𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼮𖽻𖾐 𖼀𖽶 𖼻𖽶
16
1 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼽𖽡 𖼖𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼺𖽜 𖼍𖽪𖾐，𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼊𖽚𖾐 𖼖𖽻𖾐 𖼞𖽳𖾐 𖼠𖽙𖾑 𖼍𖽻𖾐 𖼞𖽑𖽶𖾑 𖼳𖽨𖾐 𖼷𖽑𖽡𖾐 𖼣𖽙 𖼊𖽑𖽡 𖼐𖽑𖽡𖾐 𖼮𖽑𖽡𖾐，𖼖𖽻𖾐 𖼽𖽡 𖼖𖽧 𖼄𖽡𖾐 𖼊𖽺𖾐 𖼐𖽺𖾐 𖼳𖽡𖾐 𖼐𖽦𖾑 𖼄𖽡𖾐 𖼊𖽺𖾐 𖼠𖽻𖾐 𖼊𖽑𖽺 𖼞𖽳𖾐 𖼳𖽲𖾑 𖼞𖽳𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼮𖽑𖽡𖾐． 2 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼷𖽪𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼮𖽻𖾐 𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼊𖽑𖽺 𖼀𖽶 𖼻𖽶 𖼊𖽻 𖼊𖽑𖽜𖾐．3 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼣𖽙𖾐 𖼈𖽳𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽻𖾐 𖼽𖽺𖾐 𖼦𖽴 𖼦𖽫 𖼖𖽦 𖼠𖽻𖾐 𖼞𖽑𖽶𖾐 𖼳𖽶𖾐 𖼐𖽑𖽧𖾐 𖼺𖽳． 𖼞𖽑𖽶𖾑 𖼮𖽶𖾐，𖼣𖽙𖾐 𖼈𖽳𖾐 𖼦𖽙 𖼰𖽡𖽦𖾑 𖼺𖽪𖾐 𖽃𖽔𖾐 𖼮𖽑𖽳𖾐 𖼀𖽙 𖼮𖽑𖽶𖾐 𖼊𖽡𖾐，𖼀𖽚𖾑 𖼀𖽚𖾐 𖽂𖽙𖾐 𖼷𖽙． 𖼦𖽑𖽻𖾐 𖼊𖽑𖽻𖾐，𖼣𖽙𖾐 𖼈𖽳𖾐 𖼊𖽑𖽺 𖼐𖽑𖽡𖾐 𖼈𖽳𖾐 𖼮𖽑𖽢𖾑 𖼦𖽳 𖼊𖽑𖽧 𖼖𖽻𖾐，𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼮𖽻𖾐，𖼷𖽑𖽻𖾐 𖼷𖽪𖾐 𖼞𖽜 𖼄𖽦 𖼳𖽶𖾐 𖼊𖽻𖾐 𖼖𖽔𖾑？ ”
