𖼖𖽚𖾐 𖼳𖽔𖾐 𖼊𖽑𖽺𖾐 𖼞𖽑𖽶𖾐 𖽃𖽔𖾐 𖼮𖽡𖽦𖾐 𖼊𖽚𖾐 𖼊𖽑𖽧 𖼖𖽻𖾐 ( 𖼈𖽜𖾐 20： 1-13)
17
1 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐，𖼊𖽑𖽡 𖼍𖽚 𖼊𖽑𖽡 𖼍𖽚 𖼐𖽺𖾐 𖼮𖽑𖽶𖾑 𖼺𖽜，𖼳𖽲𖾑 𖼞𖽳𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼮𖽑𖽻𖾐 𖼺𖽜 𖼍𖽪𖾐 ，𖼖𖽡𖾑 𖼇𖽺𖾐 𖼍𖽧𖾑 𖼄𖽡𖾐 𖼊𖽺𖾐 𖼮𖽻𖾐 𖼦𖽑𖽺𖾐 𖼠𖽴𖾐 𖼍𖽚 𖼈𖽶，𖼞𖽑𖽶𖾑 𖼠𖽻𖾐 𖼷𖽑𖽻𖾐 𖼀𖽺 𖽃𖽔𖾐 𖼮𖽡𖽦𖾐 𖼊𖽻𖾐 𖼖𖽚𖾐 𖼂𖽚𖾐 𖼄𖽔 𖼮𖽻𖾐． 2 𖽃𖽔𖾐 𖼺𖽺𖾑，𖼷𖽑𖽻𖾐 𖼀𖽺 𖼄𖽚 𖼳𖽡𖾐 𖼖𖽙𖾐 𖼮𖽑𖽻𖾐 𖼦𖽻𖾐 𖼊𖽦，𖼀𖽦𖾐 ：“𖼣𖽙𖾐 𖼈𖽳𖾐 𖼊𖽑𖽺 𖽃𖽔𖾐 𖼮𖽡𖽦𖾐 𖼍𖽻𖾐 𖼖𖽻𖾐 𖼄𖽺! ” 𖼄𖽚 𖼳𖽡𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖽃𖽔𖾐 𖼹𖽻𖾐 𖼣𖽙𖾐 𖼊𖽑𖽺 𖼦𖽻𖾐 𖼊𖽦 𖼐𖽺𖾑 ？ 𖽃𖽔𖾐 𖼹𖽻𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽕𖾐 𖼐𖽦𖾐 𖼐𖽺𖾑？” 3 𖼷𖽑𖽻𖾐 𖼀𖽺 𖽃𖽔𖾐 𖼮𖽡𖽦𖾐 𖼺𖽧 𖼺𖽺𖾑，𖼄𖽚 𖼳𖽡𖾐 𖼊𖽑𖽺 𖼀𖽶 𖼻𖽶 𖼀𖽦𖾐：“𖼐𖽑𖽡𖾐 𖽃𖽔𖾐 𖼹𖽻𖾐 𖼣𖽙𖾐 𖼈𖽳𖾐 𖼊𖽑𖽺 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼦𖽳 𖼊𖽚𖾐 𖼖𖽻𖾐 𖼺𖽺𖾑，𖼣𖽙𖾐 𖼈𖽳𖾐 𖼐𖽺𖾐 𖼣𖽙𖾐 𖼈𖽳𖾐 𖼻𖽙 𖼄𖽡𖾐 𖼐𖽜𖾐，𖼣𖽙𖾐 𖼈𖽳𖾐 𖼞𖽳𖾐 𖼮𖽡𖽺 𖼞𖽑𖽙𖾐 𖼣𖽻𖾐 𖼞𖽜 𖽃𖽔𖾐 𖼮𖽡𖽦𖾐 𖼺𖽧 𖼳𖽶𖾐 𖼖𖽻𖾐 𖼮𖽻𖾐 𖼐𖽺𖾑 ？”
4 𖼄𖽚 𖼳𖽡𖾐 𖼽𖽺𖾐 𖼦𖽜 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐𖼀𖽦𖾐 ：“𖼷𖽑𖽻𖾐 𖼀𖽺 𖼦𖽑𖽺𖾑 𖼹𖽻𖾐 𖼊𖽑𖽺 𖼣𖽙𖾐 𖽃𖽔 𖼊𖽺𖾐 𖼂𖽺𖾐 𖼖𖽡𖾐 𖼐𖽺𖾑 ？ 𖼽𖽻 𖼈𖽳𖾐 𖼖𖽚𖾐 𖼄𖽙𖾐 𖼈𖽺𖾐 𖼣𖽙𖾐 𖼊𖽑𖽺 𖼷𖽴𖾐 𖼳𖽶𖾐 𖼐𖽺 𖼹𖽻．”
