(2) 𖽃𖽙𖾑 𖼂𖽙𖾑 𖼈𖽡𖾑 𖼞𖽑𖽙
8
1 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼇𖽕 𖼖𖽻 𖼞𖽳𖾐 𖼞𖽑𖽶𖾑 𖼠𖽻𖾐 𖼽𖽡𖾐 𖼽𖽻 𖼖𖽙𖾐 𖼀𖽦𖾐 𖼊𖽑𖽧，𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼻𖽻𖾐 𖼀𖽦𖾐：‘ 𖼣𖽙𖾐 𖼞𖽳𖾐 𖼷𖽑𖽻𖾐 𖼀𖽺 𖼞𖽜 𖼦𖽑𖽺𖾑 𖼄𖽡𖾐 𖼊𖽺𖾐 𖼰𖽡𖾑 𖼦𖽑𖽙𖾐 𖼖𖽡𖾐，𖼽𖽻 𖼈𖽳𖾐 𖼞𖽜 𖼣𖽙𖾐 𖼊𖽑𖽺 𖽂𖽙𖾐 𖼠𖽙𖾐 𖼳𖽙𖾐 𖼽𖽡𖾐 𖼊𖽙𖾐． 2 𖼐𖽑𖽡𖾐 𖼽𖽻 𖼈𖽳𖾐 𖼊𖽑𖽺 𖼦𖽑𖽺𖾑 𖼄𖽡𖾐 𖼊𖽺𖾐 𖼮𖽑𖽻𖾐 𖼄𖽔 𖼀𖽑𖽨 𖼊𖽑𖽧 𖼽𖽡𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼐𖽑𖽡𖾐 𖼞𖽳𖾐 𖼠𖽚 𖼞𖽜 𖽃𖽙𖾑 𖼂𖽙𖾑 𖼈𖽡𖾑 𖼞𖽑𖽙 𖼷𖽶𖾐 𖼊𖽻𖾐． 3 𖼖𖽻𖾐 𖼮𖽻 𖼞𖽑𖽶𖾐 𖽃𖽙𖾑 𖼂𖽙𖾑 𖼀𖽑𖽙 𖼄𖽨 𖼍𖽪𖾐 𖼖𖽻𖾐 𖼺𖽺𖾑，𖼊𖽦𖾐 𖼖𖽻𖾐 𖼐𖽑𖽡𖾐 𖼈𖽪𖾐 𖼍𖽦 𖼦𖽑𖽺𖾐 𖼐𖽺𖾐 𖼐𖽑𖽡𖾐 𖼽𖽦 𖼦𖽑𖽺𖾐 𖼞𖽳𖾐 𖼊𖽡 𖼽𖽡𖾐 𖼊𖽻𖾐，𖼐𖽑𖽡𖾐 𖼽𖽦 𖼞𖽪𖾐 𖼊𖽑𖽺 𖼊𖽦𖾐 𖼽𖽡𖾐，𖼐𖽑𖽡𖾐 𖼞𖽳𖾐 𖼷𖽶 𖼄𖽻 𖽃𖽔𖾑 𖼞𖽑𖽶𖾐 𖼊𖽡 𖼽𖽡𖾐，𖼐𖽑𖽡𖾐 𖼞𖽳𖾐 𖼷𖽑𖽻𖾐 𖼀𖽺 𖼞𖽶𖾐 𖼮𖽑𖽶 𖼊𖽑𖽺 𖼊𖽦𖾐 𖼽𖽡𖾐，𖼐𖽑𖽡𖾐 𖼞𖽳𖾐 𖼖𖽚𖾐 𖼹𖽚 𖼊𖽑𖽺 𖼊𖽦𖾐 𖼽𖽡𖾐，𖼐𖽑𖽡𖾐 𖼞𖽳𖾐 𖼷𖽙𖾐 𖼄𖽶𖾐 𖼻𖽸 𖼖𖽻 𖼞𖽑𖽶𖾐 𖼊𖽡 𖼽𖽡𖾐 𖼊𖽻𖾐． 4 𖽃𖽙𖾑 𖼂𖽙𖾑 𖼦𖽑𖽔𖾐 𖼖𖽺𖾑 𖼂𖽦𖾐 𖼺𖽺𖾑 𖼐𖽑𖽡𖾐 𖼞𖽶𖾐 𖼮𖽑𖽶、 𖼷𖽶 𖼄𖽻 𖼐𖽺𖾐 𖼐𖽑𖽡𖾐 𖼞𖽳𖾐 𖼷𖽑𖽻𖾐 𖼀𖽺 𖼞𖽶𖾐 𖼮𖽑𖽶 𖼊𖽑𖽺 𖼊𖽦𖾐 𖼽𖽡𖾐 𖼊𖽻𖾐．’”5 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼽𖽕𖾑 𖼖𖽪𖽦 𖼊𖽑𖽺 𖼀𖽦𖾐 𖼽𖽻 𖼖𖽦 𖼀𖽑𖽦𖾐 𖼞𖽑𖽶𖾐 𖼍𖽚𖾐 𖼖𖽜 𖼄𖽶𖾐 𖼄𖽶𖾐 𖼮𖽑𖽳 𖼍𖽪𖾐 𖼖𖽻𖾐 𖼺𖽺𖾑，𖼐𖽦𖾐 𖼈𖽡𖾐、 𖼖𖽻𖾐 𖼮𖽻 𖼐𖽺𖾐 𖼈𖽡𖾐 𖼊𖽪 𖼞𖽳𖾐 𖽃𖽙𖾑 𖼂𖽙𖾑 𖼞𖽜 𖼊𖽦𖾐 𖼖𖽻𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼀𖽡𖾐 𖼮𖽨𖾐 𖼖𖽡𖾐．” 