𖼽𖽱𖾐 𖼺𖽴𖾑 𖼽𖽻 𖼈𖽧 𖼄𖽻 𖼐𖽑𖽳𖾐 𖼄𖽻 𖼊𖽑𖽺 𖼦𖽳 𖼇𖽕 𖼖𖽻 𖼊𖽑𖽺 𖼄𖽡𖽻𖾐 𖼽𖽡𖾐
47
1 𖼽𖽱𖾐 𖼺𖽴𖾑 𖼊𖽡 𖼽𖽡𖾐 𖼇𖽕 𖼖𖽻 𖼖𖽙𖾐 𖼀𖽦𖾐：“𖼣𖽻𖾐 𖼀𖽙 𖼐𖽺𖾐 𖼣𖽙𖾐 𖼈𖽧 𖼄𖽻 𖼐𖽑𖽳𖾐 𖼄𖽻，𖼽𖽻 𖼈𖽳𖾐 𖼐𖽑𖽡 𖼐𖽺𖾐 𖽃𖽔𖾑 𖼮𖽑𖽸 𖼽𖽻𖾐 𖼞𖽕，𖼞𖽑𖽙𖾐 𖼮𖽻𖾐 𖼳𖽶 𖼈𖽺𖾐 𖼺𖽺𖾑，𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼮𖽑𖽡𖾐 𖼖𖽻𖾐，𖽃𖽔𖾑 𖼄𖽳𖾐 𖼠𖽜𖾐 𖼳𖽔𖾐 𖼄𖽡𖾐 𖼊𖽺𖾐 𖼮𖽻𖾐 𖼍𖽳𖾐．”2 𖼽𖽱𖾐 𖼺𖽴𖾑 𖼽𖽻 𖼈𖽧 𖼄𖽻 𖼐𖽑𖽳𖾐 𖼄𖽻 𖼠𖽻𖾐 𖼊𖽑𖽺 𖼣𖽙 𖼽𖽚𖾐 𖼺𖽺𖾐 𖼊𖽑𖽧 𖼖𖽻𖾐，𖼽𖽻 𖼈𖽳𖾐 𖼊𖽑𖽺 𖼦𖽳 𖼺𖽺𖾑，𖼇𖽕 𖼖𖽻 𖼊𖽑𖽺 𖼄𖽡𖽻𖾐 𖼽𖽡𖾐．
3 𖼇𖽕 𖼖𖽻 𖼽𖽱𖾐 𖼺𖽴𖾑 𖼞𖽳𖾐 𖼈𖽧 𖼄𖽻 𖼐𖽑𖽳𖾐 𖼄𖽻 𖼊𖽑𖽺 𖼊𖽻 𖼐𖽙𖾐：“𖼐𖽑𖽡𖾐 𖼈𖽳𖾐 𖽃𖽔 𖼊𖽺𖾑 𖼳𖽶 𖼄𖽡𖽻 𖼄𖽪𖾐 𖼺𖽪𖾐 𖼣𖽻𖾐？”
𖼽𖽻 𖼈𖽳𖾐 𖼊𖽻 𖼞𖽑𖽚：“𖼺𖽡 𖼀𖽑𖽙 𖽃𖽔𖾐！ 𖼣𖽙𖾐 𖼈𖽳𖾐 𖼮𖽡𖽺 𖼖𖽚𖾑 𖼀𖽑𖽙 𖼣𖽻𖾐，𖼣𖽙𖾐 𖼈𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼖𖽺𖾑 𖼮𖽡𖽺 𖼖𖽚𖾑 𖼺𖽪𖾐 𖼣𖽻𖾐．” 4 𖼽𖽻 𖼈𖽳𖾐 𖼹𖽦𖾑 𖼇𖽕 𖼖𖽻 𖼖𖽙𖾐 𖼀𖽦𖾐：“𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼦𖽑𖽦 𖼄𖽦 𖼈𖽳 𖼰𖽡，𖼣𖽙𖾐 𖼈𖽳𖾐 𖼞𖽳𖾐 𖼮𖽡𖽺 𖼷𖽪𖾐 𖼳𖽶𖾑 𖼀𖽺 𖼷𖽙 𖼖𖽚𖾐 𖼂𖽚𖾐 𖼖𖽺𖾑 𖼄𖽔 𖼮𖽻𖾐 𖼺𖽺𖾑，𖼣𖽙𖾐 𖼈𖽳𖾐 𖼦𖽑𖽺𖾑 𖼄𖽡𖾐 𖼊𖽺𖾐 𖼣𖽙𖾑 𖼮𖽻𖾐 𖼖𖽻𖾐．𖼐𖽑𖽡𖾐 𖼊𖽑𖽺 𖼮𖽑𖽡 𖼰𖽡𖽺𖾐 𖼣𖽙𖾐 𖼈𖽳𖾐 𖼞𖽜 𖼠𖽜𖾐 𖼳𖽔𖾐 𖼄𖽡𖾐 𖼊𖽺𖾐 𖽂𖽙𖾐 𖼮𖽻𖾐 𖼊𖽙𖾐 𖼖𖽡𖾐．”
