𖽃𖽦𖾐 𖼰𖽧 𖼊𖽚𖾐 𖼺𖽪𖾑 9

(5) 𖼮𖽡𖽺 𖼐𖽙𖾐 𖼊𖽡𖾐 𖼈𖽡𖾑 𖼞𖽑𖽙

1 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼇𖽕 𖼖𖽻 𖼞𖽳𖾐 𖼞𖽑𖽶𖾑 𖼠𖽻𖾐 𖼽𖽡𖾐，𖼽𖽻 𖼖𖽙𖾐 𖼀𖽦𖾐 𖼊𖽑𖽧，𖼳𖽡𖾐 𖼂𖽚 𖼖𖽦 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫𖼦𖽑𖽺𖾑 𖼻𖽻𖾐 𖼀𖽦𖾐：‘ 𖼣𖽙𖾐 𖼞𖽳𖾐 𖼷𖽑𖽻𖾐 𖼀𖽺 𖼞𖽜 𖼦𖽑𖽺𖾑 𖼠𖽻𖾐 𖼰𖽡𖾑 𖼦𖽑𖽙𖾐，𖼽𖽻 𖼈𖽳𖾐 𖼞𖽜 𖼣𖽙𖾐 𖼊𖽑𖽺 𖽂𖽙𖾐 𖼠𖽙𖾐 𖼳𖽙𖾐 𖼊𖽙𖾐． 2 𖼐𖽑𖽡𖾐 𖼽𖽻 𖼈𖽳𖾐 𖼊𖽑𖽺 𖼄𖽔 𖼀𖽑𖽨 𖼂𖽡𖾐 𖼽𖽡𖾐，𖼦𖽑𖽔𖾐 𖼖𖽺𖾑 𖼽𖽻 𖼈𖽳𖾐 𖼊𖽑𖽺 𖼀𖽨 𖼮𖽳 𖼍𖽡 𖼊𖽑𖽡𖾑 𖼣𖽻𖾐， 3 𖼽𖽺𖾐 𖼦𖽴 𖼦𖽫 𖼐𖽙𖾐 𖼊𖽡𖾐 𖼈𖽳 𖼀𖽑𖽨 𖼐𖽑𖽡𖾐 𖼞𖽳𖾐 𖼄𖽡𖾐 𖼠𖽻𖾐 𖼞𖽳𖾐 𖼮𖽡𖽺 𖼷𖽪𖾐 𖼊𖽑𖽺 𖼍𖽦𖾐 𖼊𖽻𖾐． 𖼄𖽪、 𖼊𖽑𖽳 𖼖𖽳𖾐 𖼄𖽪、 𖼖𖽚𖾑 𖼊𖽑𖽚、 𖼐𖽑𖽡、 𖽃𖽔𖾑 𖼮𖽑𖽸 𖼽𖽻𖾐 𖼷𖽪𖾐 𖼐𖽙𖾐 𖼊𖽡𖾐 𖼊𖽑𖽝𖾐 𖼊𖽻𖾐． 4 𖼽𖽺𖾐 𖼦𖽴 𖼦𖽫 𖼷𖽑𖽴𖾑 𖼷𖽑𖽜𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽡𖽺 𖼐𖽺𖾐 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽡𖽺 𖼀𖽜𖾐 𖼀𖽑𖽪𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽡𖽺 𖼊𖽑𖽡 𖼊𖽝𖾐 𖼖𖽺𖾑 𖼄𖽔 𖼳𖽶𖾐 𖼊𖽻𖾐．’ ” 5 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼦𖽑𖽦 𖼍𖽧𖾑 𖼷𖽑𖽦𖾐 𖼦𖽑𖽙𖾐，𖼀𖽦𖾐：“𖽃𖽔𖾑 𖼞𖽶𖾐 𖼐𖽑𖽡𖾐 𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼐𖽙𖾐 𖼊𖽡𖾐 𖼀𖽑𖽨 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼹𖽺𖾐 𖼊𖽻𖾐．”

