𖽂𖽙 𖼺𖽙𖾐 𖼂𖽙𖾐 𖼄𖽚 𖼳𖽡𖾐 𖼊𖽑𖽺 𖼮𖽨 𖼄𖽡𖽻𖾐 𖼞𖽜
4
1 𖼄𖽚 𖼳𖽡𖾐 𖼊𖽻 𖼞𖽑𖽚：“𖼽𖽻 𖼈𖽳𖾐 𖼦𖽑𖽺𖾑 𖼻𖽻𖾐 𖼀𖽦𖾐 𖼊𖽻𖾐：‘ 𖼽𖽺𖾐 𖼦𖽴 𖼦𖽫 𖼊𖽚𖾐 𖼊𖽑𖽧 𖼖𖽻𖾐 𖼐𖽑𖽡𖾐 𖼞𖽜 𖼄𖽡𖽻𖾐 𖼄𖽔 𖼮𖽶𖾐．’ 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼷𖽑𖽜𖾑 𖼷𖽑𖽜𖾐 𖼣𖽙𖾐 𖼊𖽑𖽺 𖼊𖽻 𖼮𖽶𖾐 𖼄𖽔 𖼦𖽶𖾐，𖼣𖽙𖾐 𖼊𖽻 𖼂𖽪𖾑 𖼊𖽑𖽺 𖼖𖽺𖾑 𖼄𖽔 𖼊𖽻 𖼐𖽙𖾐 𖼊𖽻𖾐． ”2 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼊𖽑𖽺 𖼊𖽻 𖼐𖽙𖾐：“𖼐𖽑𖽡𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼈𖽺𖾐 𖼺𖽪𖾐 𖼞𖽑𖽶𖾑 𖽃𖽔 𖼊𖽺𖾑 𖼳𖽶 𖼣𖽻𖾐？”
𖼽𖽻 𖼊𖽻 𖼞𖽑𖽚：“𖼍𖽚𖾐 𖼖𖽜 𖼣𖽻𖾐．”
3 𖼽𖽺𖾐 𖼦𖽴 𖼦𖽫 𖼀𖽦𖾐：“𖼍𖽚𖾐 𖼖𖽜 𖼷𖽴𖾐 𖼄𖽡𖾑 𖼐𖽦𖾐 𖼀𖽙 𖼹𖽺𖾐． ” 𖼄𖽚 𖼳𖽡𖾐 𖼷𖽴𖾐 𖼹𖽺𖾐 𖼍𖽺𖾑 𖼺𖽺，𖼍𖽚𖾐 𖼖𖽜 𖼞𖽑𖽶𖾑 𖼖𖽙𖾐 𖼳𖽳𖾐 𖼊𖽑𖽡 𖼮𖽑𖽡𖾐 𖼀𖽑𖽢． 𖽃𖽔𖾐 𖼺𖽺𖾑，𖼄𖽚 𖼳𖽡𖾐 𖼮𖽡𖽪 𖼀𖽑𖽻𖾐 𖼍𖽪𖾐 𖼽𖽡𖾐，𖼖𖽙𖾐 𖼳𖽳𖾐 𖼊𖽑𖽺 𖼰𖽡𖾑 𖼦𖽑𖽙𖾐．
4 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼊𖽑𖽧 𖼖𖽻𖾐 𖼖𖽙𖾐 𖼳𖽳𖾐 𖼄𖽳𖾑 𖼵𖽪𖾐 𖼍𖽡． ” 𖽃𖽔𖾐 𖼺𖽺𖾑，𖼄𖽚 𖼳𖽡𖾐 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼊𖽑𖽧 𖼖𖽻𖾐 𖼖𖽙𖾐 𖼳𖽳𖾐 𖼄𖽳𖾑 𖼵𖽪𖾐 𖼍𖽡，𖼖𖽙𖾐 𖼳𖽳𖾐 𖼞𖽑𖽶𖾑 𖼹𖽦𖾑 𖼄𖽚 𖼳𖽡𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼀𖽑𖽚𖾐 𖼍𖽚𖾐 𖼖𖽜 𖼀𖽑𖽢．
