𖼽𖽡 𖼺𖽴𖾑 𖼖𖽡𖽦𖾑 𖼈𖽴 𖽃𖽦𖾐 𖼰𖽧 𖼄𖽡𖾐 𖼊𖽺𖾐𖼹𖽺𖾐 𖼽𖽡𖾐
46
1 𖼽𖽡 𖼺𖽴𖾑 𖼖𖽡𖽦𖾑 𖼽𖽻 𖼞𖽑𖽙𖾐 𖼮𖽻𖾐 𖼺𖽪𖾐 𖼠𖽙𖾐 𖼳𖽙𖾐 𖼍𖽪𖾐 𖼖𖽻𖾐，𖼽𖽡𖾐 𖼂𖽡𖽦 𖼳𖽶𖾑 𖼂𖽔𖾐 𖼖𖽪𖾐 𖼞𖽳𖾐 𖼮𖽑𖽡𖾐 𖼺𖽺𖾑，𖼽𖽻 𖼀𖽙 𖼽𖽡 𖼺𖽔 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼍𖽡𖾐． 2 𖼄𖽶 𖼮𖽑𖽧 𖼠𖽻𖾐 𖼞𖽑𖽶𖾐 𖼽𖽡 𖼺𖽴𖾑 𖼖𖽡𖽦𖾑 𖼞𖽑𖽙 𖼣𖽝 𖼄𖽡𖽻 𖼐𖽦𖾐 𖼄𖽡𖽻𖾐，𖽂𖽙 𖼺𖽙𖾐 𖼂𖽙𖾐 𖼽𖽻 𖼊𖽑𖽺 𖽃𖽶𖾐：“𖼽𖽔 𖼠𖽴𖾑，𖼽𖽔 𖼠𖽴𖾑！”𖼽𖽻 𖼊𖽻 𖼞𖽑𖽚：“𖼣𖽙𖾐 𖼦𖽑𖽺𖾑 𖼠𖽻𖾐 𖼮𖽻𖾐 𖼍𖽳𖾐．”
3 𖽂𖽙 𖼺𖽙𖾐 𖼂𖽙𖾐 𖼀𖽦𖾐：“𖼣𖽙𖾐 𖽂𖽙 𖼺𖽙𖾐 𖼀𖽙𖾐 𖼣𖽻𖾐，𖼐𖽑𖽡𖽻𖾐 𖼀𖽙 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼞𖽑𖽶𖾑 𖼽𖽚𖾐 𖼣𖽻𖾐．𖼐𖽑𖽡𖾐 𖼮𖽡𖽮𖾐 𖼄𖽔 𖼻𖽻𖾐，𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼹𖽺𖾐 𖼽𖽡𖾐 𖼮𖽑𖽳𖾐．𖼞𖽪𖾐 𖼮𖽡𖽺𖾐 𖼣𖽙𖾐 𖼐𖽑𖽡𖾐 𖼞𖽜 𖼞𖽑𖽶𖾑 𖼠𖽻𖾐 𖼮𖽻𖾐 𖼺𖽺𖾑，𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼄𖽨 𖼄𖽨 𖼀𖽑𖽙 𖼍𖽪𖾐 𖼖𖽻𖾐，𖼮𖽑𖽪𖾐 𖼳𖽶 𖼈𖽳 𖼄𖽙𖾐 𖼀𖽑𖽢 𖼊𖽻𖾐，． 4 𖼣𖽙𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼹𖽺𖾐 𖼽𖽡𖾐 𖼊𖽻𖾐，𖼦𖽑𖽔𖾐 𖼖𖽺𖾑 𖼐𖽑𖽡𖾐 𖼊𖽑𖽺 𖼦𖽳 𖼊𖽦𖾐 𖼖𖽻𖾐 𖼊𖽻𖾐．𖼽𖽱𖾐 𖼺𖽴𖾑 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼊𖽑𖽺 𖼍𖽻𖾐 𖼺𖽺𖾑，𖼄𖽻 𖼰𖽶𖾐 𖼮𖽑𖽡𖾐 𖼊𖽻𖾐．
