𖼮𖽑𖽡 𖼈𖽪𖾑 𖼻𖽙 𖼐𖽺𖾐 𖽂𖽙 𖼊𖽺𖾐 𖼦𖽳 𖼺𖽪𖾐 𖼽𖽺𖾐 𖼦𖽴 𖼦𖽫 𖼷𖽺𖾐 𖼣𖽻𖾐
13
1 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐： 2 “𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼠𖽻𖾐 𖼊𖽑𖽺 𖽂𖽙 𖼊𖽺𖾐 𖼽𖽚𖾐 𖼺𖽪𖾐，𖼷𖽑𖽻𖾐 𖼣𖽻𖾐 𖼦𖽻，𖼮𖽡𖽺 𖼣𖽻𖾐 𖼦𖽻，𖼄𖽳𖾑 𖼄𖽳 𖼣𖽙𖾐 𖼷𖽺𖾐 𖼣𖽻𖾐，𖼀𖽜𖾐 𖼀𖽑𖽪𖾐 𖼊𖽑𖽧 𖼖𖽻𖾐 𖼣𖽙𖾐 𖼊𖽑𖽺 𖼞𖽜 𖼷𖽻．”3 𖼄𖽚 𖼳𖽡𖾐 𖼷𖽑𖽻𖾐 𖼀𖽺 𖼖𖽙𖾐 𖼀𖽦𖾐： 𖼐𖽑𖽡𖾐 𖼈𖽳𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼀𖽑𖽚𖾐 𖼀𖽑𖽙 𖼀𖽑𖽚𖾐 𖼄𖽙𖾐 𖼂𖽺𖾐 𖼠𖽻𖾐 𖼊𖽑𖽺 𖼮𖽑𖽻𖾐 𖼊𖽚𖾐 𖼖𖽻𖾐，𖼦𖽑𖽺𖾑 𖼊𖽑𖽡 𖼐𖽑𖽡𖾐 𖼊𖽑𖽺 𖼦𖽙𖾑 𖼮𖽑𖽡 𖼖𖽡𖾐，𖼞𖽪𖾐 𖼮𖽡𖽺𖾐 𖼽𖽺𖾐 𖼦𖽴 𖼦𖽫 𖽂𖽙 𖼐𖽑𖽡𖾐 𖽂𖽙 𖼖𖽕𖾐 𖼻𖽜 𖼐𖽑𖽡𖾐 𖼈𖽳𖾐 𖼊𖽑𖽺 𖼦𖽳 𖼊𖽑𖽧 𖼖𖽻𖾐． 𖽃𖽔𖾐 𖼺𖽺𖾑，𖼇𖽝𖾐 𖼠𖽚 𖼺𖽪𖾐 𖽃𖽔𖾑 𖼂𖽻𖾐 𖽂𖽙𖾐 𖼷𖽙 𖼄𖽔 𖼊𖽙𖾐． 4 𖼐𖽑𖽡𖾐 𖼈𖽳𖾐 𖼞𖽑𖽚 𖼳𖽸 𖼳𖽨𖾐 𖼞𖽳𖾐 𖼦𖽑𖽺𖾑 𖼊𖽑𖽡 𖼐𖽑𖽡𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼊𖽚𖾐 𖼖𖽻𖾐 𖼺𖽪𖾐 𖼣𖽻𖾐． 5 𖼠𖽙𖾑 𖼍𖽻𖾐 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼈𖽳𖾐 𖼊𖽑𖽺 𖼦𖽳 𖼺𖽺𖾑，𖼰𖽡𖽔𖾐 𖼐𖽕 𖼮𖽑𖽪𖾐 𖼳𖽶 𖼷𖽑𖽻𖾐、 𖼦𖽴𖾑 𖼮𖽑𖽪𖾐 𖼳𖽶 𖼷𖽑𖽻𖾐、 𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐、 𖼳𖽡𖾐 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽺𖾐 𖼽𖽺𖾐 𖼂𖽪𖾑 𖼺𖽶𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼮𖽑𖽡𖾐，𖼞𖽑𖽶𖾑 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼈𖽳𖾐 𖼞𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐，𖼖𖽪 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜 𖼮𖽙𖾐 𖼺𖽪𖾐 𖼀𖽕𖾑 𖼮𖽸𖾐 𖼈𖽡𖾐 𖼊𖽚𖾐 𖼐𖽺𖾐 𖼀𖽨 𖼈𖽡𖾐 𖼮𖽻𖾐 𖼄𖽡𖾐 𖼊𖽺𖾐 𖼣𖽻𖾐． 