(10)𖼮𖽑𖽡 𖼈𖽪𖾑 𖼻𖽙 𖼳𖽶𖾐 𖼦𖽑𖽙𖾐 𖼈𖽡𖾑 𖼞𖽑𖽙
11
1 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐： “𖼣𖽙𖾐 𖼹𖽦𖾑 𖼇𖽕 𖼖𖽻 𖼐𖽺𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽜 𖼈𖽡𖾑 𖼞𖽑𖽙 𖼊𖽑𖽡 𖼳𖽶 𖼷𖽶𖾐 𖼊𖽻𖾐，𖼠𖽙𖾑 𖼍𖽻𖾐 𖼽𖽻 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼈𖽳𖾐 𖼞𖽜 𖼦𖽑𖽺𖾑 𖼄𖽡𖾐 𖼊𖽺𖾐 𖼰𖽡𖾑 𖼦𖽑𖽙𖾐 𖼊𖽻𖾐，𖼽𖽻 𖼐𖽑𖽡𖾐 𖼈𖽳𖾐 𖼞𖽜 𖼽𖽡𖾐 𖼞𖽑𖽶𖾑 𖼮𖽶𖾐，𖼄𖽳𖾑 𖼄𖽳 𖼊𖽑𖽺 𖼞𖽕 𖼊𖽑𖽧 𖼽𖽡𖾐 𖼊𖽻𖾐． 2 𖽃𖽔𖾑 𖼄𖽳𖾐 𖼐𖽑𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼀𖽦𖾐 𖼊𖽑𖽧 𖼖𖽡𖾐，𖼻𖽙 𖼐𖽜𖾐 𖼣𖽻𖾐 𖼦𖽻，𖼻𖽙 𖼄𖽳 𖼣𖽻𖾐 𖼦𖽻，𖼽𖽻 𖼄𖽳𖾑 𖼮𖽑𖽡𖽦𖾐 𖼮𖽑𖽻 𖼞𖽳𖾐 𖼀𖽑𖽨𖾐 𖼳𖽳𖾐 𖼄𖽡𖽻 𖼐𖽑𖽡 𖼰𖽙𖾐 𖼖𖽡𖾐．” 3 𖼽𖽺𖾐 𖼦𖽴 𖼦𖽫 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽜 𖼮𖽡 𖼽𖽡𖾑 𖽂𖽙𖾐 𖼊𖽻𖾐，𖼦𖽑𖽔𖾐 𖼖𖽺𖾑 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼇𖽕 𖼖𖽻 𖼞𖽳𖾐 𖼷𖽶 𖼄𖽻 𖽃𖽙𖾑 𖼄𖽺 𖼮𖽑𖽡𖽺 𖼐𖽺𖾐 𖼷𖽑𖽻𖾐 𖼀𖽺 𖽃𖽙𖾑 𖼄𖽺 𖼮𖽑𖽡𖽺，𖼄𖽚 𖼳𖽡𖾐 𖼞𖽜 𖼄𖽡𖾐 𖼊𖽻 𖼈𖽳 𖼊𖽚𖾐 𖼊𖽻𖾐．4 𖼄𖽚 𖼳𖽡𖾐 𖼀𖽦𖾐：“𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼻𖽻𖾐 𖼀𖽦𖾐：‘ 𖽃𖽙𖾑 𖼄𖽺𖾐 𖼄𖽶 𖼮𖽑𖽧 𖼺𖽜𖾐 𖼦𖽜𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖼣𖽙𖾐 𖼊𖽚𖾐 𖼽𖽡𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼰𖽻𖾐 𖼐𖽦𖾐 𖼽𖽡𖾐 𖼊𖽻𖾐． 5 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽡 𖼈𖽪𖾑 𖼻𖽙 𖼞𖽑𖽙𖾐 𖼣𖽻𖾐，𖼳𖽳𖾐 𖼮𖽡𖽺 𖼊𖽑𖽺 𖼊𖽡𖾐 𖼺𖽪𖾐 𖼇𖽕 𖼖𖽻 𖼞𖽳𖾐 𖼻𖽙 𖼈𖽳 𖼮𖽑𖽻𖾐 𖼖𖽚𖾐 𖼮𖽑𖽙 𖼞𖽻𖾐 𖼺𖽪𖾐 𖼮𖽜𖾐 𖼄𖽙𖾐 𖼞𖽳𖾐 𖼻𖽙 𖼈𖽳 𖼖𖽙𖾐 𖼮𖽑𖽡𖾐，𖼦𖽑𖽔𖾐 𖼖𖽺𖾑 𖽂𖽙 𖼊𖽺𖾐 𖼦𖽳 𖼺𖽪𖾐 𖼮𖽡𖽺 𖼖𖽙𖾐 𖼮𖽑𖽡𖾐，𖼄𖽳𖾑 𖼄𖽳 𖼳𖽶𖾐 𖼦𖽑𖽙𖾐 𖼊𖽻𖾐． 