𖼽𖽺𖾐 𖼦𖽴 𖼦𖽫 𖼞𖽜 𖼮𖽙𖾐 𖼺𖽪𖾐 𖼄𖽢
6
1 𖽃𖽔𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼊𖽑𖽺 𖼊𖽻 𖼞𖽑𖽚，𖼀𖽦𖾐：“𖽃𖽔𖾑 𖼄𖽳𖾐 𖼐𖽑𖽡𖾐 𖼷𖽑𖽜𖾑 𖼷𖽑𖽜𖾐 𖼄𖽡𖽻𖾐 𖼊𖽻𖾐，𖼣𖽙𖾐 𖽂𖽙 𖼐𖽑𖽡𖾐 𖽂𖽙 𖼖𖽕𖾐 𖼻𖽜 𖼺𖽺𖾑，𖼇𖽕 𖼖𖽻𖾐 𖼷𖽑𖽜𖾑 𖼷𖽑𖽜𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽜 𖼺𖽜 𖼽𖽡𖾐 𖼊𖽻𖾐，𖼦𖽑𖽔𖾐 𖼖𖽺𖾑 𖼠𖽻𖾐 𖼄𖽺 𖼄𖽙𖾐 𖼽𖽻 𖼈𖽳𖾐 𖼊𖽑𖽺 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼞𖽕 𖼊𖽑𖽧 𖼽𖽡𖾐 𖼊𖽻𖾐．”2 𖽂𖽙 𖼺𖽙𖾐 𖼂𖽙𖾐 𖼄𖽚 𖼳𖽡𖾐 𖼖𖽙𖾐 𖼀𖽦𖾐 𖼊𖽑𖽧：“𖼣𖽙𖾐 𖼽𖽺𖾐 𖼦𖽴 𖼦𖽫 𖼣𖽻𖾐． 3 𖼣𖽙𖾐 𖽃𖽙𖾑 𖼄𖽺 𖼊𖽑𖽙 𖼊𖽚𖾐 𖼊𖽑𖽧 𖼖𖽻𖾐 𖼽𖽕𖾑 𖼂𖽚 𖼖𖽔𖾐 𖼦𖽕、 𖼽𖽡 𖼺𖽔 𖼐𖽺𖾐 𖼽𖽔 𖼠𖽴𖾑 𖼞𖽜 𖼄𖽡𖽻𖾐 𖼠𖽚，𖼣𖽙𖾐 𖼦𖽑𖽺𖾑 𖼞𖽑𖽙𖾐 𖼣𖽻𖾐 𖼳𖽶 𖼂𖽺𖾐 𖼠𖽸𖾑 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐，𖼞𖽑𖽶𖾑 𖼽𖽻 𖼈𖽳𖾐 𖼺𖽝𖾑 𖼍𖽳𖾐． 𖼦𖽑𖽻𖾐 𖼊𖽑𖽻𖾐，𖼣𖽙𖾐 𖼊𖽑𖽺 𖼽𖽺𖾐 𖼦𖽴 𖼦𖽫 𖼄𖽡𖾐 𖼦𖽑𖽺𖾑 𖼽𖽻 𖼈𖽳𖾐 𖼖𖽙𖾐 𖼄𖽔 𖼀𖽦𖾐 𖼊𖽑𖽧． 4 𖼣𖽙𖾐 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼺𖽺𖾑，𖼽𖽻 𖼈𖽳𖾐 𖼞𖽑𖽙𖾐 𖼣𖽙𖾑 𖼮𖽻𖾐 𖼞𖽳𖾐 𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐，𖼦𖽑𖽺𖾑 𖼖𖽪 𖼽𖽻 𖼈𖽳𖾐 𖼊𖽑𖽺 𖼞𖽜 𖼊𖽻𖾐． 5 𖼣𖽙𖾐 𖼹𖽦𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐，𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼖𖽦 𖼠𖽻𖾐 𖼞𖽑𖽶𖾐 𖼠𖽻𖾐 𖼰𖽡𖽳𖾐 𖼞𖽳𖾐 𖼷𖽳𖾑 𖼮𖽑𖽡𖽪 𖼊𖽻 𖼮𖽨 𖼦𖽑𖽻𖾐． 𖼣𖽙𖾐 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼠𖽚 𖼺𖽪𖾐 𖼊𖽑𖽺 𖼦𖽙𖾑 𖼮𖽑𖽡 𖼍𖽪𖾐 𖼖𖽻𖾐．