5 “𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼽𖽻 𖼈𖽳𖾐 𖼊𖽻 𖼮𖽶𖾐 𖼦𖽶𖾐，𖼐𖽑𖽡𖾐 𖼈𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽚𖾐 𖼊𖽑𖽧 𖼖𖽻𖾐 𖼐𖽑𖽡𖾐 𖼞𖽜 𖼄𖽡𖽻𖾐 𖼦𖽑𖽻𖾐，𖼽𖽻 𖼞𖽑𖽶𖾑 𖼽𖽕𖾑 𖼂𖽚 𖼖𖽔𖾐 𖼦𖽕 𖼞𖽳𖾐 𖽂𖽙 𖼺𖽙𖾐 𖼂𖽙𖾐，𖼽𖽡 𖼺𖽔 𖼞𖽳𖾐 𖽂𖽙 𖼺𖽙𖾐 𖼂𖽙𖾐，𖼽𖽔 𖼠𖽴𖾑 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐．”
6 𖼽𖽺𖾐 𖼦𖽴 𖼦𖽫 𖼹𖽦𖾑 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖽃𖽔𖾑 𖼄𖽳𖾐 𖼐𖽑𖽡𖾐 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼖𖽦 𖼞𖽚 𖼞𖽑𖽶𖾐 𖼰𖽡𖽺𖾐．” 𖽃𖽔𖾐 𖼺𖽺𖾑，𖼄𖽚 𖼳𖽡𖾐 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼖𖽦 𖼞𖽚 𖼞𖽑𖽶𖾐 𖼰𖽡𖽺𖾐，𖼽𖽻 𖼹𖽦𖾑 𖼮𖽑𖽡𖽺𖾐 𖼊𖽑𖽧 𖼖𖽻𖾐 𖼞𖽑𖽶𖾑 𖼮𖽶𖾐，𖼖𖽦 𖼀𖽑𖽦𖾐 𖼐𖽪𖾐 𖼐𖽙𖾐 𖼺𖽺𖾑 𖽂𖽙 𖼖𖽙𖾐 𖼺𖽶𖾑 𖼀𖽑𖽨𖾐 𖼦𖽑𖽻𖾐． 7 𖼽𖽺𖾐 𖼦𖽴 𖼦𖽫 𖼀𖽦𖾐：“𖼐𖽑𖽡𖾐 𖼹𖽦𖾑 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼀𖽑𖽚𖾐 𖼞𖽚 𖼽𖽡𖾐．” 𖼄𖽚 𖼳𖽡𖾐 𖼹𖽦𖾑 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼖𖽦 𖼞𖽚 𖼞𖽑𖽶𖾐 𖼰𖽡𖽺𖾐 𖼞𖽑𖽚，𖼽𖽻 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼊𖽑𖽧 𖼖𖽻𖾐 𖼞𖽑𖽶𖾑 𖼮𖽶𖾐，𖼖𖽦 𖼀𖽑𖽦𖾐 𖼞𖽑𖽙 𖼦𖽑𖽻𖾐 𖼺𖽺𖾑，𖼞𖽶𖾐 𖼮𖽑𖽶 𖼊𖽑𖽺 𖼠𖽳𖾐 𖼖𖽪𖾐 𖼦𖽙 𖼖𖽙𖾐 𖼺𖽶𖾑 𖼮𖽻𖾐．
