𖼽𖽱𖾐 𖼺𖽴𖾑 𖼽𖽻 𖼈𖽧 𖼄𖽻 𖼐𖽑𖽳𖾐 𖼄𖽻 𖼊𖽑𖽺 𖼵𖽜𖾑
45
1 𖼽𖽱𖾐 𖼺𖽴𖾑 𖼞𖽑𖽻𖾑 𖼽𖽻 𖼀𖽙 𖼮𖽑𖽶𖾐 𖼮𖽻𖾐 𖼺𖽪𖾐 𖼹𖽡𖾐 𖼖𖽦 𖼞𖽑𖽶𖾑 𖼹𖽻𖾐 𖽃𖽙𖾑 𖼄𖽺 𖼮𖽑𖽡𖽺，𖼷𖽳𖾑 𖼍𖽪𖾐 𖼄𖽔 𖼊𖽙𖾐 𖼺𖽺𖾑，𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼊𖽚𖾐 𖼽𖽡𖾐．” 𖽃𖽔𖾐 𖼺𖽺𖾑 𖼽𖽱𖾐 𖼺𖽴𖾑 𖼽𖽻 𖼈𖽧 𖼄𖽻 𖼐𖽑𖽳𖾐 𖼄𖽻 𖼊𖽑𖽺 𖼵𖽜𖾑 𖼞𖽑𖽶𖾑 𖼮𖽶𖾐，𖼠𖽳𖾐 𖼖𖽪𖾐 𖼷𖽑𖽻𖾐 𖼞𖽑𖽶𖾑 𖼠𖽻𖾐 𖼄𖽔 𖼮𖽻𖾐． 2 𖼽𖽱𖾐 𖼺𖽴𖾑 𖼮𖽑𖽡𖽪 𖼈𖽳 𖼄𖽙𖾐 𖼣𖽶𖾐，𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼖𖽺𖾑 𖼊𖽻 𖼮𖽨，𖼇𖽕 𖼖𖽻 𖼈𖽴 𖼖𖽺𖾑 𖼄𖽡𖽻 𖼦𖽑𖽺𖾑 𖼺𖽝𖾑 𖼦𖽑𖽻𖾐．3 𖼽𖽱𖾐 𖼺𖽴𖾑 𖼽𖽻 𖼈𖽧 𖼄𖽻 𖼐𖽑𖽳𖾐 𖼄𖽻 𖼖𖽙𖾐 𖼀𖽦𖾐：“𖼣𖽙𖾐 𖼽𖽱𖾐 𖼺𖽴𖾑 𖼣𖽻𖾐，𖼣𖽻𖾐 𖼀𖽙 𖼮𖽻𖾐 𖼮𖽻𖾐 𖼺𖽺？” 𖼽𖽻 𖼈𖽧 𖼄𖽻 𖼐𖽑𖽳𖾐 𖼄𖽻 𖼽𖽱𖾐 𖼺𖽴𖾑 𖽃𖽙𖾑 𖼄𖽺 𖼮𖽑𖽡𖽺 𖼮𖽡𖽮𖾐 𖼷𖽑𖽚 𖼺𖽺𖾑，𖼊𖽻 𖼞𖽑𖽚 𖼊𖽑𖽧 𖼖𖽻𖾐 𖼄𖽔 𖼊𖽙𖾐．
4 𖼽𖽱𖾐 𖼺𖽴𖾑 𖼽𖽻 𖼈𖽧 𖼄𖽻 𖼐𖽑𖽳𖾐 𖼄𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼣𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼖𖽻𖾐．” 𖽃𖽔 𖼺𖽺𖾑，𖼽𖽻 𖼈𖽳𖾐 𖼽𖽻 𖽃𖽙𖾑 𖼄𖽺 𖼮𖽑𖽡𖽺 𖼽𖽡𖾐．𖼽𖽻 𖼀𖽦𖾐：“𖼣𖽙𖾐 𖼽𖽱𖾐 𖼺𖽴𖾑 𖼣𖽻𖾐，𖼣𖽙𖾐 𖼦𖽑𖽺𖾑 𖼐𖽑𖽡𖾐 𖼈𖽳𖾐 𖼮𖽑𖽢𖾑 𖼈𖽪 𖼺𖽺𖾑，𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼖𖽻𖾐 𖼺𖽪𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖼐𖽑𖽳𖾐 𖼄𖽻 𖼣𖽻𖾐． 