6 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼮𖽑𖽡𖽪 𖼈𖽳 𖼄𖽙𖾐 𖼣𖽶𖾐 𖼦𖽑𖽡𖽻𖾐 𖼊𖽻𖾐，𖼦𖽑𖽺𖾑 𖼻𖽻𖾐 𖼣𖽶𖾐 𖼦𖽑𖽡𖽻𖾐 𖼺𖽪𖾐 𖽃𖽙𖾑 𖼄𖽺 𖼊𖽑𖽙 𖼮𖽻𖾐 𖼄𖽔 𖼠𖽚，𖼠𖽙𖾑 𖼍𖽻𖾐 𖼖𖽺𖾑 𖼄𖽔 𖼮𖽻𖾐 𖼊𖽻𖾐． 7 𖼦𖽑𖽻𖾐 𖼊𖽑𖽻𖾐，𖼷𖽑𖽻𖾐 𖼣𖽻𖾐 𖼦𖽻、 𖼮𖽡𖽺 𖼣𖽻𖾐 𖼦𖽻、 𖽃𖽔𖾑 𖼐𖽙 𖼣𖽻𖾐 𖼦𖽻，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼮𖽑𖽡𖽪 𖼊𖽑𖽧 𖼄𖽔 𖼂𖽡𖾑 𖼊𖽻𖾐． 𖽃𖽔𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼞𖽜 𖼺𖽝𖾑 𖼊𖽻𖾐，𖼽𖽺𖾐 𖼦𖽴 𖼦𖽫 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼀𖽜𖾐 𖼀𖽑𖽪𖾐 𖼦𖽑𖽙𖾐 𖼺𖽪𖾐 𖼣𖽻𖾐． ’ 8 𖼐𖽑𖽡𖾐 𖼞𖽳𖾐 𖼷𖽶 𖼄𖽻 𖼞𖽑𖽙𖾐 𖼣𖽻𖾐 𖼣𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼖𖽻𖾐，𖼣𖽙𖾐 𖼊𖽑𖽺 𖼊𖽑𖽴 𖼺𖽺𖾑，𖼀𖽦𖾐：‘ 𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼞𖽳𖾐 𖼷𖽑𖽻𖾐 𖼀𖽺 𖼄𖽳𖾑 𖼄𖽳 𖼊𖽚𖾐 𖼽𖽡𖾐 𖼞𖽜’，𖼠𖽙𖾑 𖼍𖽻𖾐 𖼺𖽺𖾑 𖼣𖽙𖾐 𖼊𖽚𖾐 𖼽𖽡𖾐 𖼺𖽺．” 𖽃𖽔𖾐 𖼺𖽺𖾑，𖼄𖽚 𖼳𖽡𖾐 𖼀𖽶 𖼻𖽶 𖼮𖽑𖽡𖾐 𖼮𖽑𖽡𖾐 𖼐𖽺𖾐 𖼇𖽕 𖼖𖽻 𖼊𖽑𖽺 𖼰𖽡𖾑 𖼦𖽑𖽙𖾐 𖼊𖽚𖾐 𖼽𖽡𖾐．
9 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐： “𖼇𖽕 𖼖𖽻 𖼐𖽑𖽡𖾐 𖼈𖽳𖾐 𖼊𖽑𖽺 𖼊𖽻 𖼮𖽶𖾐 𖼄𖽔 𖼦𖽶𖾐 𖼺𖽺𖾑，𖼣𖽙𖾐 𖼞𖽳𖾐 𖼺𖽡𖾐 𖼂𖽺𖾐 𖼊𖽪𖾐 𖼞𖽜 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼠𖽳𖾐 𖼖𖽳𖾐 𖼄𖽨 𖼍𖽪𖾐 𖼖𖽻𖾐 𖼊𖽻𖾐．” 10 𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼽𖽡𖾐 𖼇𖽕 𖼖𖽻 𖽃𖽙𖾑 𖼄𖽺 𖼮𖽑𖽡𖽺，𖼺𖽡𖾐 𖼂𖽺𖾐 𖼊𖽪𖾐 𖼄𖽳𖾑 𖼄𖽳 𖼂𖽺𖾐 𖼦𖽑𖽻𖾐． 𖼦𖽑𖽻𖾐 𖼊𖽑𖽻𖾐，𖼽𖽺𖾐 𖼦𖽴 𖼦𖽫 𖼇𖽕 𖼖𖽻 𖼞𖽜 𖼐𖽑𖽧𖾐 𖼠𖽴𖾐 𖼺𖽺𖾑，𖼇𖽕 𖼖𖽻 𖼦𖽑𖽔𖾐 𖼖𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼀𖽑𖽨 𖼂𖽡𖾐 𖼽𖽡𖾐 𖼄𖽔 𖼦𖽶𖾐．