8 𖼽𖽺𖾐 𖼦𖽴 𖼦𖽫 𖼦𖽑𖽔𖾐 𖼖𖽺𖾑 𖼀𖽦𖾐：“𖼽𖽻 𖼈𖽳𖾐 𖼐𖽑𖽡𖾐 𖼊𖽑𖽺 𖼊𖽻 𖼮𖽶𖾐 𖼄𖽔 𖼦𖽶𖾐 ，𖽂𖽙 𖼊𖽺𖾐 𖼺𖽡𖾐 𖼂𖽺𖾐 𖼊𖽪𖾐 𖼞𖽑𖽶𖾑 𖼊𖽝𖾐 𖼊𖽑𖽺 𖼊𖽻 𖼮𖽶𖾐 𖼄𖽔 𖼮𖽶𖾐 𖼀𖽦𖾐 𖼖𖽺𖾑，𖼽𖽻 𖼈𖽳𖾐 𖼷𖽑𖽜𖾑 𖼷𖽑𖽜𖾐 𖼠𖽙𖾑 𖼍𖽻𖾐 𖼞𖽳𖾐 𖼺𖽡𖾐 𖼂𖽺𖾐 𖼊𖽪𖾐 𖼦𖽑𖽺𖾑 𖼊𖽝𖾐 𖼊𖽑𖽺 𖼊𖽻 𖼮𖽶𖾐 𖼊𖽻𖾐． 9 𖼽𖽻 𖼈𖽳𖾐 𖼺𖽡𖾐 𖼂𖽺𖾐 𖼊𖽪𖾐 𖼦𖽑𖽺𖾑 𖼐𖽑𖽡 𖼊𖽝𖾐 𖼊𖽻 𖼮𖽶𖾐 𖼄𖽔 𖼦𖽶𖾐，𖼐𖽑𖽡𖾐 𖼊𖽻 𖼂𖽪𖾑 𖼊𖽑𖽺 𖼖𖽺𖾑 𖼊𖽻 𖼄𖽔 𖼐𖽙𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼐𖽑𖽧 𖼖𖽚 𖼖𖽻𖾐 𖼮𖽻 𖼞𖽳𖾐 𖽃𖽔𖾐 𖼮𖽡𖽦𖾐 𖼊𖽑𖽡 𖼀𖽧𖾑 𖼈𖽺𖾐 𖼂𖽻𖾐 𖼖𖽻𖾐 𖼺𖽺𖾑，𖼐𖽑𖽡𖾑 𖼦𖽡𖽳𖾑 𖼄𖽡𖾐 𖼀𖽙 𖼊𖽑𖽺 𖼍𖽦𖾐；𖼐𖽑𖽡𖾐 𖼖𖽻𖾐 𖼮𖽻 𖼮𖽑𖽻𖾐 𖼈𖽺𖾐 𖼂𖽻𖾐 𖼖𖽻𖾐 𖼺𖽪𖾐 𖽃𖽔𖾐 𖼮𖽡𖽦𖾐，𖼞𖽑𖽶𖾑 𖼦𖽡𖽳𖾑 𖼄𖽡𖾐 𖼀𖽙 𖼊𖽑𖽺 𖼮𖽻𖾐 𖼺𖽶 𖼀𖽑𖽢 𖼊𖽻𖾐．”
𖼽𖽕𖾑 𖼖𖽪𖽦 𖼄𖽚 𖼳𖽡𖾐 𖼊𖽑𖽡𖾑 𖼮𖽪 𖼊𖽻 𖼊𖽑𖽜𖾐
10 𖼄𖽚 𖼳𖽡𖾐 𖼽𖽺𖾐 𖼦𖽴 𖼦𖽫 𖼖𖽙𖾐 𖼀𖽦𖾐：“𖼺𖽡 𖼀𖽑𖽙 𖽃𖽔𖾐! 𖼣𖽙𖾐 𖽃𖽙𖾑 𖼄𖽺 𖼊𖽑𖽙 𖼹𖽦𖾐 𖼦𖽑𖽺 𖼠𖽸𖾑 𖼺𖽪𖾐 𖼷𖽑𖽻𖾐 𖼄𖽔 𖼣𖽻𖾐，𖼐𖽑𖽡𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼊𖽑𖽜𖾐 𖼦𖽑𖽻𖾐 𖼠𖽙𖾑 𖼍𖽻𖾐，𖼦𖽑𖽔𖾐 𖼖𖽺𖾑 𖼦𖽑𖽺 𖼠𖽸𖾑 𖼺𖽪𖾐 𖼷𖽑𖽻𖾐 𖼄𖽔 𖼣𖽻𖾐． 𖼞𖽪𖾐 𖼮𖽡𖽺𖾐 𖼣𖽙𖾐 𖼦𖽑𖽺𖾑 𖼄𖽡 𖼮𖽑𖽶 𖼞𖽪 𖼐𖽑𖽡𖽪𖾑 𖼺𖽪𖾐 𖼷𖽑𖽻𖾐 𖼣𖽻𖾐．”