5 𖼇𖽕 𖼖𖽻 𖼽𖽱𖾐 𖼺𖽴𖾑 𖼖𖽙𖾐 𖼀𖽦𖾐：“𖼐𖽑𖽡𖽻𖾐 𖼀𖽙 𖼐𖽺𖾐 𖼐𖽑𖽡𖾐 𖼈𖽧 𖼄𖽻 𖼐𖽑𖽳𖾐 𖼄𖽻 𖼐𖽑𖽡𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼮𖽑𖽡𖾐 𖼖𖽻𖾐， 6 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽻𖾐，𖼽𖽻 𖼈𖽳𖾐 𖼞𖽜 𖼦𖽑𖽔𖾐 𖼮𖽶𖾐 𖼹𖽳𖾐 𖼺𖽪𖾐 𖼄𖽡𖾐 𖼊𖽺𖾐 𖼞𖽳𖾐 𖼮𖽻𖾐 𖼍𖽺𖾑 𖼻𖽻𖾐，𖼽𖽻 𖼈𖽳𖾐 𖼠𖽜𖾐 𖼳𖽔𖾐 𖼄𖽡𖾐 𖼊𖽺𖾐 𖽂𖽙𖾐 𖼮𖽻𖾐 𖼊𖽙𖾐．𖼐𖽑𖽡𖾐 𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖽃𖽔 𖼊𖽺𖾑 𖼳𖽶 𖼷𖽑𖽻𖾐 𖼖𖽕𖾐 𖼮𖽻𖾐 𖼺𖽝𖾑 𖼊𖽑𖽡𖾑 𖼣𖽻𖾐，𖼽𖽻 𖼈𖽳𖾐 𖼊𖽑𖽺 𖼀𖽑𖽨 𖼣𖽙𖾐 𖼖𖽙𖾐 𖼀𖽙𖾐 𖼮𖽡𖽺 𖼷𖽪𖾐 𖼐𖽦𖾐 𖼳𖽪𖾐 𖼻𖽻𖾐．”
𖼽𖽔 𖼠𖽴𖾑 𖼇𖽕 𖼖𖽻 𖼊𖽑𖽺 𖼄𖽡𖽻𖾐 𖼽𖽡𖾐
7 𖼽𖽱𖾐 𖼺𖽴𖾑 𖼽𖽻 𖼀𖽙 𖼊𖽑𖽺 𖼦𖽳 𖼇𖽕 𖼖𖽻 𖽃𖽙𖾑 𖼄𖽺 𖼮𖽑𖽡𖾐，𖽃𖽔𖾐 𖼺𖽺𖾑 𖼽𖽔 𖼠𖽴𖾑 𖼄𖽢 𖼦𖽙𖾐 𖼇𖽕 𖼖𖽻 𖼊𖽑𖽺 𖼞𖽜．
8 𖼇𖽕 𖼖𖽻 𖼽𖽔 𖼠𖽴𖾑 𖼊𖽑𖽺 𖼊𖽻 𖼐𖽙𖾐：“𖼐𖽑𖽡𖾐 𖼞𖽑𖽙 𖼄𖽙𖾐 𖼞𖽑𖽚 𖼖𖽚？”
9 𖼽𖽔 𖼠𖽴𖾑 𖼊𖽻 𖼞𖽑𖽚：“𖼣𖽙𖾐 𖼊𖽺𖾐 𖼊𖽑𖽺 𖼣𖽙𖾑 𖼮𖽻𖾐 𖼞𖽳𖾐 𖼐𖽑𖽡𖾐 𖼦𖽑𖽦 𖼊𖽑𖽡 𖼦𖽑𖽙𖾐 𖼺𖽙𖾐 𖼷𖽑𖽡𖾐 𖼞𖽑𖽚 𖼣𖽻𖾐，𖼣𖽙𖾐 𖽂𖽙𖾐 𖼠𖽙𖾑 𖼞𖽳𖾐 𖼐𖽑𖽡𖾐 𖼦𖽑𖽦 𖼦𖽑𖽔𖾐 𖼮𖽶𖾐 𖼣𖽻𖾐 𖼐𖽑𖽡𖽪𖾑、 𖼦𖽑𖽔𖾐 𖼮𖽶𖾐 𖼳𖽚𖾑 𖼞𖽑𖽪，𖼣𖽻𖾐 𖼂𖽸𖾑 𖼣𖽻𖾑 𖼄𖽻 𖼞𖽑𖽚 𖼊𖽑𖽙 𖼄𖽨𖾐 𖼄𖽔 𖽂𖽙𖾐 𖼮𖽻𖾐．” 10 𖼽𖽔 𖼠𖽴𖾑 𖼹𖽦𖾑 𖼄𖽢 𖼦𖽙𖾐 𖼇𖽕 𖼖𖽻 𖼊𖽑𖽺 𖼞𖽜 𖼺𖽺𖾑，𖼇𖽕 𖼖𖽻 𖼞𖽳𖾐 𖼮𖽑𖽻𖾐 𖼊𖽚𖾐 𖼽𖽡𖾐 𖼦𖽑𖽙𖾐．
