𖽚 𖼖𖽻𖾐 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼘𖽜𖾑 𖼐𖽦𖾐 𖼖𖽻𖾐 𖼄𖽔 𖼊𖽙𖾐． 𖼄𖽔 𖼣𖽻𖾐 𖼊𖽡𖾑𖽑 𖼣𖽻𖾐，𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖼷𖽑𖽻𖾐 𖼄𖽨 𖼄𖽨 𖼄𖽳 𖼮𖽡𖽦 𖼊𖽻𖾐． 22 𖼦𖽑𖽔𖾐 𖼖𖽺𖾑 𖼽𖽺𖾐 𖼦𖽴 𖼦𖽫 𖼊𖽑𖽺 𖼠𖽙𖾐 𖼳𖽙𖾐 𖼺𖽪𖾐 𖼍𖽡𖾐 𖼄𖽻 𖼞𖽜 𖼽𖽻 𖼄𖽳𖾑 𖼞𖽚 𖼺𖽡 𖼮𖽡𖾐 𖼖𖽡𖾐，𖼄𖽔 𖼣𖽻𖾐 𖼊𖽑𖽡𖾑 𖼣𖽻𖾐，𖼽𖽺𖾐 𖼦𖽴 𖼦𖽫 𖼐𖽕 𖼊𖽺𖾐 𖼽𖽻 𖼈𖽳𖾐 𖼊𖽑𖽺 𖼺𖽦 𖼦𖽑𖽙𖾐 𖼠𖽸𖾑．”
23 𖼄𖽚 𖼳𖽡𖾐 𖼽𖽺𖾐 𖼦𖽴 𖼦𖽫 𖼖𖽙𖾐 𖼀𖽦𖾐： “𖼷𖽑𖽻𖾐 𖼀𖽺 𖼳𖽡𖾐 𖼐𖽦𖾑 𖽂𖽙 𖼰𖽡𖽺𖾐 𖼊𖽑𖽺 𖽂𖽙𖾐 𖼊𖽦𖾐 𖼖𖽻𖾐 𖼄𖽔 𖼊𖽙𖾐，𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼽𖽻 𖼈𖽳𖾐 𖼊𖽑𖽺 𖼀𖽦𖾐 𖼄𖽪𖾑 𖼠𖽚，𖽂𖽙 𖼰𖽡𖽺𖾐 𖼞𖽳𖾐 𖼦𖽜 𖼷𖽜𖾐 𖼄𖽡𖾐 𖼹𖽸𖾑 𖼺𖽙 𖼍𖽴𖾑 𖼖𖽡𖾐，𖽂𖽙 𖼰𖽡𖽺𖾐 𖼞𖽜 𖼖𖽺𖾑 𖼺𖽡 𖼮𖽡𖾐 𖼖𖽡𖾐．”
24 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼹𖽺𖾐 𖼽𖽡𖾐 𖼺𖽺𖾑 𖼐𖽑𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼷𖽙𖾐 𖼖𖽙𖾐 𖼮𖽑𖽻𖾐 𖼹𖽦𖾑 𖼊𖽦𖾐 𖼖𖽻𖾐 𖼖𖽡𖾐． 𖼦𖽑𖽻𖾐 𖼊𖽑𖽻𖾐 𖼍𖽡𖾐 𖼄𖽻 𖼐𖽺𖾐 𖼷𖽑𖽻𖾐 𖼀𖽺 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖽂𖽙𖾐 𖼖𖽻𖾐 𖼄𖽔 𖼊𖽙𖾐． 𖼄𖽔 𖼣𖽻𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼐𖽕 𖼊𖽺𖾐 𖼽𖽻 𖼈𖽳𖾐 𖼊𖽑𖽺 𖼺𖽦 𖼦𖽑𖽙𖾐 𖼊𖽻𖾐．”
25 𖽃𖽔𖾐 𖼺𖽺𖾑，𖼄𖽚 𖼳𖽡𖾐 𖽂𖽙 𖼰𖽡𖽺𖾐 𖼮𖽑𖽻𖾐 𖼹𖽺𖾐 𖼽𖽡𖾐，𖼷𖽑𖽻𖾐 𖼀𖽺 𖼞𖽳𖾐 𖼞𖽑𖽶𖾑 𖼠𖽻𖾐 𖼽𖽡𖾐 𖼽𖽻 𖼈𖽳𖾐 𖼊𖽑𖽺 𖼀𖽦𖾐 𖼊𖽑𖽧．