𖼽𖽱𖾐 𖼺𖽴𖾑 𖼽𖽻 𖼈𖽧 𖼄𖽻 𖼐𖽑𖽳𖾐 𖼄𖽻 𖼊𖽑𖽺 𖼳𖽶𖾑 𖼐𖽦𖾐
44
1 𖼽𖽱𖾐 𖼺𖽴𖾑 𖽃𖽔𖾑 𖼞𖽑𖽶𖾐 𖼠𖽕 𖼺𖽪𖾐 𖼖𖽙𖾐 𖼀𖽦𖾐：“𖼽𖽻 𖼈𖽳𖾐 𖼀𖽶 𖼖𖽧𖾑 𖼠𖽻𖾐 𖼞𖽑𖽶𖾐 𖼷𖽙𖾐 𖼺𖽳 𖼰𖽡𖽺𖾐 𖼀𖽡𖾐 𖼖𖽡𖾐，𖼽𖽻 𖼈𖽳𖾐 𖼞𖽑𖽙 𖼄𖽙𖾐 𖼰𖽡𖽦𖾐 𖼍𖽪𖾐 𖼊𖽙𖾐 𖼞𖽑𖽙 𖼄𖽙𖾐 𖼰𖽡𖽺𖾐 𖼮𖽑𖽳𖾐，𖼦𖽑𖽔𖾐 𖼖𖽺𖾑 𖼽𖽻 𖼈𖽳𖾐 𖼞𖽳𖾐 𖼀𖽑𖽨𖾐 𖼀𖽑𖽡 𖼈𖽺𖾐 𖼀𖽑𖽚𖾐 𖼽𖽻 𖼈𖽳𖾐 𖼀𖽶 𖼖𖽧𖾑 𖼠𖽻𖾐 𖼞𖽑𖽶𖾐 𖼰𖽡𖽺𖾐 𖼞𖽑𖽚 𖼖𖽡𖾐， 2 𖼹𖽦𖾑 𖼣𖽙𖾐 𖼞𖽳𖾐 𖼀𖽑𖽨𖾐 𖼺𖽡𖾑 𖼈𖽺𖾐 𖼺𖽺𖾑，𖼻𖽙 𖼽𖽳𖾐 𖼷𖽙𖾐 𖼺𖽳 𖼈𖽳𖾐 𖼖𖽚𖾐 𖼂𖽚𖾐 𖼀𖽑𖽨𖾐 𖼀𖽑𖽡 𖼖𖽙𖾐 𖼮𖽑𖽻𖾐 𖼀𖽶 𖼖𖽧𖾑 𖼠𖽻𖾐 𖼞𖽑𖽶𖾐 𖼰𖽡𖽺𖾐 𖼖𖽡𖾐．” 𖽃𖽔𖾐 𖼺𖽺𖾑，𖽃𖽔𖾑 𖼞𖽑𖽶𖾐 𖼠𖽕 𖼺𖽪𖾐 𖼽𖽱𖾐 𖼺𖽴𖾑 𖼀𖽦𖾐 𖼖𖽙𖾐 𖼮𖽑𖽻𖾐 𖼂𖽺𖾐 𖼽𖽡𖾐．3 𖼠𖽙𖾑 𖼍𖽻𖾐 𖼊𖽑𖽡 𖼐𖽜𖾐 𖼷𖽑𖽶𖾐 𖼐𖽦，𖼽𖽻 𖼈𖽳𖾐 𖼞𖽜 𖼊𖽑𖽳 𖼖𖽳𖾐 𖼄𖽪 𖼺𖽶𖾐，𖼷𖽙𖾐 𖼰𖽡𖽦𖾐 𖼺𖽺𖾑 𖼽𖽡𖾐 𖼦𖽑𖽙𖾐． 4 𖼽𖽻 𖼈𖽳𖾐 𖼖𖽪𖾐 𖼞𖽑𖽶𖾐 𖼊𖽚𖾐 𖼽𖽡𖾐，𖼞𖽑𖽙 𖼈𖽡𖾐 𖼄𖽔 𖼽𖽡𖾐 𖼺𖽺，𖼽𖽱𖾐 𖼺𖽴𖾑 𖽃𖽔𖾑 𖼞𖽑𖽶𖾐 𖼠𖽕 𖼺𖽪𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼐𖽕 𖼐𖽕𖾐 𖼷𖽑𖽻𖾐 𖼞𖽑𖽶𖾑 𖼹𖽻𖾐 𖼠𖽙𖾑 𖼍𖽻𖾐 𖼞𖽕 𖼽𖽡𖾐，𖼞𖽕 𖼄𖽳𖾐 𖼞𖽑𖽶𖾑 𖼮𖽶𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：‘ 𖼐𖽑𖽡𖾐 𖼈𖽳𖾐 𖽃𖽔𖾐 𖼹𖽻𖾐 𖼊𖽶𖾐 𖼄𖽡𖽻 𖼂𖽺𖾐 𖼺𖽺𖾑 𖼹𖽳𖾐 𖼄𖽡𖽻 𖼊𖽑𖽺 𖼞𖽑𖽚 𖼐𖽺𖾑？ 