7
1 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼐𖽦𖾐 𖼄𖽺! 𖼣𖽙𖾐 𖼐𖽑𖽡𖾐 𖼞𖽜 𖼇𖽕 𖼖𖽻𖽃𖽙𖾑 𖼄𖽺 𖼮𖽑𖽡𖽺 𖽂𖽙 𖼺𖽙𖾐 𖼂𖽙𖾐 𖼖𖽙𖾐 𖼺𖽶𖾑，𖼐𖽑𖽡𖽻𖾐 𖼍𖽕𖾑 𖼽𖽕𖾑 𖼖𖽪𖽦 𖼐𖽑𖽡𖾐 𖼊𖽑𖽡𖾑 𖼮𖽪 𖼊𖽻 𖼊𖽑𖽜𖾐 𖼖𖽦 𖼠𖽸𖾑 𖼂𖽺𖾐 𖼊𖽻𖾐． 2 𖼣𖽙𖾐 𖼐𖽑𖽡𖾐 𖼊𖽑𖽺 𖼞𖽑𖽙𖾐 𖼄𖽪𖾑 𖼍𖽴𖾑 𖼺𖽪𖾐，𖼐𖽑𖽡𖾐 𖼄𖽳𖾑 𖼄𖽳 𖼀𖽦𖾐 𖼊𖽑𖽧 𖼖𖽡𖾐． 𖼐𖽑𖽡𖽻𖾐 𖼍𖽕𖾑 𖼽𖽕𖾑 𖼖𖽪𖽦 𖼞𖽜 𖼇𖽕 𖼖𖽻 𖼊𖽑𖽺 𖼀𖽦𖾐 𖼊𖽑𖽧，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽜 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼰𖽡𖾑 𖼦𖽑𖽙𖾐 𖼖𖽡𖾐． 3 𖼣𖽙𖾐 𖼇𖽕 𖼖𖽻 𖼞𖽜 𖼐𖽑𖽧𖾐 𖼠𖽴𖾐 𖼺𖽺𖾑，𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼺𖽡𖾐 𖼂𖽺𖾐 𖼊𖽪𖾐 𖼄𖽨 𖼄𖽨 𖼂𖽺𖾐 𖼀𖽦𖾐 𖼖𖽺𖾑， 4 𖼇𖽕 𖼖𖽻 𖼐𖽑𖽡𖾐 𖼈𖽳𖾐 𖼊𖽻 𖼂𖽪𖾑 𖼊𖽑𖽺 𖼄𖽔 𖼊𖽻 𖼐𖽙𖾐 𖼊𖽻𖾐． 𖼣𖽙𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽜 𖼈𖽡𖾑 𖼞𖽑𖽙 𖼈𖽳 𖼄𖽙𖾐 𖼷𖽶𖾐 𖼺𖽺𖾑，𖼣𖽙𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼄𖽦 𖼀𖽑𖽙 𖼷𖽪𖾐 𖼖𖽙𖾐 𖼺𖽶𖾑，𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼦𖽳 𖼊𖽑𖽧 𖼖𖽻𖾐 𖼊𖽻𖾐． 5 𖼣𖽙𖾐 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼊𖽑𖽺 𖼊𖽝，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖼮𖽑𖽻𖾐 𖼦𖽳 𖼊𖽚𖾐 𖼖𖽻𖾐 𖼞𖽑𖽶𖾑 𖼮𖽶𖾐 𖼺𖽺𖾑 ，𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼷𖽑𖽜𖾑 𖼷𖽑𖽜𖾐 𖼺𖽝𖾑 𖼊𖽻𖾐，𖼣𖽙𖾐 𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼣𖽻𖾐．”