5 𖽃𖽔𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼻𖽙 𖼞𖽑𖽶𖾑 𖼹𖽻𖾐 𖼇𖽕 𖼖𖽻 𖼦𖽑𖽙𖾐 𖼽𖽔 𖼠𖽴𖾑 𖼊𖽑𖽺 𖼞𖽜 𖼺𖽪𖾐 𖼮𖽑𖽜𖾐 𖼻𖽜 𖼺𖽺𖾑，𖼽𖽻 𖼈𖽳𖾐 𖽃𖽔 𖼀𖽙 𖼐𖽺𖾐 𖼽𖽻 𖼈𖽳𖾐 𖼄𖽳 𖼻𖽙、 𖼻𖽙 𖼄𖽡𖾐 𖼐𖽜𖾐 𖼞𖽜 𖼊𖽡𖾐．𖼽𖽔 𖼠𖽴𖾑 𖼂𖽡𖽦 𖼳𖽶𖾑 𖼂𖽔𖾐 𖼖𖽪𖾐 𖼞𖽳𖾐 𖼮𖽑𖽻𖾐 𖼺𖽜 𖼍𖽪𖾐． 6 𖼽𖽻 𖼈𖽳𖾐 𖼮𖽡𖽺 𖼞𖽕，𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼞𖽑𖽙𖾐 𖽂𖽙𖾐 𖼺𖽪𖾐 𖼈𖽺𖾐 𖼺𖽺𖾑，𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼹𖽺𖾐 𖼽𖽡𖾐．𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼽𖽔 𖼠𖽴𖾑 𖼐𖽺𖾐 𖼽𖽻 𖼻𖽙 𖼮𖽑𖽡 𖼖𖽡𖾑 𖼖𖽦𖾐，𖼄𖽳𖾑 𖼄𖽳 𖼷𖽙𖾐 𖼖𖽙𖾐 𖼮𖽑𖽻𖾐 𖼽𖽡𖾐． 7 𖼽𖽔 𖼠𖽴𖾑 𖼞𖽳𖾐 𖼻𖽙、 𖼖𖽡𖾑 𖼂𖽙𖾑、 𖼻𖽙 𖼄𖽳、 𖼖𖽡𖾑 𖼄𖽙𖾐，𖼽𖽻 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼄𖽳𖾑 𖼄𖽳𖼊𖽑𖽺 𖼦𖽳 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼽𖽡𖾐．
𖼽𖽔 𖼠𖽴𖾑 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐
8 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽡𖾐 𖼖𖽻𖾐 𖼺𖽪𖾐 𖼽𖽡 𖼺𖽴𖾑 𖼖𖽡𖽦𖾑 𖼈𖽴 𖼷𖽑𖽻𖾐，𖼞𖽑𖽶𖾑 𖼽𖽔 𖼠𖽴𖾑 𖼐𖽺𖾐 𖼽𖽻 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼣𖽻𖾐．𖼽𖽻 𖼈𖽳𖾐 𖼞𖽳𖾐 𖼄𖽡𖾐 𖼈𖽝 𖼍𖽕𖾑 𖽂𖽚 𖼍𖽙𖾑：
𖼽𖽔 𖼠𖽴𖾑 𖼞𖽳𖾐 𖼻𖽙 𖼈𖽳 𖼖𖽡𖽚 𖼂𖽡𖽦𖾑 𖼣𖽻𖾐．
9 𖼖𖽡𖽚 𖼂𖽡𖽦𖾑 𖼞𖽳𖾐 𖼻𖽙 𖼦𖽔𖾐 𖼐𖽙𖾑、 𖼇𖽕 𖼖𖽪𖾑、 𖼳𖽡𖾐 𖼺𖽶𖾐 𖼖𖽪𖽦 𖼐𖽺𖾐 𖼰𖽡𖽔𖾐 𖼄𖽡 𖼣𖽻𖾐．
10 𖼳𖽡𖾐 𖼄𖽡𖽺 𖼞𖽳𖾐 𖼻𖽙 𖼽𖽺𖾐 𖼄𖽪 𖼖𖽡𖾑、 𖼽𖽔 𖼄𖽡𖽺、 𖽃𖽔𖾐 𖼳𖽡𖽕、 𖼽𖽔 𖼰𖽡𖽺𖾐、 𖼺𖽙 𖼳𖽡𖽕 𖼐𖽺𖾐 𖼺𖽻 𖼖𖽚 𖼣𖽻𖾐．𖼺𖽻 𖼖𖽚 𖼦𖽑𖽺𖾑 𖼰𖽡𖽔𖾐 𖼐𖽕 𖼺𖽪𖾐 𖼻𖽙 𖼄𖽳 𖼽𖽚𖾐 𖼺𖽪𖾐 𖼣𖽻𖾐．
11 𖼖𖽡𖾑 𖼈𖽪𖽺𖾑 𖼞𖽳𖾐 𖼻𖽙 𖼠𖽴 𖼳𖽱𖾑、 𖼠𖽜𖾐 𖼳𖽡𖽕 𖼐𖽺𖾐 𖼄𖽡 𖼖𖽔𖾐 𖼖𖽡𖾑 𖼣𖽻𖾐．
12 𖼽𖽚 𖼍𖽕𖾑 𖼞𖽳𖾐 𖼻𖽙 𖽃𖽳、 𖽃𖽴 𖼐𖽕、 𖼳𖽶𖾑 𖼖𖽔𖾐、 𖼇𖽕 𖼖𖽴𖾑 𖼺𖽶𖾐 𖼐𖽺𖾐 𖼳𖽡𖽺𖾑 𖼖𖽔𖾐 𖼣𖽻𖾐．𖼦𖽑𖽻𖾐 𖼊𖽑𖽻𖾐，𖽃𖽳 𖼐𖽺𖾐 𖽃𖽴 𖼐𖽕 𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼮𖽻𖾐 𖼳𖽶𖾐 𖼦𖽑𖽙𖾐．𖼇𖽕 𖼖𖽴𖾑 𖼺𖽶𖾐 𖼞𖽳𖾐 𖼻𖽙 𖼳𖽡𖾐 𖼺𖽶𖾐 𖼖𖽪𖽦 𖼐𖽺𖾐 𖼦𖽔𖾐 𖼄𖽪 𖼖𖽴𖾑 𖼣𖽻𖾐．
13 𖼽𖽡 𖼺𖽕𖾑 𖼰𖽡𖽔𖾐 𖼞𖽳𖾐 𖼻𖽙 𖼊𖽑𖽚 𖼖𖽔𖾐、 𖼀𖽑𖽪 𖽂𖽗、 𖼽𖽱𖾐 𖼂𖽚 𖼐𖽺𖾐 𖼳𖽜𖾐 𖼖𖽪𖽦 𖼣𖽻𖾐．
14 𖼳𖽡𖾐 𖼂𖽪𖾑 𖼖𖽪𖽦 𖼞𖽳𖾐 𖼻𖽙 𖼳𖽡𖾐 𖼖𖽡𖽦𖾑、 𖼽𖽡 𖼖𖽪𖽦 𖼐𖽺𖾐 𖼽𖽔 𖼖𖽡𖾑 𖼣𖽻𖾐．