𖼐𖽑𖽡𖾐 𖼈𖽳𖾐 𖼞𖽑𖽻𖾑 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖼦𖽑𖽺𖾑 𖼊𖽑𖽡 𖼳𖽨𖾐 𖼠𖽻𖾐 𖼞𖽑𖽶𖾐 𖼐𖽑𖽡𖾐 𖼮𖽡𖽺𖾐 𖼦𖽑𖽺𖾑 𖼳𖽪𖾐 𖼖𖽡𖾐． 6 𖼐𖽑𖽡𖾐 𖼈𖽳𖾐 𖼇𖽝𖾐 𖼄𖽔 𖼠𖽚 𖼺𖽪𖾐 𖽃𖽔𖾑 𖼂𖽻𖾐 𖼳𖽶 𖼐𖽑𖽡𖾐 𖼷𖽙 𖼖𖽡𖾐，𖼳𖽶 𖼐𖽑𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼽𖽺𖾐 𖼦𖽴 𖼦𖽫 𖼖𖽙𖾐 𖼀𖽙𖾐 𖼻𖽦 𖼐𖽑𖽡𖾐 𖼳𖽪𖾐 𖼖𖽡𖾐． 7 𖼳𖽶 𖼐𖽑𖽡𖾐 𖼠𖽻𖾐 𖼊𖽑𖽺 𖼐𖽑𖽡𖾐 𖼇𖽝𖾐 𖼄𖽔 𖼠𖽚 𖼺𖽪𖾐 𖽃𖽔𖾑 𖼂𖽻𖾐 𖼷𖽙 𖼖𖽡𖾐． 𖼐𖽑𖽡𖾐 𖼮𖽻𖾐 𖼞𖽳𖾐 𖼄𖽡𖾐 𖼊𖽺𖾐，𖼇𖽝𖾐 𖼠𖽚 𖼺𖽪𖾐 𖽃𖽔𖾑 𖼂𖽻𖾐 𖼐𖽺𖾐 𖼇𖽝𖾐 𖼄𖽶𖾐 𖽂𖽙𖾐 𖼮𖽻𖾐 𖼄𖽔 𖼊𖽙𖾐．
8 𖼳𖽶 𖼐𖽑𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼐𖽑𖽡𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼊𖽑𖽺 𖼀𖽦𖾐 𖼰𖽨𖾐 𖼖𖽡𖾐 ：‘ 𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼣𖽙𖾐 𖼈𖽳𖾐 𖼊𖽑𖽺 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼦𖽳 𖼊𖽑𖽧 𖼖𖽻𖾐 𖼞𖽑𖽶𖾑 𖼮𖽶𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖼄𖽡𖽻 𖼣𖽻𖾐．’ 9 𖼻𖽦 𖼐𖽑𖽡𖾐 𖼦𖽑𖽺𖾑 𖼈𖽝 𖼐𖽑𖽡𖾐 𖼖𖽦 𖼀𖽑𖽦𖾐 𖼊𖽑𖽺 𖼍𖽡 𖼐𖽺𖾐 𖼣𖽴 𖼠𖽻𖾐 𖼊𖽑𖽺 𖼍𖽴𖾑 𖼖𖽙𖾐 𖼺𖽶𖾑，𖼺𖽙 𖼂𖽺𖾐 𖼖𖽡𖾐． 𖼦𖽑𖽺𖾑 𖼻𖽻𖾐，𖼽𖽺𖾐 𖼦𖽴 𖼦𖽫 𖼞𖽳𖾐 𖼳𖽪𖾐 𖼮𖽨𖾐 𖼊𖽻 𖼮𖽑𖽡𖽺 𖼻𖽳𖾐 𖼻𖽳𖾐 𖼐𖽑𖽡𖾐 𖼄𖽡 𖼞𖽑𖽪𖾐 𖼮𖽑𖽻𖾐 𖽂𖽙𖾐 𖼊𖽚𖾐 𖼊𖽙𖾐． 