𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼽𖽡𖾐 𖼇𖽕 𖼖𖽻 𖼊𖽑𖽺 𖼄𖽡𖽻𖾐
5
1 𖼠𖽙𖾑 𖼍𖽻𖾐，𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼽𖽡𖾐 𖼇𖽕 𖼖𖽻 𖼖𖽙𖾐 𖼀𖽦𖾐：“𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫𖼦𖽑𖽺𖾑 𖼻𖽻𖾐 𖼀𖽦𖾐：‘ 𖼣𖽙𖾐 𖼞𖽳𖾐 𖼷𖽑𖽻𖾐𖼀𖽺 𖼞𖽜 𖼦𖽑𖽺𖾑 𖼠𖽻𖾐 𖼰𖽡𖾑 𖼦𖽑𖽙𖾐，𖼽𖽻 𖼈𖽳𖾐 𖼞𖽜 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼽𖽡𖾐 𖼣𖽙𖾐 𖼊𖽑𖽺 𖼍𖽡𖾐 𖼊𖽑𖽴 𖼞𖽳𖾐 𖼻𖽦 𖼐𖽑𖽡𖾐 𖼳𖽪𖾐 𖼖𖽡𖾐．’”2 𖼇𖽕 𖼖𖽻 𖼊𖽻 𖼞𖽑𖽚：“𖼽𖽺𖾐 𖼦𖽴 𖼦𖽫 𖼞𖽑𖽶𖾑 𖽃𖽔 𖼺𖽺 𖼣𖽻𖾐，𖼣𖽙𖾐 𖼞𖽜 𖼽𖽻 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽜 𖼦𖽑𖽺𖾑 𖼠𖽻𖾐 𖼰𖽡𖾑 𖼦𖽑𖽙𖾐 𖼐𖽺𖾑？ 𖼣𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼄𖽔 𖼺𖽝𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽜 𖽂𖽙𖾐 𖼽𖽡𖾐 𖼄𖽔 𖼊𖽙𖾐．”
3 𖼽𖽻 𖼈𖽳𖾐 𖼀𖽦𖾐：“𖼳𖽡𖾐 𖼂𖽚 𖼖𖽦 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼣𖽙𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐． 𖼣𖽙𖾐 𖼈𖽳𖾐 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼣𖽙𖾐 𖼈𖽳𖾐 𖼞𖽜 𖼺𖽙𖾐 𖼐𖽑𖽡𖾐 𖼮𖽨𖾐 𖼄𖽙𖾐 𖼺𖽜 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼽𖽡𖾐，𖼍𖽡𖾐 