5 𖽃𖽔𖾑 𖼄𖽳𖾐 𖼐𖽑𖽡𖾐 𖼈𖽳𖾐 𖼣𖽙𖾐 𖼊𖽑𖽺 𖼈𖽪 𖼦𖽑𖽺𖾑 𖼠𖽻𖾐 𖼖𖽻𖾐 𖼖𖽙𖾐 𖼀𖽙𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼣𖽝 𖼐𖽑𖽡𖾐 𖼈𖽳𖾐 𖼠𖽚 𖼳𖽚𖾑 𖼄𖽔 𖼻𖽻𖾐．𖼦𖽑𖽺𖾑 𖽂𖽙 𖼺𖽙𖾐 𖼂𖽙𖾐 𖼣𖽙𖾐 𖼊𖽑𖽺 𖽃𖽙𖾑 𖼄𖽺 𖼹𖽡𖾐 𖼂𖽻𖾐 𖼖𖽻𖾐 𖼺𖽺𖾑，𖼄𖽳𖾑 𖼄𖽳 𖼞𖽜 𖽂𖽙𖾐 𖼠𖽙𖾑 𖼊𖽙𖾐 𖼖𖽙𖾐 𖼀𖽙𖾐 𖼳𖽶 𖼣𖽻𖾐． 6 𖽃𖽔𖾑 𖼄𖽳𖾐 𖼦𖽑𖽺𖾑 𖼄𖽡𖾐 𖼊𖽺𖾐 𖼦𖽑𖽦 𖼄𖽦 𖼷𖽶𖾐 𖼄𖽳𖾐 𖼺𖽪𖾐 𖼐𖽑𖽡 𖼞𖽑𖽚 𖼖𖽚，𖼦𖽑𖽔𖾐 𖼖𖽺𖾑 𖼣𖽙 𖼞𖽑𖽚 𖼹𖽚 𖼳𖽶𖾑 𖼀𖽑𖽢 𖼄𖽔 𖼊𖽙𖾐，𖼠𖽜𖾐 𖽂𖽙𖾐 𖼄𖽔 𖼊𖽙𖾐 𖼊𖽻𖾐． 7 𖽂𖽙 𖼺𖽙𖾐 𖼂𖽙𖾐 𖼣𖽙𖾐 𖼊𖽑𖽺 𖽃𖽙𖾑 𖼄𖽺 𖼹𖽡𖾐 𖼦𖽑𖽺𖾑 𖼠𖽻𖾐 𖼖𖽻𖾐 𖼺𖽪𖾐，𖼐𖽑𖽡𖾐 𖼈𖽳𖾐 𖼊𖽑𖽺 𖼰𖽨𖾑，𖼐𖽑𖽡𖾐 𖼈𖽳𖾐 𖼐𖽺𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼞𖽜 𖽂𖽙𖾐 𖼠𖽙𖾑 𖼊𖽙𖾐 𖼖𖽙𖾐 𖼀𖽙𖾐 𖼳𖽶 𖼣𖽻𖾐． 8 𖼦𖽑𖽺𖾑 𖼻𖽻𖾐 𖼐𖽦𖾐 𖼂𖽻𖾐 𖼖𖽻𖾐，𖼣𖽙𖾐 𖼊𖽑𖽺 𖼹𖽡𖾐 𖼦𖽑𖽺𖾑 𖼄𖽡𖾐 𖼊𖽺𖾐 𖼖𖽻𖾐 𖼺𖽪𖾐，𖼐𖽑𖽡𖾐 𖼈𖽳𖾐 𖼄𖽔 𖼣𖽻𖾐，𖽂𖽙 𖼺𖽙𖾐 𖼂𖽙𖾐 𖼣𖽻𖾐．𖽂𖽙 𖼺𖽙𖾐 𖼂𖽙𖾐 𖼣𖽙𖾐 𖼞𖽜 𖼇𖽕 𖼖𖽻 𖼽𖽻 𖼀𖽙 𖼖𖽙𖾐 𖼺𖽶𖾑，𖼇𖽕 𖼖𖽻 𖼞𖽳𖾐 𖽃𖽔𖾑 𖼞𖽑𖽶𖾐 𖼊𖽑𖽺 𖼠𖽕，𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽳𖾐 𖼷𖽶 𖼄𖽻 𖼈𖽳 𖼂𖽺𖾐．
9 𖼐𖽑𖽡𖾐 𖼈𖽳𖾐 𖼐𖽕 𖼊𖽺𖾐 𖼣𖽻𖾐 𖼀𖽙 𖼞𖽳𖾐 𖼊𖽦𖾐 𖼽𖽡𖾐 𖼺𖽺𖾑，𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼻𖽙 𖼽𖽱𖾐 𖼺𖽴𖾑 𖼀𖽦𖾐：‘ 𖽂𖽙 𖼺𖽙𖾐 𖼂𖽙𖾐 𖼣𖽙𖾐 𖼞𖽜 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼠𖽕，𖼐𖽑𖽡𖾐 𖼍𖽻𖾐 𖼊𖽑𖽔 𖼞𖽙𖾐 𖼄𖽙𖾐 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼹𖽺𖾐 𖼖𖽻𖾐 𖼖𖽡𖾐． 