15 𖼽𖽻 𖼈𖽳𖾐 𖼺𖽙𖾐 𖼷𖽑𖽡𖾐 𖼺𖽙𖾐 𖼽𖽚𖾐 𖼊𖽑𖽺 𖼂𖽔𖾐 𖼍𖽗𖾑 𖼽𖽕𖾑 𖼖𖽕 𖼄𖽡𖾐 𖼊𖽺𖾐 𖼮𖽻𖾐 𖼽𖽚𖾐，𖼦𖽑𖽺𖾑 𖼹𖽻𖾐 𖼖𖽡𖾑 𖼽𖽕𖾑 𖼐𖽺𖾐 𖼽𖽔 𖼠𖽴𖾑 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼣𖽻𖾐．𖼖𖽡𖾑 𖼽𖽕𖾑 𖼐𖽺𖾐 𖼽𖽔 𖼠𖽴𖾑 𖼞𖽳𖾐 𖼻𖽙 𖼄𖽳 𖼍𖽡 𖼐𖽕 𖼄𖽡𖾐．
16 𖼰𖽡𖽔𖾐 𖼍𖽴 𖼞𖽳𖾐 𖼻𖽙 𖼳𖽡 𖼇𖽺𖾐 𖼽𖽲、 𖼦𖽔𖾐 𖼰𖽡𖾐、 𖼳𖽪𖾐 𖼐𖽑𖽧、 𖼽𖽡 𖼺𖽶𖾐 𖼂𖽜、 𖼽𖽡 𖼖𖽡𖾑、 𖼽𖽕𖾑 𖼖𖽚 𖼍𖽡 𖼐𖽺𖾐 𖼽𖽕𖾑 𖼖𖽡𖽦𖾑 𖼖𖽡𖾑 𖼣𖽻𖾐．
17 𖼽𖽕𖾑 𖼳𖽴𖾑 𖼞𖽳𖾐 𖼻𖽙 𖼽𖽺𖾐 𖼐𖽕、 𖼽𖽡𖾑 𖼳𖽶𖾐 𖽂𖽗、 𖼽𖽡𖾑 𖼳𖽶𖾐 𖼈𖽪𖽺 𖼐𖽺𖾐 𖼂𖽡 𖼖𖽡𖾑 𖼽𖽕𖾑 𖼣𖽻𖾐，𖼽𖽻 𖼈𖽳𖾐 𖼐𖽜𖾑 𖼄𖽙𖾐 𖼳𖽡𖾐 𖼖𖽔𖾐 𖼄𖽡𖾐．𖼂𖽡 𖼖𖽡𖾑 𖼽𖽕𖾑 𖼞𖽳𖾐 𖼻𖽙 𖼳𖽡𖾐 𖼂𖽡𖽦 𖼐𖽺𖾐 𖼄𖽔 𖼰𖽧 𖼣𖽻𖾐．
18 𖼽𖽻 𖼈𖽳𖾐 𖼷𖽑𖽡𖾐 𖼮𖽑𖽡𖽚 𖼽𖽚𖾐，𖼦𖽑𖽺𖾑 𖼳𖽧 𖼀𖽑𖽕𖾑 𖼐𖽺𖾐 𖼽𖽔 𖼠𖽴𖾑 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼣𖽻𖾐．𖼳𖽧 𖼀𖽑𖽕𖾑 𖼦𖽑𖽺𖾑 𖼖𖽔𖾐 𖼂𖽔𖾐 𖼀𖽑𖽨 𖼽𖽻 𖼻𖽙 𖼄𖽳 𖼖𖽡𖾑 𖼽𖽕𖾑 𖼊𖽑𖽺 𖼞𖽜 𖼺𖽪𖾐 𖼮𖽜𖾐 𖼄𖽙𖾐 𖼣𖽻𖾐．
19 𖼽𖽔 𖼠𖽴𖾑 𖼄𖽳 𖼻𖽙 𖼖𖽔𖾐 𖼰𖽡𖽦 𖼽𖽚𖾐 𖼺𖽪𖾐 𖼽𖽱𖾐 𖼺𖽴𖾑 𖼐𖽺𖾐 𖼂𖽡𖽦𖾑 𖼽𖽔 𖼄𖽡𖽺 𖼣𖽻𖾐．