6 𖼠𖽙𖾑 𖼍𖽻𖾐 𖼊𖽑𖽡 𖼐𖽑𖽡𖾐 𖼹𖽦𖾐 𖼽𖽺𖾐 𖼦𖽴 𖼦𖽫 𖼐𖽙𖾐 𖼊𖽡𖾐 𖼦𖽑𖽺𖾑 𖼀𖽑𖽨 𖼹𖽺𖾐 𖼺𖽺𖾑，𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽡𖽺 𖼄𖽳𖾑 𖼄𖽳 𖼳𖽶𖾐 𖼦𖽑𖽻𖾐． 𖼦𖽑𖽻𖾐 𖼊𖽑𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽡𖽺 𖼊𖽑𖽡 𖼊𖽝𖾐 𖼖𖽺𖾑 𖼄𖽔 𖼳𖽶𖾐． 7 𖼇𖽕 𖼖𖽻 𖼷𖽑𖽻𖾐 𖼹𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼐𖽦𖾐 𖼽𖽡𖾐，𖼽𖽻 𖼈𖽳𖾐 𖼞𖽳𖾐 𖼮𖽡𖽺 𖼊𖽑𖽡 𖼊𖽝𖾐 𖼖𖽺𖾑 𖼄𖽔 𖼳𖽶𖾐． 𖼦𖽑𖽻𖾐 𖼊𖽑𖽻𖾐，𖼇𖽕 𖼖𖽻 𖼦𖽑𖽔𖾐 𖼖𖽺𖾑 𖼐𖽑𖽧𖾐 𖼠𖽴𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼀𖽺 𖼊𖽑𖽺 𖼀𖽑𖽨 𖼊𖽑𖽧 𖼽𖽡𖾐 𖼄𖽔 𖼦𖽶𖾐．

(6) 𖼀𖽕𖾐 𖼐𖽙𖾐 𖼈𖽡𖾑 𖼞𖽑𖽙

8 𖼽𖽺𖾐 𖼦𖽕 𖼦𖽫 𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼣𖽳 𖼊𖽪 𖼞𖽑𖽶𖾐 𖼮𖽑𖽻𖾐 𖼞𖽑𖽪 𖼖𖽪𖾐 𖼍𖽴𖾐 𖼺𖽺𖾑，𖼄𖽚 𖼳𖽡𖾐 𖼇𖽕 𖼖𖽻 𖽃𖽙𖾑 𖼄𖽺 𖼮𖽑𖽡𖽺 𖼮𖽻𖾐 𖼞𖽑𖽪 𖼖𖽪𖾐 𖼊𖽻 𖼄𖽶 𖼖𖽙𖾐 𖼀𖽙 𖼍𖽦𖾐 𖼖𖽡𖾐， 9 𖼞𖽑𖽪 𖼖𖽪𖾐 𖼦𖽑𖽺𖾑 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽑𖽙𖾐 𖼮𖽑𖽡𖾐 𖼊𖽪 𖼐𖽡𖾑 𖼄𖽶𖾐 𖼀𖽑𖽢 𖼺𖽺𖾑，𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽳𖾐 𖼷𖽑𖽻𖾐 𖼐𖽺𖾐 𖼮𖽡𖽺 𖼄𖽳𖾑 𖼄𖽳 𖼞𖽶𖾐 𖼮𖽑𖽶 𖼊𖽑𖽺 𖼀𖽑𖽪 𖼐𖽙𖾐 𖼐𖽺𖾐 𖼀𖽕𖾐 𖼐𖽙𖾐 𖼊𖽚𖾐 𖼊𖽻𖾐．”

