𖼽𖽔 𖼠𖽴𖾑 𖼄𖽢 𖼦𖽙𖾐 𖼽𖽱𖾐 𖼺𖽴𖾑 𖼻𖽙 𖼊𖽑𖽺 𖼞𖽜
48
1 𖼄𖽡𖽻 𖼦𖽑𖽺𖾑 𖼹𖽻𖾐 𖼠𖽚 𖼦𖽑𖽙𖾐 𖼠𖽙𖾑 𖼍𖽻𖾐，𖼷𖽑𖽻𖾐 𖼽𖽱𖾐 𖼺𖽴𖾑 𖼊𖽑𖽺 𖼀𖽦𖾐 𖼊𖽑𖽧 𖼺𖽪𖾐 𖼮𖽻𖾐：“𖼐𖽑𖽡𖽻𖾐 𖼀𖽙 𖼦𖽑𖽔𖾐 𖼮𖽶𖾐 𖼐𖽙𖾐 𖼖𖽡．” 𖽃𖽔𖾐 𖼺𖽺𖾑，𖼽𖽱𖾐 𖼺𖽴𖾑 𖼽𖽻 𖼻𖽙 𖼄𖽔 𖼐𖽕𖾐 𖼳𖽡𖾐 𖼐𖽺𖾐 𖼽𖽡 𖼇𖽕 𖼖𖽡𖽦 𖼊𖽑𖽺 𖼦𖽳 𖼮𖽑𖽻𖾐 𖼽𖽡𖾐．2 𖼷𖽑𖽻𖾐 𖼽𖽔 𖼠𖽴𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖼻𖽙 𖼽𖽱𖾐 𖼺𖽴𖾑 𖼮𖽑𖽡𖾐 𖼖𖽻𖾐 𖼦𖽑𖽻𖾐．” 𖽃𖽔𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼞𖽑𖽙𖾐 𖼊𖽙𖾐 𖼊𖽙𖾐 𖼽𖽦 𖼞𖽪𖾐 𖼊𖽑𖽺 𖼮𖽑𖽻𖾐 𖼍𖽪𖾐 𖼖𖽻𖾐 𖼞𖽑𖽻𖾑 𖼊𖽡𖾐．
3 𖼽𖽔 𖼠𖽴𖾑 𖼽𖽱𖾐 𖼺𖽴𖾑 𖼖𖽙𖾐 𖼀𖽦𖾐：“𖼞𖽑𖽙𖾐 𖼣𖽻𖾐 𖼳𖽶 𖼂𖽺𖾐 𖼠𖽸𖾑 𖼺𖽪𖾐 𖽂𖽙 𖼺𖽙𖾐 𖼂𖽙𖾐，𖽃𖽙𖾑 𖼄𖽺 𖼊𖽑𖽙 𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼖𖽪𖾑 𖼺𖽶𖾐 𖼖𖽪𖾐 𖼞𖽳𖾐 𖼮𖽑𖽻𖾐 𖼊𖽚𖾐 𖼊𖽑𖽧 𖼖𖽻𖾐 𖼣𖽙𖾐 𖼞𖽜 𖼄𖽡𖽻𖾐，𖼄𖽢 𖼖𖽪 𖼣𖽙𖾐 𖼊𖽑𖽺 𖼄𖽻𖾑． 4 𖼣𖽙𖾐 𖼖𖽙𖾐 𖼀𖽦𖾐：‘ 𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼞𖽜 𖼀𖽑𖽙 𖼄𖽨 𖼍𖽪𖾐 𖼖𖽻𖾐，𖼞𖽑𖽙 𖼄𖽙𖾐 𖼳𖽶 𖼀𖽑𖽙 𖼖𖽺𖾑 𖼀𖽑𖽢 𖼊𖽻𖾐，𖼦𖽑𖽔𖾐 𖼖𖽺𖾑 𖼦𖽑𖽺𖾑 𖼄𖽡𖾐 𖼊𖽺𖾐 𖼖𖽪 𖼐𖽑𖽡𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼊𖽑𖽺 𖼞𖽜 𖼺𖽺𖾑，𖼻𖽳𖾐 𖼹𖽦𖾐 𖼞𖽳𖾐 𖼄𖽡𖾐 𖼳𖽡𖽪 𖼂𖽺𖾐．’