𖼞𖽪𖾐 𖼮𖽡𖽺𖾐，𖼽𖽺𖾐 𖼦𖽴 𖼦𖽫 𖽂𖽙 𖼐𖽑𖽡𖾐 𖽂𖽙 𖼖𖽕𖾐 𖼻𖽜 𖼐𖽑𖽡𖾐 𖼈𖽳𖾐 𖼊𖽑𖽺 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼦𖽳 𖼊𖽚𖾐 𖼖𖽻𖾐． 10 𖽃𖽔𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼊𖽑𖽡 𖼞𖽑𖽚𖾑 𖼞𖽑𖽚 𖼐𖽑𖽡𖾐 𖼦𖽑𖽦 𖼖𖽙𖾐 𖼮𖽑𖽻𖾐 𖼐𖽑𖽡𖾐 𖼮𖽡𖽺𖾐 𖼦𖽑𖽺𖾑 𖼳𖽪𖾐 𖼖𖽡𖾐．
11 𖽃𖽔𖾑 𖼞𖽶𖾐，𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼈𖽳𖾐 𖼊𖽑𖽺 𖼦𖽳 𖼺𖽺𖾑，𖼽𖽻 𖼐𖽑𖽡𖾐 𖼈𖽳𖾐 𖼞𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐，𖼖𖽪 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜 𖼊𖽻𖾐 𖼺𖽪𖾐 𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼮𖽑𖽡𖾐，𖼞𖽑𖽶𖾑 𖼄𖽡𖾐 𖼊𖽺𖾐 𖼖𖽪 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜 𖼠𖽙𖾑 𖼍𖽻𖾐， 12 𖼐𖽑𖽡𖾐 𖼈𖽳𖾐 𖼮𖽑𖽡 𖼈𖽪𖾑 𖼻𖽙 𖼞𖽑𖽙𖾐 𖼣𖽻𖾐 𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜 𖼖𖽡𖾐，𖽂𖽙 𖼊𖽺𖾐 𖼦𖽳 𖼺𖽪𖾐 𖼮𖽡𖽺 𖼖𖽺𖾑 𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜 𖼖𖽡𖾐，𖼽𖽻 𖼂𖽙𖾑 𖼞𖽑𖽙𖾐 𖼣𖽻𖾐 𖼽𖽺𖾐 𖼦𖽴 𖼦𖽫 𖼷𖽺𖾐 𖼣𖽻𖾐． 13 𖽂𖽙 𖼊𖽺𖾐 𖼦𖽳 𖼺𖽪𖾐 𖼊𖽑𖽳 𖼖𖽳𖾐 𖼄𖽪，𖼐𖽑𖽡𖾐 𖼽𖽻𖾐 𖼻𖽙 𖼻𖽜 𖼈𖽳 𖼞𖽑𖽚 𖼖𖽡𖾐． 𖼐𖽑𖽡𖾐 𖼄𖽔 𖼈𖽳 𖼞𖽑𖽚 𖼊𖽑𖽡𖾑 𖼣𖽻𖾐，𖼽𖽻 𖼖𖽺𖾐 𖼹𖽧𖾑 𖼊𖽝 𖼳𖽡𖽪 𖼖𖽡𖾐． 𖼐𖽑𖽡𖾐 𖼈𖽳𖾐 𖼞𖽳𖾐 𖼮𖽑𖽡 𖼈𖽪𖾑 𖼻𖽙 𖼞𖽑𖽙𖾐 𖼣𖽻𖾐 𖼺𖽪𖾐 𖼊𖽑𖽺 𖼈𖽳 𖼞𖽑𖽚 𖼖𖽻𖾐 𖼖𖽡𖾐．