11 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖽃𖽔 𖼺𖽺 𖼷𖽑𖽻𖾐 𖼄𖽡 𖼞𖽑𖽪𖾐 𖼹𖽸𖾑？ 𖽃𖽔 𖼺𖽺 𖼷𖽑𖽻𖾐 𖼞𖽜 𖼖𖽕𖾑 𖼄𖽡𖾐、 𖼐𖽙𖾑 𖼀𖽻、 𖼐𖽦𖾐 𖼄𖽡𖽻𖾐、 𖼄𖽦𖾐 𖼍𖽳𖾐 𖼺𖽪𖾐 𖼣𖽻𖾐 𖼐𖽺𖾑？ 𖼞𖽑𖽶𖾑 𖼣𖽙𖾐 𖼽𖽺𖾐 𖼦𖽴 𖼦𖽫 𖼄𖽔 𖼣𖽻𖾐 𖼖𖽔𖾑？ 12 𖽃𖽔𖾑 𖼄𖽳𖾐 𖼐𖽑𖽡𖾐 𖼽𖽡𖾐 𖼍𖽺𖾑 𖼻𖽻𖾐，𖼣𖽙𖾐 𖼐𖽑𖽡𖾐 𖼞𖽜 𖼊𖽻 𖼊𖽑𖽜𖾐 𖼀𖽑𖽢 𖼠𖽸𖾑，𖼞𖽑𖽙𖾐 𖼊𖽑𖽜𖾐 𖼖𖽡𖾐 𖼺𖽪𖾐 𖼊𖽻 𖼂𖽪𖾑 𖼐𖽑𖽡𖾐 𖼊𖽑𖽺 𖼄𖽪𖾑 𖼊𖽻𖾐．”
13 𖼄𖽚 𖼳𖽡𖾐 𖼀𖽦𖾐：“𖼺𖽡 𖼀𖽑𖽙 𖽃𖽔𖾐! 𖼐𖽑𖽡𖾐 𖼠𖽳𖾐 𖼖𖽪𖾐 𖼷𖽑𖽻𖾐 𖽃𖽔 𖼺𖽺 𖼊𖽑𖽺 𖼐𖽑𖽧𖾐 𖼺𖽳 𖼊𖽑𖽡𖾑 𖼣𖽻𖾐 𖽃𖽔 𖼺𖽺 𖼊𖽑𖽺 𖼹𖽡𖾐 𖼂𖽡𖾐 𖼽𖽡𖾐 𖼻𖽻𖾐．”
14 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼊𖽑𖽺 𖼷𖽸𖾐 𖼍𖽪𖾐 𖼖𖽻𖾐 𖼺𖽺𖾑 𖼀𖽦𖾐：“𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼠𖽻𖾐 𖼞𖽑𖽶𖾐，𖼐𖽑𖽡𖽻𖾐 𖼍𖽕𖾑 𖼽𖽕𖾑 𖼖𖽪𖽦 𖼊𖽑𖽡 𖼽𖽚𖾐 𖼮𖽻𖾐 𖼍𖽳𖾐 𖼺𖽺 𖼄𖽔 𖼣𖽻𖾐 𖼖𖽔？ 𖼣𖽙𖾐 𖼺𖽝𖾑 𖼽𖽻 𖼄𖽡 𖼞𖽑𖽪𖾐 𖼦𖽑𖽔𖾐 𖼮𖽶𖾐 𖼦𖽑𖽺 𖼠𖽸𖾑；𖼽𖽻 𖽃𖽔𖾑 𖼄𖽳𖾐 𖼊𖽚𖾐 𖼖𖽻𖾐 𖼐𖽑𖽡𖾐 𖼊𖽑𖽺 𖼹𖽶𖾐 𖼊𖽻𖾐． 𖼽𖽻 𖼐𖽑𖽡𖾐 𖼊𖽑𖽺 𖼄𖽡𖽻𖾐 𖼞𖽑𖽶𖾑 𖼮𖽶𖾐，𖼐𖽑𖽧𖾐 𖼄𖽙𖾐 𖼦𖽑𖽔𖾐 𖼮𖽶𖾐 𖼖𖽺𖾑 𖼞𖽜𖾐 𖼺𖽜𖾐 𖼊𖽻𖾐． 15 𖼐𖽑𖽡𖾐 𖼞𖽑𖽙𖾐 𖼀𖽦𖾐 𖼖𖽡𖾐 𖼞𖽳𖾐 𖼊𖽻 𖼦𖽑𖽺 𖼽𖽻 𖼖𖽙𖾐 𖼰𖽨𖾐，𖼣𖽙𖾐 𖼐𖽑𖽡𖾐 𖼊𖽑𖽺 𖼊𖽻 𖼊𖽑𖽜𖾐 𖼈𖽪𖾐 𖼺𖽝𖾑 𖼞𖽜 𖼊𖽻𖾐，𖼽𖽻 𖼊𖽑𖽺 𖼖𖽺𖾑 𖼊𖽻 𖼊𖽑𖽜𖾐 𖼈𖽪𖾐 𖼺𖽝𖾑 𖼞𖽜 𖼊𖽻𖾐，𖼞𖽑𖽙𖾐 𖼂𖽺𖾐 𖼖𖽡𖾐 𖼺𖽪𖾐 𖼄𖽡𖽻 𖼣𖽙𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼄𖽪𖾑 𖼍𖽴𖾑 𖼊𖽻𖾐． 