10 𖽃𖽔𖾐 𖼺𖽺𖾑，𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼣𖽳 𖼊𖽪 𖼞𖽑𖽶𖾐 𖼮𖽑𖽡𖾐 𖼞𖽑𖽪 𖼖𖽪𖾐 𖼈𖽺𖾐 𖼂𖽻𖾐 𖼖𖽻𖾐，𖼇𖽕 𖼖𖽻 𖽃𖽙𖾑 𖼄𖽺 𖼮𖽑𖽡𖽺 𖼮𖽻𖾐，𖼄𖽚 𖼳𖽡𖾐 𖼞𖽑𖽪 𖼖𖽪𖾐 𖼊𖽻 𖼄𖽶 𖼖𖽙𖾐 𖼀𖽙 𖼍𖽦𖾐 𖼺𖽺𖾑，𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼐𖽺𖾐 𖼮𖽡𖽺 𖼞𖽶𖾐 𖼮𖽑𖽶 𖼊𖽑𖽺 𖼀𖽑𖽪 𖼐𖽙𖾐 𖼐𖽺𖾐 𖼀𖽕𖾐 𖼐𖽙𖾐 𖼊𖽚𖾐 𖼊𖽑𖽧 𖼖𖽻𖾐． 11 𖼂𖽡𖾐 𖼀𖽑𖽙 𖼞𖽑𖽶𖾑 𖼹𖽻𖾐 𖼖𖽺𖾑 𖼀𖽕𖾐 𖼄𖽙𖾐 𖼊𖽚𖾐 𖼺𖽺𖾑，𖼄𖽚 𖼳𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼦𖽑𖽡𖽚 𖼻𖽺𖾐 𖼄𖽔 𖼊𖽙𖾐． 𖼞𖽪𖾐 𖼮𖽡𖽺𖾐，𖼂𖽡𖾐 𖼀𖽑𖽙 𖼐𖽺𖾐 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼞𖽶𖾐 𖼮𖽑𖽶 𖼊𖽑𖽺 𖼀𖽕𖾐 𖼐𖽙𖾐 𖼊𖽚𖾐． 12 𖼽𖽺𖾐 𖼦𖽴 𖼦𖽫 𖼇𖽕 𖼖𖽻 𖼞𖽜 𖼐𖽑𖽧𖾐 𖼠𖽴𖾐 𖼺𖽺𖾑，𖼽𖽻 𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐 𖼄𖽔 𖼦𖽶𖾐，𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼊𖽑𖽺 𖼞𖽑𖽙𖾐 𖼀𖽦𖾐 𖼖𖽙𖾐 𖼺𖽶𖾑．