5 𖼐𖽑𖽡𖾐 𖼈𖽳𖾐 𖽃𖽔𖾐 𖼹𖽻𖾐 𖼣𖽙𖾐 𖼺𖽡 𖼀𖽑𖽙 𖼞𖽳𖾐 𖼮𖽶𖾐 𖼀𖽳 𖼊𖽻𖾐 𖼐𖽺𖾐 𖼰𖽕𖾐 𖼐𖽦𖾐 𖼻𖽜 𖼖𖽚𖾐 𖼂𖽚𖾐 𖼀𖽑𖽨𖾐 𖼺𖽡𖾑 𖼞𖽑𖽶 𖼐𖽺𖾑？𖼐𖽑𖽡𖾐 𖼈𖽳𖾐 𖼞𖽑𖽙𖾐 𖼂𖽺𖾐 𖼺𖽪𖾐，𖼦𖽑𖽔𖾐 𖼮𖽶𖾐 𖼄𖽔 𖼀𖽑𖽢 𖼳𖽶 𖼣𖽻𖾐．’”
6 𖽃𖽔𖾐 𖼺𖽺𖾑，𖽃𖽔𖾑 𖼞𖽑𖽶𖾐 𖼠𖽕 𖼺𖽪𖾐 𖼽𖽻 𖼈𖽳𖾐 𖼊𖽑𖽺 𖼞𖽕 𖼄𖽳𖾐，𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼦𖽑𖽺𖾑 𖼻𖽻𖾐 𖼊𖽻 𖼊𖽑𖽜𖾐．
7 𖼽𖽻 𖼈𖽳𖾐 𖼊𖽻 𖼞𖽑𖽚 𖼀𖽦𖾐：“𖼣𖽙𖾐 𖼺𖽡 𖼀𖽑𖽙 𖽃𖽔𖾐！ 𖼐𖽑𖽡𖾐 𖽃𖽔𖾐 𖼹𖽻𖾐 𖼦𖽑𖽺𖾑 𖼳𖽶 𖼊𖽻 𖼊𖽑𖽜𖾐 𖼐𖽺𖾑？𖼣𖽙𖾐 𖼈𖽳𖾐 𖼠𖽕𖾐 𖼰𖽶𖾐 𖼦𖽑𖽺𖾑 𖼳𖽶 𖼄𖽡𖽻 𖼂𖽺𖾐 𖼄𖽔 𖼠𖽸𖾑． 8 𖼐𖽦𖾐 𖼄𖽺！ 𖽃𖽙𖾑 𖼄𖽺 𖼞𖽑𖽶𖾑 𖼊𖽑𖽡 𖼂𖽦𖾑 𖼣𖽙𖾐 𖼈𖽳𖾐 𖼀𖽶 𖼖𖽧𖾑 𖼞𖽑𖽶𖾐 𖼰𖽡𖽺𖾐 𖼞𖽑𖽚 𖼖𖽻𖾐 𖼺𖽪𖾐 𖼀𖽑𖽨𖾐 𖼀𖽑𖽡 𖼖𖽺𖾑，𖼣𖽙𖾐 𖼈𖽳𖾐 𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼮𖽑𖽻𖾐 𖼈𖽺𖾐 𖼐𖽑𖽡𖾐 𖼊𖽑𖽺 𖼞𖽑𖽚 𖼦𖽑𖽙𖾐 𖼺𖽪𖾐 𖼣𖽻𖾐 𖼺𖽺𖾑，𖽃𖽔𖾐 𖼹𖽻𖾐 𖼀𖽑𖽚𖾐 𖼐𖽑𖽡𖾐 𖼺𖽡 𖼀𖽑𖽙 𖼞𖽳𖾐 𖼀𖽑𖽨𖾐 𖼳𖽳𖾐 𖼞𖽑𖽶 𖼠𖽸𖾑 𖼖𖽔𖾑？ 