5 𖼣𖽙𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼐𖽑𖽡𖾐 𖼊𖽑𖽺 𖼄𖽔 𖼄𖽡𖽻𖾐 𖼖𖽻𖾐 𖼺𖽺 𖽃𖽙𖾑 𖼄𖽺，𖼐𖽑𖽡𖾐 𖼦𖽑𖽺𖾑 𖼠𖽻𖾐 𖼮𖽻𖾐 𖼽𖽚𖾐 𖼺𖽪𖾐 𖼻𖽙 𖼦𖽑𖽺𖾑 𖼐𖽑𖽡 𖼽𖽚𖾐，𖼽𖽻 𖼈𖽳𖾐 𖼣𖽙𖾐 𖼻𖽙 𖼰𖽕𖾐 𖼖𖽡𖾐．𖼖𖽡𖽚 𖼂𖽡𖽦𖾑 𖼐𖽺𖾐 𖼳𖽡𖾐 𖼄𖽡𖽺 𖼣𖽙𖾐 𖼻𖽙 𖼣𖽻𖾐 𖼖𖽙𖾐 𖼺𖽶𖾑，𖼽𖽡 𖼇𖽕 𖼖𖽡𖽦 𖼐𖽺𖾐 𖼄𖽔 𖼐𖽕 𖼳𖽡𖾐 𖼖𖽺𖾑 𖼣𖽙𖾐 𖼻𖽙 𖼰𖽕𖾐 𖼊𖽻𖾐． 6 𖼠𖽙𖾑 𖼍𖽻𖾐 𖼐𖽑𖽡𖾐 𖼞𖽑𖽙𖾐 𖼽𖽚𖾐 𖼺𖽪𖾐 𖼐𖽑𖽡𖾐 𖼞𖽳𖾐 𖼣𖽻𖾐，𖼦𖽑𖽻𖾐 𖼊𖽑𖽻𖾐 𖼽𖽻 𖼈𖽳𖾐 𖼽𖽡 𖼇𖽕 𖼖𖽡𖽦 𖼐𖽺𖾐 𖼄𖽔 𖼐𖽕 𖼳𖽡𖾐 𖼞𖽳𖾐 𖼮𖽑𖽪𖾐 𖼳𖽶 𖼖𖽙𖾐 𖼮𖽑𖽻𖾐 𖼄𖽡𖾐 𖼳𖽡𖽪 𖼀𖽜𖾐 𖽂𖽙𖾐 𖼊𖽙𖾐．
7 𖼣𖽙𖾐 𖼂𖽔𖾐 𖼍𖽗𖾑 𖼽𖽕𖾑 𖼖𖽕 𖼄𖽡𖾐 𖼊𖽺𖾐 𖼮𖽑𖽻𖾐 𖼞𖽚 𖼖𖽻𖾐 𖼞𖽑𖽶𖾑 𖼮𖽶𖾐，𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼞𖽳𖾐 𖼮𖽨𖾐 𖼄𖽙𖾐 𖼊𖽑𖽺 𖼽𖽡 𖼇𖽕 𖼊𖽑𖽔𖾐 𖼖𖽪𖾐 𖼞𖽳𖾐 𖼄𖽔 𖼮𖽑𖽡𖾐 𖼺𖽺 𖼞𖽑𖽶𖾑 𖼠𖽻𖾐，𖼖𖽔𖾐 𖼰𖽡𖽦 𖼣𖽙𖾐 𖼄𖽦𖾐 𖼊𖽪 𖼮𖽑𖽡𖽺 𖼮𖽻𖾐 𖼳𖽶𖾐 𖼦𖽑𖽙𖾐 𖼺𖽺𖾑，𖼣𖽙𖾐 𖼽𖽻 𖼊𖽑𖽺 𖼀𖽑𖽨 𖼽𖽡 𖼇𖽕 𖼊𖽑𖽔𖾐 𖼽𖽡𖾐 𖼞𖽳𖾐 𖼮𖽨𖾐 𖼄𖽙𖾐 𖼦𖽜 𖼍𖽡𖾑．” 𖼽𖽡 𖼇𖽕 𖼊𖽑𖽔𖾐 𖼦𖽑𖽺𖾑 𖼂𖽚 𖼖𖽡𖾑 𖼦𖽴 𖼣𖽻𖾐．
8 𖼽𖽡 𖼺𖽴𖾑 𖼖𖽡𖽦𖾑 𖼽𖽱𖾐 𖼺𖽴𖾑 𖼻𖽙 𖼊𖽑𖽺 𖼄𖽡𖽻𖾐 𖼺𖽺𖾑，𖼊𖽻 𖼐𖽙𖾐：“𖼽𖽻 𖼈𖽳𖾐 𖽃𖽔 𖼺𖽺 𖼣𖽻𖾐？”
