𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼦𖽜𖾐 𖼄𖽙𖾐 𖼐𖽑𖽡𖾐 𖼠𖽚
14
1 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐： 2 “𖼐𖽑𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼀𖽦𖾐 𖼄𖽪𖾑，𖼰𖽻𖾐 𖼀𖽑𖽚𖾐 𖼞𖽚 𖼖𖽻𖾐 𖼖𖽡𖾐，𖼂𖽡 𖼦𖽔𖾐 𖼳𖽡𖾐 𖼖𖽮𖾑 𖼖𖽪𖾐 𖽃𖽙𖾑 𖼄𖽺 𖼀𖽳，𖼦𖽜𖾐 𖼄𖽙𖾐 𖼐𖽺𖾐 𖼄𖽧𖾑 𖼍𖽚 𖼖𖽪𖾐 𖼠𖽻𖾐 𖼊𖽑𖽺 𖼞𖽳𖾐 𖼂𖽔𖾐 𖼖𖽧𖾑 𖼳𖽡 𖼇𖽜𖾐 𖼖𖽪𖾐 𖼍𖽴 𖼍𖽪𖾐，𖼦𖽜𖾐 𖼄𖽙𖾐 𖼖𖽙𖾐 𖼐𖽳 𖼞𖽳𖾐 𖼞𖽑𖽶𖾑 𖼠𖽻𖾐，𖼦𖽑𖽺𖾐 𖼠𖽴𖾐 𖼍𖽚 𖼈𖽶 𖼖𖽡𖾐． 3 𖼇𖽕 𖼖𖽻 𖼷𖽑𖽜𖾑 𖼷𖽑𖽜𖾐 𖼦𖽑𖽺𖾑 𖼻𖽻𖾐 𖼀𖽦𖾐 𖼊𖽻𖾐：‘ 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼠𖽻𖾐 𖼊𖽑𖽺 𖼮𖽨𖾐 𖼄𖽙𖾐 𖼺𖽜 𖼦𖽑𖽙 𖼦𖽑𖽻𖾐，𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼽𖽻 𖼈𖽳𖾐 𖼊𖽑𖽺 𖼀𖽨 𖼮𖽳 𖼍𖽡 𖼊𖽻𖾐．’ 4 𖼣𖽙𖾐 𖼇𖽕 𖼖𖽻 𖼞𖽜 𖼐𖽑𖽧𖾐 𖼠𖽴𖾐 𖼺𖽺𖾑，𖼽𖽻 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼠𖽙𖾑 𖼍𖽻𖾐 𖼞𖽕 𖼽𖽡𖾐 𖼊𖽻𖾐． 𖼦𖽑𖽺𖾑 𖼻𖽻𖾐，𖼇𖽕 𖼖𖽻 𖼐𖽺𖾐 𖼽𖽻 𖼞𖽳𖾐 𖼄𖽦 𖼀𖽑𖽙 𖼷𖽪𖾐 𖼊𖽑𖽺 𖼮𖽑𖽻𖾐 𖼣𖽙𖾐 𖼞𖽳𖾐 𖼄𖽶 𖼳𖽳𖾐 𖽂𖽙𖾐 𖼊𖽻𖾐． 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼷𖽑𖽜𖾑 𖼷𖽑𖽜𖾐 𖼺𖽝𖾑 𖼊𖽻𖾐，𖼣𖽙𖾐 𖼽𖽺𖾐 𖼦𖽴 𖼦𖽫 𖼣𖽻𖾐．” 𖽃𖽔𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼦𖽑𖽺𖾑 𖼖𖽙𖾐 𖼺𖽶𖾑 𖼂𖽺𖾐 𖼽𖽡𖾐．