9 𖼺𖽡 𖼀𖽑𖽙 𖽃𖽔𖾐！𖼐𖽑𖽡𖾐 𖼣𖽙𖾐 𖼈𖽳𖾐 𖼠𖽻𖾐 𖼊𖽑𖽺 𖽃𖽔 𖼺𖽺 𖼞𖽳𖾐 𖼮𖽑𖽻𖾐 𖼀𖽑𖽚𖾐 𖼊𖽑𖽧 𖼖𖽻𖾐 𖼊𖽑𖽡𖾑 𖼣𖽻𖾐，𖽃𖽔 𖼺𖽺 𖼞𖽜 𖼳𖽶𖾐 𖼻𖽻𖾐，𖼣𖽙𖾐 𖼈𖽳𖾐 𖼖𖽺𖾑 𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙 𖼂𖽺𖾐 𖼊𖽻𖾐．”
10 𖽃𖽔𖾑 𖼞𖽑𖽶𖾐 𖼠𖽕 𖼺𖽪𖾐 𖼀𖽦𖾐：“𖼣𖽻𖾐，𖼐𖽑𖽡𖾐 𖼈𖽳𖾐 𖼀𖽦𖾐 𖼖𖽙𖾐 𖼮𖽑𖽻𖾐 𖼂𖽺𖾐 𖼮𖽑𖽳𖾐！𖼦𖽑𖽻𖾐 𖼊𖽑𖽻𖾐，𖽃𖽔 𖼺𖽺 𖼞𖽳𖾐 𖼮𖽑𖽻𖾐 𖼀𖽑𖽚𖾐 𖼊𖽑𖽧 𖼖𖽻𖾐 𖼊𖽑𖽡𖾑 𖼣𖽻𖾐，𖽃𖽔 𖼺𖽺 𖼞𖽜 𖼣𖽙𖾐 𖼮𖽜𖾐 𖼀𖽑𖽙 𖼂𖽺𖾐 𖼖𖽡𖾐，𖼞𖽑𖽻𖾐 𖼂𖽻𖾑 𖼖𖽙𖾐 𖼮𖽡 𖼄𖽔 𖼠𖽳𖾐．”
11 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼐𖽕 𖼊𖽺𖾐 𖼄𖽪 𖼰𖽡𖽦𖾐 𖼮𖽑𖽳 𖼹𖽺𖾐 𖼖𖽻𖾐，𖼀𖽶 𖼖𖽧𖾑 𖼀𖽑𖽡𖾐 𖼦𖽑𖽙𖾐． 12 𖽃𖽔𖾑 𖼞𖽑𖽶𖾐 𖼠𖽕 𖼺𖽪𖾐 𖼽𖽻 𖼈𖽳𖾐 𖼊𖽑𖽺 𖼈𖽳 𖼮𖽑𖽻𖾐 𖼽𖽳𖾐 𖼖𖽙𖾐 𖼮𖽑𖽡𖾐 𖼀𖽑𖽚𖾐 𖼐𖽦𖾐 𖼺𖽺𖾑，𖼊𖽺𖾐 𖼊𖽺𖾐 𖼂𖽡𖽦𖾑 𖼽𖽔 𖼄𖽡𖽺 𖼀𖽶 𖼖𖽧𖾑 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼀𖽑𖽨𖾐 𖼺𖽡𖾑 𖼀𖽑𖽚𖾐 𖼊𖽑𖽧 𖼖𖽻𖾐． 13 𖼽𖽻 𖼈𖽳𖾐 𖼽𖽻 𖼄𖽳𖾑 𖼀𖽑𖽡𖽻𖾐 𖼷𖽑𖽶 𖼰𖽸𖾐 𖼮𖽑𖽡𖽦，𖼄𖽪 𖼰𖽡𖽦𖾐 𖼮𖽑𖽳 𖼊𖽑𖽳 𖼖𖽳𖾐 𖼄𖽪 𖼍𖽦𖾐，𖼀𖽑𖽚𖾐 𖼖𖽪𖾐 𖼞𖽑𖽶𖾐 𖼞𖽚 𖼽𖽡𖾐．