4 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼐𖽦𖾐 𖼄𖽺! 𖼣𖽙𖾐 𖼄𖽶 𖼠𖽻𖾐 𖼊𖽑𖽺 𖼮𖽑𖽻𖾐 𖼷𖽙 𖼊𖽪𖾐 𖼀𖽑𖽨 𖼹𖽺𖾐 𖼖𖽻𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜 𖼊𖽻𖾐，𖼷𖽑𖽻𖾐 𖼀𖽺 𖼊𖽚𖾐 𖼽𖽡𖾐 𖼊𖽑𖽡 𖼐𖽑𖽡𖾐 𖼷𖽙 𖼖𖽚𖾐 𖼂𖽚𖾐 𖼊𖽑𖽡 𖼐𖽑𖽡𖾐 𖽂𖽙𖾐 𖼠𖽜𖾐 𖼊𖽙𖾐． 𖼣𖽙𖾐 𖼽𖽻 𖼈𖽳𖾐 𖼐𖽑𖽧𖾐 𖼄𖽙𖾐 𖼊𖽑𖽺 𖼰𖽡𖾐 𖼐𖽦𖾐 𖼊𖽻𖾐，𖼽𖽻 𖼈𖽳𖾐 𖼣𖽙𖾐 𖼳𖽪𖾐 𖼮𖽨𖾐 𖼊𖽑𖽺 𖼳𖽪𖾐 𖼐𖽺𖾑 𖼄𖽔 𖼳𖽪𖾐． 5 𖼮𖽑𖽡𖽚 𖼐𖽑𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐，𖽃𖽙𖾑 𖼄𖽺 𖼠𖽙𖾑 𖼍𖽻𖾐 𖼞𖽳𖾐 𖼐𖽑𖽡 𖼀𖽜𖾐 𖼄𖽨𖾐 𖼠𖽜𖾐 𖼞𖽚 𖼖𖽻𖾐，𖼷𖽙 𖼊𖽪𖾐 𖼂𖽺𖾐 𖼳𖽡𖽻𖾐 𖼀𖽑𖽢 𖼖𖽡𖾐．”
6 𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽦𖾐：“𖼄𖽶 𖼮𖽑𖽧 𖼖𖽻𖾐 𖼮𖽻𖾐 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼈𖽳𖾐 𖼷𖽑𖽜𖾑 𖼷𖽑𖽜𖾐 𖼺𖽝𖾑 𖼊𖽻𖾐，𖼐𖽑𖽡𖾐 𖼈𖽳𖾐 𖼊𖽑𖽺 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼦𖽳 𖼊𖽑𖽧 𖼖𖽻𖾐 𖼺𖽪𖾐 𖼞𖽑𖽶𖾑 𖼽𖽺𖾐 𖼦𖽴 𖼦𖽫 𖼣𖽻𖾐． 7 𖽃𖽔𖾑 𖼞𖽶𖾐 𖼐𖽜𖾐 𖼐𖽑𖽡𖾐 𖼈𖽳𖾐 𖼷𖽑𖽜𖾑 𖼷𖽑𖽜𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽶 𖼳𖽳𖾐 𖼊𖽑𖽺 𖼄𖽡𖽻𖾐 𖼊𖽻𖾐，𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼈𖽳𖾐 𖼽𖽺𖾐 𖼦𖽜 𖼦𖽫 𖼊𖽑𖽺 𖼞𖽑𖽙𖾐 𖼊𖽑𖽜𖾐 𖼺𖽪𖾐 𖼀𖽶 𖼻𖽶 𖼊𖽻，𖼽𖽻 𖼊𖽻 𖼮𖽨 𖼦𖽑𖽻𖾐． 𖼣𖽙𖾐 𖼈𖽳𖾐 𖽃𖽔 𖼊𖽺𖾑 𖼳𖽶 𖼰𖽕𖾐 𖼖𖽚 𖼐𖽺𖾑？ 𖼐𖽑𖽡𖾐 𖼈𖽳𖾐 𖽃𖽔𖾐 𖼹𖽻𖾐 𖼣𖽙𖾐 𖼈𖽳𖾐 𖼊𖽑𖽺 𖼀𖽶 𖼻𖽶 𖼐𖽺𖾑？” 