20 𖼽𖽱𖾐 𖼺𖽴𖾑 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽻𖾐 𖼞𖽑𖽶𖾑 𖼮𖽶𖾐，𖼽𖽻 𖼻𖽙 𖼄𖽔 𖼐𖽕 𖼳𖽡𖾐 𖼐𖽺𖾐 𖼽𖽡 𖼇𖽕 𖼖𖽡𖽦 𖼊𖽑𖽺 𖼽𖽚𖾐，𖼽𖽻 𖼄𖽳 𖼻𖽙 𖼞𖽑𖽶𖾑 𖽃𖽗𖾐 𖼖𖽪𖾐 𖼞𖽳𖾐 𖼍𖽡𖾐 𖼄𖽻 𖼂𖽙𖾐 𖼊𖽑𖽧 𖼇𖽺𖾐 𖼖𖽔𖾐 𖼻𖽙 𖼄𖽳 𖼽𖽕𖾑 𖼳𖽡𖾐 𖼐𖽕𖾑 𖼣𖽻𖾐．
21 𖼂𖽡𖽦𖾑𖼽𖽔 𖼄𖽡 𖼞𖽳𖾐 𖼻𖽙 𖼂𖽡 𖼖𖽔𖾐、 𖼂𖽡 𖼰𖽡𖽦、 𖼽𖽕𖾑 𖼳𖽸 𖼂𖽡𖽦、 𖼰𖽡𖾐 𖼖𖽔𖾐、 𖼐𖽺 𖼄𖽕𖾑、 𖼽𖽡 𖼳𖽡𖾐、 𖼖𖽚 𖼳𖽸、 𖼄𖽪 𖼀𖽑𖽧、 𖼦𖽪𖾑 𖼀𖽑𖽧 𖼐𖽺𖾐 𖼽𖽕𖾑 𖼖𖽴𖾑 𖼣𖽻𖾐．
22 𖼽𖽻 𖼈𖽳𖾐 𖼷𖽑𖽡𖾐 𖼖𖽡𖾐 𖼽𖽚𖾐，𖼦𖽑𖽺𖾑 𖼖𖽔𖾐 𖼰𖽡𖽦 𖼐𖽺𖾐 𖼽𖽔 𖼠𖽴𖾑 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼣𖽻𖾐．
23 𖼍𖽗𖾑 𖼞𖽳𖾐 𖼻𖽙 𖼦𖽪𖾑 𖼳𖽜𖾐 𖼣𖽻𖾐．
24 𖼐𖽕 𖼇𖽮 𖼊𖽑𖽔𖾐 𖼖𖽡𖾑 𖼞𖽳𖾐 𖼻𖽙 𖼽𖽔 𖼳𖽡𖽱𖾐、 𖼠𖽪𖾐 𖼐𖽑𖽧、 𖼽𖽺𖾐 𖼺𖽴𖾑 𖼐𖽺𖾐 𖼳𖽶𖾑 𖼖𖽜 𖼣𖽻𖾐．
25 𖼽𖽻 𖼈𖽳𖾐 𖼳𖽶 𖼽𖽚𖾐，𖼦𖽑𖽺𖾑 𖼀𖽑𖽡𖾑 𖼖𖽔𖾐 𖼐𖽺𖾐 𖼽𖽔 𖼠𖽴𖾑 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼣𖽻𖾐．𖼀𖽑𖽡𖾑 𖼖𖽔𖾐 𖼦𖽑𖽺𖾑 𖼖𖽔𖾐 𖼂𖽔𖾐 𖼀𖽑𖽨 𖼽𖽻 𖼻𖽙 𖼄𖽳 𖼖𖽔𖾐 𖼰𖽡𖽦 𖼊𖽑𖽺 𖼞𖽜 𖼺𖽪𖾐 𖼮𖽜𖾐 𖼄𖽙𖾐 𖼣𖽻𖾐．
26 𖼽𖽔 𖼠𖽴𖾑 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐，𖼽𖽻 𖼖𖽙𖾐 𖼮𖽑𖽻𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽡𖾐 𖼖𖽻𖾐 𖼺𖽪𖾐，𖼽𖽻 𖼮𖽑𖽡 𖼄𖽙𖾐 𖼄𖽔 𖼈𖽜𖾐 𖼮𖽑𖽻𖾐 𖼖𖽺𖾑 𖼮𖽑𖽡𖽚 𖼷𖽑𖽡𖾐 𖼮𖽑𖽡𖽚 𖼽𖽚𖾐 𖼮𖽻𖾐． 