11 𖼽𖽱𖾐 𖼺𖽴𖾑 𖼇𖽕 𖼖𖽻 𖼀𖽦𖾐 𖼄𖽪𖾑 𖼖𖽙𖾐 𖼮𖽑𖽻𖾐，𖽃𖽦𖾐 𖼰𖽧 𖼞𖽳𖾐 𖼦𖽑𖽔𖾐 𖼮𖽶𖾐 𖼹𖽳𖾐 𖼺𖽪𖾐 𖼖𖽕 𖼺𖽺𖾐 𖼄𖽡𖾐 𖼊𖽺𖾐，𖼀𖽑𖽨 𖼽𖽻 𖼀𖽙 𖼐𖽺𖾐 𖼽𖽻 𖼈𖽧 𖼄𖽻 𖼐𖽑𖽳𖾐 𖼄𖽻 𖼊𖽑𖽺 𖼞𖽜，𖼽𖽻 𖼈𖽳𖾐 𖼞𖽳𖾐 𖼄𖽡𖾐 𖼳𖽡𖽪 𖼂𖽺𖾐． 12 𖼽𖽱𖾐 𖼺𖽴𖾑 𖼹𖽦𖾑 𖼽𖽻 𖼈𖽳𖾐 𖼊𖽑𖽡 𖼈𖽴𖾑 𖼈𖽴 𖼷𖽑𖽻𖾐 𖼄𖽨 𖼐𖽑𖽡𖽪𖾑 𖼖𖽙𖾐 𖼮𖽑𖽻𖾐，𖼷𖽙 𖼊𖽪𖾐 𖼀𖽜𖾐 𖼽𖽻 𖼀𖽙、 𖼽𖽻 𖼈𖽧 𖼄𖽻 𖼐𖽑𖽳𖾐 𖼄𖽻 𖼐𖽺𖾐 𖼽𖽻 𖼀𖽙 𖼈𖽴 𖽃𖽔𖾑 𖼞𖽑𖽶𖾐 𖼷𖽑𖽻𖾐 𖼄𖽳𖾑 𖼄𖽳 𖼊𖽑𖽺 𖼰𖽙𖾑．
𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼀𖽺 𖼷𖽙𖾐 𖼖𖽳𖾑
13 𖼞𖽑𖽶𖾑 𖼮𖽶𖾐，𖼦𖽑𖽦 𖼄𖽦 𖼈𖽳 𖼰𖽡 𖼺𖽺𖾑，𖼞𖽑𖽙𖾐 𖼮𖽑𖽡𖾐 𖼊𖽪 𖼷𖽙 𖼊𖽪𖾐 𖼄𖽔 𖼮𖽻𖾐 𖼦𖽑𖽻𖾐．𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼐𖽺𖾐 𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼷𖽑𖽻𖾐，𖼦𖽑𖽦 𖼂𖽙𖾐 𖼄𖽦 𖼺𖽺𖾑 𖼳𖽶𖾐 𖼖𖽻𖾐 𖼮𖽻𖾐． 14 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼐𖽺𖾐 𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼷𖽑𖽻𖾐，𖼞𖽑𖽙𖾐 𖼮𖽻𖾐 𖼺𖽪𖾐 𖼀𖽑𖽨𖾐 𖼀𖽑𖽡 𖼻𖽜 𖼷𖽙𖾐 𖼈𖽳𖾐 𖼦𖽑𖽻𖾐，𖼽𖽱𖾐 𖼺𖽴𖾑 𖼀𖽑𖽨𖾐 𖼀𖽑𖽡 𖼄𖽳𖾑 𖼄𖽳 𖼠𖽙𖾐 𖼳𖽙𖾐 𖼍𖽪𖾐 𖼖𖽻𖾐，𖼀𖽑𖽨 𖼇𖽕 𖼖𖽻 𖼮𖽻𖾐 𖼞𖽳𖾐 𖼦𖽑𖽺𖾐 𖼞𖽑𖽶𖾐 𖼍𖽙𖾑． 