8 𖼄𖽚 𖼳𖽡𖾐 𖼦𖽑𖽔𖾐 𖼖𖽺𖾑 𖼀𖽦𖾐：“𖼽𖽺𖾐 𖼦𖽴 𖼦𖽫 𖼄𖽶 𖼮𖽑𖽧 𖼖𖽻𖾐 𖼮𖽻𖾐 𖼞𖽑𖽶𖾑 𖼮𖽶𖾐 𖼐𖽑𖽡𖾐 𖼈𖽳𖾐 𖼞𖽜 𖼦𖽙 𖽂𖽙𖾐 𖼷𖽙 𖼊𖽻𖾐，𖽃𖽔𖾑 𖼞𖽶𖾐 𖼐𖽜𖾐 𖼐𖽑𖽡𖾐 𖼈𖽳𖾐 𖼞𖽜 𖽃𖽔𖾑 𖼀𖽻𖾐 𖽂𖽙𖾐 𖼷𖽙 𖼀𖽚𖾐 𖼊𖽻𖾐，𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼈𖽳𖾐 𖼽𖽺𖾐 𖼦𖽜 𖼦𖽫 𖼊𖽑𖽺 𖼞𖽑𖽙𖾐 𖼊𖽑𖽜𖾐 𖼺𖽪𖾐 𖼀𖽶 𖼻𖽶 𖼊𖽻，𖼽𖽻 𖼊𖽻 𖼮𖽨 𖼦𖽑𖽻𖾐． 𖼣𖽙𖾐 𖼈𖽳𖾐 𖽃𖽔 𖼊𖽺𖾑 𖼳𖽶 𖼰𖽕𖾐 𖼖𖽚 𖼐𖽺𖾑 ？ 𖼐𖽑𖽡𖾐 𖼈𖽳𖾐 𖼀𖽶 𖼻𖽶 𖼺𖽪𖾐 𖼦𖽑𖽺𖾑 𖼣𖽙𖾐 𖼈𖽳𖾐 𖼊𖽑𖽺 𖼄𖽔 𖼣𖽻𖾐，𖼽𖽺𖾐 𖼦𖽴 𖼦𖽫 𖼊𖽑𖽺 𖼀𖽶 𖼻𖽶 𖼳𖽶 𖼣𖽻𖾐．”
9 𖼄𖽚 𖼳𖽡𖾐 𖼽𖽕𖾑 𖼖𖽪𖽦 𖼖𖽙𖾐 𖼀𖽦𖾐：“𖼐𖽑𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼊𖽑𖽺 𖼀𖽦𖾐 𖼊𖽑𖽧：‘ 𖼐𖽑𖽡𖾐 𖼈𖽳𖾐 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼖𖽻𖾐，𖼞𖽪𖾐 𖼮𖽡𖽺𖾐 𖼽𖽻 𖼐𖽑𖽡𖾐 𖼈𖽳𖾐 𖼀𖽶 𖼻𖽶 𖼊𖽻 𖼊𖽑𖽺 𖼊𖽻 𖼮𖽨 𖼦𖽑𖽻𖾐．’” 10\pn 𖼽𖽕𖾑 𖼖𖽪𖽦\pn* 𖼽𖽡 𖼺𖽜𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐 𖼞𖽑𖽶𖾑 𖼮𖽶𖾐，𖼽𖽻 𖼈𖽳𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼘𖽜𖾑 𖼐𖽦𖾐，𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽶 𖼳𖽳𖾐 𖼍𖽡𖾐 𖼮𖽑𖽙𖾐 𖼞𖽑𖽶𖾐 𖼮𖽑𖽻𖾐 𖼊𖽚𖾐 𖼊𖽑𖽧 𖼖𖽻𖾐 𖼞𖽳𖾐 𖼐𖽦𖾐 𖼄𖽡𖽻𖾐．
11 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼊𖽑𖽺 𖼄𖽪𖾑 𖼍𖽴𖾑： 12 “𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼀𖽶 𖼻𖽶 𖼊𖽻，𖼣𖽙𖾐 𖼊𖽻 𖼮𖽨𖼦𖽑𖽻𖾐． 