(7) 𖽂𖽙 𖼖𖽚𖾐 𖼈𖽡𖾑 𖼞𖽑𖽙

13 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼷𖽑𖽶𖾐 𖼐𖽦 𖼍𖽪𖾐 𖼖𖽻𖾐，𖼇𖽕 𖼖𖽻 𖽃𖽙𖾑 𖼄𖽺 𖼮𖽑𖽡𖽺 𖼽𖽡𖾐 𖼽𖽻 𖼖𖽙𖾐 𖼀𖽦𖾐 𖼊𖽑𖽧，𖼳𖽡𖾐 𖼂𖽚 𖼖𖽦 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼻𖽻𖾐 𖼀𖽦𖾐：‘ 𖼣𖽙𖾐 𖼞𖽳𖾐 𖼷𖽑𖽻𖾐 𖼀𖽺 𖼞𖽜 𖼦𖽑𖽺𖾑 𖼠𖽻𖾐 𖼰𖽡𖾑 𖼦𖽑𖽙𖾐，𖼽𖽻 𖼈𖽳𖾐 𖼞𖽜 𖼣𖽙𖾐 𖼊𖽑𖽺 𖽂𖽙𖾐 𖼠𖽙𖾐 𖼳𖽙𖾐 𖼽𖽡𖾐 𖼊𖽙𖾐． 14 𖼞𖽪𖾐 𖼮𖽡𖽺𖾐，𖼦𖽑𖽺𖾑 𖼊𖽑𖽡 𖼂𖽦𖾑 𖼣𖽙𖾐 𖼈𖽡𖾑 𖼞𖽑𖽙 𖼞𖽑𖽙𖾐 𖼣𖽻𖾐 𖼀𖽑𖽨 𖼺𖽺𖾑，𖼐𖽑𖽡𖾐 𖼐𖽺𖾐 𖼷𖽶 𖼄𖽻、 𖼐𖽑𖽡𖾐 𖼞𖽳𖾐 𖼷𖽑𖽻𖾐 𖼀𖽺 𖼄𖽳𖾑 𖼄𖽳 𖼊𖽑𖽺 𖼍𖽦𖾐 𖼊𖽻𖾐，𖼐𖽑𖽡𖾐 𖼞𖽜 𖼺𖽝𖾑 𖼊𖽻𖾐，𖼄𖽶 𖼊𖽑𖽡 𖽂𖽚 𖼞𖽑𖽶𖾐 𖼣𖽙𖾐 𖼖𖽙𖾐 𖼺𖽶𖾑 𖼺𖽪𖾐 𖼠𖽳𖾐 𖼖𖽪𖾐 𖼺𖽡𖾐 𖼄𖽔 𖼮𖽻𖾐． 15 𖽃𖽔𖾑 𖼄𖽳𖾐 𖼣𖽙𖾐 𖼹𖽦𖾑 𖼐𖽙𖾐 𖼊𖽡𖾐 𖼀𖽑𖽨 𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼞𖽳𖾐 𖼷𖽑𖽻𖾐 𖼀𖽺 𖼞𖽶𖾐 𖼮𖽑𖽶 𖼊𖽑𖽺 𖼍𖽦𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼐𖽦 𖼄𖽙𖾐 𖼹𖽦𖾐 𖼊𖽺𖾐 𖼊𖽑𖽺 𖼮𖽑𖽻𖾐 𖼄𖽳 𖼮𖽡𖽦 𖼦𖽑𖽙𖾐 𖼊𖽻𖾐． 16 𖼦𖽑𖽻𖾐 𖼊𖽑𖽻𖾐，𖼣𖽙𖾐 𖼐𖽑𖽡𖾐 𖼈𖽪𖾑 𖼠𖽻𖾐 𖼹𖽺𖾐 𖼍𖽙𖾑 𖼺𖽪𖾐，𖼐𖽑𖽡𖾐 𖼞𖽜 𖼺𖽺𖾑 𖼣𖽙𖾐 𖽂𖽙 𖼐𖽑𖽡𖾐 𖽂𖽙 𖼖𖽕𖾐 𖼊𖽑𖽺 𖼐𖽦𖾐 𖼄𖽡𖽻𖾐，𖼦𖽑¯ 𖼖𖽺𖾑 𖼄𖽶 𖼊𖽑𖽡 𖼊𖽺𖾐 𖼣𖽙𖾐 𖼄𖽡𖾐 𖼊𖽑𖽺 𖼀𖽦𖾐 𖼊𖽑𖽧 𖼖𖽡𖾐 𖼖𖽙𖾐 𖼀𖽙𖾐 𖼳𖽶 𖼣𖽻𖾐． 17 𖼐𖽑𖽡𖾐 𖼦𖽑𖽔𖾐 𖼖𖽺𖾑 𖼣𖽙𖾐 𖼷𖽑𖽻𖾐 𖼀𖽺 𖽃𖽙𖾑 𖼄𖽺 𖼮𖽑𖽡𖽺 𖼳𖽡𖽦 𖼈𖽳 𖼺𖽺𖾑，𖼽𖽻 𖼈𖽳𖾐 𖼊𖽑𖽺 𖼄𖽔 𖼀𖽑𖽨 𖼊𖽑𖽧 𖼽𖽡𖾐 𖼊𖽻𖾐 𖼖𖽔𖾑？ 18 𖼐𖽦𖾐 𖼄𖽺! 𖽃𖽔𖾑 𖼞𖽶𖾐 𖼐𖽑𖽡𖾐 𖽃𖽔 𖼖𖽙𖾐 𖼦𖽑𖽺𖾑 𖼠𖽸𖾑 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖼣𖽙𖾐 𖼷𖽑𖽜𖾑 𖼷𖽑𖽜𖾐 𖽂𖽙 𖼖𖽚𖾐 𖼈𖽳 𖼄𖽙𖾐 𖼮𖽨𖾐 𖼹𖽺𖾐 𖼖𖽻𖾐 𖼊𖽻𖾐，𖽃𖽦𖾐 𖼰𖽧 𖼠𖽚 𖼊𖽴𖾐 𖼍𖽪𖾐 𖼮𖽑𖽻𖾐 𖽃𖽔𖾑 𖼄𖽳𖾐 𖼖𖽙𖾐 𖼮𖽑𖽡𖾐，𖽂𖽙 𖼖𖽚𖾐 𖼦𖽑𖽺𖾑 𖼻𖽻𖾐 𖼮𖽨𖾐 𖼄𖽔 𖼠𖽚 𖼺𖽺． 19 𖽃𖽔𖾐 𖼺𖽺𖾑，𖼐𖽑𖽡𖾐 𖼷𖽑𖽻𖾐 𖼹𖽡𖾐 𖼂𖽡𖾐 𖼽𖽡𖾐，𖼐𖽑𖽡𖾐 𖼞𖽳𖾐 𖼮𖽡𖽺 𖼐𖽺𖾐 𖼞𖽑𖽙𖾐 𖼣𖽻𖾐 𖼳𖽶，𖼠𖽙𖾐 𖼳𖽙𖾐 𖼺𖽺𖾑 𖽂𖽙 𖼖𖽚𖾐 𖼊𖽝 𖼄𖽳𖾐 𖼄𖽔 𖼊𖽙𖾐 𖼞𖽳𖾐 𖼍𖽙𖾑 𖼖𖽡𖾐． 𖼞𖽪𖾐 𖼮𖽡𖽺𖾐，𖼄𖽡𖾐 𖼠𖽻𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼐𖽺𖾐 𖼮𖽡𖽺 𖼦𖽑𖽺𖾐 𖼞𖽑𖽶𖾐 𖼄𖽔 𖼊𖽡 𖼽𖽡𖾐 𖼺𖽪𖾐，𖼷𖽑𖽜𖾑 𖼷𖽑𖽜𖾐 𖼳𖽶𖾐 𖼮𖽡𖽦 𖼊𖽻𖾐．