14 𖼽𖽚 𖼍𖽕𖾑 𖼐𖽺𖾐 𖼽𖽻 𖼈𖽧 𖼄𖽻 𖼐𖽑𖽳𖾐 𖼄𖽻 𖼀𖽑𖽚𖾐 𖼽𖽱𖾐 𖼺𖽴𖾑 𖼈𖽴 𖼞𖽳𖾐 𖼮𖽑𖽡𖾐，𖼽𖽱𖾐 𖼺𖽴𖾑 𖼦𖽑𖽔𖾐 𖼖𖽺𖾑 𖼞𖽑𖽶𖾑 𖼠𖽻𖾐 𖼮𖽻𖾐 𖼍𖽳𖾐 𖼺𖽺，𖽃𖽔𖾐 𖼺𖽺𖾑 𖼽𖽻 𖼈𖽳𖾐 𖼽𖽻 𖽃𖽙𖾑 𖼄𖽺 𖼮𖽑𖽡𖽺 𖼂𖽴𖾐 𖼹𖽺𖾐． 15 𖼽𖽱𖾐 𖼺𖽴𖾑 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖽃𖽔𖾐 𖼹𖽻𖾐 𖼦𖽑𖽺𖾑 𖼻𖽻𖾐 𖼂𖽺𖾐 𖼐𖽺𖾑？𖼣𖽙𖾐 𖼦𖽑𖽺𖾑 𖼰𖽕𖾐 𖼐𖽦𖾐 𖼠𖽸𖾑 𖼺𖽪𖾐 𖼷𖽑𖽻𖾐 𖼣𖽻𖾐，𖼐𖽑𖽡𖾐 𖼈𖽳𖾐 𖼄𖽔 𖼺𖽝𖾑 𖼖𖽔？”
16 𖼽𖽚 𖼍𖽕𖾑 𖼀𖽦𖾐：“𖼣𖽙𖾐 𖼈𖽳𖾐 𖼺𖽡 𖼀𖽑𖽙 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖽃𖽔 𖼊𖽺𖾑 𖼳𖽶 𖼦𖽑𖽺 𖼖𖽚𖾐 𖼂𖽚𖾐 𖼮𖽻𖾐 𖼺𖽺 𖼐𖽺𖾑？𖼣𖽙𖾐 𖼈𖽳𖾐 𖼦𖽑𖽺 𖼖𖽚𖾐 𖼂𖽚𖾐 𖼄𖽔 𖼮𖽻𖾐．𖼣𖽙𖾐 𖼈𖽳𖾐 𖽃𖽔 𖼊𖽺𖾐 𖼂𖽺𖾐 𖼺𖽺𖾑，𖼣𖽙𖾐 𖼈𖽳𖾐 𖼮𖽑𖽢𖾑 𖼞𖽑𖽶 𖼺𖽪𖾐 𖼄𖽔 𖼣𖽻𖾐 𖼊𖽑𖽺 𖼦𖽑𖽺 𖼄𖽡𖾐 𖼀𖽻𖾐 𖼊𖽙𖾐 𖼐𖽺𖾑？𖽂𖽙 𖼺𖽙𖾐 𖼂𖽙𖾐 𖼐𖽑𖽡𖾐 𖼮𖽜𖾐 𖼀𖽑𖽙 𖼞𖽳𖾐 𖼽𖽺𖾐 𖼮𖽑𖽡𖽪𖾑 𖼊𖽑𖽺 𖽂𖽙 𖼇𖽕 𖼳𖽶 𖼺𖽪𖾐 𖼣𖽻𖾐．𖼐𖽦𖾐 𖼄𖽺！ 𖼣𖽙𖾐 𖼈𖽳𖾐 𖼐𖽺𖾐 𖼀𖽑𖽨𖾐 𖼺𖽡𖾑 𖼰𖽳𖾐 𖼺𖽪𖾐 𖼷𖽑𖽻𖾐 𖼦𖽑𖽺𖾑 𖼽𖽚𖾐，𖼄𖽳𖾑 𖼄𖽳 𖼖𖽺𖾑 𖼺𖽡 𖼀𖽑𖽙 𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙 𖼣𖽻𖾐 𖼦𖽑𖽻𖾐．”