𖼐𖽑𖽡𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐 𖼊𖽑𖽧： ‘ 𖼄𖽶 𖼮𖽑𖽧 𖼖𖽻𖾐 𖼮𖽻𖾐 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼈𖽳𖾐 𖼦𖽙 𖽂𖽙𖾐 𖼷𖽙 𖼊𖽻𖾐，𖽃𖽔𖾑 𖼞𖽶𖾐 𖼐𖽜𖾐 𖼷𖽑𖽶𖾐 𖼐𖽦 𖼐𖽑𖽡𖾐 𖼈𖽳𖾐 𖽃𖽔𖾑 𖼂𖽻𖾐 𖽂𖽙𖾐 𖼷𖽙 𖼀𖽚𖾐 𖼊𖽻𖾐． 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼺𖽝𖾑 𖼊𖽻𖾐，𖼣𖽙𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼣𖽻𖾐．’”
𖼣𖽕𖾐 𖽃𖽙𖾑 𖼄𖽜 𖼖𖽜 𖼐𖽺𖾐 𖼄𖽔 𖼐𖽕
13 𖼄𖽶 𖼮𖽑𖽧 𖼞𖽑𖽶𖾑 𖼮𖽑𖽡𖾐，𖼣𖽕𖾐 𖽃𖽙𖾑 𖼄𖽜 𖼖𖽜 𖼀𖽨𖾐 𖼂𖽻𖾐 𖼖𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼮𖽻𖾐 𖼞𖽳𖾐 𖼀𖽡𖾐 𖼮𖽨𖾐 𖼦𖽑𖽻𖾐． 𖼷𖽑𖽶𖾐 𖼐𖽦 𖼞𖽑𖽶𖾑 𖼮𖽶𖾐，𖼽𖽻 𖼈𖽳𖾐 𖼮𖽻𖾐 𖼞𖽳𖾐 𖼞𖽕 𖼰𖽡𖽺𖾐 𖼰𖽶𖾑 𖼈𖽡𖾐 𖼮𖽻𖾐 𖼀𖽡𖾐 𖼦𖽑𖽻𖾐． 14 𖼰𖽶𖾑 𖼈𖽡𖾐 𖼮𖽡𖾐 𖼦𖽑𖽻𖾐 𖼠𖽙𖾑 𖼍𖽻𖾐，𖼄𖽡𖾐 𖼳𖽡𖽻𖾐 𖼀𖽙𖾐 𖼊𖽑𖽺 𖼐𖽑𖽡𖾐 𖼀𖽑𖽨𖾐 𖼖𖽙𖾐 𖼺𖽶𖾑 𖼈𖽻𖾑 𖼈𖽻𖾐 𖼻𖽙 𖼊𖽑𖽡 𖼳𖽶 𖼮𖽻𖾐． 15 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼐𖽦𖾐 𖼄𖽡𖽻𖾐 𖼦𖽑𖽻𖾐 𖼺𖽺𖾑，𖼷𖽙𖾐 𖼖𖽙𖾐 𖼮𖽑𖽻𖾐 𖼀𖽦𖾐：“𖼦𖽑𖽺𖾑 𖽃𖽔 𖼊𖽺𖾑 𖼳𖽶 𖼣𖽻𖾐 𖼐𖽺𖾑？”
𖼞𖽪𖾐 𖼮𖽡𖽺𖾐 𖽃𖽔 𖼊𖽺𖾑 𖼳𖽶 𖼣𖽻𖾐 𖼽𖽻 𖼈𖽳𖾐 𖼄𖽔 𖼺𖽝𖾑 𖼺𖽺𖾑，𖼄𖽚 𖼳𖽡𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼖𖽪 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜 𖼺𖽪𖾐 𖼷𖽙 𖼊𖽪𖾐 𖼣𖽻𖾐． 