20 𖼇𖽕 𖼖𖽻 𖼞𖽳𖾐 𖼷𖽶 𖼄𖽶 𖼊𖽑𖽡 𖼹𖽻𖾐 𖼽𖽺𖾐 𖼦𖽴 𖼦𖽫 𖼊𖽻 𖼂𖽪𖾑 𖼊𖽑𖽺 𖼮𖽡𖽮𖾐 𖼺𖽺𖾑，𖼽𖽻 𖼈𖽳𖾐 𖼞𖽳𖾐 𖼮𖽜𖾐 𖼀𖽑𖽙 𖼐𖽺𖾐 𖼮𖽡𖽺 𖼊𖽑𖽺 𖼠𖽙𖾐 𖼳𖽙𖾐 𖼦𖽑𖽺𖾐 𖼞𖽑𖽶𖾐 𖼊𖽡 𖼖𖽻𖾐．’” 21 𖼦𖽑𖽻𖾐 𖼊𖽑𖽻𖾐，𖼽𖽺𖾐 𖼦𖽴 𖼦𖽫 𖼞𖽳𖾐 𖼊𖽻 𖼂𖽪𖾑 𖼊𖽑𖽺 𖼀𖽑𖽨 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼄𖽔 𖼍𖽙𖾑 𖼺𖽪𖾐 𖼷𖽶 𖼄𖽻 𖼞𖽑𖽶𖾑 𖼹𖽻𖾐，𖼦𖽑𖽔𖾐 𖼖𖽺𖾑 𖼽𖽻 𖼈𖽳𖾐 𖼞𖽳𖾐 𖼮𖽜𖾐 𖼀𖽑𖽙 𖼐𖽺𖾐 𖼮𖽡𖽺 𖼊𖽑𖽺 𖼀𖽑𖽨 𖼄𖽡𖾐 𖼠𖽻𖾐 𖼍𖽙𖾑 𖼍𖽳𖾐．