5 𖼷𖽑𖽻𖾐 𖼊𖽑𖽡 𖼹𖽻𖾐 𖽃𖽦𖾐 𖼰𖽧 𖼠𖽚 𖼞𖽳𖾐 𖼈𖽪𖾐 𖼍𖽦 𖼖𖽙𖾐 𖼀𖽦𖾐：“𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼮𖽡𖽪 𖼀𖽑𖽻𖾐 𖼺𖽜 𖼽𖽡𖾐 𖼦𖽑𖽙𖾐．” 𖼇𖽕 𖼖𖽻 𖼐𖽺𖾐 𖼷𖽶 𖼄𖽻 𖼐𖽑𖽧𖾐 𖼄𖽙𖾐 𖼣𖽝 𖼀𖽑𖽚𖾐 𖼺𖽺𖾑，𖼽𖽻 𖼈𖽳𖾐 𖼷𖽙𖾐 𖼖𖽙𖾐 𖼮𖽑𖽻𖾐 𖼀𖽦𖾐：“𖽃𖽔 𖼐𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽜 𖼺𖽜 𖼽𖽡𖾐 𖼦𖽑𖽙𖾐，𖼹𖽦𖾑 𖽃𖽔 𖼐𖽺𖾑 𖼊𖽑𖽺 𖼄𖽔 𖼠𖽙𖾐 𖼳𖽙𖾐 𖼊𖽻𖾐，𖼦𖽑𖽺𖾑 𖽃𖽔 𖼊𖽺𖾑 𖼳𖽶 𖼄𖽡𖽻 𖼂𖽺𖾐 𖼺𖽪𖾐 𖼣𖽻𖾐 𖼐𖽺𖾑？” 6 𖽃𖽔𖾐 𖼺𖽺𖾑，𖼇𖽕 𖼖𖽻 𖼄𖽪 𖼮𖽑𖽜𖾐 𖼂𖽺𖾐 𖼳𖽡𖽻𖾐，𖼽𖽻 𖼞𖽳𖾐 𖼄𖽦 𖼀𖽑𖽙 𖼊𖽑𖽺 𖼦𖽳 𖼮𖽑𖽻𖾐 𖼽𖽡𖾐． 7 𖼦𖽑𖽔𖾐 𖼮𖽶𖾐 𖼹𖽳𖾐 𖼺𖽪𖾐 𖼄𖽪 𖼮𖽑𖽜𖾐 𖼮𖽑𖽡𖽚 𖼦𖽑𖽙𖾐 𖼷𖽸 𖼐𖽺𖾐 𖽃𖽦𖾐 𖼰𖽧 𖼠𖽚 𖼞𖽑𖽙𖾐 𖼮𖽻𖾐 𖼺𖽪𖾐 𖼄𖽪 𖼮𖽑𖽜𖾐，𖼊𖽑𖽡 𖼷𖽸𖾑 𖼊𖽑𖽡 𖼷𖽸 𖼊𖽑𖽺 𖼄𖽦 𖼈𖽪𖾑 𖼷𖽪𖾐 𖼮𖽑𖽻𖾐． 8 𖼽𖽺𖾐 𖼦𖽴 𖼦𖽫 𖼇𖽕 𖼖𖽻 𖼞𖽜 𖼐𖽑𖽧𖾐 𖼠𖽴𖾐 𖼺𖽺𖾑，𖼽𖽻 𖼽𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼞𖽕 𖼽𖽡𖾐． 𖼞𖽪𖾐 𖼮𖽡𖽺𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖽂𖽙 𖼐𖽑𖽡𖾐 𖼖𖽙𖾐 𖼣𖽜𖾐，𖼮𖽡𖽮𖾐 𖼊𖽪𖾐 𖼄𖽔 𖼮𖽻𖾐 𖼄𖽙𖾐 𖼊𖽚𖾐 𖼽𖽡𖾐 𖼳𖽶 𖼣𖽻𖾐． 9 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼽𖽻 𖼈𖽳𖾐 𖼊𖽑𖽺 𖼞𖽕 𖼽𖽡𖾐，𖼇𖽕 𖼖𖽻 𖼞𖽳𖾐 𖼄𖽪、 𖼰𖽕𖾑 𖼊𖽝 𖼮𖽑𖽜𖾐、 𖼄𖽪 𖼷𖽳 𖼺𖽪𖾐 𖼄𖽦 𖼀𖽑𖽙 𖼐𖽺𖾐 𖼮𖽨𖾐 𖼺𖽜 𖼺𖽪𖾐 𖼄𖽦 𖼀𖽑𖽙 𖼞𖽑𖽙𖾐 𖼣𖽻𖾐，𖼞𖽑𖽻𖾑 𖼦𖽜𖾐 𖼄𖽙𖾐 𖼦𖽜 𖼂𖽡 𖼦𖽔𖾐 𖼳𖽡𖾐 𖼖𖽮𖾑 𖼖𖽪𖾐 𖼖𖽙𖾐 𖼐𖽳，𖼂𖽔𖾐 𖼖𖽧𖾑 𖼳𖽡 𖼇𖽜𖾐 𖼖𖽪𖾐 𖼍𖽴 𖼍𖽪𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼮𖽻𖾐 𖼞𖽳𖾐 𖼞𖽑𖽶𖾑 𖼠𖽻𖾐，𖼽𖽻 𖼈𖽳𖾐 𖼊𖽑𖽺 𖼞𖽕 𖼄𖽳𖾐．