17 𖼽𖽱𖾐 𖼺𖽴𖾑 𖼀𖽦𖾐：“𖼣𖽙𖾐 𖼦𖽑𖽺𖾑 𖼻𖽻𖾐 𖼄𖽔 𖼂𖽺𖾐！ 𖽃𖽔 𖼺𖽺 𖼞𖽳𖾐 𖼮𖽑𖽻𖾐 𖼀𖽑𖽚𖾐 𖼊𖽑𖽧 𖼖𖽻𖾐，𖽃𖽔 𖼺𖽺 𖼞𖽜 𖼣𖽙𖾐 𖼞𖽳𖾐 𖼮𖽜𖾐 𖼀𖽑𖽙 𖼂𖽺𖾐 𖼖𖽡𖾐，𖼞𖽑𖽻𖾐 𖼂𖽻𖾑 𖼞𖽜 𖼺𖽙𖾑 𖼺𖽙𖾐 𖼀𖽑𖽚𖾐 𖼐𖽑𖽡𖾐 𖼈𖽳𖾐 𖽃𖽔 𖼀𖽙 𖼞𖽳𖾐 𖼊𖽦𖾐 𖼞𖽚 𖼽𖽡𖾐 𖼻𖽻𖾐．”
𖼽𖽚 𖼍𖽕𖾑 𖼂𖽡𖽦𖾑 𖼽𖽔 𖼄𖽡𖽺 𖼖𖽙𖾐 𖼀𖽙𖾐 𖼮𖽑𖽡 𖼮𖽡𖽺𖾐
18 𖼽𖽚 𖼍𖽕𖾑 𖼺𖽜 𖼽𖽱𖾐 𖼺𖽴𖾑 𖼖𖽙𖾐 𖼐𖽳 𖼽𖽡𖾐，𖼀𖽦𖾐：“𖼺𖽡 𖼀𖽑𖽙 𖽃𖽔𖾐！ 𖼐𖽑𖽡𖾐 𖼇𖽕 𖼖𖽻 𖼖𖽙𖾐 𖼺𖽶𖾑 𖼷𖽶 𖼊𖽺𖾐 𖼈𖽳 𖼮𖽻𖾐．𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐 𖼮𖽜𖾐 𖼀𖽑𖽙 𖼞𖽜 𖼊𖽻 𖼂𖽪𖾑 𖼊𖽑𖽡 𖼮𖽑𖽡𖽺 𖽂𖽙𖾐 𖼊𖽑𖽜𖾐 𖼊𖽙𖾐 𖼖𖽡𖾐，𖼮𖽜𖾐 𖼀𖽑𖽙 𖼊𖽑𖽺 𖼊𖽑𖽔 𖼀𖽶 𖼻𖽶 𖼞𖽜．
19 𖼺𖽡 𖼀𖽑𖽙 𖼐𖽑𖽡𖾐 𖽃𖽙𖾑 𖼄𖽺 𖼊𖽑𖽙 𖼣𖽙𖾐 𖼈𖽳𖾐 𖼊𖽑𖽺 𖼊𖽻 𖼐𖽙𖾐 𖼠𖽚：‘ 𖼐𖽑𖽡𖾐 𖼈𖽳𖾐 𖽃𖽔 𖼀𖽙 𖼐𖽺𖾐 𖼠𖽳𖾐 𖼖𖽪𖾐 𖼐𖽑𖽳𖾐 𖼄𖽻 𖼮𖽻𖾐 𖼮𖽻𖾐 𖼺𖽺？’ 20 𖼣𖽙𖾐 𖼈𖽳𖾐 𖼺𖽡 𖼀𖽑𖽙 𖼐𖽑𖽡𖾐 𖼊𖽑𖽺 𖼊𖽻 𖼞𖽑𖽚 𖼠𖽚：‘ 𖼣𖽙𖾐 𖼈𖽳𖾐 𖼞𖽑𖽚 𖼊𖽑𖽙 𖼄𖽻 𖼦𖽑𖽻𖾐 𖼺𖽪𖾐 𖽃𖽔 𖼀𖽙 𖼐𖽺𖾐 𖼐𖽑𖽳𖾐 𖼄𖽻 𖼽𖽳𖾐 𖼊𖽑𖽡 𖼽𖽚𖾐 𖼮𖽻𖾐 𖼍𖽳𖾐 𖼺𖽺，𖼣𖽙𖾐 𖼈𖽳𖾐 𖽃𖽔 𖼀𖽙 𖼞𖽑𖽚 