(8) 𖼀𖽶 𖼳𖽳𖾐 𖼈𖽡𖾑 𖼞𖽑𖽙
10
1 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼇𖽕 𖼖𖽻 𖼞𖽳𖾐 𖼞𖽑𖽶𖾑 𖼠𖽻𖾐 𖼽𖽡𖾐! 𖼞𖽪𖾐 𖼮𖽡𖽺𖾐，𖼣𖽙𖾐 𖼇𖽕 𖼖𖽻 𖼐𖽺𖾐 𖼷𖽶 𖼄𖽻 𖼞𖽜 𖼐𖽑𖽧𖾐 𖼠𖽴𖾐 𖼦𖽑𖽻𖾐，𖽃𖽔𖾐 𖼺𖽺𖾑 𖼣𖽙𖾐 𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖼺𖽡𖾐 𖼂𖽺𖾐 𖼊𖽪𖾐 𖼦𖽑𖽺𖾑 𖼹𖽻𖾐 𖼂𖽺𖾐 𖼊𖽻𖾐． 2 𖼣𖽙𖾐 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼊𖽑𖽺 𖼞𖽑𖽙𖾐 𖼂𖽺𖾐 𖼺𖽪𖾐 𖼄𖽡𖽻 𖼐𖽺𖾐 𖼣𖽙𖾐 𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖼊𖽚𖾐 𖼊𖽑𖽧 𖼖𖽻𖾐 𖼺𖽪𖾐 𖼺𖽡𖾐 𖼂𖽺𖾐 𖼊𖽪𖾐，𖼐𖽑𖽡𖾐 𖼄𖽳𖾑 𖼄𖽳 𖼦𖽑𖽺 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼊𖽑𖽺 𖼰𖽨𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼞𖽜 𖼺𖽝𖾑 𖼖𖽡𖾐，𖼣𖽙𖾐 𖼦𖽑𖽺𖾑 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼣𖽻𖾐． ”3 𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼇𖽕 𖼖𖽻 𖼞𖽳𖾐 𖼞𖽑𖽶𖾑 𖼠𖽻𖾐 𖼽𖽡𖾐，𖼽𖽻 𖼖𖽙𖾐 𖼀𖽦𖾐：“𖼳𖽡𖾐 𖼂𖽚 𖼖𖽦 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼻𖽻𖾐 𖼀𖽦𖾐：‘ 𖼐𖽑𖽡𖾐 𖼣𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖽃𖽜𖾐 𖼺𖽳 𖼄𖽔 𖼦𖽶𖾐 𖼞𖽑𖽙 𖼊𖽑𖽻𖾐 𖼮𖽑𖽡𖾐 𖼊𖽻𖾐 𖼐𖽺𖾑？ 𖼣𖽙𖾐 𖼞𖽳𖾐 𖼷𖽑𖽻𖾐 𖼀𖽺 𖼞𖽜 𖼦𖽑𖽺𖾑 𖼠𖽻𖾐 𖼰𖽡𖾑 𖼦𖽑𖽙𖾐 𖼖𖽡𖾐，𖼽𖽻 𖼈𖽳𖾐 𖼞𖽜 𖼣𖽙𖾐 𖼊𖽑𖽺 𖼠𖽙𖾐 𖼳𖽙𖾐 𖼽𖽡𖾐 𖼖𖽡𖾐． 