22 𖼽𖽺𖾐 𖼦𖽕 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼍𖽚𖾐 𖼖𖽜 𖼄𖽶𖾐 𖼄𖽶𖾐 𖼮𖽑𖽳 𖼍𖽪𖾐 𖼺𖽺𖾑，𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽑𖽙𖾐 𖼮𖽑𖽡𖾐 𖼊𖽪 𖽂𖽙 𖼖𖽚𖾐 𖼮𖽨𖾐，𖼷𖽑𖽻𖾐 𖼞𖽶𖾐 𖼮𖽑𖽶、 𖼮𖽡𖽺 𖼞𖽶𖾐 𖼮𖽑𖽶 𖼐𖽺𖾐 𖼄𖽡𖾐 𖼠𖽻𖾐 𖼞𖽑𖽶𖾐 𖼖𖽚𖾑 𖼄𖽚 𖼞𖽑𖽙𖾐 𖼣𖽻𖾐 𖼊𖽑𖽺 𖽂𖽙 𖼖𖽚𖾐 𖼊𖽝 𖼊𖽻𖾐．

23 𖼄𖽚 𖼳𖽡𖾐 𖼍𖽚𖾐 𖼖𖽜 𖼄𖽶𖾐 𖼄𖽶𖾐 𖼮𖽑𖽳 𖼍𖽪𖾐 𖼍𖽺𖾑 𖼺𖽺，𖼽𖽺𖾐 𖼦𖽴 𖼦𖽫 𖽃𖽔𖾑 𖼄𖽶 𖼠𖽶、 𖽂𖽙 𖼖𖽚𖾐 𖼮𖽨𖾐、 𖽃𖽔𖾑 𖼄𖽶 𖼀𖽢 𖼄𖽡𖾑 𖼐𖽦𖾐 𖼊𖽑𖽺 𖼹𖽺𖾐，𖼽𖽺𖾐 𖼦𖽴 𖼦𖽫 𖽂𖽙 𖼖𖽚𖾐 𖼀𖽑𖽨 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼊𖽑𖽺 𖼊𖽝． 24 𖼞𖽑𖽶𖾑 𖼮𖽶𖾐，𖽂𖽙 𖼖𖽚𖾐 𖼐𖽺𖾐 𖽃𖽔𖾑 𖼄𖽶 𖼀𖽢 𖼷𖽙𖾐 𖼖𖽙𖾐 𖼮𖽑𖽻𖾐，𖼦𖽑𖽔𖾐 𖼮𖽶𖾐 𖼈𖽳 𖼷𖽑𖽚，𖽃𖽦𖾐 𖼰𖽧 𖼠𖽚 𖼊𖽴𖾐 𖼍𖽪𖾐 𖼮𖽑𖽻𖾐 𖽃𖽔𖾑 𖼄𖽳𖾐 𖼮𖽑𖽡𖾐，𖽂𖽙 𖼖𖽚𖾐 𖼦𖽑𖽺𖾑 𖼻𖽻𖾐 𖼮𖽨𖾐 𖼄𖽔 𖼠𖽚． 25 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽑𖽙𖾐 𖼮𖽑𖽡𖾐 𖼊𖽪，𖼄𖽡𖾐 𖼠𖽻𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼐𖽺𖾐 𖼮𖽡𖽺 𖼊𖽑𖽺 𖽂𖽙 𖼖𖽚𖾐 𖼮𖽑𖽢𖾑 𖼊𖽝 𖼄𖽳𖾐． 𖼄𖽡𖾐 𖼠𖽻𖾐 𖼖𖽚𖾑 𖼄𖽚 𖼊𖽑𖽺 𖼖𖽺𖾑 𖽂𖽙 𖼖𖽚 𖼮𖽑𖽢𖾑 𖼊𖽝 𖼄𖽳𖾐，𖼹𖽦𖾑 𖼺𖽧𖾐 𖼷𖽡𖾐 𖼊𖽑𖽺 𖼖𖽺𖾑 𖼊𖽝 𖼳𖽡𖽪 𖼦𖽑𖽻𖾐． 26 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼮𖽻𖾐 𖼞𖽳𖾐 𖼠𖽜𖾐 𖼳𖽔𖾐 𖼄𖽡𖾐 𖼊𖽺𖾐 𖼍𖽺𖾑 𖽂𖽙 𖼖𖽚𖾐 𖼄𖽔 𖼮𖽨𖾐．