10 𖼇𖽕 𖼖𖽻 𖼺𖽜 𖼽𖽻 𖼈𖽳𖾐 𖼖𖽙𖾐 𖼐𖽳 𖼞𖽑𖽶𖾑 𖼮𖽶𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼈𖽪𖾑 𖼊𖽡𖾐 𖼮𖽑𖽳 𖼍𖽪𖾐 𖼐𖽦𖾐 𖼄𖽡𖽻𖾐，𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼽𖽻 𖼈𖽳𖾐 𖼊𖽑𖽺 𖼞𖽕 𖼖𖽻𖾐，𖼽𖽻 𖼈𖽳𖾐 𖼦𖽑𖽔𖾐 𖼮𖽶𖾐 𖼮𖽡𖽮𖾐 𖼺𖽺𖾑，𖼮𖽑𖽡𖽪 𖼈𖽳 𖼄𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐． 11 𖼽𖽻 𖼈𖽳𖾐 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼖𖽧 𖼀𖽳𖾐 𖼄𖽔 𖼮𖽻𖾐 𖼖𖽔？ 𖼐𖽑𖽡𖾐 𖼣𖽙𖾐 𖼈𖽳𖾐 𖼊𖽑𖽺 𖼦𖽳 𖼺𖽺𖾑，𖼳𖽶𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼠𖽻𖾐 𖼊𖽑𖽺 𖼀𖽜 𖼊𖽻𖾐 𖼖𖽔𖾑？ 𖼐𖽑𖽡𖾐 𖽃𖽔𖾐 𖼹𖽻𖾐 𖼦𖽑𖽺𖾑 𖼳𖽶 𖼄𖽡𖽻 𖼂𖽺𖾐？ 𖼣𖽙𖾐 𖼈𖽳𖾐 𖼊𖽑𖽺 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼦𖽳 𖼊𖽚𖾐 𖼖𖽻𖾐 𖼐𖽺𖾑？ 12 𖼣𖽙𖾐 𖼈𖽳𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽻𖾐 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼀𖽦𖾐 𖼠𖽚 𖼄𖽔 𖼣𖽻𖾐 𖼖𖽔？ 𖼣𖽙𖾐 𖼈𖽳𖾐 𖼊𖽑𖽺 𖼊𖽑𖽔 𖼠𖽕，𖼣𖽙𖾐 𖼈𖽳𖾐 𖼞𖽜 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼊𖽑𖽺 𖼞𖽳𖾐 𖼀𖽑𖽚𖾐 𖼀𖽑𖽙 𖼀𖽑𖽚𖾐 𖼄𖽙𖾐 𖼂𖽺𖾐 𖼻𖽻𖾐． 