16 𖼽𖽻 𖼐𖽑𖽡𖾐 𖼊𖽑𖽡𖾑 𖼮𖽪 𖼷𖽑𖽻𖾐 𖼀𖽺 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐，𖼽𖽻 𖼐𖽑𖽡𖾐 𖼞𖽳𖾐 𖼄𖽡 𖼞𖽑𖽪𖾐 𖼂𖽺𖾐，𖼐𖽑𖽡𖾐 𖼽𖽻 𖼞𖽳𖾐 𖼺𖽡 𖼀𖽑𖽙 𖼂𖽺𖾐 𖼊𖽻𖾐． 17 𖼐𖽑𖽡𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼍𖽚𖾐 𖼖𖽜 𖼦𖽑𖽺𖾑 𖼈𖽺𖾐 𖼺𖽺𖾑，𖼺𖽡𖾐 𖼂𖽺𖾐 𖼊𖽪𖾐 𖼂𖽺𖾐 𖼖𖽡𖾐．”
𖼄𖽚 𖼳𖽡𖾐 𖼀𖽑𖽚𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽚 𖼽𖽡𖾐
18 𖽃𖽔𖾐 𖼺𖽺𖾑，𖼄𖽚 𖼳𖽡𖾐 𖼀𖽑𖽚𖾐 𖼽𖽻 𖼽𖽚 𖼀𖽑𖽙 𖼽𖽦𖾑 𖼊𖽑𖽴𖾑 𖼖𖽚 𖼞𖽳𖾐 𖼞𖽚 𖼽𖽡𖾐，𖼽𖽻 𖼽𖽚 𖼀𖽑𖽙 𖼖𖽙𖾐 𖼀𖽦𖾐：“𖼣𖽙𖾐 𖼞𖽜 𖼦𖽑𖽺𖾑 𖼠𖽻𖾐 𖼰𖽡𖾑 𖼦𖽑𖽙𖾐 𖼺𖽺𖾑，𖼀𖽑𖽚𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼣𖽙𖾐 𖼈𖽧 𖼐𖽑𖽳𖾐 𖼞𖽳𖾐 𖼞𖽚 𖼽𖽡𖾐，𖼽𖽻 𖼈𖽳𖾐 𖼮𖽻𖾐 𖼮𖽻𖾐 𖼺𖽺 𖼊𖽑𖽡 𖼠𖽙𖾐 𖼐𖽦𖾐 𖼽𖽡𖾐 𖼊𖽻𖾐．”
𖼽𖽦𖾑 𖼊𖽑𖽴𖾑 𖼖𖽚 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼺𖽙𖾑 𖼺𖽙𖾐 𖼽𖽡𖾐 𖼻𖽻𖾐．”
19 𖼽𖽺𖾐 𖼦𖽴 𖼦𖽫 𖼄𖽡 𖼍𖽡𖽦𖾑 𖼄𖽡𖾐 𖼊𖽺𖾐 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼍𖽪𖾐 𖼖𖽻𖾐，𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽚 𖼽𖽡𖾐 𖼻𖽻𖾐，𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼈𖽪𖾑 𖼠𖽻𖾐 𖼊𖽑𖽺 𖼦𖽹𖾑 𖼊𖽡 𖼮𖽑𖽻 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼳𖽶𖾐 𖼦𖽑𖽻𖾐．”