9 𖼽𖽱𖾐 𖼺𖽴𖾑 𖼽𖽻 𖼀𖽙 𖼊𖽑𖽺 𖼊𖽻 𖼞𖽑𖽚：“𖼽𖽻 𖼈𖽳𖾐 𖼣𖽙𖾐 𖼻𖽙 𖼣𖽻𖾐，𖼦𖽑𖽺𖾑 𖽂𖽙 𖼺𖽙𖾐 𖼂𖽙𖾐 𖼖𖽪 𖼣𖽙𖾐 𖼊𖽑𖽺 𖼄𖽻𖾑 𖼺𖽪𖾐 𖼣𖽻𖾐．”
𖼽𖽡 𖼺𖽴𖾑 𖼖𖽡𖽦𖾑 𖼀𖽦𖾐：“𖼽𖽻 𖼈𖽳𖾐 𖼊𖽑𖽺 𖼦𖽳 𖼣𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼖𖽻𖾐，𖼣𖽙𖾐 𖼄𖽢 𖼦𖽙𖾐 𖼽𖽻 𖼈𖽳𖾐 𖼊𖽑𖽺 𖼞𖽜 𖼊𖽻𖾐．”
10 𖼽𖽡 𖼺𖽴𖾑 𖼖𖽡𖽦𖾑 𖼞𖽑𖽚 𖼊𖽑𖽙 𖼄𖽻 𖼺𖽺𖾑，𖼄𖽦𖾐 𖼊𖽪 𖼄𖽦𖾐 𖼈𖽧𖾑，𖼐𖽦𖾐 𖼞𖽕𖾐 𖼄𖽔 𖼠𖽸𖾑．𖼽𖽱𖾐 𖼺𖽴𖾑 𖼽𖽻 𖼈𖽳𖾐 𖼊𖽑𖽺 𖼦𖽳 𖼽𖽻 𖽃𖽙𖾑 𖼄𖽺 𖼮𖽑𖽡𖽺 𖼽𖽡𖾐 𖼺𖽺𖾑，𖼽𖽻 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼮𖽑𖽻 𖼄𖽦𖾐 𖼹𖽮𖾑，𖼽𖽻 𖼈𖽳𖾐 𖼊𖽑𖽺 𖼈𖽝𖾐 𖼍𖽦𖾐． 11 𖼽𖽡 𖼺𖽴𖾑 𖼖𖽡𖽦𖾑 \pn 𖼽𖽱𖾐 𖼺𖽴𖾑 𖼖𖽙𖾐 𖼀𖽦𖾐：“𖼣𖽙𖾐 𖼣𖽝 𖼄𖽔 𖼮𖽑𖽡𖾐 𖼄𖽙𖾐 𖼐𖽑𖽡𖾐 𖼊𖽑𖽺 𖽂𖽙𖾐 𖼄𖽡𖽻𖾐，𖽂𖽙 𖼺𖽙𖾐 𖼂𖽙𖾐 𖼦𖽑𖽔𖾐 𖼖𖽺𖾑 𖼣𖽙𖾐 𖼞𖽜 𖼐𖽑𖽡𖾐 𖼻𖽙 𖼊𖽑𖽺 𖽂𖽙𖾐 𖼄𖽡𖽻𖾐．”
12 𖼽𖽱𖾐 𖼺𖽴𖾑 𖼽𖽻 𖼻𖽙 𖼐𖽑𖽡 𖼽𖽚𖾐 𖼊𖽑𖽺 𖼽𖽡 𖼺𖽴𖾑 𖼖𖽡𖽦𖾑 𖼮𖽑𖽡𖾐 𖼹𖽧𖾑 𖼞𖽳𖾐 𖼮𖽑𖽻𖾐 𖼺𖽶𖾐 𖼦𖽑𖽙𖾐 𖼺𖽺𖾑，𖼽𖽻 𖼂𖽴𖾐 𖼹𖽺𖾐 𖼽𖽻 𖼀𖽙 𖼊𖽑𖽺 𖼊𖽑𖽴． 13 𖽃𖽔𖾐 𖼺𖽺𖾑，𖼽𖽻 𖼻𖽙 𖼐𖽑𖽡 𖼽𖽚𖾐 𖼊𖽑𖽺 𖼺𖽶𖾐 𖼽𖽡 𖼺𖽴𖾑 𖼖𖽡𖽦𖾑 𖽃𖽙𖾑 𖼄𖽺 𖼮𖽑𖽡𖽺 𖼽𖽡𖾐，𖼽𖽡 𖼇𖽕 𖼖𖽡𖽦 𖼞𖽜 𖼽𖽡 𖼺𖽴𖾑 𖼖𖽡𖽦𖾑 𖼞𖽳𖾐 𖼈𖽳𖾑 𖼀𖽳 𖼮𖽻𖾐，𖼄𖽔 𖼐𖽕 𖼳𖽡𖾐 𖼞𖽜 𖼽𖽡 𖼺𖽴𖾑 𖼖𖽡𖽦𖾑 𖼞𖽳𖾐 𖼽𖽙𖾐 𖼀𖽳 𖼮𖽻𖾐． 