6 𖽃𖽔𖾐 𖼺𖽺𖾑，𖼐𖽑𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽦𖾐 𖼊𖽑𖽧：‘ 𖼣𖽙𖾐 𖼽𖽺𖾐 𖼦𖽴 𖼦𖽫 𖼣𖽻𖾐，𖼐𖽑𖽡𖾐 𖼈𖽳𖾐 𖼊𖽑𖽺 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼖𖽦 𖽂𖽚 𖼞𖽑𖽶𖾐 𖼮𖽑𖽻𖾐 𖼰𖽨𖾑 𖼊𖽑𖽧 𖼖𖽻𖾐 𖼺𖽺𖾑，𖼽𖽻 𖼈𖽳𖾐 𖼞𖽳𖾐 𖼮𖽜𖾐 𖼀𖽑𖽙 𖼄𖽔 𖼂𖽺𖾐 𖼊𖽻𖾐． 𖼣𖽙𖾐 𖽂𖽙 𖼐𖽑𖽡𖾐 𖼖𖽦 𖼂𖽪𖾑 𖼻𖽜，𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼞𖽜 𖼈𖽡𖾑 𖼞𖽑𖽙 𖼈𖽳 𖼷𖽶𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼊𖽑𖽺 𖼰𖽨𖾑 𖼊𖽑𖽧 𖼖𖽻𖾐 𖼊𖽻𖾐． 7 𖼣𖽙𖾐 𖼐𖽑𖽡𖾐 𖼈𖽳𖾐 𖼞𖽜 𖼣𖽙𖾐 𖼞𖽳𖾐 𖼷𖽑𖽻𖾐 𖼀𖽺 𖼂𖽺𖾐，𖼣𖽙𖾐 𖼖𖽺𖾑 𖼐𖽑𖽡𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼂𖽺𖾐 𖼊𖽻𖾐． 𖼐𖽑𖽡𖾐 𖼈𖽳𖾐 𖼺𖽝𖾑 𖼖𖽡𖾐，𖼣𖽙𖾐 𖼦𖽑𖽺𖾑 𖼐𖽑𖽡𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼣𖽻𖾐，𖼐𖽑𖽡𖾐 𖼈𖽳𖾐 𖼊𖽑𖽺 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼖𖽦 𖽂𖽚 𖼞𖽑𖽶𖾐 𖼮𖽑𖽻𖾐 𖼰𖽨𖾑 𖼊𖽑𖽧 𖼖𖽻𖾐． 8 𖼣𖽙𖾐 𖼄𖽳𖾐 𖼷𖽑𖽦𖾐 𖼺𖽺𖾑 𖼽𖽕𖾑 𖼂𖽚 𖼖𖽔𖾐 𖼦𖽕、 𖼽𖽡 𖼺𖽔 𖼐𖽺𖾐 𖼽𖽔 𖼠𖽴𖾑 𖼊𖽑𖽺 𖼞𖽜 𖼮𖽙𖾐 𖼞𖽳𖾐 𖼄𖽡𖾐 𖼊𖽺𖾐，𖼣𖽙𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼦𖽳 𖼞𖽑𖽶𖾑 𖼠𖽻𖾐 𖼽𖽡𖾐，𖼞𖽑𖽶𖾑 𖼄𖽡𖾐 𖼊𖽺𖾐 𖼖𖽪 𖼐𖽑𖽡𖾐 𖼈𖽳𖾐 𖼞𖽜 𖼄𖽡𖾐 𖼳𖽡𖽪 𖼂𖽺𖾐 𖼊𖽻𖾐． 𖼣𖽙𖾐 𖼽𖽺𖾐 𖼦𖽕 𖼦𖽫 𖼣𖽻𖾐．’”