4 𖼐𖽑𖽡𖾐 𖼹𖽦𖾑 𖼣𖽙𖾐 𖼞𖽳𖾐 𖼷𖽑𖽻𖾐 𖼀𖽺 𖼊𖽑𖽺 𖼄𖽔 𖼀𖽑𖽨 𖼊𖽑𖽧 𖼽𖽡𖾐 𖼊𖽑𖽡𖾑 𖼣𖽻𖾐，𖽃𖽔𖾑 𖼞𖽶𖾐 𖼐𖽑𖽡𖾐，𖼣𖽙𖾐 𖼀𖽶 𖼳𖽳𖾐 𖼀𖽑𖽨 𖼐𖽑𖽡𖾐 𖼄𖽡𖾑 𖼐𖽦𖾐 𖼊𖽑𖽺 𖼹𖽺𖾐 𖼊𖽻𖾐． 5 𖼀𖽶 𖼳𖽳𖾐 𖼄𖽡𖾑 𖼐𖽦𖾐 𖼊𖽑𖽺 𖼀𖽡𖾐 𖼮𖽨𖾐 𖼺𖽺𖾑，𖼷𖽑𖽻𖾐 𖼄𖽡𖾑 𖼐𖽦𖾐 𖼊𖽑𖽺 𖼖𖽺𖾑 𖼄𖽡𖽻𖾐 𖼮𖽨𖾐 𖼄𖽔 𖼊𖽙𖾐 𖼊𖽻𖾐，𖼦𖽑𖽔𖾐 𖼖𖽺𖾑 𖽂𖽙 𖼖𖽚𖾐 𖼊𖽝 𖼷𖽺 𖼷𖽺𖾐，𖼹𖽺𖾐 𖼍𖽙𖾑 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜 𖼺𖽪𖾐 𖼞𖽑𖽶𖾑 𖼹𖽻𖾐，𖼀𖽶 𖼳𖽳𖾐 𖼮𖽑𖽢𖾑 𖼷𖽙 𖼞𖽳𖾐 𖼊𖽻𖾐，𖼹𖽦𖾑 𖼄𖽡𖾐 𖼠𖽻𖾐 𖼞𖽑𖽙𖾐 𖼐𖽜 𖼺𖽪𖾐 𖼺𖽧𖾐 𖼷𖽡𖾐 𖼊𖽑𖽺 𖼖𖽺𖾑 𖼀𖽶 𖼳𖽳𖾐 𖼮𖽑𖽢𖾑 𖼷𖽙 𖼞𖽳𖾐 𖼊𖽻𖾐． 6 𖼀𖽶 𖼳𖽳𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼞𖽳𖾐 𖼈𖽪𖾐 𖼍𖽦 𖼦𖽑𖽺𖾐，𖼷𖽶 𖼄𖽻 𖼞𖽳𖾐 𖼦𖽑𖽺𖾐 𖼐𖽺𖾐 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼞𖽳𖾐 𖼦𖽑𖽺𖾐 𖼞𖽑𖽶𖾐 𖼀𖽡𖾐 𖼮𖽨𖾐 𖼊𖽻𖾐． 𖽃𖽔 𖼈𖽜 𖼊𖽑𖽙 𖼐𖽑𖽡𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼞𖽳𖾐 𖼐𖽑𖽡𖾐 𖼦𖽑𖽦 𖼮𖽑𖽻𖾐 𖽃𖽔𖾑 𖼄𖽳𖾐 𖼖𖽙𖾐 𖼮𖽑𖽡𖾐 𖼖𖽺𖾑，𖼦𖽑𖽺𖾑 𖼳𖽶 𖼈𖽡𖾑 𖼞𖽑𖽙 𖼷𖽶𖾐 𖼄𖽳𖾐 𖼄𖽔 𖼠𖽚．’” 𖽃𖽔𖾐 𖼺𖽺𖾑，𖼄𖽚 𖼳𖽡𖾐 𖼰𖽻𖾐 𖼀𖽑𖽚𖾐 𖼞𖽚 𖼖𖽻𖾐 𖼇𖽕 𖼖𖽻 𖼊𖽑𖽺 𖼰𖽡𖾑 𖼦𖽑𖽙𖾐 𖼺𖽜 𖼽𖽡𖾐．
7 𖼇𖽕 𖼖𖽻 𖼞𖽳𖾐 𖼷𖽶 𖼄𖽻 𖼽𖽻 𖼖𖽙𖾐 𖼀𖽦𖾐：“𖼷𖽑𖽻𖾐 𖼦𖽑𖽺𖾑 𖼽𖽚𖾐 𖽃𖽔 𖼐𖽺𖾑 𖼞𖽳𖾐 𖼈𖽪𖾐 𖼂𖽝𖾐 𖼂𖽺𖾐 𖼞𖽑𖽙 𖼊𖽑𖽻𖾐 𖼮𖽑𖽡𖾐 𖼊𖽻𖾐 𖼐𖽺𖾑？ 𖼷𖽑𖽻𖾐 𖼦𖽑𖽺𖾑 𖼹𖽻𖾐 𖼞𖽜 𖼽𖽡𖾐 𖼻𖽻𖾐，𖼽𖽻 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖽂𖽙𖾐 𖼍𖽡𖾐 𖼊𖽑𖽴 𖼽𖽡𖾐 𖼊𖽙𖾐． 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼄𖽳 𖼮𖽡𖽦 𖼦𖽑𖽻𖾐，𖼐𖽑𖽡𖾐 𖼄𖽔 𖼺𖽝𖾑 𖼺𖽺 𖼖𖽔？”
