𖼄𖽚 𖼳𖽡𖾐 𖼮𖽻 𖼮𖽪
15
1 𖼞𖽑𖽶𖾑 𖼮𖽶𖾐，𖼄𖽚 𖼳𖽡𖾐 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼮𖽻 𖼮𖽪 𖼮𖽻 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽑𖽪𖾐 𖼮𖽑𖽳， 𖼀𖽦𖾐： “𖼣𖽙𖾐 𖼮𖽻 𖼮𖽪 𖼮𖽻 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽑𖽪𖾐 𖼮𖽑𖽳 𖼊𖽻𖾐．
𖼞𖽪𖾐 𖼮𖽡𖽺𖾐，𖼽𖽻 𖼰𖽕𖾑 𖼊𖽝 𖽂𖽙 𖼊𖽙𖾐 𖼦𖽑𖽻𖾐，𖼽𖽻 𖼇𖽕 𖼖𖽻 𖼞𖽳𖾐 𖼄𖽪
𖼐𖽺𖾐 𖼄𖽪 𖼷𖽳 𖼺𖽪𖾐 𖼄𖽦 𖼀𖽑𖽙 𖼊𖽑𖽺 𖼷𖽴𖾐 𖼦𖽜𖾐 𖼄𖽙𖾐 𖼞𖽑𖽶𖾐 𖼰𖽡𖽺𖾐．
2 𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼣𖽙𖾐 𖼞𖽳𖾐 𖽂𖽙 𖼐𖽑𖽡𖾐 𖼣𖽻𖾐，𖼣𖽙𖾐 𖼞𖽳𖾐 𖼮𖽻 𖼮𖽪 𖼣𖽻𖾐，
𖼦𖽑𖽔𖾐 𖼖𖽺𖾑 𖼣𖽙𖾐 𖼞𖽳𖾐 𖼰𖽨𖾑 𖼺𖽡 𖼀𖽑𖽙 𖼣𖽻𖾐． 𖼽𖽻 𖼣𖽙𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐，𖼣𖽙𖾐 𖼽𖽻 𖼊𖽑𖽺 𖼞𖽑𖽪𖾐 𖼮𖽑𖽳 𖼊𖽻𖾐．
𖼽𖽻 𖼣𖽻𖾐 𖼀𖽙 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐，𖼣𖽙𖾐 𖼽𖽻 𖼊𖽑𖽺 𖼐𖽦𖾐 𖼄𖽶𖾐 𖼊𖽻𖾐．
3 𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼄𖽦 𖼀𖽑𖽙 𖼣𖽻𖾐，
𖼽𖽻 𖼊𖽑𖽺 𖼽𖽺𖾐 𖼦𖽴 𖼦𖽫 𖼄𖽡𖾐．