𖼊𖽑𖽙 𖼄𖽻 𖼦𖽑𖽻𖾐 𖼺𖽺𖾑 𖼽𖽻 𖼊𖽑𖽺 𖼽𖽚𖾐，𖼽𖽻 𖼽𖽪𖾐 𖼄𖽔 𖼮𖽻𖾐 𖼦𖽑𖽙𖾐，𖼽𖽻 𖼄𖽙𖾐 𖼖𖽺𖾑 𖼄𖽔 𖼮𖽻𖾐 𖼦𖽑𖽙𖾐，𖼽𖽻 𖼊𖽑𖽡 𖼽𖽚𖾐 𖼍𖽺𖾑 𖼷𖽺𖾐 𖼺𖽺𖾑，𖼽𖽻 𖼀𖽙 𖼽𖽻 𖼊𖽑𖽺 𖼐𖽙𖾑 𖼣𖽜 𖼷𖽑𖽚．’
21 𖼺𖽡 𖼀𖽑𖽙 𖼐𖽑𖽡𖾐 𖼣𖽙𖾐 𖼈𖽳𖾐 𖼖𖽙𖾐 𖼀𖽦𖾐：‘ 𖼽𖽻 𖼊𖽑𖽺 𖼦𖽳 𖼹𖽺𖾐 𖼖𖽻𖾐，𖼣𖽙𖾐 𖼞𖽜 𖼽𖽻 𖼊𖽑𖽺 𖽂𖽙𖾐 𖼐𖽦𖾐 𖼄𖽡𖽻𖾐 𖼖𖽡𖾐．’
22 𖼣𖽙𖾐 𖼈𖽳𖾐 𖼺𖽡 𖼀𖽑𖽙 𖼐𖽑𖽡𖾐 𖼖𖽙𖾐 𖼀𖽦𖾐：‘ 𖼽𖽻 𖼀𖽙 𖽃𖽔𖾐 𖼞𖽶𖾑 𖼞𖽑𖽶𖾑 𖼊𖽑𖽺 𖼰𖽡𖾑 𖼦𖽑𖽙𖾐 𖼄𖽔 𖼊𖽙𖾐，𖼰𖽡𖾑 𖼦𖽑𖽙𖾐 𖼊𖽑𖽡𖾑 𖼣𖽻𖾐，𖼽𖽻 𖼀𖽙 𖼷𖽑𖽜𖾑 𖼷𖽑𖽜𖾐 𖼳𖽶𖾐 𖼊𖽻𖾐．’ 23 𖼺𖽡 𖼀𖽑𖽙 𖼐𖽑𖽡𖾐 𖼣𖽙𖾐 𖼈𖽳𖾐 𖼖𖽙𖾐 𖼀𖽦𖾐：‘ 𖼐𖽑𖽡𖾐 𖼈𖽳𖾐 𖼐𖽑𖽳𖾐 𖼄𖽻 𖼽𖽳𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼄𖽔 𖼹𖽺𖾐 𖼖𖽻𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼈𖽳𖾐 𖼣𖽙𖾐 𖼊𖽑𖽺 𖽂𖽙𖾐 𖼄𖽡𖽻𖾐 𖼖𖽻𖾐 𖼄𖽔 𖼊𖽙𖾐．’
24 𖽃𖽔𖾐 𖼺𖽺𖾑，𖼣𖽙𖾐 𖼈𖽳𖾐 𖼊𖽦𖾐 𖼽𖽡𖾐 𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙 𖼣𖽙𖾐 𖼈𖽳𖾐 𖽃𖽔 𖼀𖽙 𖼞𖽳𖾐 𖼮𖽑𖽡𖾐，𖼐𖽑𖽡𖾐 𖼞𖽑𖽙𖾐 𖼀𖽦𖾐 𖼺𖽪𖾐 𖼦𖽑𖽺 𖼽𖽻 𖼊𖽑𖽺 𖼰𖽨𖾐 𖼦𖽑𖽙𖾐．