8 𖽃𖽔𖾐 𖼺𖽺𖾑，𖼇𖽕 𖼖𖽻 𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐，𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼽𖽡𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼠𖽙𖾐 𖼳𖽙𖾐 𖼽𖽡𖾐 𖼊𖽙𖾐． 𖼦𖽑𖽻𖾐 𖼊𖽑𖽻𖾐，𖽃𖽔 𖼺𖽺 𖼺𖽺 𖼽𖽡𖾐 𖼊𖽻𖾐 𖼐𖽺𖾑？”
9 𖼄𖽚 𖼳𖽡𖾐 𖼊𖽻 𖼞𖽑𖽚：“𖼣𖽙𖾐 𖼈𖽳𖾐 𖼞𖽳𖾐 𖼷𖽑𖽻𖾐 𖼄𖽻 𖽃𖽔𖾐 𖼐𖽑𖽳𖾐 𖼐𖽺𖾐 𖼻𖽙 𖼄𖽡𖾐 𖼐𖽜𖾐 𖼮𖽑𖽻𖾐 𖼽𖽡𖾐，𖼣𖽙𖾐 𖼈𖽳𖾐 𖼞𖽳𖾐 𖼮𖽡𖽺 𖼷𖽪𖾐 𖼖𖽺𖾑 𖼞𖽕 𖼮𖽑𖽻𖾐 𖼽𖽡𖾐 𖼊𖽻𖾐． 𖼞𖽪𖾐 𖼮𖽡𖽺𖾐，𖼣𖽙𖾐 𖼈𖽳𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼻𖽦 𖼐𖽑𖽡𖾐 𖼳𖽪𖾐 𖼖𖽡𖾐．”
10 𖼇𖽕 𖼖𖽻 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼣𖽙𖾐 𖼐𖽑𖽡𖾐 𖼈𖽳𖾐 𖼐𖽺𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖽃𖽔𖾐 𖼐𖽑𖽳𖾐 𖼄𖽙𖾐 𖼻𖽙 𖼞𖽜 𖼺𖽜 𖼽𖽡𖾐 𖼞𖽑𖽶𖾑 𖼮𖽶𖾐，𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼮𖽻𖾐 𖼍𖽳𖾐 𖼂𖽔𖾑! 𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼈𖽳𖾐 𖼷𖽜𖾐 𖼍𖽳𖾐 𖼻𖽻𖾐，𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼈𖽳𖾐 𖼄𖽔 𖼹𖽳𖾐 𖼳𖽶 𖼄𖽡𖽻 𖼣𖽝． 