6 𖼽𖽕𖾑 𖼖𖽪𖽦 𖼍𖽚𖾐 𖼖𖽜 𖼄𖽶𖾐 𖼄𖽶𖾐 𖼮𖽑𖽳 𖼍𖽪𖾐 𖼖𖽻𖾐 𖼺𖽺𖾑，，𖽃𖽙𖾑 𖼂𖽙𖾑 𖼊𖽦𖾐 𖼖𖽻𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼀𖽡𖾐 𖼮𖽨𖾐 𖼦𖽑𖽻𖾐． 7 𖼂𖽡𖾐 𖼀𖽑𖽙 𖼞𖽑𖽶𖾑 𖼹𖽻𖾐 𖼖𖽺𖾑 𖼽𖽻 𖼈𖽳𖾐 𖼞𖽳𖾐 𖼐𖽺 𖼄𖽪𖾐 𖼊𖽪𖾐 𖼻𖽜 𖼦𖽑𖽺𖾑 𖼖𖽙𖾐 𖼺𖽶𖾑 𖼂𖽺𖾐，𖽃𖽙𖾑 𖼂𖽙𖾑 𖼞𖽜 𖽃𖽦𖾐 𖼰𖽧 𖼄𖽡𖾑 𖼐𖽦𖾐 𖼊𖽑𖽺 𖼊𖽦𖾐 𖼖𖽻𖾐，
8 𖼇𖽕 𖼖𖽻 𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐，𖼀𖽦𖾐：“𖼐𖽑𖽡𖾐 𖼈𖽳𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐，𖽃𖽙𖾑 𖼂𖽙𖾑 𖼞𖽜 𖼣𖽙𖾐 𖼐𖽺𖾐 𖼣𖽙𖾐 𖼷𖽑𖽻𖾐 𖼀𖽺 𖼊𖽑𖽺 𖼰𖽡𖾑 𖼦𖽑𖽙𖾐 𖼺𖽺𖾑，𖼣𖽙𖾐 𖼐𖽑𖽡𖾐 𖼞𖽳𖾐 𖼷𖽑𖽻𖾐 𖼀𖽺 𖼞𖽜 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖽂𖽙𖾐 𖼍𖽡𖾐 𖼊𖽑𖽴 𖼽𖽡𖾐 𖼊𖽙𖾐．”
9 𖼄𖽚 𖼳𖽡𖾐 𖼇𖽕 𖼖𖽻 𖼊𖽑𖽺 𖼊𖽻 𖼞𖽑𖽚：“𖼐𖽑𖽡𖾐 𖼀𖽦𖾐 𖼣𖽙𖾐 𖼖𖽙𖾐 𖼊𖽑𖽧，𖼣𖽙𖾐 𖼞𖽜 𖼞𖽑𖽙 𖼊𖽑𖽻𖾐 𖼐𖽑𖽡𖾐 𖼐𖽺𖾐 𖼷𖽶 𖼄𖽻、 𖼷𖽑𖽻𖾐 𖼀𖽺 𖼖𖽙𖾐 𖼀𖽙𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐，𖽃𖽙𖾑 𖼂𖽙𖾑 𖼊𖽑𖽺 𖼄𖽳 𖼮𖽡𖽦，𖽃𖽙𖾑 𖼂𖽙𖾑 𖼞𖽜 𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼞𖽳𖾐 𖼈𖽪𖾐 𖼍𖽦 𖼦𖽑𖽺𖾐 𖼊𖽑𖽺 𖼰𖽡𖾑 𖼦𖽑𖽙𖾐，𖼀𖽑𖽨 𖼐𖽑𖽧 𖼖𖽚 𖼖𖽻𖾐 𖼮𖽻 𖼍𖽺𖾑 𖼮𖽻𖾐 𖼐𖽺𖾑？”
10 𖼇𖽕 𖼖𖽻 𖼀𖽦𖾐：“𖽃𖽔𖾑 𖼞𖽶𖾐 𖼐𖽑𖽡𖾐 𖼄𖽡𖽻 𖼦𖽑𖽺𖾑 𖼂𖽺𖾐 𖼽𖽡𖾐．”