14 𖼦𖽑𖽻𖾐 𖼊𖽑𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼖𖽦 𖼀𖽑𖽦𖾐 𖼷𖽙𖾐 𖼖𖽙𖾐 𖼳𖽡𖽦𖾑，𖼽𖽙𖾐 𖼀𖽳 𖼮𖽑𖽡𖽺𖾐 𖼻𖽙 𖼽𖽳𖾐 𖼽𖽡 𖼇𖽕 𖼖𖽡𖽦 𖼈𖽪𖾑 𖼊𖽡𖾐 𖼊𖽑𖽺 𖼊𖽦𖾐，𖼈𖽳𖾑 𖼀𖽳 𖼮𖽑𖽡𖽺𖾐 𖼻𖽙 𖼈𖽳 𖼄𖽔 𖼐𖽕 𖼳𖽡𖾐 𖼈𖽪𖾑 𖼊𖽡𖾐 𖼊𖽑𖽺 𖼊𖽦𖾐． 15 𖼽𖽻 𖼄𖽢 𖼦𖽙𖾐 𖼽𖽱𖾐 𖼺𖽴𖾑 𖼊𖽑𖽺 𖼞𖽜，𖼀𖽦𖾐：“𖼣𖽻𖾐 𖼂𖽙𖾐 𖼽𖽕𖾑 𖼂𖽚 𖼖𖽔𖾐 𖼦𖽗 𖼐𖽺𖾐 𖼣𖽻𖾐 𖼀𖽙 𖼽𖽡 𖼺𖽔 𖼞𖽑𖽙𖾐 𖼠𖽙𖾐 𖼳𖽙𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐，𖼐𖽑𖽡𖾐 𖼣𖽙𖾐 𖼊𖽑𖽺 𖼊𖽑𖽡 𖼻𖽳𖾐 𖼐𖽦𖾐 𖼳𖽪𖾐 𖼍𖽻𖾐 𖼠𖽙𖾑 𖽃𖽙𖾑 𖼐𖽑𖽡𖾐 𖼖𖽙𖾐 𖼮𖽑𖽡𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐，
16 𖼐𖽑𖽡𖾐 𖼣𖽙𖾐 𖼊𖽑𖽺 𖼳𖽚𖾑 𖼞𖽑𖽪 𖼠𖽻𖾐 𖼰𖽡𖽳𖾐 𖼞𖽑𖽶𖾐 𖼮𖽑𖽻𖾐 𖼰𖽨𖾑 𖼊𖽑𖽧 𖼖𖽻𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐，𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐 𖼄𖽢 𖼖𖽪 𖽃𖽔𖾐 𖼞𖽶𖾑 𖼦𖽑𖽺𖾑 𖼐𖽑𖽡 𖼽𖽚𖾐 𖼊𖽑𖽺 𖼄𖽻𖾑 𖼞𖽜．𖼽𖽻 𖼈𖽳𖾐 𖼞𖽳𖾐 𖼮𖽑𖽻𖾐 𖼺𖽺𖾑，𖼹𖽦𖾐 𖼹𖽦𖾐 𖼀𖽻𖾐 𖼀𖽻𖾐 𖼞𖽳𖾐 𖼷𖽑𖽻𖾐 𖼞𖽜 𖼣𖽙𖾐 𖼞𖽳𖾐 𖼄𖽡𖾐、 𖼣𖽻𖾐 𖼂𖽙𖾐 𖼽𖽕𖾑 𖼂𖽚 𖼖𖽔𖾐 𖼦𖽗 𖼞𖽳𖾐 𖼄𖽡𖾐 𖼐𖽺𖾐 𖼣𖽻𖾐 𖼀𖽙𖾐 𖼽𖽡 𖼺𖽔 𖼞𖽳𖾐 𖼄𖽡𖾐 𖼊𖽑𖽺 𖽂𖽙𖾐 𖼺𖽝𖾑 𖼖𖽡𖾐．𖼦𖽑𖽔𖾐 𖼖𖽺𖾑 𖼽𖽻 𖼈𖽳𖾐 𖼞𖽜 𖼄𖽡𖾑 𖼐𖽦𖾐 𖼊𖽑𖽺 𖼮𖽻𖾐，𖼻𖽙 𖼦𖽑𖽨𖾐 𖼐𖽜𖾐 𖼖𖽡𖾑 𖼄𖽨 𖼄𖽨 𖼀𖽑𖽙 𖼍𖽪𖾐 𖼖𖽻𖾐 𖼖𖽡𖾐．”