𖼞𖽪𖾐 𖼮𖽡𖽺𖾐，𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼞𖽳𖾐 𖼀𖽑𖽚𖾐 𖼀𖽑𖽙 𖼀𖽑𖽚𖾐 𖼄𖽙𖾐 𖼂𖽺𖾐，𖼞𖽑𖽶𖾑 𖼳𖽶𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼀𖽜 𖼦𖽶𖾑 𖼄𖽔 𖼷𖽑𖽶𖾐 𖼹𖽳𖾐 𖼺𖽺．”
13 𖼄𖽚 𖼳𖽡𖾐 𖼷𖽑𖽻𖾐 𖼀𖽺 𖼖𖽙𖾐 𖼀𖽦𖾐：“𖼮𖽡𖽮𖾐 𖼄𖽔 𖼻𖽻𖾐，𖼦𖽑𖽡𖽚 𖼻𖽺𖾐 𖼍𖽺𖾑 𖼻𖽻𖾐，𖽃𖽙𖾑 𖼐𖽑𖽡𖾐 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼈𖽳𖾐 𖼊𖽑𖽺 𖼰𖽨𖾑 𖼊𖽻𖾐 𖼞𖽳𖾐 𖼄𖽡𖽻 𖼊𖽑𖽺 𖼐𖽦𖾐 𖼍𖽺𖾑 𖼻𖽻𖾐． 𖼞𖽪𖾐 𖼮𖽡𖽺𖾐，𖽃𖽙𖾑 𖼐𖽑𖽡𖾐 𖼐𖽑𖽡𖾐 𖼈𖽳𖾐 𖼞𖽑𖽙𖾐 𖼐𖽦𖾐 𖼄𖽡𖽻𖾐 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼦𖽑𖽺𖾑 𖼹𖽻𖾐，𖼷𖽑𖽜𖾑 𖼷𖽑𖽜𖾐 𖼹𖽦𖾑 𖼄𖽔 𖼄𖽡𖽻𖾐 𖼊𖽻𖾐． 14 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼈𖽳𖾐 𖼊𖽑𖽡𖾑 𖼮𖽪 𖼊𖽝 𖼊𖽦 𖼊𖽻𖾐，𖼐𖽑𖽡𖾐 𖼈𖽳𖾐 𖼮𖽑𖽨 𖼀𖽺𖾐 𖼊𖽑𖽔 𖼊𖽑𖽧，𖼍𖽧𖾑 𖼊𖽧𖾐 𖼊𖽧𖾐 𖼮𖽻𖾐 𖼍𖽺𖾑 𖼻𖽻𖾐．”
15 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖽃𖽔𖾐 𖼹𖽻𖾐 𖼐𖽑𖽧𖾐 𖼮𖽑𖽸 𖼄𖽙𖾐 𖼣𖽙𖾐 𖼊𖽑𖽺 𖼮𖽑𖽡 𖼮𖽡𖽺𖾐 𖼐𖽺𖾑？ 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼄𖽪𖾑 𖼺𖽺𖾑，𖽃𖽙𖾑 𖼄𖽺 𖼺𖽜 𖼽𖽡𖾐 𖼍𖽺𖾑 𖼻𖽻𖾐． 