𖼄𖽚 𖼳𖽡𖾐 𖼊𖽻 𖼞𖽑𖽚：“𖼐𖽑𖽡𖾐 𖼀𖽦𖾐 𖼖𖽙𖾐 𖼮𖽑𖽻𖾐 𖼂𖽺𖾐 𖼽𖽡𖾐 𖼊𖽻𖾐． 𖽃𖽔𖾐 𖼺𖽺𖾑，𖼐𖽑𖽡𖾐 𖼞𖽜 𖼺𖽝𖾑 𖼊𖽻𖾐，𖼠𖽳𖾐 𖼖𖽪𖾐 𖼺𖽡𖾐 𖼣𖽙𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼖𖽙𖾐 𖼺𖽶𖾑 𖼺𖽪𖾐 𖼄𖽔 𖼮𖽻𖾐． 11 𖽃𖽙𖾑 𖼂𖽙𖾑 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼞𖽳𖾐 𖼈𖽪𖾐 𖼍𖽦 𖼦𖽑𖽺𖾐，𖼷𖽑𖽻𖾐 𖼀𖽺 𖼐𖽺𖾐 𖼷𖽶 𖼄𖽻 𖼊𖽑𖽺 𖼰𖽡𖾑 𖼦𖽑𖽙𖾐，𖼀𖽑𖽨 𖼐𖽑𖽧 𖼖𖽚 𖼖𖽻𖾐 𖼮𖽻 𖼞𖽑𖽶𖾐 𖼍𖽺𖾑 𖼮𖽻𖾐 𖼊𖽻𖾐． ”
12 𖽃𖽔𖾐 𖼺𖽺𖾑，𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼇𖽕 𖼖𖽻 𖼊𖽑𖽺 𖼰𖽡𖾑 𖼦𖽑𖽙𖾐 𖼊𖽚𖾐 𖼽𖽡𖾐，𖼇𖽕 𖼖𖽻 𖽃𖽙𖾑 𖼂𖽙𖾑 𖼈𖽡𖾑 𖼞𖽑𖽙 𖼷𖽶𖾐 𖼄𖽳𖾐 𖼖𖽙𖾐 𖼀𖽙𖾐 𖼺𖽺𖾑，𖼄𖽚 𖼳𖽡𖾐 𖼽𖽻 𖼊𖽑𖽡𖾑 𖼮𖽪 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐． 13 𖽃𖽔𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼊𖽻 𖼂𖽪𖾑 𖼖𖽙𖾐 𖼮𖽑𖽻𖾐 𖼂𖽺𖾐 𖼀𖽑𖽢 𖼦𖽑𖽻𖾐，𖼦𖽺𖾐 𖼞𖽑𖽶𖾐、 𖼮𖽡𖽺 𖼞𖽪 𖼠𖽻𖾐 𖼞𖽑𖽶𖾐 𖼐𖽺𖾐 𖼄𖽡𖾐 𖼠𖽻𖾐 𖼞𖽑𖽶𖾐 𖼮𖽻𖾐 𖼺𖽪𖾐 𖽃𖽙𖾑 𖼂𖽙𖾑，𖼄𖽳𖾑 𖼄𖽳𖾐 𖼳𖽶𖾐 𖼦𖽑𖽻𖾐． 14 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖽃𖽙𖾑 𖼂𖽙𖾑 𖼊𖽑𖽡 𖼂𖽜𖾐 𖼊𖽑𖽡 𖼂𖽜𖾐 𖼠𖽜𖾐 𖼂𖽜𖾐 𖼍𖽪𖾐 𖼖𖽻𖾐，𖼞𖽑𖽶𖾑 𖼄𖽡𖾐 𖼊𖽺𖾐 𖼮𖽑𖽶 𖼀𖽺 𖼐𖽜𖾐 𖼦𖽑𖽻𖾐． 15 𖼇𖽕 𖼖𖽻 𖽃𖽙𖾑 𖼂𖽙𖾑 𖼈𖽡𖾑 𖼞𖽑𖽙 𖼐𖽙 𖼹𖽺𖾐 𖼽𖽡𖾐 𖼞𖽳𖾐 𖼐𖽦𖾐 𖼄𖽡𖽻𖾐 𖼺𖽺𖾑，𖼐𖽑𖽧𖾐 𖼠𖽴𖾐 𖼍𖽪𖾐 𖼖𖽻𖾐，𖼽𖽻 𖼈𖽳𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼮𖽶𖾐 𖼄𖽔 𖼦𖽶𖾐，𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼀𖽦𖾐 𖼖𖽙𖾐 𖼺𖽶𖾑．