15 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼐𖽺𖾐 𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼷𖽑𖽻𖾐 𖼀𖽑𖽨𖾐 𖼀𖽑𖽡 𖼻𖽜 𖼞𖽳𖾐 𖼦𖽑𖽻𖾐．𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼀𖽺 𖼽𖽱𖾐 𖼺𖽴𖾑 𖼞𖽳𖾐 𖼖𖽻𖾐，𖼀𖽦𖾐：“𖼣𖽙𖾐 𖼈𖽳𖾐 𖼀𖽑𖽨𖾐 𖼀𖽑𖽡 𖼻𖽜 𖼞𖽳𖾐 𖼦𖽑𖽻𖾐，𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼣𖽙𖾐 𖼈𖽳𖾐 𖼊𖽑𖽺 𖼷𖽙 𖼊𖽪𖾐 𖼄𖽻𖾑 𖼞𖽜，𖼣𖽙𖾐 𖼈𖽳𖾐 𖼞𖽜 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽻𖾐 𖼄𖽦 𖼳𖽶𖾐 𖼄𖽔 𖼻𖽻𖾐．”
16 𖼽𖽱𖾐 𖼺𖽴𖾑 𖼀𖽦𖾐：“𖼀𖽑𖽨𖾐 𖼀𖽑𖽡 𖼻𖽜 𖼞𖽳𖾐 𖼦𖽑𖽻𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼈𖽳𖾐 𖼞𖽳𖾐 𖼮𖽡𖽺 𖼀𖽑𖽨 𖼣𖽙𖾐 𖼞𖽳𖾐 𖼷𖽙 𖼊𖽪𖾐 𖼖𖽳𖾑 𖼖𖽻𖾐 𖼮𖽑𖽳𖾐．” 17 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼮𖽡𖽺 𖼞𖽕 𖼽𖽱𖾐 𖼺𖽴𖾑 𖼞𖽳𖾐 𖼽𖽡𖾐，𖼽𖽱𖾐 𖼺𖽴𖾑 𖼷𖽙 𖼊𖽪𖾐 𖼈𖽺𖾐 𖼺𖽺𖾑，𖼽𖽻 𖼈𖽳𖾐 𖼞𖽳𖾐 𖼄𖽪、 𖽃𖽔𖾑 𖼮𖽑𖽸 𖼽𖽻𖾐、 𖼐𖽑𖽡 𖼐𖽺𖾐 𖼊𖽑𖽳 𖼖𖽳𖾐 𖼄𖽪 𖼖𖽳𖾑．𖼞𖽑𖽶𖾑 𖼊𖽑𖽡 𖼞𖽑𖽚，𖼽𖽱𖾐 𖼺𖽴𖾑 𖼷𖽙 𖼊𖽪𖾐 𖼈𖽺𖾐 𖼽𖽻 𖼈𖽳𖾐 𖼞𖽳𖾐 𖼮𖽡𖽺 𖼞𖽑𖽙𖾐 𖼣𖽻𖾐 𖼖𖽳𖾑 𖼺𖽺𖾑，𖼽𖽻 𖼈𖽳𖾐 𖼊𖽑𖽺 𖼍𖽻𖾐 𖼠𖽙𖾑．