11 𖼦𖽑𖽺𖾑 𖼖𖽙𖾐 𖼺𖽶𖾑 𖼂𖽺𖾐 𖼄𖽔 𖼊𖽙𖾐，𖼐𖽑𖽡𖾐 𖼈𖽳𖾐 𖼞𖽳𖾐 𖼻𖽙 𖼐𖽜𖾐 𖼍𖽺𖾑 𖼽𖽡𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖽂𖽙𖾐 𖼠𖽙𖾐 𖼳𖽙𖾐 𖼊𖽙𖾐． 𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼈𖽳𖾐 𖼮𖽑𖽡 𖼮𖽡𖽺𖾐 𖼠𖽚 𖼺𖽪𖾐 𖼦𖽑𖽺𖾑 𖼻𖽻𖾐 𖼣𖽻𖾐．” 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼊𖽑𖽺 𖼇𖽕 𖼖𖽻 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼞𖽕 𖼊𖽑𖽧 𖼽𖽡𖾐 𖼦𖽑𖽙𖾐．
12 𖼽𖽺𖾐 𖼦𖽴 𖼦𖽕 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼍𖽪𖾐 𖼖𖽻𖾐 𖼺𖽺𖾑，𖼀𖽶 𖼳𖽳𖾐 𖼞𖽜 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼖𖽻𖾐，𖼄𖽡𖾑 𖼐𖽦𖾐 𖼊𖽑𖽺 𖼞𖽑𖽙𖾐 𖼮𖽻𖾐 𖼳𖽶 𖼈𖽻 𖼊𖽑𖽺 𖼷𖽙 𖼦𖽑𖽙𖾐 𖼖𖽡𖾐，𖼦𖽑𖽺𖾑 𖽂𖽙 𖼖𖽚𖾐 𖼊𖽝 𖼷𖽺 𖼷𖽺𖾐 𖼺𖽪𖾐 𖼣𖽻𖾐．”
13 𖽃𖽔𖾐 𖼺𖽺𖾑，𖼄𖽚 𖼳𖽡𖾐 𖼍𖽚𖾐 𖼖𖽜 𖼄𖽶𖾐 𖼄𖽶𖾐 𖼮𖽑𖽳 𖼍𖽪𖾐 𖼖𖽻𖾐，𖼀𖽡𖾑 𖼀𖽡𖾐 𖼊𖽑𖽡 𖼐𖽑𖽡𖾐 𖼊𖽑𖽡 𖼦𖽑𖽦，𖼽𖽺𖾐 𖼦𖽴 𖼦𖽫 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖽃𖽔𖾑 𖼄𖽶 𖼳𖽡𖽺𖾐 𖼞𖽜 𖼮𖽝 𖼂𖽻𖾐 𖼖𖽻𖾐 𖼺𖽺𖾑，𖼄𖽶 𖼊𖽑𖽡 𖼞𖽑𖽶𖾑 𖼮𖽶𖾐，𖽃𖽔𖾑 𖼄𖽶 𖼳𖽡𖽺𖾐 𖼀𖽶 𖼳𖽳𖾐 𖼊𖽑𖽺 𖼮𖽝 𖼂𖽻𖾐 𖼖𖽻𖾐． 14 𖼀𖽶 𖼳𖽳𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽡𖾐 𖼖𖽻𖾐，𖼞𖽑𖽙𖾐 𖼮𖽑𖽡𖾐 𖼊𖽪 𖼮𖽻𖾐 𖼀𖽡𖾐，𖼀𖽶 𖼳𖽳𖾐 𖼦𖽑𖽔𖾐 𖼮𖽶𖾐 𖼄𖽨 𖼷𖽑𖽚，𖽃𖽙𖾑 𖼄𖽺 𖼦𖽑𖽺𖾑 𖼻𖽻𖾐 𖼮𖽻𖾐 𖼄𖽔 𖼠𖽚，𖼠𖽙𖾑 𖼍𖽻𖾐 𖼖𖽺𖾑 𖼦𖽑𖽺𖾑 𖼻𖽻𖾐 𖼄𖽔 𖼮𖽻𖾐 𖼊𖽻𖾐． 