(3) 𖼳𖽡𖽺𖾐 𖼄𖽙𖾐 𖼈𖽡𖾑 𖼞𖽑𖽙
16 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼽𖽕𖾑 𖼖𖽪𖽦 𖼊𖽑𖽺 𖼀𖽦𖾐 𖼊𖽑𖽧，𖼍𖽚𖾐 𖼖𖽜 𖼈𖽺𖾐 𖼄𖽡𖾑 𖼐𖽦𖾐 𖼀𖽙 𖼐𖽑𖽡𖾑 𖼄𖽶𖾐 𖼊𖽑𖽺 𖼊𖽝 𖼺𖽺𖾑，𖼐𖽑𖽡𖾑 𖼄𖽶𖾐 𖼞𖽜 𖼳𖽡𖽺𖾐 𖼄𖽙𖾐 𖼀𖽑𖽢 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼀𖽡𖾐 𖼮𖽨𖾐 𖼖𖽡𖾐．” 17 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼦𖽑𖽺𖾑 𖼖𖽙𖾐 𖼺𖽶𖾑 𖼂𖽺𖾐 𖼽𖽡𖾐，𖼽𖽕𖾑 𖼖𖽪𖽦 𖼍𖽚𖾐 𖼖𖽜 𖼈𖽺𖾐 𖼄𖽡𖾑 𖼐𖽦𖾐 𖼀𖽙 𖼐𖽑𖽡𖾑 𖼄𖽶𖾐 𖼊𖽑𖽺 𖼊𖽝 𖼺𖽺𖾑，𖼷𖽑𖽻𖾐 𖼐𖽺𖾐 𖼮𖽡𖽺 𖼞𖽶𖾐 𖼮𖽑𖽶 𖼊𖽑𖽺 𖼳𖽡𖽺𖾐 𖼄𖽙𖾐 𖼮𖽻𖾐 𖼀𖽡𖾐 𖼦𖽑𖽻𖾐，𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼐𖽑𖽡𖾑 𖼄𖽶𖾐 𖼞𖽑𖽙𖾐 𖼣𖽻𖾐 𖼳𖽡𖽺𖾐 𖼄𖽙𖾐 𖼀𖽑𖽢 𖼦𖽑𖽻𖾐． 18 𖼂𖽡𖾐 𖼀𖽑𖽙 𖼞𖽑𖽶𖾑 𖼹𖽻𖾐 𖼖𖽺𖾑 𖼐𖽺 𖼄𖽪𖾐 𖼊𖽪𖾐 𖼻𖽻 𖼺𖽺𖾑，𖼳𖽡𖽺𖾐 𖼄𖽙𖾐 𖼂𖽺𖾐 𖼊𖽑𖽧 𖼖𖽻𖾐 𖼊𖽡 𖼮𖽑𖽻，𖼦𖽑𖽻𖾐 𖼊𖽑𖽻𖾐 𖼂𖽺𖾐 𖼄𖽔 𖼠𖽸𖾑，𖽃𖽔𖾐 𖼺𖽺𖾑 𖼷𖽑𖽻𖾐 𖼐𖽺𖾐 𖼮𖽡𖽺 𖼞𖽶𖾐 𖼮𖽑𖽶 𖼊𖽑𖽺 𖼳𖽡𖽺𖾐 𖼄𖽙𖾐 𖼮𖽻𖾐 𖼀𖽡𖾐 𖼦𖽑𖽻𖾐．
19 𖼂𖽡𖾐 𖼀𖽑𖽙 𖼞𖽑𖽶𖾑 𖼹𖽻𖾐 𖼇𖽕 𖼖𖽻 𖼖𖽙𖾐 𖼀𖽦𖾐：“𖼦𖽑𖽺𖾑 𖽂𖽙 𖼺𖽙𖾐 𖼂𖽙𖾐 𖼂𖽺𖾐 𖼳𖽶 𖼣𖽻𖾐．” 𖼦𖽑𖽻𖾐 𖼊𖽑𖽻𖾐，𖼇𖽕 𖼖𖽻 𖼐𖽑𖽧𖾐 𖼠𖽴𖾐 𖼺𖽺𖾑，𖼄𖽚 𖼳𖽡𖾐 𖼐𖽺𖾐𖼽𖽕𖾑 𖼖𖽪𖽦 𖼞𖽳𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐 𖼄𖽔 𖼦𖽶𖾐，𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼀𖽦𖾐 𖼖𖽙𖾐 𖼺𖽶𖾑．