5 𖼽𖽺𖾐 𖼦𖽜 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐 ：“𖼐𖽑𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽳 𖼄𖽻 𖼊𖽑𖽡 𖼹𖽻𖾐 𖼊𖽑𖽺 𖼦𖽳，𖼷𖽑𖽻𖾐 𖼀𖽺 𖽃𖽙𖾑 𖼄𖽡𖽺 𖼮𖽑𖽡𖽺 𖼮𖽑𖽻𖾐 𖼠𖽚 𖼽𖽡𖾐，𖽃𖽙𖾑 𖼄𖽺 𖼊𖽑𖽙 𖼐𖽑𖽧 𖼖𖽚 𖼖𖽻𖾐 𖼮𖽻 𖼊𖽑𖽺 𖼊𖽝 𖼠𖽚 𖼺𖽪𖾐 𖼍𖽚𖾐 𖼖𖽜 𖼞𖽑𖽶𖾑 𖼈𖽺𖾐． 6 𖼐𖽦𖾐 𖼄𖽺! 𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼦𖽴 𖼖𖽡𖽦𖾑 𖽂𖽙 𖼰𖽡𖽺𖾐 𖼖𖽚𖾐 𖼳𖽔𖾐 𖼊𖽑𖽺𖾐 𖼞𖽑𖽶𖾑 𖼠𖽻𖾐，𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼦𖽑𖽡𖽚 𖼊𖽻𖾐． 𖼐𖽑𖽡𖾐 𖼖𖽚𖾐 𖼳𖽔𖾐 𖼊𖽑𖽺𖾐 𖼊𖽑𖽺 𖼊𖽝 𖼖𖽡𖾐，𖽃𖽔𖾐 𖼺𖽺𖾑，𖽃𖽔𖾐 𖼮𖽡𖽦𖾐 𖼷𖽑𖽜𖾑 𖼷𖽑𖽜𖾐 𖼖𖽚𖾐 𖼳𖽔𖾐 𖼊𖽑𖽺𖾐 𖼮𖽑𖽻𖾐 𖼊𖽚𖾐 𖼖𖽻𖾐 𖼊𖽻𖾐，𖼷𖽑𖽻𖾐 𖼀𖽺 𖼞𖽜 𖽂𖽙𖾐 𖼊𖽻𖾐 𖼊𖽙𖾐．” 𖼄𖽚 𖼳𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽳 𖼄𖽻 𖼄𖽦𖾐 𖼊𖽪 𖼮𖽑𖽡𖽺 𖼦𖽑𖽺𖾑 𖼻𖽻𖾐 𖼂𖽺𖾐 𖼦𖽑𖽙𖾐．
7 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼠𖽻𖾐 𖼄𖽚 𖼳𖽡𖾐 𖼖𖽙𖾐 𖼮𖽑𖽻𖾐 𖼦𖽻𖾐 𖼊𖽦，𖼽𖽺𖾐 𖼦𖽴 𖼦𖽫 𖼊𖽑𖽺 𖼖𖽺𖾑 𖼮𖽕𖾐 𖼐𖽦𖾐 𖼺𖽺𖾑 𖼀𖽦𖾐：“𖼽𖽺𖾐 𖼦𖽴 𖼦𖽫 𖽃𖽔 𖼐𖽺𖾑 𖼠𖽻𖾐 𖼞𖽑𖽶𖾐 𖼮𖽻𖾐 𖼮𖽻𖾐 𖼺𖽺 𖼐𖽺𖾑？ ” 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑 𖼄𖽚 𖼳𖽡𖾐 𖼞𖽑𖽶𖾑 𖼄𖽡𖾐 𖼊𖽺𖾐 𖼊𖽑𖽺 𖼄𖽔 𖼺𖽔 𖼄𖽡𖾐，𖼄𖽡 𖼖𖽡𖾑 𖼂𖽔𖾐 𖼐𖽺𖾐 𖼖𖽺𖾑 𖼄𖽡𖾐．
𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼰𖽕𖾑 𖼊𖽝