15 𖼀𖽶 𖼳𖽳𖾐 𖼄𖽡𖾑 𖼐𖽦𖾐 𖼊𖽑𖽺 𖼮𖽻𖾐 𖼀𖽡𖾐 𖼦𖽑𖽻𖾐 𖼺𖽺𖾑，𖼄𖽡𖾑 𖼐𖽦𖾐 𖼐𖽦𖾑 𖼐𖽦𖾐 𖼀𖽑𖽢 𖼦𖽑𖽻𖾐，𖽂𖽙 𖼖𖽚𖾐 𖼮𖽑𖽢𖾑 𖼊𖽝 𖼷𖽺 𖼷𖽺𖾐 𖼺𖽪𖾐 𖼞𖽑𖽙𖾐 𖼣𖽙𖾐 𖼳𖽶 𖼈𖽻，𖼞𖽑𖽙𖾐 𖼣𖽻𖾐 𖼳𖽶 𖼺𖽧𖾐 𖼷𖽡𖾐 𖼊𖽑𖽺 𖼺𖽳 𖼄𖽙𖾐 𖼷𖽙 𖼞𖽳𖾐 𖼦𖽑𖽻𖾐． 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽑𖽙𖾐 𖼮𖽑𖽡𖾐 𖼊𖽪，𖼺𖽧𖾐 𖼷𖽡𖾐 𖼣𖽻𖾐 𖼦𖽻，𖼄𖽡𖾐 𖼠𖽻𖾐 𖼞𖽑𖽶𖾐 𖼈𖽻 𖼣𖽻𖾐 𖼦𖽻，𖼐𖽑𖽧𖾐 𖼰𖽸𖾐 𖼺𖽪𖾐 𖼊𖽑𖽡 𖼀𖽧𖾑 𖼖𖽺𖾑 𖼄𖽔 𖼮𖽻𖾐 𖼦𖽑𖽻𖾐．
16 𖽃𖽔𖾐 𖼺𖽺𖾑，𖼇𖽕 𖼖𖽻 𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼊𖽑𖽺 𖼐𖽕 𖼐𖽕𖾐 𖽃𖽶𖾐 𖼂𖽻𖾐 𖼖𖽻𖾐 𖼺𖽺𖾑，𖼀𖽦𖾐：“𖼣𖽙𖾐 𖼽𖽺𖾐 𖼮𖽑𖽡𖽪𖾑𖽪𖾑 𖼀𖽑𖽨 𖼐𖽑𖽡𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡𖽺 𖼂𖽚𖾐 𖼦𖽑𖽻𖾐，𖼐𖽑𖽡𖾐 𖼈𖽳𖾐 𖼊𖽑𖽺 𖼖𖽺𖾑 𖼮𖽑𖽡𖽺 𖼂𖽚𖾐 𖼦𖽑𖽻𖾐． 17 𖽃𖽔𖾑 𖼄𖽳𖾐 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼦𖽑𖽺𖾑 𖼊𖽑𖽡 𖼂𖽦𖾑 𖼣𖽙𖾐 𖼽𖽺𖾐 𖼮𖽑𖽡𖽪𖾑 𖼊𖽑𖽺 𖼄𖽡𖽺 𖼞𖽜，𖼐𖽑𖽡𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼖𖽺𖾑 𖼮𖽑𖽡 𖼮𖽡𖽺𖾐，𖼣𖽙𖾐 𖼞𖽜 𖼦𖽑𖽺𖾑 𖼊𖽑𖽡 𖼂𖽦𖾑 𖼳𖽡𖾐 𖼮𖽡𖽦 𖼊𖽑𖽔 𖼷𖽶𖾐 𖼞𖽜．”
18 𖼄𖽚 𖼳𖽡𖾐 𖼇𖽕 𖼖𖽻 𖼞𖽳𖾐 𖼮𖽑𖽻𖾐 𖼊𖽚𖾐 𖼽𖽡𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐． 19 𖼽𖽺𖾐 𖼦𖽴 𖼦𖽫 𖼮𖽡𖾐 𖼖𖽻𖾑 𖼄𖽡𖾐 𖼀𖽳 𖽃𖽔𖾑 𖼄𖽶 𖼳𖽡𖽺𖾐 𖼈𖽳 𖼄𖽙𖾐 𖼮𖽝 𖼺𖽺𖾑，𖼀𖽶 𖼳𖽳𖾐 𖼊𖽑𖽺 𖼮𖽝 𖼦𖽜𖾐 𖼄𖽙𖾐 𖼐𖽑𖽡𖾐 𖼞𖽑𖽶𖾐 𖼊𖽡 𖼽𖽡𖾐，𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽑𖽙𖾐 𖼮𖽑𖽡𖾐 𖼊𖽪 𖼀𖽶 𖼳𖽳𖾐 𖼊𖽑𖽡 𖼊𖽝𖾐 𖼖𖽺𖾑 𖼄𖽔 𖼷𖽺𖾐 𖼦𖽑𖽙𖾐． 20 𖼦𖽑𖽻𖾐 𖼊𖽑𖽻𖾐，𖼽𖽺𖾐 𖼦𖽴 𖼦𖽫 𖼇𖽕 𖼖𖽻 𖼞𖽜 𖼐𖽑𖽧𖾐 𖼠𖽴𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼀𖽑𖽨 𖼊𖽑𖽧 𖼽𖽡𖾐 𖼄𖽔 𖼦𖽶𖾐．