(4) 𖼽𖽻𖾐 𖼄𖽡 𖼈𖽡𖾑 𖼞𖽑𖽙
20 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖽃𖽔𖾑 𖼞𖽶𖾐 𖼐𖽜𖾐 𖼍𖽪𖾐 𖼖𖽻𖾐，𖼇𖽕 𖼖𖽻 𖼖𖽻𖾐 𖼮𖽻 𖼀𖽪𖾐 𖼦𖽜 𖼮𖽑𖽡𖾐 𖼖𖽻𖾐 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼽𖽡𖾐 𖼽𖽻 𖽃𖽙𖾑 𖼄𖽺 𖼮𖽑𖽡𖽺 𖼦𖽑𖽡𖽚 𖼺𖽺𖾑，𖼽𖽻 𖼖𖽙𖾐 𖼀𖽦𖾐 𖼊𖽑𖽧，𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼻𖽻𖾐 𖼀𖽦𖾐： ‘𖼐𖽑𖽡𖾐 𖼣𖽙𖾐 𖼞𖽳𖾐 𖼷𖽑𖽻𖾐 𖼀𖽺 𖼞𖽜 𖼦𖽑𖽺𖾑 𖼄𖽡𖾐 𖼊𖽺𖾐 𖼰𖽡𖾑 𖼦𖽑𖽙𖾐 𖼖𖽡𖾐 ，𖼽𖽻 𖼈𖽳𖾐 𖼞𖽜 𖼣𖽙𖾐 𖼊𖽑𖽺 𖽂𖽙𖾐 𖼠𖽙𖾐 𖼳𖽙𖾐 𖼊𖽙𖾐． 21 𖼐𖽑𖽡𖾐 𖼣𖽙𖾐 𖼞𖽳𖾐 𖼷𖽑𖽻𖾐 𖼀𖽺 𖼞𖽜 𖼦𖽑𖽺𖾑 𖼄𖽡𖾐 𖼊𖽺𖾐 𖼰𖽡𖾑 𖼦𖽑𖽙𖾐 𖼄𖽔 𖼦𖽶𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼽𖽻𖾐 𖼄𖽡 𖼞𖽜 𖼖𖽻𖾐 𖼐𖽑𖽡𖾐 𖼞𖽶𖾐 𖼮𖽑𖽶、 𖼷𖽶 𖼄𖽻 𖼐𖽺𖾐 𖼐𖽑𖽡𖾐 𖼞𖽳𖾐 𖼷𖽑𖽻𖾐 𖼀𖽺 𖼞𖽶𖾐 𖼮𖽑𖽶 𖼊𖽑𖽺 𖼮𖽻𖾐 𖼊𖽻𖾐，𖼽𖽻𖾐 𖼄𖽡 𖼐𖽑𖽡𖾐 𖼞𖽳𖾐 𖼈𖽪𖾐 𖼍𖽦 𖼦𖽑𖽺𖾐 𖼞𖽑𖽶𖾐 𖼊𖽡 𖼽𖽡𖾐，𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼞𖽳𖾐 𖼦𖽑𖽺𖾐 𖼞𖽑𖽶𖾐 𖼊𖽡 𖼽𖽡𖾐，𖼽𖽻 𖼈𖽳𖾐 𖼞𖽑𖽙𖾐 𖼮𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼽𖽻𖾐 𖼄𖽡 𖼀𖽡𖾐 𖼮𖽨𖾐 𖼊𖽻𖾐． 22 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼮𖽑𖽡𖾐，𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼣𖽙𖾐 𖼷𖽑𖽻𖾐 𖼀𖽺 𖼮𖽻𖾐 𖼞𖽳𖾐 𖼠𖽜𖾐 𖼳𖽔𖾐 𖼄𖽡𖾐 𖼊𖽺𖾐 𖼀𖽜𖾐 𖼀𖽑𖽪𖾐 𖼺𖽺𖾑，𖼞𖽑𖽶𖾑 𖼠𖽻𖾐 𖼽𖽻𖾐 𖼄𖽡 𖼄𖽔 𖼮𖽻𖾐 𖼊𖽻𖾐． 