25 𖼠𖽙𖾑 𖼍𖽻𖾐，𖼣𖽙𖾐 𖼈𖽳𖾐 𖽃𖽔 𖼀𖽙 𖼀𖽦𖾐：‘ 𖼐𖽑𖽡𖾐 𖼈𖽳𖾐 𖼹𖽦𖾑 𖽃𖽔 𖼐𖽺𖾑 𖼖𖽙𖾐 𖼀𖽙𖾐 𖼷𖽙𖾐 𖼈𖽳𖾐 𖼽𖽡𖾐．’ 26 𖼣𖽙𖾐 𖼈𖽳𖾐 𖼽𖽻 𖼊𖽑𖽺 𖼊𖽻 𖼞𖽑𖽚：‘ 𖼣𖽙𖾐 𖼈𖽳𖾐 𖼄𖽔 𖼹𖽺𖾐 𖼽𖽡𖾐 𖼊𖽻𖾐，𖼐𖽑𖽡𖾐 𖼣𖽙𖾐 𖼈𖽳𖾐 𖼐𖽑𖽳𖾐 𖼄𖽻 𖼽𖽳𖾐 𖼊𖽑𖽺 𖼀𖽑𖽨 𖼣𖽙𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼽𖽡𖾐 𖼺𖽺𖾑，𖼣𖽙𖾐 𖼈𖽳𖾐 𖼹𖽺𖾐 𖼽𖽡𖾐 𖼊𖽻𖾐．𖼞𖽪𖾐 𖼮𖽡𖽺𖾐，𖼣𖽙𖾐 𖼈𖽳𖾐 𖼐𖽑𖽳𖾐 𖼄𖽻 𖼽𖽳𖾐 𖼄𖽔 𖼮𖽑𖽻𖾐 𖼽𖽡𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼈𖽳𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖽂𖽙𖾐 𖼄𖽡𖽻𖾐 𖼽𖽡𖾐 𖼄𖽔 𖼊𖽙𖾐．’
27 𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙 𖼣𖽙𖾐 𖼈𖽳𖾐 𖼞𖽳𖾐 𖽃𖽔 𖼀𖽙 𖼀𖽦𖾐：‘ 𖼐𖽑𖽡𖾐 𖼈𖽳𖾐 𖼺𖽝𖾑 𖼣𖽙𖾐 𖼄𖽳 𖼻𖽙 𖼖𖽔𖾐 𖼰𖽡𖽦 𖼣𖽙𖾐 𖼖𖽙𖾐 𖼮𖽑𖽻𖾐 𖼻𖽙 𖼐𖽑𖽡 𖼽𖽚𖾐 𖼍𖽺𖾑 𖼽𖽚𖾐． 28 𖼊𖽑𖽡 𖼽𖽚𖾐 𖼣𖽙𖾐 𖼊𖽑𖽺 𖼰𖽡𖾑 𖼦𖽑𖽙𖾐，𖼽𖽻 𖼊𖽑𖽺 𖼐𖽑𖽡𖾑 𖼳𖽶𖾐 𖼮𖽑𖽢𖾑 𖼰𖽸𖾐 𖼮𖽑𖽡𖽦 𖼦𖽑𖽙𖾐 𖼖𖽡𖾐 𖼷𖽻，𖽃𖽔𖾑 𖼄𖽳𖾐 𖼖𖽙𖾐 𖼮𖽑𖽡𖾐 𖼖𖽺𖾑 𖼣𖽙𖾐 𖼽𖽻 𖼊𖽑𖽺 𖼄𖽔 𖽂𖽙𖾐 𖼄𖽡𖽻𖾐． 