6 𖽃𖽔𖾐 𖼺𖽺𖾑，𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼦𖽑𖽺𖾑 𖼻𖽻𖾐 𖼂𖽺𖾐 𖼽𖽡𖾐，𖼽𖽺𖾐 𖼦𖽴 𖼦𖽫 𖼽𖽻 𖼈𖽳𖾐 𖼊𖽑𖽺 𖽃𖽔 𖼊𖽺𖾐 𖼀𖽦𖾐 𖼄𖽪𖾑，𖼽𖽻 𖼈𖽳𖾐 𖽃𖽔 𖼊𖽺𖾐 𖼂𖽺𖾐 𖼽𖽡𖾐 𖼦𖽑𖽙𖾐． 7 𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼽𖽡𖾐 𖼇𖽕 𖼖𖽻 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐 𖼞𖽑𖽶𖾑 𖼮𖽶𖾐，𖼄𖽚 𖼳𖽡𖾐 𖼦𖽑𖽦 𖼷𖽑𖽡𖾐 𖼞𖽑𖽚 𖼖𖽚，𖼽𖽕𖾑 𖼖𖽪𖽦 𖼦𖽑𖽦 𖼷𖽑𖽡𖾐 𖼺𖽙𖾐 𖼞𖽑𖽚 𖼖𖽚．
𖼍𖽚𖾐 𖼖𖽜 𖼖𖽙𖾐 𖼳𖽳𖾐 𖼀𖽑𖽢
8 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼖𖽙𖾐 𖼀𖽦𖾐 𖼊𖽑𖽧： 9 “𖼇𖽕 𖼖𖽻 𖼐𖽑𖽡𖾐 𖼈𖽳𖾐 𖼊𖽑𖽺 ‘ 𖼞𖽑𖽙 𖼣𖽝 𖼄𖽡𖽻 𖼊𖽑𖽡 𖼳𖽶 𖼂𖽺𖾐 𖼄𖽺 ’ 𖼀𖽦𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼽𖽕𖾑 𖼖𖽪𖽦 𖼊𖽑𖽺 𖼞𖽜 𖼍𖽚𖾐 𖼖𖽜 𖼷𖽴𖾐 𖼇𖽕 𖼖𖽻 𖽃𖽙𖾑 𖼄𖽺 𖼮𖽑𖽡𖽺 𖼍𖽙𖾑 𖼻𖽻𖾐，𖼍𖽚𖾐 𖼖𖽜 𖼞𖽑𖽶𖾑 𖼖𖽙𖾐 𖼳𖽳𖾐 𖼀𖽑𖽢 𖼊𖽻𖾐．
10 𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼇𖽕 𖼖𖽻 𖼞𖽳𖾐 𖼽𖽡𖾐，𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐 𖼄𖽡𖽻 𖼂𖽺𖾐． 𖼽𖽕𖾑 𖼖𖽪𖽦 𖼍𖽚𖾐 𖼖𖽜 𖼷𖽴𖾐 𖼇𖽕 𖼖𖽻 𖼐𖽺𖾐 𖼷𖽶 𖼄𖽻 𖽃𖽙𖾑 𖼄𖽺 𖼮𖽑𖽡𖽺 𖼍𖽙𖾑，𖼍𖽚𖾐 𖼖𖽜 𖼞𖽑𖽶𖾑 𖼖𖽙𖾐 𖼳𖽳𖾐 𖼀𖽑𖽢 𖼦𖽑𖽙𖾐． 