𖼊𖽪𖾐 𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼣𖽙𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼍𖽡𖾐 𖼊𖽙𖾐． 𖼄𖽔 𖼣𖽻𖾐 𖼊𖽑𖽡𖾑 𖼣𖽻𖾐，𖽂𖽙 𖼺𖽙𖾐 𖼂𖽙𖾐 𖼐𖽙𖾐 𖼊𖽡𖾐 𖼐𖽺𖾐 𖽃𖽔𖾑 𖼊𖽑𖽙 𖼻𖽜 𖼣𖽙𖾐 𖼈𖽳𖾐 𖼞𖽜 𖼈𖽡𖾑 𖼞𖽑𖽙 𖼷𖽶𖾐 𖼊𖽻𖾐．”
4 𖽃𖽦𖾐 𖼰𖽧 𖼠𖽚 𖼞𖽳𖾐 𖼈𖽪𖾐 𖼍𖽦 𖼇𖽕 𖼖𖽻 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼄𖽚 𖼳𖽡𖾐、 𖼽𖽕𖾑 𖼖𖽪𖽦 ，𖼐𖽑𖽡𖾐 𖼈𖽳𖾐 𖽃𖽔𖾐 𖼹𖽻𖾐 𖼷𖽑𖽻𖾐 𖼀𖽺 𖼞𖽜 𖼀𖽝𖾐 𖼽𖽚𖾐 𖼺𖽺𖾑，𖼄𖽡𖽻 𖼄𖽔 𖼄𖽪𖾐 𖼐𖽺𖾑？ 𖼽𖽡𖾐! 𖼐𖽑𖽡𖾐 𖼈𖽳𖾐 𖼄𖽡𖽻 𖼄𖽪𖾐 𖼽𖽡𖾐．” 5 𖼇𖽕 𖼖𖽻 𖼦𖽑𖽔𖾐 𖼖𖽺𖾑 𖼀𖽦𖾐：“𖼐𖽦𖾐 𖼄𖽺! 𖽃𖽔𖾑 𖼄𖽳𖾐 𖼦𖽑𖽺𖾑 𖼄𖽡𖾐 𖼊𖽺𖾐 𖼐𖽑𖽡𖾐 𖼈𖽳𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼦𖽑𖽔𖾐 𖼮𖽶𖾐 𖼄𖽨，𖼐𖽑𖽡𖾐 𖼈𖽳𖾐 𖽃𖽔𖾐 𖼹𖽻𖾐 𖼽𖽻 𖼈𖽳𖾐 𖼊𖽑𖽺 𖼀𖽦𖾐 𖼺𖽺𖾑，𖼄𖽡𖽻 𖼀𖽑𖽨 𖼐𖽙 𖼦𖽑𖽙𖾐 𖼐𖽺𖾑．”
6 𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼇𖽕 𖼖𖽻 𖼞𖽑𖽻𖾑 𖼷𖽑𖽻𖾐 𖼀𖽺 𖼞𖽳𖾐 𖽂𖽙 𖼠𖽕 𖼺𖽪𖾐 𖼐𖽺𖾐 𖼈𖽪𖾑 𖼷𖽪𖾐 𖼊𖽑𖽺 𖼄𖽪𖾑 𖼍𖽴𖾑： 7 “𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼐𖽑𖽡𖾑 𖼰𖽡𖽺𖾐 𖼦𖽜𖾐 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼈𖽳𖾐 𖼹𖽦𖾑 𖽃𖽙𖾑 𖼄𖽺 𖼖𖽙𖾐 𖼺𖽶𖾑 𖼳𖽶𖾑 𖼀𖽺 𖽂𖽙𖾐 𖼞𖽜 𖼄𖽔 𖼊𖽙𖾐，𖼽𖽻 𖼈𖽳𖾐 𖼞𖽜 𖼽𖽻 𖼄𖽳𖾑 𖼷𖽺𖾐 𖼳𖽶𖾑 𖼀𖽺 𖼰𖽙𖾐 𖼽𖽡𖾐 𖼍𖽳𖾐． 