16 𖼽𖽺𖾐 𖼦𖽜 𖼦𖽫 𖼄𖽪𖾑 𖼍𖽴𖾑 𖼺𖽪𖾐 𖼦𖽑𖽺𖾑 𖼻𖽻𖾐 𖼣𖽻𖾐：‘ 𖼐𖽑𖽡𖾐 𖼈𖽳𖾐 𖼽𖽻 𖼄𖽳𖾑 𖼷𖽙 𖼦𖽑𖽻𖾐 𖼊𖽙𖾐 𖼖𖽙𖾐 𖼮𖽑𖽻𖾐，𖼦𖽑𖽺𖾐 𖼠𖽴𖾐 𖼞𖽑𖽶𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼊𖽑𖽡 𖼰𖽡𖾐 𖼂𖽕 \fr 16．16 \ft “𖼊𖽑𖽡 𖼰𖽡𖾐 𖼂𖽕 ” 𖼳𖽡𖾐 𖼂𖽚 𖼈𖽴 𖼠𖽻𖾐 𖼞𖽑𖽶𖾐 “𖼽𖽡𖾑 𖽃𖽴 𖼄𖽦 𖽃𖽳 ” 𖼀𖽦𖾐，𖽃𖽔 𖼖𖽙𖾐 𖼐𖽑𖽡 𖼠𖽙𖾐 𖼳𖽜𖾐 𖼮𖽻𖾐． 𖽂𖽙𖾐 𖼠𖽺𖾑 𖼊𖽙𖾐，𖼽𖽻 𖼄𖽳𖾑 𖼊𖽑𖽡 𖼈𖽴 𖼷𖽑𖽻𖾐 𖼷𖽙 𖼦𖽑𖽻𖾐 𖼊𖽙𖾐 𖼖𖽙𖾐 𖼮𖽑𖽻𖾐 𖼍𖽺𖾑 𖽂𖽙𖾐 𖼠𖽺𖾑 𖼊𖽙𖾐． ’”
17 𖽃𖽔𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼦𖽑𖽺𖾑 𖼻𖽻𖾐 𖼂𖽺𖾐 𖼽𖽡𖾐，𖼄𖽨 𖼠𖽜𖾐 𖼺𖽪𖾐 𖼮𖽻𖾐，𖼐𖽑𖽡𖽪𖾑 𖼠𖽜𖾐 𖼺𖽪𖾐 𖼮𖽻𖾐． 18 𖼽𖽻 𖼈𖽳𖾐 𖼮𖽡𖽻𖾐 𖼊𖽪𖾐 𖼈𖽺𖾐 𖼮𖽡𖽻𖾐 𖼞𖽑𖽶𖾑 𖼮𖽶𖾐，𖼄𖽨 𖼠𖽺𖾑 𖼺𖽪𖾐 𖼖𖽺𖾑 𖼄𖽔 𖼷𖽺𖾐，𖼐𖽑𖽡𖽪𖾑 𖼠𖽺𖾑 𖼺𖽪𖾐 𖼖𖽺𖾑 𖼄𖽔 𖼖𖽚 𖼐𖽺𖾐 𖼄𖽔 𖼮𖽻𖾐，𖼽𖽻 𖼈𖽳𖾐 𖼞𖽑𖽙𖾐 𖼠𖽺𖾑 𖼞𖽚 𖼖𖽻𖾐 𖼺𖽪𖾐 𖼽𖽻 𖼈𖽳𖾐 𖼷𖽙 𖼖𖽚．
19 𖼄𖽚 𖼳𖽡𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼊𖽑𖽡 𖼽𖽚𖾐 𖼖𖽺𖾑 𖼷𖽙 𖼊𖽪𖾐 𖽂𖽙𖾐 𖼹𖽺𖾐 𖼠𖽙𖾑 𖼍𖽻𖾐 𖼊𖽑𖽡 𖼐𖽜𖾐 𖼮𖽑𖽡𖾐 𖼄𖽔 𖼊𖽙𖾐．” 20 𖼦𖽑𖽻𖾐 𖼊𖽑𖽻𖾐，𖼷𖽑𖽻𖾐 𖼊𖽑𖽡 𖼹𖽻𖾐 𖼄𖽚 𖼳𖽡𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼄𖽔 𖼐𖽙𖾐，𖼽𖽻 𖼈𖽳𖾐 𖼷𖽙 𖼊𖽪𖾐 𖼹𖽺𖾐 𖼠𖽙𖾑 𖼍𖽻𖾐 𖼊𖽑𖽡 𖼐𖽜𖾐 𖼮𖽑𖽡𖾐 𖼺𖽪𖾐 𖼮𖽻𖾐 𖼺𖽺𖾑 ，𖼀𖽶 𖼮𖽑𖽡𖾐 𖼀𖽺 𖼐𖽜𖾐 𖼦𖽑𖽻𖾐． 𖽃𖽔𖾐 𖼺𖽺𖾑，𖼄𖽚 𖼳𖽡𖾐 𖼽𖽻 𖼈𖽳𖾐 𖼊𖽑𖽺 𖼀𖽶 𖼻𖽶．