11 𖽃𖽔𖾐 𖼺𖽺𖾑，𖼇𖽕 𖼖𖽻 𖼖𖽺𖾑 𖼈𖽪𖾐 𖼺𖽝𖾑 𖼷𖽑𖽻𖾐 𖼐𖽺𖾐 𖼂𖽡𖾐 𖼀𖽑𖽙 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐，𖼽𖽻 𖼈𖽳𖾐 𖼦𖽑𖽺𖾑 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽳𖾐 𖼂𖽡𖾐 𖼀𖽑𖽙 𖼣𖽻𖾐，𖼽𖽻 𖼈𖽳𖾐 𖼖𖽺𖾑 𖼐𖽺 𖼄𖽪𖾐 𖼊𖽪𖾐 𖼻𖽜 𖼺𖽺𖾑 𖼦𖽑𖽺𖾑 𖼻𖽻𖾐 𖼂𖽺𖾐． 12 𖼽𖽻 𖼈𖽳𖾐 𖼽𖽻 𖼄𖽳𖾑 𖼞𖽳𖾐 𖼍𖽚𖾐 𖼖𖽜 𖼷𖽴𖾐 𖼄𖽡𖾑 𖼐𖽦𖾐 𖼀𖽙 𖼹𖽺𖾐 𖼺𖽺𖾑，𖼖𖽙𖾐 𖼳𖽳𖾐 𖼀𖽑𖽢 𖼦𖽑𖽙𖾐，𖼦𖽑𖽻𖾐 𖼊𖽑𖽻𖾐 𖼽𖽕𖾑 𖼖𖽪𖽦 𖼞𖽳𖾐 𖼍𖽚𖾐 𖼖𖽜 𖼽𖽻 𖼈𖽳𖾐 𖼞𖽳𖾐 𖼍𖽚𖾐 𖼖𖽜 𖼊𖽑𖽺 𖼊𖽻𖾐 𖼦𖽑𖽙𖾐． 13 𖼇𖽕 𖼖𖽻 𖼐𖽑𖽧𖾐 𖼠𖽴𖾐 𖼺𖽺𖾑，𖼽𖽻 𖼈𖽳𖾐 𖼀𖽦𖾐 𖼺𖽪𖾐 𖼊𖽑𖽺 𖼊𖽻 𖼐𖽙𖾐 𖼄𖽔 𖼦𖽶𖾐，𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼀𖽦𖾐 𖼖𖽙𖾐 𖼺𖽶𖾑．
(1) 𖼺𖽶 𖼈𖽡𖾑 𖼞𖽑𖽙
14 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼇𖽕 𖼖𖽻 𖼐𖽑𖽧𖾐 𖼠𖽴𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼀𖽑𖽨 𖼂𖽡𖾐 𖼽𖽡𖾐 𖼄𖽔 𖼦𖽶𖾐 𖼊𖽻𖾐． 15 𖼐𖽑𖽡𖾐 𖽃𖽔𖾑 𖼞𖽶𖾐 𖼐𖽜𖾐 𖼇𖽕 𖼖𖽻 𖼞𖽳𖾐 𖼞𖽑𖽻𖾑 𖼽𖽡𖾐． 𖼐𖽦𖾐 𖼄𖽺! 𖼇𖽕 𖼖𖽻 𖼖𖽻𖾐 𖼮𖽻 𖼦𖽜 𖼽𖽡𖾐 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼞𖽑𖽶𖾑 𖼠𖽻𖾐 𖼦𖽑𖽡𖽚 𖼽𖽻 𖼊𖽑𖽺 𖼹𖽶𖾐 𖼖𖽡𖾐，𖼐𖽑𖽡𖾐 𖼖𖽙𖾐 𖼳𖽳𖾐 𖼀𖽑𖽢 𖼠𖽚 𖼺𖽪𖾐 𖼍𖽚𖾐 𖼖𖽜 𖼞𖽑𖽶𖾑 𖼈𖽺𖾐 𖼍𖽳𖾐 𖼖𖽡𖾐． 