4 𖼽𖽻 𖼇𖽕 𖼖𖽻 𖼞𖽳𖾐 𖼄𖽪 𖼮𖽑𖽜𖾐 𖼐𖽺𖾐 𖼄𖽦 𖼀𖽑𖽙 𖼊𖽑𖽺 𖼷𖽴𖾐 𖼦𖽜𖾐 𖼄𖽙𖾐 𖼞𖽑𖽶𖾐 𖼹𖽺𖾐，
𖼇𖽕 𖼖𖽻 𖼞𖽑𖽙𖾐 𖼺𖽺𖾐 𖼺𖽪𖾐 𖼄𖽦 𖼈𖽪𖾑 𖼷𖽪𖾐，
𖼄𖽳𖾑 𖼄𖽳 𖼦𖽜𖾐 𖼄𖽙𖾐 𖼐𖽑𖽡𖾐 𖼞𖽑𖽶𖾐 𖽃𖽝𖾐 𖼳𖽶𖾐 𖼦𖽑𖽙𖾐．
5 𖼈𖽡𖾐 𖼹𖽧𖾑 𖼽𖽻 𖼈𖽳𖾐 𖼊𖽑𖽺 𖽃𖽝𖾐 𖼄𖽡𖾑，
𖼽𖽻 𖼈𖽳𖾐 𖼖𖽚𖾐 𖼄𖽙𖾐 𖼖𖽙𖾐 𖼺𖽶𖾑，𖼦𖽑𖽜𖾐 𖼦𖽜𖾐 𖼄𖽙𖾐 𖼊𖽑𖽻𖾐 𖼐𖽦𖾑 𖼹𖽺𖾐 𖼽𖽡𖾐．
6 𖼽𖽺𖾐 𖼦𖽴 𖼦𖽫 𖽃𖽔𖾐! 𖼐𖽑𖽡𖾐 𖼽𖽙𖾐 𖼀𖽳𖾐 𖼞𖽳𖾐 𖼖𖽦 𖼀𖽑𖽦𖾐 𖼄𖽶 𖼳𖽳𖾐 𖼐𖽺𖾐 𖽂𖽙 𖼐𖽑𖽡𖾐 𖼮𖽻𖾐．
𖼽𖽺𖾐 𖼦𖽴 𖼦𖽫 𖽃𖽔𖾐! 𖼐𖽑𖽡𖾐 𖼽𖽙𖾐 𖼀𖽳 𖼞𖽳𖾐 𖼖𖽦 𖼀𖽑𖽦𖾐 𖼮𖽡𖾐 𖼂𖽦𖾐 𖼊𖽑𖽺 𖼊𖽝 𖼐𖽝𖾐 𖼦𖽑𖽙𖾐．
7 𖼐𖽑𖽡𖾐 𖼞𖽳𖾐 𖽂𖽙 𖼐𖽑𖽡𖾐 𖽂𖽙 𖼖𖽕𖾐，𖼮𖽡𖾐 𖼂𖽦𖾐 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐；
𖼐𖽑𖽡𖾐 𖼞𖽳𖾐 𖼀𖽶 𖼻𖽶 𖼮𖽑𖽡𖾐，𖽃𖽔𖾐 𖼍𖽚𖾑 𖼻𖽜 𖼂𖽴𖾑 𖼊𖽑𖽺 𖼮𖽑𖽡𖽪𖾐 𖼮𖽡𖽦 𖼖𖽙𖾐 𖼺𖽶𖾑，𖼽𖽻 𖼈𖽳𖾐 𖼊𖽑𖽺 𖼮𖽑𖽡𖽪𖾐 𖼮𖽡𖽦 𖼦𖽑𖽙𖾐．
8 𖼐𖽑𖽡𖾐 𖼐𖽙𖾑 𖼀𖽧𖾐 𖼳𖽡𖽪𖾐 𖼺𖽦 𖼄𖽸𖾐 𖼍𖽺𖾑 𖼺𖽺，𖼦𖽜𖾐 𖼄𖽙𖾐 𖽃𖽔𖾐 𖼮𖽡𖽦𖾐 𖼂𖽜𖾐 𖼍𖽪𖾐 𖼖𖽻𖾐，
𖽃𖽔𖾐 𖼮𖽡𖽦𖾐 𖼍𖽪𖾑 𖼍𖽪𖾐 𖼈𖽡𖾐 𖼊𖽡𖾐 𖼂𖽜𖾑 𖼖𖽙𖾐 𖼺𖽶𖾑，𖼦𖽜𖾐 𖼄𖽙𖾐 𖽃𖽔𖾐 𖼮𖽡𖽦𖾐 𖼄𖽔 𖼖𖽧𖾐 𖼖𖽕𖾐．
9 𖼮𖽡𖾐 𖼂𖽦𖾐 𖼀𖽦𖾐：‘ 𖼣𖽙𖾐 𖼞𖽕 𖼽𖽡𖾐 𖼊𖽻𖾐，𖼣𖽙𖾐 𖼽𖽻 𖼈𖽳𖾐 𖼊𖽑𖽺 𖼞𖽕 𖽂𖽙𖾐 𖼺𖽺𖾑，
𖼽𖽻 𖼈𖽳𖾐 𖼞𖽳𖾐 𖼄𖽡𖽻 𖼐𖽑𖽡 𖼐𖽻𖾑 𖼦𖽑𖽙𖾐 𖼊𖽻𖾐，