9 𖼊𖽻 𖼂𖽪𖾑 𖼦𖽑𖽺𖾑 𖼹𖽻𖾐 𖼄𖽚 𖼳𖽡𖾐 𖼀𖽦𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼰𖽨𖾐． 𖼦𖽑𖽻𖾐 𖼊𖽑𖽻𖾐，𖼽𖽻 𖼈𖽳𖾐 𖼄𖽡𖽻 𖼄𖽪𖾐 𖼳𖽚𖾑 𖼞𖽑𖽪，𖼐𖽑𖽧𖾐 𖼄𖽙𖾐 𖼮𖽑𖽧𖾐 𖼞𖽪 𖼺𖽺𖾑，𖼽𖽻 𖼊𖽻 𖼂𖽪𖾑 𖼊𖽑𖽺 𖼊𖽻 𖼮𖽶𖾐 𖼄𖽔 𖼦𖽶𖾐．
10 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼊𖽑𖽺 𖼀𖽦𖾐 𖼊𖽑𖽧： 11 “𖼐𖽑𖽡𖾐 𖼽𖽡𖾐 𖽃𖽦𖾐 𖼰𖽧 𖼠𖽚 𖼞𖽳𖾐 𖼈𖽪𖾐 𖼍𖽦 𖼇𖽕 𖼖𖽻 𖼊𖽑𖽺 𖼀𖽦𖾐 𖼊𖽑𖽧 𖼖𖽡𖾐，𖼽𖽻 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽜 𖼽𖽻 𖼞𖽳𖾐 𖼄𖽡𖾐 𖼊𖽺𖾐 𖼮𖽑𖽻𖾐 𖼰𖽡𖾑 𖼦𖽑𖽙𖾐 𖼖𖽡𖾐．”
12 𖼄𖽚 𖼳𖽡𖾐 𖼽𖽺𖾐 𖼦𖽴 𖼦𖽫 𖼖𖽙𖾐 𖼀𖽦𖾐：“𖼐𖽦𖾐 𖼄𖽺! 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽺𖾑 𖼣𖽙𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼮𖽶𖾐 𖼄𖽔 𖼦𖽶𖾐 𖼺𖽺𖾑，𖼇𖽕 𖼖𖽻 𖽃𖽔𖾐 𖼹𖽻𖾐 𖼣𖽙𖾐 𖼊𖽻 𖼂𖽪𖾑 𖼊𖽻 𖼐𖽙𖾐 𖼦𖽶𖾐 𖼐𖽺𖾑？ 𖼞𖽪𖾐 𖼮𖽡𖽺𖾐，𖼣𖽙𖾐 𖼦𖽑𖽺𖾑 𖼄𖽡 𖼮𖽑𖽶 𖼞𖽪 𖼐𖽑𖽡𖽪𖾑 𖼺𖽪𖾐 𖼷𖽑𖽻𖾐 𖼣𖽻𖾐．”
13 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼊𖽑𖽺 𖼄𖽪𖾑 𖼍𖽴𖾑，𖼽𖽻 𖼈𖽳𖾐 𖼞𖽜 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼐𖽺𖾐 𖼇𖽕 𖼖𖽻 𖼞𖽳𖾐 𖼞𖽑𖽶𖾑 𖼠𖽻𖾐 𖼽𖽡𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼦𖽳 𖼊𖽚𖾐 𖼖𖽻𖾐 𖼖𖽡𖾐．
𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼞𖽳𖾐 𖼈𖽴 𖼮𖽑𖽪𖾐 𖼷𖽑𖽻𖾐
14 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼽𖽻 𖼄𖽳𖾑 𖼈𖽴 𖼮𖽑𖽪𖾐 𖼞𖽳𖾐 𖼈𖽪𖾑 𖼷𖽪𖾐 𖼄𖽡𖾐 𖼈𖽝 𖼍𖽕𖾑 𖽂𖽚 𖼍𖽙𖾑．
𖼽𖽡 𖼺𖽴𖾑 𖼖𖽡𖽦𖾑 𖼞𖽳𖾐 𖼻𖽙 𖼈𖽳 𖼖𖽡𖽚 𖼂𖽡𖽦𖾑 𖼞𖽳𖾐 𖼻𖽙，𖼞𖽑𖽶𖾑 𖼦𖽔𖾐 𖼐𖽚𖾑、 𖼇𖽕 𖼖𖽪𖾑、 𖼳𖽡𖾐 𖼺𖽶𖾐 𖼖𖽪𖽦、 𖼰𖽔𖾐 𖼄𖽡 𖼣𖽻𖾐，𖼦𖽑𖽺𖾑 𖼹𖽻𖾐 𖼖𖽡𖽚 𖼂𖽡𖽦𖾑 𖼮𖽑𖽪𖾐 𖼳𖽶 𖼞𖽳𖾐 𖼈𖽴 𖼮𖽑𖽪𖾐 𖼈𖽪𖾑 𖼷𖽪𖾐 𖼣𖽻𖾐．
15 𖼳𖽡𖾐 𖼄𖽡𖽺 𖼞𖽳𖾐 𖼻𖽙，𖼞𖽑𖽶𖾑 𖼽𖽺𖾐 𖼄𖽪 𖼖𖽡𖾑、 𖼽𖽔 𖼄𖽡𖽺、 𖽃𖽔𖾐 𖼳𖽡𖽕、 𖼽𖽔 𖼰𖽡𖽺𖾐、 𖼺𖽙 𖼳𖽡𖽕 𖼐𖽺𖾐 𖼺𖽻 𖼖𖽚 𖼣𖽻𖾐 ( 𖼺𖽻 𖼖𖽚 𖼽𖽻 𖼄𖽙𖾐 𖼦𖽑𖽺𖾑 𖼰𖽡𖽔𖾐𖼐𖽕 𖼺𖽪𖾐 𖼻𖽙 𖼄𖽳 𖼣𖽻𖾐)，𖼦𖽑𖽺𖾑 𖼹𖽻𖾐 𖼳𖽡𖾐 𖼄𖽡𖽺 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼈𖽴 𖼮𖽑𖽪𖾐 𖼈𖽪𖾑 𖼷𖽪𖾐 𖼣𖽻𖾐．
16 𖼖𖽡𖾑 𖼈𖽪𖽺𖾑 𖼞𖽳𖾐 𖼻𖽙 𖼈𖽴 𖼮𖽑𖽪𖾐 𖼈𖽪𖾑 𖼷𖽪𖾐 𖼂𖽺𖾐 𖼺𖽪𖾐，𖼞𖽑𖽶𖾑 𖼠𖽴 𖼳𖽱𖾑、 𖼠𖽜𖾐 𖼳𖽡𖽕、 𖼄𖽡 𖼖𖽔𖾐 𖼖𖽡𖾑 𖼣𖽻𖾐，𖼖𖽡𖾑 𖼈𖽪𖽺𖾑 𖼊𖽑𖽡 𖼦𖽑𖽙𖾐 𖼺𖽙𖾐 𖼷𖽑𖽡𖾐 𖼳𖽶 𖼞𖽑𖽚 𖽂𖽙𖾐 𖼮𖽻𖾐．
17 𖼠𖽴 𖼳𖽱𖾑 𖼞𖽳𖾐 𖼻𖽙，𖼈𖽴 𖼮𖽑𖽪𖾐 𖼈𖽪𖾑 𖼷𖽪𖾐 𖼂𖽺𖾐 𖼺𖽪𖾐，𖼞𖽑𖽶𖾑𖼖𖽧𖾑 𖼐𖽑𖽧 𖼐𖽺𖾐 𖼳𖽶𖾑 𖼄𖽺 𖼣𖽻𖾐．
18 𖼠𖽜𖾐 𖼳𖽡𖽕 𖼞𖽳𖾐 𖼻𖽙，𖼈𖽴 𖼮𖽑𖽪𖾐 𖼈𖽪𖾑 𖼷𖽪𖾐 𖼂𖽺𖾐 𖼺𖽪𖾐，𖼞𖽑𖽶𖾑 𖽃𖽗𖾑 𖼖𖽕、 𖼽𖽡 𖼺𖽶𖾐 𖼦𖽔𖾐、 𖼳𖽡𖾐 𖼂𖽚 𖼖𖽪𖽦 𖼐𖽺𖾐 𖼈𖽪𖾐 𖼳𖽡𖽱𖾐 𖼣𖽻𖾐，𖼠𖽜𖾐 𖼳𖽡𖽕 𖼊𖽑𖽡 𖼦𖽑𖽙𖾐 𖼺𖽙𖾐 𖼷𖽑𖽡𖾐 𖼺𖽙𖾐 𖼞𖽑𖽚 𖽂𖽙𖾐 𖼮𖽻𖾐．