18 𖼞𖽑𖽶𖾑 𖼊𖽑𖽡 𖼞𖽑𖽚 𖼠𖽚 𖼦𖽑𖽻𖾐，𖼠𖽙𖾑 𖼍𖽻𖾐 𖼞𖽑𖽶𖾑 𖼊𖽑𖽡 𖼞𖽑𖽚 𖼽𖽻 𖼈𖽳𖾐 𖼹𖽦𖾑 𖼖𖽻𖾐，𖼽𖽱𖾐 𖼺𖽴𖾑 𖼖𖽙𖾐 𖼀𖽦𖾐：“𖼺𖽡 𖼀𖽑𖽙 𖽃𖽔𖾐！𖼣𖽙𖾐 𖼈𖽳𖾐 𖼐𖽑𖽡𖾐 𖼊𖽑𖽺 𖼇𖽪 𖼺𖽪𖾐 𖼄𖽔 𖼣𖽻𖾐，𖼣𖽙𖾐 𖼈𖽳𖾐 𖼠𖽕𖾐 𖼮𖽶𖾐 𖼀𖽑𖽨𖾐 𖼀𖽑𖽡 𖼻𖽜 𖼞𖽳𖾐 𖼦𖽑𖽻𖾐，𖼮𖽡𖽺 𖼖𖽺𖾑 𖼐𖽑𖽡𖾐 𖼊𖽑𖽺 𖼞𖽜 𖼦𖽑𖽙𖾐．𖼣𖽙𖾐 𖼈𖽳𖾐 𖼺𖽡 𖼀𖽑𖽙 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺，𖼽𖽻 𖼄𖽳𖾑 𖼞𖽶𖾐 𖼮𖽑𖽶 𖼐𖽺𖾐 𖼄𖽡𖾐 𖼮𖽑𖽙𖾐 𖼍𖽺𖾑 𖼮𖽻𖾐，𖼠𖽳𖾐 𖼖𖽪𖾐 𖼊𖽑𖽡 𖼳𖽶 𖼖𖽺𖾑 𖼄𖽔 𖼷𖽺𖾐 𖼦𖽑𖽻𖾐． 19 𖼐𖽑𖽡𖾐 𖼣𖽙𖾐 𖼈𖽳𖾐 𖼐𖽺𖾐 𖼣𖽙𖾐 𖼈𖽳𖾐 𖼞𖽳𖾐 𖼄𖽡𖾐 𖼮𖽑𖽙𖾐 𖼞𖽜 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼄𖽳 𖼮𖽡𖽦𖼦𖽑𖽙𖾐 𖼊𖽙𖾐 𖼖𖽔𖾑？𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼷𖽙 𖼊𖽪𖾐 𖼈𖽺𖾐 𖼣𖽙𖾐 𖼈𖽳𖾐 𖼐𖽺𖾐 𖼣𖽙𖾐 𖼈𖽳𖾐 𖼞𖽳𖾐 𖼄𖽡𖾐 𖼮𖽑𖽙𖾐 𖼊𖽑𖽺 𖼖𖽳𖾑 𖼞𖽜．𖼦𖽑𖽺𖾑 𖼻𖽻𖾐，𖼣𖽙𖾐 𖼈𖽳𖾐 𖼐𖽺𖾐 𖼣𖽙𖾐 𖼈𖽳𖾐 𖼞𖽳𖾐 𖼄𖽡𖾐 𖼮𖽑𖽙𖾐 𖼇𖽕 𖼖𖽻 𖼞𖽳𖾐 𖼣𖽻𖾐．𖼦𖽑𖽔𖾐 𖼖𖽺𖾑 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼣𖽙𖾐 𖼈𖽳𖾐 𖼊𖽑𖽺 𖼳𖽶𖾑 𖼄𖽙𖾐 𖼄𖽻𖾑 𖼞𖽜，𖼣𖽙𖾐 𖼈𖽳𖾐 𖼞𖽜 𖽂𖽙𖾐 𖼠𖽙𖾑 𖼊𖽙𖾐，𖼳𖽶𖾐 𖼄𖽔 𖼻𖽻𖾐，𖼄𖽡𖾐 𖼮𖽑𖽙𖾐 𖼖𖽺𖾑 𖼄𖽡𖾐 𖼮𖽡𖽦𖾐𖼀𖽑𖽢 𖼄𖽔 𖼻𖽻𖾐．”
20 𖽃𖽔𖾐 𖼺𖽺𖾑，𖼽𖽱𖾐 𖼺𖽴𖾑 𖼇𖽕 𖼖𖽻 𖼖𖽙𖾐 𖼀𖽙𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽳𖾐 𖼄𖽡𖾐 𖼮𖽑𖽙𖾐 𖼄𖽳𖾑 𖼄𖽳 𖼊𖽑𖽺 𖼈𖽳𖾐 𖼹𖽺𖾐 𖼖𖽻𖾐．𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼦𖽑𖽦 𖼄𖽦 𖼈𖽳 𖼷𖽶𖾐 𖼄𖽳𖾐 𖼺𖽺𖾑，𖼽𖽻 𖼄𖽳𖾑 𖼞𖽳𖾐 𖼄𖽡𖾐 𖼮𖽑𖽙𖾐 𖼈𖽪 𖼇𖽕 𖼖𖽻 𖼊𖽑𖽺 𖼞𖽜 𖼦𖽑𖽙𖾐．𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼞𖽑𖽶𖾑 𖼄𖽡𖾐 𖼊𖽺𖾐 𖼄𖽳𖾑 𖼄𖽳 𖼇𖽕 𖼖𖽻 𖼞𖽳𖾐 𖼣𖽻𖾐． 21 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽑𖽙𖾐 𖼮𖽑𖽡𖾐 𖼊𖽪 𖼞𖽳𖾐 𖼷𖽑𖽻𖾐 𖼀𖽺，𖼽𖽱𖾐 𖼺𖽴𖾑 𖼮𖽑𖽢𖾑 𖼽𖽻 𖼈𖽳𖾐 𖼞𖽜 𖼮𖽜𖾐 𖼀𖽑𖽙 𖼀𖽑𖽢． 22 𖼍𖽡𖾐 𖼄𖽻 𖼞𖽳𖾐 𖼄𖽡𖾐 𖼮𖽑𖽙𖾐 𖼍𖽺𖾑 𖼽𖽱𖾐 𖼺𖽴𖾑 𖼄𖽔 𖼈𖽳𖾐，𖼞𖽪𖾐 𖼮𖽡𖽺𖾐 𖼇𖽕 𖼖𖽻 𖼷𖽙 𖼊𖽪𖾐 𖼐𖽺𖾐 𖼀𖽑𖽨𖾐 𖼀𖽑𖽡 𖼽𖽻 𖼈𖽳𖾐 𖼊𖽑𖽺 𖼞𖽜，𖼽𖽻 𖼈𖽳𖾐 𖼇𖽕 𖼖𖽻 𖼞𖽑𖽙𖾐 𖼞𖽜 𖼺𖽪𖾐 𖼊𖽑𖽺 𖽂𖽙𖾐 𖼷𖽙 𖼊𖽙𖾐 𖼺𖽺𖾑，𖼽𖽻 𖼈𖽳𖾐 𖼞𖽳𖾐 𖼄𖽡𖾐 𖼮𖽑𖽙𖾐 𖼄𖽔 𖼈𖽪．
23 𖼽𖽱𖾐 𖼺𖽴𖾑 𖼷𖽑𖽻𖾐 𖼀𖽺 𖼖𖽙𖾐 𖼀𖽦𖾐：“𖽃𖽙𖾑 𖼐𖽑𖽡𖾐 𖼣𖽙𖾐 𖼇𖽕 𖼖𖽻 𖼖𖽙𖾐 𖼀𖽙𖾐 𖼐𖽑𖽡𖾐 𖼈𖽳𖾐 𖼐𖽺𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖼄𖽡𖾐 𖼮𖽑𖽙𖾐 𖼊𖽑𖽺 𖼈𖽳𖾐．𖼐𖽦𖾐 𖼄𖽺！ 𖼳𖽶𖾑 𖼄𖽙𖾐 𖼦𖽑𖽺𖾑 𖼠𖽻𖾐 𖼮𖽻𖾐，𖼐𖽑𖽡𖾐 𖼈𖽳𖾐 𖼈𖽺𖾐 𖼂𖽡𖾐 𖼽𖽡𖾐 𖽂𖽙𖾐 𖼍𖽳𖾐 𖼊𖽙𖾐． 24 𖼖𖽚𖾑 𖼄𖽚 𖼠𖽜𖾐 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼈𖽳𖾐 𖼣𖽙 𖼀𖽜𖾐 𖼊𖽑𖽡 𖼀𖽜𖾐 𖼇𖽕 𖼖𖽻 𖼊𖽑𖽺 𖼞𖽜 𖼖𖽡𖾐，𖼖𖽡𖾐 𖼀𖽜𖾐 𖼐𖽑𖽡𖾐 𖼈𖽳𖾐 𖼽𖽻 𖼄𖽳𖾑 𖼞𖽳𖾐 𖼣𖽻𖾐，𖼳𖽶𖾑 𖼄𖽙𖾐 𖼂𖽺𖾐，𖼦𖽑𖽔𖾐 𖼖𖽺𖾑 𖼐𖽑𖽡𖾐 𖼈𖽳𖾐 𖼐𖽺𖾐 𖼐𖽑𖽡𖾐 𖼈𖽳𖾐 𖽃𖽔𖾑 𖼞𖽑𖽶𖾐 𖼷𖽑𖽻𖾐、 𖽃𖽔𖾐 𖼞𖽶𖾑 𖼞𖽳𖾐 𖼷𖽙 𖼊𖽪𖾐 𖽂𖽙𖾐 𖼂𖽺𖾐 𖼊𖽙𖾐．”