17 𖼽𖽻 𖼀𖽙 𖼖𖽦 𖼀𖽑𖽦𖾐 𖼽𖽙𖾐 𖼀𖽳 𖼮𖽑𖽡𖽺𖾐 𖼽𖽡 𖼇𖽕 𖼖𖽡𖽦 𖼈𖽪𖾑 𖼊𖽡𖾐 𖼊𖽑𖽺 𖼍𖽦𖾐，𖼽𖽱𖾐 𖼺𖽴𖾑 𖼐𖽦𖾐 𖼄𖽡𖽻𖾐 𖼺𖽺𖾑，𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼄𖽔 𖼖𖽺𖾑，𖼽𖽡 𖼇𖽕 𖼖𖽡𖽦 𖼈𖽪𖾑 𖼊𖽡𖾐 𖼊𖽑𖽺 𖼮𖽑𖽻𖾐 𖼽𖽻 𖼀𖽙 𖼖𖽦 𖼀𖽑𖽦𖾐 𖼈𖽺𖾐 𖼄𖽔 𖼐𖽕 𖼳𖽡𖾐 𖼈𖽪𖾑 𖼊𖽡𖾐 𖼊𖽑𖽺 𖼍𖽦𖾐 𖼊𖽡 𖼮𖽑𖽻． 18 𖼽𖽱𖾐 𖼺𖽴𖾑 𖼽𖽻 𖼀𖽙 𖼖𖽙𖾐 𖼀𖽦𖾐：“𖽃𖽔 𖼀𖽙！𖼦𖽑𖽺𖾑 𖼻𖽻𖾐 𖼄𖽔 𖼣𖽻𖾐，𖼦𖽑𖽺𖾑 𖼽𖽚𖾐 𖼺𖽺𖾑 𖼻𖽙 𖼈𖽳 𖼣𖽻𖾐，𖼐𖽑𖽡𖾐 𖼖𖽦 𖼀𖽑𖽦𖾐 𖼽𖽙𖾐 𖼀𖽳 𖼀𖽑𖽨 𖼽𖽻 𖼈𖽪𖾑 𖼊𖽡𖾐 𖼊𖽑𖽺 𖼍𖽦𖾐 𖼞𖽜．”
19 𖼽𖽻 𖼀𖽙 𖼄𖽔 𖼦𖽶𖾐 𖼺𖽺𖾑，𖼀𖽦𖾐：“𖼣𖽙𖾐 𖼺𖽝𖾑 𖼍𖽳𖾐，𖼣𖽙𖾐 𖼻𖽙 𖽃𖽔𖾐，𖼣𖽙𖾐 𖼺𖽝𖾑 𖼍𖽳𖾐！𖼽𖽻 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼖𖽺𖾑 𖼮𖽑𖽪𖾐 𖼳𖽶 𖼈𖽳 𖼄𖽙𖾐 𖼊𖽑𖽡 𖼳𖽶 𖼀𖽑𖽢，𖽂𖽙 𖼊𖽙𖾐 𖼍𖽪𖾐 𖼖𖽻𖾐 𖼊𖽻𖾐．𖼦𖽑𖽻𖾐 𖼊𖽑𖽻𖾐，𖼽𖽻 𖼐𖽑𖽳𖾐 𖼄𖽻 𖼽𖽻 𖼦𖽶𖾑 𖼄𖽔 𖼷𖽑𖽶𖾐 𖽂𖽙 𖼊𖽙𖾐 𖼊𖽻𖾐，𖼽𖽻 𖼐𖽑𖽳𖾐 𖼄𖽻 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼮𖽑𖽪𖾐 𖼳𖽶 𖼄𖽨 𖼄𖽨 𖼀𖽑𖽢 𖼊𖽻𖾐．”
20 𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼽𖽡 𖼺𖽴𖾑 𖼖𖽡𖽦𖾑 𖼄𖽢 𖼦𖽙𖾐 𖼽𖽻 𖼈𖽳𖾐 𖼊𖽑𖽺 𖼞𖽜 𖼺𖽺𖾑，𖼀𖽦𖾐：“𖼽𖽡 𖼺𖽴𖾑 𖼖𖽡𖽦𖾑 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼷𖽑𖽻𖾐 