20 𖽃𖽔𖾐 𖼺𖽺𖾑，𖼄𖽚 𖼳𖽡𖾐 𖼽𖽻 𖽃𖽔𖾐 𖼐𖽑𖽳𖾐 𖼄𖽙𖾐 𖼻𖽙 𖼊𖽑𖽺 𖼦𖽳，𖼽𖽻 𖼈𖽳𖾐 𖼞𖽜 𖼊𖽑𖽳 𖼖𖽳𖾐 𖼄𖽪 𖼷𖽳． 𖼄𖽚 𖼳𖽡𖾐 𖽂𖽙 𖼺𖽙𖾐 𖼂𖽙𖾐 𖼽𖽻 𖼞𖽜 𖼈𖽳𖾐 𖼖𖽡𖾐 𖼺𖽪𖾐 𖼍𖽚𖾐 𖼖𖽜 𖼈𖽺𖾐，𖼀𖽑𖽚𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽚 𖼽𖽡𖾐．
21 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽚 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖼣𖽙𖾐 𖼐𖽑𖽡𖾐 𖼞𖽜 𖼞𖽑𖽙𖾐 𖼂𖽺𖾐 𖼖𖽡𖾐 𖼺𖽪𖾐 𖼺𖽡𖾐 𖼂𖽺𖾐 𖼊𖽪𖾐，𖼐𖽑𖽡𖾐 𖼐𖽑𖽧𖾐 𖼄𖽙𖾐 𖼊𖽑𖽺 𖼍𖽙𖾑 𖼍𖽳𖾐，𖼂𖽺𖾐 𖼺𖽺𖾑 𖼇𖽕 𖼖𖽻 𖽃𖽙𖾑 𖼄𖽺 𖼮𖽑𖽡𖽺 𖼍𖽙𖾑 𖼖𖽡𖾐． 𖼦𖽑𖽻𖾐 𖼊𖽑𖽻𖾐，𖼣𖽙𖾐 𖼽𖽻 𖼞𖽜 𖼐𖽑𖽧𖾐 𖼠𖽴𖾐 𖼺𖽺𖾑，𖼽𖽻 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼀𖽑𖽨 𖼦𖽑𖽙𖾐 𖼄𖽔 𖼦𖽶𖾐 𖼊𖽻𖾐． 22 𖼐𖽑𖽡𖾐 𖼇𖽕 𖼖𖽻 𖼖𖽙𖾐 𖼀𖽦𖾐 𖼖𖽡𖾐： ‘𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼻𖽻𖾐 𖼀𖽦𖾐： 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼦𖽑𖽺𖾑 𖼣𖽙𖾐 𖼞𖽳𖾐 𖼻𖽙 𖼈𖽳 𖼣𖽻𖾐， 23 𖼣𖽙𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼀𖽦𖾐 𖼠𖽚，𖼣𖽙𖾐 𖼻𖽙 𖼞𖽜 𖼦𖽑𖽺𖾑 𖼠𖽻𖾐 𖼰𖽡𖾑 𖼦𖽑𖽙𖾐 𖼺𖽺𖾑 ，𖼽𖽻 𖼞𖽜 𖼣𖽙𖾐 𖼊𖽑𖽺 𖼠𖽙𖾐 𖼳𖽙𖾐 𖼖𖽡𖾐． 𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼦𖽑𖽔𖾐 𖼖𖽺𖾑 𖼽𖽻 𖼈𖽳𖾐 𖼊𖽑𖽺 𖼀𖽨 𖼮𖽳，𖼀𖽑𖽨 𖼦𖽑𖽙𖾐 𖼄𖽔 𖼦𖽶𖾐． 𖽃𖽔𖾐 𖼺𖽺𖾑，𖼣𖽙𖾐 𖼐𖽑𖽡𖾐 𖼞𖽳𖾐 𖼻𖽙 𖼈𖽳 𖼊𖽑𖽺 𖼺𖽦 𖼦𖽑𖽙𖾐 𖼊𖽻𖾐．’”