25 𖼽𖽻 𖼈𖽳𖾐 𖼀𖽦𖾐：“𖼐𖽑𖽡𖾐 𖼣𖽙𖾐 𖼈𖽳𖾐 𖼞𖽜 𖽂𖽙𖾐 𖼠𖽙𖾑，𖼮𖽡 𖼽𖽡𖾑 𖼣𖽙𖾐 𖼈𖽳𖾐 𖼊𖽑𖽺 𖼞𖽜 𖼦𖽑𖽻𖾐，𖼣𖽙𖾐 𖼈𖽳𖾐 𖼐𖽑𖽧𖾐 𖼺𖽳 𖼄𖽙𖾐 𖼇𖽕 𖼖𖽻 𖼞𖽳𖾐 𖼮𖽜𖾐 𖼀𖽑𖽙 𖼂𖽺𖾐 𖼊𖽻𖾐．”
26 𖽃𖽔𖾐 𖼺𖽺𖾑，𖼽𖽱𖾐 𖼺𖽴𖾑 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽳𖾐 𖼄𖽡𖾐 𖼮𖽑𖽙𖾐 𖼖𖽙𖾐 𖼀𖽙𖾐 𖼳𖽪𖾐 𖼮𖽨𖾐 𖼊𖽑𖽡 𖼮𖽨𖾐 𖼍𖽧𖾑 𖼍𖽙𖾑，𖼖𖽚𖾑 𖼄𖽚 𖼞𖽑𖽙𖾐 𖼠𖽜𖾐 𖽂𖽙𖾐 𖼺𖽪𖾐 𖼣𖽙 𖼀𖽜𖾐 𖼊𖽑𖽡 𖼀𖽜𖾐 𖼇𖽕 𖼖𖽻 𖼊𖽑𖽺 𖼞𖽜 𖼖𖽡𖾐，𖽃𖽙𖾑 𖼐𖽑𖽡𖾐 𖼖𖽙𖾐 𖼮𖽑𖽡𖾐 𖼖𖽺𖾑 𖼳𖽪𖾐 𖼍𖽳𖾐 𖼺𖽺．𖼦𖽑𖽻𖾐 𖼊𖽑𖽻𖾐，𖼍𖽡𖾐 𖼄𖽻 𖼞𖽳𖾐 𖼄𖽡𖾐 𖼮𖽑𖽙𖾐 𖼇𖽕 𖼖𖽻 𖼊𖽑𖽺 𖼄𖽔 𖼞𖽜．
𖼽𖽔 𖼠𖽴𖾑 𖼽𖽱𖾐 𖼺𖽴𖾑 𖼞𖽜 𖼄𖽳𖾐 𖼷𖽑𖽦𖾐
27 𖼽𖽡 𖼺𖽴𖾑 𖼖𖽡𖽦𖾑 𖼈𖽴 𖼷𖽑𖽻𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼠𖽜𖾐 𖼳𖽔𖾐 𖼄𖽡𖾑 𖼐𖽦𖾐 𖼞𖽳𖾐 𖼮𖽻𖾐，𖼄𖽡𖾐 𖼳𖽡𖽪 𖼈𖽳𖾐 𖼍𖽙𖾑，𖼀𖽑𖽙 𖼍𖽪𖾐 𖼖𖽻𖾐 𖼺𖽺𖾑，𖼷𖽑𖽻𖾐 𖼦𖽑𖽔𖾐 𖼮𖽶𖾐 𖼄𖽨．
28 𖼽𖽔 𖼠𖽴𖾑 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼷𖽑𖽡𖾐 𖼳𖽶 𖼞𖽑𖽚 𖼮𖽻𖾐 𖼦𖽑𖽙𖾐，𖼽𖽻 𖼊𖽑𖽡 𖼦𖽑𖽙𖾐 𖼖𖽡𖾐 𖼷𖽑𖽡𖾐 𖼳𖽶 𖼞𖽑𖽚 𖽂𖽙𖾐 𖼮𖽻𖾐．