(9) 𖼐𖽦𖾑 𖼐𖽦𖾐 𖼈𖽡𖾑 𖼞𖽑𖽙
21 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼍𖽚𖾐 𖼖𖽜 𖼄𖽶𖾐 𖼄𖽶𖾐 𖼮𖽑𖽳 𖼍𖽪𖾐，𖼣𖽙𖾐 𖼐𖽦𖾑 𖼐𖽦𖾐 𖼈𖽡𖾑 𖼞𖽑𖽙 𖼀𖽑𖽨 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽡𖾐 𖼖𖽻𖾐 𖼊𖽻𖾐，𖼐𖽦𖾑 𖼐𖽦𖾐 𖼦𖽑𖽺𖾑 𖼄𖽚𖾐 𖽂𖽙𖾐 𖼊𖽙𖾐 𖼖𖽙𖾐 𖼺𖽶𖾑 𖼮𖽻𖾐．” 22 𖽃𖽔𖾐 𖼺𖽺𖾑，𖼄𖽚 𖼳𖽡𖾐 𖼍𖽚𖾐 𖼖𖽜 𖼄𖽶𖾐 𖼄𖽶𖾐 𖼮𖽑𖽳 𖼍𖽪𖾐 𖼖𖽻𖾐，𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼺𖽙𖾐 𖼐𖽑𖽡𖾐 𖼺𖽙𖾐 𖼦𖽑𖽦 𖼐𖽦𖾑 𖼐𖽦𖾐 𖼀𖽑𖽢 𖼦𖽑𖽻𖾐． 23 𖼺𖽙𖾐 𖼐𖽑𖽡𖾐 𖼠𖽻𖾐 𖼞𖽑𖽶𖾐，𖼷𖽑𖽻𖾐 𖼷𖽙𖾐 𖼖𖽙𖾐 𖼄𖽡𖽻𖾐 𖼄𖽔 𖼊𖽙𖾐，𖼊𖽑𖽡 𖼽𖽚𖾐 𖼖𖽺𖾑 𖼽𖽻 𖼄𖽳𖾑 𖼞𖽑𖽙𖾐 𖼮𖽻𖾐 𖼞𖽳𖾐 𖼮𖽑𖽻𖾐 𖼠𖽳𖾐 𖼖𖽪𖾐 𖼊𖽑𖽡 𖼄𖽦𖾐 𖼽𖽡𖾐 𖼀𖽑𖽢 𖼄𖽔 𖼊𖽙𖾐． 𖼦𖽑𖽻𖾐 𖼊𖽑𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽑𖽙𖾐 𖼮𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼀𖽜𖾐 𖼖𖽜𖾐 𖼮𖽻𖾐．
24 𖼇𖽕 𖼖𖽻 𖼄𖽚 𖼳𖽡𖾐 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐 𖼺𖽺𖾑，𖼀𖽦𖾐：“𖼐𖽑𖽡𖾐 𖼈𖽳𖾐 𖼽𖽡𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼠𖽙𖾐 𖼳𖽙𖾐 𖼽𖽡𖾐 𖼻𖽻𖾐，𖼐𖽑𖽡𖾐 𖼈𖽳𖾐 𖼞𖽳𖾐 𖽃𖽔𖾐 𖼐𖽑𖽳𖾐 𖼄𖽙𖾐 𖼻𖽙 𖼖𖽺𖾑 𖼮𖽑𖽻𖾐 𖼽𖽡𖾐 𖼻𖽻𖾐，𖼐𖽑𖽡𖾐 𖼈𖽳𖾐 𖼞𖽳𖾐 𖼽𖽻𖾐 𖼷𖽪𖾐 𖼐𖽺𖾐 𖼐𖽑𖽡 𖼷𖽪𖾐 𖼍𖽺𖾑 𖼹𖽺𖾐 𖼍𖽙𖾑 𖼍𖽧𖾑 𖼖𖽡𖾐．”