16 𖼐𖽑𖽡𖾐 𖼇𖽕 𖼖𖽻 𖼖𖽙𖾐 𖼀𖽦𖾐：‘ 𖼳𖽡𖾐 𖼂𖽚 𖼖𖽦 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼣𖽙𖾐 𖼊𖽑𖽺 𖼹𖽡𖾐 𖼦𖽑𖽺𖾑 𖼠𖽻𖾐 𖼖𖽻𖾐 𖼺𖽺𖾑，𖼐𖽑𖽡𖾐 𖼖𖽙𖾐 𖼀𖽦𖾐，𖼽𖽻 𖼞𖽳𖾐 𖼷𖽑𖽻𖾐 𖼀𖽺 𖼞𖽜 𖼦𖽑𖽺𖾑 𖼄𖽡𖾐 𖼊𖽺𖾐 𖼰𖽡𖾑 𖼦𖽑𖽙𖾐 𖼺𖽺𖾑，𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼽𖽻 𖼊𖽑𖽺 𖼠𖽙𖾐 𖼳𖽙𖾐 𖼽𖽡𖾐 𖼖𖽡𖾐． 𖼦𖽑𖽻𖾐 𖼊𖽑𖽻𖾐，𖽃𖽔𖾑 𖼄𖽳𖾐 𖼖𖽙𖾐 𖼮𖽑𖽡𖾐 𖼖𖽺𖾑 𖼐𖽑𖽡𖾐 𖼊𖽻 𖼐𖽙𖾐 𖼄𖽔 𖼦𖽶𖾐．” 17 𖼽𖽺𖾐 𖼦𖽴 𖼦𖽫 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼞𖽜 𖼺𖽝𖾑 𖼊𖽻𖾐，𖼽𖽻 𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼣𖽻𖾐． 𖼐𖽦𖾐 𖼄𖽺! 𖼣𖽙𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼍𖽚𖾐 𖼖𖽜 𖼈𖽺𖾐 𖼖𖽻𖾐 𖼮𖽻 𖽃𖽔𖾐 𖼮𖽡𖽦𖾐 𖼊𖽑𖽺 𖼊𖽝 𖼺𖽺𖾑，𖽃𖽔𖾐 𖼮𖽡𖽦𖾐 𖼞𖽜 𖼺𖽶 𖼀𖽑𖽢， 18 𖼖𖽻𖾐 𖼮𖽻 𖼞𖽑𖽶𖾐 𖼣𖽙𖾑 𖼳𖽶𖾐 𖼦𖽑𖽻𖾐 𖼊𖽻𖾐． 𖽃𖽔𖾐 𖼮𖽡𖽦𖾐 𖼖𖽺𖾑 𖼮𖽑𖽶 𖼀𖽺 𖼐𖽜𖾐 𖼐𖽑𖽧𖾐 𖼀𖽑𖽴 𖼺𖽺𖾑，𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼊𖽻𖾐 𖼀𖽑𖽢 𖼄𖽔 𖼊𖽙𖾐 𖼊𖽻𖾐．”
19 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼽𖽕𖾑 𖼖𖽪𖽦 𖼊𖽑𖽺 𖼀𖽦𖾐 𖼊𖽑𖽧，𖼽𖽻 𖼞𖽜 𖼍𖽚𖾐 𖼖𖽜 𖼄𖽶𖾐 𖼄𖽶𖾐 𖼮𖽑𖽳 𖼍𖽪𖾐 𖼺𖽺𖾑，𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽳𖾐 𖼐𖽦𖾐 𖼈𖽡𖾐、 𖼖𖽻𖾐 𖼮𖽻、 𖼈𖽡𖾐 𖼊𖽪 𖼐𖽺𖾐 𖼈𖽡𖾐 𖼊𖽚𖾐 𖼄𖽳𖾑 𖼄𖽳 𖼺𖽶 𖼀𖽑𖽢 𖼊𖽻𖾐． 𖽃𖽔𖾐 𖼺𖽺𖾑，𖼺𖽧𖾐 𖼊𖽑𖽪 𖼠𖽻𖾐 𖼞𖽑𖽶𖾐 𖼣𖽻𖾐 𖼦𖽻，𖼖𖽚𖾐 𖼖𖽻 𖼠𖽻𖾐 𖼞𖽑𖽶𖾐 𖼣𖽻𖾐 𖼦𖽻，𖼞𖽑𖽙𖾐 𖼮𖽑𖽡𖾐 𖼊𖽪 𖼺𖽶 𖼮𖽻𖾐 𖼊𖽻𖾐．