24 𖼄𖽚 𖼳𖽡𖾐 𖼮𖽨𖾐 𖼄𖽙𖾐 𖼊𖽑𖽺 𖼦𖽑𖽦 𖼞𖽳𖾐 𖼄𖽡𖾐 𖼊𖽺𖾐 𖼞𖽑𖽶𖾑 𖼠𖽻𖾐，𖽂𖽙 𖼺𖽙𖾐 𖼂𖽙𖾐 𖼽𖽻 𖼊𖽑𖽺 𖼷𖽶𖾐 𖼄𖽳𖾐 𖼺𖽺𖾑，𖼽𖽻 𖼊𖽑𖽺 𖼺𖽦 𖼊𖽡 𖼮𖽑𖽻， 25 𖽃𖽔𖾐 𖼺𖽺𖾑，𖼳𖽡𖾐 𖼀𖽑𖽙𖾐 𖼖𖽔𖾐 𖼮𖽝 𖼖𖽚𖾐 𖼊𖽑𖽡 𖼊𖽝𖾐 𖼈𖽺𖾐，𖼽𖽻 𖼻𖽙 𖼊𖽑𖽺 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼂𖽺𖾐，𖼷𖽑𖽳 𖼹𖽺𖾐 𖼖𖽻𖾐 𖼺𖽪𖾐 𖼮𖽡𖾐 𖼞𖽑𖽶𖾑 𖼈𖽺𖾐 𖼄𖽚 𖼳𖽡𖾐 𖼮𖽑𖽡𖾑 𖼀𖽑𖽦𖾐 𖼊𖽑𖽺 𖼍𖽪 𖼄𖽳𖾐，𖼀𖽦𖾐： 𖼐𖽑𖽡𖾐 𖼠𖽕𖾐 𖼰𖽶𖾐 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼺𖽶 𖼻𖽜 𖼖𖽳𖾑 𖼂𖽻𖾐 𖼖𖽻𖾐 𖼺𖽪𖾐 𖼣𖽙𖾐 𖼞𖽳𖾐 𖼷𖽑𖽻𖾐 𖼀𖽑𖽙 𖼣𖽻𖾐． 26 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼽𖽻 𖼊𖽑𖽺 𖼀𖽑𖽨 𖼦𖽑𖽙𖾐，𖼞𖽑𖽶𖾑 𖼮𖽶𖾐 𖼳𖽡𖾐 𖼀𖽑𖽙𖾐 𖼖𖽔𖾐 𖼀𖽦𖾐． 𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼠𖽕𖾐 𖼰𖽶𖾐 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼺𖽶 𖼻𖽜 𖼖𖽳𖾑 𖼂𖽻𖾐 𖼖𖽻𖾐 𖼺𖽪𖾐 𖼣𖽙𖾐 𖼞𖽳𖾐 𖼷𖽑𖽻𖾐 𖼀𖽑𖽙 𖼣𖽻𖾐．