16 𖼐𖽑𖽡𖾐 𖼍𖽚𖾐 𖼖𖽜 𖼄𖽶𖾐 𖼄𖽶𖾐 𖼮𖽑𖽳 𖼍𖽪𖾐，𖼦𖽜𖾐 𖼄𖽙𖾐 𖽃𖽔𖾐 𖼮𖽡𖽦𖾐 𖼀𖽜𖾐 𖼀𖽑𖽪𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽜 𖼦𖽜𖾐 𖼄𖽙𖾐 𖼠𖽻𖾐 𖼞𖽑𖽶𖾐 𖼦𖽡𖽳𖾑 𖼄𖽡𖾐 𖼊𖽑𖽺 𖼺𖽜 𖼊𖽻𖾐． 17 𖼐𖽦𖾐 𖼄𖽺! 𖼣𖽙𖾐 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼞𖽜 𖼐𖽑𖽧𖾐 𖼠𖽴𖾐，𖼽𖽻 𖼈𖽳𖾐 𖼞𖽜 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼠𖽙𖾑 𖼍𖽻𖾐 𖼄𖽳𖾐 𖼹𖽺𖾐 𖼽𖽡𖾐． 𖼣𖽙𖾐 𖼇𖽕 𖼖𖽻 𖼐𖽺𖾐 𖼽𖽻 𖼞𖽳𖾐 𖼄𖽪 𖼮𖽑𖽜𖾐，𖼄𖽪 𖼷𖽳 𖼺𖽪𖾐 𖼄𖽦 𖼀𖽑𖽙 𖼐𖽺𖾐 𖼄𖽦 𖼀𖽑𖽙 𖼞𖽑𖽙𖾐 𖼣𖽻𖾐 𖼊𖽑𖽺 𖼊𖽝 𖽂𖽙 𖼊𖽙𖾐 𖼺𖽺𖾑，𖼄𖽶 𖼳𖽳𖾐 𖽂𖽙𖾐 𖼊𖽻𖾐． 18 𖼇𖽕 𖼖𖽻 𖼐𖽺𖾐 𖼽𖽻 𖼞𖽳𖾐 𖼄𖽪 𖼮𖽑𖽜𖾐，𖼄𖽪 𖼷𖽳 𖼺𖽪𖾐 𖼄𖽦 𖼀𖽑𖽙 𖼐𖽺𖾐 𖼄𖽦 𖼀𖽑𖽙 𖼞𖽑𖽙𖾐 𖼣𖽻𖾐 𖼊𖽑𖽺 𖼊𖽝 𖽂𖽙 𖼊𖽙𖾐 𖼺𖽺𖾑，𖼄𖽶 𖼳𖽳𖾐 𖽂𖽙𖾐 𖼞𖽑𖽶𖾑 𖼮𖽶𖾐，𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼞𖽜 𖼺𖽝𖾑 𖼊𖽻𖾐，𖼣𖽙𖾐 𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼣𖽻𖾐．”
19 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖽃𖽙𖾑 𖼄𖽺 𖼀𖽳 𖼦𖽳 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼹𖽡𖾐 𖼖𖽦，𖼰𖽻𖾐 𖼀𖽑𖽚𖾐 𖼽𖽻 𖼈𖽳𖾐 𖼠𖽙𖾑 𖼍𖽻𖾐 𖼞𖽳𖾐 𖼀𖽳 𖼽𖽡𖾐． 𖼍𖽡𖾐 𖼻𖽶𖾐 𖼖𖽺𖾑 𖼽𖽻 𖼈𖽳𖾐 𖽃𖽙𖾑 𖼄𖽺 𖼮𖽑𖽻𖾐 𖼰𖽻𖾐 𖼺𖽺𖾑，𖼽𖽻 𖼈𖽳𖾐 𖼠𖽙𖾑 𖼍𖽻𖾐 𖼞𖽳𖾐 𖼀𖽳 𖼐𖽙． 