𖼐𖽑𖽡𖾐 𖼞𖽜 𖼺𖽝𖾑 𖼊𖽻𖾐，𖼄𖽶 𖼊𖽑𖽡 𖽂𖽚 𖼞𖽑𖽶𖾐 𖼣𖽙𖾐 𖼽𖽺𖾐 𖼦𖽴 𖼦𖽫 𖼍𖽺𖾑 𖼺𖽡𖾐 𖼠𖽕𖾐 𖼰𖽶𖾐 𖼣𖽻𖾐． 23 𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼣𖽙𖾐 𖼞𖽳𖾐 𖼷𖽑𖽻𖾐 𖼀𖽺 𖼐𖽺𖾐 𖼐𖽑𖽡𖾐 𖼞𖽳𖾐 𖼷𖽑𖽻𖾐 𖼀𖽺 𖼊𖽑𖽺 𖼀𖽜𖾐 𖼀𖽑𖽪𖾐 𖼊𖽻𖾐，𖽃𖽔𖾑 𖼞𖽶𖾐 𖼐𖽑𖽡𖾐 𖼺𖽡𖾐 𖼂𖽺𖾐 𖼊𖽪𖾐 𖼦𖽑𖽺𖾑 𖼮𖽻𖾐 𖼊𖽻𖾐．’ ”
24 𖽃𖽔𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼻𖽻𖾐 𖼂𖽺𖾐，𖼽𖽻𖾐 𖼄𖽡 𖼄𖽨 𖼄𖽨 𖼈𖽪𖾐 𖼍𖽦 𖼦𖽑𖽺𖾐 𖼞𖽑𖽶𖾐 𖼐𖽺𖾐 𖼷𖽶 𖼄𖽻 𖼦𖽑𖽺𖾐 𖼞𖽑𖽶𖾐 𖼊𖽡 𖼽𖽡𖾐，𖼦𖽑𖽔𖾐 𖼖𖽺𖾑 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼀𖽡𖾐 𖼮𖽨𖾐 𖼺𖽺𖾑，𖼞𖽑𖽶𖾑 𖼄𖽡𖾐 𖼊𖽺𖾐 𖼽𖽻𖾐 𖼄𖽡 𖼮𖽑𖽢𖾑 𖼂𖽺𖾐 𖼀𖽑𖽧𖾐 𖼦𖽑𖽻𖾐．
25 𖼇𖽕 𖼖𖽻 𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐，𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼦𖽑𖽺𖾑 𖼄𖽡𖾐 𖼊𖽺𖾐 𖼮𖽻𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼍𖽡𖾐 𖼊𖽑𖽴 𖼻𖽻𖾐．”
26 𖼄𖽚 𖼳𖽡𖾐 𖼊𖽻 𖼞𖽑𖽚：“𖼦𖽑𖽺𖾑 𖼻𖽻𖾐 𖼂𖽺𖾐 𖼀𖽑𖽢 𖼄𖽔 𖼊𖽙𖾐，𖼞𖽪𖾐 𖼮𖽡𖽺𖾐 𖼣𖽙𖾐 𖼈𖽳𖾐 𖼈𖽺𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜 𖼺𖽪𖾐 𖼍𖽡𖾐 𖼊𖽪𖾐，𖼦𖽑𖽺𖾑 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼞𖽑𖽙𖾐 𖼦𖽶𖾑 𖼳𖽶 𖼣𖽻𖾐． 