19 𖼄𖽡 𖼖𖽔𖾐 𖼖𖽡𖾑 𖼞𖽳𖾐 𖼻𖽙，𖼈𖽴 𖼮𖽑𖽪𖾐 𖼈𖽪𖾑 𖼷𖽪𖾐 𖼂𖽺𖾐 𖼺𖽪𖾐，𖼞𖽑𖽶𖾑 𖼄𖽚 𖼖𖽡𖾑 𖼐𖽺𖾐 𖼄𖽪 𖼳𖽶𖾑 𖼣𖽻𖾐，
𖼦𖽑𖽺𖾑 𖼹𖽻𖾐 𖼖𖽡𖾑 𖼈𖽪𖽺𖾑 𖼞𖽳𖾐 𖼈𖽴 𖼮𖽑𖽪𖾐 𖼷𖽑𖽻𖾐 𖼣𖽻𖾐．
20 𖽃𖽗𖾑 𖼖𖽕 𖼄𖽳 𖼻𖽙 𖼽𖽱𖾐 𖼰𖽡𖾐 𖼂𖽡𖽦 𖼦𖽑𖽺𖾑 𖼽𖽻 𖼀𖽙 𖼞𖽳𖾐 𖼐𖽜𖾑 𖼄𖽙𖾐 𖼣𖽻𖾐，𖼽𖽱𖾐 𖼰𖽡𖾐 𖼂𖽡𖽦 𖼞𖽳𖾐 𖼻𖽙，𖼞𖽑𖽶𖾑 𖼽𖽕𖾑 𖼖𖽪𖽦 𖼐𖽺𖾐 𖼄𖽚 𖼳𖽡𖾐 𖼣𖽻𖾐，𖽃𖽗𖾑 𖼖𖽕 𖼊𖽑𖽡 𖼦𖽑𖽙𖾐 𖼺𖽙𖾐 𖼷𖽑𖽡𖾐 𖼳𖽶 𖼞𖽑𖽚 𖽂𖽙𖾐 𖼮𖽻𖾐．
21 𖼽𖽡 𖼺𖽶𖾐 𖼦𖽔𖾐 𖼞𖽳𖾐 𖼻𖽙，𖼞𖽑𖽶𖾑 𖼞𖽑𖽜 𖼖𖽔𖾐、 𖼐𖽑𖽧 𖼇𖽺 𖼐𖽺𖾐 𖼳𖽡𖾑 𖼰𖽡𖾐 𖼖𖽡𖾑 𖼣𖽻𖾐．
22 𖼈𖽪𖾐 𖼳𖽡𖽱𖾐 𖼞𖽳𖾐 𖼻𖽙，𖼞𖽑𖽶𖾑 𖼄𖽡 𖼳𖽔𖾐 𖼖𖽡𖾑、 𖼽𖽡 𖼖𖽡𖾑 𖼺𖽕𖾑 𖼇𖽕 𖼐𖽺𖾐 𖼳𖽡𖾐 𖼊𖽑𖽧 𖼖𖽡𖾑 𖼣𖽻𖾐．
23 𖼽𖽕𖾑 𖼖𖽪𖽦 𖼄𖽳 𖼻𖽙 𖼽𖽡 𖼖𖽡𖾑 𖼳𖽔𖾐 𖼂𖽔𖾐 ，𖼞𖽑𖽶𖾑 𖼽𖽕𖾑 𖼄𖽡 𖼐𖽕 𖼍𖽕 𖼞𖽳𖾐 𖼻𖽙 𖼄𖽳，𖼐𖽕 𖼳𖽱𖾑 𖼞𖽳𖾐 𖼐𖽜𖾑 𖼄𖽙𖾐 𖼣𖽻𖾐． 𖼽𖽻 𖼽𖽕𖾑 𖼖𖽪𖽦 𖼖𖽙𖾐 𖼮𖽑𖽻𖾐 𖼽𖽚𖾐 𖼺𖽪𖾐 𖼻𖽙，𖼞𖽑𖽶𖾑 𖼐𖽕 𖼍𖽕、 𖼽𖽕𖾑 𖼂𖽡 𖼦𖽪𖾑、 𖼽𖽡 𖼖𖽡𖾑 𖼽𖽕𖾑 𖼺𖽔 𖼐𖽺𖾐 𖼽𖽡 𖼊𖽑𖽔𖾐 𖼄𖽔 𖼣𖽻𖾐．
24 𖼞𖽑𖽜 𖼖𖽔𖾐 𖼞𖽳𖾐 𖼻𖽙，𖼞𖽑𖽶𖾑 𖼽𖽕𖾑 𖼳𖽧𖾐、 𖼽𖽡 𖼖𖽡𖾑 𖼰𖽔𖾐 𖼐𖽕 𖼐𖽺𖾐 𖼽𖽕𖾑 𖼂𖽡 𖼽𖽕𖾑 𖼺𖽔 𖼣𖽻𖾐． 𖼦𖽑𖽺𖾑 𖼹𖽻𖾐 𖼞𖽑𖽜 𖼖𖽔 𖼈𖽴 𖼮𖽑𖽪𖾐 𖼞𖽳𖾐 𖼷𖽑𖽻𖾐 𖼣𖽻𖾐．
25 𖼽𖽕𖾑 𖼖𖽪𖽦 𖼞𖽳𖾐 𖼻𖽙 𖼽𖽡 𖼖𖽡𖾑 𖼽𖽕𖾑 𖼺𖽔 ，𖼽𖽻 𖼄𖽳 𖼻𖽙 𖼞𖽑𖽶𖾑 𖼀𖽑𖽪 𖼊𖽑𖽧 𖼞𖽳𖾐 𖼻𖽙 𖼄𖽳 𖼣𖽻𖾐，𖼽𖽻 𖼽𖽡 𖼖𖽡𖾑 𖼽𖽕𖾑 𖼺𖽔 𖼖𖽙𖾐 𖼮𖽑𖽻𖾐 𖼽𖽚𖾐 𖼺𖽪𖾐 𖼻𖽙，𖼞𖽑𖽶𖾑 𖼇𖽺𖾐 𖼐𖽑𖽧 𖼦𖽔𖾐 𖼣𖽻𖾐．
𖼦𖽑𖽺𖾑 𖼹𖽻𖾐 𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼈𖽴 𖼮𖽑𖽪𖾐 𖼈𖽪𖾑 𖼷𖽪𖾐 𖼣𖽻𖾐．