10 𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼻𖽙、 𖼐𖽑𖽡𖾐 𖼖𖽡𖾑 𖼂𖽙𖾑，𖼮𖽡𖽺 𖼷𖽪𖾐 𖼐𖽺𖾐 𖼐𖽑𖽡𖾐 𖼞𖽑𖽙𖾐 𖼮𖽻𖾐 𖼳𖽶，𖼄𖽳𖾑 𖼄𖽳 𖼣𖽙𖾐 𖼖𖽙𖾐 𖼐𖽳 𖼞𖽳𖾐 𖼠𖽜𖾐 𖼳𖽔𖾐 𖼄𖽡𖾐 𖼊𖽺𖾐 𖽂𖽙𖾐 𖼮𖽻𖾐 𖼊𖽙𖾐． 11 𖼞𖽪𖾐 𖼮𖽡𖽺𖾐 𖼦𖽑𖽦 𖼄𖽦 𖼦𖽑𖽔𖾐 𖼖𖽺𖾑 𖼣𖽙 𖼞𖽑𖽚 𖼮𖽻𖾐 𖼺𖽺，𖽃𖽔𖾐 𖼺𖽺𖾑 𖼣𖽙𖾐 𖼦𖽑𖽺𖾑 𖼠𖽻𖾐 𖼐𖽑𖽡𖾐 𖼊𖽑𖽺 𖼍𖽻𖾐、 𖼐𖽑𖽡𖾐 𖼊𖽑𖽺 𖼠𖽙𖾐 𖼳𖽙𖾐 𖼊𖽻𖾐．𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼊𖽑𖽡 𖼈𖽴 𖼷𖽑𖽻𖾐，𖼹𖽦𖾑 𖼐𖽑𖽡𖾐 𖼞𖽑𖽙𖾐 𖼮𖽻𖾐 𖼳𖽶 𖼞𖽜 𖼳𖽚𖾑 𖼞𖽑𖽪 𖼷𖽶𖾐 𖼄𖽳𖾐 𖼄𖽔 𖼻𖽻𖾐．’
12 𖼐𖽦𖾐 𖼄𖽺！𖼐𖽑𖽡𖾐 𖼈𖽳𖾐 𖼐𖽺𖾐 𖼣𖽙𖾐 𖼐𖽑𖽳𖾐 𖼄𖽻 𖼂𖽡𖽦𖾑 𖼽𖽔 𖼄𖽡𖽺 𖼺𖽝𖾑 𖼄𖽡𖾐 𖼀𖽻𖾐 𖼦𖽑𖽻𖾐，𖼊𖽻 𖼂𖽪𖾑 𖼦𖽑𖽺𖾑 𖼠𖽕𖾐 𖼰𖽶𖾐 𖼣𖽙𖾐 𖼮𖽑𖽢𖾑 𖼀𖽦𖾐 𖼺𖽪𖾐 𖼣𖽻𖾐．
13 𖼣𖽙𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖽃𖽔 𖼊𖽺𖾑 𖼻𖽻𖾐 𖼀𖽑𖽶 𖼊𖽴 𖼄𖽡𖾐 𖼊𖽻 𖼮𖽻𖾐 𖼐𖽺𖾐 𖼐𖽑𖽡𖾐 𖼈𖽳𖾐 𖼞𖽑𖽙𖾐 𖼐𖽦𖾐 𖼄𖽡𖽻𖾐 𖼺𖽪𖾐，𖼄𖽳𖾑 𖼄𖽳 𖼦𖽑𖽺 𖼣𖽻𖾐 𖼀𖽙 𖼰𖽨𖾐 𖼖𖽡𖾐，𖼦𖽑𖽔𖾐 𖼖𖽺𖾑 𖼐𖽕 𖼐𖽕𖾐 𖼣𖽻𖾐 𖼀𖽙 𖼊𖽑𖽺 𖼹𖽶𖾐 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐 𖼖𖽡𖾐．”