𖼣𖽙𖾐 𖼈𖽳𖾐 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼄𖽦𖾐 𖼊𖽪 𖼮𖽑𖽡𖽺 𖼽𖽻 𖼈𖽳𖾐 𖼞𖽑𖽙𖾐 𖼦𖽶𖾑 𖼳𖽶 𖼈𖽺𖾐 𖼍𖽡𖾐 𖼊𖽪𖾐 𖼂𖽺𖾐 𖼊𖽑𖽡𖾑 𖼣𖽻𖾐，𖼽𖽻 𖼈𖽳𖾐 𖼖𖽚𖾐 𖼄𖽙𖾐 𖼻𖽜 𖼣𖽙𖾐 𖼈𖽳𖾐 𖼊𖽑𖽺 𖼄𖽔 𖼊𖽝 𖼳𖽶𖾐 𖼊𖽻𖾐 𖼖𖽔𖾑？ 27 𖼣𖽙𖾐 𖼈𖽳𖾐 𖼺𖽙𖾐 𖼐𖽑𖽡𖾐 𖼞𖽳𖾐 𖼮𖽨𖾐 𖼄𖽙𖾐 𖼺𖽜 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼽𖽡𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐，𖼣𖽙𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼍𖽡𖾐 𖼊𖽑𖽴 𖼽𖽡𖾐 𖼊𖽻𖾐．”
28 𖼇𖽕 𖼖𖽻 𖼊𖽻 𖼞𖽑𖽚：“𖼣𖽙𖾐 𖼐𖽑𖽡𖾐 𖼈𖽳𖾐 𖼞𖽜 𖽂𖽙𖾐 𖼽𖽡𖾐 𖼊𖽙𖾐，𖼐𖽑𖽡𖾐 𖼈𖽳𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖽂𖽙𖾐 𖼍𖽡𖾐 𖼊𖽑𖽴 𖼊𖽙𖾐． 𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼈𖽳𖾐 𖽂𖽙𖾐 𖼽𖽡𖾐 𖼄𖽡𖾐 𖼈𖽡 𖼄𖽔 𖼊𖽙𖾐，𖼐𖽑𖽡𖾐 𖼈𖽳𖾐 𖼣𖽙𖾐 𖼖𖽙𖾐 𖼀𖽙𖾐 𖼮𖽑𖽡 𖼮𖽡𖽺𖾐 𖼂𖽺𖾐 𖼞𖽜．”
29 𖼄𖽚 𖼳𖽡𖾐 𖼀𖽦𖾐：“𖼐𖽦𖾐 𖼄𖽺! 𖼣𖽙𖾐 𖼐𖽑𖽡𖾐 𖼊𖽑𖽺 𖼰𖽡𖾑 𖼦𖽑𖽙𖾐 𖼊𖽚𖾐 𖼽𖽡𖾐，𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐 𖼺𖽺𖾑，𖽃𖽔𖾑 𖼞𖽶𖾐 𖼐𖽑𖽡𖾐 𖼽𖽻𖾐 𖼄𖽡 𖼞𖽜 𖼇𖽕 𖼖𖽻、 𖼷𖽶 𖼄𖽻 𖼐𖽺𖾐 𖼷𖽑𖽻𖾐 𖼀𖽺 𖼊𖽑𖽺 𖼰𖽡𖾑 𖼦𖽑𖽙𖾐 𖼊𖽻𖾐． 𖼦𖽑𖽻𖾐 𖼊𖽑𖽻𖾐，𖼇𖽕 𖼖𖽻 𖼐𖽑𖽡𖾐 𖼹𖽦𖾑 𖼇𖽪 𖼊𖽻 𖼊𖽑𖽔 𖼊𖽑𖽜𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽜 𖼦𖽑𖽺𖾑 𖼠𖽻𖾐 𖼰𖽡𖽡𖾑 𖼦𖽑𖽙𖾐，𖼽𖽺𖾐 𖼦𖽴 𖼦𖽫 𖼊𖽑𖽺 𖽂𖽙𖾐 𖼍𖽡𖾐 𖼊𖽑𖽴 𖼄𖽔 𖼊𖽙𖾐 𖼊𖽑𖽔 𖼂𖽺𖾐．”