26 𖼽𖽺𖾐 𖼦𖽴 𖼦𖽫 𖼽𖽕𖾑 𖼖𖽪𖽦 𖼐𖽺𖾐 𖼄𖽚 𖼳𖽡𖾐 𖼖𖽙𖾐 𖼮𖽑𖽻𖾐 𖼀𖽦𖾐 𖼠𖽚：“𖼐𖽑𖽡𖾐 𖼈𖽳𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼄𖽦 𖼀𖽑𖽙 𖼷𖽪𖾐 𖼖𖽙𖾐 𖼺𖽶𖾑，𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼦𖽳 𖼊𖽚𖾐 𖼖𖽻𖾐 𖼖𖽡𖾐．” 27 𖼞𖽑𖽻𖾑 𖽃𖽦𖾐 𖼰𖽧 𖼠𖽚 𖼞𖽳𖾐 𖼈𖽪𖾐 𖼍𖽦 𖼖𖽙𖾐 𖼮𖽑𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼊𖽚𖾐 𖼖𖽻𖾐 𖼖𖽡𖾐 𖼀𖽦𖾐 𖼺𖽪𖾐 𖼞𖽑𖽶𖾑 𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼣𖽻𖾐．
𖽂𖽙 𖼺𖽙𖾐 𖼂𖽙𖾐 𖼹𖽦𖾑 𖼊𖽑𖽡 𖼂𖽦𖾑 𖼄𖽚 𖼳𖽡𖾐 𖼐𖽺𖾐𖼽𖽕𖾑 𖼖𖽪𖽦 𖼊𖽑𖽺 𖼄𖽪𖾑 𖼍𖽴𖾑
28 𖼽𖽺𖾐 𖼦𖽴 𖼦𖽫 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽳𖾐 𖼄𖽚 𖼳𖽡𖾐 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐 𖼞𖽑𖽶𖾑 𖼮𖽶𖾐， 29 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼣𖽙𖾐 𖼽𖽺𖾐 𖼦𖽴 𖼦𖽫 𖼣𖽻𖾐，𖼣𖽙𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼞𖽑𖽙𖾐 𖼊𖽑𖽜𖾐 𖼺𖽪𖾐 𖼊𖽻 𖼂𖽪𖾑，𖼐𖽑𖽡𖾐 𖼄𖽳𖾑 𖼄𖽳𖾐 𖼀𖽦𖾐 𖽃𖽦𖾐 𖼰𖽧 𖼠𖽚 𖼈𖽪𖾐 𖼍𖽦 𖼊𖽑𖽺 𖼰𖽨𖾐 𖼖𖽡𖾐．” 30 𖼄𖽚 𖼳𖽡𖾐 𖼽𖽺𖾐 𖼦𖽴 𖼦𖽫 𖼖𖽙𖾐 𖼀𖽦𖾐：“𖼐𖽦𖾐 𖼄𖽺! 𖼣𖽙𖾐 𖼦𖽑𖽺𖾑 𖼄𖽡 𖼮𖽑𖽶 𖼞𖽪 𖼐𖽑𖽡𖽪𖾑 𖼺𖽪𖾐 𖼊𖽑𖽡 𖼽𖽚𖾐 𖼣𖽻𖾐，𖼇𖽕 𖼖𖽻 𖽃𖽔𖾐 𖼹𖽻𖾐 𖼣𖽙𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐 𖼦𖽶𖾐 𖼐𖽺𖾑？”