25 𖼄𖽚 𖼳𖽡𖾐 𖼊𖽻 𖼞𖽑𖽚：“𖼣𖽙𖾐 𖼈𖽳𖾐 𖼍𖽡𖾐 𖼊𖽪𖾐 𖼐𖽺𖾐 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼖𖽚𖾐 𖼂𖽚𖾐，𖼐𖽑𖽡𖾐 𖼣𖽙𖾐 𖼈𖽳𖾐 𖼊𖽑𖽺 𖼞𖽜 𖼖𖽡𖾐． 𖽃𖽔𖾐 𖼺𖽺𖾑，𖼣𖽙𖾐 𖼈𖽳𖾐 𖼦𖽑𖽙𖾐 𖼣𖽙𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖽂𖽙𖾐 𖼍𖽡𖾐 𖼊𖽙𖾐． 26 𖼣𖽙𖾐 𖼈𖽳𖾐 𖼞𖽳𖾐 𖼮𖽡𖽺 𖼷𖽪𖾐 𖼖𖽺𖾑 𖼞𖽕 𖼮𖽑𖽻𖾐 𖼽𖽡𖾐 𖼖𖽡𖾐，𖼊𖽑𖽡 𖼊𖽝𖾐 𖼖𖽺𖾑 𖼄𖽔 𖼹𖽺𖾐 𖼍𖽙𖾑 𖼍𖽧𖾑 𖼊𖽻𖾐． 𖼞𖽪𖾐 𖼮𖽡𖽺𖾐，𖼮𖽡𖽺 𖼷𖽪𖾐 𖼠𖽻𖾐 𖼊𖽑𖽺 𖼮𖽑𖽻𖾐 𖼍𖽡𖾐 𖼊𖽪𖾐 𖼈𖽺𖾐 𖼣𖽙𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼍𖽡𖾐 𖼖𖽡𖾐，𖼣𖽙𖾐 𖼈𖽳𖾐 𖼞𖽑𖽶𖾑 𖼄𖽡𖾐 𖼊𖽺𖾐 𖼄𖽔 𖼮𖽑𖽡𖾐 𖼺𖽺 𖽃𖽙𖾑 𖼄𖽺，𖽃𖽔 𖼊𖽺𖾑 𖼳𖽶 𖼈𖽺𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼠𖽙𖾐 𖼳𖽙𖾐 𖼖𖽡𖾐 𖼄𖽔 𖼺𖽝𖾑 𖼺𖽺．”
27 𖼦𖽑𖽻𖾐 𖼊𖽑𖽻𖾐，𖼽𖽺𖾐 𖼦𖽴 𖼦𖽫 𖼇𖽕 𖼖𖽻 𖼞𖽜 𖼐𖽑𖽧𖾐 𖼠𖽴𖾐 𖼺𖽺𖾑，𖼇𖽕 𖼖𖽻 𖼽𖽻 𖼈𖽳𖾐 𖼊𖽑𖽺 𖼀𖽑𖽨 𖼊𖽑𖽧 𖼽𖽡𖾐 𖼄𖽔 𖼦𖽶𖾐． 28 𖼇𖽕 𖼖𖽻 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼣𖽙𖾐 𖼊𖽑𖽺 𖼰𖽡𖾑 𖼦𖽑𖽙𖾐 𖼊𖽚𖾐 𖼽𖽡𖾐，𖼐𖽑𖽡𖾐 𖼷𖽜𖾐 𖼍𖽳𖾐 𖼻𖽻𖾐，𖼹𖽦𖾑 𖼣𖽙𖾐 𖼊𖽑𖽺 𖼄𖽡𖽻𖾐 𖼖𖽻𖾐 𖼄𖽔 𖼻𖽻𖾐，𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼹𖽦𖾑 𖼣𖽙𖾐 𖼊𖽑𖽺 𖼄𖽡𖽻𖾐 𖼞𖽑𖽶𖾑 𖼮𖽶𖾐 𖼐𖽑𖽡𖾐 𖼷𖽑𖽜𖾑 𖼷𖽑𖽜𖾐 𖼳𖽶𖾐 𖼊𖽻𖾐．”
29 𖼄𖽚 𖼳𖽡𖾐 𖼊𖽻 𖼞𖽑𖽚：“𖼐𖽑𖽡𖾐 𖼀𖽦𖾐 𖼺𖽪𖾐 𖼣𖽻𖾐 𖼮𖽶𖾐，𖼣𖽙𖾐 𖼠𖽕𖾐 𖼰𖽶𖾐 𖼐𖽑𖽡𖾐 𖼊𖽑𖽺 𖼄𖽔 𖼄𖽡𖽻𖾐 𖼊𖽻𖾐．”