21 𖼽𖽻 𖼈𖽳𖾐 𖼊𖽑𖽡 𖼐𖽑𖽡𖾑 𖼐𖽑𖽡𖾐 𖼷𖽑𖽶𖾐 𖼐𖽦，𖼽𖽻 𖼄𖽳𖾑 𖼞𖽑𖽙𖾐 𖼷𖽙 𖼦𖽑𖽻𖾐 𖼊𖽙𖾐 𖼖𖽙𖾐 𖼮𖽑𖽻𖾐 𖼠𖽺𖾑，𖽃𖽔𖾑 𖼄𖽶 𖼷𖽑𖽙𖾐 𖼊𖽚𖾐 𖼖𖽻𖾐 𖼹𖽦𖾐 𖼷𖽙 𖼊𖽪𖾐 𖼮𖽡𖾐 𖼦𖽑𖽻𖾐． 22 𖼮𖽑𖽡𖽚 𖼐𖽑𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼽𖽻 𖼈𖽳𖾐 𖼷𖽙 𖼊𖽪𖾐 𖽃𖽙𖾑 𖼄𖽺 𖼊𖽑𖽙 𖼖𖽙𖾐 𖼐𖽑𖽡 𖼀𖽜𖾐 𖼄𖽨𖾐 𖼠𖽺𖾑，𖼊𖽑𖽡 𖼽𖽚𖾐 𖼺𖽙𖾐 𖼰𖽡𖾐 𖼠𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼈𖽪𖾑 𖼷𖽪𖾐 𖼖𖽻𖾐 𖼺𖽺𖾑 𖼄𖽡𖽻 𖼦𖽑𖽺𖾑 𖼀𖽦𖾐 𖼄𖽚 𖼳𖽡𖾐 𖼖𖽙𖾐 𖼀𖽦𖾐 𖼊𖽑𖽧． 23 𖼄𖽚 𖼳𖽡𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖽃𖽔𖾑 𖼞𖽶𖾐 𖼐𖽑𖽡𖾐 𖼳𖽡𖽻𖾐 𖼐𖽑𖽡𖾐 𖼣𖽻𖾐，𖼽𖽺𖾐 𖼦𖽜 𖼦𖽫 𖼖𖽙𖾐 𖼀𖽙𖾐 𖼳𖽪𖾐 𖼖𖽡𖾐 𖼺𖽪𖾐 𖼺𖽡 𖼮𖽡𖾐 𖼐𖽑𖽡𖾐 𖼦𖽑𖽦 𖼣𖽻𖾐． 𖼐𖽑𖽡𖾐 𖼈𖽳𖾐 𖼠𖽻𖾐 𖼊𖽡 𖼮𖽑𖽻 𖼺𖽪𖾐 𖼠𖽻𖾐 𖼻𖽻𖾐，𖼰𖽡𖽦𖾑 𖼊𖽡 𖼮𖽑𖽻 𖼺𖽪𖾐 𖼮𖽡𖽦𖾑 𖼻𖽻𖾐，𖼞𖽑𖽙𖾐 𖼷𖽺𖾐 𖼺𖽪𖾐 𖼽𖽻 𖼄𖽳𖾑 𖼠𖽙𖾐 𖼳𖽙𖾐 𖼀𖽑𖽢，𖼹𖽺𖾐 𖼠𖽙𖾑 𖼍𖽻𖾐 𖼊𖽑𖽡 𖼐𖽑𖽡𖾐 𖽂𖽙𖾐 𖼮𖽑𖽡𖾐 𖼊𖽙𖾐．
24 𖼽𖽻 𖼈𖽳𖾐 𖼄𖽚 𖼳𖽡𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐，𖼷𖽺𖾐 𖼺𖽪𖾐 𖼹𖽺𖾐 𖼠𖽙𖾑 𖼍𖽻𖾐 𖼊𖽑𖽡 𖼐𖽑𖽡𖾐 𖼮𖽑𖽡𖾐 𖼖𖽺𖾑，𖼀𖽺 𖼄𖽔 𖼐𖽜𖾐， 𖼀𖽶 𖼖𖽺𖾑 𖼄𖽔 𖼮𖽑𖽡𖾐．” 25 𖼄𖽚 𖼳𖽡𖾐 𖼀𖽦𖾐：“𖽃𖽙𖾑 𖼐𖽑𖽡𖾐 𖼐𖽑𖽡𖾐 𖼈𖽳𖾐 𖼷𖽺 𖼷𖽺𖾐 𖼦𖽑𖽺𖾑 𖼷𖽙 𖼮𖽑𖽳𖾐! 𖼞𖽪𖾐 𖼮𖽡𖽺𖾐，𖽃𖽙𖾑 𖼐𖽑𖽡𖾐 𖼽𖽺𖾐 𖼦𖽴 𖼦𖽫 𖼖𖽙𖾐 𖼀𖽙𖾐 𖼳𖽪𖾐 𖼖𖽡𖾐 𖼞𖽳𖾐 𖼳𖽡𖽻𖾐 𖼐𖽑𖽡𖾐 𖼣𖽻𖾐，𖽃𖽙𖾑 𖼐𖽑𖽡𖾐 𖼐𖽑𖽡𖾐 𖼈𖽳𖾐 𖼄𖽡𖾐 𖼳𖽡𖽻𖾐 𖼀𖽙 𖼷𖽙 𖼊𖽪𖾐 𖼰𖽙𖾐 𖽂𖽙𖾐 𖼄𖽔 𖼊𖽙𖾐 𖼊𖽻𖾐． 26 𖼮𖽑𖽡𖽚 𖼐𖽑𖽡𖾐 𖼠𖽻𖾐 𖼞𖽑𖽶𖾐 𖼐𖽑𖽡𖾐 𖼈𖽳𖾐 𖼷𖽙 𖼊𖽪𖾐 𖽂𖽙𖾐 𖼠𖽺𖾑 𖼊𖽙𖾐，𖼦𖽑𖽻𖾐 𖼊𖽑𖽻𖾐，𖼳𖽶 𖼐𖽑𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼳𖽡𖽻𖾐 𖼐𖽑𖽡𖾐 𖼣𖽻𖾐 𖼺𖽺𖾑，𖼷𖽙 𖼊𖽪𖾐 𖼄𖽔 𖼀𖽑𖽨 𖼹𖽺𖾐 𖼖𖽻𖾐．”