27 𖽃𖽔𖾐 𖼺𖽺𖾑，𖼇𖽕 𖼖𖽻 𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐，𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼦𖽑𖽺𖾑 𖼊𖽑𖽡 𖼂𖽦𖾑 𖼣𖽙𖾐 𖼠𖽕𖾐 𖼰𖽶𖾐 𖼽𖽺𖾐 𖼮𖽑𖽡𖽪𖾑 𖼀𖽑𖽨 𖼦𖽑𖽻𖾐，𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼀𖽳𖾐 𖼈𖽡𖾐 𖼮𖽻𖾐 𖼺𖽪𖾐 𖼣𖽻𖾐，𖼣𖽙𖾐 𖼐𖽺𖾐 𖼣𖽙𖾐 𖼞𖽳𖾐 𖼷𖽑𖽻𖾐 𖼀𖽺 𖼽𖽺𖾐 𖼮𖽑𖽡𖽪𖾑 𖼮𖽻𖾐． 28 𖼐𖽑𖽡𖾐 𖼈𖽳𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐 𖼞𖽜，𖼞𖽪𖾐 𖼮𖽡𖽺𖾐 𖽃𖽔𖾑 𖼄𖽶 𖼠𖽶 𖼮𖽑𖽡𖽪 𖼀𖽺𖾐 𖼐𖽺𖾐 𖽂𖽙 𖼖𖽚𖾐 𖼦𖽑𖽺𖾑 𖼣𖽙𖾐 𖼈𖽳𖾐 𖼷𖽳𖾑 𖼖𖽚 𖼦𖽑𖽻𖾐，𖼣𖽙𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼀𖽑𖽨 𖼦𖽑𖽙𖾐 𖼊𖽻𖾐，𖼐𖽑𖽡𖾐 𖼈𖽳𖾐 𖽂𖽙𖾐 𖼺𖽜 𖼽𖽡𖾐 𖼊𖽙𖾐．”

29 𖼄𖽚 𖼳𖽡𖾐 𖼇𖽕 𖼖𖽻 𖼊𖽑𖽺 𖼊𖽻 𖼞𖽑𖽚：“𖼣𖽙𖾐 𖼖𖽪𖾐 𖼞𖽑𖽶𖾐 𖼊𖽚𖾐 𖼽𖽡𖾐 𖼹𖽦𖾐 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼍𖽪𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐 𖼺𖽺𖾑 ，𖽃𖽔𖾑 𖼄𖽶 𖼠𖽶 𖼷𖽑𖽜𖾑 𖼷𖽑𖽜𖾐 𖼐𖽙 𖼊𖽻𖾐，𖽂𖽙 𖼖𖽚𖾐 𖼖𖽺𖾑 𖼄𖽔 𖼮𖽨𖾐 𖼊𖽻𖾐． 𖽃𖽔𖾐 𖼺𖽺𖾑，𖼐𖽑𖽡𖾐 𖼞𖽜 𖼺𖽝𖾑 𖼊𖽻𖾐，𖼄𖽶 𖼊𖽑𖽡 𖼊𖽺𖾐 𖼽𖽺𖾐 𖼦𖽴 𖼦𖽫 𖼷𖽺𖾐 𖼣𖽻𖾐． 30 𖼦𖽑𖽻𖾐 𖼊𖽑𖽻𖾐，𖼣𖽙𖾐 𖼺𖽝𖾑 𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼞𖽳𖾐 𖼷𖽶 𖼄𖽻，𖼦𖽑𖽔𖾐 𖼖𖽺𖾑 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼄𖽔 𖼮𖽡𖽮𖾐．