8 𖼽𖽻 𖼈𖽳𖾐 𖽃𖽙𖾑 𖼄𖽺 𖼞𖽑𖽙 𖼄𖽙𖾐 𖼦𖽜𖾐 𖼊𖽚𖾐 𖼖𖽻𖾐，𖽃𖽔𖾑 𖼄𖽳𖾐 𖼖𖽺𖾑 𖼽𖽻 𖼈𖽳𖾐 𖼞𖽜 𖼞𖽑𖽙 𖼄𖽙𖾐 𖼦𖽜𖾐 𖼖𖽡𖾐，𖼊𖽑𖽡 𖼀𖽧𖾑 𖼖𖽺𖾑 𖽂𖽙𖾐 𖼣𖽻𖾐 𖼐𖽑𖽡𖽪𖾑 𖼄𖽔 𖼊𖽙𖾐． 𖼞𖽪𖾐 𖼮𖽡𖽺𖾐，𖼽𖽻 𖼈𖽳𖾐 𖼷𖽑𖽻𖾐 𖼀𖽝𖾐 𖼽𖽚𖾐 𖼣𖽻𖾐 𖼺𖽺𖾑，𖽃𖽶𖾐 𖼮𖽸 𖼀𖽦𖾐：‘ 𖼣𖽙𖾐 𖼈𖽳𖾐 𖼞𖽜 𖼽𖽡𖾐 𖼣𖽙𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼍𖽡𖾐 𖼊𖽑𖽴 𖼄𖽶𖾑 𖼞𖽜．’ 9 𖼐𖽑𖽡𖾐 𖼈𖽳𖾐 𖽃𖽙𖾑 𖼄𖽺 𖼦𖽶𖾑 𖼄𖽔 𖼷𖽑𖽶𖾐 𖼖𖽡 𖼺𖽪𖾐 𖼄𖽡𖽻 𖼀𖽑𖽨 𖼽𖽻 𖼈𖽳𖾐 𖼞𖽜 𖼄𖽪𖾐 𖼖𖽡𖾐，𖼽𖽻 𖼈𖽳𖾐 𖼞𖽜 𖽂𖽙 𖼊𖽑𖽧 𖼄𖽪𖾐 𖼺𖽺𖾑，𖼇𖽪 𖼊𖽻 𖼊𖽑𖽺 𖼊𖽑𖽔 𖼊𖽻 𖼐𖽙𖾐 𖼍𖽳𖾐．”
𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼠𖽳𖾐 𖼠𖽳𖾐 𖼮𖽑𖽡𖾐 𖼻𖽸
10 𖼷𖽑𖽻𖾐 𖼀𖽺 𖼞𖽳𖾐 𖽂𖽙 𖼠𖽕 𖼺𖽪𖾐 𖼐𖽺𖾐 𖼈𖽪𖾑 𖼷𖽪𖾐 𖼊𖽚𖾐 𖼖𖽻𖾐，𖼷𖽑𖽻𖾐 𖼀𖽺 𖼖𖽙𖾐 𖼀𖽦𖾐 𖼊𖽑𖽧：“𖼇𖽕 𖼖𖽻 𖼦𖽑𖽺𖾑 𖼻𖽻𖾐 𖼀𖽦𖾐：‘ 𖼣𖽙𖾐 𖼹𖽦𖾑 𖼳𖽶𖾑 𖼀𖽺 𖼐𖽑𖽡𖾐 𖼈𖽳𖾐 𖼊𖽑𖽺 𖼄𖽔 𖼞𖽜 𖼊𖽻𖾐． 11 𖼐𖽑𖽡𖾐 𖼈𖽳𖾐 𖼽𖽻 𖼄𖽳𖾑 𖼷𖽺𖾐 𖽃𖽔 𖼊𖽺𖾑 𖼠𖽻𖾐 𖼳𖽶𖾑 𖼀𖽺 𖼰𖽙𖾐 𖽂𖽙𖾐 𖼊𖽙𖾐，𖽃𖽔 𖼊𖽺𖾑 𖼠𖽻𖾐 𖼰𖽙𖾐 𖼽𖽡𖾐 𖼮𖽑𖽳𖾐． 𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼈𖽳𖾐 𖼄𖽪𖾐 𖼖𖽡𖾐 𖼺𖽪𖾐 𖼊𖽑𖽡 𖼀𖽧𖾑 𖼖𖽺𖾑 𖽂𖽙𖾐 𖼣𖽻𖾐 𖼐𖽑𖽡𖽪𖾑 𖼄𖽔 𖼊𖽙𖾐．’” 12 𖽃𖽔𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼀𖽜𖾐 𖼀𖽺 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽑𖽙𖾐 𖼮𖽑𖽡𖾐 𖼊𖽪 𖼽𖽡𖾐，𖼂𖽴𖾑 𖼰𖽙𖾐 𖼺𖽺𖾑 𖼳𖽶𖾑 𖼀𖽺 𖼂𖽺𖾐．