29 𖼽𖽡 𖼺𖽴𖾑 𖼖𖽡𖽦𖾑 𖼳𖽶𖾐 𖼖𖽻𖾐 𖼮𖽻𖾐 𖼞𖽑𖽶𖾑 𖼮𖽶𖾐，𖼽𖽻 𖼽𖽱𖾐 𖼺𖽴𖾑 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐，𖼀𖽦𖾐：“𖼣𖽙𖾐 𖼞𖽜 𖼐𖽑𖽡𖾐 𖼞𖽳𖾐 𖼮𖽡 𖼽𖽡𖾑 𖽂𖽙𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼖𖽦 𖼀𖽑𖽦𖾐 𖼀𖽑𖽨 𖼣𖽙𖾐 𖼀𖽪𖾐 𖼍𖽻𖾐 𖼞𖽑𖽶𖾐 𖼰𖽡𖽺𖾐 𖼺𖽺𖾑 𖼄𖽳𖾐 𖼷𖽑𖽦𖾐 𖼖𖽡𖾐，𖼐𖽑𖽡𖾐 𖼠𖽕𖾐 𖼰𖽶𖾐 𖼣𖽙𖾐 𖼊𖽑𖽺 𖼐𖽙𖾑 𖼣𖽜 𖼖𖽡𖾐，𖼣𖽙𖾐 𖼊𖽑𖽺 𖼀𖽑𖽨 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖽂𖽙𖾐 𖼍𖽡𖾑 𖼄𖽔 𖼊𖽙𖾐． 30 𖼣𖽙𖾐 𖼣𖽻𖾐 𖼂𖽸𖾑 𖼣𖽻𖾑 𖼄𖽻 𖼖𖽙𖾐 𖼺𖽶𖾑 𖼄𖽻 𖼦𖽑𖽙𖾐 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼣𖽙𖾐 𖼊𖽑𖽺 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼦𖽳 𖼊𖽑𖽧 𖼽𖽡𖾐，𖼀𖽑𖽨 𖼽𖽻 𖼈𖽳𖾐 𖼞𖽳𖾐 𖼖𖽧 𖼀𖽳𖾐 𖼞𖽑𖽶𖾐 𖼍𖽡𖾑 𖼖𖽡𖾐．”
𖼽𖽱𖾐 𖼺𖽴𖾑 𖼀𖽦𖾐：“𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼀𖽦𖾐 𖼖𖽙𖾐 𖼮𖽑𖽻𖾐 𖼂𖽺𖾐 𖼊𖽻𖾐．”
31 𖼽𖽔 𖼠𖽴𖾑 𖼀𖽦𖾐：“𖼐𖽑𖽡𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼖𖽡𖾐．” 𖼽𖽱𖾐 𖼺𖽴𖾑 𖼽𖽻 𖼀𖽙 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼦𖽑𖽙𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼽𖽦 𖼞𖽪𖾐 𖼊𖽑𖽺 𖼮𖽻𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼊𖽑𖽴．