20 𖼍𖽡𖾐 𖼻𖽶𖾐 𖼖𖽻𖾐 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼞𖽳𖾐 𖼄𖽦 𖼀𖽑𖽙 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼮𖽻𖾐 𖼞𖽳𖾐 𖼠𖽻𖾐 𖼊𖽑𖽺 𖼮𖽻𖾐，𖼊𖽑𖽡 𖼀𖽳 𖼐𖽦𖾑 𖼐𖽦𖾐，𖼊𖽑𖽡 𖼀𖽳 𖼀𖽜𖾐 𖼖𖽜𖾐，𖼊𖽑𖽡 𖼦𖽑𖽦 𖼐𖽺𖾐 𖼐𖽑𖽡 𖼀𖽳 𖼷𖽙𖾐 𖼖𖽙𖾐 𖼞𖽳𖾐 𖼽𖽡𖾐 𖼖𖽻𖾐 𖼀𖽑𖽢 𖼄𖽔 𖼊𖽙𖾐．
21 𖼄𖽚 𖼳𖽡𖾐 𖼍𖽚𖾐 𖼖𖽜 𖼄𖽶𖾐 𖼄𖽶𖾐 𖼮𖽑𖽳 𖼍𖽪𖾐，𖼽𖽺𖾐 𖼦𖽴 𖼦𖽫 𖼄𖽶 𖼳𖽡𖽺𖾐 𖼈𖽳 𖼄𖽙𖾐 𖼞𖽜 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼮𖽑𖽻𖾐 𖼮𖽝 𖼂𖽻𖾐 𖼖𖽻𖾐，𖼊𖽑𖽡 𖼦𖽑𖽦 𖼠𖽻𖾐 𖼞𖽑𖽶𖾐 𖽃𖽔𖾐 𖼮𖽡𖽦𖾐 𖼐𖽑𖽡 𖼊𖽑𖽜𖾐 𖼷𖽑𖽦𖾐，𖼦𖽜𖾐 𖼄𖽙𖾐 𖽃𖽔𖾐 𖼮𖽡𖽦𖾐 𖼐𖽑𖽡 𖼊𖽑𖽜𖾐 𖼷𖽑𖽦𖾐 𖼺𖽺𖾑 𖼦𖽡𖽳𖾑 𖼄𖽡𖾐 𖼀𖽑𖽢． 22 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼦𖽜𖾐 𖼄𖽙𖾐 𖼞𖽑𖽶𖾐 𖼹𖽺𖾐 𖼽𖽡𖾐 𖼦𖽡𖽳𖾑 𖼄𖽡𖾐 𖼊𖽑𖽺 𖼺𖽜，𖽃𖽔𖾐 𖼮𖽡𖽦𖾐 𖼽𖽻 𖼈𖽳𖾐 𖼞𖽳𖾐 𖼽𖽙𖾐 𖼀𖽳 𖼈𖽳𖾑 𖼀𖽳 𖼖𖽜𖾐 𖼀𖽜𖾐 𖼀𖽑𖽢．
23 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼖𖽻𖾐 𖼽𖽻 𖼈𖽳𖾐 𖼊𖽑𖽺 𖼞𖽕，𖼇𖽕 𖼖𖽻 𖼞𖽳𖾐 𖼄𖽪、 𖼰𖽕𖾑 𖼊𖽝 𖼮𖽑𖽜𖾐、 𖼄𖽪 𖼷𖽳 𖼺𖽪𖾐 𖼄𖽦 𖼀𖽑𖽙 𖼞𖽑𖽙𖾐 𖼣𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼠𖽙𖾑 𖼍𖽻𖾐 𖼄𖽳𖾐 𖼦𖽜𖾐 𖼄𖽙𖾐 𖼞𖽑𖽶𖾐 𖼹𖽺𖾐 𖼽𖽡𖾐． 24 𖼄𖽶 𖼊𖽑𖽡 𖼖𖽻𖾐 𖼮𖽻𖾐 𖼞𖽑𖽶𖾑 𖼮𖽡𖾐，𖼽𖽺𖾐 𖼦𖽴 𖼦𖽫 𖼍𖽡𖾐 𖼻𖽶𖾐 𖼐𖽺𖾐 𖼍𖽚𖾑 𖼻𖽶𖾐 𖼠𖽻𖾐 𖼊𖽑𖽺 𖼮𖽑𖽻𖾐，𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼞𖽳𖾐 𖼄𖽦 𖼀𖽑𖽙 𖼊𖽑𖽺 𖼐𖽦𖾐，𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼞𖽳𖾐 𖼄𖽦 𖼀𖽑𖽙 𖼞𖽜 𖼦𖽑𖽚 𖼊𖽦 𖼍𖽪𖾐 𖼖𖽻𖾐． 