14 𖽃𖽔𖾑 𖼞𖽶𖾐，𖼐𖽑𖽡𖾐 𖼈𖽳𖾐 𖼞𖽳𖾐 𖼻𖽙 𖼄𖽡𖾐 𖼐𖽜𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼊𖽻 𖼐𖽙𖾐 𖼀𖽦𖾐：‘ 𖼦𖽑𖽺𖾑 𖽃𖽔 𖼊𖽺𖾑 𖼳𖽶 𖼞𖽪𖾐 𖼮𖽡𖽺𖾐 𖼣𖽻𖾐？’ 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼈𖽳𖾐 𖼦𖽑𖽺𖾑 𖼻𖽻𖾐 𖼊𖽻 𖼞𖽑𖽚 𖼊𖽙𖾐：‘ 𖼣𖽙𖾐 𖼈𖽳𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼀𖽑𖽚𖾐 𖼀𖽑𖽙 𖼀𖽑𖽚𖾐 𖼄𖽙𖾐 𖼂𖽺𖾐 𖼠𖽻𖾐 𖼞𖽑𖽶𖾐 𖼮𖽑𖽻𖾐，𖼽𖽺𖾐 𖼦𖽴 𖼦𖽫 𖽂𖽙 𖼐𖽑𖽡𖾐 𖽂𖽙 𖼖𖽕𖾐 𖼻𖽜 𖼣𖽙𖾐 𖼈𖽳𖾐 𖼊𖽑𖽺 𖼦𖽳 𖼊𖽚𖾐 𖼖𖽻𖾐． 15 𖼦𖽑𖽻𖾐 𖼊𖽑𖽻𖾐，𖼇𖽕 𖼖𖽻 𖼐𖽑𖽧𖾐 𖼠𖽴𖾐，𖼣𖽙𖾐 𖼈𖽳𖾐 𖼞𖽜 𖼊𖽚𖾐 𖼖𖽻𖾐 𖼄𖽔 𖼦𖽶𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼮𖽑𖽢𖾑 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖽂𖽙 𖼊𖽺𖾐 𖼽𖽚𖾐 𖼺𖽪𖾐 𖼞𖽑𖽙𖾐 𖼣𖽻𖾐，𖼷𖽑𖽻𖾐 𖼣𖽻𖾐 𖼦𖽻，𖼮𖽡𖽺 𖼣𖽻𖾐 𖼦𖽻，𖼄𖽳𖾑 𖼄𖽳 𖼺𖽦 𖼳𖽶𖾐 𖼦𖽑𖽙𖾐． 𖽃𖽔𖾐 𖼺𖽺𖾑，𖼮𖽡𖽺 𖽂𖽙 𖼊𖽺𖾐 𖼦𖽳 𖼺𖽪𖾐 𖼽𖽻 𖼂𖽙𖾑 𖼞𖽑𖽙𖾐 𖼣𖽻𖾐，𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜 𖼖𖽡𖾐． 𖼦𖽑𖽻𖾐 𖼊𖽑𖽻𖾐，𖼮𖽑𖽡 𖼈𖽪𖾑 𖼻𖽙 𖼞𖽑𖽙𖾐 𖼣𖽻𖾐，𖼄𖽳𖾑 𖼄𖽳 𖼈𖽳 𖼞𖽑𖽚 𖼖𖽻𖾐 𖼖𖽡𖾐． 16 𖼻𖽦 𖼐𖽑𖽡𖾐 𖼦𖽑𖽺𖾑 𖼈𖽝 𖼐𖽑𖽡𖾐 𖼖𖽦 𖼀𖽑𖽦𖾐 𖼊𖽑𖽺 𖼍𖽡 𖼐𖽺𖾐 𖼣𖽴 𖼠𖽻𖾐 𖼊𖽑𖽺 𖼍𖽴𖾑 𖼖𖽙𖾐 𖼺𖽶𖾑，𖼺𖽙 𖼂𖽺𖾐 𖼖𖽡𖾐． 𖼞𖽪𖾐 𖼮𖽡𖽺𖾐，𖼽𖽺𖾐 𖼦𖽴 𖼦𖽫 𖽂𖽙 𖼐𖽑𖽡𖾐 𖽂𖽙 𖼖𖽕𖾐 𖼻𖽜，𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼦𖽳 𖼊𖽚𖾐 𖼖𖽻𖾐．’”
𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼊𖽚𖾐 𖼖𖽻𖾐 𖼞𖽑𖽙𖾐 𖼺𖽜 𖼖𖽡𖾐 𖼞𖽳𖾐 𖼮𖽨𖾐 𖼄𖽙𖾐