14 𖽃𖽔𖾐 𖼺𖽺𖾑，𖼽𖽱𖾐 𖼺𖽴𖾑 𖼽𖽻 𖼐𖽑𖽳𖾐 𖼄𖽻 𖼂𖽡𖽦𖾑 𖼽𖽔 𖼄𖽡𖽺 𖼖𖽺𖾐 𖼀𖽺 𖼍𖽦𖾐 𖼺𖽺𖾑，𖼣𖽶𖾐 𖼍𖽪𖾐 𖼖𖽻𖾐．𖼂𖽡𖽦𖾑 𖼽𖽔 𖼄𖽡𖽺 𖼖𖽺𖾑 𖼽𖽱𖾐 𖼺𖽴𖾑 𖼖𖽺𖾐 𖼀𖽺 𖼍𖽦𖾐 𖼍𖽳𖾐 𖼣𖽶𖾐． 15 𖼽𖽻 𖼹𖽦𖾑 𖼽𖽻 𖼈𖽧 𖼄𖽻 𖼐𖽑𖽳𖾐 𖼄𖽻 𖼖𖽙𖾐 𖼮𖽑𖽻𖾐 𖼮𖽑𖽻 𖼄𖽦𖾐 𖼹𖽮𖾑，𖼽𖽻 𖼈𖽳𖾐 𖼊𖽑𖽺 𖼍𖽦𖾐 𖼍𖽳𖾐 𖼣𖽶𖾐．𖼠𖽙𖾑 𖼍𖽻𖾐，𖼽𖽻 𖼈𖽧 𖼄𖽻 𖼐𖽑𖽳𖾐 𖼄𖽻 𖼽𖽻 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐．
𖼇𖽕 𖼖𖽻 𖼽𖽱𖾐 𖼺𖽴𖾑 𖼞𖽜 𖼽𖽻 𖼀𖽙 𖼊𖽑𖽺 𖼹𖽶𖾐
16 𖼷𖽑𖽻𖾐𖼇𖽕 𖼖𖽻 𖽃𖽔𖾑 𖼞𖽑𖽶𖾐 𖼽𖽡𖾐 𖼀𖽦𖾐 𖼊𖽑𖽧 𖼺𖽪𖾐 𖼮𖽻𖾐：“𖼽𖽱𖾐 𖼺𖽴𖾑 𖼞𖽳𖾐 𖼈𖽧 𖼄𖽻 𖼐𖽑𖽳𖾐 𖼄𖽻 𖼮𖽑𖽡𖾐 𖼖𖽻𖾐 𖼦𖽑𖽻𖾐．” 𖼇𖽕 𖼖𖽻 𖼐𖽺𖾐 𖼽𖽻 𖽂𖽚 𖼞𖽑𖽶𖾐 𖼞𖽳𖾐 𖼷𖽶 𖼄𖽻，𖼄𖽳𖾑 𖼄𖽳 𖼦𖽑𖽔𖾐 𖼮𖽶𖾐 𖼖𖽺𖾑 𖼞𖽜𖾐 𖼺𖽜𖾐．
17 𖼇𖽕 𖼖𖽻 𖼽𖽱𖾐 𖼺𖽴𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽧 𖼄𖽻 𖼐𖽑𖽳𖾐 𖼄𖽻 𖼖𖽙𖾐 𖼀𖽦𖾐：‘ 𖼄𖽡𖽻 𖼐𖽑𖽡 𖼷𖽙 𖼊𖽪𖾐 𖼄𖽨 𖼄𖽨 𖼰𖽡𖽦𖾐 𖼺𖽺𖾑，𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼽𖽡𖾐， 18 𖼐𖽑𖽡𖾐 𖼈𖽳𖾐 𖽃𖽔 𖼀𖽙 𖼐𖽺𖾐 𖼽𖽻 𖽃𖽔𖾑 𖼞𖽑𖽶𖾐 𖼷𖽑𖽻𖾐 𖼄𖽳𖾑 𖼄𖽳 𖼊𖽑𖽺 𖼹𖽶𖾐 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐 𖼖𖽡𖾐．𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽑𖽙𖾐 𖼊𖽚𖾐 𖼺𖽪𖾐 𖼹𖽳𖾐 𖼳𖽶，𖼣𖽙𖾐 𖼖𖽪 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜 𖼊𖽻𖾐，𖼦𖽑𖽺𖾑 𖼄𖽡𖾐 𖼊𖽺𖾐 𖼞𖽑𖽙𖾐 𖼹𖽳𖾐 𖼳𖽶 𖼐𖽑𖽡𖾐 𖼈𖽳𖾐 𖽂𖽙𖾐 𖼷𖽙 𖼊𖽙𖾐．’