25 𖼦𖽑𖽔𖾐 𖼖𖽺𖾑 𖼽𖽻 𖼈𖽳𖾐 𖼞𖽳𖾐 𖼮𖽑𖽜𖾐 𖼠𖽪𖾐 𖼖𖽪𖾐 𖼞𖽜 𖼖𖽴𖾐 𖼊𖽚𖾐 𖼽𖽡𖾐，𖼺𖽜 𖼀𖽑𖽢 𖼄𖽔 𖼊𖽙𖾐，𖽃𖽔𖾐 𖼺𖽺𖾑 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼀𖽦𖾐：“𖽃𖽔 𖼐𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽡𖽪 𖼀𖽑𖽻𖾐 𖼻𖽻𖾐，𖼞𖽪𖾐 𖼮𖽡𖽺𖾐 𖼽𖽺𖾐 𖼦𖽴 𖼦𖽫 𖼽𖽻 𖼈𖽳𖾐 𖼖𖽙𖾐 𖼂𖽻𖾐 𖽃𖽔 𖼐𖽺𖾑 𖼊𖽑𖽺 𖼊𖽝 𖼊𖽦 𖼊𖽻𖾐．”
𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼦𖽜𖾐 𖼄𖽙𖾐 𖼐𖽑𖽡𖾐 𖼞𖽑𖽶𖾐 𖽃𖽝𖾐 𖼳𖽶𖾐 𖼦𖽑𖽙𖾐
26 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼍𖽚𖾐 𖼖𖽜 𖼄𖽶𖾐 𖼄𖽶𖾐 𖼮𖽑𖽳 𖼍𖽪𖾐，𖽃𖽔𖾐 𖼮𖽡𖽦𖾐 𖼞𖽜 𖼖𖽻 𖼀𖽑𖽚𖾐 𖼞𖽑𖽚 𖼖𖽻𖾐 𖼺𖽺𖾑，𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐、 𖼰𖽕𖾑 𖼊𖽝 𖼮𖽑𖽜𖾐 𖼐𖽺𖾐 𖼄𖽪 𖼷𖽳 𖼄𖽦 𖼀𖽑𖽙 𖼊𖽑𖽺 𖽃𖽝𖾐 𖼄𖽡𖾑． 27 𖽃𖽔𖾐 𖼺𖽺𖾑，𖼄𖽚 𖼳𖽡𖾐 𖼍𖽚𖾐 𖼖𖽜 𖼄𖽶𖾐 𖼄𖽶𖾐 𖼮𖽑𖽳 𖼍𖽪𖾐，𖼄𖽶 𖼊𖽑𖽡 𖼞𖽑𖽶𖾑 𖼮𖽶𖾐，𖼦𖽜𖾐 𖼄𖽙𖾐 𖽃𖽔𖾐 𖼮𖽡𖽦𖾐 𖽃𖽙𖾑 𖼄𖽺 𖼖𖽙𖾐 𖼺𖽶𖾑 𖼖𖽻 𖼀𖽑𖽚𖾐 𖼞𖽑𖽚 𖼖𖽻𖾐． 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼮𖽡𖽪 𖼀𖽑𖽻𖾐 𖼞𖽑𖽶𖾑 𖼮𖽶𖾐，𖼽𖽺𖾐 𖼦𖽴 𖼦𖽫 𖽃𖽔𖾐 𖼮𖽡𖽦𖾐 𖼞𖽜 𖼀𖽑𖽚𖾐 𖼽𖽻 𖼈𖽳𖾐 𖼊𖽑𖽺 𖼄𖽡𖾑 𖼮𖽨𖾐． 