𖼣𖽙𖾐 𖼽𖽻 𖼈𖽳𖾐 𖼞𖽶𖾐 𖼮𖽑𖽶 𖼊𖽑𖽺 𖼮𖽑𖽻𖾐 𖼐𖽑𖽧𖾐 𖼖𖽚 𖼊𖽻𖾐，
𖼣𖽙𖾐 𖽃𖽔𖾑 𖼊𖽑𖽙 𖼞𖽻𖾐 𖼊𖽑𖽧 𖼖𖽻𖾐 𖼺𖽺𖾑，𖼽𖽻 𖼈𖽳𖾐 𖼊𖽑𖽺 𖼺𖽦 𖼦𖽑𖽙𖾐 𖼊𖽻𖾐．’
10 𖼐𖽑𖽡𖾐 𖽃𖽔𖾑 𖼄𖽶 𖼳𖽡𖽺𖾐 𖼞𖽜 𖼊𖽑𖽡 𖼖𖽦 𖼮𖽝 𖼍𖽺𖾑 𖼺𖽺，𖼦𖽜𖾐 𖼄𖽙𖾐 𖽃𖽔𖾐 𖼮𖽡𖽦𖾐 𖼽𖽻 𖼈𖽳𖾐 𖼊𖽑𖽺 𖽃𖽝𖾐 𖼄𖽡𖾑 ，
𖼽𖽻 𖼈𖽳𖾐 𖼦𖽜𖾐 𖼂𖽸𖾐 𖼖𖽸𖾐 𖼖𖽙𖾐 𖼺𖽶𖾑，𖼦𖽑𖽜𖾐 𖼈𖽡𖾐 𖼊𖽑𖽻𖾐 𖼹𖽺𖾐 𖼽𖽡𖾐 𖼦𖽑𖽙𖾐．
11 𖼽𖽺𖾐 𖼦𖽴 𖼦𖽫 𖽃𖽔𖾐! 𖼞𖽑𖽙𖾐 𖼣𖽻𖾐 𖼳𖽶 𖼺𖽡𖾐 𖼠𖽻𖾐 𖼞𖽑𖽶𖾐，𖽃𖽔 𖼺𖽺 𖼐𖽑𖽡𖾐 𖼖𖽙𖾐 𖼄𖽳𖾐 𖼊𖽙𖾐 𖼐𖽺𖾑？
𖽃𖽔 𖼺𖽺 𖼐𖽑𖽡𖾐 𖼖𖽙𖾐 𖼺𖽶𖾑 𖼄𖽶 𖼳𖽳𖾐 𖼮𖽻𖾐，𖼺𖽡 𖼮𖽡𖾐 𖼮𖽻𖾐，𖼞𖽑𖽪𖾐 𖼮𖽑𖽳 𖼷𖽻，𖼮𖽡𖽮𖾐 𖼠𖽙𖾐 𖼳𖽙𖾐 𖼷𖽻 ，𖼞𖽑𖽙 𖼣𖽝 𖼄𖽡𖽻 𖼂𖽺𖾐 𖼠𖽸𖾑 𖼐𖽺𖾑？
12 𖼐𖽑𖽡𖾐 𖼽𖽙𖾐 𖼀𖽳 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼊𖽚𖾐 𖼖𖽻𖾐 𖼺𖽺𖾑，𖼄𖽡𖾑 𖼐𖽦𖾐 𖼽𖽻 𖼈𖽳𖾐 𖼊𖽑𖽺 𖼊𖽻𖾐 𖼦𖽑𖽙𖾐．
13 𖼐𖽑𖽡𖾐 𖼐𖽙𖾑 𖼣𖽜 𖼖𖽙𖾐 𖼮𖽑𖽻𖾐，𖼐𖽑𖽡𖾐 𖼞𖽑𖽙𖾐 𖼈𖽳 𖼞𖽑𖽚 𖼖𖽻𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼦𖽳 𖼺𖽜，
𖼐𖽑𖽡𖾐 𖽂𖽙 𖼐𖽑𖽡𖾐 𖼖𖽙𖾐 𖼮𖽑𖽻𖾐，𖼽𖽻 𖼈𖽳𖾐 𖼊𖽑𖽺 𖼦𖽳 𖼐𖽑𖽡𖾐 𖼞𖽳𖾐 𖼺𖽡 𖼮𖽡𖾐 𖼄𖽡𖾐 𖼊𖽺𖾐 𖼮𖽑𖽡𖾐．
14 𖼞𖽑𖽙𖾐 𖼣𖽻𖾐 𖼳𖽶 𖼀𖽑𖽙 𖼊𖽻 𖼮𖽨 𖼺𖽺𖾑，𖼮𖽡𖽮𖾐 𖼞𖽴𖾐 𖼍𖽪𖾐 𖼖𖽻𖾐 𖼊𖽻𖾐，
𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼖𖽺𖾑 𖼮𖽡𖽮𖾐 𖼐𖽙𖾐 𖼊𖽻𖾐．
15 𖼞𖽑𖽶𖾑 𖼮𖽶𖾐 𖼮𖽑𖽡𖾐，𖼽𖽡 𖼍𖽙𖾐 𖼄𖽡𖾐 𖼊𖽺𖾐 𖼮𖽑𖽪𖾐 𖼳𖽶 𖼈𖽪𖾑 𖼷𖽪𖾐 𖼮𖽡𖽮𖾐 𖼷𖽑𖽚，
𖼄𖽚 𖼽𖽔𖾐 𖼺𖽪𖾐 𖼷𖽑𖽻𖾐 𖼖𖽕𖾐 𖼷𖽑𖽺 𖼷𖽑𖽺 𖼐𖽑𖽡𖽻𖾐 𖼐𖽑𖽡𖽻𖾐 𖼞𖽴𖾐 𖼦𖽑𖽻𖾐，
𖼰𖽡𖽔𖾐 𖼐𖽕 𖼺𖽪𖾐 𖼷𖽑𖽻𖾐 𖼀𖽺 𖼞𖽑𖽙𖾐 𖼣𖽻𖾐 𖼮𖽡𖽮𖾐 𖼰𖽡𖾐 𖼀𖽺 𖼦𖽑𖽻𖾐．
16 𖼮𖽡𖽮𖾐 𖼮𖽡𖽮𖾐 𖼞𖽴𖾐 𖼞𖽴𖾐 𖼞𖽳𖾐 𖼄𖽡𖽻 𖼽𖽻 𖼈𖽳𖾐 𖼊𖽑𖽺 𖼰𖽻𖾑 𖼍𖽡．
𖼽𖽺𖾐 𖼦𖽴 𖼦𖽫 𖽃𖽔𖾐! 𖼐𖽑𖽡𖾐 𖼞𖽳𖾐 𖽂𖽙 𖼐𖽑𖽡𖾐 𖽂𖽙 𖼖𖽕𖾐 𖼖𖽙𖾐 𖼀𖽙𖾐 𖼺𖽺𖾑，𖼽𖽻 𖼈𖽳𖾐 𖼖𖽚𖾐 𖼄𖽙𖾐 𖼖𖽙𖾐 𖼺𖽶𖾑 𖼖𖽧𖾐 𖼖𖽕𖾐 𖼄𖽔 𖼠𖽸𖾑．
𖼳𖽡𖽻𖾐 𖼺𖽺𖾑 𖼐𖽑𖽡𖾐 𖼞𖽑𖽙𖾐 𖼈𖽳 𖼞𖽑𖽚 𖼖𖽻𖾐 𖼞𖽳𖾐 𖼷𖽑𖽻𖾐 𖼀𖽺 𖼠𖽚 𖼽𖽡𖾐 𖼦𖽑𖽻𖾐 𖼰𖽶𖾐 𖼮𖽑𖽡𖾐．
17 𖼐𖽑𖽡𖾐 𖼽𖽻 𖼈𖽳𖾐 𖼊𖽑𖽺 𖼦𖽳 𖼞𖽜 𖼮𖽙𖾐 𖼄𖽡𖾐 𖼊𖽺𖾐 𖼽𖽡𖾐 𖼺𖽺𖾑，𖼀𖽑𖽨 𖼐𖽑𖽡𖾐 𖼄𖽡𖾐 𖼳𖽡𖽪 𖼞𖽳𖾐 𖽂𖽙 𖼰𖽡𖽺𖾐 𖼊𖽑𖽺 𖼮𖽻𖾐 𖼻𖽻𖾐．
𖼽𖽺𖾐 𖼦𖽴 𖼦𖽫 𖽃𖽔𖾐! 𖼞𖽑𖽶𖾑 𖼐𖽑𖽡𖾐 𖼽𖽻 𖼄𖽳𖾑 𖼖𖽙𖾐 𖼀𖽙𖾐 𖼂𖽺𖾐 𖼳𖽡𖽻𖾐 𖼺𖽪𖾐 𖼮𖽻𖾐 𖼞𖽳𖾐 𖼣𖽻𖾐．
𖼺𖽡 𖼀𖽑𖽙 𖽃𖽔𖾐! 𖼞𖽑𖽶𖾑 𖼐𖽑𖽡𖾐 𖼺𖽡 𖼮𖽡𖾐 𖼦𖽑𖽺𖾐 𖼊𖽴𖾐 𖼊𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼣𖽻𖾐．
18 𖼽𖽺𖾐 𖼦𖽴 𖼦𖽫 𖼷𖽑𖽜𖾑 𖼷𖽑𖽜𖾐 𖼈𖽪𖾐 𖼍𖽦 𖼂𖽺𖾐 𖼺𖽺𖾑 ，𖼻𖽳𖾐 𖼻𖽳𖾐 𖼹𖽦𖾐 𖼹𖽦𖾐 𖼖𖽙𖾐 𖼮𖽑𖽡𖾐 𖼊𖽻𖾐．”