13 𖽂𖽙 𖼠𖽕 𖼺𖽪𖾐 𖼽𖽻 𖼈𖽳𖾐 𖼊𖽑𖽺 𖼀𖽦𖾐：“𖽃𖽙𖾑 𖼄𖽺 𖼊𖽑𖽙 𖼐𖽑𖽡𖾐 𖼈𖽳𖾐 𖼊𖽑𖽺 𖼳𖽶𖾑 𖼀𖽺 𖼞𖽜 𖼞𖽑𖽶𖾑 𖼖𖽙𖾐 𖼺𖽶𖾑，𖼊𖽑𖽡 𖼐𖽑𖽡𖾐 𖼞𖽳𖾐 𖼄𖽡𖽻 𖼊𖽑𖽡 𖼐𖽑𖽡𖾐 𖼄𖽪𖾐 𖼦𖽑𖽻𖾐 𖼖𖽡𖾐．” 14 𖼇𖽕 𖼖𖽻 𖼞𖽳𖾐 𖽂𖽙 𖼠𖽕 𖼺𖽪𖾐 𖼞𖽑𖽻𖾑 𖼽𖽻 𖼈𖽳𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼠𖽻𖾐 𖼊𖽑𖽺 𖼮𖽑𖽻𖾐 𖼺𖽺𖾐 𖼊𖽑𖽧 𖼖𖽻𖾐 𖼺𖽪𖾐 𖼈𖽪𖾑 𖼷𖽪𖾐 𖼊𖽑𖽺 𖼊𖽝，𖼀𖽦𖾐：“𖼐𖽑𖽡𖾐 𖼈𖽳𖾐 𖽃𖽔𖾐 𖼹𖽻𖾐 𖼞𖽪𖾐 𖼮𖽡𖽺𖾐 𖽃𖽔 𖼐𖽑𖽡𖾐 𖼐𖽺𖾐 𖽃𖽙𖾑 𖼐𖽑𖽡𖾐，𖽃𖽙𖾑 𖼄𖽺 𖼊𖽑𖽙 𖼖𖽙𖾐 𖼺𖽶𖾑，𖼞𖽑𖽙𖾐 𖼦𖽜𖾐 𖼖𖽡𖾐 𖼺𖽪𖾐 𖼐𖽑𖽡𖾑 𖼰𖽡𖽺𖾐 𖼄𖽔 𖼦𖽜𖾐 𖼊𖽚𖾐 𖼖𖽻𖾐 𖼐𖽺𖾑？”
15 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼈𖽪𖾑 𖼷𖽪𖾐 𖼖𖽻𖾐 𖼇𖽕 𖼖𖽻 𖼊𖽑𖽺 𖼮𖽑𖽡 𖼮𖽡𖽺𖾐，𖼀𖽦𖾐：“𖼈𖽪𖾐 𖼍𖽦 𖽃𖽔𖾐!“𖼐𖽑𖽡𖾐 𖽃𖽔𖾐 𖼹𖽻𖾐 𖼮𖽜𖾐 𖼀𖽑𖽙 𖼊𖽑𖽺 𖼦𖽑𖽺𖾑 𖼻𖽻𖾐 𖼂𖽺𖾐 𖼐𖽺𖾑？ 16 𖽂𖽙 𖼠𖽕 𖼺𖽪𖾐 𖼳𖽶𖾑 𖼀𖽺 𖼐𖽑𖽡𖾐 𖼮𖽜𖾐 𖼀𖽑𖽙 𖼊𖽑𖽺 𖼄𖽔 𖼞𖽜，𖼦𖽑𖽻𖾐 𖼊𖽑𖽻𖾐 𖼽𖽻 𖼈𖽳𖾐 𖼀𖽦𖾐： ‘𖼐𖽑𖽡𖾐 𖼈𖽳𖾐 𖼐𖽑𖽡𖾑 𖼰𖽡𖽺𖾐 𖼦𖽜𖾐 𖼖𖽡𖾐 !’ 𖼐𖽦𖾐 𖼄𖽺! 𖼣𖽙𖾐 𖼈𖽳𖾐 𖼊𖽑𖽺 𖼊𖽝 𖼄𖽳𖾐，𖼦𖽑𖽺𖾑 𖼐𖽑𖽡𖾐 𖼞𖽳𖾐 𖼷𖽑𖽻𖾐 𖼀𖽺 𖼮𖽑𖽢𖾑 𖼮𖽶𖾐 𖼺𖽪𖾐 𖼣𖽻𖾐．”
17 𖼇𖽕 𖼖𖽻 𖼀𖽦𖾐：“𖼐𖽑𖽡𖾐 𖼈𖽳𖾐 𖼠𖽕𖾐 𖼰𖽶𖾐 𖼷𖽑𖽻𖾐 𖼀𖽝𖾐 𖼽𖽚𖾐 𖼣𖽻𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼦𖽑𖽺𖾑 𖼻𖽻𖾐 𖼀𖽦𖾐： ‘𖼣𖽙𖾐 𖼈𖽳𖾐 𖼞𖽜 𖼽𖽡𖾐 𖼍𖽡𖾐 𖼊𖽪𖾐 𖼦𖽑𖽙𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼞𖽜 𖼖𖽡𖾐．’ 18 𖽃𖽔𖾑 𖼄𖽳𖾐 𖼐𖽑𖽡𖾐 𖼈𖽳𖾐 𖼄𖽡𖽻 𖼄𖽪𖾐 𖼽𖽡𖾐 𖼖𖽡𖾐，𖼳𖽶𖾑 𖼀𖽺 𖼐𖽑𖽡𖾐 𖼈𖽳𖾐 𖼊𖽑𖽺 𖼄𖽔 𖼞𖽜． 𖼦𖽑𖽻𖾐 𖼊𖽑𖽻𖾐，𖼞𖽑𖽙𖾐 𖼍𖽧𖾑 𖼺𖽪𖾐 𖼈𖽜𖾐 𖼮𖽑𖽡𖽺 𖼖𖽙𖾐 𖼮𖽑𖽻𖾐 𖼐𖽑𖽡𖾑 𖼰𖽡𖽺𖾐 𖼦𖽜𖾐 𖼀𖽡𖾐 𖼖𖽡𖾐．”