8 𖼞𖽑𖽶𖾑 𖼮𖽶𖾐，𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼖𖽡𖾑 𖼇𖽺𖾐 𖼍𖽧𖾑 𖼄𖽡𖾐 𖼊𖽺𖾐 𖼖𖽻𖾐 𖼺𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼰𖽕𖾑 𖼊𖽝． 9 𖼄𖽚 𖼳𖽡𖾐 𖼽𖽱𖾐 𖼳𖽪𖾐 𖼽𖽕𖾑 𖼖𖽙𖾐 𖼀𖽦𖾐 ：“𖼐𖽑𖽡𖾐 𖽃𖽔 𖼐𖽺𖾑 𖼖𖽙𖾐 𖼀𖽙𖾐 𖼷𖽑𖽻𖾐 𖼺𖽺𖾐 𖼊𖽚𖾐 𖼖𖽻𖾐 𖼺𖽺𖾑 ，𖼊𖽚𖾐 𖼽𖽡𖾐 𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼰𖽕𖾑 𖼊𖽝 𖼖𖽡𖾐，𖼣𖽙𖾐 𖽃𖽔𖾑 𖼞𖽶𖾐 𖼐𖽑𖽡𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼍𖽚𖾐 𖼖𖽜 𖼈𖽺𖾐，𖽂𖽙 𖼰𖽡𖽺𖾐 𖼈𖽪𖾑 𖼖𖽚𖾐 𖼞𖽳𖾐 𖼦𖽑𖽡𖽚 𖼊𖽻𖾐．”
10 𖽃𖽔 𖼺𖽺𖾑，𖼽𖽱𖾐 𖼳𖽪𖾐 𖼽𖽕𖾑 𖼄𖽚 𖼳𖽡𖾐 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐 𖼂𖽺𖾐 𖼽𖽡𖾐，𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼰𖽕𖾑 𖼊𖽝，𖼄𖽚 𖼳𖽡𖾐、 𖼽𖽕𖾑 𖼖𖽪𖽦 𖼐𖽺𖾐 𖼇𖽪𖾑 𖽃𖽳 ，𖽂𖽙 𖼰𖽡𖽺𖾐 𖼈𖽪𖾑 𖼖𖽚𖾐 𖼊𖽑𖽺 𖼊𖽦𖾐 𖼽𖽡𖾐 𖼦𖽑𖽙𖾐． 11 𖼄𖽚 𖼳𖽡𖾐 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼍𖽪𖾐 𖼖𖽻𖾐 𖼞𖽑𖽶𖾑 𖼮𖽶𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽝 𖽂𖽙 𖼊𖽙𖾐，𖼄𖽚 𖼳𖽡𖾐 𖼖𖽦 𖼀𖽑𖽦𖾐 𖼀𖽑𖽨 𖼹𖽺𖾐 𖼞𖽑𖽶𖾑 𖼮𖽶𖾐，𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽝 𖽂𖽙 𖼊𖽙𖾐． 12 𖼦𖽑𖽻𖾐 𖼊𖽑𖽻𖾐，𖼄𖽚 𖼳𖽡𖾐 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖽂𖽙 𖼞𖽶𖾐 𖼦𖽑𖽻𖾐 𖼺𖽺𖾑，𖼽𖽻 𖼈𖽳𖾐 𖼖𖽚𖾐 𖼄𖽙𖾐 𖼍𖽦𖾐 𖼂𖽻𖾐 𖼖𖽻𖾐，𖼄𖽚 𖼳𖽡𖾐 𖼖𖽚𖾐 𖼄𖽙𖾐 𖼞𖽑𖽶𖾑 𖼊𖽑𖽺 𖼊𖽡𖾐，𖼽𖽕𖾑 𖼖𖽪𖽦 𖼐𖽺𖾐 𖼇𖽪𖾑 𖽃𖽳 𖼊𖽑𖽡 𖼽𖽚𖾐 𖼊𖽑𖽡 𖼀𖽳 𖼦𖽑𖽡𖽚，𖼄𖽚 𖼳𖽡𖾐 𖼖𖽦 𖼀𖽑𖽦𖾐 𖼐𖽑𖽡 𖼂𖽦𖾐 𖼊𖽑𖽺 𖼰𖽻 𖼍𖽡． 