28 𖼦𖽜𖾐 𖼄𖽙𖾐 𖽃𖽔𖾐 𖼮𖽡𖽦𖾐 𖼖𖽻 𖼀𖽑𖽚𖾐 𖼞𖽑𖽚 𖼖𖽻𖾐 𖼞𖽑𖽶𖾑 𖼮𖽶𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼠𖽙𖾑 𖼍𖽻𖾐 𖼄𖽳𖾐 𖼦𖽜𖾐 𖼄𖽙𖾐 𖼞𖽑𖽶𖾐 𖼹𖽺𖾐 𖼽𖽡𖾐 𖼺𖽪𖾐 𖼇𖽕 𖼖𖽻 𖼞𖽳𖾐 𖼄𖽪 𖼮𖽑𖽜𖾐 𖼐𖽺𖾐 𖼄𖽦 𖼀𖽑𖽙 𖼞𖽑𖽙𖾐 𖼣𖽻𖾐，𖼊𖽑𖽡 𖼽𖽚𖾐 𖼖𖽺𖾑 𖼄𖽔 𖼷𖽺𖾐，𖼄𖽳𖾑 𖼄𖽳 𖽃𖽝𖾐 𖼳𖽶𖾐 𖼦𖽑𖽙𖾐．
29 𖼦𖽑𖽻𖾐 𖼊𖽑𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼍𖽺𖾑 𖼦𖽜𖾐 𖼄𖽙𖾐 𖼞𖽑𖽶𖾐 𖼦𖽡𖽳𖾑 𖼄𖽡𖾐 𖼊𖽑𖽺 𖼮𖽨𖾐 𖼺𖽜，𖽃𖽔𖾐 𖼮𖽡𖽦𖾐 𖼽𖽻 𖼈𖽳𖾐 𖼞𖽳𖾐 𖼽𖽙𖾐 𖼀𖽳 𖼈𖽳𖾑 𖼀𖽳 𖼖𖽜𖾐 𖼀𖽜𖾐 𖼀𖽑𖽢． 30 𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼽𖽺𖾐 𖼦𖽴 𖼦𖽫 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼰𖽨𖾑 𖼊𖽑𖽧 𖼖𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼐𖽦𖾐 𖼄𖽡𖽻𖾐，𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼳𖽶𖾐 𖼄𖽻𖾐 𖼄𖽳𖾑 𖼄𖽳 𖼦𖽜𖾐 𖼄𖽙𖾐 𖼦𖽜 𖼮𖽻𖾐 𖼍𖽳𖾐 𖼦𖽑𖽻𖾐． 31 𖼽𖽺𖾐 𖼦𖽴 𖼦𖽫 𖽂𖽙 𖼐𖽑𖽡𖾐 𖽂𖽙 𖼖𖽕𖾐 𖼻𖽜，𖼈𖽡𖾑 𖼞𖽑𖽙 𖼀𖽑𖽨 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼊𖽑𖽺 𖼍𖽦𖾐 𖼞𖽳𖾐 𖼄𖽡𖽻 𖼈𖽳，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼐𖽦𖾐 𖼄𖽡𖽻𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽡𖽮𖾐 𖼠𖽙𖾐 𖼳𖽙𖾐，𖼦𖽑𖽔𖾐 𖼖𖽺𖾑 𖼽𖽺𖾐 𖼦𖽴 𖼦𖽫 𖼐𖽺𖾐 𖼽𖽻 𖼞𖽳𖾐 𖼮𖽜𖾐 𖼀𖽑𖽙 𖼄𖽚 𖼳𖽡𖾐 𖼊𖽑𖽺 𖼊𖽻 𖼮𖽶𖾐 𖼮𖽻𖾑 𖼊𖽴．