27 𖼳𖽶 𖼐𖽑𖽡𖾐 𖼦𖽑𖽺𖾑 𖼊𖽑𖽡 𖼐𖽑𖽡𖾐 𖼷𖽑𖽻𖾐 𖼊𖽑𖽡 𖼹𖽻𖾐 𖼊𖽚𖾐 𖼽𖽡𖾐 𖼠𖽺𖾑 𖼺𖽪𖾐 𖼮𖽻𖾐． 𖼦𖽑𖽻𖾐 𖼊𖽑𖽻𖾐，𖼊𖽑𖽡 𖼳𖽶 𖼖𖽺𖾑 𖼠𖽺𖾑 𖼄𖽔 𖽂𖽙𖾐． 28 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼣𖽙𖾐 𖼷𖽑𖽦𖾐 𖼮𖽡𖽺𖾐 𖼐𖽺𖾐 𖼳𖽪𖾐 𖼮𖽨𖾐 𖼊𖽑𖽺 𖼄𖽔 𖼳𖽪𖾐 𖼺𖽺𖾑，𖼞𖽑𖽙 𖼊𖽑𖽻𖾐 𖼮𖽑𖽡𖾐 𖼊𖽻𖾐 𖼐𖽺𖾑？ 29 𖼐𖽦𖾐 𖼄𖽺! 𖼽𖽺𖾐 𖼦𖽴 𖼦𖽫 𖼳𖽡𖽻𖾐 𖼐𖽑𖽡𖾐 𖼖𖽪 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜 𖼦𖽑𖽻𖾐 𖼺𖽺𖾑，𖼮𖽡𖽚 𖼐𖽑𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼷𖽙 𖼊𖽪𖾐 𖼐𖽑𖽡 𖼀𖽜𖾐 𖼄𖽨𖾐 𖼖𖽪 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜． 𖼳𖽶 𖼐𖽑𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼐𖽑𖽡𖾐 𖼈𖽳𖾐 𖼽𖽻 𖼄𖽳𖾑 𖽃𖽔𖾑 𖼞𖽑𖽶𖾐 𖼍𖽺𖾑 𖼮𖽻𖾐 𖼖𖽡𖾐，𖼊𖽑𖽡 𖼽𖽚𖾐 𖼖𖽺𖾑 𖽂𖽙𖾐 𖼊𖽚𖾐 𖼽𖽡𖾐 𖼄𖽔 𖼊𖽙𖾐． 30 𖽃𖽔𖾐 𖼺𖽺𖾑，𖼳𖽶 𖼐𖽑𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼐𖽙 𖼹𖽺𖾐 𖼖𖽻𖾐 𖼳𖽡𖽻𖾐 𖼐𖽑𖽡𖾐 𖼳𖽪𖾐．”
31 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼷𖽙 𖼊𖽪𖾐 𖼦𖽑𖽺𖾑 𖼊𖽑𖽺 𖼄𖽔 𖼐𖽕 \fr 16．31 \ft “𖼄𖽔 𖼐𖽕 ” 𖼦𖽑𖽺𖾑 “𖽃𖽔 𖼊𖽺𖾑 𖼳𖽶 𖼣𖽻𖾐 ” 𖼖𖽙𖾐 𖼀𖽦𖾐 𖼺𖽪𖾐 𖼣𖽙𖾐． 𖼐𖽺𖾐 𖼄𖽡𖾐，𖼀𖽑𖽨𖾑 𖼀𖽑𖽨𖾐 𖼮𖽻𖾐，𖼄𖽔 𖼐𖽕 𖼦𖽑𖽺𖾑 𖼊𖽜 𖼦𖽜 𖼳𖽨𖾐 𖼄𖽙𖾐 𖼖𖽙𖾐 𖼺𖽶𖾑 ，𖼷𖽙 𖼍𖽪𖾐 𖼖𖽻𖾐 𖽃𖽔𖾑 𖼂𖽻𖾐 𖼞𖽑𖽶𖾐 𖼀𖽨 𖼈𖽡𖾐 𖼰𖽡𖽺𖾐 𖼖𖽙𖾐 𖼺𖽶𖾑．