𖽃𖽔𖾐 𖼺𖽺𖾑，𖼽𖽻 𖼖𖽦 𖼈𖽶 𖼞𖽜 𖼻𖽺𖾑 𖼻𖽺𖾐 𖼮𖽻𖾐，𖽃𖽔𖾑 𖼄𖽶 𖼐𖽑𖽡𖾐 𖼖𖽻𖾑 𖼹𖽺𖾐 𖼽𖽡𖾐 𖼰𖽶𖾐 𖼮𖽑𖽡𖾐． 13 𖼽𖽱𖾐 𖼳𖽪𖾐 𖼽𖽕𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼦𖽳，𖽃𖽔𖾑 𖼊𖽑𖽙 𖼻𖽜 𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽺𖾐 𖼽𖽻 𖼈𖽳𖾐 𖼞𖽳𖾐 𖼈𖽪𖾐 𖼍𖽦 𖼊𖽑𖽺 𖼊𖽝 𖽂𖽙 𖼊𖽙𖾐 𖼦𖽑𖽻𖾐．
14 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼣𖽙𖾐 𖼄𖽶 𖼊𖽑𖽡 𖽂𖽚𖾐 𖼞𖽑𖽶𖾐 𖼮𖽑𖽻𖾐 𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼄𖽡𖾐 𖼊𖽑𖽺 𖼄𖽳 𖼮𖽡𖽦𖼦𖽑𖽙𖾐 𖼊𖽻𖾐． 𖼊𖽻 𖼂𖽪𖾑 𖼦𖽑𖽺𖾑 𖼹𖽻𖾐 𖼐𖽑𖽡𖾐 𖼈𖽝 𖼺𖽺𖾑 𖼺𖽪𖾑 𖼊𖽑𖽺 𖼊𖽦𖾐 𖼦𖽙𖾑 𖼮𖽑𖽡 𖼊𖽪𖾐 𖼂𖽺𖾐 𖼖𖽡𖾐，𖼹𖽦𖾑 𖼽𖽱𖾐 𖼳𖽪𖾐 𖼽𖽕𖾑 𖼊𖽑𖽺 𖼀𖽦𖾐 𖼰𖽨𖾐 𖼖𖽡𖾐．” 15 𖼄𖽚 𖼳𖽡𖾐 𖼍𖽡𖾐 𖼷𖽻𖾐 𖼊𖽑𖽡 𖼷𖽻𖾐 𖼷𖽑𖽧𖾐，𖼍𖽡𖾐 𖼷𖽻𖾐 𖼊𖽑𖽺 “𖼽𖽺𖾐 𖼦𖽴 𖼦𖽫 𖼐𖽑𖽧 𖼳𖽡𖾐 ” \fr 17．15 \ft “𖼽𖽺𖾐 𖼦𖽴 𖼦𖽫 𖼐𖽑𖽧 𖼳𖽡𖾐 ” 𖼦𖽑𖽺𖾑 “𖼽𖽺𖾐 𖼦𖽴 𖼦𖽫 𖼣𖽙𖾐 𖼞𖽳𖾐 𖼮𖽡𖾐 𖼺𖽙 𖼣𖽻𖾐，𖼣𖽙𖾐 𖼞𖽜 𖼰𖽕𖾑 𖼊𖽝 𖽂𖽙 𖼊𖽙𖾐 𖼺𖽪𖾐 𖼣𖽻𖾐 ”． 𖼐𖽺𖾐 𖼄𖽡𖾐． 16 𖼄𖽚 𖼳𖽡𖾐 𖼦𖽑𖽔𖾐 𖼖𖽺𖾑 𖼀𖽦𖾐：“𖼣𖽙𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼮𖽡𖾐 𖼺𖽙 𖽃𖽙𖾑 𖼄𖽺 𖼮𖽑𖽡𖽺 𖼖𖽦 𖼀𖽑𖽦𖾐 𖼮𖽑𖽳 𖼍𖽪𖾐 𖼄𖽳𖾐 𖼷𖽑𖽦𖾐，𖼽𖽺𖾐 𖼦𖽴 𖼦𖽫 𖼷𖽑𖽜𖾑 𖼷𖽑𖽜𖾐 𖼹𖽦𖾐 𖼹𖽦𖾐 𖼀𖽻𖾐 𖼀𖽻𖾐 𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼰𖽕𖾑 𖼊𖽝 𖼊𖽻𖾐．”