27 𖼹𖽦𖾑 𖼽𖽱𖾐 𖼺𖽴𖾑 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽳𖾐 𖼽𖽚𖾐 𖼺𖽪𖾐 𖼻𖽙 𖼐𖽑𖽡 𖼽𖽚𖾐 𖼮𖽻𖾐．𖼽𖽔𖾐 𖼠𖽴𖾑 𖼈𖽴 𖼷𖽑𖽻𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽡𖾐 𖼖𖽻𖾐 𖼺𖽪𖾐 𖼄𖽳𖾑 𖼄𖽳 𖼳𖽶 𖼷𖽑𖽡𖾐 𖼽𖽚𖾐 𖼣𖽻𖾐．
𖼽𖽱𖾐 𖼺𖽴𖾑 𖼠𖽜𖾐 𖼳𖽔𖾐 𖼄𖽡𖾐 𖼊𖽺𖾐 𖼽𖽻 𖼀𖽙 𖽃𖽙𖾑 𖼄𖽺 𖼹𖽶𖾐
28 𖼽𖽔 𖼠𖽴𖾑 𖽃𖽙𖾑 𖼄𖽺 𖼽𖽚 𖼍𖽕𖾑 𖼊𖽑𖽺 𖼹𖽡𖾐 𖼽𖽱𖾐 𖼺𖽴𖾑 𖼊𖽑𖽺 𖼄𖽡𖽻𖾐 𖼽𖽡𖾐，𖼽𖽱𖾐 𖼺𖽴𖾑 𖼞𖽜 𖼷𖽑𖽻𖾐 𖼹𖽡𖾐 𖼽𖽻 𖼈𖽳𖾐 𖼊𖽑𖽺 𖼮𖽨𖾐 𖼦𖽳 𖼠𖽜𖾐 𖼳𖽔𖾐 𖼄𖽡𖾐 𖼊𖽺𖾐 𖼽𖽡𖾐 𖼺𖽺𖾑，𖼽𖽻 𖼈𖽳𖾐 𖼖𖽻𖾐 𖼠𖽜𖾐 𖼳𖽔𖾐 𖼄𖽡𖾐 𖼊𖽺𖾐 𖼮𖽑𖽡𖾐． 29 𖼽𖽱𖾐 𖼺𖽴𖾑 𖼮𖽑𖽜𖾐 𖼂𖽺𖾐 𖼳𖽡𖽻𖾐 𖼺𖽺𖾑，𖼠𖽜𖾐 𖼳𖽔𖾐 𖼄𖽡𖾐 𖼊𖽺𖾐 𖼊𖽦𖾐 𖼽𖽡𖾐 𖼽𖽻 𖼀𖽙 𖽃𖽙𖾑 𖼄𖽺 𖼹𖽶𖾐．𖼽𖽱𖾐 𖼺𖽴𖾑 𖼽𖽻 𖼀𖽙 𖼊𖽑𖽺 𖼄𖽡𖽻𖾐 𖼍𖽺𖾑 𖼺𖽺，𖼽𖽻 𖼀𖽙 𖼖𖽺𖾐 𖼀𖽺 𖼍𖽦𖾐 𖼍𖽡 𖼺𖽺𖾑，𖼊𖽑𖽡 𖼠𖽸𖾑 𖼄𖽙𖾐 𖼣𖽶𖾐 𖼦𖽑𖽙𖾐． 30 𖼽𖽡 𖼺𖽴𖾑 𖼖𖽡𖽦𖾑 \pn 𖼽𖽱𖾐 𖼺𖽴𖾑 𖼖𖽙𖾐 𖼀𖽦𖾐：“𖽃𖽔𖾑 𖼄𖽳𖾐 𖼣𖽙𖾐 𖼐𖽑𖽡𖾐 𖼊𖽑𖽺 𖽂𖽙𖾐 𖼄𖽡𖽻𖾐，𖼐𖽑𖽡𖾐 𖼦𖽑𖽔𖾐 𖼖𖽺𖾑 𖼠𖽙𖾑 𖼍𖽳𖾐 𖼺𖽺，𖼣𖽙𖾐 𖼞𖽜 𖼳𖽶𖾐 𖼦𖽑𖽙𖾐 𖼀𖽦𖾐 𖼖𖽺𖾑 𖼐𖽑𖽧𖾐 𖼺𖽳 𖼺𖽪𖾐 𖼣𖽻𖾐．”