𖼄𖽡 𖼖𖽡𖾑 𖽃𖽗𖾑 𖼞𖽳𖾐 𖼮𖽻 𖼮𖽪
19 𖼇𖽕 𖼖𖽻 𖼄𖽪 𖼰𖽕𖾑 𖼊𖽝 𖼮𖽑𖽜𖾐 𖼞𖽻𖾐 𖼍𖽳𖾐、 𖼄𖽪 𖼷𖽳 𖼺𖽪𖾐 𖼄𖽦 𖼀𖽑𖽙 𖼖𖽙𖾐 𖼮𖽑𖽻𖾐，𖼦𖽜𖾐 𖼄𖽙𖾐 𖼞𖽑𖽶𖾐 𖼊𖽡 𖼽𖽡𖾐 𖼞𖽑𖽶𖾑 𖼮𖽶𖾐，𖼽𖽺𖾐 𖼦𖽴 𖼦𖽫 𖼦𖽜𖾐 𖼄𖽙𖾐 𖽃𖽔𖾐 𖼮𖽡𖽦𖾐 𖼞𖽜 𖼖𖽻 𖼀𖽑𖽚𖾐 𖼞𖽑𖽚 𖼖𖽻𖾐 𖼽𖽻 𖼈𖽳𖾐 𖼊𖽑𖽺 𖽃𖽝𖾐 𖼄𖽡𖾑． 𖼦𖽑𖽻𖾐 𖼊𖽑𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼦𖽜𖾐 𖼄𖽙𖾐 𖼞𖽑𖽶𖾐 𖼦𖽡𖽳𖾑 𖼄𖽡𖾐 𖼊𖽑𖽺 𖽂𖽙𖾐 𖼺𖽜．
20 𖼽𖽕𖾑 𖼖𖽪𖽦 𖼽𖽻 𖼷𖽡𖾐 𖼄𖽡 𖼖𖽡𖾑 𖽃𖽗𖾑 ，𖼞𖽑𖽶𖾑 𖼺𖽡𖾐 𖼻𖽙 𖼣𖽻𖾐，𖼖𖽦 𖼀𖽑𖽦𖾐 𖼠𖽪 𖼈𖽺𖾐 ；𖼻𖽙 𖼄𖽳 𖼄𖽡𖾐 𖼐𖽜𖾐 𖼞𖽑𖽙𖾐 𖼣𖽻𖾐 𖼽𖽻 𖼖𖽙𖾐 𖼮𖽑𖽻𖾐 𖼊𖽚𖾐 𖼖𖽻𖾐 𖼺𖽺𖾑，𖼠𖽪 𖼊𖽝 𖼞𖽪𖾐 𖼰𖽴𖾐． 21 𖼄𖽡 𖼖𖽡𖾑 𖽃𖽗𖾑 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼮𖽻 𖼮𖽪 𖼮𖽻，𖼀𖽦𖾐：
“𖼐𖽑𖽡𖾐 𖼈𖽳𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽑𖽪𖾐 𖼮𖽑𖽳 𖼖𖽡𖾐，
𖼞𖽪𖾐 𖼮𖽡𖽺𖾐 𖼽𖽻 𖼰𖽕𖾑 𖼊𖽝 𖽂𖽙 𖼊𖽙𖾐 𖼦𖽑𖽻𖾐，
𖼄𖽪 𖼐𖽺𖾐 𖼄𖽪 𖼷𖽳 𖼺𖽪𖾐 𖼄𖽦 𖼀𖽑𖽙 𖼊𖽑𖽺 𖼽𖽻 𖼮𖽑𖽢𖾑 𖼷𖽴𖾐 𖼦𖽜𖾐 𖼄𖽙𖾐 𖼞𖽑𖽶𖾐 𖼰𖽡𖽺𖾐 𖼦𖽑𖽙𖾐．”
𖼄𖽔 𖼖𖽔𖾐 𖼄𖽡𖾐 𖼊𖽺𖾐 𖼈𖽡𖾐 𖼞𖽑𖽻