19 𖼐𖽑𖽡𖾐 𖼽𖽻 𖼈𖽳𖾐 𖼊𖽑𖽺 𖼀𖽦𖾐 𖼄𖽪𖾑：‘ 𖼐𖽑𖽡𖾐 𖼈𖽳𖾐 𖼦𖽑𖽺𖾑 𖼻𖽻𖾐 𖼂𖽺𖾐 𖼖𖽡𖾐！𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽜𖾐 𖼞𖽕 𖼊𖽦𖾐 𖼽𖽡𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼞𖽳𖾐 𖽃𖽔𖾐 𖼞𖽶𖾑 𖼐𖽺𖾐 𖼄𖽳 𖼻𖽙、 𖼹𖽦𖾑 𖼐𖽑𖽡𖾐 𖼈𖽳𖾐 𖽃𖽔 𖼀𖽙 𖼊𖽑𖽺 𖼹𖽶𖾐 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐 𖼖𖽡𖾐．’ 20 𖼐𖽑𖽡𖾐 𖼈𖽳𖾐 𖼄𖽡𖽻 𖼐𖽑𖽡 𖼄𖽡𖽻 𖼠𖽴𖾐 𖼊𖽑𖽺 𖼂𖽙𖾑 𖼖𖽕𖾐 𖼄𖽔 𖼻𖽻𖾐，𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼈𖽳𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽑𖽙𖾐 𖼊𖽚𖾐 𖼺𖽪𖾐 𖼹𖽳𖾐 𖼳𖽶 𖽂𖽙𖾐 𖼊𖽻𖾐．
21 𖽃𖽔𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼞𖽳𖾐 𖼻𖽙 𖼞𖽑𖽶𖾑 𖼹𖽻𖾐 𖼦𖽑𖽺𖾑 𖼻𖽻𖾐 𖼂𖽺𖾐 𖼽𖽡𖾐．𖼽𖽱𖾐 𖼺𖽴𖾑 𖼇𖽕 𖼖𖽻 𖼞𖽑𖽙𖾐 𖼀𖽦𖾐 𖼖𖽙𖾐 𖼮𖽑𖽻𖾐 𖼮𖽑𖽜𖾐 𖼐𖽺𖾐 𖼮𖽨𖾐 𖼄𖽙𖾐 𖼊𖽑𖽺 𖼷𖽙 𖼊𖽪𖾐 𖼈𖽺𖾐 𖼽𖽻 𖼈𖽳𖾐 𖼊𖽑𖽺 𖼞𖽜， 22 𖼦𖽑𖽔𖾐 𖼖𖽺𖾑 𖼊𖽑𖽡 𖼽𖽚𖾐 𖼊𖽑𖽺 𖼀𖽑𖽡𖽻𖾐 𖼷𖽑𖽶 𖼳𖽸 𖼊𖽑𖽡 𖼊𖽑𖽘𖾑 𖼞𖽜，𖼂𖽡𖽦𖾑 𖼽𖽔 𖼄𖽡𖽺 𖼊𖽑𖽺 𖼍𖽺𖾑 𖼀𖽑𖽨𖾐 𖼺𖽙𖾐 𖼦𖽑𖽙𖾐 𖼀𖽑𖽡 𖼐𖽺𖾐 𖼀𖽑𖽡𖽻𖾐 𖼷𖽑𖽶 𖼳𖽸 𖼣𖽙 𖼊𖽑𖽘𖾑 𖼞𖽜． 