31 𖼞𖽑𖽶𖾑 𖼮𖽶𖾐，𖼻𖽪𖾐 𖼐𖽜𖾐 𖼊𖽚𖾐 𖼮𖽻𖾐，𖼄𖽪𖾐 𖼖𖽺𖾑 𖼈𖽦𖾐 𖼮𖽻𖾐 𖼺𖽺𖾑，𖼻𖽪𖾐 𖼐𖽺𖾐 𖼄𖽪𖾐 𖽂𖽙 𖼖𖽚𖾐 𖼮𖽑𖽢𖾑 𖼊𖽝 𖼄𖽳𖾐． 32 𖼳𖽙𖾐 𖼐𖽺𖾐 𖼻𖽪𖾐 𖼖𖽡 𖼍𖽺𖾑 𖼊𖽝 𖼄𖽔 𖼳𖽻𖾐，𖼞𖽪𖾐 𖼮𖽡𖽺𖾐 𖼦𖽑𖽺𖾑 𖼹𖽻𖾐 𖼄𖽔 𖼈𖽳 𖼺𖽺．

33 𖼄𖽚 𖼳𖽡𖾐 𖼇𖽕 𖼖𖽻 𖼊𖽑𖽺 𖼰𖽡𖾑 𖼦𖽑𖽙𖾐 𖼖𖽪𖾐 𖼞𖽑𖽶𖾐 𖼮𖽑𖽻𖾐 𖼊𖽚𖾐 𖼽𖽡𖾐，𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼍𖽪𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐 𖼺𖽺𖾑 ，𖼄𖽶 𖼠𖽶 𖼐𖽺𖾐 𖽂𖽙 𖼖𖽚𖾐 𖼐𖽙 𖼦𖽑𖽙𖾐，𖽃𖽔𖾑 𖼄𖽶 𖼖𖽺𖾑 𖼦𖽑𖽙𖾐 𖼐𖽙 𖼦𖽑𖽻𖾐． 34 𖼇𖽕 𖼖𖽻 𖼐𖽦𖾐 𖼄𖽡𖽻𖾐，𖽃𖽔𖾑 𖼄𖽶 𖼦𖽑𖽙𖾐、 𖽂𖽙 𖼖𖽚𖾐 𖼐𖽺𖾐 𖽃𖽔𖾑 𖼄𖽶 𖼠𖽶，𖼄𖽳𖾑 𖼄𖽳𖾐 𖼐𖽙 𖼦𖽑𖽻𖾐 𖼺𖽺𖾑，𖼠𖽳𖾐 𖼖𖽳𖾐 𖼽𖽺𖾐 𖼮𖽑𖽡𖽪𖾑 𖼀𖽑𖽨，𖼽𖽻 𖼐𖽺𖾐 𖼽𖽻 𖼞𖽳𖾐 𖼷𖽶 𖼄𖽻 𖼄𖽳𖾑 𖼄𖽳𖾐 𖼐𖽑𖽧𖾐 𖼠𖽴𖾐． 35 𖼇𖽕 𖼖𖽻 𖼐𖽑𖽧𖾐 𖼠𖽴𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼀𖽑𖽨 𖼊𖽑𖽧 𖼽𖽡𖾐 𖼄𖽔 𖼦𖽶𖾐，𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼮𖽑𖽻𖾐 𖼞𖽑𖽙𖾐 𖼀𖽦𖾐 𖼖𖽙𖾐 𖼺𖽶𖾑．