27 𖼽𖽺𖾐 𖼦𖽴 𖼦𖽫 𖼽𖽕𖾑 𖼖𖽪𖽦 𖼖𖽙𖾐 𖼀𖽦𖾐：“𖼐𖽑𖽡𖾐 𖼽𖽡𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼄𖽚 𖼳𖽡𖾐 𖼊𖽑𖽺 𖼹𖽶𖾐 𖼽𖽡𖾐．” 𖽃𖽔𖾐 𖼺𖽺𖾑，𖼽𖽕𖾑 𖼖𖽪𖽦 𖼽𖽡𖾐 𖼦𖽑𖽙𖾐，𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖽂𖽙 𖼰𖽡𖽺𖾐 𖼊𖽑𖽺 𖼄𖽚 𖼳𖽡𖾐 𖼖𖽙𖾐 𖼷𖽶𖾐 𖼄𖽳𖾐，𖼽𖽻 𖼖𖽙𖾐 𖼮𖽑𖽻𖾐 𖼮𖽑𖽻 𖼄𖽦𖾐 𖼹𖽮𖾑． 28 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼞𖽜 𖼞𖽑𖽙𖾐 𖼀𖽦𖾐 𖼖𖽡𖾐 𖼺𖽪𖾐 𖼊𖽻 𖼂𖽪𖾑 𖼐𖽺𖾐 𖼞𖽑𖽙𖾐 𖼂𖽺𖾐 𖼖𖽡𖾐 𖼺𖽪𖾐 𖼺𖽡𖾐 𖼂𖽺𖾐 𖼊𖽪𖾐，𖼄𖽚 𖼳𖽡𖾐 𖼄𖽳𖾑 𖼄𖽳 𖼦𖽺 𖼽𖽕𖾑 𖼖𖽪𖽦 𖼊𖽑𖽺 𖼰𖽨𖾐 𖼦𖽑𖽙𖾐．
29 𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼽𖽡𖾐 𖼺𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽳 𖼄𖽻 𖼄𖽳𖾑 𖼄𖽳 𖼊𖽑𖽺 𖽃𖽶𖾐 𖼻𖽶𖾑 𖼖𖽻𖾐． 30 𖽂𖽙 𖼺𖽙𖾐 𖼂𖽙𖾐 𖼄𖽚 𖼳𖽡𖾐 𖼖𖽙𖾐 𖼮𖽑𖽻𖾐 𖼞𖽑𖽙𖾐 𖼀𖽦𖾐 𖼺𖽪𖾐 𖼊𖽻 𖼂𖽪𖾑，𖼽𖽕𖾑 𖼖𖽪𖽦 𖼄𖽳𖾑 𖼄𖽳 𖼊𖽑𖽡 𖼂𖽦𖾑 𖼦𖽑𖽺 𖼽𖽻 𖼈𖽳𖾐 𖼖𖽙𖾐 𖼰𖽨𖾐，𖼄𖽚 𖼳𖽡𖾐 𖼖𖽺𖾑 𖼷𖽑𖽻𖾐 𖼀𖽺 𖽃𖽙𖾑 𖼄𖽺 𖼮𖽑𖽡𖽺 𖼺𖽡𖾐 𖼂𖽺𖾐 𖼊𖽪𖾐 𖼦𖽑𖽺𖾑 𖼹𖽻𖾐 𖼂𖽺𖾐 𖼦𖽑𖽙𖾐． 31 𖽃𖽔𖾐 𖼺𖽺𖾑，𖼷𖽻𖾐 𖼀𖽺 𖼊𖽻 𖼮𖽶𖾐 𖼦𖽑𖽻𖾐． 𖼞𖽪𖾐 𖼮𖽡𖽺𖾐 𖼽𖽺𖾐 𖼦𖽴 𖼦𖽫 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼐𖽦𖾐 𖼳𖽪𖾐，𖼦𖽑𖽔𖾐 𖼖𖽺𖾑 𖼽𖽻 𖼈𖽳𖾐 𖼞𖽳𖾐 𖼳𖽚𖾑 𖼞𖽑𖽪 𖼊𖽑𖽺 𖼐𖽦𖾐 𖼄𖽡𖽻𖾐 𖼦𖽑𖽻𖾐 𖼞𖽳𖾐 𖼄𖽡𖽻 𖼽𖽻 𖼈𖽳𖾐 𖼊𖽻 𖼮𖽨 𖼺𖽺𖾑，𖼂𖽴𖾐 𖼹𖽺𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼊𖽑𖽴．