23 𖼽𖽱𖾐 𖼺𖽴𖾑 𖼦𖽑𖽙𖾐 𖼽𖽻 𖼀𖽙 𖼊𖽑𖽺 𖼞𖽜 𖼺𖽪𖾐：𖼊𖽑𖽳 𖼖𖽳𖾐 𖼄𖽪 𖼂𖽙𖾑 𖼷𖽑𖽡𖾐 𖼷𖽳 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽑𖽙𖾐 𖼊𖽚𖾐 𖼺𖽪𖾐 𖼹𖽳𖾐 𖼳𖽶 𖼰𖽡𖽦𖾐，𖼊𖽑𖽳 𖼖𖽳𖾐 𖼄𖽪 𖼄𖽙𖾐 𖼷𖽑𖽡𖾐 𖼷𖽳 𖼷𖽙𖾐 𖼺𖽳、 𖽃𖽔𖾑 𖼂𖽻𖾐 𖼐𖽺𖾐 𖼮𖽨𖾐 𖼄𖽙𖾐 𖼊𖽑𖽺 𖼽𖽻 𖼀𖽙 𖼷𖽙 𖼖𖽚𖾐 𖼂𖽚𖾐 𖼰𖽡𖽦𖾐．
24 𖽃𖽔𖾐 𖼺𖽺𖾑，𖼽𖽱𖾐 𖼺𖽴𖾑 𖼽𖽻 𖼈𖽧 𖼄𖽻 𖼐𖽑𖽳𖾐 𖼄𖽻 𖼞𖽜 𖼀𖽑𖽚𖾐 𖼞𖽚 𖼽𖽡𖾐，𖼽𖽻 𖼈𖽳𖾐 𖼺𖽜 𖼽𖽡𖾐 𖼞𖽑𖽶𖾑 𖼮𖽶𖾐，𖼽𖽱𖾐 𖼺𖽴𖾑 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼮𖽨𖾐 𖼄𖽙𖾐 𖼊𖽑𖽺 𖼷𖽙𖾐 𖼖𖽙𖾐 𖼊𖽑𖽔 𖼦𖽻𖾐 𖼊𖽦．”
25 𖼽𖽻 𖼈𖽳𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼰𖽡𖾑 𖼦𖽑𖽙𖾐 𖼺𖽺𖾑，𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼽𖽻 𖼀𖽙 𖼽𖽔 𖼠𖽴𖾑 𖼞𖽳𖾐 𖼊𖽦𖾐 𖼽𖽡𖾐，
26 𖼽𖽻 𖼀𖽙 𖼖𖽙𖾐 𖼀𖽦𖾐：“𖼽𖽱𖾐 𖼺𖽴𖾑 𖼦𖽑𖽔𖾐 𖼖𖽺𖾑 𖼠𖽙𖾑 𖼍𖽳𖾐 𖼺𖽺，𖼽𖽻 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼷𖽶 𖼄𖽻 𖼈𖽳 𖼂𖽺𖾐．” 𖼽𖽔 𖼠𖽴𖾑 𖼨𖽜 𖼦𖽑𖽻𖾐，𖼽𖽻 𖼈𖽳𖾐 𖼀𖽦𖾐 𖼺𖽪𖾐 𖼖𖽙𖾐 𖼊𖽻 𖼄𖽔 𖼮𖽶𖾐． 27 𖼽𖽻 𖼈𖽳𖾐 𖼽𖽱𖾐 𖼺𖽴𖾑 𖼞𖽑𖽙𖾐 𖼀𖽦𖾐 𖼺𖽪𖾐 𖼊𖽻 𖼂𖽪𖾑，𖼄𖽳𖾑 𖼄𖽳 𖼀𖽦𖾐 𖼽𖽔 𖼠𖽴𖾑 𖼖𖽙𖾐 𖼊𖽑𖽧．𖼽𖽔 𖼠𖽴𖾑 𖼞𖽑𖽻𖾑 𖼽𖽱𖾐 𖼺𖽴𖾑 𖼞𖽑𖽙𖾐 𖼀𖽑𖽨 𖼂𖽻𖾐 𖼖𖽻𖾐 𖼽𖽻 𖼊𖽑𖽺 𖼹𖽶𖾐 𖼺𖽪𖾐 𖼮𖽑𖽜𖾐 𖼊𖽑𖽺 𖼐𖽦𖾐 𖼄𖽡𖽻𖾐 𖼺𖽺𖾑，𖼣𖽝 𖼄𖽡𖾐 𖼀𖽻𖾐 𖼦𖽑𖽙𖾐．
28 𖼽𖽡 𖼺𖽴𖾑 𖼖𖽡𖽦𖾑 𖼀𖽦𖾐：“𖼣𖽻𖾐 𖼮𖽶𖾐！𖼣𖽙𖾐 𖼻𖽙 𖼽𖽱𖾐 𖼺𖽴𖾑 𖼠𖽙𖾑 𖼍𖽳𖾐 𖼺𖽺，𖼣𖽙𖾐 𖼄𖽔 𖼳𖽶𖾐 𖼺𖽺 𖽃𖽙𖾑 𖼄𖽺，𖼽𖽻 𖼊𖽑𖽺 𖼄𖽡𖽻𖾐 𖼽𖽡𖾐 𖼊𖽻𖾐．”