20 𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐 𖼂𖽺𖾐 𖼽𖽡𖾐． 𖼽𖽕𖾑 𖼖𖽪𖽦 𖼇𖽕 𖼖𖽻 𖼐𖽺𖾐 𖼷𖽶 𖼄𖽻 𖽃𖽙𖾑 𖼄𖽺 𖼮𖽑𖽡𖽺 𖼖𖽦 𖼀𖽑𖽦𖾐 𖼞𖽑𖽶𖾐 𖼍𖽚𖾐 𖼖𖽜 𖼈𖽺𖾐 𖼍𖽪𖾐 𖼖𖽻𖾐 ，𖼖𖽻𖾐 𖼮𖽻 𖽃𖽔𖾐 𖼮𖽡𖽦𖾐 𖼊𖽑𖽺 𖼊𖽝 𖼺𖽺𖾑，𖼖𖽻𖾐 𖼮𖽻 𖽃𖽔𖾐 𖼮𖽡𖽦𖾐 𖼄𖽳𖾑 𖼄𖽳 𖼺𖽶 𖼀𖽑𖽢 𖼦𖽑𖽻𖾐． 21 𖼖𖽻𖾐 𖼮𖽻 𖼞𖽑𖽶𖾐 𖼣𖽙𖾑 𖼳𖽶𖾐 𖼞𖽳𖾐 𖼦𖽑𖽻𖾐，𖽃𖽔𖾐 𖼮𖽡𖽦𖾐 𖼮𖽑𖽶 𖼀𖽺 𖼐𖽜𖾐 𖼦𖽑𖽻𖾐，𖽃𖽔𖾐 𖼺𖽺𖾑 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖽃𖽔𖾐 𖼮𖽡𖽦𖾐 𖼊𖽻𖾐 𖼀𖽑𖽢 𖼄𖽔 𖼊𖽙𖾐． 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽑𖽙𖾐 𖼮𖽑𖽡𖾐 𖼊𖽪 𖼺𖽶 𖼍𖽺𖾑 𖼣𖽻𖾐． 22 𖽃𖽦𖾐 𖼰𖽧 𖼠𖽚 𖼞𖽳𖾐 𖼂𖽡𖾐 𖼀𖽑𖽙 𖼖𖽺𖾑 𖼐𖽺 𖼄𖽪𖾐 𖼊𖽪𖾐 𖼻𖽜 𖼦𖽑𖽺𖾑 𖼻𖽻𖾐 𖼂𖽺𖾐，𖼇𖽕 𖼖𖽻 𖼐𖽑𖽧𖾐 𖼠𖽴𖾐 𖼺𖽺𖾑，𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼀𖽦𖾐 𖼺𖽪𖾐 𖼊𖽑𖽺 𖼊𖽻 𖼐𖽙𖾐 𖼄𖽔 𖼦𖽶𖾐，𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼀𖽦𖾐 𖼖𖽙𖾐 𖼺𖽶𖾑． 23 𖼇𖽕 𖼖𖽻 𖼀𖽑𖽚𖾐 𖼈𖽪𖾐 𖼍𖽦 𖼦𖽑𖽺𖾐 𖼞𖽳𖾐 𖼞𖽚 𖼽𖽡𖾐，𖼄𖽡𖽻 𖼦𖽑𖽺𖾑 𖼮𖽨𖾐 𖼖𖽺𖾑 𖼀𖽑𖽨 𖼐𖽑𖽧𖾐 𖼄𖽙𖾐 𖼊𖽑𖽺 𖼄𖽔 𖼍𖽙𖾑． 24 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼽𖽡𖾐 𖼖𖽻𖾐 𖼮𖽻 𖼦𖽜 𖽃𖽔𖾐 𖼮𖽡𖽦𖾐 𖼠𖽢𖾑，𖼊𖽻𖾐 𖼖𖽚𖾐 𖼂𖽚𖾐 𖽃𖽔𖾐 𖼮𖽡𖽦𖾐 𖼰𖽙𖾐． 𖼞𖽪𖾐 𖼮𖽡𖽺𖾐，𖼽𖽻 𖼈𖽳𖾐 𖼖𖽻𖾐 𖼮𖽻 𖽃𖽔𖾐 𖼮𖽡𖽦𖾐 𖼊𖽻𖾐 𖼀𖽑𖽢 𖼄𖽔 𖼊𖽙𖾐．
25 𖼽𖽺𖾐 𖼦𖽴 𖼦𖽫 𖼐𖽑𖽧 𖼖𖽚 𖼖𖽻𖾐 𖼮𖽻 𖼞𖽜 𖼺𖽶 𖼀𖽑𖽢，𖼳𖽶 𖼐𖽑𖽡𖾐 𖼖𖽚．