19 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼈𖽪𖾑 𖼷𖽪𖾐 𖼊𖽻 𖼮𖽨，𖼽𖽻 𖼈𖽳𖾐 𖼊𖽑𖽡 𖼐𖽑𖽡𖾐 𖼞𖽑𖽙𖾐 𖼄𖽪𖾐 𖼖𖽡𖾐 𖼺𖽪𖾐 𖼄𖽡𖽻，𖼊𖽑𖽡 𖼀𖽧𖾑 𖼖𖽺𖾑 𖽂𖽙𖾐 𖼣𖽻𖾐 𖼐𖽑𖽡𖽪𖾑 𖼄𖽔 𖼊𖽙𖾐．” 𖽃𖽔𖾐 𖼺𖽺𖾑 𖼽𖽻 𖼈𖽳𖾐 𖼺𖽝𖾑，𖼈𖽡𖾑 𖼞𖽑𖽙 𖼷𖽶𖾐 𖼄𖽳𖾐 𖼦𖽑𖽻𖾐．
𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼊𖽑𖽺 𖼷𖽑𖽻𖾐 𖼀𖽺 𖼮𖽑𖽢𖾑 𖼦𖽳𖾐 𖼄𖽳𖾐
20 𖼽𖽻 𖼈𖽳𖾐 𖼇𖽕 𖼖𖽻 𖼞𖽳𖾐 𖼮𖽑𖽻𖾐 𖼊𖽚𖾐 𖼖𖽻𖾐 𖼞𖽑𖽶𖾑 𖼮𖽶𖾐 𖼐𖽦𖾐 𖼄𖽡𖽻𖾐，𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼞𖽑𖽶𖾑 𖼠𖽻𖾐 𖼦𖽑𖽡𖽚 𖼽𖽻 𖼈𖽳𖾐 𖼊𖽑𖽺 𖼳𖽡𖽻𖾐 𖼍𖽳𖾐， 21 𖼽𖽻 𖼈𖽳𖾐 𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼖𖽙𖾐 𖼀𖽦𖾐：“𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼈𖽳𖾐 𖼊𖽑𖽺 𖼮𖽑𖽕 𖼐𖽦𖾐，𖼐𖽑𖽡𖾐 𖼈𖽳𖾐 𖼊𖽑𖽺 𖼳𖽶 𖼊𖽻 𖼐𖽙𖾐 𖼊𖽻𖾐． 𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼈𖽳𖾐 𖼮𖽑𖽢𖾑 𖼦𖽹𖾑 𖼺𖽺𖾑，𖼣𖽙𖾐 𖼈𖽳𖾐 𖼇𖽕 𖼖𖽻 𖼐𖽺𖾐 𖼷𖽶 𖼄𖽻 𖽃𖽙𖾑 𖼄𖽺 𖼮𖽑𖽡𖽺 𖼄𖽡𖾐 𖼊𖽻 𖼄𖽔 𖼹𖽳𖾐 𖼦𖽑𖽻𖾐，𖼐𖽑𖽡𖾐 𖼈𖽳𖾐 𖽃𖽔𖾑 𖼊𖽑𖽙 𖼈𖽺𖾐 𖼽𖽻 𖼈𖽳𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐 𖼺𖽺𖾑，𖼣𖽙𖾐 𖼈𖽳𖾐 𖼊𖽑𖽺 𖼺𖽦 𖼳𖽶 𖼣𖽻𖾐．”