17 𖼇𖽕 𖼖𖽻 𖼷𖽑𖽻𖾐 𖼀𖽺 𖼊𖽑𖽺 𖼀𖽑𖽨 𖼊𖽚𖾐 𖼽𖽡𖾐 𖼞𖽑𖽶𖾑 𖼮𖽶𖾐，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽨𖾐 𖼄𖽙𖾐 𖼮𖽑𖽻𖾐 𖼠𖽚 𖼽𖽡𖾐 𖼦𖽑𖽔𖾐 𖼮𖽶𖾐 𖼐𖽳 𖼊𖽑𖽻𖾐，𖽂𖽙 𖼺𖽙𖾐 𖼂𖽙𖾐 𖼽𖽻 𖼈𖽳𖾐 𖼊𖽑𖽺 𖼄𖽔 𖼦𖽳 𖼮𖽨𖾐 𖼄𖽙𖾐 𖼞𖽑𖽶𖾑 𖼰𖽴𖾐 𖼺𖽜． 𖼞𖽪𖾐 𖼮𖽡𖽺𖾐 𖽂𖽙 𖼺𖽙𖾐 𖼂𖽙𖾐 𖼀𖽦𖾐：“𖼷𖽑𖽻𖾐 𖼀𖽺 𖼰𖽕𖾑 𖼊𖽝 𖼄𖽡𖽻 𖼷𖽶𖾐 𖼄𖽳𖾐 𖼺𖽺𖾑，𖼀𖽑𖽚𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽚 𖼽𖽡𖾐 𖼠𖽸𖾑 𖼮𖽡𖽮𖾐．” 18 𖽃𖽔𖾐 𖼺𖽺𖾑，𖽂𖽙 𖼺𖽙𖾐 𖼂𖽙𖾐 𖼷𖽑𖽻𖾐 𖼀𖽺 𖼊𖽑𖽺 𖼦𖽳 𖼮𖽨𖾐 𖼰𖽻𖾐 𖼺𖽜，𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼮𖽑𖽻𖾐 𖼺𖽺𖾑，𖼦𖽜𖾐 𖼄𖽙𖾐 𖼐𖽑𖽡𖾐 𖼞𖽳𖾐 𖼮𖽑𖽡𖾐． 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼊𖽚𖾐 𖼖𖽻𖾐 𖼞𖽑𖽶𖾑 𖼮𖽶𖾐，𖼄𖽳𖾑 𖼄𖽳 𖼖𖽺𖾑 𖼰𖽕𖾑 𖼊𖽝 𖼄𖽡𖽻 𖼐𖽑𖽡 𖼈𖽺𖾐．
19 𖼽𖽱𖾐 𖼺𖽴𖾑 𖼞𖽳𖾐 𖼈𖽶 𖼠𖽴𖾐 𖼄𖽚 𖼳𖽡𖾐 𖼈𖽺𖾐 𖼮𖽑𖽻𖾐 𖼽𖽡𖾐，𖼞𖽪𖾐 𖼮𖽡𖽺𖾐 𖼽𖽱𖾐 𖼺𖽴𖾑 𖽃𖽙𖾑 𖼄𖽺 𖼊𖽑𖽙 𖼹𖽦𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽜 𖼄𖽳𖾐 𖼷𖽑𖽦𖾐 𖼠𖽚，𖼀𖽦𖾐：“𖽂𖽙 𖼺𖽙𖾐 𖼂𖽙𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼰𖽨𖾑 𖼊𖽑𖽧 𖼖𖽻𖾐 𖼊𖽻𖾐，𖼐𖽑𖽡𖾐 𖼈𖽳𖾐 𖼦𖽑𖽺𖾑 𖼄𖽡𖾐 𖼊𖽺𖾐 𖼮𖽑𖽻𖾐 𖼣𖽙𖾐 𖼞𖽳𖾐 𖼈𖽶 𖼠𖽴𖾐 𖼈𖽺𖾐 𖼮𖽑𖽻𖾐 𖼽𖽡𖾐 𖼖𖽡𖾐．”
20 𖼽𖽻 𖼈𖽳𖾐 𖼳𖽪𖾐 𖼠𖽜𖾐 𖼄𖽡𖾐 𖼊𖽺𖾐 𖼮𖽑𖽻𖾐 𖼺𖽜 𖼍𖽪𖾐 𖼺𖽺𖾑，𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼦𖽜 𖼷𖽜𖾐 𖼽𖽡 𖼊𖽑𖽔 𖼄𖽡𖾐 𖼊𖽺𖾐 𖼦𖽑𖽺𖾐 𖼠𖽴𖾐 𖼍𖽚 𖼈𖽶． 21 𖼽𖽺𖾐 𖼦𖽴 𖼦𖽫 𖼽𖽻 𖼈𖽳𖾐 𖽃𖽙𖾑 𖼄𖽺 𖼮𖽑𖽻𖾐 𖼺𖽜，𖼄𖽶 𖼐𖽑𖽡𖾐 𖼍𖽡𖾐 𖼻𖽶𖾐 𖼽𖽻 𖼈𖽳𖾐 𖼊𖽑𖽺 𖼦𖽳，𖼄𖽶 𖼮𖽑𖽧 𖼍𖽚𖾑 𖼻𖽶𖾐 𖼀𖽜𖾐 𖼖𖽜𖾐 𖼊𖽚𖾐 𖼽𖽻 𖼈𖽳𖾐 𖼊𖽑𖽺 𖼄𖽡𖽻𖾐，𖽃𖽔 𖼺𖽺𖾑 𖼽𖽻 𖼈𖽳𖾐 𖼄𖽶 𖼐𖽑𖽡𖾐 𖼄𖽶 𖼦𖽡𖽦 𖼖𖽺𖾑 𖼺𖽜 𖼀𖽑𖽢 𖼊𖽙𖾐． 22 𖼄𖽶 𖼐𖽑𖽡𖾐 𖼍𖽡𖾐 𖼻𖽶𖾐，𖼄𖽶 𖼮𖽑𖽧 𖼍𖽚𖾑 𖼻𖽶𖾐，𖼽𖽻 𖼈𖽳𖾐 𖽃𖽙𖾑 𖼄𖽺 𖼰𖽡𖾑 𖼦𖽑𖽙𖾐 𖼄𖽔 𖼷𖽻𖾐．