31 𖼽𖽱𖾐 𖼺𖽴𖾑 𖼽𖽻 𖼈𖽧 𖼄𖽻 𖼐𖽑𖽳𖾐 𖼄𖽻 𖼐𖽺𖾐 𖼽𖽻 𖼀𖽙 𖼈𖽴 𖼷𖽑𖽻𖾐 𖼞𖽑𖽙𖾐 𖼣𖽻𖾐 𖼖𖽙𖾐 𖼀𖽦𖾐：“𖼣𖽙𖾐 𖼊𖽦𖾐 𖼽𖽡𖾐 𖼇𖽕 𖼖𖽻 𖼖𖽙𖾐 𖼀𖽦𖾐 𖼊𖽑𖽧 𖼊𖽻𖾐：‘ 𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼮𖽑𖽻𖾐 𖼖𖽻𖾐 𖼺𖽪𖾐 𖼣𖽙𖾐 𖼈𖽧 𖼄𖽻 𖼐𖽑𖽳𖾐 𖼄𖽻 𖼐𖽺𖾐 𖼣𖽻𖾐 𖼀𖽙 𖼊𖽑𖽡 𖼈𖽴，𖽃𖽔𖾑 𖼄𖽳𖾐 𖼦𖽑𖽺𖾑 𖼠𖽻𖾐 𖼮𖽑𖽡𖾐 𖼖𖽻𖾐 𖼦𖽑𖽻𖾐． 32 𖼽𖽻 𖼈𖽳𖾐 𖼮𖽡𖽺 𖼖𖽚𖾑 𖼀𖽑𖽙 𖼣𖽻𖾐，𖼮𖽡𖽺 𖼰𖽡𖽺𖾑 𖼮𖽡𖽺 𖼖𖽚𖾑 𖼷𖽑𖽻𖾐 𖼻𖽳𖾐 𖼠𖽚．𖼽𖽻 𖼈𖽳𖾐 𖼞𖽑𖽙𖾐 𖼮𖽻𖾐 𖼺𖽪𖾐 𖼐𖽑𖽡 𖼐𖽺𖾐 𖽃𖽔𖾑 𖼮𖽑𖽸 𖼽𖽻𖾐，𖼄𖽳𖾑 𖼄𖽳 𖼞𖽕 𖼦𖽑𖽺𖾑 𖼠𖽻𖾐 𖼮𖽑𖽡𖾐 𖼖𖽻𖾐 𖼦𖽑𖽻𖾐．’
33 𖼇𖽕 𖼖𖽻 𖼐𖽑𖽡𖾐 𖼈𖽳𖾐 𖼊𖽑𖽺 𖽃𖽶𖾐 𖼂𖽡𖾐 𖼽𖽡𖾐 𖼽𖽻 𖼊𖽑𖽺 𖼄𖽡𖽻𖾐 𖼞𖽑𖽶𖾑 𖼮𖽶𖾐，𖼽𖽻 𖼐𖽑𖽡𖾐 𖼈𖽳𖾐 𖼊𖽑𖽺 𖽃𖽔 𖼊𖽺𖾑 𖼳𖽶 𖼄𖽡𖽻 𖼄𖽪𖾐 𖼊𖽻 𖼐𖽙𖾐 𖼊𖽑𖽡𖾑 𖼣𖽻𖾐？ 34 𖼐𖽑𖽡𖾐 𖼈𖽳𖾐 𖼦𖽑𖽺𖾑 𖼻𖽻𖾐 𖼊𖽻 𖼞𖽑𖽚 𖼖𖽡𖾐：‘ 𖼺𖽡 𖼀𖽑𖽙 𖽃𖽔𖾐！𖼣𖽙𖾐 𖼈𖽳𖾐 𖼽𖽳𖾐 𖼊𖽑𖽙 𖼮𖽑𖽻𖾐 𖽃𖽔𖾑 𖼄𖽳𖾐 𖼖𖽙𖾐 𖼮𖽑𖽡𖾐，𖼮𖽡𖽺 𖼰𖽡𖽺𖾑 𖼮𖽡𖽺 𖼖𖽚𖾑 𖼷𖽑𖽻𖾐 𖼻𖽳𖾐 𖼠𖽚 𖼺𖽪𖾐 𖼣𖽻𖾐．𖼣𖽙𖾐 𖼈𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼖𖽺𖾑 𖼮𖽡𖽺 𖼰𖽡𖽺𖾑 𖼮𖽡𖽺𖾐 𖼖𖽚𖾑 𖼺𖽪𖾐 𖼣𖽻𖾐．’ 𖽃𖽔𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼞𖽜 𖼠𖽜𖾐 𖼳𖽔𖾐 𖼄𖽡𖾐 𖼊𖽺𖾐 𖽂𖽙𖾐 𖼮𖽻𖾐 𖼊𖽙𖾐，𖼞𖽪𖾐 𖼮𖽡𖽺𖾐 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼮𖽡𖽺 𖼖𖽚𖾑 𖼀𖽑𖽙 𖼊𖽑𖽺 𖼐𖽦𖾐 𖼄𖽔 𖼍𖽪𖾐 \fr．”