22 𖼄𖽚 𖼳𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼦𖽜𖾐 𖼄𖽙𖾐 𖼐𖽑𖽡𖾐 𖼞𖽳𖾐 𖼮𖽑𖽻𖾐 𖼦𖽳 𖼺𖽜 𖼍𖽪𖾐，𖼳𖽪𖾐 𖽃𖽳 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼞𖽳𖾐 𖼮𖽑𖽡𖾐． 𖼽𖽻 𖼈𖽳𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼺𖽙𖾐 𖼐𖽑𖽡𖾐 𖼺𖽜 𖼦𖽑𖽙𖾐，𖽃𖽔𖾐 𖼮𖽡𖽦𖾐 𖼰𖽙𖾐 𖽂𖽙𖾐 𖼊𖽻𖾐 𖼄𖽔 𖼊𖽙𖾐． 23 𖼠𖽙𖾑 𖼍𖽻𖾐 𖼄𖽔 𖼖𖽔𖾐 𖼄𖽡𖾐 𖼊𖽺𖾐 𖼮𖽑𖽡𖾐，𖼞𖽑𖽶𖾑 𖼠𖽻𖾐 𖽃𖽔𖾐 𖼮𖽡𖽦𖾐 𖼞𖽑𖽻 𖼺𖽺𖾑 𖼊𖽻𖾐 𖼀𖽑𖽢 𖼄𖽔 𖼊𖽙𖾐，𖽃𖽔𖾐 𖼺𖽺𖾑 𖼞𖽑𖽶𖾑 𖼄𖽡𖾐 𖼊𖽺𖾐 𖼄𖽔 𖼖𖽔𖾐 𖼄𖽡𖾐．
24 𖼷𖽑𖽻𖾐 𖼀𖽺 𖼄𖽚 𖼳𖽡𖾐 𖼊𖽑𖽺 𖼀𖽶 𖼻𖽶 𖼊𖽻 𖼊𖽑𖽜𖾐，𖼀𖽦𖾐：“𖼣𖽙𖾐 𖼈𖽳𖾐 𖽃𖽔 𖼊𖽺𖾑 𖼳𖽶 𖼊𖽻𖾐 𖼐𖽺𖾑？ ” 25 𖼄𖽚 𖼳𖽡𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼽𖽻 𖼊𖽑𖽺 𖼺𖽧𖾐 𖼊𖽑𖽡 𖼷𖽡𖾐 \fr 15．25 \ft “𖼺𖽧𖾐 𖼊𖽑𖽡 𖼷𖽡𖾐 ” 𖼊𖽑𖽺 “𖼺𖽧𖾐 𖼊𖽑𖽡 𖼀𖽦𖾐 ” 𖼀𖽑𖽚𖾐 𖼺𖽪𖾐 𖼖𖽺𖾑 𖼮𖽻𖾐． 𖼊𖽑𖽪 𖼄𖽪𖾑． 𖼽𖽻 𖼺𖽧𖾐 𖼞𖽑𖽶𖾑 𖼷𖽡𖾐 𖼷𖽴𖾐 𖽃𖽔𖾐 𖼮𖽡𖽦𖾐 𖼞𖽑𖽶𖾐 𖼹𖽺𖾐，𖽃𖽔𖾐 𖼮𖽡𖽦𖾐 𖼮𖽑𖽶𖾑 𖼮𖽑𖽶𖾐 𖼀𖽑𖽢 𖼦𖽑𖽙𖾐．