32 𖼄𖽚 𖼳𖽡𖾐 𖼀𖽦𖾐：“𖼽𖽺𖾐 𖼦𖽜 𖼦𖽫 𖼄𖽪𖾑 𖼍𖽴𖾑 𖼺𖽪𖾐 𖼦𖽑𖽺𖾑 𖼻𖽻𖾐 𖼣𖽻𖾐，𖼄𖽔 𖼐𖽕 𖼊𖽑𖽡 𖼰𖽡𖾐 𖼂𖽕 𖼠𖽙𖾐 𖼳𖽙𖾐 𖼍𖽪𖾐 𖼖𖽻𖾐 𖼹𖽺𖾐 𖼍𖽙𖾑 𖼺𖽺𖾑 𖼹𖽦𖾐 𖼹𖽦𖾐 𖼀𖽻𖾐 𖼀𖽻𖾐 𖼖𖽙𖾐 𖼮𖽑𖽡𖾐 𖼖𖽡𖾐，𖼐𖽑𖽡𖾐 𖼈𖽳𖾐 𖼻𖽙 𖼖𖽡𖾑 𖼻𖽙 𖼖𖽦𖾐 𖼞𖽜 𖽂𖽙𖾐 𖼐𖽦𖾐 𖼄𖽡𖽻𖾐 𖼊𖽙𖾐，𖼣𖽙𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼦𖽳 𖼊𖽙𖾐 𖼖𖽻𖾐 𖼞𖽑𖽶𖾑 𖼮𖽶𖾐，𖼦𖽑𖽺𖾑 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼰𖽙𖾑 𖼺𖽪𖾐 𖼷𖽙 𖼊𖽪𖾐 𖼣𖽻𖾐．”
33 𖼄𖽚 𖼳𖽡𖾐 𖼽𖽕𖾑 𖼖𖽡𖽦 𖼖𖽙𖾐 𖼀𖽦𖾐：“𖼈𖽪𖾑 𖼀𖽸 𖼻𖽙 𖼊𖽑𖽡 𖼊𖽝𖾐 𖼈𖽺𖾐 𖼂𖽻𖾐 𖼖𖽻𖾐，𖼄𖽔 𖼐𖽕 𖼊𖽑𖽡 𖼰𖽡𖾐 𖼂𖽕 𖼰𖽡𖽺𖾐 𖼀𖽡𖾐，𖼀𖽑𖽨 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽡𖽺 𖼮𖽑𖽡𖽺 𖼍𖽙𖾑，𖼹𖽺𖾐 𖼍𖽙𖾑 𖼐𖽑𖽡𖾐 𖼈𖽳𖾐 𖼻𖽙 𖼮𖽑𖽡 𖼻𖽙 𖼖𖽦𖾐 𖼊𖽑𖽺 𖼞𖽜．” 34 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼊𖽑𖽺 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐，𖼽𖽕𖾑 𖼖𖽡𖽦 𖼄𖽔 𖼐𖽕 𖼠𖽙𖾐 𖼳𖽙𖾐 𖼈𖽺𖾐 𖼺𖽺𖾑 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼞𖽑𖽶𖾐 𖼰𖽡𖽺𖾐． 35 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼮𖽻𖾐 𖼄𖽔 𖼐𖽕 𖼖𖽡𖾐 𖼷𖽑𖽡𖾐 𖼞𖽑𖽚 𖼷𖽙 𖼀𖽡𖾐，𖼽𖽻 𖼈𖽳𖾐 𖼄𖽔 𖼐𖽕 𖼷𖽙 𖼺𖽺𖾑 𖼮𖽑𖽶𖾑 𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐 𖼖𖽙𖾐 𖼮𖽑𖽡𖾐．
36 𖼊𖽑𖽧 𖼰𖽡𖾐 𖼂𖽕 \fr 16．36 \ft “𖼊𖽑𖽡 𖼰𖽡𖾐 𖼂𖽕 ” 𖼦𖽑𖽺𖾑 “𖼽𖽡𖾐 𖼇𖽕 ” 𖼞𖽳𖾐 𖼷𖽑𖽡𖾐 𖼀𖽜𖾐 𖼊𖽑𖽡 𖼀𖽜𖾐 𖼣𖽻𖾐． 𖼦𖽑𖽺𖾑 𖼞𖽑𖽶𖾑 𖼮𖽶𖾐 𖼞𖽳𖾐 𖼮𖽡𖽻𖾐 𖼊𖽪𖾐 𖼞𖽳𖾐 𖼷𖽑𖽡𖾐 𖼀𖽜𖾐 𖼊𖽑𖽡 𖼀𖽜𖾐 𖼣𖽻𖾐．