29 𖽃𖽔𖾑 𖼄𖽳𖾐 𖼐𖽑𖽡𖾐 𖼈𖽳𖾐 𖼹𖽦𖾑 𖼣𖽙𖾐 𖼻𖽙 𖼽𖽳𖾐 𖼊𖽑𖽺 𖼦𖽳 𖼂𖽡𖾐 𖼽𖽡𖾐，𖼽𖽻 𖼊𖽑𖽺 𖼦𖽹𖾑 𖼄𖽳𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼈𖽳𖾐 𖼣𖽙𖾐 𖼞𖽜 𖼈𖽪𖾑 𖼷𖽑𖽜𖾑 𖼀𖽑𖽨𖾑 𖼀𖽑𖽨𖾐、 𖼮𖽑𖽧𖾐 𖼮𖽑𖽧𖾐 𖼞𖽪 𖼞𖽪 𖼄𖽙𖾐 𖼳𖽶𖾐 𖼷𖽪𖾐 𖼄𖽡𖾐 𖼞𖽑𖽶𖾐 𖼹𖽺𖾐 𖼽𖽡𖾐 𖼊𖽻𖾐．’
30 𖼣𖽻𖾐 𖼀𖽙 𖼈𖽪𖾑 𖼠𖽻𖾐 𖼐𖽺𖾐 𖼻𖽙 𖼽𖽳𖾐 𖼈𖽪𖾑 𖼠𖽻𖾐 𖼷𖽙𖾐 𖼖𖽙𖾐 𖼊𖽴 𖼺𖽪𖾐 𖼣𖽻𖾐．𖽃𖽔𖾑 𖼄𖽳𖾐 𖼣𖽙𖾐 𖼀𖽑𖽚𖾐 𖼐𖽑𖽡𖾐 𖼮𖽜𖾐 𖼀𖽑𖽙 𖼣𖽻𖾐 𖼀𖽙 𖼞𖽳𖾐 𖼮𖽑𖽡𖾐，𖼻𖽙 𖼽𖽳𖾐 𖼣𖽙𖾐 𖼈𖽳𖾐 𖼖𖽙𖾐 𖼄𖽔 𖼮𖽑𖽻𖾐 𖼊𖽑𖽡𖾑 𖼣𖽻𖾐， 31 𖼽𖽻 𖼻𖽙 𖼽𖽳𖾐 𖼊𖽑𖽺 𖼄𖽔 𖼄𖽡𖽻𖾐 𖼺𖽺𖾑，𖼷𖽑𖽜𖾑 𖼷𖽑𖽜𖾐 𖼳𖽶𖾐 𖼦𖽑𖽙𖾐 𖼊𖽻𖾐．𖼦𖽑𖽺𖾑 𖼻𖽻𖾐，𖼣𖽙𖾐 𖼈𖽳𖾐 𖼣𖽻𖾐 𖼀𖽙 𖼞𖽜 𖼈𖽪𖾑 𖼷𖽑𖽜𖾑 𖼀𖽑𖽨𖾑 𖼀𖽑𖽨𖾐、 𖼮𖽑𖽧𖾐 𖼮𖽑𖽧𖾐 𖼞𖽪 𖼞𖽪 𖼄𖽙𖾐 𖼳𖽶𖾐 𖼷𖽪𖾐 𖼄𖽡𖾐 𖼞𖽑𖽶𖾐 𖼹𖽺𖾐 𖼽𖽡𖾐 𖼊𖽻𖾐． 32 𖼞𖽪𖾐 𖼮𖽡𖽺𖾐， 𖼣𖽙𖾐 𖼐𖽑𖽳𖾐 𖼄𖽻 𖼽𖽳𖾐 𖼖𖽙𖾐 𖼀𖽙𖾐 𖼄𖽡𖽻 𖼮𖽑𖽻 𖼀𖽶 𖼮𖽙𖾐，𖼽𖽻 𖼞𖽜 𖼺𖽙𖾑 𖼺𖽙𖾐 𖼮𖽻𖾐 𖼊𖽻𖾐．𖼣𖽙𖾐 𖼣𖽻𖾐 𖼀𖽙 𖼖𖽙𖾐 𖼀𖽦𖾐 𖼠𖽚，𖼣𖽙𖾐 𖼐𖽑𖽳𖾐 𖼄𖽻 𖼽𖽳𖾐 𖼊𖽑𖽺 𖼄𖽔 𖼦𖽳 𖼞𖽚 𖼽𖽡𖾐 𖼽𖽻 𖼞𖽜 𖼊𖽑𖽡𖾑 𖼣𖽻𖾐，𖼣𖽙𖾐 𖼊𖽑𖽡 𖼻𖽳𖾐 𖼽𖽺𖾐 𖼮𖽑𖽡𖽪𖾑 𖼀𖽶 𖼊𖽻𖾐．