𖼽𖽺𖾐 𖼦𖽴 𖼦𖽫 𖼞𖽑𖽶𖾑 𖼠𖽻𖾐 𖼽𖽻 𖼈𖽳𖾐 𖼖𖽙𖾐 𖼀𖽙𖾐 𖼳𖽪𖾐 𖼮𖽨𖾐 𖼐𖽺𖾐 𖼐𖽑𖽡𖾐 𖼮𖽡𖽺𖾐 𖼍𖽧𖾑 𖼍𖽙𖾑，𖼦𖽑𖽔𖾐 𖼖𖽺𖾑 𖼞𖽑𖽶𖾑 𖼠𖽻𖾐 𖼽𖽻 𖼈𖽳𖾐 𖼊𖽑𖽺 𖼳𖽶𖾑 𖼐𖽦𖾐． 26 𖼽𖽺𖾐 𖼦𖽴 𖼦𖽫 𖼦𖽑𖽔𖾐 𖼖𖽺𖾑 𖼀𖽦𖾐：“𖼐𖽑𖽡𖾐 𖼹𖽳𖾐 𖼄𖽙𖾐 𖼣𖽙𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐，𖼣𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼐𖽑𖽧𖾐 𖼰𖽶𖾐 𖼞𖽳𖾐 𖼄𖽡𖽻 𖼂𖽺𖾐，𖼐𖽑𖽧𖾐 𖼄𖽙𖾐 𖼊𖽑𖽺 𖼍𖽙𖾑 𖼣𖽙𖾐 𖼞𖽳𖾐 𖼷𖽑𖽦𖾐 𖼮𖽡𖽺𖾐 𖼊𖽑𖽺 𖼊𖽻 𖼮𖽶𖾐 𖼮𖽻𖾑 𖼊𖽴，𖼣𖽙𖾐 𖼞𖽳𖾐 𖼳𖽪𖾐 𖼮𖽨𖾐 𖼊𖽑𖽺 𖼳𖽪𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼀𖽑𖽨 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼞𖽶𖾐 𖼮𖽑𖽶 𖼊𖽑𖽺 𖼍𖽦𖾐 𖼺𖽪𖾐 𖼐𖽙𖾐 𖼮𖽡𖽻𖾐，𖼷𖽑𖽜𖾑 𖼷𖽑𖽜𖾐 𖼄𖽔 𖼀𖽑𖽨 𖼐𖽑𖽡𖾐 𖼈𖽳𖾐 𖼞𖽶𖾐 𖼮𖽑𖽶 𖼊𖽑𖽺 𖼍𖽦𖾐 𖼊𖽻𖾐． 𖼞𖽪𖾐 𖼮𖽡𖽺𖾐，𖼣𖽙𖾐 𖼦𖽑𖽺𖾑 𖼐𖽑𖽡𖾐 𖼈𖽳𖾐 𖼊𖽑𖽺 𖼐𖽙𖾐 𖼞𖽪𖾐 𖼺𖽪𖾐 𖼽𖽺𖾐 𖼦𖽴 𖼦𖽫 𖼣𖽻𖾐．”
𖼽𖽡 𖼖𖽧 𖼄𖽡𖾐 𖼊𖽺𖾐 𖼞𖽳𖾐 𖼈𖽡𖾐 𖼊𖽚𖾐
27 𖼠𖽙𖾑 𖼍𖽻𖾐，𖼽𖽻 𖼈𖽳𖾐 𖼽𖽡 𖼖𖽧 𖼄𖽡𖾐 𖼊𖽺𖾐 𖼮𖽑𖽡𖾐，𖼞𖽑𖽶𖾑 𖼠𖽻𖾐 𖼈𖽡𖾐 𖼊𖽚𖾐 𖼷𖽑𖽡𖾐 𖼐𖽑𖽡 𖼊𖽚𖾐 𖼮𖽻𖾐，𖼮𖽡𖽺𖾐 𖼷𖽡𖾐 𖼳𖽶 𖼷𖽑𖽡𖾐 𖼷𖽡𖾐 𖼮𖽻𖾐． 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖽃𖽔𖾐 𖼮𖽡𖽦𖾐 𖼦𖽜 𖼷𖽜𖾐 𖼞𖽑𖽶𖾑 𖼠𖽻𖾐 𖼦𖽑𖽺𖾐 𖼠𖽴𖾐 𖼍𖽚 𖼈𖽶．