𖼊𖽑𖽺 𖼄𖽢 𖼦𖽙𖾐 𖼞𖽜 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼈𖽳𖾐 𖼄𖽡𖾐 𖼊𖽑𖽺 𖽃𖽶𖾐 𖼺𖽺𖾑，𖼦𖽑𖽺𖾑 𖼻𖽻𖾐 𖼀𖽦𖾐 𖼊𖽻𖾐：‘ 𖽂𖽙 𖼺𖽙𖾐 𖼂𖽙𖾐 𖼽𖽡 𖼇𖽕 𖼖𖽡𖽦 𖼐𖽺𖾐 𖼄𖽔 𖼐𖽕 𖼳𖽡𖾐 𖼊𖽑𖽺 𖼮𖽑𖽪𖾐 𖼮𖽑𖽻 𖼖𖽙𖾐 𖼺𖽶𖾑，𖼐𖽑𖽡𖾐 𖼈𖽳𖾐 𖼊𖽑𖽺 𖼮𖽑𖽪𖾐 𖼮𖽑𖽻 𖼞𖽜．’” 𖽃𖽔𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 \pn 𖼽𖽡 𖼇𖽕 𖼖𖽡𖽦 𖼊𖽑𖽺 𖼻𖽙 𖼈𖽳 𖼰𖽕𖾐，𖼽𖽻 𖼞𖽜 𖼽𖽳𖾐 𖼺𖽪𖾐 𖼀𖽑𖽚𖾐 𖼈𖽳 𖼺𖽪𖾐 𖼖𖽚．
21 𖼽𖽡 𖼺𖽴𖾑 𖼖𖽡𖽦𖾑 𖼹𖽦𖾑 𖼽𖽱𖾐 𖼺𖽴𖾑 𖼖𖽙𖾐 𖼀𖽦𖾐：“𖼐𖽦𖾐 𖼄𖽺！ 𖼣𖽙𖾐 𖼳𖽶𖾐 𖼖𖽻𖾐 𖼮𖽻𖾐．𖼦𖽑𖽻𖾐 𖼊𖽑𖽻𖾐，𖽂𖽙 𖼺𖽙𖾐 𖼂𖽙𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼮𖽻𖾐，𖼐𖽑𖽡𖾐 𖼈𖽳𖾐 𖼊𖽑𖽺 𖼦𖽳 𖼺𖽺𖾑，𖼐𖽑𖽡𖾐 𖼈𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼞𖽳𖾐 𖼄𖽡𖾐 𖼊𖽺𖾐 𖼞𖽚 𖼽𖽡𖾐 𖼊𖽻𖾐． 22 𖼣𖽙𖾐 𖽃𖽙𖾑 𖼄𖽺 𖼊𖽑𖽙 𖽃𖽔𖾑 𖼊𖽑𖽙 𖼐𖽺𖾐 𖼮𖽑𖽡𖽦𖾐 𖼻𖽜 𖼺𖽺𖾑，𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼐𖽻𖾑 𖼂𖽻𖾐 𖼖𖽻𖾐 𖼺𖽪𖾐 𖽂𖽙 𖼰𖽡𖽺𖾐 𖼀𖽙 𖼄𖽡𖾐 𖼞𖽑𖽶𖾑 𖼮𖽑𖽙𖾐，𖽃𖽔𖾑 𖼄𖽳𖾐 𖼖𖽪 𖼐𖽑𖽡𖾐 𖼊𖽑𖽺 𖼄𖽻𖾑，𖼐𖽑𖽡𖾐 𖼞𖽜 𖼐𖽑𖽡𖾐 𖼈𖽧 𖼄𖽻 𖼐𖽑𖽳𖾐 𖼄𖽻 𖼄𖽨𖾐 𖼄𖽔 𖼷𖽑𖽶𖾐 𖼊𖽑𖽡 𖼀𖽜𖾐 𖽂𖽙𖾐．”